محەمەد هاشم

لە کاتێکدا جیهان بەدەست جەنگ و ئاژاوە سیاسییەکانەوە دەناڵێنێت، هونەر وەک ئاوێنەیەک بۆ نیشاندانی ئەم نەهامەتییانە دەردەکەوێت. بڕیارە ڕۆژی ٢٨ی شوبات، لە شاری گوا لە وڵاتی هیندستان، پێشانگایەکی نێودەوڵەتیی جیاواز لەژێر ناونیشانی (جیهان لە ئاژاوەدا - World in Chaos) بکرێتەوە.

هونەر لە ڕووبەڕووبوونەوەی وێرانکاریدا

ئەم چالاکییە کە لەلایەن هونەرمەند (یۆلەندا دی سۆسە)وە ڕێکخراوە، تەنها ٤٢ هونەرمەندی لە سەرانسەری جیهانەوە هەڵبژاردووە تا لە ڕێگەی وێنەکێشان، پەیکەرسازی، ئەنستەلاسیۆن و گرافیکەوە، وێنای ئەو کوشتار و ناسەقامگیرییە بکەن کە مرۆڤی هاوچەرخی ماندوو کردووە. 

مژاری سەرەکی کارەکان گوزارشتە لەو ئازارانەی کە سنوورە جوگرافییەکان دەبەزێنن و دەبنە زمانێکی هاوبەشی مرۆیی.

ئامادەیی هونەرمەندی کورد (حەمە هاشم) وەک بەشداربوو لەم پێشانگایەدا، گرنگییەکی تایبەتی هەیە. بەشداریی هونەرمەندێکی کورد لە ناو دڵی ئەم نمایشە نێودەوڵەتییەدا، دەرفەتێکە بۆ ئەوەی دیدگایەکی جیاواز لەسەر ئەو نەهامەتی و ئاژاوەیەی جیهانی گرتووەتەوە بگاتە بینەری بیانی، چونکە هونەر باشترین ئامرازە بۆ گوزارشتکردن لەو خەمە گەردونییانەی کە هەمووان تێیدا هاوبەشن.

ئەم نمایشە کە لە گەلەری (دێ بێلاس ئارتێس) لە ئاڕت کەمپەر بەڕێوەدەچێت، سەعات ٧:٣٠ی ئێوارەی ٢٨ی شوبات دەکرێتەوە و بۆ ماوەی دوو مانگی تەواو بە ڕووی سەردانیکەراندا کراوە دەبێت. نمایشەکە بانگەوازێکی بێدەنگە بۆ تێڕامان لەو دۆخە پڕ لە ئاژاوەیەی کە مرۆڤایەتی تێی کەوتووە و هەوڵێکە بۆ دۆزینەوەی مانا لە نێوان ڕەنگ و وێرانکارییەکاندا.