جەمال کۆچەر: کێشەی مووچە چارەسەر نەبووە 

فیدراسیۆنی رێکخراوەکانی کۆمەڵگەی مەدەنی، ڕایدەگەیەنن: بەکارهێنانی هێز و میلیتاریزەکردنی شاری سلێمانی و شارەکانی تر لە لایەن حیزبەکانی دەسەڵات و ئۆپۆزیسیۆن و پێکدادانی چەکداریی پێشێلکارییەکی ئاشکرای مافی ژیانی هاووڵاتیانە. هەروەها ئەوەشدەخەنەڕوو دەقە یاساییەکان، بۆ دەستگیرکردنی داواکراو، گۆڕینی دۆسیەکان لە دەستی هێزێکەوە بۆ هێزێکی تر، بەکارهێنانی چەک، بەڵام لەم ڕووداوانە هەموو ئەو بنەمایانە پێشێلکراون. پێشیان وایە، کارنەکردن لەسەر دۆسییەکان لەکاتی خۆیدا و هەڵگرتنی بۆ کاتی تر، کردنەوەی دەرگایەکی مەترسیدارە بۆ بەکارهێنانی یاسا، بە میزاج و لێدانی نەیارەکان بە دامەزراوە حکومییەکان. دەقى ڕاگەیەندراوەکە هەرێمی کوردستان؛ بەرەو تونێلێکی تاریک ڕاگەیەندراوی فیدراسیۆنی رێکخراوەکانی کۆمەڵگەی مەدەنی سەبارەت بە ئامرازکردنی دامەزراوەی دادوەری، بۆ بەدیهێنانی بەرژەوەندی کەس و حیزبی بە نیگەرانییەکی قووڵەوە چاودێریی ئەو زنجیرە ڕووداوە مەترسیدارانە دەکەین کە لە ماوەی چەند مانگی ڕابردوودا بوونەتە هەڕەشەیەکی ڕاستەوخۆ لەسەر سەقامگیری، سەروەریی یاسا، ژیانی خەڵک و بنەماکانی دیموکراسی لە هەرێمدا. ڕووداوەکانی هەولێر، لە کێشەی نێوان هەردوو عەشیرەتی چەکداری هەرکی و گۆران، هێرشکردنە سەر مافپەروەر (شوان سابیر)، درێژەدان بە زیندانیکردنی رۆژنامەنووس (شێروان شێروانی). ڕووداوەکانی سلێمانی، دەستگیرکردنی سەرۆکی نەوەی نوێ، هێرشی سەربازی بۆ سەر ماڵ و بارەگای سەرۆکی بەرەی گەل بە چەکی قورس و دەستگیکردنی، هەموو ئەوانە بە بەکارهێنانی بڕیاری دادگا کراوە. ئەمەش بۆتە هۆی بێئومێدی زیاتری ناوخۆ و دەرەوە لە دەسەڵاتی دادوەری. بەپێی پرەنسیپە نێودەوڵەتیەکانی بانگلور بۆ سلوکی دادوەری، پێویستە دادگاکان سەربەخۆبن لە هەموو ڕوویەکەوە. ئەوەی گرنگە بۆ چەسپاندنی ئەم سەربەخۆییە متمانەی کۆمەڵگا و ڕای گشتی هاوڵاتیانە. پێویستە ئەم هەستە لەناو ناخ و دەروونی تاکەکانی کۆمەڵگادا بە واقیع بچەسپێت، تاوەکو هەرکەس ڕووبەڕووی لێپرسینەوەی یاسایی دەبێتەوە بێ ترس و بێ سڵەمینەوە بچێتە بەردەم دادگا. لە کاتێکدا، دەزگا فەرمییەکانی حکومەتی هەرێم و عێراق، وڵاتانی جیهان، بەردەوام ئیدانەی دۆخەکە دەکەن. ئێمە ئیدانەی ئەوان دەکەین، کە دەیانتوانی هەنگاوی کرداری بنێن، کەچی جگە لە دەرکردنی بەیاننامە، لەشوێنی خۆیان بە مەبەستی چارەسەر نەجوڵاون. بۆیە هەڵوێستی ئەوان هێندەی ڕووداوەکان مایەی نیگەرانیمانە. ئێمە بە ئەرکی خۆمانی دەزانین بە ڕاشکاوی ئەم خاڵانە دووبارە بخەینەوەڕوو: ١-بەکارهێنانی هێز و میلیتاریزەکردنی شاری سلێمانی و شارەکانی تر لە لایەن حیزبەکانی دەسەڵات و ئۆپۆزیسیۆن و پێکدادانی چەکداریی و بەکارهێنانی چەکی قورس لەناوچەیەکی گەشتیاریی و گەڕەکێکی نیشتەجێبوون، و گۆڕینی ناوچەکە بۆ گۆڕەپانی شەڕ، پێشێلکارییەکی ئاشکرای مافی ژیانی هاووڵاتیانە. ٢-لەکارخستنی دەزگای پۆلیس و بەکاربردنی هێزەکانی دژەتیرۆر و هێزی تایبەت بە چەکی قورسەوە، سوکایەتی کردنە بە حکومەتی هەڕێم، بە هاوپەیمانان، کە ئەو چەکانەیان بۆ شەڕی دژی تیرۆر، بە هێزەکانی پاراستنی هەرێم داوە، کەچی ئێستا لە ململانێی ناوخۆیدا بەکار دەهێنرێت. ٣-دەقە یاساییەکان، بۆ دەستگیرکردنی داواکراو، گۆڕینی دۆسیەکان لە دەستی هێزێکەوە بۆ هێزێکی تر، بەکارهێنانی چەک، ڕێوشوێنی تایبەتی خۆیی هەیە و بە گوێرەی یاسا بەرکارەکانی هەرێم و پرەنسیپە نێودەوڵەتیەکان دیاری کراوە. بەڵام لەم ڕووداوانە هەموو ئەو بنەمایانە پێشێلکراون. ٤-کارنەکردن لەسەر دۆسییەکان لەکاتی خۆیدا و هەڵگرتنی بۆ کاتی تر، کردنەوەی دەرگایەکی مەترسیدارە بۆ بەکارهێنانی یاسا، بە میزاج و لێدانی نەیارەکان بە دامەزراوە حکومییەکان. ٥-دووبارە سزادانەوەی ڕۆژنامەنووس (شێروان شێروانی)، لە کاتێکدا چاوەڕێی ئازادکردنی دەکرا. سەلماندنی ئەو راستییەیە کە دادگا بۆ تۆڵەسەندنەوە بەکاردێت. لەسەر بنەمای ئەو ڕووداوانە، فیدراسیۆنی ڕێکخراوەکان، داواکارە:- ١-لە حکومەت، دامەزراوەی دادوەری و داواکاری گشتی: •پێکهێنانی لیژنەیەکی لێکۆڵینەوەی سەربەخۆ و بێلایەن بۆ لێکۆڵینەوە لە ڕووداوەکانی سلێمانی، ئاشکراکردنی ئەنجامەکان بۆ ڕای گشتی، و بەسزاگەیاندنی هەموو ئەو کەس و لایەنانەی بەرپرسیارن لەم خوێنڕشتنە. بە تایبەتی پاش ڕوونکردنەوەی دووەمی سەرۆکی حکومەتی هەرێم، کە بێئاگایی حکومەتی لەو هەنگاوانە نیشانداوە، ئەمەش هەموو دامەزراوە ئەمنیەکان دەخاتە بەردەم بەرپرسیارێتی وەڵام دانەوە. •کۆتاییهێنان بە سیاسیکردنی دۆسیە یاساییەکان و گەرەنتیکردنی دادگاییکردنی دادپەروەرانە بۆ هەموو دەستگیرکراوان، دابینکردنی ڕێوشێونی یاسایی بۆ دەستگیرکردنی داواکراوان. لەنێویاندا تەمیزکردنەوەی دادپەروەرانەی بڕیاری دادگای بنەسڵاوە بۆ(شێروان شێروانی). ٢-لە کۆمەڵگای نێودەوڵەتی و نێردەی نەتەوە یەکگرتووەکان (یونامی): •زیاترکردنی فشاری دیپلۆماسی لەسەر دەسەڵاتدارانی هەرێم، بۆ پابەندبوون بە بنەماکانی مافی مرۆڤ و سەروەریی یاسا، وەک لە بەیاننامەکانتاندا ئاماژەتان پێکردووە. •فشاری ئەمریکا و هاوپەیمانان، بۆ پێکهێنانی هێزی پێشمەرگەی یەکگرتووی نیشتمانی، کە ئەنجامەکەی چەک داماڵین بێت لە حیزبەکان و عەشیرەتەکان، بە گوێرەی دەستووری عێراق و یاسای حیزبەکان، بە پێچەوانەوە مۆڵەتی کارکردن لەو حیزبانە بسەنرێتەوە. کۆتایی بە دیدی ئێمە، ژيرخانی ئابووری بنیاتنەنراو موڵکانەستێنی زاڵە، دام و دەزگای مۆدێرن پێکنەهێنرا، هێزی پێشمەرگەی نیزامی یەکگرتوو درووست نەکرا، بۆیە دیموکراسی لە پاشەکشەدایە. پەیوەندی نێوان هەرێم وعێراق خراپە، شۆڤێنزم و مەزهەبگەرایی لە عێراق ڕوو لە زیادبوونە و بەغداد گەندەڵی هەرێم بەکاردەهێنێت بۆ پاشەکشە لە مافە دەستوورییەکان و لەو نێوەندەدا مووچە خۆرانی هەرێم بوونەتە قوربانی. بڕواشمان وایە، بە پێچەوانەی گرووپ و خێڵ و حیزبەکان، کۆمەڵگە ناچێتە ژێر باری ئەو هێزانەی کۆنترۆڵیان دەکات. کۆمەڵگەی بەهێز، کۆمەڵگەی تاکە ئازاد و یەکسانەکانە. مەحاڵیشە لە کۆمەڵگەی مەدەنیدا سیاسەت و ئاکار لەیەک جیابکرێنەوە، ناکرێت باس لە پاراستنی ئاشتیی کۆمەڵایەتی و حوکمڕانیی سەرکەوتوو بکرێت، بێ بوونی ئاکار و ڕەفتاری وەک: هەستکردن بە بەرپرسیارێتی، کاری هەرەوەزی، بەستنەوەی بەرژەوەندی تایبەت بەرژەوەندیی گشتییەوە، لە پێناو خەمی گشتیدا. ئێستا هەرێمی کوردستان لەبەردەم دووڕیانێکی سەختدایە، گرنگە بۆ درووستکردنی لۆژیکی یاسا و دامەزراوەکان هەنگاوبنێن، لە جیاتی خۆبەدەستەوەدان بە لۆژیکی هێز و ململانێی چەکداری کە داهاتووی هەموومان دەخاتە مەترسییەوە. ئێمە لەسەر چاودێریکردن و فشاردروستکردن بەردەوام دەبین. فیدراسیۆنی ڕێکخراوەکانی کۆمەڵگەی مەدەنی ڕێکەوت: ٢٣ی ئابی ٢٠٢٥

پۆلیسى سلێمانى دەنگۆی تێکچوونی رەوشی تەندروستی شاسوار عەبدولواحید رەتدەکاتەوەو دەڵێن هیچ کیشەیەکى نییە. سەرچاوەیەک لە پۆلیسی سلێمانی، ڕاگەیاند، دەنگۆی تێکچوونی رەوشی تەندروستی شاسوار عەبدولواحید ناڕاستە، لە ئێستادا ناوبراو لە بەڕێوەبەرایەتی گرتن و گواستنەوەی سلێمانییە و رەوشی تەندروستی جێگیرە. ئەمەش لەکاتێکدایە نیوەرۆى ئەمڕۆ سەرۆکى فراکسیۆنى نەوەى نوێ نیوەڕۆى ئەمڕۆ شەممە ڕایگەیاند، ڕەوشى تەندروستى شاسوار عەبدولواحید سەرۆکى جوڵانەوەى نەوەى نوێ لەزیندان تێکچووەو بارودۆخى تەندروستى ناجێگیرە. کوردەوان جەمال سەرۆکى فراکسیۆنى نەوەى نوێ لەپەرلەمانى کوردستان، لەوبارەیەوە وتى: دایکى و هاوسەرەکەى بینیویانەو بارودۆخى تەندروستى تێکچووە، بەڵام بەهۆى ئەوەى رێگرى دەکرێت و  چاودێرییەکى وردو پاسەوانیەتێکى زۆرى لەسەرە نەتوانراوە بیبین. شەوی ١٢ـی ئەم مانگە شاسوار عەبدولواحید سەرۆکی جوڵانەوەى نەوەى نوێ لەلایەن هێزێکی پۆلیسەوە لەماڵەکەى خۆى لەسلێمانى دەستگیرکرا. پێنجشەممە ٢١ـی ئابی ٢٠٢٥، دواى نۆ رۆژ لە دەستگیرکردنی شاسوار عەبدولواحید، سەرۆکی جوڵانەوەی نەوەی نوێ بردرایە بەردەم دادگا و وتەی لێوەرگیرا، ناوبراو لەبەردەم دادوەر سەرجەم ئەو تۆمەتانەی ئاڕاستەی کرابوون رەتکردەوە.

لیژنەی باڵای هەڵبژاردنی ئەنجوومەنی گەلى حکومەتى سوریا بڕیاریدا پرۆسەی هەڵبژاردن لە پارێزگاکانی سویدا، حەسەکە و ڕەقە دوابخرێت، بەهۆی ئەو ئاستەنگە ئەمنییانەی کە ڕووبەڕووی ئەو پارێزگایانە دەبنەوە. نەوار نەجمە، وتەبێژی کۆمسیۆنی باڵای هەڵبژاردنەکانی سوریا ڕایگەیاند: "بەهۆی بارودۆخى ئەمنی هەڵبژاردنەکان لەو سی ناوچەیە بۆ کاتێکی نادیار دواخراوە، بەڵام کورسییەکانی ئەو پارێزگایانە پارێزراو دەبن". نەوار نەجمە ئەوەشى ڕاگەیاند، هەڵبژاردنی پەرلەمانی سووریا لە سێ پارێزگا بۆ ماوەیەکی نادیار دواخراوە. وتەبێژی کۆمیسیۆنی باڵای هەڵبژاردن، ئەوەشى خستەڕوو بڕیاری دواخستنەکە لە خواستی لیژنەکە سەرچاوەی گرتووە بۆ دەستەبەرکردنی نوێنەرایەتی دادپەروەرانە لە ئەنجوومەنی گەل بۆ هەر سێ پارێزگاکە، جەختیشی کردەوە کە کورسییە تەرخانکراوەکان بە تەرخانکراو دەمێننەوە تا ئەوکاتەی هەڵبژاردن ئەنجام دەدرێت. ئەحمەد شەرع سەرۆک کۆماری سوریا پێشتر فەرمانی ژمارە (١٤٣)ی ساڵی ٢٠٢٥ی دەرکردبوو، کە سیستەمی هەڵبژاردنی کاتی بۆ ئەنجومەنی گەلی سوریا پەسەند کرد. بڕیارە لە نێوان 15-20ی ئەیلوولی 2025 هەڵبژاردنی پەرلەمانی سووریا بەڕێوە بچێت. ئەحمەد شەرع سەرۆكی قۆناغی راگوزەری سوریا مەرسومێكی دەكردووەو بەپێ ئەو مەرسومە (سیستەمی هەڵبژاردنی كاتیی ئەنجومەنی گەل)ی پەسەندكردووە. سیستەمەكە قەدەغەی كردووە (پارێزگار، سەرۆك وەزیرانەكانی پێشوو) خۆیان بۆ پەرلەمانی نوێ كاندید بكەن، هاوكات قەدەغەی كردووە "ئەوانەی بانگەشە بۆ دابەشبوونی سوریاو جیابوونەوە" دەكەن خۆیان كاندید بكەن، رەنگە لەمەدا بە پلەی یەكەم كورد بە ئامانج گیرا بێت، ئەوانەشی كە پشتیوانییان لە رژێمی پێشووی ئەسەد كردووە بە هەمان شێوە كاندیدبوونیان قەدەغەكراوە.  بەگوێرەی سیستەمە پەسەندكراوەكە، ژمارەی ئەندامانی ئەنجومەنی گەلی سوریا لە (210) كەس پێكدێت، دوو لەسەر سێی ئەم كەسانە بەگوێرەی حوكمەكانی مەرسومەكەی ئەحمەد شەرع هەڵدەبژێردرێن و كورسییەكان بەگوێرەی ژمارەی دانیشتووان بەسەر پارێزگاكاندا دابەشدەكرێت.

سەرۆکى فراکسیۆنى نەوەى نوێ نیوەڕۆى ئەمڕۆ شەممە ڕایگەیاند، ڕەوشى تەندروستى شاسوار عەبدولواحید سەرۆکى جوڵانەوەى نەوەى نوێ لەزیندان تێکچووەو بارودۆخى تەندروستى ناجێگیرە. کوردەوان جەمال سەرۆکى فراکسیۆنى نەوەى نوێ لەپەرلەمانى کوردستان، لەوبارەیەوە وتى: دایکى و هاوسەرەکەى بینیویانەو بارودۆخى تەندروستى تێکچووە، بەڵام بەهۆى ئەوەى رێگرى دەکرێت و  چاودێرییەکى وردو پاسەوانیەتێکى زۆرى لەسەرە نەتوانراوە بیبین. بەپێى ئەو زانیاریانەى سەرۆکى فراکسیۆنەکە باسى کردوە پێشتر چەند جارێک کەسوکارەکەى ویستویانە سەردانى بکات نەیانهێشتوەو پارێزەرەکەشى ویستویەتى بیبنێت بەڵام نەیانهێشتوە. لەلایەکى دیکەوە، سروە عەبدولواحید- سەرۆكی فراكسیۆنی (نەوەی نوێ) لە پەرلەمانی عێراق دەڵێت: زانیاریمان پێگەیشتووە لە زینداندا دۆخی تەندروستی (شاسوار عەبدولواحید)ی سەرۆكی جوڵانەوەی نەوەی نوێ تێكچووە. وتیشى:  لەكاتێكدا حزبەكەی تاڵەبانی سورە لەسەر پێشێلكردنی یاساو رێگریكردن سەردانی كەسوكارو هاوڕێكانی. ئەم رەفتارە هەڕەمەكی و نایاساییانە ئەوە پشتڕاستدەكەنەوە كە دۆسیەكە بەتەواوەتیی سیاسییەو شەقام لەم پێشێلكارییانە بێدەنگ نابێت.   تائێستا لایەنە فەرمیەکان لەزیندان و تەندروستى هیچ زانیارى و لێدوانێکیان لەسەر ئەم زانیاریانەو تەندروستى شاسوار عەبدواحید نەخستوەڕوو شەوی ١٢ـی ئەم مانگە شاسوار عەبدولواحید سەرۆکی جوڵانەوەى نەوەى نوێ لەلایەن هێزێکی پۆلیسەوە لەماڵەکەى خۆى لەسلێمانى دەستگیرکرا. پێنجشەممە ٢١ـی ئابی ٢٠٢٥، دواى نۆ رۆژ لە دەستگیرکردنی شاسوار عەبدولواحید، سەرۆکی جوڵانەوەی نەوەی نوێ بردرایە بەردەم دادگا و وتەی لێوەرگیرا، ناوبراو لەبەردەم دادوەر سەرجەم ئەو تۆمەتانەی ئاڕاستەی کرابوون رەتکردەوە.

  سەلام عەبدولخالق وتەبێژی ئاسایشی هەرێمی كوردستان ڕاگەیاند "لاهور شێخ جەنگی بە رێگەی مەدەنی ئاگادارکرا بێتە بەردەم دادگا بەڵام رەتیکردەوە". وتەبێژەکە دەشڵێت: چەکدارەکانی لالەزار یەکەمجار تەقەیان کردوو کارمەندێکی هێزە ئەمنییەکانیان کوشت و چەند دانەیەکیشیان بریندارکرد". سەلام عەبدولخالق، وتى: لاهور جەنگی بورهان لەلای دەزگای ئاسایش دەستبەسەرە و سەرجەم دەستگیرکراوانیش بەهەمان شێوە.  سەبارەت بە بارودۆخى تەندروستى، ئەوەى خستەڕوو دۆخی تەندروستیی لاهور جەنگی بورهان باشە و چاوەڕوانین دادگا بڕیاری خۆی بدات. وتەبێژی دەزگای ئاسایشی هەرێم، رایگەیاند، پۆڵاد جەنگی بورهان برینەکەی سووکە و بەمزووانە دەچێتە زیندان ئیستا لەنەخۆشخانەى فاروقەو چارەسەر وەردەگرێت. سەلام عەبدولخالق سەبارەت بەچارەنوسى ڕێبوارى حامى حاجى خالى، ئاماژەى بۆ ئەوەکرد ئەویش لاى ئاسایش دەستبەسەرەو ئێستا لەزیندانە. ناوبراو ئاماژەى بۆ ئەوەکرد نزیکەى ١٥٠ چەکدارى لالەزار لاى ئەوان دەستگیرکراون و دەستبەسەرن،  شەوی رابردتر وو هێزە ئەمنییەکان لەسەر فەرمانی دادوەر و بە گوێرەى ماددەى 56 لە یاساى سزادانى عێراقى کە تایبەتە بە هەوڵى ئەنجامدانی تاوانى رێکخراو لە رێگەى گرووپى تاوانکاری، روویان لە لالەزار کرد، بۆ دەستگیرکردنى لاهور شێخ جەنگى. لە کاتژمێر هەشتى ئێوارەوە تاوەکو درەنگانێکى شەو هێزە ئەمنییەکان بۆ ئاڵۆزنەبوونى رەوشەکە، زیاتر لە 10 جار بانگەوازیان بۆ لاهور شێخ جەنگى و ئەو کەسانەى لەگەڵى فەرمانى دەستگیرکردنیان هەبوو کرد، کە خۆیان رادەستبکەن،  بەڵام داواکارییەکەیان رەتکردەوە و بڕیارى رووبەڕووبوونەوەیاندا لەگەڵ هێزە ئەمنییەکان.

بڕیاردەری رەوتی هەڵوێست ڕایدەگەیەنێت ئێوە کە نیشتیمانی و هەستی نیشتیمانی و دامەزراوەی نیشتیمانیتان دۆڕاندبێ؛ هەرچی هێزو پارەو کورسی و  دادگاتان هەبێت براوەنین.  لەپەیامێکدا کە لەسەر تۆڕە گۆمەڵایەتى فەیسبوکى خۆى بڵاویکردوەتەوە، عەلی حەمەساڵح بڕیاردەری رەوتی هەڵوێست ئەوە دەخاتەڕوو دەزانم کەی کێتان بوێت دەتوانن دەستگیریبکەن، دەتوانن دەیان تۆمەت بدەنە پاڵمان، بەڵام دەبێت لەم قۆناغەش بڕیاری بەردەوامی بدەین، چۆڵکردنی ئەم ساحەو بێدەنگبوون لە بەرامبەر نادادی هەرگیز بژاردەی دروست نیە.. دەقى پەیامەکەى.. سی و چوار ساڵە، پێیانوایە ؛ نابێت سوپایەکی نیشتیمانی هەبێت، نابێت دادگا بۆ هەموان بێت! دەبێت هەواڵگری تایبەت بەخۆیان هەبێت، هەموو یاسا شکێنیەک بۆ خۆیان ڕەوا بێت. هیچ کەسێکیان لە کاتی دەسەڵات هەرچی بکەن؛ نادرێتە دادگا! کام بەرپرسی گەندەڵ و ناداد و کوردکوژو بەدڕەفتار درایە دادگا!  دەتوانن بە ویستی خۆتان قاچاخی بکەن، زەوی ببەن و سەرانە وەربگرن! نەوت ببەن و قۆرخکاری بکەن؛  بیکەنە دەستکەوتی نیشتیمانی!  هەردولاتان هێزی زۆرتان هەیە؛ دەتوانن هەموو کەس سەرکوت بکەن ! دەتوانن خەڵک شار بەدەرو وڵات بەدر بکەن و بیدەنە دادگا و بەویستی خۆتان سزای بدەن.  ئێستا ملیارەها دۆلارتان هەیە بەسەر میللەتێکی بێموچەوە.. چیتان دەوێت دەیکەن! ملیارەها دۆلار دەبەنە دەرەوە.. میدیای گەورەتان هەیە؛ تەنیا ئەرکیان پیشاندانی وێنەیەکی ساختەی ئێوەیە.. دەزانن لەو پاشایە دەچن، جل و بەرگی لەبەرنەبوو؛ دوروبەرەکەی هەمیشە باسی جوانی جل و بەرگیان دەکرد.. هەموو دامەزراوەکانی حوکمڕانی و دەوڵەتداریتان کوشت! کەچی میدیاکانتان باسی جوامێری ئێوە لە دەوڵەتداریتان دەکات! دڵخۆش مەبن.. لە مێژوو بڕوانن ئەوانەی وەک ئێوەبوون، چۆن ناویان ڕۆشتە مێژوو، چۆن ئەو هێزەی خەڵکی بۆ سەرکوتکردن بوە دوژمنی!  سیاسی ژیر بۆ ئەوەی پارێزراوبێت دادگای نیشتیمانی و سوپای نیشتیمانی دروستدەکات.. لە ڕوخانی شای ئێران، کاتێک دەورو بەری شا دەستگیرکران، نیگەران بوون؛ وتیان: شوێنی زیندانمان زۆر خراپە، یاساکان نادادپەروەرن! دادوەری”شۆڕش’ زیندانەکان ئێوە دروستتان کرد بۆ ئێمەو یاساکانیش هەمان یاسان کە بۆ دەستگیکردنی ئێمە دەرتانکرد.. ئێوەیەک نیشتیمان و دامەزراوەکانی؛ سوپاو هێزی ئەمنی و هەوالگری و نەوت و زەوی و پاڵاوگەو خاڵی سنوری …… هتد بەهی خۆتان دەزانن نەک نیشتیمان؛ کەواتە دۆڕاوی گەورە ئێوەن کە نیشتیمان بەتاڵ دەکەن لە دەستکەوتەکانی.. وەک کەس و هێزگەلێک ناوتان دەچێتە مێژوو؛ ڕۆڵی گەورەیان بینی لە دواکەوتنی تاکی کوردو کوشتنی هەستی نیشتیمانی و دزینی سامانی نیشتیمانی..  ئێوە کە نیشتیمانی و هەستی نیشتیمانی و دامەزراوەی نیشتیمانیتان دۆڕاندبێ؛ دەیان ساڵ ئەم میللەتەتان لە ئامانجی  مێژووی خۆی دورخستبێتەوە؛ هەرچی هێزو پارەو کورسی و  دادگا….. هتد تان هەبێت براوەنین.  لە دەسەڵاتدار تاوانبارترن ئەوانەن کە دوایان کەوتون… سەرقاڵی کوشتنی نیشتیمان و شەقهەڵدانن لە دامەزراوەی نیشتیمانی و شانازی بەم وێرانکاریە دەکەن؛ لە ژێرناوی دادگاو سەروەری یاسا سەرقاڵی یاساشکێنین! بە میلیشیا؛ سوپای نیشتیمانی دەکوژن.  دەزانم ململانێ و بەردەوامی خەباتی مەدەنی و سیاسی لە سایەی ئەم فۆڕمە لە حوکمڕانی ئێجگار قورسە؛ دەزانم کەی کێتان بوێت دەتوانن دەستگیریبکەن، دەتوانن دەیان تۆمەت بدەنە پاڵمان، بەڵام دەبێت لەم قۆناغەش بڕیاری بەردەوامی بدەین، چۆڵکردنی ئەم ساحەو بێدەنگبوون لە بەرامبەر نادادی هەرگیز بژاردەی دروست نیە.. عەلی حەمە ساڵح

بەرهەمهێنانی نەوت لە کێڵگەی موگار لە شێخان دەستپێکردەوە، پێشبینی دەکات تا کۆتایی ئەم مانگە بەرهەمهێنانی لەو کێڵگەیە ئاسایی ببێتەوە، ئەو کێڵگەیە لەلایەن کۆمپانیای هانت ئۆیڵی ئەمەریکیەوە سەرپەرشتى دەکرێت. ئەمڕۆ شەممە (23ـی ئابی 2025) وتەبێژی کۆمپانیای هانت ئۆیڵی ئەمەریکی لە لێدوانێکیدا بۆ ئاژانسی هەواڵی رۆیتەر رایگەیاند: کارەکانیان لە کێڵگەی نەوتی شێخان لە سنوری پارێزگای دهۆک دەستپێکردوەتەوە، ئەوەش دوای زیاتر لە مانگێک لە راگرتنی کارەکانیان بەهۆی هێرشی فڕۆکەی بێفڕۆکەوانەوە. وتەبێژی کۆمپانیاکە رایگەیاند: پیشبینی دەکەین تا کۆتایی ئەم مانگە بەرهەمهێنانی نەوت لە کێڵگەی نەوتی شێخان ئاسایی بێتەوە. گەڕانەوەی ئەو کۆمپانیایە بۆ کارکردن، دوای ئەوە هات کە ژمارەیەک کۆمپانیای دیکە لە ناویاندا دی ئێن ئۆی نەرویجی دەستپێکردنەوەی بەرهەمهێنانی نەوتی لە کێڵگەکانی هەرێمی کوردستان راگەیاند. مانگی تەمموزی رابردوو، زیاتر لە 20 هێرشی درۆنی و فڕۆکەی بێفڕۆکەوان کرایە سەر کێڵگە نەوتییەکانی هەرێمی کوردستان، سەرەڕای زیانی ماددی زۆرینەی کۆمپانیا بیانییەکان کارکردنیان لە کێڵگە نەوتییەکان راگرت و بەهۆیەوە بەرهەمهێنانی نەوت لە زۆینەی ئەو کێڵگانە وەستا. رۆژی (17ـی تەمموزی 2025) لە رێگەی فڕۆکەیەکی بێفڕۆکەوانەوە هێرش کرایە سەر کێڵگەی نەوتی موگارا لە سنوری قەزای شێخانی پارێگای دهۆک کە لەلایەن کۆمپانیای هانت ئۆیلەوە بەڕێوەدەبرا و بەهۆیەوە بەرهەمهێنان لە کێڵگەکە راگیرا. پێنجشەممەى ڕابردوو کۆمپانیای دی ئێن ئۆی نەرویجی  راپۆرتی چارەکی دووەمی خۆی بڵاوکردەوە، کە بەراورد بە چارەکی یەکەم بەرهەمهێنانی نەوت کەمبووەتەوە. کۆمپانیاکە ئاشکرای کرد، سەرەتای ئەم مانگە بەرهەمهێنانی نەوتی لە کێڵگەی تاوکێ دەستپێکردووەتەوە و دواتریش پێشاپوور، ئەمەش دوای ئەوەی مانگی رابردوو کێڵگەکە بە درۆن کرایە ئامانج.   قەبارەی بەرهەمهێنانی نەوت لە چارەکی دووەمی ئەمساڵدا بەپێی راپۆرتەکەی کۆمپانیای دی ئێن ئۆ، لە هەر دوو کێڵگەدا بە تێکڕا گەیشتووەتە 74 هەزار و 760 بەرمیل نەوت لە رۆژێکدا. لە کاتێکدا لە چارەکی یەکەمی 2025ـدا ئاستی بەرهەمهێنانی کۆمپانیاکە لە تاوکێ و پێشابوور 82 هەزار و 81 بەرمیل بووە.

لەژمارەى ئەمڕۆیدا رۆژنامەی "الشرق الاوسط"  ڕاپۆرتێکى لەسەر ڕوداووەکان و  شەڕەکەى لالەزار بڵاوکردوەتەوەو تیایدا دەڵێت:دانیشتوانی شاری سلێمانی تووشی شۆک بوون بە پێکدادانێکی خوێناوی، کە یەکە ئەمنییە حکومی و حزبییەکان تێیدا بەشداربوون، بەر لەوەی بۆيان ئاشكرابێت شەڕی نێوان ئامۆزاکانی ناو خێزانی جەلال تاڵەبانی، سەرۆک کۆماری کۆچکردووی عێراق بووە. لە ئێوارەی پێنجشەممەوە تا بەرەبەیانی رۆژی هەینی، دەرچوونی فەرمانی دەستگیرکردن بۆ لاهور شێخ جەنگی، ئامۆزای بافڵ تاڵەبانی، سەرۆکی یەکێتی نیشتمانی کوردستان، پەرەی سەند بۆ پێکدادان و گەمارۆدانی دراماتیکیی هۆتێلێک لە سەنتەری شارەکە، کە بە دەستگیرکردنی شێخ جەنگی، كە یەكێك بوو لەسەر سەرکردە دیارەكانی ئەو حزبە کۆتاییهات. لە ئەنجامی ئەو روبەڕوبونەوانە لانیکەم سێ کەس كوژراون و نزیکەی  (١٠) کەسی دیکەش برینداربوون، لەكاتێكدا كە ستوونی دووکەڵ لە سەنتەری شارەوەكەوە بەرزدەبووەوە، هێزە ئەمنییەکان سەرجەم دەروازەکانی چوونە ژوورەوەی سلێمانییان داخست. هێزە ئەمنییەکان ئەو شوێنەیان ئاشکرا نەکردووە کە شێخ جەنگی و دوو براکەی بۆی گواستراونەتەوە، بەڵام سەرچاوەکان ئاشكرایان كردووە: دەستگیرکراوان رەنگە روبەڕوی سزای چەند ساڵێك زیندانی ببنەوە، بەهۆی ئەوەی بە داڕشتنی پیلان بۆ تێکدانی سەقامگیری ئاسایش تۆمەتباركراون. چاودێرانی سیاسی وای دەبینن، ئەو ئۆپەراسیۆنە،  ئاشکراکردنی ململانێیەکی قووڵی ناو حزبەکەیە لە سلێمانی لە نێوان "برا دوژمن"ەكاندا، کە ساڵانێک بەرژەوەندی ئەمنی و سیاسییان بەشكردبوو.

بەپێى زانیارى چەند سەرچاوەیەکى ئاگادار، شاندى باڵاى هەرێمى کوردستان لە سەرەتاى ئەم هەفتەیەدا سەردانى بەغداد دەکات، بۆ یەکلاکردنەوەى پرسى داهاتى نانەوتی و هەناردەکردنەوەى نەوت. چوارشەممەى ڕابردوو، شاندێکى هەرێم و شاندێکی حکومەتی فیدراڵ لە بەغداد کۆبوونەوە، تەیف سامی وەزیری دارایی عێراق و کەمال محەمەد وەزیری سامانە سرووشتییەکانی هەرێمی کوردستان لە کۆبوونەوەکەدا بەشداربوون، بەڵام جارێکی دیکە شاندەکەی هەرێمی کوردستان بە دەستی بەتاڵ و بەبێ هیچ رێککەوتنێک گەڕایەوە. سەرچاوەیەک لە ئەنجوومەنى وەزیرانى هەرێمى کوردستان، ڕاگەیاند: شاندى هەرێم سەرەتاى ئەم هەفتەیە جارێکى دیکە دەچنەوە بەغداد کە ئەمجارە چاوەڕوان دەکرێت ئاوات شێخ جەناب وەزیرى دارایی و ئابوورى و کەمال محەمەد وەزیرى سامانە سروشتییەکان بەوەکالەت لە شاندەکەدا بن، تاوەکو بڕیار لەسەر داهاتى نانەوتیی و هەناردەکردنەوەى نەوت بدرێت". راشیگەیاند، حکومەتى هەرێمى کوردستان 120 ملیار دینارى داهاتى نانەوتی بۆ مانگى حوزەیران ئامادە کردووە و هەر کات بڕیاردرا، دەخرێتە سەر هەژمارى دارایی وەزارەتى دارایی فیدراڵ لە لقى هەولێرى بانکى ناوەندى . باسى لەوەشکرد، کۆبوونەوەى شاندى هەرێمى کوردستان و عێراق بۆ ئەوەیە پرسى داهاتى نانەوتی تێدا یەکلایبکرێتەوە، تاوەکو گرفتەکانى بەردەم خەرجکردنى مووچە کۆتایی پێبهێندرێت. ئەمە لەکاتێکدایە، لەکۆبوونەوەى رۆژى سێشەممە 19ـى ئاب، ئەنجوومەنى وەزیرانى عێراق بڕیارى دابینکردنى مووچەى مانگى حوزیرانیدا بەو مەرجەى هەولێر نەوت رادەست بکات و داهاتى نانەوتی لەکاتى خۆیدا رەوانە بکات.

پەرلەمانتارێکی کوردی جەهەپە لە بازنەی ئامەد پەیامێکی سەڵاحەدین دەمیرتاش، هاوسەرۆکی پێشووتری هەدەپە بڵاودەکاتەوە، کە جەخت لەسەر بایەخی کات دەکاتەوە و دەڵێت، "گەورەترین مەترسی، بەفیڕۆدانی کاتە."   ئەمڕۆ هەینی 22ی ئابی 2025 سەزگین تانریکوڵو، پەرلەمانتاری کوردی جەهەپە لە بازنەی ئامەد سەردانی سەڵاحەدین دەمیرتاش، هاوسەرۆکی پێشووتری هەدەپە و سەلچوک مزراکلی، سەرۆکی پێشووی گەورەشارەوانیی ئامەدی لە گرتووخانەی سزا قورسەکانی ئەدیرنە کرد.   دوای سەردانەکەی، تانریکوڵو پەیامێکی ڤیدیۆیی بڵاوکردەوە و رایگەیاند، تەندروستیی دەمیرتاش و مزراکلی باشە، "سڵاو و خۆشەویستییان بۆ خۆشەویستان و دۆست و هاونیشتمانییانمان هەیە. لە نزیکەوە چاودێریی پرۆسەکە دەکەن."   بە گوتەی پەرلەمانتارەکەی جەهەپە، دەمیرتاش و مزراکلی بەهۆی سنوورداریی پەیوەندییەکانیان لەنێو گرتووخانەکەدا، زانیاریی وردیان لەسەر پێشهاتەکان نییە، بەڵام پێیان وایە "گەورەترین مەترسی بەفیڕۆدانی کاتە."   تانریکوڵو گوتیشی، "پێیان راگەیاندین کە پێویستە ئەم کاتە زۆر بە باشی سوودی لێ وەربگیرێت و دەبێت هەرچی زووە کاروبارە یاساییەکان و هەنگاوە پێویستەکانی دیکە بنرێن."   جگە لە پێویستی هەموارکردنەوەی یاساکان، تانریکوڵو پێیوایە، کێشەی پەیوەست بە جێبەجێکردنی یاساش هەیە، "پێویستە ئەمانەش چارەسەر بکرێن، بۆئەوەی متمانەی کۆمەڵگە بە پرۆسەکە بەهێز بێت. کردەوە نادیموکراسییەکان بە شێوەیەکی بەردەوام زیاد دەکەن. ئەوانیش جەختیان لەوە کردەوە کە ئەمە یەکێکە لە مەترسییە هەرە گەورەکانی بەردەم پرۆسەکە."   ئەو پەرلەمانتارە کوردەی جەهەپە جەختی لە پشتگیریی دەمیرتاش و مزراکلی بۆ سەرخستنی پرۆسەی چارەسەری کردەوە و گوتی، "ئەوەیان دووپاتکردەوە، لە هەموو دۆخێکدا لەگەڵ ئاشتیدان و پشتگیری لە دەستبەرداربوون لە چەک دەکەن."   سەڵاحەدین دەمیرتاش زیاتر لە 9 ساڵە و سەلچوک مزراکلیش زیاتر لە 6 ساڵە لە زینداندان.

نووسینگەی سەرۆکی حکومەتی هەرێمی کوردستان، ڕایدەگەیەنێت هێرشی دوێنێ شەوی سەر لالەزار لە لایەن هێزەکانی ینک ئەنجام دراوە و کێشەیەکی نێوان ینک و بەرەی گەل بووە . لەبەشێکى دیکەى پەیامەکەدا کەلەبارەی شەڕەکەى لالەزارەوە بڵاوکراوەتەوە، ئاماژە بۆ ئەوەدەکات پێویستە یاسا ببێتە جێگرەوەی بڕیاری حزبی و توندوتیژی و چیتر شەڕ و ئاژاوە، سەقاگیری هەرێمی کوردستان نەخاتە مەترسییەوە. دەقى ڕاگەیەنراوەکەى نووسینگەی سەرۆکی حکوومەتی هەرێمی کوردستان نووسینگەی سەرۆکی حکوومەتی هەرێمی کوردستان. ڕاگەیەنراوێکی بڵاو کردەوە تێیدا هاتووە: هێرشی دوێنێ شەوی سەر لالەزار لە لایەن هێزەکانی ینک ئەنجام دراوە و کێشەیەکی نێوان ینک و بەرەی گەل بووە و سەرۆکایەتی حکومەتی هەرێم ئاگادار نەبووە تا دوا ساتەکانی گەمارۆدان و پەلامار دان.  سەرەڕای هەوڵی زۆری سەرۆکی حکومەت بۆ ئەوەی شەڕ و پێکدادان ڕوو نەدات، بەڵام زۆر بە داخەوە هێڕشەکە ئەنجام درا و کوژراو برینداری لێ کەوتەوە.  زۆر نیگەران و دڵگرانین بەو ڕووداوە و ئێستاش، پێویستە یاسا ببێتە جێگرەوەی بڕیاری حزبی و توندوتیژی و چیتر شەڕ و ئاژاوە، سەقاگیری هەرێمی کوردستان نەخاتە مەترسییەوە.

سەرۆكایەتی كۆماری عیراق راگەیەنراوێكی لەبارەی روداوەكانی بەرەبەیانی ئەمڕۆی سلێمانی بڵاوكردەوە و ئاماژەی بەوەكردووە، جەخت لە دانبەخۆداگرتن و پابەند بوون بە رێكارە یاسایی و دادوەرییەكان دەكەنەوە. هەر لەو ڕاگەیەندراوەدا هاتوە: سەرۆکایەتیی کۆمار بەنیگەرانییەوە چاودێریی ئەو ڕووداوە نەخوازراوانەی کرد کە شاری سلێمانی بەخۆیەوە بینی. دەقى بەیاننامەکە.. سەرۆکایەتیی کۆمار بەنیگەرانییەوە چاودێریی ئەو ڕووداوە نەخوازراوانەی کرد کە شاری سلێمانی بەخۆیەوە بینی، کە بووە هۆی شەهیدبوونی ژمارەیەک لە کارمەندانی دەزگا ئەمنییەکان لە شارەکەدا و برینداربوونی ژمارەیەکی تر. جەخت دەکەینەوە لەسەر پێویستیی دانبەخۆداگرتن و پەنابردنە بەر ڕێکارە یاسایی و دادوەرییەکان بەپێی دەستوور و دوور لە توندوتیژی، بە شێوەیەک کە بنەماکانی دادپەروەری بچەسپێنێت و ئاسایش و سەقامگیریی هاووڵاتیان بپارێزێت. هەروەها سەرۆکایەتیی کۆمار  سەرەخۆشی و هاوخەمیی خۆی ئاراستەی خانەوادەی قوربانیان دەکات، و هیوای چاکبوونەوەی خێرا بۆ برینداران دەخوازین.  خوای گەورە سلێمانی و دانیشتووانەکەی و هەموو عێراقییەکان لە هەموو ناخۆشی و خراپەیەک بپارێزێت. سەرۆکایەتیی کۆمار هەینی ٢٢ی ئابی ٢٠٢٥

سەباح نوعمان، وتەبێژی فەرماندەی گشتی هێزە چەكدارەكانی عێراق، لەبارەی رووداوەكانی سلێمانیەوە دەلێت: دوابەدوای ئەو رووداوە ناخۆشانەی لە پارێزگای سلێمانی روویاندا، حکومەتی فیدراڵی دووپات دەکاتەوە، لایەنە پەیوەندیدارەکان رێوشوێنی یاسایی و دادوەری بگرنەبەر بەپێی بڕگەکانی دەستور. سه‌باح نوعمان، وته‌بێژی فه‌رمانده‌ی گشتیی هێزه‌ چه‌كداره‌كان له‌ڕاگه‌یه‌ندراوێكدا بڵاویكرده‌وه‌، ئەوەى خستەڕوو حکومەت جەخت لەسەر گرنگی جێبەجێکردنی ئەو رێوشوێنانە دەکاتەوە بە بێلایەنی و شەفافیەتێكی تەواو، دوور لە هەر دیاردەیەكی چەکداری یان هەوڵدان بۆ ترساندنی هاوڵاتیان. وتەبێژەکەى سودانى وتى: حکومەت جەختدەكاتەوە، جێبەجێکردنی یاسا دەبێت بەجۆرێك بێت زامنی  پاراستنی شكۆی مرۆڤ و مافەکانی  بکات. باسی له‌وه‌شكردوه‌، "حكومه‌ت درێغی ناكات له‌ ڕێگریكردن له‌ ئاژاوه‌گێڕی و به‌ره‌وپێشبردنی ئاشتی كۆمه‌ڵایه‌تی و چه‌سپاندنی سه‌قامگیری، به‌رژه‌وه‌ندی پارێزگایی سلێمانی و ئاسایش و سه‌لامه‌تی گه‌له‌كه‌ی و ئاسایشی هه‌رێمی كوردستان و عێراق به‌گشتی له‌ سه‌روی هه‌مو ڕه‌چاوكردنێكه‌وه‌ ده‌مێنێته‌وه‌". سەباح نوعمان لەبەشێکى پەیامەکەیدا دەڵێت: پاراستنی ئاسایشی هاوڵاتیان لە ناوچەکەو لە سەرانسەری هەموو پارێزگاکانی عێراق ئەرکێکی نیشتمانی و ئەخلاقییە، حکومەت درێخی ناكات لە هیچ هەوڵێک بۆ رێگریکردن لە ئاشوب و پتەوكردنی ئاشتی کۆمەڵایەتی و چەسپاندنی سەقامگیری.

رێکخەری سەنتەری میترۆ دەڵێت، هێزێکی ئەمنی چوونەتە سەر کەناڵی ئاسمانیی زووم لە شاری سلێمانی. بەڕێوەبەری کەناڵەکە دەڵێت، ئەوان لە باڵەخانەکەیاندا نەماون.   ئیدارەی کەناڵی زووم  کارمەندەکانی ئاگادارکردووەتەوە کە نەچنەوە بۆ دەوام، هەروەها پەخشی هەموو بەرنامەکانی راگرتووەو لە ئێستادا تەنیا چەند دیمەنێکی راستەوخۆ پەخش دەکات. دواهەمین پۆستیشیان لەسەر فەیسبووک دوو کاتژمێر پێش ئێستا بووە. رەحمان غەریب، رێکخەری سەنتەری میترۆ وتى: "هێزێکی گەورەی ئەمنی بە چەکی سووک و قورسەوە بەسەر کەناڵی ئاسمانیی زوومیان داداوە".   کەناڵی ئاسمانیی زووم بە میدیای بەرەی گەل دادەنرێت، کە لەلایەن لاهوور شێخ جەنگییەوە سەرۆکایەتی دەکرێت.   رەحمان غەریب گوتی: "لە کەناڵەکە تەنیا پەیامنێرێک هەبووە بە ناوی محەممەد دڵشاد و هێزەکە دەستگیریان کردووە، لە هەوڵداین بۆ ئازادکردنی".   هێمن مەحموود، بەڕێوەبەری کەناڵی زووم ئاماژەى بۆ ئەوەکرد ئاگاداری هێز نین، چونکە پێشوەختە کەناڵەکەمان چۆڵکردووە.   تاوەکو ئامادەکردنی ئەم هەواڵە، پەخشی کەناڵە بە دانانی کامێرایەکی جێگر بە شێوەی راستەوخۆ بەردەوامە.   ئەمە دووەمجارە هێزەکانی یەکێتی هەڵدەکوتنە سەر میدیاکانی لاهوور شێخ جەنگی. لە 08ـی تەمموزی 2021، کاتێک ناکۆکی کەوتە نێوان بافڵ تاڵەبانی و لاهوور شێخ جەنگی، هێزەکانی یەکێتی بارەگای تەلەڤزیۆنی ئای پڵەسیان کۆنترۆڵکرد، کە ئەوکات لاهوور جەنگی خاوەنداری دەکرد.

سەرۆکایەتیی هەرێمی کوردستان لەبارەی رووداوەکەی لالەزار دەڵێت، "پێویستە سەرجەم كێشه‌ و ناكۆكييه‌كان به‌ ياسا و دوور له‌ تووندوتيژى يه‌كلايى بكرێنه‌وه‌." سەرۆکایەتیی هەرێمی کوردستان دەڵێت، "جه‌خت له‌ سه‌روه‌ريى ياسا و پاراستنى ئاسايش و ئاراميى شار و پاراستنى سه‌ر و ماڵى هاووڵاتييان ده‌كه‌ينه‌وه‌. پێویستە سەرجەم كێشه‌ و ناكۆكييه‌كان به‌ ياسا و دوور له‌ توندوتيژى يه‌كلايى بكرێنه‌وه‌." لە راگەیێندراوەکەداسەرۆکایەتیی هەرێمی کوردستان سەرەخۆشی لە کەسوکاری قوربانییان دەکات و هیوای "زووچاکبوونەوە" بۆ برینداران دەخوازێت."   دەقی پەیامەکەی سەرۆکایەتیی هەرێمی کوردستان:   په‌يامێك له‌ سه‌رۆكايه‌تيى هه‌رێمى كوردستانه‌وه‌ دوابەدوای‌ ڕووداوه‌ نه‌خوازراوه‌کەی به‌ره‌به‌يانى ئه‌مڕۆى سلێمانى كه‌ به‌داخه‌وه‌ ژماره‌يه‌ك قوربانیى لێكه‌وته‌وه، جه‌خت له‌ سه‌روه‌ريى ياسا و پاراستنى ئاسايش و ئاراميى شار و پاراستنى سه‌ر و ماڵى هاووڵاتييان ده‌كه‌ينه‌وه‌. پێویستە سەرجەم كێشه‌ و ناكۆكييه‌كان به‌ ياسا و دوور له‌ توندوتيژى يه‌كلايى بكرێنه‌وه‌.  هاوكات، سه‌ره‌خۆشى له‌ خێزان و كه‌سوكارى سەرجەم قوربانیيەكان دەكەین و هاوخه‌میانین، هيواى زوو چاكبوونه‌وه‌ بۆ برينداران ده‌خوازين.  سه‌رۆكايه‌تيى هه‌رێمى كوردستان 2025/8/22