هەسەدە: وەك هێزێكی بنەڕەتی دەمێنینەوە بۆ پارێزگاریكردن لە گەلەكەمان

شاری سلێمانی لە 1784ـدا لەلایەن ئیبراهیم پاشای بابانەوە، بەناوی "سلێمان" پاشای بابان، دامەزرێنەری میرنشینی بابانەوە ناونراوە. ئەمڕۆ فێستیڤاڵێک بە بۆنەی 241ـمین ساڵی بونیادنانی شارى سلێمانی بەڕێوەدەچێت، فێستیڤاڵەکە بە بەشداریى چەندین کەسایەتى و بەرپرسى حکومى بۆ ماوەى دوو رۆژ بەردەوام دەبێت. سلێمانى لە دواى دامەزراندنییەوە، بەردەوام یەکێک بووە لەو شارانەى پێگەیەکى گەورەى لە ڕووداوە سیاسییەکانى باشوورى کوردستاندا هەبووە و دژى حکومەتەکانى ئینگلیز و عێراق وەستاوەتەوە، لەم شارەدا چەندین ڕووداوى مێژوویی وەک خۆپیشاندان و ڕاپەڕین ڕوویانداوە، ئەوەش وایکردووە ئەم شارە پێگەیەکى گرنگ و دیارى لە خەباتى نەتەوەیی گەلى کورد لە باشوورى کوردستان هەبێت، لەم گرافیکەدا بەشێک لە ڕووداوە گرنگەکانتان بۆ باسدەکەین. هاوکات  هەڤأڵ ئەبوبەکر، پارێزگاری سلێمانی لە وڵاتی چینەوە پەیامێکی بە بۆنەی 241هەمین ساڵیادی بونیادنانی شاری سلێمانی بڵاوکردەوە و گوتی، توانیویانە یادى سلێمانى ببەینە شارى ئیوى وڵاتى چین. بەبۆنەى تێپەڕبوونى 241 ساڵ بەسەر بونیادنانى شارى سلێمانى، هەڤاڵ ئەبوبەکر پەیامێکى ڤیدیۆیى بڵاوکردەوە و ڕایگەیاند، توانیویانە ئەمساڵ یادى شارى سلێمانى ببنە شارى ئیوى وڵاتى چین و لێکتێگەیشتنێکى هاوبەشى دوولایەنە واژۆبکەن، بۆ ئەوەى سلێمانى ببێتە هاوتاى شارى ئیو. ئاماژەى بەوەشکرد، جێگەى شانازییە سلێمانى توانیویەتى لەئاستێکى پێشکەوتوو گەشەسەندوودابێت و ئومێد دەکەن هەڵبژاردنى ئەنجوومەنى نوێنەرانى عێراق و دەستکەوتەکانى شارەکە یارمەتى دەربێت بۆ سلێمانى، بچێتە ئەو ئاستەى کە خواستى هەمووانە. ڕووداوەکانی 100 ساڵی ڕابردوو بڕیارە لە فێستیڤاڵەکەدا، رووداوە دیارەکانى 100 ساڵى ڕابردووى سلێمانى لە ئینفۆگرافیکێکدا بخرێنەڕوو. دامەزرێنەر و ناوی سلێمانی لانکەی شۆڕش و نوێخوازی و ڕۆشنبیری سلێمانی، سەرەڕای ئەوەی هەمیشە لانكەی شۆڕش بووە لە قۆناغە یەك لە دوای یەكەكاندا، له‌ هه‌مان كاتدا لانكەی بیری نوێخوازی و ڕۆشنبیریش بووە و یەكەمین ڕۆژنامەی كوردی لەسەر ئاستی باشووری كوردستان لەم شارەدا دەرچووە و یەكەمین چاپخانەش كە لە كوردستاندا دەستبەكار بووبێت هەر لەم شارەدا بووە.  یەکەمینەکانی سلێمانی  یەكەمین جار خوێندن بەزمانی كوردی لەم شارەدا بووە بزووتنەوەی شانۆی كوردی-یش هەر لەم شارەوە سەریهەڵداوە یەكەمین سروودی كوردی-یش كە لەسەر قەوان تۆمار كرابێت هەر لەم شارەدا بووە په‌رلەمانی كوردستان-یش بە بڕیارێك ئەم شارەی كردۆتە پایتەختی ڕۆشنبیریی هەرێمی كوردستان.  

عایشەگول دۆغان، وتەبێژی پارتی یەکسانی و دیموکراسیی گەلان (دەم پارتی) لە کۆنگرەیەکی ڕۆژنامەوانیدا لە ناوەندی گشتی پارتەکەی، پرسەکانی ڕۆژەڤی هەڵسەنگاند. عایشەگول دۆغان ڕایگەیاند، بڕیارەکەی دادگای مافی مرۆڤی ئەوروپا سەبارەت بە ئازادکردنی سەلاحەدین دەمیرتاش، هاوسەرۆکی پێشووی هەدەپە دەبێت جێبەجێ بکرێت و هەنگاوی کرداری بنرێت و ڕایگەیاند: "هەموومان هەر ڕۆژ سات بە سات چاوەڕێی هەواڵی ئازادی دەکەین، ئەوەی پێویستە بکرێت ڕوون و ئاشکرایە، بەڵام ناکرێت. ماوەی نۆ ساڵە بەشێوەیەکی نایاسایی ئەم ڕەوشە بەردەوامە، دەبێت دەستبەجێ زیندانیکردنی سەلاحەدین دەمیرتاش کۆتایی پێبێت." عایشەگوڵ دۆغان ڕایگەیاند، سەلچوک مزراکلی، هاوسەرۆکی پێشووی شارەوانی گەورەی ئامەد، مافی ئازادکردنی مەرجداری هەیە و وتی: "بەمەبەستی جێبەجێکردنی ئەم مافە، لە مانگی ئەیلولدا داواکارییەک ئاراستەی کۆمیتەی چاودێری و ئیدارەی زیندان کراوە. کۆمیتەکە داواکارییەکەی ڕەتکردووتەوە. لە پاساوی ڕەتکردنەوەکەدا هاتووە: "لەو ماوەیەی کە لە زینداندا بووە، بە ئاشکرا ڕاینەگەیاندووە کە لە ڕێکخراوی تیرۆریستی جیا بووەتەوە." پێویست ناکات بۆ درێژکردنەوەی دەستبەسەرکردنی نایاسایی سەلچوک مزراکلی، بەدوای بیانوودا بگەڕێین." هەنگاوکرداری پێویستە نەک قسەکردن عایشەگوڵ دۆغان لەبەردەوامیدا ئاماژەی بە چالاکییەکانی کۆمیسیۆنی دیموکراسی ئاشتی، خوشک و برایەتی یەکگرتنی نیشتیمانی کرد و وتی: "لە قۆناغێکداین کە دەبێت هەنگاوەکان بەپێی ئەو بەڵێنانەی کە دراون بنرێت، چیتر پێویست بە لێدوانەکان ناکات، دەبێت هەنگاوی کردەیی و یاسایی بنرێت بۆ ئەوەی دادپەروەری بنیات بنرێت." سەبارەت بەو بوودجەیەی کە ئامادە دەکرێت، عایشەگوڵ دۆغان وتی: "دڵنیا نین لەوەی ئەم بودجەیە بۆ ئاشتییە یان نا، بۆیە دەڵێین نەخێر بۆ بودجەی ساڵی ٢٠٢٦، بۆ نان و ئاشتی لە بەشە جیاوازەکانەوە لە مانگەکانی تشرینی دووەم و کانوونی یەکەم بەرەو ئەنقەرە ڕێپێوان دەکەین." پێویستە کۆمیسیۆن بچێت بۆ ئیمراڵی عایشەگوڵ دۆغان لە کۆبوونەوەکەدا وڵامی پرسیاری ڕۆژنامەنووسانی دایەوە و جەختی لەوە کردەوە کە کۆمیسیۆن لە چوون بۆ ئیمراڵی بە گومان بێت و وتی: "بەپێچەوانەی ئەم تێڕوانینە، نەچوون بۆ ئیمراڵی دەبێتە هۆی لەدەستدانی دەرفەتێکی گەورەیە. پێویستە لایەنی دەسەڵاتیش لەم ڕووەوە ڕوانگەی خۆی نیشان بدات بۆ ئەوەی شوێنێک بۆ گفتوگۆ نەمێنێت. چەند ڕۆژێک لەمەوبەر سەرۆکی پەرلەمان ڕایگەیاند؛ وەک سەرۆکی کۆمیسیۆن لەسەر ئەم ڕۆژەڤە لە گەڵ ئەندامانی کۆمیسیۆن کۆبوونەوە ئەنجام دەدات. بە بۆچوونی ئێمە پێویستە کۆمیسیۆن بڕیار لەسەر ڕۆیشتنی بۆ ئیمراڵی بدات."

رێبوار تەها، پارێزگاری کەرکووک، لە کۆنفڕانسێکی ڕۆژنامەوانیدا ڕایگەیاند، بەراورد بە هەڵبژاردنى 2021 یەکێتى لە کەرکوک 100 هەزار دەنگ زیادیکردووە، ئاماژەی بەوەشکرد، وەکو پارێزگارى کەرکووک بەردەوام دەبم و ناچمە بەغداد و خزمەتى زیاترى دانیشتووانى کەرکووک دەکەم. ئاماژەى بەوەشکرد، لە کەرکووک دەمێنێتەوە و بەشێوازێکى نوێ خزمەت دەکات و کۆمەڵانى خەڵکى کەرکووکیش بە سەرجەم پێکهاتەکانیەوە دڵنیادەکاتەوە کە خزمەتى ئەمجارەیان جیاوازدەبێت لە ساڵانى ڕابردوو. ڕێبوار تەها، سوپاسى سەرجەم ئەو کەس و لایەنانەشیکرد کە هاوکاربوون لەسەرخستنى لیستى یەکێتیى نیشتمانى کوردستان لە کەرکووک کە توانیویەتى پلەى یەکەم بەدەستبهێنێت و گوتى، بەراورد بە هەڵبژاردنى 2021 یەکێتى لە کەرکووک 100 هەزار دەنگ زیادیکردووە. ڕێبوار تەها باسی لەوەشکرد، دەنگدەرانى پێکهاتەکانى کەرکووک بەشدارییەکى کاراى هەڵبژاردنیان کرد. پارێزگاری کەرکووک، داوایەکی ئاڕاستەی پارتی دیموکراتی کوردستان کرد و گوتی " داوا لە پارتى دیموکراتى کوردستان دەکەم پشتیوانیى حکومەتى خۆجێیی کەرکووک بکەن".

شارەزایەکی کەشناسی ڕایگەیاند: لە یەکشەممە و دووشەممەی هەفتەی داهاتوو، شەپۆلێکی بارانبارینی مامناوەند و بەهێز تەواوی ناوچە جیاوازەکانی هەرێمی کوردستان دەگرێتەوە، بەڕێژەی جیاواز. ئەمڕۆ پێنجشەممە، ١٣ی تشرینی دووەمی ٢٠٢٥، پشتیوان پێنجوێنی شارەزای بواری کەشناسیی ئاشکرایکرد، ئەو شەپۆلەی لە چەند ڕۆژی داهاتوودا ڕوو لە ناوچەکەمان دەکات، بارانی بەخوڕ و مامناوەندی لەخۆگرتووە و لە هەندێک ناوچە ئەگەری بەهێزی دروستبوونی لافاو هەیە، لەوانە هەولێر و دهۆک و ڕاپەڕین. وتیشی، لەو شەپۆلەدا بەفربارین هەندێک لە ناوچەکان دەگرێتەوە، وەک بەشێک لە ناوچە سنوررییەکان و حاجی ئۆمەران و ناوچەشاخاوییەکانی وەک قەندیل و حەسارۆست و چەن چیایەکیتر. هاوکات، تەنها لە دوو ڕۆژدا پلەکانی گەرما سێ بۆ پێنج پلەی سیلیزیی دابەزیووە و بە وتەی پشتیوان پێنجوینی لەگەڵ هاتنی شەپۆلەکەدا پلەکانی گەرما پێنج بۆ حەوت پلەی سیلیزیی دیکە دادەبەزن، واتە زیاتر لە ١٠ پلە گۆڕانکاریی دروستدەبێت و کەشێکی تەواو زستانە ڕوو لە ناوچەکەمان دەکات.

تۆم باراك، نێردەی تایبەتی ئەمریكا بۆ سوریا، لە پەیامێكدا درێژدا كە  كەمێك لەمەوبەر لەسەكۆی " ئێكس" بڵاویكردووەتەوە، باسی لە وردەكاری كۆبونەوەكەی نێوان دۆناڵد ترەمپ و ئەحمەد شەرع كردووە، كە لەچەند رۆژی رابردوودا لە كۆشكی سپی ئەنجامدراو تیایدا دەڵێت: سەرۆک دۆناڵد جەی ترەمپ و سەرۆک شەرع قەناعەتی هاوبەشیان دووپاتکردووەتەوە کە کاتی ئەوە هاتووە دابڕان بە بەشداریکردن بگۆڕن و دەرفەتێکی راستەقینە بدرێت بە سوریاو گەلەکەی بۆ نوێبوونەوە. باراك ئاماژە بەوەدەكات، پابەندبونی سەرۆک شەرع بەرامبەر بە سەرۆک ترەمپ بۆ بەشداریکردن لە هاوپەیمانی دژی داعش، نمایندەی چوارچێوەیەکی مێژوویی دەکات کە گواستنەوەی سوریا لە سەرچاوەی تیرۆرەوە بۆ هاوبەشێک لە بەرەنگاربوونەوەی تیرۆردا دیاری دەکات و پابەندبونە بە ئاوەدانکردنەوە و هاوکاری و بەشداریکردن لە سەقامگیری تەواوی ناوچەکە. راشگەیاندووە: ئێستا دیمەشق بە شێوەیەکی چالاکانە هاوکاریمان دەکات لە روبەڕوبونەوەو هەڵوەشاندنەوەی پاشماوەکانی داعش و سوپای پاسدارانی ئێران، حەماس و حزبوڵاو تۆڕە تیرۆریستییەکانی دیکە، وەک هاوبەشێکی پابەند لەگەڵ هەوڵە جیهانیەكان بۆ دەستەبەرکردنی ئاشتی دەوەستێت. تۆم باراك لە بەشێكی تری پەیامەكەیدا باسی لەوەكردووە: لە کۆبونەوەیەکی گرنگ و سێ قۆڵی لەگەڵ وەزیر روبیۆ، هاکان فیدان وەزیری دەرەوەی تورکیا و ئەسعەد شەیبانی وەزیری دەرەوەی سوریا، وێنای قۆناغی داهاتوومان كێشا لە چوارچێوەی ئەمریکا،تورکیا، سوریا: یەکخستنی هێزەکانی سوریای دیموکرات (هەسەدە) لە پێکهاتەی نوێی ئابوری، بەرگری و مەدەنی سوریای نوێ؛ دووبارە پێناسەکردنەوەی پەیوەندییەکانی تورکیا،سوریا،ئیسرائیل و بەهێزکردنی ئەو کۆدەنگییەی کە پشتیوانی لە ئاگربەستی نێوان ئیسرائیل و حەماس دەکات، هەروەها چارەسەرکردنی کێشە جیاوازەکانی سنوری لوبنان. وەك باراك وتویەتی، رۆڵی ماندوو نەناسانەی تورکیا شایەنی ستایشی تایبەتە، ئەوە بەڵگەیە لەسەر دیپلۆماسییەکی هێمن و چەسپاو کە پردەكان دروست دەکات لەو شوێنانەی کە دیوارەکان وەستابوون.

کۆمیسیۆنی هەڵبژاردنەکانی عێراق جەخت دەکاتەوە، کاندیدەکان مانگێکیان لەبەردەستدایە بۆ لێکردنەوەی پۆستەرەکانیان، بەپێچەوانەوە سزای دارایی دەدرێن. ئەمڕۆ چوارشەممە، 12ـی تشرینی دووەمی 2025، کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، لەمڕۆوە کاندیدەکانی هەڵبژاردنی پەرلەمانی عێراق ماوەی 30 ڕۆژیان لەبەردەستدایە بۆ لێکردنەوەی سەرجەم پۆستەر و بانگەشەکانیان لەسەر شەقام و شوێنە گشتییەکان.  بەگوێرەی ڕاگەیەندراوی کۆمیسیۆن، ئەگەر هەر کاندیدێک لە ماوەی دیاریکراودا پۆستەر و بانگەشەکانی لێ نەکاتەوە، ئەوا کۆمیسیۆن خۆی بەو کارە هەڵدەستێت و تێچووی لابردنی پۆستەرەکان لەو بڕە پارەیە دەبڕێت کە کاندیدەکە وەکو بارمتە لای کۆمیسیۆن دای ناون. سەبارەت بە سکاڵاکانی هەڵبژاردن، کۆمیسیۆن ئاماژەی بەوەدا، تا ئێستا 39 سکاڵا لەسەرانسەری عێراق تۆمارکراون لە ماوەی دەنگدانی گشتی و تایبەتدا. هەروەها، کاندید و لایەنەکان دەتوانن تا کۆتایی دەوامی ئەمڕۆ سکاڵای نوێ پێشکەش بکەن. ڕۆژی سێشەممە، 11ـی تشرینی دووەمی 2025، دەنگدانی گشتی و ڕۆژی یەکشەممەش، 09ـی تشرینی دووەمی 2025، دەنگدانی تایبەتی خولی شەشەمی پەرلەمان، لە پارێزگاکانی عێراق و هەرێمی کوردستان بەڕێوەچوو. بە گوێرەی ئامارەکانی کۆمیسیۆن، ڕێژەی بەشداری لە دەنگدانی تایبەت، 82.42% و لە دەنگدانی گشتیش، نزیکەی 54.5% بوو.  لەسەر ئاستی پارێزگاکانی عێراق و هەرێمی کوردستان، پارتی دیموکراتی کوردستان زۆرترین دەنگی بەدەستهێناوە، بەوپێیەی زیاتر لە یەک ملیۆن و 100 هەزار دەنگی بردووەتەوە. یەکێتیی نیشتمانیش کوردستانیش بە بەدەستهێنانی نزیکەی 535 هەزار دەنگ، لە ڕیزی دووەم دێت. یەکگرتووی ئیسلامیی کوردستانیش بە نزیکەی 165 هەزار دەنگ لە ڕیزی سێیەم دێت.  جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق، بە ماڵپەری کوردستان24ـی ڕاگەیاند، کاتژمێر 06:00ـی ئێوارەی ئەمڕۆ چوارشەممە، 12ـی تشرینی دووەمی 2025، ڕێژەی بەشداری و ئەنجامی بەرایی هەردوو دەنگدانی تایبەت و گشتیی هەڵبژاردنی پەرلەمانی عێراق ڕادەگەیەنن. 

رەوتی هەڵوێست لە بەیاننامەیەكدا دەڵێت:  سوپاسی هەموو ئەو بەڕێزانە دەکەین متمانەیان بە لیستی هەڵوێست دا، جارێکی دی بەڵێن بە دەنگدەران دەدەینەوە "متمانەتان نادۆڕێنین".  سەرباری فشاری زۆر گەورەی دەسەڵات لەسەر دەنگدەران، لیستی هەڵوێست سەرکەوتنی بەدەستهێناوە.  فراکسیۆنی هەڵوێست، نوێنەرایەتی هەموو خەڵکی هەرێمی کوردستان و بەرژەوەندیە باڵاکانی دەکات…  نوێنەرەکانمان، تەنیا نوێنەرایەتی دەنگدەری هەڵوێست نیە، نوێنەری هەموو ئەوانەیە لە ژێر فشاردا دەنگیان سوتاند، نوێنەری بایکۆت و کۆی دەنگی ناڕازی کوردستان دەبێت.  لێرەوە دەستی دۆستایەتی بۆ سەرجەم لایەنەکانی دەرەوەی پارتی و یەکێتی درێژدەکەین.. بۆ کاری پێکەوەیی و نوێنەرایەتیەکی ڕاستەقینەی تەواوی خەڵکی کوردستان.

محەمەد حەكیم سەرۆكی لیستی كۆمەڵی دادگەری لە بازنەی سلێمانی لە نوسنێكدا پیرۆزبایی لە ئەحمەد حاجی رەشید دەكات كە لە لیستی كۆمەڵی دادگەری تاكە كاندیدی سەركەوتووبوو، لە هەمان كاتدا دەڵێت: "کۆمەڵ دەرفەتی باشى لە بەردەمدایە بۆ  بە خۆدا چونەوە و چاکسازیی لە هەرکەمتەرخەمی و هەڵەیەك" بە ناوی خوای بەخشندەی میهرەبان ئەندامان و دۆستان و دەنگدەرانی کۆمەڵی دادگەری. هاوکارانی دلسۆزلەتیمی بانگەشە. لەلایەن خۆمەوە سوپاسی یەك بەیەکتان دەکەم لە پای بانگەشە و متمانە و دەنگدانتان بە لیستی ٢٨٥ی کۆمەڵی دادگەری من وەك کاندیدێك ئەوەی توانیم و لەدەستم هات ئەنجامم دا،هەر چەند ئەنجامەکە بەدڵی ئێمە نیە بەڵام سوپاس بۆ خوای گەورە کە بەدەنگەکانی ئێوە کۆمەڵ لە پەرلەمانی بەغداد دانابڕێت ، پیرۆزباییش لە برای بەڕێزم مامۆستا أحمد حمەرشید دەکەم و دوعای موەفەقی بۆ دەکەم . کۆمەڵی دادگەری دەرفەتی باشى لە بەردەمدایە بۆ ئەوەی قۆناغی داهاتوو بکاتە قۆناغی بە خۆدا چونەوە و چاکسازیی لە هەرکەمتەرخەمی و هەڵەیەك، هەروەها سوپاس کردنی خودای میهرەبان لەسەر هەرکارێکی جوان و چاك و پابەند بوون ی زیاتر بە فەرمانەکانی و بانگ کردن ی خەڵک بۆی، وە خۆم بە بەرپرسیار دەزانم لەئێستاو داهاتوو داواکارم لەخوای باڵا دەست پشتیوانمان بێ و بەرچاوڕوونیمان پێ ببەخشێ و لە گوناهو کەمتەرخەمیمان خۆش بێت. براتان محمد حکیم

وتەبێژی یەکێتیی زانایانی ئایینی ئیسلامی کوردستان ئاماژە بەوە دەکات، حەوت مامۆستای ئایینی بۆ خولی شەشەمی ئەنجوومەنی نوێنەرانی عێراق خۆیان کاندید کردبوو، بەڵام تاوەکوو ئێستا هیچیان نەیان توانیوە کورسی پەرلەمان بەدەستبێنن. عەبدوڵڵا شێرکاوەیی، گوتەبێژی یەکێتیی زانایانی ئایینی ئیسلامی کوردستان، ئەمڕۆ چوارشەممە، 12ـی تشرینی دووەمی 2025، بە ماڵپەڕی کوردستان24ـی ڕاگەیاند: لەگەڵ بڵاوکردنەوەی ئەنجامە بەراییەکانی هەڵبژاردنی گشتیی و تایبەت تاوەکوو ئێستا هیچ مامۆستایەکی ئایینی نەیتوانیوە کورسی پەرلەمان مسۆگەربکات. عەبدوڵڵا شێرکاوەیی، گوتیشی: دیارنییە لەگەڵ ڕاگەیاندنی ئەنجامەکانی کۆتایی و فەرمی کەسیان دەردەچن یان نا، بەڵام لەو حەوت مامۆستا ئایینیە کەسیان دەرنەچوونە. پێشتریش عەبدوڵڵا شێرکاوەیی بە ماڵپەڕی کوردستان24ـی ڕاگەیاندبوو: لە سەرتاسەری هەرێمی کوردستان حەوت مامۆستای ئایینی، هاوکات کە ئەندامی کارای یەکێتیی زانایانن کاندیدن بۆ هەڵبژاردنی خولی شەشەمی ئەنجوومەنی نوێنەرانی عێراق. دوێنێ سێشەممە، 11ـی تشرینی دووەمی 2025، دەنگدانی گشتیی بۆ هەڵبژاردنی خولی شەشەمی ئەنجوومەنی نوێنەرانی عێراق بەڕێوەچوو، بەگوێرەی ئەنجامە بەراییەکان پارتی دیموکراتی کوردستان توانیویەتی زۆرترین دەنگ لەسەر ئاستی عێراق و هەرێمی کوردستان بەدەستبهێنێت.

قوباد تاڵەبانی، لە پەیامێکدا سەرکەوتنی پرۆسەی هەڵبژاردنی ئەنجومەنی نوێنەرانی عێراقی بە سەرکەوتنی هەموو خەڵکی عێراق و هەرێمی کوردستان وەسف کرد. لە پەیامەکەیدا، قوباد تاڵەبانی پیرۆزبایی لە هەموو عێراقییەکان و بە تایبەتیش لە هاوڵاتییانی کوردستان کرد و ڕایگەیاند: "بەڕێوەچوونی سەرکەوتووانەی پرۆسەی هەڵبژاردنی ئەنجومەنی نوێنەرانی عێراق، سەرکەوتنی هەموو خەڵکی عێراق و هەرێمی کوردستانە." ناوبراو سوپاسی بەشداریی بەرچاوی خەڵکی کوردستانی کرد و وتی: "سوپاس و پیرۆزباییەکی تایبەتیش بۆ هەموو دەنگدەرانی یەکێتیی نیشتمانیی کوردستان کە بە دەنگەکانیان سەنگ و پێگەی یەکێتییان لە کوردستان و عێراقدا بەهێزتر کرد." قوباد تاڵەبانی دڵنیایی دایە دەنگدەران و جەماوەری یەکێتی و خەڵکی کوردستان کە "یەکێتی لە ئاستی ئەو متمانە گەورەیەدا دەبێت و بە هەموو توانایەوە کار دەکات بۆ جێبەجێکردنی بەڵێنەکانی." هەروەها جەختی کردەوە کە یەکێتی ئەم متمانەیە بەکاردەهێنێت "بۆ بەهێزترکردنی پێگەی کورد لە عێراق و چارەسەرکردنی کێشەکانی نێوان هەرێم و بەغدا و شەڕیش لەسەر هەموو مافە دەستورییەکانی خەڵکی کوردستان دەکەین."

ساڵح موسلیم، ئەندامی ئەنجوومەنی بەڕێوەبەریی پەیەدە، سەبارەت بە کۆبوونەوەی نێوان دۆناڵد ترەمپ سەرۆکی ئەمریکا و ئەحمەد شەرع سەرۆکی حکومەتی کاتیی سووریا ئاماژەی بەوەدا، کە ئەوان وەک هەنگاوێکی نوێ و ئەرێنی تەماشای کۆبوونەوەکەیان کردووە بۆ چارەسەرکردنی پرسەکانی سووریا. ساڵح موسلیم ڕایگەیاند: گرنگترین بابەت ئامادەبوونی وەزیری دەرەوەی دەوڵەتی داگیرکەری تورک بوو، کە بەشداری لە کۆبوونەوەکەدا کردبوو. لەو بارەیەوە وتی: “پێدەچێت لەسەر زۆرێک لە پرسەکان کۆدەنگی لەسەر کرابێت و ڕێککەوتنی ۱۰ـی ئازاریش لەلایەن تورکیاوە قبووڵ کرابێت، کە ڕێککەوتنێکی گرنگە بۆ هەموو سووریا”. ئەو هەشت مادەیەی لەم ڕێککەوتنەدا هەیە بۆ بەرژەوەندی هەمووانە و هەمووان دەیانەوێت جێبەجێ بکرێن. ساڵح موسلیم ئاماژەی بەوەشدا، کە دەوڵەتی داگیرکەری تورک دەستی نەبووە لە ئامادەکردن و واژۆکردنی ئەم ڕێککەوتنە و ویستی هەڵیوەشێنێتەوە، بەڵام بە ئامادەبوونی وەزیری دەرەوەی تورکیا لەم کۆبوونەوەیەدا، ئێستا دەتوانین بڵێین دەوڵەتی تورک ئەم ڕێککەوتنەی قبووڵ کردووە. ئەندامی ئەنجوومەنی بەڕێوەبەریی پەیەدە جەختی لەوەش کردەوە، کە ئێستا دانوستانەکان تەواو بوون و داوای کرد، کە پرۆسەی یەکگرتنی دیموکراسیی لە سووریا ئەنجام بدرێت و وتی: “دەمانەوێت لەسەر بنەمای دیموکراسی تێکەڵ بە سووریا بین، لەبەر ئەوەی یەکگرتن بەبێ دیموکراسی ناتوانرێت ڕووبدات و دیمەشقیش هەر وەک ئێمە دەبێت باوەڕی بە دیموکراسی هەبێت”.

 تۆڕی هاوپەیمانیی ڕێکخراوە نیشتمانییەکان (تۆڕی شەمس) بۆ چاودێریی هەڵبژاردنەکان، ئەمڕۆ چوارشەممە، 12ـی تشرینی دووەمی 2025، وردەکاریی چاودێریی خۆی لەسەر پرۆسەی هەڵبژاردنی خولی شەشەمی پەرلەمانی عێراقی خستەڕوو. هۆگر چەتۆ، سەرۆکی ڕێکخراوی تۆڕی شەمس، لە کۆنگرەیەکی ڕۆژنامەوانیدا ڕایگەیاند، تۆڕەکەیان لە ڕێگەی 5 هەزار و 89 چاودێرەوە لە سەرانسەری 18 پارێزگای عێراق، چاودێریی پرۆسەکەیان کردووە و لەو چوارچێوەیەشدا 18 هەزار و 168 ڕاپۆرتی جیاوازیان ئامادە کردووە. بەگوێرەی ڕاپۆرتی تۆڕەکە، ڕێژەی دەنگدەرانی تەمەن 18 ساڵ لەم هەڵبژاردنەدا گەیشتووەتە سەدا41ـی کۆی دەنگدەران. هەروەها ئاماژەی بەوەدا کە بەپێی پسوڵەی بایۆمەتری، سەدا 56ـی دەنگدەرانی عێراق بەشدارییان لە پرۆسەکەدا کردووە. تۆڕی شەمس ژمارەیەک حاڵەتی نەخوازراو و پێشێلکاریی تۆمار کردووە، لەوانەش: 501 حاڵەتی ئەنجامدانی پروپاگەندەی هەڵبژاردن لەبەردەم بنکە و وێستگەکانی دەنگدان. هەروەها 415 حاڵەتی ڕوون نەکردنەوەی شێوازی دەستپێکردنی پرۆسەکە و نەدانی زانیاریی پێویست بە کارمەندان. لەگەل 382 حاڵەتی بردنە ژوورەوەی مۆبایل بۆ ناوەندەکانی دەنگدان، کە بەپێی ڕێکارەکان قەدەغە بوو. لەگەڵ 359 حاڵەتی ڕێگە نەدان یان دوورخستنەوەی چاودێران، کە بەشێکی هەرە زۆری لە کاتی ژماردنی دەنگەکاندا بووە. بەرەبەیانی ڕۆژی سێشەممە، 11ـی تشرینی دووەمی 2025، لە پارێزگاکانی عێراق و هەرێمی کوردستان پرۆسەی دەنگدانی گشتیی بۆ هەڵبژاردنی ئەندامانی خولی شەشەمی پەرلەمانی عێراق بەڕێوەدەچێت، بە گوێرەی ئامار و تۆمارەکانی کۆمیسیۆنی باڵای سەربەخۆی هەڵبژاردنەکانی عێراق زیاتر لە 20 ملیۆن دەنگدەر مافی دەنگدانیان هەیە، کە زیاتر لە دوو ملیۆن و 800 هەزار دەنگدەر لە هەرێمی کوردستانن. ناوەندەکانی دەنگدا لە کاتژمێر 7:00ـی بەیانییەوە کراونەوە و پرۆسەی دەنگدان تاوەکوو 6:00ـی ئێوارە بەردەوام بوو. سەرجەم بنکەکان لە لایەن هێزە ئەمنییەکانەوە پارێزگاری کران، هاوکات لەلایەن کۆمیسیۆنی باڵای سەربەخۆی هەڵبژاردنەکانی عێراقەوە لە ڕێگەی کامێرای چاودێرییەوە چاودێری بەڕێوەچوونی پرۆسەکەیان کرد.

بەرپرسی ڕێکخستن و ئەندامی مەکتەبی سیاسی پارتی لە سلێمانی ڕایگەیاند، سوپاسی هاووڵاتیان، بە تایبەتی دانیشتووانی سلێمانی دەکەین بۆ سەرخستنی لیستی پارتی لە هەڵبژاردنی پەرلەمانی عێراق، بێگومان بەهێزی پارتی واتە بەهێزی هەرێمی کوردستان لە عێراق.  ئەمڕۆ چوار شەممە 12ی یشرینی دووەمی 2025، عەلی حوسێن، بەرپرسی ڕێکخستن و ئەندامی مەکتەبی سیاسی پارتی لە سلێمانی ڕایگەیاند، پرۆسەی دەنگدان بە شێوەیەکی زۆر هێمن و دیموکراسی بەڕێوەچوو، سوپاسی هاووڵاتیانی کوردستان، بە تایبەتی دانیشتووانی سلێمانی دەکەین، بەراورد بە پارێزگاکانی دیکەی عێراق لە هەرێمی کوردستان ڕێژەیەکی زۆر بەشداریان لە پرۆسەی هەڵبژاردن کرد، ئەمەش ئامادەیی و بڕوابوونی خەڵکی کوردستانە بە پرۆسەی سیاسی و دیموکراسی. عەلی حوسێن گوتی: پیرۆزبایی لە کاندیدە سەرکەوتووەکان دەکەین، هەوڵ و ماندوو بوونی ئەندامان و لایەنگرانمان بەرز دەنرخێنین، ئەو کاندیدانەشی کە دەنگی پێویستیان بە دەست نەهێناوە ئەوانیش سەرکەوتوون، چونکە ڕۆڵیان لە سەرخستنی ئەم پرۆسەیە و لیستی پارتی دیموکراتی کوردستان هەبووە. گوتیشی: دەمەوێ بە تایبەتی سوپاسی خەڵکی سلێمانی بکەم بۆ پاڵپشتی و پشتگیریان لە سەر خستنی پرۆسەی دەنگدان و لیستی 275ی پارتی لە بازنەی سلێمانی.  بەشێکى دیکە لە پەیامەکەى عەلى حسێن، بەرپرسی مەکتەبی ڕێکخستنی سلێمانی - هەڵەبجە - راپەڕینی پارتی دیموکراتی کوردستان ــ پارتی وەكو حزب لە ئاستی عێراق حزبی یەكەمەو دەنگی یەكەمی هێناوە. ــ یەكێتی بۆیە نەهاتە پێشەوە بۆ پێكهێنانی حكومەت چونكە قەناعەتی وابوو لە هەڵبژاردنی پەرلەمانی عێراقدا دەنگی زیاتر دەهێنێت. ــ لە ساڵی (1964)ئەو ململانێیە لەنێوان پارتی و یەكێتی هەیە، كەسمان سودمان لە شەڕی ناوخۆ و یەكتر برینداركردن نەبینیوە بەڵكو زیانمان كردووە. ــ لەپێكەوەی كاركردن و لەبەرەی كوردستانی و پێكەوەبوون لە بەغدادو هەرێمی كوردستان، قازانجمان بەخۆمان و میللەتەكەمان گەیاندووە. ــ كاك فازیل میرانی پیاوێكی بە ئەزمونەوەو بەبێ‌ بنەما قسەناكات، دەرەنجامی وەڵامی قسەكانی كاك بافڵ بوو. ــ دەنگەكانی پارتی بەراورد بە هەڵبژاردنی پێشوو لە سنوری سلێمانی نزیكەی (20) هەزار دەنگ زیادی كردووە. ــ خەڵكی ئەم سنورە رقیان لە پارتی نییەو چاوەڕوانیان لێی هەیە، پێموایە ئەو دەرگایە خەریكە دەكرێتەوە. ــ وەك پارتی دەمانەوێت هەمووان پێكەوەبین لە بەغداد، بەڵام هەندێك لایەن ئەمەیان ناوێت.

بارەگاى بارزانى ڕاگەیەندراوێکى بڵاوکردەوەو تیایدا دەڵێت: ئەمڕۆ چوارشەممە، 12ـی تشرینی دووەمی 2025، سەرۆک مەسعود بارزانی لە پەیامێکدا پیرۆزبایی سەرکەوتنی پڕۆسەی هەڵبژاردنی پەرلەمانی لە هاووڵاتیانی کوردستان و هەموو عێراق کرد. هەر لە ڕاگەیەندراوەکەدا ئەوەش خراوەتەڕوو لە پەیامەکەی سەرۆک بارزانیدا هاتووە "بەبۆنەی سەركەوتنی پڕۆسەی هەڵبژاردنی ئەنجوومەنی نوێنەرانی عێراق پیرۆزبایی لە هاووڵاتیانی خۆشەویستی كوردستان و هەموو عێراق دەكەم، هەروەها پیرۆزبایی لە خانەوادەی سەربەرزی شەهیدان و پێشمەرگە قارەمانەكان و هەموو چینوتوێژەكانی كوردستان دەكەم." پەیامێک لە سەرۆک بارزانییەوە بەناوی خودای بەخشندە و میهرەبان بەبۆنەی سەركەوتنی پڕۆسەی هەڵبژاردنی ئەنجوومەنی نوێنەرانی عێراق پیرۆزبایی لە هاووڵاتیانی خۆشەویستی كوردستان و هەموو عێراق دەكەم، هەروەها پیرۆزبایی لە خانەوادەی سەربەرزی شەهیدان و پێشمەرگە قارەمانەكان و هەموو چینوتوێژەكانی كوردستان دەكەم. لێرەدا بەپێویستی دەزانم سوپاسی سەرکردایەتی و  ئەندامان و کادران و جەماوەری پارتی و هەروەها دامودەزگە ئەمنییەكان و هەموو لایەنە پەیوەندیدارەكان بكەم كە بە ماندووبوون و شەونخونیان كەشێكی ئارام و هێمنیان بۆ ئەنجامدانی پڕۆسەی هەڵبژاردن ڕەخساند. هیوادارم ئەو هەڵبژاردنە و ئەنجامەكانی ببێتە هۆی ئەوەی عێراق بكەوێتە سەر ڕێچكەی دروستی خۆی. مسعود بارزانی 12ـی تشرینی دووەمی 2025

بەرپرسی مەکتەبی هەڵبژاردنی یەکگرتووی ئیسلامی دەڵێت، لە هەر سێ بازنەکانی هەرێمی کوردستان 5 کورسیی پەرلەمانی عێراقیان مسۆگەر کردووە، ئاماژە بەوەش دەکات، بەهۆی پێشێلکردنی رێنوێنییەکانی هەڵبژاردن، ژمارەیەک سکاڵایان تۆمار کردووە. ئەمڕۆ چوارشەممە 12-11-2025 سەباح بابیری، بەرپرسی مەکتەبی هەڵبژاردنی یەکگرتووی ئیسلامیی کوردستان لەکاتی بەشداریکردنی لە بەرنامەی نووڕۆژی تۆڕی میدیایی رووداو، کە نالین حەسەن پێشکێشی کرد، کۆمەڵێک زانیاریی لەبارەی ئەنجامی هەڵبژاردنی پەرلەمانی عێراق و دەنگی حیزبەکەی خستەڕوو. سەباح بابیری رایگەیاند، ''رازیین لە ئەنجامی هەڵبژاردن، بەڵام گەلێک تێبینیشمان لەسەر چۆنێتیی بەڕێوەچوونی پڕۆسەکە هەیە.'' بە گوتەی بەرپرسی مەکتەبی هەڵبژاردنی یەکگرتووی ئیسلامیی کوردستان، حیزبەکەی لە هەڵبژاردنی پەرلەمانی عێراقدا بەگشتی 175 هەزار و 918 دەنگی بەدەستهێناوە، بەراورد بە هەڵبژاردنەکانی پێشوو لە هەر سێ بازنەکانی سلێمانی، دهۆک و هەولێر دەنگی حیزبەکە زیادی کردووە. پێچەوانەی ئەنجامە بەراییەکان، سەباح بابیری رەتی دەکاتەوە حیزبەکەی لە هەولێر کورسیی بەدەستنەهێنابێت و دەڵێت، ''لە هەولێر 38 هەزار و 151 دەنگمان بەدەستهێناوە و پێمان وایە کە لە هەموو هەرێمی کوردستان 5 کورسی بەدەستدەهێنین. دوو کورسی لە بازنەی سلێمانی، دوو کورسی لە بازنەی دهۆک و کورسییەکیش لە هەولێر.'' سەبارەت بە پێشێلکردنی رێنوێنییەکانی کۆمیسیۆن لەلایەن هەندێک بەربژێر و لیستەوە، بەرپرسی مەکتەبی هەڵبژاردنی یەکگرتووی ئیسلامیی کوردستان ئاماژەی بەوە دا، ''تاوەکو کاژێر 15:00 پڕۆسەکە بە باشی بەڕێوەچوو، بەڵام دواتر کەشەکە گۆڕا و یەکێک لە دیاردە ناشیرینەکان کە کڕینی دەنگە، لەبەردەم بنکەکانی دەنگداندا بیندراوە، پارە بەسەر خەڵکدا دابەش دەکرا، بۆئەوەی دەنگ بە لایەنێکی دیاریکراو بدەن.'' بەگوێرەی رێنوێنییەکانی کۆمیسیۆنی باڵای سەربەخۆی هەڵبژاردنەکانی عێراق، 24 بۆ 48 کاژێر بەر لە دەنگدان، بانگەشەی هەڵبژاردن دەوەستێت. سەباح بابیری گوتی، ''لەکاتی دەنگداندا لەبەردەم هەندێک لە بنکەکانی دەنگدان بانگەشە هەر بەردەوام بوو.'' وەک بەرپرسی مەکتەبی هەڵبژاردنی یەکگرتووی ئیسلامیی کوردستان دەڵێت، لە هەرسێ بازنەکانی هەرێمی کوردستان، سکاڵایان لەسەر پێشێلکارییەکان تۆمار کردووە و لە کاژێرەکانی داهاتوودا، ژمارەیەک سکاڵای دیکەش تۆمار دەکەن. رۆژی سێشەممە 11-11-2025 هەڵبژاردنی پەرلەمانی عێراق بەڕێوەچووو بەگوێرەی ئەنجامە بەراییەکان، پارتی دیموکراتی کوردستان زیاتر لە ملیۆنێک دەنگی بەدەستهێنا، دوای ئەویش یەکێتی پلەی دووەمی بەدەستهێنا، هێشتا ئەنجامە بەراییە فەرمییەکان رانەگەیێنراوە و بڕیارە رۆژی چوارشەممە کۆمیسیۆن ئەو ئەنجامە فەرمییە بەراییانە رابگەیێنێت.