هاوڵاتی

- لەمڕۆ بەدواوە هیچ ستەمێك لە كورد ناكرێت و بەشێك دەبێت لە داهاتوی سوریا.

- کورد بەشێکە لە نیشتمانەکەمان و وەکو ئێمە روبەڕوی زوڵمی زۆر بونەتەوە.

- لەگەڵ کورد پێکەوە دەژین و هەمومان بەپێی یاسا مافی خۆمان وەردەگرین.

ئەحمەد شەرع سەرۆكی ڕێكخراوی تەحریر شام ڕایگەیاند كورد بەشێكە لەگەلی سوریا و لەمڕۆ بەدواوە هیچ ستەمێك لە كورد ناكرێت و بەشێك دەبێت لە داهاتوی سوریا.

ئەحمەد شەرع له گرتە ڤیدیۆییەکدا کە لە تۆڕە کۆمەڵایەتییەکان بڵاوبوتەوە رایگەیاند، "کورد بەشێکە لە نیشتمانەکەمان و وەکو ئێمە روبەڕوی زوڵمی زۆر بونەتەوە".

ئاماژەی بەوەشکرد، "بەروخانی دەسەڵاتەكەی بەشار ئەسەد، ئەو زوڵمەی توشیان بوو نامێنێت و پشتیوان بە خودا لە سوریای داهاتوو، کورد بەشێكی سەرەکی دەبێت و بەپێی یاسا مافی خۆیان وەردەگرن".

باسی لەوەشكرد، "لەگەڵ کورد پێکەوە دەژین و هەمومان بەپێی یاسا مافی خۆمان وەردەگرین، لەمڕۆوە هیچ زوڵمێک لە کورد ناکرێت مێژوی نوێ و دەرگایەکی نوێ دەکەینەوە".

ئەوەشی خستەڕو، كار بۆ ئەوە دەكەن ئاوارە كوردەكانی عەفرین و ناوچەكانی دیكە بۆ زێدی ڕەسەنی خۆیان بگەڕێنینەوە.