هه‌فته‌ی‌ تۆقاندن له‌هه‌ولێر

dddddd

پۆلیس بێده‌نگه‌، تۆڕه‌ كۆمه‌ڵایه‌تیه‌كان پڕن له‌توڕه‌بون‌و نوێنه‌رایه‌تی‌ وڵاتانیش ئاگادارده‌كرێنه‌وه‌.

ئاواره‌ حه‌مید

هه‌فته‌ی‌ رابردوو، چه‌ندین هێرش‌و په‌لاماردران‌و رفاندن له‌شاری‌ هه‌ولێر ئه‌نجامدران بۆ سه‌ر پیاوانی‌ ئاینی‌‌و پزیشكان‌و چالاكانی‌ مه‌ده‌نی‌‌و میدیاكاران، ئه‌وه‌ش هاوكاته‌ له‌گه‌ڵ به‌رزكردنه‌وه‌ی‌ ده‌نگی‌ ناڕه‌زایی ئه‌و توێژانه‌ له‌سه‌ر سیستمی‌ پاشكه‌وتنی‌ موچه‌ له‌لایه‌ن حكومه‌ته‌وه‌.

حكومه‌ت جۆرێك له‌بێده‌نگی‌ هه‌ڵبژاردوه‌ سه‌باره‌ت به‌و روداوانه‌، به‌ڵام تۆڕه‌ كۆمه‌ڵایه‌تیه‌كانی‌ ئینته‌رنێت پڕبون له‌توڕه‌یی خه‌ڵك، لیژنه‌ی‌ مافی مرۆڤی‌ په‌رله‌مانیش ده‌ڵێت سه‌رجه‌م نوێنه‌رایه‌تی‌ وڵاتانیان له‌و روداوانه‌ ئاگاداركردۆته‌وه‌.

هه‌فته‌ی‌ رابردوو هێرشكرایه‌ سه‌ر تیمێكی‌ كه‌ناڵی‌ knnی‌ سه‌ر به‌گۆڕان، چالاكێكی‌ كۆمه‌ڵگه‌ی‌ مه‌ده‌نیش رفێنرا به‌ڵام دوای‌ لێدان ئازادكرا، دواتر ته‌قه‌ له‌ماڵی‌ مامۆستایه‌كی‌ ئاینی‌ كرا، هه‌روه‌ها دكتۆرێك له‌ناو نه‌خۆشخانه‌ هێرشیكرایه‌سه‌ر‌و بریندار كرا.

هه‌ینی‌ رابردوش، له‌ناو مزگه‌وتێك هێرشكرایه‌ سه‌ر مامۆستایه‌كی‌ ئاینی‌‌و هه‌وڵی‌ سوتاندنی‌ ریشی‌ درا، كوڕێكی‌ مامۆستاكه‌ برینداركراو له‌چه‌ند نوێژخوێنێكیش درا.

ئه‌و روداوانه‌ هاوكاتن له‌گه‌ڵ به‌رزكردنه‌وه‌ی‌ ده‌نگی‌ ناڕه‌زایه‌تی‌ سه‌رجه‌م ئه‌و چین‌و توێژانه‌ی‌ هێرشیان كراوه‌ته‌ سه‌ر، ناڕه‌زایه‌تیه‌كانی‌ ئه‌وان به‌هۆی‌ سیستمی‌ نوێی موچه‌كه‌یه‌ كه‌ بۆ هه‌ندێك له‌و توێژانه‌ موچه‌كانیان دابه‌زیوه‌ بۆ خوار نیوه‌.

پاساوی‌ حكومه‌ت بۆ ئه‌و سیستمه‌ ئه‌وه‌یه‌، ناتوانێت موچه‌ بدات به‌هۆی‌ دابه‌زینی‌ نرخی‌ نه‌وته‌وه‌، به‌ڵام زۆرێك له‌موچه‌خۆران بڕوا به‌و قسانه‌ نه‌كه‌ن به‌هۆی‌ ئه‌وه‌ی‌ باس له‌وه‌ده‌كرێـت به‌رپرسانی‌ حزبی به‌ملیار دیناریان بردۆته‌ دره‌وه‌، ئه‌وه‌ش به‌پشتبه‌ستن به‌هه‌ندێك لێدوانی دیبلۆماتێكی‌ پێشوی‌ ئه‌مه‌ریكا له‌عێراق كه‌ له‌ئێستادا له‌هه‌رێم ده‌سته‌ی‌ ده‌سپاكی‌ بۆ ئه‌و دۆسیه‌یه‌ لیژنه‌ی‌ به‌دواداچونی‌ پێكهێناوه‌.

سۆران عومه‌ر، سه‌رۆكی‌ لیژنه‌ی‌ مافه‌كانی‌ مرۆڤ له‌په‌رله‌مانی‌ كوردستان به‌هاولاَتی‌ وت “ئه‌و رواداوانه‌ بۆ تۆقاندنی‌ خه‌ڵكی‌ هه‌ولێره‌و په‌یوه‌ندییان به‌دۆخی‌ سیاسیه‌وه‌ هه‌یه‌، هه‌موو نوێنه‌رایه‌تی‌ ولاَتیانمان له‌و مه‌ترسیانه‌ ئاگاداركردۆته‌وه‌”.

ئه‌و رودانه‌وانه‌ی‌ شاری‌ هه‌ولێر له‌تۆڕی‌ كۆمه‌لاَیه‌تی‌ فه‌یسبوك ده‌نگدانه‌وه‌ی‌ لێكه‌وته‌وه‌، به‌جۆرێك سه‌باری‌ نیگه‌رانی‌ هه‌ندێك سلێمانی‌‌و هه‌ولێر وه‌ك كۆریای‌ باكوری‌‌و باشور ده‌شوبهێنن، یه‌كێك نوسیویه‌تی‌ هه‌ولێر به‌ته‌نیا پێویستی‌ به‌رێكخراوێكی‌ مرۆڤ دۆسته‌، ئه‌مه‌ش وه‌ك ئه‌وه‌ی‌ به‌رده‌وام له‌و شاره‌ پێشێلكاری‌ هه‌یه‌.

پۆلیسی هه‌ولێر هیچ رونكردنه‌وه‌یه‌كی‌ له‌سه‌ر روداوه‌كان نه‌داوه‌، جگه‌ له‌رودانی‌ هێرشكردنه‌ سه‌ر مه‌لا نادر كانی‌ كورده‌یی وتاربێژی‌ مزگه‌وتی‌ قادر خۆشناو، ئه‌وه‌ش دوای‌ ئه‌وه‌ هات كه‌ مه‌لای‌ ئه‌و مزگه‌وته‌ له‌رێگه‌ی‌ كه‌ناڵه‌ ته‌له‌فزیۆنیه‌كانه‌وه‌ روداوه‌كه‌ی‌ گێڕایه‌وه‌.

دوێنێ‌ شه‌ممه‌، نه‌قیب هۆگر عه‌زیز به‌ڕێوه‌به‌ری ڕاگه‌یاندنی پۆلیسی هه‌ولێر له‌ڕونكردنه‌وه‌یه‌كدا رایگه‌یاند “هه‌ركاتێك مامۆستا مه‌لا نادر كانی كورده‌یی، سكاڵای یاسایی تۆماركرد په‌ڕاوی لێكۆڵینه‌وه‌ بۆ روداوه‌كه‌ ده‌كه‌ینه‌وه‌و رێوشوێنی پێویستی یاسایی ده‌گرینه‌به‌ر”.

له‌رونكردنه‌وه‌كه‌دا باسی روداوه‌كانی‌ تری شاری هه‌ولێر ناكات.

نادر كانی‌ كورده‌یی‌، وتاربێژی‌ مه‌زگه‌وتی‌ مه‌لا قادر خۆشناو دوای‌ رونكردنه‌وه‌كه‌ی‌ پۆلیس بۆ هاولاَتی‌ ئاماژه‌ی‌ به‌وه‌دا، ئه‌وانه‌ی‌ هێرشیان كرده‌ سه‌ریان یه‌كێكیان ناوی‌ سیانی‌ خۆی‌ وتوه‌و به‌به‌رێوه‌به‌ری‌ ئاسایشی‌ ئه‌و گه‌ڕه‌كه‌ خۆی‌ ناساندوه‌ كه‌ مزگه‌وته‌كه‌ی‌ لێیه‌.

هه‌روه‌ها وتیشی‌ “ئه‌وان هێرشیان كرده‌ سه‌رمان‌و یه‌كێك چه‌رخێكی‌ پێبوو هه‌وڵی‌ سوتاندنی‌ ریشی‌ دام‌و كه‌مێك له‌ریشی‌ سوتاندم”.

هاوڵاتی‌ سه‌باره‌ت به‌روداوه‌كانی‌ تری رفاندن‌و په‌لاماردان بۆ چه‌ندینجار په‌یوه‌ندیكرد به‌هه‌ریه‌ك له‌به‌ڕێوه‌به‌ری‌ پۆلیسی‌ هه‌ولێرو وته‌بێژی پۆلیسه‌وه‌، به‌لاَم هیچكمیان ولاَمی‌ په‌یوه‌ندیه‌كانیان نه‌دایه‌وه‌.

ده‌سته‌ی‌ مافی‌ مرۆڤ له‌هه‌رێمی‌ كوردستان له‌به‌یاننامه‌یه‌كدا له‌سه‌ر ئه‌و روداوانه‌ی‌ شاری هه‌ولێر نیگه‌رانی‌ خۆی‌ پیشانداوه‌و ئیدانه‌ی‌ ده‌كات، به‌ڵام له‌گه‌ڵ ئه‌وه‌شدا هیچ كه‌سێك ده‌ستگیرنه‌كراوه‌ به‌تۆمه‌تی‌ ئه‌نجامدانی‌ ئه‌و كارانه‌.

دوای‌ ئه‌و روداوانه‌، وه‌زاره‌تی‌ ئه‌وقاف‌و مامۆستایانی‌ ئاینی‌‌و رێكخراوه‌ ئاینیه‌كانی‌ سه‌ر به‌حزبه‌ ئیسلامیه‌كان له‌گه‌ڵ پێنج فراكسیۆنی‌ په‌رله‌مان (گۆڕان، یه‌كێتی‌، یه‌كگرتوو، كۆمه‌ڵ‌و بزوتنه‌وه‌) نیگه‌رانی‌ خۆیان ده‌ربڕی‌، داوا به‌سزاگه‌یاندنی‌ بكه‌رانی‌ ئه‌و رواداوانه‌یان كرد.

هێرش‌و په‌لاماره‌كانی‌ هه‌ولێر له‌هه‌فته‌ی‌ رابردودا

له‌ 16ی‌ ئه‌م مانگه‌ هێرشكرایه‌ سه‌ر دكتۆر عه‌باس ره‌باتی‌، پزیشكی‌ پسپۆڕی‌ مندالاَن‌و مامۆستای‌ هه‌ولێری‌ پزیشكی‌ له‌كاتی‌ ده‌وامی‌ ئاسایی‌ خۆی‌، سه‌رباری‌ ئه‌وه‌ی‌ وه‌زاره‌تی‌ ته‌ندروستی‌ رونكردنه‌وه‌یه‌كی‌ بلاَوكرده‌وه‌و له‌گه‌ڵ ئیدانه‌كردن‌و كاركردن له‌سه‌ر دۆسیه‌كه‌ له‌سه‌ر ئاستی‌ وه‌زیری‌ ته‌ندروستی‌‌و ناوخۆ بۆ ده‌ستگیركردنی‌ تۆمه‌تباران، به‌لاَم تائێستا هیچ كه‌سێك له‌سه‌ر هێرشكردنه‌ سه‌ر ئه‌و دكتۆره‌ ده‌ستگیر نه‌كراوه‌.

هه‌روه‌ها له‌كاتی‌ روماڵكردنی‌ خۆپیشاندان‌و مانگرتنه‌كان له‌لایه‌ن تیمی‌ كه‌ناڵی‌ كه‌ی‌ ئێن ئێنی‌ سه‌ر به‌ بزوتنه‌وه‌ی‌ گۆڕان له‌هه‌ولێرو مه‌خمور، له‌ناو په‌خشی‌ راسته‌وخۆدا هێرشكرایه‌ سه‌ر تیمی‌ كه‌ناڵه‌كه‌، له‌ماوه‌ی‌ كه‌متر له‌هه‌فته‌یه‌كدا ئه‌و كه‌ناڵه‌ روبه‌ڕوی‌ دوو هێرش بویه‌وه‌.

رۆژێك دوای‌ ئه‌و روداوه‌، واته‌ 17ی‌ ئه‌م مانگه‌ كامه‌ران سه‌رسپی‌ چالاكی‌ كۆمه‌ڵگه‌ی‌ مه‌ده‌نی‌ له‌گه‌ڕه‌كی‌ هه‌ڤالاَنی‌ شاری‌ هه‌ولێر كاتێك له‌ماڵه‌كه‌ی‌ خۆی‌ دێته‌ ده‌ره‌وه‌ ده‌ڕفێنرێت، دوای‌ سێ كاتژمێر له‌لێدان‌و جنێو پێدان دواتر له‌گۆڕستانی‌ شێخ ئه‌حمد هه‌ر له‌ناو شاری‌ هه‌ولێر فڕێدودرێت.

رۆژێكی‌ نه‌كه‌وته‌ نێوان هه‌ر بۆ شه‌وه‌كه‌ی‌ ته‌قه‌ به‌سه‌ر ماڵی‌ مامۆستایه‌كی‌ ئاینی‌ كرا به‌ناوی‌ مه‌لا فه‌تاح ناوبه‌رگه‌ی‌‌و هیچ كه‌سێك به‌وهۆیه‌وه‌ ده‌ستگیرنه‌كراوه‌.

له‌ 19ی‌ ئه‌م مانگه‌شدا، دوای‌ نوێژی‌ هه‌ینی‌ له‌مزگه‌وتی‌ مه‌لا قادر خۆشناو چه‌ند چه‌كدارێك چونه‌ته‌ ناو مزگه‌وت، هه‌وڵی‌ لێدان‌و سوتاندنی‌ ریشی‌ مامۆستا نادر كانی‌ كورده‌یی‌ دراوه‌.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *