هاوڵاتى
له‌ ئیسته‌نبووڵ کۆنفرانسى رۆژنامه‌وانیى پارێزه‌رانى عه‌بدوڵڵا ئۆجه‌لان، رێبه‌رى زیندانیکراوى پارتى کرێکارانى کوردستان( په‌که‌که‌) به‌ڕێوه‌چوو په‌یامى ئۆجه‌لان خوێندرایه‌وه‌ که‌ تێیدا داواى کۆتاییهێنان به‌ مانگرتنى لایه‌نگرانى ده‌کات.

پارێزه‌رانى ئۆجه‌لان رایانگه‌یاند: "به‌ڕێز ئۆجه‌لان سوپاسى مانگرتووانى کردووه‌ و هه‌ڵوێسته‌کانیانى به‌ گرنگ زانیوه‌ و داواده‌کات مانگرتووان کۆتایى به‌ مانگرتن بێنن".

پارێزه‌رانى ئۆجه‌لان  له‌باره‌ى دوایین هه‌ڵوێستى رێبه‌رى زیندانیکراوى په‌که‌که‌ له‌باره‌ى پرۆسه‌ى ئاشتى رایانگه‌یاند: "به‌ڕێز ئۆجه‌لان هیواى وایه‌ به‌ ئاشتى کێشه‌کان چاره‌سه‌ر بێت".

رۆژى 22ى ئایارى 2019 عه‌بدوڵا ئۆجه‌لان سه‌رۆکى زیندانیکراوى پارتى کرێکارانى کوردستان(په‌که‌که‌)  له‌نامه‌یه‌کدا که‌داویه‌تى به‌ پارێزه‌ره‌کانى داواى له‌ زیندانیکراوان و لایه‌نگرانى کردووه‌ ده‌ستبه‌ردارى مانگرتن ببن.

بۆ لابردنى زیندانى تاکه‌که‌سى و رێگه‌نه‌دان به‌ سه‌ردانى عه‌بدوڵا ئۆجه‌لان  لایه‌نگرانى هه‌ده‌په‌ و ئه‌ندامانى په‌رله‌مان ده‌ستیان به‌مانگرتن کردو سه‌رقافڵه‌که‌یان که‌ لایلاگۆڤه‌ن بوو 200 رۆژ به‌رده‌وام بوو له‌مانگرتن و دواى په‌یامه‌که‌ى ئۆجه‌لان ده‌ستبه‌ردارى بوو.
زیاتر له‌ پێنج هه‌زار که‌س له‌زیندانه‌کانى تورکیا و ناوخۆى ئه‌و وڵاته‌و هه‌رێمى کوردستانیش ده‌ستیان به‌مانگرتن کردبوو.