هاوڵاتی

لقی سلێمانی بانکی ناوەندیی هەرێم لە رونکردنەوەیەکدا رایگەیاند، هیچ بڕە پارەیەک بەناوی موچەی فەرمانبەران یان پارەی گەنمی جوتیاران راستەوخۆ لە بەغداوە بۆ سلێمانی نەهاتوە و ئۆتۆمبێلەکە پەیوەندیی بە بانکی ناوەندیی هەرێم / سلێمانیـیەوە نییە.

لە روونکردنەوەکەدا کە ئەمشەو بانکی ناوەندیی هەرێم  بڵاوی کردووەتەوە، دەڵێ "لە چەند پەیج و دەزگایەکی راگەیاندن هەواڵێک دەربارەی وەرگەڕانی ئۆتۆمبێلێکی گواستنەوەی پارە لە ناوچەی چیمەنی سەر بەپارێزگای کەرکووک بڵاوکراوەتەوە، کە ئەو ئۆتۆمبێلە پارەی لە بەغداوە بۆ بانکی ناوەندی هەرێم / سلێمانی گواستووەتەوە.''

بانکەکە ڕونیکردۆتەوە  "بۆ ڕای گشتی و سەرجەم راگەیاندنەکانی روون دەکەینەوە؛ هیچ بڕە پارەیەک بەناوی مووچەی فەرمانبەران یان پارەی گەنمی جووتیاران راستەوخۆ لە بەغداوە بۆ سلێمانی نەهاتووە و ئەو ئۆتۆمبێلەی باس کراوە، هیچ پەیوەندییەکی بە بانکی ناوەندیی هەرێم / سلێمانیەوە نییە."

ئێوارەی ئەمڕۆ، لە کەرکووک  دوو ئۆتۆمبێلی گوللـە نەبڕ و زرێپۆش کە تایبەت بوون بە گواستنەوەی پارە لە بانکەکانی نێوان سلێمانی و کەرکووک، لە سلێمانییەوە بە ئاراستەی کەرکووک دەهاتن  لە بازگەی چیمەن توشی ڕوداوی هاتوچۆ بوون.بە گوێرەی زانیارییەکان دوای کەمتر لە کاتژمێرێک لە رووداوەکە، دوو ئۆتۆمبێلی دیکەی گوللـەنەبڕ هاتوون و پارەکانیان گواستوونەتەوە ئۆتۆمبێلەکانی دیکە لە رێوشوێنێکی ئەمنیی تووندا.