هاوڵاتی

بەشێک لە خاوەنپێداویستیەکان وەک ناڕەزاییەک لە خراپی دۆخی ژیانیان، ئەمڕۆ دووشەممە لە سلێمانی سفرەیەکی نانخواردنیان سوتاند و ڕایانگەیاند، سەرباری بوونی خێر و بێرێکی زۆر و زەوەندە لە هەرێمی کوردستان، بەڵام خاوەنپێداویستییە تایبەتەکان لە گوزەرانێکی زۆر نالەباردا ژیان بەسەر دەبەن.

نوێنەری خاوەنپێداویستییە تایبەتەکان لە بەردەم دەزگاکانی ڕاگەیاندندا ئاماژەی بەوەکرد، هەموو مانگێک گرفت و کێشە بۆ خاوەنپێداویستییە تایبەتەکان دروست دەکرێت و چەندین جار دەدرێنەوە بە لیژنە بۆ دیاریکردنی ڕێژەی کەمئەندامییەکانیان.

ئاماژەی بەوەشکرد، ئەوان ناڕەزایی دەردەبڕن لە دەسەڵاتێک کە ڕۆژانە ژیان و گوزەرانی کەمئەندامان دەکات بە دۆزەخ.

ڕوونیشیکردەوە، بەم مانگی رەمەزانە خاوەنپێداویستییە تایبەتەکان برسین و گیرفانیان بە تاڵە و وەک پێویست نان نییە بیخۆن و ئەوەی کە ماوە تەنها ئەوەیە کە زیندوون.

ئەوەش لە کاتێکدایە تا ئێستا چەند جارێک خاوەنپێداویستییە تایبەتەکان گردبوونەتەوە و نالەباری و خراپی دۆخی ژیان گەیاندووەتە بەرپرسان و پەرلەمان، بەڵام وەک خۆیان دەڵێن هیچ وەڵامێکی ئەرێنییان نەدراوەتەوە بۆ باشترکردنی گوزەرانیان.