هاوڵاتی

ئاسایش دەستگیرکردنی تۆمەتبارێکی ڕاگەیاند و دەڵێت ئەو تۆمەتبارە بازرگانى ماددەى هۆشبەر بوە و لە زیندانى پۆلیسى خانەقین هەڵاتوە.

بەپێى ئەو راگەیەنراوەى دەزگاى ئاسایشى هەرێم بڵاویکردوەتەوە: دوای ئەوەی هێزە ئەمنییەکانی شاری خانەقین زانیاریان پێداین لەسەر هەڵهاتنی تۆمەتبارێک بەناوی (ح،خ،م) لە زیندانی پۆلیسی خانەقین، لەسەر فەرمانی دادوەری لێکۆڵینەوە، هێزەکانی ئاسایش دوای بەدەستخستنی زانیاری ورد و بەدواداچون توانرا شوێنی خۆحەشاردانی تۆمەتبار دەستنیشان بکرێت.

ئاماژە بۆ ئەوەشکراوە کە  بەکەمتر لە (24) کاتژمێر دوای روبەڕوبونەوە لەگەڵ هێزەکانیان توانراوە تۆمەتبارەکە بە برینداری دەستگیربکرێت.

ئاسایشى هەرێم دەشڵێت: لە ئێستادا تۆمەتبار لەسەر فەرمانی دادوەر راگیراوە و پاش تەواوبونی ڕێکارە یاساییەکان، ڕادەستی لایەنی پەیوەندیدار دەکرێتەوە.