هاوڵاتی

سەنتەری میترۆ، لە یادی ڕۆژنامەگەریی کوردیدا، لە ڕاگەیاندراوێکدا داوا لە حکومەتی هەرێم دەکات، سەرلەنوێ لێكۆڵینەوە لە دۆسییەی تیرۆركردنی ڕۆژنامەنوسان ‌و سوتانی كەناڵەكان بكاتەوە، هەروەها گەرەنتی بدات لە پاراستنی گیانی ڕۆژنامەنوسان لەكاتی کارکردندا.

ئەمڕۆ 125 ساڵ بەسەر دەركردنی یەكەم رۆژنامەی كوردیدا تێپەڕدەبێت، سەنتەری میترۆ بەوبۆنەیەوە لە پەیامێكدا دەڵێت:"بەبۆنەی دەرچونی یەکەم رۆژنامە بە زمانی کوردی،  جەژنی رۆژنامەگەریی کوردی لە رۆژنامەنوسانی کوردستان پیرۆز بێت و سەری رێز نەویدەکەین بۆ شەهیدانی رۆژنامەگەری."

هەر لە ڕاگەیانراوەکەی سەنتەری میترۆدا هاتووە، لە هەرێمی كوردستان ئازادیی كاری ڕۆژنامەنوسی‌ و مافی زانیاریی بە یاسای ڕۆژنامەگەریی “ژمارە (٣٥) ی ساڵی ٢٠٠٧” ‌و یاسای مافی دەستكەوتنی زانیاری “ژمارە (١١)ی ساڵی ٢٠١٣” پارێزراون، بەڵام بەردەوام لە گرژییە سیاسییەكاندا و لە ڕۆژانی تریشدا، ڕۆژنامەنووسان ڕووبەڕووی هەڕەشە، هەراسانكردن، لێدان، گرتن، و توندوتیژیی جۆراوجۆر دەبنەوە و بكەرانیش لە سزادان دەربازیان بووە.

ئەوەش هاتووە تێیدا: یاسای ڕۆژنامەگەریی “ژمارە (٣٥)ی ساڵی ٢٠٠٧” دەبوو ببێتە بنەما بۆ مامەڵەكردنی هێزە ئەمنییەكان، بەرپرسە حزبییەكان و دادگاكان لەگەڵ ڕۆژنامەنوسان دا، بەڵام بەیاسای تر و بە بێ فەرمانی دادوەر رۆژنامەنووسان دەستبەسەر دەکەن .

سەنتەری میترۆ پێی وایە، تا ئێستا ویستێكی سیاسی ئامادە نییە بۆ ئەوەی هەرێمی كوردستان ببێتە مەشخەڵی دیموكراسی لە ناوچەكەدا، ڕۆژنامەنوسانیش بێ ترس لە تۆڵەكردنەوە كارەكانیان ئەنجامبدەن.

هەروەها داواشی حكومەتی هەرێمی كوردستان كردوە "سەرلەنوێ بەقوڵی لێكۆڵینەوە لەو هێرشانەی سەر رۆژنامەنوسان بكات، كە بەچارەسەرنەكراوی ماونەتەوە، سەرلەنوێ لێكۆڵینەوە لە دۆسییەی تیرۆركردنی رۆژنامەنوسان‌و سوتانی كەناڵەكان بكاتەوە، هەروەها گەرەنتی بدات لە پاراستنی سەلامەتیی گیانی رۆژنامەنوسان لەكاتی ئامادەكردنی راپۆرتەكانیاندا لەسەر مەسەلەكانی گەندەڵی‌و خراپ بەكارهێنانی دەسەڵات."