چیتان هێشتووە تا بیڕوخێنن؟
.jfif)
10 مانگ لەمەوپێش
سەرتیپ جەوهەر
گوتاری ئەمجارەی لایەنە سیاسیەكان بەتایبەتیش هەردوو حزبی دەسەڵات، خراپترین گوتارە لەماوەی 30 ساڵی رابردوو. هەموو قسەو پەیامی هەردوولا لە یەك دێڕدا كۆبۆتەوە؛ یەكێتیی دەڵێت: دەیڕوخێنین، پارتیش دەڵێت: ناتانن!
یەكێتیی كە دەستەبژێرە حوكمڕانەكەی لەماوەی 12 ساڵی رابردوو لە هەرچی خراپەكاریی و بڕیاری چەوتی ئەم حوكمڕانیەدا هەیە، بەشدار بووە و پاسەوان و پارسەنگ و پشتیوانیی پارتیی بووە و تا هەفتەی رابردووش لەكۆبونەوەی ئەنجومەنی وەزیران بوون، كەچی دەڵێن دەیڕوخێنین؟! ئاخر چی دەڕوخێنن، چیتان بەسەرچییەوە هێشتووە تا بیڕوخێنن؟! ئێوە خۆتان بەشێكبوون لەم بارودۆخە و هەرچی هەیە بەرهەمی شەراكەتی ئێوە و پارتییە لەم حكومڕانیەدا.
پارتیش كە بەرپرسی هەرچی نەهامەتیی و قوڕبەسەری ئەم میللەتەیە و قوڕگی ئەم میللەتەیان گرتووە و خەریكە هەناسەی لێدەبڕن و دەستیان گرتووە بەسەر ژیان و قووتی خەڵكی كوردستاندا، لە گوتار و پەیامەكانیاندا هیچیان پێ نییە تەنها دەڵێن خۆڕاگربن!
هیچ كام لەو دوو حزبە تائێستا باسیان لەشەفافكردنی نەوت و گێڕانەوەی موچەی خوراوی فەرمانبەران و كەمكردنەوەی باج و رسومات و نرخی ئاو و كارەبا و ئەو پرس و بابەتانە نەكردووە كە راستەوخۆ پەیوەندییان بە ژیانی بەخەڵكەوە هەیە، بەڵكو هەردوولا دەیانەوێ بەجوڵاندنی سۆزی لایەنگران و موچەخۆرانیان و تۆخكردنەوەی ململانێ و دەمارگیریی تەسكی حزبیی و بگرە تێكدانی میزاجی كۆمەڵایەتیی خەڵك سەرقاڵ بكەن، بۆ ئەو مەبەستە لەمیدیاكان و تۆڕی كۆمەڵایەتییەوە سوكایەتیش بەیەكتر دەكەن.
لەم هەڵبژاردنەدا، لەپارتی و یەكێتیی هەژارتر و بێكەستر نییە. راست و چەپ دەستیان داوەتە ترساندن و تۆقاندنی خەڵك بۆ رۆژی هەڵبژاردن، تەنانەت كارمەند و كرێكاری كۆمپانیاكانیشیان تەنگاو كردوون و بەزۆر ناچاریان كردوون و هەڕەشەی نانبڕین و دەركردنیان لێدەكەن تا بانگەشە بۆ حزبەكانیان بكەن، هاوكات كارتی دەنگدانیشیان لێوەردەگرن و ناچاریان دەكەن تا لەهەڵبژاردن دەنگ بەوان بدەن.
ئاخر حزبێك (وەك دەگوترێت) ئەو هەموو شانامە و شانازییەی رابردووی هەبێت، ئێستا حاڵی گەیشتبێتە ئەوەی بە هەڕەشە و نانبڕین خەڵك ناچار بکات دەنگی پێ بدەن، تۆ بڵێی ئێستا لەچ بارودۆخێكدا بێت؟ بۆ پرسیار لەخۆیان ناكەن زۆر لەوان جەبەرووتترو فیلەتەنتر هەبوو لەماوەی شەو و رۆژێكدا مێژوو هەڵیگێڕانەوە، تۆ بڵێی ئەمانەی ئێرە چاوەڕێی چی بكەن؟
