هاوڵاتی

- شه‌ڕڤانانی هه‌سه‌ده‌ ڕۆڵی بەردەوام و گرنگ دەگێڕێن لە ڕێگریکردن لە سەرهەڵدانەوەی داعش.

- ئێمە بەردەوامین لە پەیوەندی زۆر لە نزیکەوە لەگەڵ هێزه‌كانی سوریای دیموكرات.

- هێزه‌كانی سوریای دیموكرات وەک هاوبەشێکی گرنگی واشنتن دەمێنێتەوە.

جەنەڕاڵ پات ڕیدەر وته‌بێژی وه‌زاره‌تی به‌رگری ئه‌مریكا (پنتاگۆن) ڕایگەیاند هێزه‌كانی سوریای دیموكرات (هه‌سه‌ده‌) وەک هاوبەشێکی گرنگی واشنتن دەمێنێتەوە.

جەنەڕاڵ پات ڕیدەر، له‌ كۆنگره‌یه‌كی رۆژنامه‌وانیدا له‌باره‌ی دۆخی سوریاوه‌، ڕایگه‌یاند، "تورکیا هاوپەیمانێکی زۆر بەنرخی ناتۆیە و بەردەوامین لە هێشتنەوەی هێڵەکانی پەیوەندیکردن بە کراوەیی بەوپێیەی پەیوەندی بە دۆخی سوریاوە هەیە، وەک چۆن پەیوەندی بە بەرژەوەندییە ئەمنییەکانی ناوچەکەوە هەیە وەک داعش، من هیچ شتێکم نییە لەڕوی هیچ گۆڕانکارییەک لە هەڵوێستی هێزی ئەمریکا یان چۆنێتی نزیکبونەوەمان لە ئەرکی شکستی داعش، بەڵام دڵنیام کە بەردەوام دەبین لە ئەنجامدانی ئەو گفتوگۆیانە لەگەڵ تورکیا و هاوبەشە ناوچەییەکانی دیکە لەسەر ئەم بابەتە".

له‌باره‌ی وته‌كه‌ی هاكان فیدان، وەزیری دەرەوەی تورکیا كه‌ وتی، "ده‌بێت هێزه‌كانی سوریای دیموكرات و یه‌په‌گه‌ چه‌ك دابنێن و ڕاده‌ستی سوپای سوریای بكه‌ن یان سوریا به‌جێبهێڵن"، وته‌بێژی پێنتاگۆن ده‌ڵێت، "هیچ کۆمێنتێکم نییە لەسەر وته‌كانی وەزیری دەرەوەی توركیا بیخەمەڕوو، ئەوەی من دەیڵێم ئەوەیە کە هه‌سه‌ده‌ وەک هاوبەشێکی گرنگ دەمێنێتەوە، پێموایە گرنگە لەبیرمان بێت کە داعش توانای چیی هەیە، وەک لە ڕابردودا بینیمان و هەمومان بەرژەوەندییەکی تایبەتمان هەیە بۆ دڵنیابون لەوەی کە ناتوانن سەرهەڵبده‌نەوە".

ئاماژه‌ی به‌وه‌شكردوه‌، "ئێمە لەگەڵ هاوتا تورکەکانمان و ئەوانی دیکە لە ناوچەکە قسە دەکەین وەک ئەوەی پەیوەندی بەو تەحەددایانە هەیە کە پەیوەندییان بە داعشەوە هەیە، هەروەها شه‌ڕڤانانی هه‌سه‌ده‌ ڕۆڵی بەردەوام و گرنگ دەگێڕێن لە ڕێگریکردن لە سەرهەڵدانەوەی داعش، بۆیە ئێمە بەردەوام دەبین لە ئەنجامدانی ئەو گفتوگۆیانە".

ئه‌وه‌شی خسته‌ڕوو، "ناچمە ناو سیاسەتی ناوخۆیی سوریاوە جگە لەوەی بڵێم، دیسانەوە، ئێمە دان بەوەدا دەنێین کە دۆخی ئێستا لە سوریا ناسکە، بەتایبەتی کە دوای ڕوخانی ڕژێمی ئەسەد، هێزەکانی ئەمریکا ساڵانێکە لە نزیکەوە لەگەڵ هێزه‌كانی سوریای دیموكرات (هه‌سه‌ده‌) كارده‌كه‌ین لەسەر ئەرکی شکستی داعش و ئەوەش بەردەوامە لە گرنگیدانمان".

له‌باره‌ی پێشنیاری مه‌زڵوم كۆبانێ، فه‌رمانده‌ی گشتی هه‌سه‌ده‌ بۆ ناوچه‌یه‌كی داماڵڕاو له‌ چه‌ك له‌ كۆبانێ، وته‌بێژی پنتاگۆن وتی، "ئێمە بەردەوامین لە پەیوەندی زۆر لە نزیکەوە لەگەڵ هێزه‌كانی سوریای دیموكرات وەک هاوبەشی شکستی داعش، بەڵام لە ئێستادا هیچ گۆڕانكاریه‌كی نوێ نییە لە ڕوی گۆڕینی ئەرکەوە".