ئامادەكردنی: محمد فاتح حامد

- ئەوەی كورد بتوانێت لە سوریا بەدەستی بهێنێت ئیدارەیەكی ناوخۆییە بەپێی یاسای 107ی تایبەت بە بەرفراوانكردنی دەسەڵاتی ئیدارە ناوخۆیەكان لە سوریا.

- بەهۆی چەندین بەربەستەوە ناتوانرێت حكومەتێكی یەكگرتوو لە سوریا پێكبهێنرێت.

شرۆڤەكاری سیاسی فەرید سەعد لە قامیشلۆی سوریاوە بۆ هاوڵاتی ڕاگەیاند توركيا و حكومەتی نوێی سوریا هەرگیز نایەڵن كورد ببێتە خاوەن هەرێمی خۆی لەو وڵاتە.

فەرید سەعد تایبەت بۆ هاوڵاتی قسەی كرد و وتی: دامەزراندنی هەرێمێكی تایبەت بە كورد لە سوریا ئەستەمە، بەچەندین هۆكار دیارترینیان ڤیتۆی توركیا و ڕەتكردنەوەی ئەم هەرێمە لەلایەن حكومەتی نوێی سوریا چ هاوپەیمانی بێت یان گرووپەكان.

رونیشیكردەوە ئەوەی كورد بتوانێت لە سوریا بەدەستی بهێنێت ئیدارەیەكی ناوخۆییە بەپێی یاسای 107ی تایبەت بە بەرفراوانكردنی دەسەڵاتی ئیدارە ناوخۆیەكان لە سوریا.

سەبارەت بە بارودۆخی گشتی سوریا وتى: ناڕوونە و هیچ ئاماژەیەك نییە بۆ دەرخستنی پاشەڕۆ ژی سوریا، بەهۆی چەندین بەربەستەوە ناتوانرێت حكومەتێكی یەكگرتوو لە سوریا پێكبهێنرێت، چونكە گرووپەكان و حزبەكان لە شوێن و سەرچاوەی جیاواز و دژ بەیەكەوە سەریانهەڵداوە و بەرژەوەندیەكانیان جیاوازە و سەر بە چەند مەرجەعێكی نێودەوڵەتی و هەرێمین و بەرژەوەندیان هەیە لە سوریا و لە ڕێگای ئەو گرووپ و حزبانەوە هەوڵی بەدەستهێنانی ئەو بەرژەوەندیانە دەدەن.