هاوڵاتی

سەرۆکایەتی هەرێمی کوردستان ڕایگەیاند سه‌رۆكى هه‌رێمى كوردستان و باڵيۆزى قه‌ته‌ر لە عێراق كۆبوونه‌وه‌‏ و جەختیان لە رەخساندنی زەمینە بۆ وەبەرهێنانی قەتەری لە هەرێمی کوردستان و عێراق کردووەتەوە و تاوتوێی کردنەوەی کۆنسوڵخانەی قەتەریان لە هەولێر کردووە.

بەپێی ڕاگەیەندراوێکی سەرۆکایەتیی هەرێمی کوردستان  نيوه‌ڕۆى رۆژی سێشه‌ممه 13ی ئەیلوولی 2022 نێچيرڤان بارزانى، سه‌رۆكى هه‌رێمى ‏كوردستان پێشوازیی له‌ خالید بن حه‌مه‌د ئه‌لسلێتى، باڵيۆزى قه‌ته‌ر له‌ عێراق كرد و تاوتوێی چەند پرسێکیان کرد.

له‌ كۆبوونه‌وه‌کەدا، وەکو سەرۆکایەتیی هەرێمی کوردستان دەڵێت، ‌په‌يوندييه‌كانى عێراق و هه‌رێمى كوردستان له‌گه‌ڵ قه‌ته‌ر، دۆخى ‏سياسيى عێراق و دوايين پێشهاته‌كانى، هه‌وڵه‌كانى كردنه‌وه‌ى كۆنسوڵخانه‌ى گشتيى ‏قه‌ته‌ر له‌ هه‌ولێر له‌ داهاتوودا، ده‌رفه‌ته‌كانى وه‌به‌رهێنانى قه‌ته‌رى له‌ هه‌رێمى ‏كوردستان و ئاماده‌كارييه‌كانى قه‌ته‌ر بۆ مۆنديالى جيهانى 2022 تاوتوێ كران.‏

هەروەها هه‌ردوولا جه‌ختيان له‌ خواستى قه‌ته‌ر و هه‌رێمى كوردستان بۆ بره‌ودانى زياتر به‌ ‏په‌يوه‌ندييه‌كان و هاريكاریی هاوبه‌شى نێوانيان و ره‌خساندنى زه‌مينه‌ى له‌بار بۆ ‏وه‌به‌رهێنانى قه‌ته‌رى له‌ كه‌رت و بواره‌ جياجیاكاندا له‌ هه‌رێمى كوردستان و عێراق ‏كرده‌وه‌، هه‌روه‌ها باسيان لە گرنگيى گه‌شتی راسته‌وخۆى هێڵى ئاسمانيى قه‌ته‌رى‌ ‏بۆ عێراق و هه‌رێمى كوردستان كردووە.‏

گرنگيى ئارامى و سه‌قامگيريى سياسيى عێراق بۆ ته‌واوى ناوچه‌كه‌، په‌يوه‌ندييه‌كانى عێراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه و چه‌ند پرسێكى ‏ديكه‌ى جێى بايه‌خى هاوبه‌ش، چەند ته‌وه‌رێكى ديكه‌ى كۆبوونه‌وه‌كه‌ بوو‌ن.