هاوڵاتی

وتەبێژى حکومەتى هەرێم رایگەیاند،  بڕیاربوو هەفتەى پێشو حکومەتى ناوەندى 700 ملیار دینار بۆ هەرێم بنێرێت، بەڵام جارێکی دیکە پێچەوانەی هەموو لێدوان و قسەو باسی ناو کۆبوونەوەکان و ڕێککەوتنەکان ناردنی پارەکە دواکەوت.

پێشه‌وا هه‌ورامانی ‎وته‌بێژی حكومه‌تی هه‌رێم له‌ راگه‌یه‌ندراوێكدا بڵاویكرده‌وه‌، "بڕیار وابو هه‌فته‌ی پێشو بڕی 700 ملیار دیناری ‎موچه‌ی فه‌رمانبه‌رانی هه‌رێمی كوردستان بنێردرێت و ده‌ست به‌ دابه‌شكردنی موچه‌ بكه‌ین، به‌ڵام جارێكی دیكه‌ پێچه‌وانه‌ی هه‌مو لێدوان و قسه‌و باسی ناو كۆبونه‌وه‌كان و ڕێككه‌وتنه‌كان ناردنی پاره‌كه‌ دواكه‌وت".

دەشڵێت: ئەم هەفتەیە شاندی هەرێم دەچنەوە بەغداو ڕۆژی سێ شەممە، حکومەتی فیدراڵ کۆبوونەوەی هەیە، دەمانەوێت کە بڕیارێکی کۆتایی و ڕیشەیی لەم بارەیەوە بدرێت و فەرمانبەرانی هەرێمی کوردستان نەخرێنەوە ناڕەحەتی و سەختی.

ئەوەشی ڕونکردەوە، "‎له‌ ماوه‌ی ڕابردو نیه‌تی ڕونی حكومه‌تی هه‌رێم نیشاندرا بۆ ڕێككه‌وتن و گه‌یشتنه‌ ئه‌نجام له‌گه‌ڵ حكومه‌تی فیدڕاڵ، هیچ شتێك له‌سه‌ر ئێمه‌ نه‌ماوه‌ كه‌ ئه‌نجامیبده‌ین، به‌ڵام ئه‌گه‌ر دۆخه‌كه‌ به‌مجۆره‌ به‌رده‌وامبێت ، له‌به‌رانبه‌ر پێشێلكردنی مافی ده‌ستوری خه‌ڵكی هه‌رێمی كوردستان ناتوانین بێ ده‌نگ بین".