داواکارییەکانی شاندەکەی پارتی لە بەغدا چییە؟

    هاوڵاتى  وەزیرى کارەباى هەرێم رایگەیاند:" لەمانگی ئەیلولەوە كارەبای نیشتیمانی دەدرێتە كەرتی تایبەت". ​ئەمڕۆ دووشه‌ممه‌ 9ی ئابی 2021، کەمال محەمەد ساڵح، وەزیرى کارەباى حکومەتى هەرێم لەگەڵ بەرپرسانی وەزارەتەکەی دواین هەنگاوەکانی دابەشکردنى کارەباى نیشتیمانیان لەرێگەی کەرتی تایبەتەوە تاوتوێ کردوە و دوا قۆناغى ئامادەکردنى گرێبەستەکان بۆ بەتایبەتى کردنى کەرتى دابەشکردنى کارەبا گفتوگۆی لەسەر کراوە. وەزیرى کارەباى حکومەتى هەرێم ئاماژەی بۆ ئەوەکردووە:"  بەتایبەتی کردنی کەرتی دابەشکردنی کارەبا لە قۆناغی کۆتایی دایە و لە سەرەتاکانی مانگی ئەیلول بۆ پێدانی بە کەرتی تایبەت ئامادە دەکرێت، ئەوەش  دەبێتە هۆی "باشترکردنی دۆخی پێدانی کارەبا، کەمکردنەوەی سەرپێچی و بەفیڕۆدانی کارەبا".  لەگەڵ بەرزبونەوەی پلەکانی گەرما و وەرزی هاوین، خواستی هاوڵاتیان لەسەر کارەبا وەک هۆیەکی فێنکردنەوە زیاتر دەبێت و بەهۆیەش ساڵانە لەمانگی حوزەیراندا گۆڕانکاری لەخشتەی پێدانی کارەبادا دەکرێت.  

  هاوڵاتى  وه‌زیری نه‌وتی عێراق ڕایگه‌یاند:" ئاماده‌ن بۆ چارەسەركردنی كێشە هونەری‌و داراییەكان لەگەڵ هەرێمی كوردستان". به‌گوێره‌ی ڕاگەیەندراوێكی وەزارەتی نەوتی عێراق، ئیحسان عەبدولجەبار وەزیری نەوتی عێراق پێشوازی لەكەمال ئەتروشی وەزیری سامانە سروشتیەكانی هەرێم كردوەو ڕایگەیاندوە:' پێویستە هاوكاری هەبێت لەئیدارەدانی دۆسیەی نەوت بەوپێیەی سامانێكی نیشتیمانیە بۆ هەموو عێراق‌و پێویستیشه‌ پێكەوە كاربكەن لەپێناو بەرژەوەندی نیشتیمانیدا". هەربەپێی ڕاگه‌یه‌نراوه‌كه‌، وەزیری نەوتی عێراق لەدەستپێشخەریەكدا ئامادەیی دەربڕیوە بۆ كردنەوەی لاپەڕەیەكی نوێ‌ لەگەڵ وەزیری سامانەسروشتیەكانی هەرێم‌و دەستپێكردنی گفتوگۆیەكی بابەتیانە لەپێناو خزمەتكردن بەگەلی عێراق لەباكورەوە بۆ باشورو بەپێی دەستوری عێراق‌و پاراستنی مافەكانی پارێزگاو هەرێمەكان. لای خۆیشیەوە وەزیری سامانە سروشتیەكانی هەرێم ڕایگەیاندوە، ئامادەی هەموو جۆرە هاوكاریەكن لەڕوی پەرەپێدانی كێڵگەكانی نەوت‌و ئەنجامدانی پڕۆژەی هاوبەش‌و هاریكاریكردن لەنێوان هەردولا لەبارەی گەشەپێدانی كێڵگە نەوتی‌و غازیەكان لەپێناو بەرژەوەندی گشتی.

  هاوڵاتى وەزارەتی دارایی و ئابووری ھەرێم بڕیاریدا مانگانە نەخۆشخانە ئەھلییەکان 5٪ی باج بدەنە حکومەتی ھەرێم و نابێت ئەو باجە لەسەر ئەستۆی ھاوڵاتیان بێت. وەزارەتی دارایی ‌و ئابووری ھەرێم لە رێنماییەکی نوێدا ئاماژەی بۆ ئەوەکردووە، لەمەودوا لە بری ساڵانە پێویستە سەرجەم نەخۆشخانە ئەھلییەکان مانگانە 5٪ی باج بدەنە حکومەتی ھەرێم ‌و ھۆشداریش دەدرێتە نەخۆشخانە ئەھلییەکان ئەو رێژە باجەی دیاریکراوە.  ئەوەشخراوەتەڕوو، ''نابێت ببێتە ھۆکارێک بۆ بارگرانی لەسەرشانی ھاوڵاتیان، بەڵکو لە داھات ‌و قازانجی نەخۆشخانەکان وەردەگیرێت، ئەگەر نەخۆشخانە و پزیشکان سەرپێچی بکەن، توشی لێپێچینەوەی یاسایی دەبنەوە.'' وەزارەتی دارایی ‌و ئابووری راشیگەیاند، ''پێویستە 15ی ھەموو مانگێک ئەو رێژەی باجە بخرێتە سەر ژمێرەی بەڕێوەبەرایەتی گشتی باجەکان، ئەگەر ھەر نەخۆشخانەیەک پابەند نەبێت، مانگانە رێژەی باجەکەی بۆ 10٪ زیاد دەکرێت".

    هاوڵاتى هەپەگە ڕایگەیاند:" لە شاڕۆچکەی شاخ-ی سەر بە پارێزگای وان-ی باکووری کوردستان، گەریلاکانی یەژاستار ١٠ داگیرکەریان سزاداوە". ناوەندی ڕاگەیاندن و چاپەمەنیی هێزەکانی پارستنی گەل (هەپەگە)، ڕاگەیەندراوێکی بڵاوکردەوە و ڕایگەیاند:"ڕۆژی شەشی ئاب کاتژمێر ٥ی بەیانی، لە شارۆچکەی شاخ-ی سەر بە پارێزگای وان ناوەندێکی پەخشی ئەینتەرنێت و تەلەفۆنی دەوڵەتتی داگیرکەری تورک لە گوندی شامنس لەلایەن هێزەکانی یەژاستارەوە تەقێندراوەتەوە، پاش ئەو چالاکییە سەربازەکانی سوپای دەوڵەتی داگیرکەری تورک، بە دوو ئۆتۆمۆبێلی سەربازییەوە هاتوونەتە شوێنی چالاکییەکە و کەوتوونەتەژێر چاودێریی هێزەکانمانەوە، ڕۆژی دواتر یەکێک لەو ئۆتۆمۆبێلانە لە کاتژمێر ٤ی ئێوارە بۆمبی چێندراوی پێدا تەقێندراوەتەوە و ١٠ داگیرکەر لەو چالاکییەدا سزا دراون". لە ڕاگەیەندراوەکەدا ئاماژە بەوەشکراوە، کە هێزەکانی یەژاستار لە هەرێمی بۆتان، ئەو چالاکییەیان بۆ پیرۆزکردنی هەڵمەتی ١٥ی ئاب ئەنجام داوە. ئەوەش خراوەتەڕوو، لە چوارچێوەی هەڵمەتی شۆڕشگێڕیی بازەکانی زاگرۆس لە ناوچەی خواکورک، زاپ و ئاڤاشین، ڕۆژی شەشی ئاب لە هەرێمی خواکورک، بە چەکی قورسەوە داگیرکەرانی سەر گردی شەهید شاهان کرانە ئامانج، لەم چالاکییەدا ئامانجەکە بە شێوەی سەرکەوتووانە، ئەنجامدرا. ڕاشیدەگەیەنێت، حەوتی ئاب لە کاتژمێر ١١:٠٠ لە ناوچەی زاپ هێزەکانمان بە چەکی قورسەوە داگیرکەرانیان لە جیلوی بچووک کردە ئامانج، ژمارەی ئەو داگیرکەرانەی کە لەم چالاکییەدا سزادران ئاشکرا نەبووە. هەپەگە دەشڵێت: ڕۆژی هەشتی ئاب کاتژمێر ١٠:٠٠ لە ناوچەی ئاڤاشین، لە دژی ئەو داگیرکەرانەی کە هەوڵدەدان سەنگەر لە هەرێمی گردی سوور دروست بکەن، چالاکییەک بەڕێوەچوو، لە ئەنجامی ئەو چالاکییەدا داگیرکاران دەستبەرداری لە کارەکەیان بوون و کشانەوە. جەختیش کراوەتەوە، لەو هێرشانە دا هیچ زیانێک بەر هێزەکانیان نەکەوتووە.

هاوڵاتى وەزارەتی تەندروستی هەرێمی کوردستان رایگەیاند:" 2380 تووشبووی نوێی ڤایرۆسەکە دەستنیشانکراون و لەو ماوەدا 21 تووشبووی کۆرۆنا گیانیان لەدەستداوە، هاوکات 615 تووشبووی پێشووش چاکبوونەتەوە. بەپێی ئامارەکەی وەزارەتی تەندروستی، لە 24 کاتژمێری رابردوودا 12 هەزار و 553 پشکنین کراون، ئەنجامی پشکنینی 2380 کەس پۆزەتیڤ بوون، زۆرترین تووشبوو لە پارێزگای سلێمانی بووە.   

    هاوڵاتى یەکێتی ئەوروپا رایگەیاند:" هەمو بەڵگەکان لەبارەی ئەو پەلامارەوە دەڵێن ئێران لەپشتی هێرشکردنە سەر کەشتییە ئیسرائیلییەکەوەیە کە لەکەناراوەکانی عومان کرایە ئامانج". ئەمڕۆ یەکشەممە، یەکێتی ئەوروپا راگەیەنراوێکی بڵاوکردەوە و رایگەیاند:" هەمو بەڵگەکان لەبارەی ئەو پەلامارەوە دەڵێن ئێران لەپشتی هێرشکردنە سەر کەشتییە ئیسرائیلییەکەوەیە کە لەکەناراوەکانی عومان کرایە ئامانج هیچ بیانویەک بۆ ئەم هێرشە نیە کە هاوڵاتییەکی رۆمانیە و هاوڵاتییەکی دیکەی بریتانیای تێدا کوژرا". یەکێتی ئەوروپا راشیگەیاند:"  ئەم کردارە تاکلایەنانە کە پێچەوانەی یاسا نێودەوڵەتییەکانن، هەڕەشە لەئاشتی و ئاسایشی گەلان دەکات و پێویستە بوەستێنرێن". 30 تەموزی ئەمساڵ لەکەناراوەکانی عومان هێرشکرایە سەر کەشتییەکی نەوتهەڵگر کە لەلایەن کۆمپانیا ئیسرائیلییەکانەوە بەڕێوەدەبرا و لەئەنجامدا دو هاوڵاتی بریتانی و رۆمانی تێدا کوژراون.    

  هاوڵاتى وه‌زیری ئاوه‌دانكردنه‌وه‌ و نیشته‌جێبوونی حكومه‌تی هه‌رێم ڕایگەیاند:" له‌ دوو لیژنه‌ی ته‌نده‌ر و شیكردنه‌وه‌ی پرۆپۆزه‌له‌كان راپۆرتی خۆیان ئاماده‌كردووه‌ و له‌دوو هه‌فته‌ی ئاینده‌دا بڕیاری له‌سه‌ر رێگای ئاسن ده‌درێت و له‌ساڵی ئاینده‌وه‌ ئه‌و پڕۆژه‌ ستراتیژییه‌ ده‌چێته‌ بواری جێبه‌جێكردنه‌وه‌". ئه‌مڕۆ یه‌كشه‌ممه‌ دانا عه‌بدولكه‌ریم، وه‌زیری ئاوه‌دانكردنه‌وه‌ و نیشته‌جێبوونی حكومه‌تی هه‌رێمی كوردستان، به‌ یاوه‌ری شاندێكی حكومی پڕۆژه‌ی دووسایدكردنی رێگای نێوان سلێمانی– كه‌لاری به‌سه‌ركرده‌وه‌ و رایگه‌یاند:" بڕی 60 ملیار دیناری دیكه‌ بۆ پڕۆژه‌كه‌ ته‌رخان ده‌كرێت بۆ ئه‌وه‌ی پڕۆژه‌كه‌ له‌ هاوینی ساڵی داهاتوودا كۆتایی پێبێت". سه‌باره‌ت به‌ دووسایدكردنی رێگای نێوان كه‌لار– په‌روێزخان، وه‌زیری ئاوه‌دانكردنه‌وه‌ و نیشته‌جێبوونی هه‌رێم رایگه‌یاند كۆتایی ئه‌مساڵ ئه‌و پڕۆژه‌یه‌ش ده‌چێته‌ بواری جێبه‌جكردنه‌وه‌. له‌باره‌ی دروستكردنی رێگای ئاسن وتیشی: " له‌ دوو لیژنه‌ی ته‌نده‌ر و شیكردنه‌وه‌ی پرۆپۆزه‌له‌كان راپۆرتی خۆیان ئاماده‌كردووه‌ و له‌دوو هه‌فته‌ی ئاینده‌دا بڕیاری له‌سه‌ر ده‌درێت و له‌ساڵی ئاینده‌وه‌ ئه‌و پڕۆژه‌ ستراتیژییه‌ ده‌چێته‌ بواری جێبه‌جێكردنه‌وه‌". دانا عه‌بدولكه‌ریم، سه‌باره‌ت به‌ پێداچوونه‌وه‌ به‌ كۆكردنه‌وه‌ی داهاته‌كانی هه‌رێم وتیشی: "له‌ ئه‌نجومه‌نی وه‌زیران باس له‌سه‌ر پێداچوونه‌وه‌ به‌ كۆكردنه‌وه‌ی داهاته‌كانی هه‌رێم كراوه‌ و قوباد تاڵه‌بانی جێگری سه‌رۆكی حكومه‌ت سه‌رپه‌رشتی پێداچوونه‌وه‌ و رێكخستنه‌وه‌ی داهاته‌كانی حكومه‌تی هه‌رێمی كوردستان ده‌كات، بۆیه‌ ئه‌و كاره‌ له‌ مانگه‌كانی داهاتوودا ده‌رئه‌نجامی باشی ده‌بێت".

  هاوڵاتى مێسی بەگریانەوە رایگەیاند:" بارسێلۆنا جێدەهێڵێت". دەڵێت:" ئەگەرێک هەیە بچێتە ریزەکانی یانەی پاریس سانجێرمانی فەرەنسی". ئەمڕۆ یەکشەممە لیۆنێل مێسی، یاریزانی ئەرژەنتین و یانەی بارسێلۆنا رایگەیاند:" کە بارسێلۆنا جێدەهێڵێت". مێسی ئاماژەی بەوە دا: "هەواڵم داوە بە رێزەوە هەڵسوکەوت بکەم، هیوادارم هەر ئەوەشم لەدوای خۆم بەجێهێشتبێت". لە کۆنگرەکەدا مێسی وتی: "ئەمساڵ خۆم و خێزانەکەم چاوەڕێمان دەکرد لێرە بمێنینەوە، ئەوە لە هەموو شتێک گرنگتر بوو". جگە لە قەرەباڵخیی نێو هۆڵی کۆنگرەکە، سەتان هاندەر لە دەرەوەی هۆڵەکە بە جلی ژمارە 10ـی مێسییەوە وەستاون. کۆنگرەکە بە گریان دەستی پێکرد و لە نیوەی قسەکانیشی جارێکی دیکە ئەستێرەکەی بارسێلۆنا خۆی پێ نەگیرا و دەستی بە گریان کرد. مێسی تەمەنی 34 ساڵە، یەکێکە لە یاریزانە دیار و بەنێوبانگەکانی مێژووی تۆپی پێ کە توانیویەتی چەندی ریکۆرد بشکێنێت. هەروەها شەش جار باڵندۆر و شەش جار خەڵاتی پێڵاوی زێڕێنی بردووەتەوە کە هیچ یاریزانێکی دیکە نەیتوانیوە ئەو ژمارەیە باڵندۆر و پێڵاوی زێڕین بەدەستبهێنێت. تاوەکو ئێستا چارەنووسی مێسی دیار نییە، بەڵام پێشتر ماورێسیۆ پۆچێتینۆ، راهێنەری یانەی پاریس سانجێرمانی فەرەنسی لە کۆنگرەیەکی رۆژنامەڤانی دوای یاریی یانەکەی و تروا رایگەیاند، "هەموو راهێنەرێک حەزدەکات سەرپەرشتیی مەشقی باشترین یاریزانەکان بکات".

هاوڵاتى  مستەفا کازمی بانگهێشتی رەجەب تەیب ئەردۆغان، سەرۆک کۆماری تورکیای کرد بۆ ئەوەی سەردانی بەغدا بکات. ئەمڕۆ یەکشەممە وەزارەتی دەرەوەی عێراق لەراگەیەنراوێکدا ئاماژەی بەوەکردوە، فوئاد حسین، وەزیری دەرەوە سەردانی تورکیای کردوە و نامەیەکی مستەفا کازمی سەرۆک وەزیرانی رادەستی رەجەب تەیب ئەردۆغان، سەرۆک کۆماری تورکیا کردوە بۆ بەشداریکردن لە کۆنگرەی وڵاتانی دراوسێی عێراق. بڕیارە کۆتایی ئەم مانگە بەئامادەبونی سەرۆک و کەسی یەکەمی وڵاتانی دراوسێی عێراق، بەئامادەبونی بەرپرسانی باڵای قەتەر، ئیمارات و میسر کۆنگرەی وڵاتانی دراوسێی عێراق لەبەغدا بەڕێوەبچێت. حکومەتی عێراق بەسەرۆکایەتی مستەفا کازمی مانگی حوزەیرانی ئەمساڵیش کوبونەوەی لوتکەی عێراق، ئوردن و میسری لەبەغدا بەڕێوەبرد و لەسەر پرۆژەی شامی نوێ رێککەوتن، هەروەها کۆنگرەی وڵاتانی دراوسێی عێراقیش دەچێتە چوارچێوەی هەوڵەکانی حکومەت بۆ باشترکردنی پەیوەندییەکانی لەسەر ئاستی عەرەبی و هەرێمی.

هاوڵاتى  جێگری سەرۆكی حكومەتی هەرێمی كوردستان بڕیاریدا بەجێگیركردنی خاڵی گومرگی لەدەروازەكانی باشماخ و پەروێزخان بەمەبەستی رووبەڕووبوونەوەی" ئەوانەی لەدەرەوەی رێنمایی و بڕیارەكانی حكومەت كاردەكەن". ئەمڕۆ یەكشەممە، میدیای فەرمی یەكێتی بڵاویكردووەتەوە:" بەبڕیاری جێگری سەرۆكی حكومەتی ھەرێمی كوردستان لە رۆژی دووشەممە ٩  ی ٨ ی ٢٠٢١ ھێزەكانی ئۆپراسیۆنی ئاسایشی سلێمانی سەربەدەزگای ئاسایشی ھەرێم لە دەروازەكانی باشماخ و پەروێزخان و چەندین خاڵی تری گومرگی جێگیردەكرێن، بەمەبەستی رووبەڕووبوونەوەی قاچاخچێتی و یاساشكێنان و ئەوانەی لەدەرەوەی رێنمایی و بڕیارەكانی حكومەت كاردەكەن ."  وەك ئەو میدیایانە بڵاویانكردووەتەوە:"ئەم ھەنگاوەش سەرەتایەكی گرنگە بۆ چاكسازی و سەروەری یاسا و پارێزگاریكردن لە مافی گشتی.". هەرێمی کوردستان چوار دەروازەی سنووریی نێودەوڵەتی، دوو فڕۆکەخانەی نێودەوڵەتی و چەندین دەروازەی سنووریی فەرمی و نافەرمیی هەیە. بەقاچاخهێنان و بردنی کاڵا لە بەشێکی ئەو دەروازە سنوورییانەوە چەند ساڵێکە وەک بابەتێکی سەرەکی گەندەڵیی باسی لێوەدەکرێت.  

هاوڵاتى بەڕێوەبەرایەتی گشتی كەشناسی و بومەلەرزەزانی هەرێمی كوردستان، پێشبینییەكانی كەشوهەوای 48 كاتژمێری داهاتووی شارەكانی هەرێمی بڵاوكردەوە.  ئەمڕۆ یەكشەممە، ئاسمان لە نیوان پەڵە هەور و نیمچە هەور دەبێت، لەگەڵ بوونی تۆز و خۆڵ و زیادبوودنی خێرایی با هەندێک کات بۆ سەرووی ٢٠ کم لە کاتژمێرێکدا. ئەوەش خراوەتەڕوو، سبەینێ دووشەممە، ئاسمان پەڵە هەور دەبێت، هەندێک کات نیمجە هەور دەبێت، لەگەڵ زیادبوونی خێرایی با و ئەگەری بوونی تۆزێکی سووک.

شاناز حەسەن نوێنەری زیندانیانی بادینان دەڵێت:" لەدوای دادگایی کردنەکەی ڕۆژی ٢٩ی مانگ کە شایەتیەکەیان هەڵوەشاندۆتەوە و وتویانە متمانەیان بە ئاسایشی پارتی و دادگا نەماوە لە تۆڵەی ئەوەدا لەو ڕۆژەوە تا ئێستا زیتدانیان خراپ مامەڵەیان لەگەڵدا دەکرێت و ئەشکەنجە دەدرێن". ئەیهان سەعید، نوێنەری زیندانیانی بادینان، لە لێدوانێکدا بە هاوڵاتی وت :" هۆکاری ئەو سزادان و ئەشکەنجەدانانە، دوای ئەوە بووە کە لە دادگا زیندانیان وتویانە ئێمە نەخێر متمانەمان بە ئاسایشی پارتی نیە و متمانەمان بە دادگا نیە و ئەمانە پەنجەیان بەرز کردۆتەوە و ڕایانگەیاندووە بژی ئازادی و بمرێت دیکتاتۆرو قەرەباڵغی و دەنگەدەنگ دروست بووە و دوای ئەوە کە براون بۆ زیندان ئەشکەنجە دراون وەک تۆڵە سەندنەوەیەک لە دژی ئەو بەرخودان و ئازایەتیەی بەرامبەر خەڵک و پەرلەمانتار و کەسوکارەکانیان نیشانیان داوە". نوێنەری زیندانیانی بادینان، زیاتر ڕونیکردەوە و وتی :"ڕۆژی ٢٩ی مانگ دادگایی کردنی بەدەل بەرواری و ئومێد بەروشکی بوو زیندانیەکانی تر (شڤان سەعید و شێروان شێروانی و ئاریوان عیسا و گۆدار زێباری) وەک شایەت لەسەریان هێنرابوو کە شایەتیان لەسەر بدەن کە ئەمانە تێکدەر و تیرۆرستن و ویستویانە تەقینەوە بکەن و ئەوانیش ئەو شایەتیەیان ردەتکردەوە و ڕایان گەیاندووە "لەزێر فشاردا ٥٠ وەرەقەیان پێ وازۆ کردوین کە نەمانزانیوە ئەمە چییە و ڕێگگەیان نەداوە بیخوێنینەوە" ". هاوکات ئەمڕۆ تیمی پارێزه‌رانی چالاكوانه‌ ده‌ستگیركراوه‌كانی بادینان بانگه‌وازێكیان بۆ رای گشتی بڵاوكرده‌وه‌ و دەڵێن " سزادراوانی بادینان (ڕۆژنامەنوس و چالاکوانان ) زۆر ئەزیەت دەدرێن و فشاری زۆیان بۆ دەهێنرێت"، تیمه‌كه‌ داوای به‌پیره‌وه‌ هاتن. بانگه‌وازه‌كه‌ی تیمی پارێزه‌رانی سزادراوانی بادینان، ئه‌مڕۆ شه‌ممه‌ 7ی ئابی 2021، ئاراسته‌ی سەرۆکی هەرێمی کوردستان، سەرۆکایتی پەڕلەمان کوردستان، سەرۆکایەتی ئەنجومەنی وەزیران، سەرۆک و ئەندامانی لیژنەی مافی مرۆڤ لە پەرلەمانی کوردستان، فراكسیونه‌ جیاوازەکانی پەرلەمانی کوردستان و عێراق، دەستەی مافی مرۆڤ و تەواوی لایەنە پەیوەنددارەکان  كراوه‌. له‌ بانگه‌وازه‌كه‌ تیمه‌كه‌ ده‌ڵێت كه‌ هەر ئێستا هەواڵیان پێگەیشتووه‌ کە سزادراوانی بادینان (ڕۆژنامەنوس و چالاکوانان) زۆر ئەزیەت دەدرێن و فشاری زۆیان بۆ دەهێنرێت/ له‌سه‌ر ئه‌و بنمه‌مایه‌ش داوایه‌ك ده‌كات و ده‌ڵێت "داواتان لێ دەکەین بە پیر بانگەوازەکەمانەوە بێن کە بارودۆخی تەندروستی و شوێنی حەوانەوە و مامەڵەی کارمەندانی ئیدارەی زیندانی ئاسایشی گشتی هەولێر لەگەڵ سزادراوانی بادینان لەو پەڕی خراپیدایە و دورە لە هەموو بەها ئینسانییەکان و هیچ رەچاوی مافەکانی زیندانیانیان لەگەڵ ناکرێت". تیمی پارێزه‌ران داواشیكردوه‌ بە زوترین کات سزادراوه‌كان بگوازرێنەوە بۆ چاکسازی گەورانی هەولێر یاخود چاکسازی زەڕکا لە دهۆک و رونیكردوه‌ته‌وه‌ كه‌ بەپێی یاسا دوای سزادانی هەر ڕاگیراوێک دەبێت بگوازرێنەوە چاکسازی و وەک هەر زیندانیانی تر مامەڵەیان لەگەڵدا بکرێت. له‌كۆتایی بانگه‌وازه‌كه‌شدا تیمی پارێزه‌ران رایگه‌یاندوه‌ "ئەوانە مرۆڤن و ڕۆڵەی ئەم نیشتیمانەن و هیچ بیانوویەک نییە بۆ  هێشتنەوەیان لە زیندانی ئاسایش و نایاساییشە مانەوەیان لە ئاسایش و پێویستە بە زووترین کات سزادراوان رادەستی وەزارەتی کار و کاروباری کۆمەلایەتی بکرێن ". ڕۆزی ٢٩ی تەمموز ڕۆژی دادگایکردنی بەدەل بەرواری و ئومێد بەروشکی بوو کە لەناو هۆڵی دادگادا لەلایەن زیندانیان و کەسوکار و ئامادەبوانی ناو هۆڵی دادگاییەکەوە دروشمی بژی ئازادی و بمرێت دیکتاتۆر دەوترایەوە و دادگاییەکە دواخرا.    

  هاوڵاتى هونەرمەند بەرزانی قالەی خەڵوز لە ڕوونكردنەوەیەكدا دەڵێت:" من خۆم یەکێتیم و لە مەڵبەند دەوام دەکەم، پێویستیشم بە ئەوە نیە لایەنگیری کەسێک بکەم". هونەرمەند بەرزانی قالەی خەلوز لە ڕوونكردنەوەیەكدا ڕایگەیاند:"كۆمەڵێك پەیجی بێ ناونیشان كە خاوەن و شوێنی كاركردنیان نادیارە بە ناوی منەوە هەواڵی بێبنەما بڵاو دەكەنەوە، كە هیچ پەیوەندیەكی بە منەوە نییە ئەم بابەتەی یەكێتی زۆر لەوە گەورەترە من قسەی تێدا بکەم". ئاماژە بەوەش دەكات قسەی لەسەر هەر بابەتێك هەبێت لە ئەكاونتی تایبەتی خۆی لە فەیسبوك بڵاوی دەكاتەوەو وتیشی "لە ماوەی چەند هەفتەی ڕابردووەوە هیچ قسەیەكی لەسەر بارودۆخی ناوخۆی یەكێتی بۆ هیچ كەناڵێكی میدیایی نەكردووە". بەرزانی قالەی خەلوز ئەوەشی ڕونکردەوە:" من ئیشم شەڕە قسە نیە و ناشمەوێ وەڵامی هیچ کۆمێنت و پەیج و لایەن و کەسێک بدەمەوە". ئەم هونەرمەندە لێرەوە ڕاشیگەیاند تەنیا یەک فەیسبوکی تایبەت بە خۆی هەیە و هەر شتێک بێت لە ڕێگەی ئەو ئەکاونتەوە بڵاویدەکاتەوە. ئەمەش لەکاتێکدایە ماوەیەکە هەندێک پەیج و ئەکاونتی بێ ناونیشان بەناوی هونەرمەند و کەسانی ناسراوەوە لەسەر بابەتەکانی ڕۆژ بەتایبەت کێشەکانی ناو یەکێتی زانیاری بڵاودەکەنەوە.

  هاوڵاتى وه‌زاره‌تی ته‌ندروستی حكومه‌تی هه‌رێم ئاماری 24 كاتژمێری ڕابردوی كۆرۆنای ئاشكراكردو له‌كۆی 10 هه‌زارو 502 پشكنین هه‌زارو 52 توشبوی نوێ تۆماركراوه‌و 11 كه‌سیش گیانیان له‌ده‌ستداوه‌ و بەم ڕێژەیەش مردن بە کۆرۆنا کەمیکردووە لە چاو ڕۆژانی ڕابردوودا.  ئه‌وه‌ش له‌كاتێكدایه‌ دوێنێ‌ هه‌ینی 16 هه‌زارو 961 پشكنین ئه‌نجامدرابوو به‌هۆیه‌وه‌ دوو هه‌زارو 755 توشبوو تۆماركرابوو له‌گه‌ڵ 28 حاڵه‌تی گیان له‌ده‌ستدان.  

هاوڵاتى لەچارەکی دوەمی ئەمساڵدا عێراق لە نێو بازاڕەکانی هاوردەکردنی کاڵای ئێرانی دا لەریزبەندی پلەی دوەم بووە  کە زیاتر لە 9 ملیۆن و 611 هەزار تۆن کاڵای بەبەهای دو ملیار و 343 ملیۆن دۆلار هاوردە کردوە. ئەمڕۆ شەممە، ئاژانسی هەواڵی فارس بڵاویشیکردەوە :"لەچارەکی دوەمی ئەمساڵدا عێراق لە نێو بازاڕەکانی هاوردەکردنی کاڵای ئێرانی دا لەریزبەندی پلەی دوەم بو، کە زیاتر لە 9 ملیۆن و 611 هەزار تۆن کاڵای بەبەهای دو ملیار و 343 ملیۆن دۆلار هاوردە کردوە". ئاژانسیەکە ئاماژە بەوەشکراوە:" لە چارەکی یەکەمی ئەمساڵدا 22 ٪ ی هەناردەی کاڵای ئێران بۆ بازاڕی عێراق نێردراوە و ئەوەش بەراورد بەساڵی رابردو زیادیکردوە". ئاژانسەکە دەڵێت، چین لە ڕیزبەندی یەکەمدایە بۆ هاوردەکردنی کاڵای ئێران و هەروەها ئیمارات، تورکیا، ئەفغانستان و پاکستانیش زۆرترین بەرهەمی ئێرانی هاوردەی وڵاتەکانیان دەکەن.