ژینەر ستار فاتیح

لە فەلسەفەی مێژوودا، گەلێک کە فێری وانەکان نەبێت، مەحکوومە بە دووبارەکردنەوەیان. کورد تەنیا نەتەوەیەکە کە "تاقیکردنەوەکانی مێژوو" بە شکۆوە ئەنجام دەدات؛ بەڵام هەموو جارێک لە "ئەنجامەکان"دا دەدۆڕێت. با بە ڕاشکاوی بپرسین: بۆچی؟

ئێمە گەلێکین لە "قوربانیدان"دا زۆر دەوڵەمەندین، بەڵام لە "بەرهەمهێنان"دا هەژارین. بۆچی وانە لە مێژوو وەرناگرین؟ چونکە ئێمە تەنیا لە کاتی "تەنگانە"دا دەبینە کورد؛ کەچی لە کاتی ئاشتیدا، هەموو وزەی خۆمان خەرج دەکەین بۆ سڕینەوەی یەکتری. مێژوو ڕەحم بەو گەلە ناکات کە خوێنی ڕۆڵەکانی بۆ ئازادی دەڕێژێت، بەڵام ئازادییەکەی دەداتە دەست داگیرکەر بۆ ئەوەی حوکمی برایەکەی پێ بکات؛ ئەمە گەورەترین پارادۆکسی مێژووییە کە تێیدا دەژین.

کورد گەلێکی "عاتیفی"یە، نەک "ستراتیژی". ئێمە بە وتارێکی گەرم، بە شیعرێکی حەماسی، یان بە بەڵێنێکی سەرپێیی وڵاتێک زوو باوەڕ دەکەین و هەموو هێلکەکانمان دەخەینە ناو یەک سەبەتەوە. سیاسەتی نێودەوڵەتی بە "فرمێسك" بەڕێوە ناچێت، بەڵکوو بە "ژمارە" و "بەرژەوەندی"یە؛ ئێمە هەمیشە بە دڵ مامەڵەمان لەگەڵ دەوروبەرێک کردووە کە تەنیا بە مێشک و بەرژەوەندی بیر دەکەنەوە.

ئێمە هەمیشە وەک منداڵێکی ساویلکە متمانەمان بەو "دۆستانە" کردووە کە تەنیا بۆ بەرژەوەندیی کاتی هاتوونەتە ناو ماڵمان. کێشەی کورد ئەوەیە کە "ستراتیژیی دۆستایەتی" نییە. دۆست لای ئێمە ئەوەیە کە چەکمان بداتێ، بەڵام لە ڕاستیدا دۆست لە سیاسەتدا ئەوەیە کە بەرژەوەندییەکانی بە تۆوە گرێ درابێت. کاتێک دۆستەکانمان پشتمان تێدەکەن، ئەوە نیشانەی ناپاکی ئەوان نییە، بەڵکوو نیشانەی "هەژاریی سیاسی" ئێمەیە کە نەمانتوانیوە بەرژەوەندییەکانی ئەوان بە جۆرێک بە خۆمانەوە ببەستینەوە کە نەتوانن جێمان بهێڵن.

زوڵم لێکردن بۆ کورد بووەتە جۆرێک لە "ئارامیی دەروونی". ئێمە فێربووین هەموو شکستەکانمان بخەینە ئەستۆی "داگیرکەر، بێگانە و مێژوو"؛ ئەمەش وای کردووە کە پڕۆسەی "ڕەخنە لە خۆگرتن" پەک بکەوێت. کاتێک تۆ دەڵێیت: "هەمووان پشتمان تێدەکەن"، تۆ بەرپرسیارێتی لە ئەستۆی خۆت لادەبەیت. قووڵایی کێشەکە لێرەدایە: ئێمە وانە لە مێژوو وەرناگرین، چونکە هەمیشە خەتاکە دەخەینە ئەستۆی "مامۆستاکە" (مێژوو)، نەک "قوتابییە تەمەڵەکە" (خۆمان).
ئەم گەلە کاتێک ڕزگاری دەبێت کە چیتر نەپرسێت: "بۆچی هەمووان پشتمان تێدەکەن؟"، بەڵکوو بپرسێت: "چۆن وا بکەین کەس نەتوانێت بێ ئێمە بڕیار بدات؟".

هەتا ئەو کاتەی "شکست" لای ئێمە تەنیا شیعر و شیوەنی لێ بەرهەم بێت، مێژوو هەمان لاپەڕەمان بۆ دەخوێنێتەوە. کاتێک شکست بووە "هەوێنی گۆڕانکاری"، ئەو کاتە مێژوو ناچار دەبێت کڕنۆش بۆ ئیرادەی ئەم گەلە ببات.