هاوڵاتی

دەرسیم داغ تەمەنی ٢٢ ساڵە و لەسەر لیستى هەدەپە لەشارى ئامەد لە باکووری کوردستان بۆ پەرلەمان هەڵبژێردرا، بەوەش بوو بە یەکێک لە گەنجترین پەرلەمانتارەکانى پەرلەمانى تورکیا.

دوای سەرکەوتی بۆ پەرلەمان دەرسیم وتی «ئێمە بە گەنجی دەستمان پێکرد و بە گەنجیش سەردەکەوین»، دەشمەوێت لە پەرلەماندا ببمە دەنگ و ڕەنگی گەنجان».

دەرسیم داغ، بەهۆی بنەماڵەکەی کە لەناو تێکۆشانی ئازادیی کوردا بوون، خواستی سیاسی و نیشتیمانپەری هەیە. کاتێک دەرسیم داغ لە قۆناغی سەرەتایی خوێندویەتی، دەیویست لەداهاتوودا ببێتە دەروونناس، دواتر لە قۆناغی ئامادەیدا دەیویست ببێت بە رۆژنامەنووس، دواجار بڕیاریدا لە بەشی زمان و کلتوری کوردی درێژە بەخوێندن بدات.

بەو شێوەیە دەرسیم داغ لە بەشی وێژە و زمانی کوردی لە زانکۆی ئارتوکلو لە مێردین خوێندنی تەواو کرد، ئەو کاتەی کە لە زانکۆ بوو، بەشێوەیەکی چالاک پەیوەست بە کاری سیاسی بوو.

دەرسیم داغ لەو بڕوایەدایە گەنجان هێزی بنەڕەتیی زانست و پێشکەوتنن، بۆیە دەبێت ببنە خاوەنی مافی ڕادەربڕین. بەو بیرو بڕوایەوە، بڕیاریدا لەناو هەدەپەدا جێ بگرێت و پەیوەست بە کاری سیاسیی ببێت.

دەرسیم بە وتەی «ئێمە بە گەنجی دەستمان پێکرد و بە گەنجیش سەردەکەوین»، دەیەوێت لە پەرلەماندا ببێتە دەنگ و ڕەنگی گەنجان.