ئامادەكردنی: محمد فاتح حامد

- ڕێكەوتن لەسەر ڕادەستكردنی نەوتی هەرێمی كوردستان بە حكومەتی عێراقی هەنگاوێكی گرنگە بۆ پتەوكردنی سەقامگیری ئابوری و سیاسی لەعێراقدا.

- ناكۆكی دارایی نێوان حكومەتی ناوەندی و حكومەتی هەرێمی كوردستان كەمدەكاتەوە و وەبەرهێنانی ناوخۆیی و دەرەكی زیاتر دەبێت.

- ئەم هەنگاوە دەبێتە هۆی كەمبونەوەی گەندەڵی و متمانەی هاوڵاتیان بە حكومەت زیاتر دەكات.

ئەنوار خەفاجی مافناسی عێراقی ئەو خاڵە ئەرێنیانە بۆ هاوڵاتی ئاشكرا دەكات ئەگەر بێتو داهاتی نەوتی كوردستان ڕادەستی حكومەتی عێراق بكرێت.

ئەنوار خەفاجی تایبەت بە هاوڵاتی ڕاگەیاند ڕێكەوتن لەسەر ڕادەستكردنی نەوتی هەرێمی كوردستان بە حكومەتی عێراقی هەنگاوێكی گرنگە بۆ پتەوكردنی سەقامگیری ئابوری و سیاسی لەعێراقدا.

وتیشی: ڕادەستكردنی داهاتی نەوتی هەرێم دەبێتە هۆی دروستبونی یەك بودجەی بەهێز و دەرئەنجام ئابوری وڵات بەهێز دەكات، هەروەها ناكۆكی دارایی نێوان حكومەتی ناوەندی و حكومەتی هەرێمی كوردستان كەمدەكاتەوە و وەبەرهێنانی ناوخۆیی و دەرەكی زیاتر دەبێت.

ڕونیشیكردەوە: ئەم هەنگاوە دەبێتە هۆی كەمبونەوەی گەندەڵی و متمانەی هاوڵاتیان بە حكومەت زیاتر دەكات و دڵنیایی زیاتر بە وەبەرهێنەرە نێودەوڵەتیەكان دەدات و ڕێگە خۆشكەر دەبێت بۆ زیادبونی وەبەرهێنانی بیانی و چالاكبونی بواری ئابوری وڵات.

باسی لەوەشكرد ئەگەر ئەو ڕێكەوتنە نەوتیە لەنێوان هەرێم و بەغدا بكرێت ئابوری نێوان هەرێمی كوردستان و ناوچەكانی دیكەی عێراق پتەوتر دەبێت و سەرچاوەكانی بەشێوەیەكی دادپەروەرانەتر داەبەشدەكرێت و هاوڵاتیانی پارێزگاكانی عێراق هەست بە دادپەروەری و يەكسانی دەكەن.

لە كۆتایی قسەكانیدا بۆ هاوڵاتی مافناسی عێراقی ئەنوار خەفاجی وتی: یەكخستنی هەناردەكردنی نەوت لەنێوان هەرێمی كوردستان و حكومەتی ناوەندی پێگەی عێراق بەهێز دەكات بۆ دانوستاندن لەگەڵ كۆمپانیا نێودەوڵەتیەكانی و لایەنەكانی دیكەی بازاڕی نەوت.