رابوون مه‌عروف
یەکەم: لە هێرشی تیرۆریستەکانی دیمەشقەوە بۆ سەر رۆژاڤا، تا ئێستا، کاك مەسعود، وەك تەوەرەی سیاسەت و بڕیاریی سیاسیی نەتەوەیی کورد دەردەکەوێت. ئەمریکا و ئەوروپا، بە کردەوە، وەك چەق و ناوەندیی بڕیاریی سیاسیی کورد، تەعامول لەگەڵ کاك مەسعود دەکەن. بەڵام لێرەدا کێشە و گرفتێك هەیە!

دووەم: لە گەرمەی ململانێی گۆڕان و پارتی، لەسەر دۆسێی سەرۆکایەتی هەرێم، لە بۆنەیەك بە ئامادەبوونی کاك نەوشیروان، من وتم: ریشە و سەرچاوەی پێگە و کاریگەریی کاك مەسعود، لە باکگراوند و مێژووەکەیدایە و ئەو پێگەیە بە هەمواری قانونیی سەرۆکایەتی هەرێم یان دەستهەڵگرتنی کاك مەسعود لە سەرۆکایەتیی هەرێم کۆتایی نایات. بۆیە، ئەگەر کاك مەسعود سەرۆکایەتیی هەرێم جێبهێڵێت، سەرۆکایەتیی هەرێم، وەك دامەزراوەی نەتەوەیی لاواز دەبێت و چەقی هێز و بڕیاری سیاسی دەچێتە ئەو شوێنەی کاك مەسعود لێیدەگیرسێتەوە. ئەوەش کاریگەریی سلبی لەسەر ئەزموونی حوکمڕانیی دامەزراوەیی مۆدێرن لە کوردستان جێدەهێڵێت. دەبێت ئێمە بە ئاڕاستەی بەهێزکردنی دامەزراوەی نەتەوەیی مۆدێرن بڕۆین، نەك لاوازکردن و نابوتکردنی دامەزراوە شەرعی و نیشتیمانییەکان و بەهێزکردنی دامەزراوەی تەقلیدیی.
 
سێهەم: حوکمڕانیی دامەزراوەیی و قانون، بەرهەمی هۆشیارییەکی باڵا و مۆدێرنە. بە داخەوە، ئەو هۆشیارییە، هەم لە خۆرهەڵاتی ناوەڕاست بە گشتیی و هەم لە کوردستان بە تایبەتی، لاوازە. بەڵام دروستکردن و بنیاتنانی نەتەوە و دەوڵەتی مۆدێرن، بێ دامەزراوە و حوکمڕانیی قانون و دامەزراوەکان، مەحاڵە. بۆیە، ئەگەر خواستێك هەیە، بۆ سازکردنی نەتەوە و دەوڵەت، دەبێت، دوور لە دەمارگیریی حیزبیی و ناوچەگەریی، بەرەو بەهێزکردنیی دامەزراوە نیشتیمانییەکان بڕۆین.
 
چوارەم: ئێستا، وێنە گشتییەکەی سیاسەت و چەقی بڕیاری سیاسی بۆ هەموو کورد بەمجۆرەیە: کاك مەسعود، لە هەولێرەوە وەك چەق و ناوەندێکی نەتەوەیی: ئاپۆ لە ئیمراڵیەوە، بڕیار لەسەر پێگە و ئایندەی باکوور دەدات؛ بافڵ تاڵەبانی، لە سلێمانی و زۆنی سەوز چەق و ناوەندیی بڕیاریی یەکەم و کۆتایی ئەوێیە؛ ژەنراڵ مەزڵوم، خەریکە وەك نوێنەر و ناوەندیی بڕیاریی سیاسیی رۆژاڤا دەردەکەوێت؛ لە ئێستاوە دیارە، رەوشەکە لە خۆرهەڵاتی کوردستانیش هەر بەو جۆرە دەبێت! پرسیار: ئەی کوان دامەزراوە سەروو حیزبییە مۆدێرنە نیشتیمانییە هەڵبژێردراوەکان؟

پێنجەم: دوای سازبوونی جۆرێك حوکمڕانیی لە رۆژاڤا و ناوچەکانی باشووری رۆژاڤا، هەمیشە و بەردەوام، ژەنراڵ مەزڵوم عەبدیی وەك ناوەندیی بڕیاری سیاسیی ئەوێ دەردەکەوێت. بێگومان ژەنراڵ مەزڵوم، شایستەترینی رۆژاڤایە، بەڵام ژەنراڵ، فەرماندەی سوپایەکی سەربازییە، نەك ئیدارە و حوکمڕانیی. ئەی کوا نوێنەرایەتیی ئەو حوکمڕانییەی/ خۆسەرییەی گوایە لە رۆژاڤا هەیە؟! من نایانناسم و دەزانم کەسیش نایانناسن! ئەزانن بۆ؟ چونکە ئەو ئیدارە و خۆسەرییە کارتۆنیە و راستەقینە نیە، بەڵام هێزە سەربازییەکە راستەقینەیە و هەیە، بۆیە ژەنراڵ مەزڵوم دەبێتە نوێنەریی رۆژاڤا. پرسیار:  ئایا کورد دەیەوێت، تەنها سوپایەکی سەربازیی بێت، بۆ جەنگ و شەڕیی چەکداریی، یان هەڵکشێت بۆ ئاستیی نەتەوە و دامەزراوە و حوکمڕانیی نەتەوەیی مۆدێرن؟! کەواتە، کاتێك وەك سوپا و هێزی جەنگی، کۆتایی بە رۆڵەکەت دێت، ئیتر بۆ گلەیی دەکەیت، کە تەنها وەك ئامرازی سەربازیی و جەنگ، دەبینرێیت؟ ئایا خۆت، لەوە زیاترت دەوێت؟ ئەگەر دەتەوێت، ئەی کوا دامەزراوە و ئیدارە راستەقینە نەتەوەییە مۆدێرنەکان؟!

شەشەم: دوای سی و پێنج ساڵ، ئەزموونی حوکمڕانیی باشوور، نەنگییە، تا ئێستا، دامەزراوەی تەشریع و حوکمڕانیی بەهێزی مۆدێرن نەبێت. پەرلەمانەکە بە تەواویی ئیفلیج و لە جوڵە کەوتووە و هیچ نیه‌تێکی راستەقینەش نییە، بۆ سازکردنی پەرلەمانێکی تۆکمە و بەهێز. هەر بۆیە، خەڵکانێك کراونەتە ئەندامی ئەو پەرلەمانە، تەنها لەبەر ئەوەی شەرم ناکەن کە هەمیشە و بەردەوام جوێن بدەن و گاز لە قولەپێی هەمو کەس بگرن. ویستێکی بەهێزیش هەیە، کە حکومەتی هەرێمی کوردستانیش، بە دەردی پەرلەمانەکە ببرێت. 

ئایا بۆ دەبێت، گلەیی بکەین، کە ئەمریکایی و ئەوروپاییەکان وەك نەتەوە نەمانبینن، کاتێك ئێمە خۆمان هیچ ویستێکمان نیە، ببین بە نەتەوە و خاوەن دامەزراوەی حوکمڕانیی بەهێزیی مۆدێرن؟! 

ئێستا کاتی ئەوەیە، کابینەی نوێی حکومەتی هەرێمی کوردستان، پێکبهێنرێت و حکومەت و دامەزراوە نەتەوەییە نیشتیمانییەکان ببن بە تەوەرەی سیاسەت و بڕیاری نەتەوەیی، نەك ناوەندە تەقلیدییەکانی دەرەوەی ئیدارە و حکومەتی هەرێمی کوردستان. هەروەك چۆن، حکومەتی هەرێمی کوردستان، سیمبۆڵی بنیاتنان و ئاوەدانکردنەوەیە، هەر بەو جۆرە، دەبێت تەنها حکومەت و دامەزراوە فەرمیە نەتەوەییەکان، ببن بە تەوەرەی سیاسەت و بڕیاریی نەتەوەیی، نەك دامەزراوەکانی دەرەوەی حکومەت و حوکمڕانیی.