دڵشاد موانى
پەیوەندییە تەلەفۆنییەکانی ئەم دواییەی دۆناڵد ترەمپ لەگەڵ بەڕێزان مەسعود بارزانی و بافڵ تاڵەبانی، لە کاتێکدا کە ناوچەکە لە بەردەم ئەگەری گۆڕانکاریی بنەڕەتیی دۆخی ئێراندایە، تەنها ئاماژەیەکی دیپلۆماسی نین، بەڵکو دانپێدانانێکی ڕاشکاوە بەوەی کە کورد لە هەر هاوکێشەیەکی نوێدا کارەکتەرێکی "بێ جێگرەوە"یە، بەڵام مێژوو پێمان دەڵێت کە "پێویستیی زلهێزەکان" لە کاتی جەنگدا، مەرج نییە ببێتە "دانپێدانانی سیاسی" لە کاتی ئاشتیدا، هەر وەک چۆن دڵسۆزیی کورد لە ٢٠٠٣ و جەنگی دژی داعش نەبووە مایەی گەرەنتییەکی نێودەوڵەتی بۆ ڕیفراندۆمی سەربەخۆیی یان پاراستنی قەوارەی هەرێم لە کاتی تەنگانەدا.

بۆیە پێویستە ئەمجارە سەرکردایەتی کورد لە "چاوەڕوانیی سۆزداری"یەوە بەرەو "دیزاینی ستراتیژی" هەنگاو بنێت. ئەمە بەو مانایەیە کە نابێت هیچ جۆرە هاوکارییەکی سەربازی یان هەواڵگری لە چوارچێوەی لێدانەکانی ئێراندا پێشکەش بکرێت، بێ ئەوەی پێشوەختە "نەخشەڕێگای گەرەنتی مافی کورد" واژۆ بکرێت، نەخشەڕێگایەک کە تەنها بەڵێنی زارەکی نەبێت، بەڵکو لەسەر چوار پایەی سەرەکی بوەستێت ئەویش: 

یەک: رەشنووسی گەرێنتی بۆ پاراستنی دەستبەجێی قەوارەی ئێستای هەرێمی کوردستانی باشوور. 

دوو: چەسپاندنی مافی بڕیاردانی چارەی خۆنووسین لەهەر دەستوورێکی نوێی ناوچەیی، بەتایبەتی ئێرانی نوێ.

سێ: نێودەوڵەتیکردنی کێشەی کورد لەڕێگەی "گرووپی پەیوەندی نێودەوڵەتی  ICG".

چوار: دانانی میکانیزمێکی سزای ئۆتۆماتیکی بۆ هەر وڵاتێک کە بیەوێت پاشەکشە بە مافەکانی کورد بکات.

گرنگترین وانە بۆ هەولێر و سلێمانی لەم ساتەدا ئەوەیە کە زلهێزەکان رێز لە "پێشنیاری نوسراو" دەگرن نەک لە "داواکاریی سۆزداری زارەکی". ئەگەر کورد وەک یەک دەنگی دیبلۆماتی باڵا نەچێتە ناو ئەم دانوستانە ستراتیژییانە، دووبارە دەبێتەوە بە ئامرازێکی کاتی بۆ پەکخستنی دامودەزگاکانی رژێمی تاران و دوای تەواوبوونی ئەرکەکەی، لە نێوان بەرداشی بەرژەوەندییەکانی واشنتۆن و پایتەختە ناوچەییەکاندا جێدەهێڵرێت.

دەبێت پەیامی کورد لە "پشتیوانمان بن، چونکە هاوپەیمانێکی دڵسۆزین بۆتان" بگۆڕێت بۆ "ئێمە هاوبەشی سەقامگیرین و سەقامگیریش پێویستی بە گەرەنتی یاسایی و نێودەوڵەتییە".

ئێستا کاتی ئەوەیە کورد وەک "ئەندازیارێکی سیاسی" مامەڵە بکات نەک وەک "بەکرێگیراوێکی جوگرافی"، چونکە تەنها کاتێک سەروەری و سەربەخۆیی بەدەستدێت کە هاوکارییە مەیدانییەکان بکرێنە مەرجێکی یاسایی و لە چوارچێوەی دەزگا نێودەوڵەتییەکاندا کۆنکرێت بکرێن.

بە کورت و کوردی: نابێت مێژوو دووبارە بکرێتەوە، چونکە ئەمجارە باجی هەڵە، تەنها لەدەستدانی دەرفەت نییە، بەڵکو لەدەستدانی پاشەڕۆژی نەتەوەیەکە کە چیتر تاقەتی نائومێدیی سیاسی نەماوە.