-سبەینێ‌ شاندی یەكێتی بە نوێنەرایەتی قوباد تاڵەبانی و ڕێواز فایق و شاندی پارتی لە دەباشان كۆدەبنەوە. - تەوەری سەرەكی كۆبوونەوەكە گفتوگۆكردنە لەسەر پێكهێنانی كابینەی نوێی حكومەتی هەرێمی كوردستان. ئامادەکردنی: هاوڵاتی بڕیارە سبەینێ‌ شەممە هەردوو شاندی یەكێتی نیشتیمانی كوردستان و پارتی دیموكراتی كوردستان كۆببنەوە. پەیامنێری هاوڵاتی ئاشكرای كرد سبەینێ‌ شاندی یەكێتی بە نوێنەرایەتی قوباد تاڵەبانی و ڕێواز فایق و شاندی پارتی لە دەباشان كۆدەبنەوە. تەوەری سەرەكی كۆبوونەوەكە گفتوگۆكردنە لەسەر یەكەم دانیشتنی پەرلەمانی كوردستان و پێكهێنانی كابینەی نوێی حكومەتی هەرێمی كوردستان. دوێنێ‌ سەعدی ئەحمەد پیرە وتەبێژی یەکێتی نیشتیمانی کوردستان بەدەنگی ئەمریكای ڕاگەیاند، پێم وایە دوای دانیشتنی پەرلەمانی هەرێم یەکێتی و پارتی بەیەکەوە کۆدەبنەوە. دوای ئەوەی نێچیرڤان بارزانی سەرۆكی هەرێمی كوردستان رۆژی یەكەم دانیشتنی پەرلەمانی دەستنیشان كرد، شاندی پارتی و یەكێتی لە 27ی ئەم مانگەوە دەستیان بە سەردانەكانیان كرد بۆ لای لایەنەكانی دیكە بەمەبەستی گفتوگۆكردن بۆ پێكهێنانی كابینەی 10ی حكومەتی هەرێمی كوردستان.  

  - ئاسمان بەگشتی ساماڵ بێت لەگەڵ هەندێك پەڵە هەور. - پلەکانی گەرما كەمێك بەرزتر دەبێت.   به‌ڕێوه‌به‌رایه‌تی كه‌شناسی و بومه‌له‌رزه‌زانی هه‌رێمی كوردستان پێشبینیكرد ئه‌مڕۆ ئاسمان بەگشتی ساماڵ بێت لەگەڵ هەندێك پەڵە هەور و پلەکانی گەرما كەمێك بەرزتر بێت، سبه‌ینێش خێراىی با لەسەرخۆ و مامناوەند دەبێت و له‌ نێوان 10 بۆ 20 كیلۆمه‌تر ده‌بێت له‌كاتژمێرێكدا. به‌ڕێوه‌به‌رایه‌تیەكە بڵاویكرده‌وه‌، ئه‌مڕۆ هه‌ینی ئاسمان بەگشتی ساماڵ دەبێت لەگەڵ هەندێك پەڵە هەور و پلەکانی گەرما كەمێك بەرزتر دەبێت لە تۆمارکراوەکانى دوێنێ. ئاماژه‌ی به‌وه‌شكردوه‌، خێرایی با لەسەرخۆ و مامناوەند دەبێت و له‌ نێوان 10 بۆ 20 كیلۆمه‌تر ده‌بێت له‌كاتژمێرێكدا، ئاڕاستەی با باکوری خۆرئاوا دەبێت. كه‌شناسی ده‌ڵێت، سبه‌ی شه‌ممه‌ ئاسمان لە نێوان ساماڵ و پەڵە هەور دەبێت، لەگەڵ دروستبونی كەمێك تەم لە هەندێك ناوچە لە كاتەكانی بەیانیدا و پلەکانی گەرما بە نزیكەی 1 تا 3 پلە بەرزتر دەبێت بەراورد بە تۆمارکراوەکانى ئەمڕۆ.   بەرزترین پلەکانی گەرمای پێشبینیکراو بە پلەی سیلیزی: هەولێر  : 14 پلەى سیلیزى سلێمانی: 13 پلەى سیلیزى دهۆک : 13  پلەى سیلیزى کەرکوک : 16 پلەى سیلیزى هەڵەبجە: 13 پلەى سیلیزى زاخۆ: 14 پلەى سیلیزى حاجی ئۆمەران : 6 پلەى سیلیزى سۆران :  14  پلەى سیلیزى گەرمیان:   18 پلەى سیلیزى  

  - ئێران: هێرشی گروپە چەکدارەکان بۆسەر ریفی حەلەب و ئیدلیب پێشێلکردنی رێکەوتنی ئەستانەیە. - روسيا: لە هێرشەکەی چەکدارانی بەرەی نوسرە له سوريا لانی کەم ٤٠٠ چەکدار بە هاوکاری هێزی ئاسمانی روسیا کوژراون.   دوای ماوەیەی چەند ساڵێک لە ئاگربەستی ناچاری رانەگەیەنراو لە نێوان لایەنە ناکۆکەکانی سوریا، جارێکی تر شەڕ و پێکدادانی خوێناوی دەستی پێکردەوە و چەکدارەکانی بەرەی نوسرە و تەحریر شام و هاوپەیمانەکانی هێرشیان کردە سەر شارەکانی حەلەب و ئیدلیب و سوپای سوریاش دەڵێت لانی کەم ٤٠٠ چەکداریان کوشتووە. لەوبارەیەوە جێگری سەرۆکی سەنتەری ئاشتی روسیا لە سوریا ئۆلیگ ئاکناسیوک لە کۆنگرەیەکی رۆژنامەنوسیدا رایگەیاند: لە هێرشەکەی چەکدارانی بەرەی نوسرە بۆ سەر ئەو ناوچانەی لە ژێر کۆنترۆڵی حکومەتی سوریادان لانی کەم ٤٠٠ چەکدار بە هاوکاری هێزی ئاسمانی روسیا کوژراون. بەپێی زانیارییەکانیش لەماوەی ٢٤ کاتژمێردا چەکدارەکانی بەرەی نوسرە ١٣ هێرشیان کردۆتە سەر سوپای سوریا ١٢ هێرشیان بۆ سەر شاری ئیدلیب و هێرشێکیش بۆ سەر شاری حەلەب بووە و لەو هێرشانەدا چەکدارەکانی بەرەی نوسرە زیانی گەورەیان بەرکەوتووە. لای خۆیەوە وتەبێژی وەزارەتی دەرەوەی ئێران ئیسماعیل بەقایی لە کۆنگرەیەکی رۆژنامەنوسیدا دەڵێت: هێرشی گروپە چەکدارەکان بۆسەر ریفی حەلەب و ئیدلیب پێشێلکردنی رێکەوتنی ئەستانەیە و هەرجۆرە دواکەوتنێک لە بەرەنگاربوونەوەیان ناوچەکە دووچاری خولێکی نوێی شەڕ و پێکدادان و ناسەقامگیری دەکاتەوە. وتەبێژی وەزارەتی دەرەوەی ئێران راشیگەیاند: ئەو پەلامارە نوێیە بەشێکە لە پیلانی ئەمریکا و ئیسرائیل بۆ تێکدانی ئاسایش و ئارامی ناوچەکە. هاوکات مەرسەدی سوری دەڵێت چەکدارەکانی تەحریر شام و گروپە چەکدارەکان بە ئامانجی فراوانکردنی ناوچەی دەسەڵاتیان هێرشی فراوانیان دەستپێکردووە و چەندین گوندیان لە دەوروبەری شارەکانی ئیدلیب و حەلەب کۆنتڕۆڵ کردووە، بە گوتەی خۆشیان مەبەستیانە ئامادەکاری بکەن بۆ گەڕانەوەی هاوڵاتیان بۆ ناوچەکانیان. دوای نزیکەی ١٣ ساڵ لە شەڕ و پێکدادانەکانی سوریا و کوژرانی نزیکەی ٥٠٠ هەزار کەس و ئاوارەبوونی ژمارەیەکی زۆری هاوڵاتیان، ئێستا ئەو وڵاتە دابەشبووە بەسەر چوار بەشدا بەشێکی وڵات لە لایەن کوردەوە حوکمڕانی دەکرێت بەشێکی تریشی لەلایەن هێزە جیهادییەکان و بەشێکیش لەلایەن ئەو چەکدارانەوە کۆنترۆڵ کراوە کە تورکیا پشتیوانیان دەکات، بەڵام تا ئێستاش نزیکەی لەسەدا ٧٠ی وڵات لەژێر دەسەڵاتی بەشار ئەسەد دایە کە لەلایەن روسیا و ئێران پشتیوانی تەواوی لێ دەکرێت.  

  - داهاتی ئەم هەفتەیەی سلێمانی زیاتر لە 21 ملیارو 201 ملیۆن و 972 هەزار دینارە. - لەو بڕە 19 ملیارو 842 ملیۆن و 27 هەزار دیناری واتە 94%ی نەختینەیە.   بەگوێرەی ماڵپەڕی شەفافیەت، داهاتی ئەم هەفتەیەی سلێمانی ، زیاتر لە 21 ملیار دینارە كە 94%ی نەختینەیە. بەگوێرەی ماڵپەڕی شەفافیەت بۆ چاودێری و رێكخستنی داهاتە نانەوتییەكانی سلێمانی و هەڵەبجەو هەردوو ئیدارەی راپەڕین و گەرمیان، داهاتی ئەم هەفتەیەی سلێمانی لە 23ی 11 تا 29ی 11ی 2024، زیاتر لە 21 ملیارو 201 ملیۆن و 972 هەزار دینارە. هەر بەگوێرەی ماڵپەڕەكە، لەو بڕە 19 ملیارو 842 ملیۆن و 27 هەزار دیناری واتە 94%ی نەختینەیەو هەروەها 1 ملیارو 359 ملیۆن و 944 هەزار دیناری واتە 6%ی بەشێوەی چەكەو مەقاسە سفرە.  

  - تائێستا بەهۆی شەڕەکەوە لە ناوچەکانی باکووری سووریا زياتر له 400 کەس کوژراون. - هێرشی چەکدارانی گرووپەکانی سەر بە تەحریر شام لە شاری ئیدلب لە رۆژئاوای سووریایەوە بۆ سەر پێگەکانی سوپای سووریا چڕتر بووەتەوە. - چەكدارەكان لە نزیک دەروازەکانی رۆژئاوای شاری حەلەبی دووەم گەورەترین شاری سووریان.   هێرشی چەکدارانی گرووپەکانی سەر بە تەحریر شام لە شاری ئیدلب لە رۆژئاوای سووریایەوە بۆ سەر پێگەکانی سوپای سووریا چڕتر بووەتەوە و رێگەی سەرەکیی دیمەشق بۆ حەلەبیان پچڕاندووە.   ئەبو زوبێر شامی فەرماندەی هێزەکانی تەحریر شام دەڵێت: "دووژمن خەڵکی ئێمەی کردە ئامانج لە ناوچە ئازادکراوەکان و زیانێکی زۆری پێگەیاندن، خەڵکەکەی رووبەڕووی کوشتن و ئاوارەکردن کردەوە، ئێمە لە ئیدارەی ئۆپەراسیۆنە سەربازییەکان، بەرپرسیارێتی هەڵدەگرین لە رووبەڕووبوونەوەی هەموو دووژمنکارییەک و کۆتاییهێنان بەو دەستدرێژییانەی رژێمی تاوانبار دەیکات و پارێزگاریکردن لە خەڵکەکەمان، ئەوەی دووژمن لە هێزەکانمانی بینی، تەنیا سەرەتا بوو".  بەپێی زانیاریەكان ئەو گرووپە جیهادییە لە هێرشەکانیاندا لە 48 کاتژمێری رابردوودا، توانییان پێشڕەوی بەرچاو بکەن و رێگەی سەرەکیی نێوان دیمەشقی پایتەخت و حەلەب لە باکووری سووریا کۆنترۆڵ بکەن و ئێستا ئەوان لە نزیک دەروازەکانی رۆژئاوای شاری حەلەبی دووەم گەورەترین شاری سووریان و تەنیا دوو کیلۆمەتر لە ناوەندی شاری حەلەبەوە دوورن.  لە دوای پێشڕەوییەکانی گرووپە چەکدارەکان، فڕۆکە جەنگییەکانی رووسیا و سووریا 63 هێرشی ئاسمانییان بۆ سەر گوندەکانی هەردوو پارێزگای حەلەب و ئیدلیب کردووە و بەهۆی ئەو بۆردوومانانەشەوە زياتر له 400 كەس كوژراون.  ئەمە گەورەترین شەڕ و ئاڵۆزییە لە ناوچەکانی باکووری رۆژئاوای سووریا، لە ساڵی 2020وە، لەدوای رێککەوتنی تورکیا و رووسیا بۆ ئاگربەست لەو ناوچەیە. رێککەوتنەکە بۆ ئەوە بوو سوپای سووریا هەوڵی کۆنترۆڵکردنەوەی شاری ئیدلیب نەدات کە بە پایتەختی دیفاکتۆی گرووپە چەکدارەکانی نزیک لە تورکیا ناسراوە. شەڕ و پێکدادان سێ رۆژە لەسەر رێگەی نێوان پارێزگای دیمەشق و حەلەبی سووریا لەنێوان گرووپە چەکدارە ئۆپۆزیسیۆنەکان و سوپای حکومەتی سووریا بەردەوامە و بەهۆیەوە هەزاران كەس ئاوارەبوون و نزیكەی 250 كەسیش كوژران. سەرچاوەكانی هەواڵ ئاشكرایان كردووە شەڕەکە لەنێوان هێزی ئۆپۆزیسیۆنی تەحریر شام و هاوپەیمانەکانییەتی دژی به سوپای سووریا هەڵگیرساوە. بەگوێرەی سەرچاوەكان، هێزە ئۆپۆزیسیۆنەکان دەستیان بەسەر چەندین گونددا گرتووە و سوپای وڵاتەکەش بەردەوامە لە بۆردوومانکردنی ئەو ناوچانەی هێزەکانی تێدان.  ڕۆژی چوارشەممە ڕابردوو لە پارێزگای حەلەب شەڕ و پێکدادان لە نێوان چەند گرووپێکی چەکدار و هێزەکانی حکومەتی سووریا درووست بوو. چالاكوانانی حەلەب دەڵێن:  ژووری ئۆپەراسیۆنی فەتح موبین، کە دەستەی تەحریر شام، ئەحرار شام، جەیش عەززە و ژمارەیەک گرووپی دیکە لە خۆدەگرێت شەڕێکی راگەیاندوه و ناوی نا راگرتنی شەڕانگێزی، لەو شەڕەدا ژمارەیەک گوند و ناوچە لە رۆژئاوای حەلەب دەستی بەسەردا گیرا، لەوانە گوندی عەین جارا، عاجل، عوێجل ، قوبتان جەبەل، هۆت، ئۆرم سوخرا و ئۆرم کوبرا.  لەلایەن خۆیەوە سوپای سووریا رایگەیاند، لەگەڵ هێزە هاوپەیمانەکانی رووبەڕووی هێرشەکانی هێزە چەکدارەکان بوونەتەوە و زیانی گەورەیان لێداون.   دوای ئەوەی رژێمی سووریا لە چەند ئۆپەراسیۆنێکدا لە ساڵانی 2018 بۆ 2020  ناوچەكانی رۆژئاوای حەلەبى کۆنترۆڵ کرد، بە هاوکاری لەگەڵ چەکدارانی ئێران، نزیکەی ملیۆنێک کەس كۆچیان كردوو ئاوارەبوون، بەشێکیان لە تورکیا یان وڵاتانی ئەورووپا بوونە پەنابەر و بەشێکیش بوونە ئاوارەی نێوخۆ لە شارە جیاکانی وەکو عەفرین و ئیدلب. ساڵی 2011 جەنگی نێوخۆیی لە سوریا هەڵگیرسا و بووه هۆی ئاوارەبوونی سەدان هەزار کەس و کوژرانی زیاتر لە نیو ملیۆن کەس.  

  - ئێران بەنیازە ئامێری زیاتر دابنێت بۆ پیتاندنی یۆرانیۆم لە هەردوو دامەزراوەی نەتەنز و فۆردۆ. - بەنیازە 1152 ئامێر لە نەتەنز دابنێت بۆ پیتاندنی یۆرانیۆم بە پلەی 5%.   ئاژانسی وزەی ئەتۆم ڕایگەیاند ئێران پلان بۆ بەرفراوانكردنی پیتاندنی یۆرانیۆم لە هەردوو دامەزراوەی نەتەنز و فۆردۆ دادەنێت. رۆژنامەی شەرقولئەوسەت ئاشكرای كرد ڕاپۆڕتێكی نهێنی ئاژانسی نێودەوڵەتی وەزەی ئەتۆم باسی لەوەكردووە كە ئێران بە ئاژانسەكەی وتووە بەنیازە ئامێری زیاتر دابنێت بۆ پیتاندنی یۆرانیۆم لە هەردوو دامەزراوەی نەتەنز و فۆردۆ. ئێران بە ئاژانسەكەی وتووە 8 ئامێری نوێ‌ لە دامەزراوەی فۆردۆ بە پلەی لە 5% دەستدەكەن بە پیتاندنی یۆرانیۆم. راپۆرتەكە رونیكردەوە ئێران بە ئاژانسی ئەتۆمی ڕاگەیاندووە كە بەنیازە 1152 ئامێر لە نەتەنز دابنێت بۆ پیتاندنی یۆرانیۆم بە پلەی 5%.  

  -سه‌باره‌ت كردنه‌وه‌ی لقی هه‌ردو بانكی ڕه‌شید و ڕافیده‌ین له‌ هه‌رێم گه‌یشتنه‌ ئه‌نجام. - كردنه‌وه‌ی لقی بانكه‌كانی ره‌شید و رافده‌ین له‌ هه‌رێمی كوردستان گه‌یشتنه‌ ئه‌نجام.   غه‌ریب ئه‌حمه‌د ئه‌ندامی ئه‌نجومه‌نی نوێنه‌رانی عێراق رایگه‌یاند، هه‌وڵه‌كانی به‌مه‌به‌ستی كردنه‌وه‌ی لقی بانكه‌كانی ره‌شید و رافده‌ین له‌ هه‌رێمی كوردستان گه‌یشتنه‌ ئه‌نجام و له‌مه‌ودوا ئیتر پرسی ته‌وتین هیچ كێشه‌یه‌كی له‌به‌رده‌مدا نامێنێت و ئه‌وان ڕێكاره‌ پێویسته‌كانی جێگیربونیان له‌ سلێمانی جێبه‌جێده‌كه‌ن. غه‌ریب ئه‌حمه‌د له‌ هه‌ژماری تایبه‌تی خۆی له‌تۆڕی كۆمه‌ڵایه‌تی فه‌یسبوك نوسیویه‌تی هه‌وڵه‌كانم سه‌باره‌ت كردنه‌وه‌ی لقی هه‌ردو بانكی ڕه‌شید و ڕافیده‌ین له‌ هه‌رێم گه‌یشتنه‌ ئه‌نجام. ئاماژه‌ی به‌وه‌شكردوه‌ دوابه‌دوای نوسراومان به‌ژماره‌ (179) له‌ رۆژی 26ی (تشرینی یه‌كه‌م)ی 2024 كه‌ داوای كردنه‌وه‌ی لقی بانكی ده‌كه‌م له‌ وه‌زاره‌تی دارایی، بانكی ڕه‌شید به‌ نوسراوی (1579) له‌ رۆژی 31ی (تشرینی یه‌كه‌م)ی 2024 وه‌ڵامی نوسراومانی دایه‌وه‌ و ڕه‌زامه‌ندبون به‌ كردنه‌وه‌ی لقی بانكی ڕه‌شید له‌ سلێمانی". ئه‌وه‌شیخستۆته‌ڕو ئیتر پرسی ته‌وتین هیچ كێشه‌یه‌كی له‌به‌رده‌مدا نامێنێت و ئه‌وان ڕێكاره‌ پێویسته‌كانی جێگیربونیان له‌گه‌ڵ حكومه‌تی خۆجێی سلێمانی جێبه‌جێده‌كه‌ن و هاوڵاتیان زۆر به‌باشی لێی سودمه‌ند ده‌بن، ئه‌م ده‌ستكه‌وته‌مان پیرۆزه‌ له‌ كۆمه‌ڵانی خه‌ڵكی كوردستان.

   - پێم وایە دوای دانیشتنی پەرلەمانی هەرێم یەکێتی و پارتی بەیەکەوە کۆدەبنەوە. - بۆ بچین لەگەڵ پارتی دانیشین و زانیاریەکان لە دەستی دوو سێ وەرگرین.   سەعدی ئەحمەد پیرە وتەبێژی یەکێتی نیشتیمانی کوردستان ڕایگەیاند، پێم وایە دوای دانیشتنی پەرلەمانی هەرێم یەکێتی و پارتی بەیەکەوە کۆدەبنەوە. وتەبێژی یەکێتی نیشتیمانی کوردستان بە دەنگی ئەمەریکای ڕاگەیاند ئەم کۆبوونەوانەی یەکێتی دوو ئامانجیان هەیە، یەکەم گرنگە بۆ یەکێتی پێش ئەوەی بچێتە لای پارتی زانیاری دەستی یەکیان لە خۆیانەوە هەبێت و هەڵوێستیان بزانێت، بۆ بچین لەگەڵ پارتی دانیشین و زانیاریەکان لە دەستی دوو سێ وەرگرین. وتیشی دوای کۆبوونەوەی پەرلەمان پێم وایە کۆبوونەوەی نێوان یەکێتی و پارتیش ئەنجام دەدرێت. رونیشیكردەوە یەکێتی دەرگای بۆ سیناریۆ جیاجیاکان کراوەیە بەشێوەیەک حکومەتی هەرێمی کارامان هەبێت وا باشترە تەنانەت داوای لێبوردن لە خەڵکیش بکات و بڵێ لە ڕابردوودا هەڵە کراوە لە پرسی مووچە و ئەمن و تێوەگلانی هەرێم لە شەڕی ئەملاو لا. پێشی وایە یەکێتی وتوویەکی ڕاستکردنەوەی ڕێرەوی حوکمڕانی و تاکرەوی و ئەو بێ متمانەییەی کە لە ئامانجی ئەو تاکڕەویە دروست بووە ئەوە چارەسەر بکرێت، ئەگەر لایەنێك پێی وایە حکومەتەکەی بێ غەل و غەش و کەم و کوڕی بووە مانای وایە گفتوگۆکان دوور دەخاتەوە لە یەکتری. دوای ئەنجامدانی هەڵبژاردنی 20ی مانگی ڕابردوو بۆ پەرلەمانی هەرێمی کوردستان، هەریەکە لە یەکێتی و پارتی سەردانیان بۆلای لایەنە سیاسیەکان دەستپێکردووە. دوێنێ 27ی مانگی 11 وەفدی یەکێتی لە هەولێر بە جیا لەگەڵ هەریەکە لە کۆمەڵی دادگەری و یەکگرتوو کۆبۆوە، هاوکات پارتیش لە سلێمانی لەگەڵ نەوەی نوێ و بزووتنەوەی گۆڕان کۆبۆوە، ئێوارەی ئەمڕۆش وەفدی باڵای یەکێتی بە سەرۆکایەتی قوباد تاڵەبانی سەردانی گۆڕانیان کرد لە شاری سلێمانی. کۆبوونەوەی هەردوولایەنی براوەی یەکەم و دووەم لە هەرێم لەگەڵ لایەنە سیاسیەکان لە کاتێکدایە تا ئێستا یەکێتی و پارتی کۆبوونەوەیان لەبارەی ئەنجامی هەڵبژاردن و پێکهێنانی کابینەی نوێ ئەنجامنەداوە.              سلێمان عەبدوڵا، چاودێری سیاسی بە دەنگی ئەمەریکای ڕاگەیاند،" ئەم هەڵبژاردنە تاکە هەڵبژاردنە کە هیچ لایەنێکی سیاسی نایەوێت ئەنجامەکان ساغ بکاتەوە، لە هەموو حزبەکانی ناو دەسەڵات تا لایەنە ئۆپۆزسیۆنەکان سەرجەمیان، لە بەرژەوەندیاندایە کە ئەنجامی هەڵبژاردن ورد نەکرێنەوە، واتە دۆخی حازر لە بەرژەوەندی هەموو لایەنە سیاسیەکاندایە، بە تایبەت کە لەبەردەم هەڵبژاردنی عێراقداین."   وتیشی،" بە نسبەت پارتیەوە پۆستی سەرۆکی هەرێم و سەرۆکی حکومەت و دامەزراوەی قەزائی لایە، ئەگەر ئەنجامی هەڵبژاردن ورد بکاتەوە چی تر بە دەستدەهێنێت، بۆ یەکەمجارە پارتی دوو دامەزراوەی باڵای لەلایە بێ چاودێری پەرلەمان، بۆ یەکێتیش جێگری سەرۆکی هەرێم دەسەڵاتەکانی سنوری یەکێتی بە کاملی لە دەستی خۆیدایە، بۆیە پێم وایە هەرلایەنێک ئەنجامی هەڵبژاردن ورد بکاتەوە باشتر لەمە دەست ناخات، لایەنە ئۆپۆزسیۆنەکانیش دەزانن بەو ژمارەی کورسیانە ناتوانن پۆستە باڵاکان تاک لایەنە بەدەستبهێنن، بۆیە بە گشتی سەرجەم لایەنەکان ئەم دۆخە لە بەرژەوەندیانە و خواستیانە بەو شێوەیە درێژەی پێبدەن."   ئەمە لە کاتێکدایە دوێنێ 27ی مانگی 11 هەر یەکە لە نەوەی نوێ و بزووتنەوەی گۆڕان بە دەنگی ئەمەریکایان وت،" پێکهێنانی کابینەی نوێ و کاراکردنەوەی پەرلەمان مەبەستی هەردوولایانە."   دەنگی ئەمەریکا بۆ قسەکردن لەگەڵ شاندی پارتی چەند جارێک پەیوەندی کرد بە پشتیوان سادق ئەندامی لیژنەی دانوستکار لەگەڵ لایەنەکان، بەڵام پەیوەندیەکان بەردەست نەبوون، بەڵام بە قسەی وتەبێژی گۆڕان بێت، لە میانی کۆبوونەوەی دوێنێیاندا،" پارتی موکوڕ بووە لەسەر ئەوەی بە زۆۆترین کات کابینەی دە پێکبهێنرێت.   لە میانی بانگەشەی هەڵبژاردندا، لایەنەکان لێدوانی زبریان بەرامبەر یەک بەکار دەهێنا، یەکێتی بەردەوام باسی لە ڕێککردنەوەی ڕێڕەوەی حوکمڕانی دەکرد و باسی لە سیاسەتی تاکڕەوی دەکرد لە هەرێمدا.

- بڕیارە ڕۆژی یەک شەممەی داهاتوو ١/١٢/٢٠٢٤ بڕی ( ٧٦٣ ملیارو ١٤٦ ملیۆن) دینار بخرێتە سەر حسابی حکومەتی هەرێم بۆ مووچەی مانگی (١٠). - ئەگەر بەغدا ئەو پارە زیادەی داواکراوە نەینێرێ، هەرێم بەنیازە بە ٣ پارەی ٧٦٣ ملیاری موچەی مانگی ١٠ و ١١ دابەش بکات. ئامادەکردنی: هاوڵاتی سۆران عومەر ئەندامی لیژنەی ئابوری له پەرلەمانی عێراق ڕایگەیاند ئەگەر کورتهێنان پرنەبێتەوە هەرێم دوو مووچە دابەشدەکات. سۆران عومەر لە لێدوانێكی رۆژنامەوانیدا ڕایگەیاند پاش سەردانی سەرۆکی دادگای فیدراڵی، ئێوارەی ئەمڕۆ نوسراوەکە واژۆکرا، بڕیارە ڕۆژی یەک شەممەی داهاتوو ١/١٢/٢٠٢٤ بڕی ( ٧٦٣ ملیارو ١٤٦ ملیۆن) دینار بخرێتە سەر حسابی حکومەتی هەرێم بۆ مووچەی مانگی (١٠). وتيشى: پێویستە هەرێم لەداهاتی ناوخۆ و نەوت ٢٣٣ ملیار دینار بخاتە سەر ئەو پارەیە چونکە لیستی موچەی بە ٩٩٦ ملیار دینار داناوە. ئاماژەی بەوەشداوە، هەرێم داوای بڕێک پارەی دیکەی لەدارایی عێراق کردووە وەک پشکی هەرێم تاکو مووچەی مانگەکانی ١١ و ١٢ ی پێ دابەش بکات لەگەڵ ئەو دوو ٧٦٣ ملیارەی دیکە، ئەگەر بەغدا ئەو پارە زیادەی داواکراوە نەینێرێ، هەرێم بەنیازە بە ٣ پارەی ٧٦٣ ملیاری موچەی مانگی ١٠ و ١١ دابەش بکات. ئەوەشی ڕوونکردۆتەوە، حکومەتی هەرێم لە ١٠ مانگی ڕابردوودا تەنها ٣٩٥ ملیار دینار داهاتی ناوخۆی بۆ بەغدا گەڕاندۆتەوە، جگە لەوەی نەوتی بەتەنکەر و لەناوخۆ فرۆشتووە.  

- هەڕەشە بەردەوامەكانی رۆژئاوا پاڵ بە ئێرانەوە دەنێت هەنگاو بەرەو دروستكردنی چەكی ئەتۆمی بنێت. - تاران ڕایگەیاند رەنگە هەنگاو بەرەو دروستكردنی چەكی ئەتۆمی بنێت. ئامادەکردنی: هاوڵاتی تاران ڕایگەیاند رەنگە هەنگاو بەرەو دروستكردنی چەكی ئەتۆمی بنێت وەك وەڵامدانەوەیەك بۆ فشارەكانی رۆژئاوا. عەباس عێراقچی وەزیری دەرەوەی ئێران لە لێدوانێكدا بۆ رۆژنامەنووسان ڕایگەیاند هەڕەشە بەردەوامەكانی رۆژئاوا بە دووبارە سەپاندنەوەی سزای نەتەوەیەكگرتوەكان بەسەر ئێراندا پاڵ بە ئێرانەوە دەنێت هەنگاو بەرەو دروستكردنی چەكی ئەتۆمی بنێت. ئەنجومەنی پارێزەرانی ئاژانسی وەزەی ئەتۆم بە زۆرینەی دەنگ بۆ بەرژەوەندی بڕیارێك دەنگیاندا كە بەریتانیا و فەڕەنسا و ئەڵمانیا پێشكەشیان كردبوو باسی لەوە دەكرد كە تاران بە شێوەیەكی باش هاوكاری ئاژانسی وزەی ئەتۆم نەبووە و داوای لە ئێران كرد تاكو بەهاری 2025 ڕاپۆرتێكی گشتگیر لەسەر چالاكیە ئەتۆمیەكانی ئامادە بكات.  

- ئیسرائیل ڕایگەیاند دامەزراوەیەكی ح*ز*ب*و*ڵ*ا*ی لە باشوری لوبنان بۆردومان كردووە. -چەند گومانلێكراویەكمان ناسیوەتەوە كە گەیشتوونەتە هەندێك لە ناوچەكانی باشوری لوبنان و پێشێلی مەرجەكانی ئاگر بەستیان كردووە. ئامادەکردنی: هاوڵاتی ئەمڕۆ پێنجشەممە سوپای ئیسرائیل ڕایگەیاند دامەزراوەیەكی حزبوڵای لە باشوری لوبنان بۆردومان كردووە. سوپای ئیسرائیل لە بەیاننامەیەكدا رایگەیاند پێش ماوەیەكی كەم چالاكیەكمان بەدیكرد لە دامەزراوەیەكدا كە حزبوڵا بەكاری دەهێنێت بۆ كۆگاكردنی مووشەك لە باشوری لوبنان و ئەو هەڕشەیەمان پوچەلكردەوە لە ڕێگای هێزی ئاسمانی ئیسرائیلەوە. وتیشی: چەند گومانلێكراویەكمان ناسیوەتەوە كە گەیشتوونەتە هەندێك لە ناوچەكانی باشوری لوبنان و پێشێلی مەرجەكانی ئاگر بەستیان كردووە، سوپای ئیسرائیلیش تەقەی لێكردوون. دووپاتیشیكردەوە سوپای ئیسرائیل تائیستاش لە باشوری لوبنانە و كار لەسەر پوچەڵكردنەوەی ئەو پێشێلكاریانە دەكات كە دژ بە رێكەوتنی ئاگربەست بكرێت. رۆژی سێشەممە بنیامین نەتەنیاهوو سەرۆك وەزیرانی ئیسرائیل ئاگربەستی لەنێوان ئیسرائیل و لوبنان ڕاگەیاند و وتی: تواناكانی حزبوڵای لوبنان و بەرهەمهێنانی موشەک و هەموو سەرکردەکانی و زۆربەی ژێرخانەکانیمان لەناوبرد.

- چاوه‌ڕێبكرێت بارودۆخی پارێزگاكانی ناوه‌ڕاست و باشور  بۆ به‌رهه‌می به‌نزین باش بێت تاوه‌كو به‌شێك له‌ به‌نزین بۆ هه‌رێم ته‌رخان بكرێت. - دابه‌شكردنی به‌شی هه‌رێمی كوردستان له‌ نه‌وتی سپی كه‌ بڕی 50 ملیۆن لیتره‌. ئامادەکردنی: هاوڵاتی شاندێكی وه‌زاره‌تی سامانه‌ سروشتیه‌كانی هه‌رێم و وه‌زاره‌تی نه‌وتی عێراق، سێ بڕیاری هاوبه‌شیان تایبه‌ت به‌دابینكردنی نه‌وتی سپی و به‌نزین به‌نرخی پاڵپشتیكراو ده‌ركرد. به‌گوێره‌ی راگه‌یه‌ندراوێكی وه‌زاره‌تی سامانه‌ سروشتیه‌كان، ئه‌مڕۆ پێنجشه‌ممه‌ فارس عیسا سه‌رۆكی نوێنه‌رایه‌تی حكومه‌تی هه‌رێم و فه‌لاح مه‌ولود به‌ڕێوه‌به‌ری گشتی وه‌به‌رهێنانی  كانزایی، موحسین ته‌ها راوێژكار له‌ وه‌زاره‌تی سامانه‌ سروشتییه‌كان و سه‌باح سوبحی ئه‌ندامی لیژنه‌ی نه‌وت و غازی ئه‌نجومه‌نی نوێنه‌رانی عێراق، سه‌ردانی وه‌زاره‌تی نه‌وتی فیدراڵیان كرد و له‌لایه‌ن عه‌لی معارج بریكاری وه‌زاتی نه‌وت بۆ كاروباری دابه‌شكردن و وه‌زیر به‌وه‌كاله‌ت پێشوازیان لێكرا. رونیشیكردەوە له‌ كۆبونه‌وه‌كه‌دا باس له‌ سێ بابه‌تی سه‌ره‌كی كرا، ئه‌وانیش دابه‌شكردنی به‌شی هه‌رێمی كوردستان له‌ نه‌وتی سپی كه‌ بڕی 50 ملیۆن لیتره‌، ته‌رخانكردنی به‌شێك له‌ به‌نزینی نۆرماڵ بۆ هه‌رێمی كوردستان، هه‌ژماركردنی لیتری قیاسی نه‌ك قه‌باره‌ی سروشتی بۆ ناردنی به‌شی هه‌رێم له‌ نه‌وتی سپی. ئه‌وه‌شخراوه‌ته‌ڕو له‌ ئه‌نجامدا بڕیاردرا به‌شی هه‌رێم له‌ نه‌وتی سپی ده‌ستبه‌جێ بنێردرێت، هه‌روه‌ها چاوه‌ڕێبكرێت بارودۆخی پارێزگاكانی ناوه‌ڕاست و باشور  بۆ به‌رهه‌می به‌نزین باش بێت تاوه‌كو به‌شێك له‌ به‌نزین بۆ هه‌رێم ته‌رخان بكرێت، سێیه‌میش دیراسه‌كردنی بابه‌تی لیتری قیاسی و قه‌باره‌ی سروشتی له‌ وه‌زاره‌ت تاوه‌كو بڕیاری له‌سه‌ر بدرێت.

- تاوتوێی پەیوەندییەکانی یەکێتی و گۆڕان و ئامادەکارییەکانی قۆناغی پاش هەڵبژاردنی پەرلەمانی کوردستان کرا. - هەردوولا هاوڕا بوون کە پێویستە بەوریاییەوە مامەڵە بکرێت لەگەڵ دۆخی ئێستا و پێویستییەکانی ئەم قۆناغە. ئامادەکردنی: هاوڵاتی یەكێتی و گۆڕان تاوتوێی پەیوەندییەکانيان و دۆخی سیاسی هەرێمی کوردستان بەگشتی دەكەن. بەپێی بەیاننامەیەكی ڕەسمی پاش کۆبوونەوە لەگەڵ یەکگرتووی ئیسلامی و کۆمەڵی دادگەری، وەفدی دانوستانکاری یەکێتیی نیشتمانیی کوردستان بەسەرۆکایەتی قوباد تاڵەبانی، ئەمڕۆ پێنجشەمە لەگەڵ دانای ئەحمەد مەجید رێکخەری گشتیی بزووتنەوەی گۆڕان کۆبوونەوە. لەو کۆبوونەوەیەدا کە لە سلێمانی بەڕێوەچوو، تاوتوێی پەیوەندییەکانی یەکێتی و گۆڕان و دۆخی سیاسی هەرێمی کوردستان بەگشتی و ئامادەکارییەکانی قۆناغی پاش هەڵبژاردنی پەرلەمانی کوردستان کرا. هەردوولا هاوڕا بوون کە پێویستە بەوریاییەوە مامەڵە بکرێت لەگەڵ دۆخی ئێستا و پێویستییەکانی ئەم قۆناغە لەپێناو خزمەتکردنی باشتری هاوڵاتییان.  ئامادەییشیان دەربڕی کە بەیەکەوە کار لەسەر هێنانەکایەی ژینگەیەکی ئارامی سیاسی بکەن لەپێناو گرتنەبەری هەنگاوی کردەیی بۆ باشترکردنی ئاستی گوزەرانی هاوڵاتییان.  

- تاكو ئێستا 3823 لوبنانی كوژراون و 15859 تریش برینداربون. - ئاماری رۆژی دووشەمەی ڕابردوو لەگەڵ جێبەجێكردنی ڕاگرتنی شەڕ گەیشتە 55 كوژراوو 160 بریندار. ئامادەکردنی: هاوڵاتی وەزارەتی تەندروستی لوبنان ڕایگەیاند ژمارەی كوژراوانی هاوڵاتیانی وڵاتەكە بەهۆی هێرشەكانی ئیسرائیلەوە گەیشتووەتە 3823 كەس. وەزارەتەكە لە بەیاننامەیەكدا بڵاویكردەوە لەسەرەتای هێرشەكانی ئیسرائیل بۆ سەر لوبنان تاكو ئێستا 3823 لوبنانی كوژراون و 15859 تریش برینداربون. رونیشیكردەوە ئاماری رۆژی دووشەمەی ڕابردوو لەگەڵ جێبەجێكردنی ڕاگرتنی شەڕ گەیشتە 55 كوژراوو 160 بریندار. لەلایەن خۆیەوە ئاژانسی رۆیتەرز بڵاویكردەوە حزبوڵا 4000 چەكداری كوژراوە لەو هێرشانەی ئیسرائیل بۆ سەر لوبنان. جێگای باسە دوێنێ‌ چوارشەممە ڕاگرتنی شەڕ لەنێوان ئیسرائیل و حزبوڵای لوبنانی جۆیە بواری جێبەجێكردنەوە.

- تاكو ئێستا 3823 لوبنانی كوژراون و 15859 تریش برینداربون. - ئاماری رۆژی دووشەمەی ڕابردوو لەگەڵ جێبەجێكردنی ڕاگرتنی شەڕ گەیشتە 55 كوژراوو 160 بریندار. ئامادەکردنی: هاوڵاتی وەزارەتی تەندروستی لوبنان ڕایگەیاند ژمارەی كوژراوانی هاوڵاتیانی وڵاتەكە بەهۆی هێرشەكانی ئیسرائیلەوە گەیشتووەتە 3823 كەس. وەزارەتەكە لە بەیاننامەیەكدا بڵاویكردەوە لەسەرەتای هێرشەكانی ئیسرائیل بۆ سەر لوبنان تاكو ئێستا 3823 لوبنانی كوژراون و 15859 تریش برینداربون. رونیشیكردەوە ئاماری رۆژی دووشەمەی ڕابردوو لەگەڵ جێبەجێكردنی ڕاگرتنی شەڕ گەیشتە 55 كوژراوو 160 بریندار. لەلایەن خۆیەوە ئاژانسی رۆیتەرز بڵاویكردەوە حزبوڵا 4000 چەكداری كوژراوە لەو هێرشانەی ئیسرائیل بۆ سەر لوبنان. جێگای باسە دوێنێ‌ چوارشەممە ڕاگرتنی شەڕ لەنێوان ئیسرائیل و حزبوڵای لوبنانی جۆیە بواری جێبەجێكردنەوە.