قەرەیلان: دەبێت ئۆجەلان ئازاد بکرێت بۆ ئەوەى سەردانی هەموو شوێنێک بکات

سازدانی: ئارا ئیبراهیم وتەبێژی كۆماجڤاكێن كوردستان(كەجەكە) زانیاری زۆر وردو نەبیستراو دەربارەی ورەی رووخاوی سوپاكەی ئەردۆغان ئاشكرا دەكات و دەڵێت:" ئەو سەربازانەی چالاكی گەریلا بەرانبەریان دەكرێت و لێیان دەكوژرێت، دواتر ئەوانەی ماونەتەوە بەپەلە دەیانگۆڕن بۆ ئەوەی ئەو ترس و دڵەڕاوكێیە نەگات بەسەربازانی دیكەیان". زاگرۆس هیوا، وتەبێژی كۆماجڤاكێن كوردستان(كەجەكە)، لەم چاوپێكەوتنەیدا لەگەڵ هاوڵاتی دوا ئاماری شەڕو پێكدادانەكان و چالاكی گەریلاكانی ئازادی كوردستان باس دەكات و دەڵێت:"  لەناوەڕاستی مانگی نیسانی ئەمساڵەوە كە ئۆپەراسیۆنی سوپای تورك دەستی پێكردووە تائێستا هەزارو 203 سەربازی تورك كوژراون". هەروەها دەشڵێت:"تائێستا سوپای تورك بەدیاریكراوی 792 جار چەكی كیمیاوی 15 جار بەچەكی تێرموبارەك و چەكی نیوكلەری ئەتۆمی هێرشی كردووە، سی هەزار بۆمبی لەناو فڕۆكەى سەربازى فڕێداوەتە خوارەوە". هاوڵاتی: دوا ئامار لەو كاتەوەی ئۆپەراسیۆنی چنگی قوفڵ دەستی پێكردووە لەناوەڕاستی مانگی نیسانی ئەمساڵەوە، تا ئەم ساتە چەند سەربازی تورك كوژراون و چەند هێرشی سەربازی كراوەتە سەرتان؟ زاگرۆس هیوا: یانی ئەوەی توركیا دەیكات ئۆپەراسیۆنێكی سەربازی نییە و شەڕێكی گەورە وەك ئەوەی شەڕێك بێت لەنێوان دوو دەوڵەت و تەنانەت زیاتر لەوەش، بەپێی قەبارەی ئەو شوێنانەی دەیەوێت داگیری بكات ئەو شەڕو ئەبعادەی كەمتر نییە لەو شەڕەی كە لەئۆكرانیادا هەیە. مرۆڤ وەكو شەڕێكی داگیركاری و جینۆساید دژ بەگەلی كورد پێویستە پێناسەی بكات، شەڕی دەوڵەتێكی فاشیست دژ بەگەلی كورد، تائێستا لەو شەڕەدا وەكو ئامارێك هێرشی فڕۆكەی سەربازی دوو هەزارو 116 بووە، هێرشی بە هەلیكۆپتەر، ئەو هەلیكۆپتەرانەی لەناو هەرێمی كوردستان و قەرەقۆڵەكانی تورك هەڵدەستن كە چیای كورەژارو ئامێدی بۆردومان دەكەن هەزارو 575 جارە، هێرشی تۆپ و هاوەن و كاتیۆشاو هەندێ جاریش ساروخی بالیستی كە ئەنجامدەدرێت زیاتر لە دوو هەزار جار بووە. لەو شەڕو پێكدادانەدا تائێستا كە هاتۆتە  بەردەستمان و گەیشتووە بەناوەندی چاپەمەنی راگەیاندنی هەپەگە  هەزارو 203 عەسكەری تورك كوژراون.  ئەو هەژمارەیە هەڤاڵان چوونەتە سەر جەنازەكەیان و بەچاوی خۆیان بینیویانن، رەنگە زۆرتریش بن، گەریلا تا جەنازە نەبینن ناڵێن ئەوەندە كوژراو هەیە، ئەوانەشی كە رەنگە كوژرابێت و ژمارەكە نادەن بەئێمە، ئەو ئامارانە ئەوانەیە كە گەریلا بینیویەتی كوژراوەو چووەتە سەر جەنازەكەیان.    ئەو لەشكرانەی بەو شێوەیە دادەبەزێنرێن گورزی گەریلایان بەردەكەوێت هەموو دەروونیان تێكدەچێت، ئەو شتەی كە پێیان دەوترێت و ئەو واقعەی لەسەر ئەرزی واقع دەیبینن یەكناگرێتەوە، لەبەرئەوە زۆر دەترسن تووشی ترس و تۆقین و دڵەراوكێ دەبنەوە، ئەگەر سەیری ڤیدیۆی چالاكییەكانی گەریلا بكەیت تەنانەت سەربازەكان دەست و لاقیان ناكرێتەوە كەوەڵامیش بدەنەوەو چۆكیان دەشكێت   هاوڵاتی: گەریلا لەزۆربەی ناوچەكان بەرخودان دەكات، هەم لەباكورو هەم لەباشوور، دەكرێت چالاكییەكانی گەریلا لەباكور ئاماژە پێبدەن؟ بۆ ئەوەی خەڵك تێبگات لەوەی گەریلا لەباكوری كوردستانیش دژی سوپای تورك بەرگری دەكات؟ زاگرۆس هیوا:چاپەمەنی توركیا بەئەنقەست هەژماری كوژراوەكانی توركیا لەئەنجامی چالاكییەكان كە لەباكوری كوردستان دەكرێت ئاشكرای ناكات، دەیەوێت وا بڵێت كە گەریلا لەباكوری كوردستان نەماوەو تەنها لەباشووری كوردستاندا هەیە. بەداخەوە هەندێ چاپەمەنی باشوری كوردستان سەر بەپارتی دیموكراتی كوردستان هەمان ئەرگومێنتی توركیا بڵاودەكەنەوە وەكو چۆن لەباشوور چالاكی هەیە لەباكوری كوردستانیش چالاكی هەیە، بەڵام تەبیعەتی چالاكییەكان جیاوازن لەباكور هەم لەچیاكان چالاكی هەیە هەمیش لەناو شەقامەكان و شارەكان.  چالاكی ناوشارەكان لەڕێگەی تیمەكانی تۆڵەسەندنەوەی (هەپەدەهە) ئەنجام دەدرێت، (هەپەدەهە) بزوتنەوەیەكی شۆڕشگێڕییە بۆ هەموو توركیایە نەك تەنها بۆ باكوری كوردستان، لە ئەستەنبوڵەوە بیگرە تا دیاربەكرو ئامەد  هەم (یەپەسە) یەكینەكانی پاراستنی سڤیل، ئەو چالاكیانە ئەنجام دەدەن، شوێنی ئیكۆنۆمی فاشیستەكان و ئەو شوێنانەی كە وەكو سەرچاوەی داهاتی ئەكەپەو مەهەپەن كە هی جەماعەتی ئەردۆغان و باغچەلین ئەوانە دەكەنە ئامانج، زۆر جار راگەیاندنی توركیا دەڵێت ئاگرێك كەوتووەتەوە یان شوێنێك و بۆریەكی غاز تەقیوەتەوە، بەڵام زۆربەی ئەوانە  درۆن و (هەپەدەهە) زۆربەی چالاكییەكانی بڵاودەكاتەوە بۆ رای گشتی. لەچیاكانی باكوری كوردستان چالاكی هەیە، لەدوو مانگی رابردوودا لە ئامەد و لیجە و لەئەنجامی ئۆپەراسیۆن و پێكداداندا دوو سەربازی تورك كوژراون، لە چیای ئاگری 13 سەرباز كوژراون، لەچیای جودی پێنج سەربازی تورك كوژراون، لە چیای گابار دوو سەربازی دیكە كوژراون،  لەچیای كاتۆ دوو سەربازی دیكە كوژراون، زیاتر لە بیست سەربازی ئەوەی گەریلا بەچاوی خۆی بینویەتی كوژراون، ئەو ئامارەی كە گەیشتووەتە دەست ناوەندی راگەیاندن و چاپەمەنی هەپەگە، زۆر چالاكی دەكرێت و راپۆرتەكەی درەنگ دێت، بەدیاری كراوی بیست سەربازی تورك لە شوێنی جیاجیا لە ئامەدەوە تا وان كوژراون.     ئامانجی توركیا زیاتر روون و ئاشكرا بووەتەوە كە هەموو باشووری كوردستان قۆناغ بەقۆناغ داگیر بكات، تا ئەوكاتەی شكست نەهێنێت ئەو ئۆپەراسیۆنە هەر بەردەوام دەبێت تا موسڵیش داگیردەكات   هاوڵاتی: ئۆپەراسیۆنی چنگی قوفڵی ئەردۆغان تاكەی دەخایەنێت، هیچ زانیارییەك هەیە شەڕ رابگیرێت؟ زاگرۆس هیوا: ئەوەی كە  ئەردۆغان بەهی خۆی دەزانێت لەچوارچێوەی خەونی عوسمانی نوێدا لەبەرئەوە ئۆپەراسیۆنەكەی هی ئەوە نییە بیكات و پاشەكشە بكات، شەڕێكە دەیەوێت داگیری بكات و تێیدا بمێنێتەوە، تا ئەوكاتەی سوپای توركیا شكست نەهێنێت ئەو شەڕی داگیركارییانە هەر بەردەوام دەبێت، پێویستە وەكو چۆن خوێندنەوەمان بۆ ئەو ئۆپەراسیۆنانە دەكرد، ئێستا لەم قۆناغەی ئێستا خوێندنەوەمان بگۆڕین، چونكە وەزعەكە گۆڕانكاری زۆری بەسەردا هاتووە، ئامانجی توركیا زیاتر روون و ئاشكرا بووەتەوە كە هەموو باشووری كوردستان قۆناغ بەقۆناغ داگیر بكات، تا ئەوكاتەی شكست نەهێنێت ئەو ئۆپەراسیۆنە هەر بەردەوام دەبێت تا موسڵیش داگیر دەكات، ئەگەر لەوەدا سەركەوت دەیەوێت دەست بەسەر هەموو باشوری كوردستان و تەنانەت عێراقیشدا بگرێت، چونكە بەشێكی زۆری عێراق بەموڵكی خۆی دەزانێت.      ئاماری شەڕ بەرێگەی ئامێری بێتەل دەوترێت و هەمان رۆژ بڵاودەكرێتەوە، بەڵام بەڵگەو دیكۆمێنتی ئەوانە درەنگتر دەگاتە ناوەندی راگەیاندن و چاپەمەنی هەپەگە، كە بۆ رای گشتی بڵاویبكاتەوە هاوڵاتی: ئایا سەربازانی تورك تووشی ترس و دڵەڕاوكێ و نائارامی بوون بەرانبەر گەریلا لە زاپ و ئاڤاشین و كوڕەژاررۆ هەموو ناوچەكانی دیكە، ئەگەر ورد باسی بكەن؟ یان ئەگەر دیلێكتان دەستگیر كردبێت باسی كردبێت؟ زاگرۆس هیوا: توركیا بەهێزی تەكنیك و ئیستخبارات شەڕ دەكات، لەشكری توركیا لەشەڕی دەستەو یەخەداو لەشەڕی نزیكدا ئەو توانایەی نییە، ئەو عەسكەرانەی هاتوونەتە شەڕ لەباشووری كوردستان هەموو بەپاڵپشتی تەكنیك و درۆن ئەوانەوە تەیارەو هەلیكۆپتەری شەڕ  لەخزمەتیاندایە، هەربۆیە بەو باوەڕەوە دێن كە پشتی خۆیان بەستووە بەتەكنیك و تەكنەلۆجیا، بەڵام دەبینن تەكنەلۆژیا زۆر كاریگەری نییە بەهۆی تەكبیرەكانی گەریلاكانی ئازادی كوردستانەوە، ئەوكاتە تووشی ترس و دڵەراوكێی و تۆقین دەبنەوە. باسی تەپەی جەهەنم دەكرێت ئەو تەپەیە سوپای توركیا خۆی ناوی ناوە، كە لەساڵی نەوەدەكان گورزی توندیان لێدراوە، بۆیە ئەو ناوەیان لێ ناوە، بۆیە بۆتە جەهەنم بۆ سوپای تورك، ئەمساڵیش هەمان گردو تەپە بۆ سوپای تورك بووەوە بەجەهەنم، لەهەرێمی زاپ. ئەو لەشكرانەی بەو شێوەیە دادەبەزێنرێن گورزی گەریلایان بەردەكەوێت هەموو دەروونیان تێكدەچێت، ئەو شتەی كە پێیان دەوترێت و ئەو واقعەی لەسەر ئەرزی واقع دەیبینن یەكناگرێتەوە، لەبەرئەوە زۆر دەترسن تووشی ترس و تۆقین و دڵەراوكێ دەبنەوە، ئەگەر سەیری ڤیدیۆی چالاكییەكانی گەریلا بكەیت تەنانەت سەربازەكان دەست و لاقیان ناكرێتەوە كە وەڵامیش بدەنەوەو چۆكیان دەشكێت. ئێستا تووشی دڵەراوكێی و ترسی زۆر و زەق بوون، ئەو یەكینانەی توركیا كە گەریلا چالاكیان لەسەر دەكات بۆ ئەوەی ئەو ترسە لەناو هەموو هێزەكان بڵاونەبێتەوە توركیا تەكنیك و تەكبیر وەردەگرێت، ئەگەر یەكینەیەك گەریلا چالاكی لەسەر كرد، 10 كەسیان كوژرا یان بیستیان كوژران، ئەمجارە هەموو ئەوانە دەگۆڕێت و گروپێكی نوێ دەهێنێت، 50 كەسی نوێ دەهێنێ بۆ ئەوەی كە بڵێن ئەو ترسە لەناو ئەو سەربازانە بڵاونەبێتەوە، هەربۆیە توركیا بەردەوام جێگۆڕكێ بە هێزەكانی دەكات، تا بتوانێت بەسەر ترسی سەربازەكانیدا زاڵ ببێت، ئەو عەسكەرانەی كە ئێمەش دەكوژرێت، هەموو لەشكرەكان دەگۆڕن و ئەوانە دەبەنەوە باكوری كوردستان یان توركیا و ئینجا لەشكری نوێ دەهێنن، ئەوان نازانن  بەسەر لەشكری پێش خۆیان چیان بەسەردا هاتووە، توركیا بەو شێوەیە دەیەوێت بەسەر ترسی سەربازەكانی لەباشوری كوردستان و هەرێمەكاندا زاڵ ببێت. شێوازی شەڕی گەریلایی گۆڕاوە شەڕەكە بەتیمی دوو یان سێ كەسی بەتیمی تەڤگەر تیمی مۆبایل، هەربۆیە دەرفەتی دیلگرتن یان گرتنی جەنازەی سەربازی تورك نییە، چالاكییەكەیان دەكەن و هەر زوو پاشەكشە دەكەن و دەچنە شوێنی دیكە.  ئەو تاكتیكە بەكارناهێنرێت كە دیل بگرن، تائێستا ئەسیرو جەنازەی توركیا لەدەست هەڤاڵانی گەریلادا نییە، بەڵام جەنازە لەشوێنێك ماوەتەوەو توركیا ناتوانێت بێت جەنازەكانیان بباتەوەو هەڵبگرێت، گەریلاش بۆ ئەوەی خۆی بپارێزێت خۆی نزیكی ئەو جەنازانە ناكاتەوە، لە زۆر چالاكی دەكرێت بەتایبەت لە تونێلەكانی شەڕدا كە لەشكری دوژمن دێت، جەنازەكانی دوژمن لەژێر كۆنترۆڵی گەریلادا دەمێنێتەوە، لەشكری توركیا زۆر بەدەگمەن دەتوانێت ئەو جەنازانە هەڵبگرێت، زۆرجار ئەو جەنازانە لەچیاكان دەیانخەنە خوارەوە بۆ ئەوەی كە گەریلا راكێشی نەكات و دەستی بەسەردا نەگرێت.   توركیا چونكە ناتوانێت زەڕبە لەگەریلا بدات لەهەر شوێنێكی دیكە كوردێكی ئازاد ببینێت هێرش دەكات و وەكو گەریلا حسابی بۆ دەكات، ئەو هێرشە لەو چوارچێوەیەدا پێویستە بخوێنینەوە.   هاوڵاتی: ئەو چەكانەی دەستی بەسەردا دەگرن، چەكەكان هەمووی توركین یان چەكی وڵاتانی دیكەی تێدایە بەتایبەت كە ئەندامی ناتۆیە؟ زاگرۆس هیوا: توركیا وڵاتێكی ناتۆیە هەموو چەك و ئاموری سەربازی لە ئامووری ناتۆ بۆ دابین دەكرێت، توركیا بۆ خۆی وەكو وڵات تواناكاری ئەوەی نییە خۆڕسكانە چەك دروست بكات، ئەوەی تائێستا دروستی كردبێت (مەلەزە)، ئەویش ئاوێتەی ژێرسێ و چەكی كڵاشینكۆفە، چەكەكانی دیكەی ئەگەر لە توركیا دروست بكرێت، تەكنەلۆژیاكەی هی توركیا نییە، مانی فەكچەرە زۆربەشی لە ئەوروپاوە دەهێنن لەتوركیادا لە كارگەكاندا پێكەوە دەیبەستن و گرێی دەدەن دەیكەنە چەك، چ هەلیكۆپتەر بێت چ تانك بێت، درۆن بێت.  هەموو شتێكی ماڵی توركیا بۆ خۆی بەرهەمی بهێنێت، شتی وا نییە، بۆ نموونە توركیا زۆر بەشان و باڵی كۆپتەری ئەتاكدا دەهات، وتیان ئەمە خۆمان دروستمان كردووەو ویستی بیفرۆشێت بە پاكستان، ئەمریكا ئیجازەی پێنەدا، دواتر دیاربوو هەناردەی بكات كە زۆربەی شتەكانی بەتایبەت ماتۆڕەكەی لە ئەمریكاوە هێناویانە تا ئیجازەی ئەمریكا نەبێت ناتوانێت هەناردەی دەوڵەتەكانی دیكەی بكات. هەروەها تانكی توركیاو فرۆكەی بە تەكنەلۆژیای ناتۆ هەمووی لەوێوە دەهێنن، ئێستا فرۆكەی كەشف كەشفی چەكدار بریقەدارە، ئەوەش هەر بەشێكی  لەوڵاتێكەوە دێت، كامێراكەی لەكەنەداوە دێت و تەرماڵەكەی لە ئەڵمانیاوە دێت، ماترەكەی لەئەمریكاوە دێت ساتفۆرەكەی لەبەریتانیاوە دێت، هەر شتێك لەوڵاتێكەوە هێناویەتی و ئەو وڵاتانە ئیزنیان پێداوە كە دروستی بكات، بەبێ ئیزنی ئەوان ناتوانێت بیفرۆشێت، چونكە هەموو پارچەكانی هی دەوڵەتانی دەرەوەیە.   سوپای تورك جەسارەتی ئەوەیان نییە لەناو ئەشكەوت و تونێلەكان شەڕ بكەن، هەربۆیە چەكی كیمیاوی بەكاردەهێنن كە حەوت جۆرن، هەروەها كە چەكی كیمیاویش كاریگەری نابێت بەهۆی تەكبیری گەریلاكانەوە، چەكی تێر موبارەك بەكاردەهێنن بەڵگەمان بەدەستەوەیەو بۆ رای گشتی  ئاشكرامان كردووە.   هاوڵاتی: لەماوەی چەند رۆژی رابردوودا، قەرەیلان باسی ئەوەی كرد كە تورك تووشی شكستێكی گەورە بووە، باسی ئەوەی كرد ورەی گەریلاكان زۆر بەرزە بەرانبەر سوپای تورك، پێتانوایە گەریلا دەتوانێت چی بكات؟ زاگرۆس هیوا: ورەی گەریلا بەرزە، تا ئێستا شوێنێك لەو شوێنانە پاشەكشەی نەكردووە، راستە توركیا بە حكومی تەكنەلۆجیای سەربازی و هاوكارییەكانی پارتی كە لەپشتەوە خەنجەر لەگەریلا دەدات و رێگە دەدات سوپای توركیا بێت، توانیویەتی بچێتە هەندێ شوێن، بەڵام گەریلاش لەو شوێنانە پاشەكشەی نەكردووەو گەریلاش لەو شوێنانە شەڕ دەكات. ورەی گەریلا بەرزە لەبەرئەوەی هەموو رۆژێك چالاكی لەسەر دوژمن دەكات، ئەنجامیان هەیە، توركیا تا ئێستا نەیتوانیوە هیچ شوێنێك داگیر بكات كە گەریلای تێدا نەمێنێت، گەریلاش هەر لەو شوێنانەیە. توركیا لەم شەڕەدا ئەوەی داوەتە بەرچاو كە بەدەیان هەزار سەربازی بكوژرێت، چونكە توركیا حسابی داگیركاری و سەدان ساڵی داهاتوو دەكات و نایەوێت بگەڕێتەوە، بۆ توركیا گرنگ نییە كە بەدەیان هەزار لەشكری بكوژرێت، پێویستە رای گشتی كورد ئەوە بزانێت ئەوانەی لەهەرێمەكانی زاپ كوژراون ئامارێكی زۆرە، توركیا سوورە لەسەر داگیركاری، گیانی عەسكەرەكانی خۆی بەلاوە گرنگ نییە، لەچوارچێوەی پڕۆژەیەكی درێژخایەندا ئەو شەڕی داگیركارییە ئەنجام دەدات.   ئەگەر یەكینەیەك گەریلا چالاكی لەسەر كرد، 10 كەسیان كوژرا یان بیستیان كوژران، ئەمجارە هەموو ئەوانە دەگۆڕێت و گروپێكی نوێ دەهێنێت، 50 كەسی نوێ دەهێنێ بۆ ئەوەی كەبڵێن ئەو ترسە لەناو ئەو سەربازانە بڵاونەبێتەوە، هەربۆیە توركیا بەردەوام جێگۆڕكێ بەهێزەكانی دەكات، تا بتوانێت بەسەر ترسی سەربازەكانیدا زاڵ ببێت   هاوڵاتی: ڤیدیۆیەكی گەریلا تیڤیم بینی كە 18 سەربازی تورك كوژراون، بەڵام پاش چەند كاتژمێرێك ئامارێكی دیكە بڵاوكرایەوە كە یەژاستار بیست داگیركەری كوشتووە؟ ئەم دوو ئامارە جیاوازە هەست دەكەیت بەریەكەوتن دروست دەبێت لەسەر ئامارەكان؟ زاگرۆس هیوا: ئەو ڤیدیۆیەی كە 18 سەربازی تورك تێیدا كوژرا، گردی جەهەنممە، كە پێشتر باسم كرد ، 25ی مانگی رابردوو بووە، بەڵام ئەو ئامارەی یەژاستار بڵاویكردەوە هی سێ رۆژ لەمەوبەرە،  ئاماری یەژاستار هی گردی جودییە لەنزیك ئامێدی، گوندی فڵە، بەڵام تەپەی جەهەنەم لەسەر سنورە. ئاماری گەریلا بە دوو شێوە بڵاودەبێتەوە، یەك ئامار بەڕێگەی ئامێری بێتەل سەبارەت بەچالاكییەكان دەدرێت، یان ئەو ئامارەی دیكە كە ئەو وێنەو ڤیدیۆیانانە كە گەریلا  لەكاتی چالاكییەكاندا تۆماری دەكەن.  ئەو وێنەو ڤیدیۆیانە درەنگ دەكاتە دەستی ناوەندی راگەیاندن و چاپەمەنی هەپەگە، چونكە فڕۆكەی كەشف هەیە، زۆر شوێن هەیە پارتی دیموكراتی كوردستان گەمارۆی داوە، گەیاندنی ئەو وێنەو ڤیدیۆیانە درێژە دەكێشێت و كاتی دەوێت، چونكە گەریلا ئینتەرنێت و مۆبایل بەكارناهێنێت لەبەر هۆكاری ئەمنی مەجبوور بەدەست دەگاتە شوێنی ناوەندی راگەیاندن بۆیە ڤیدیۆو وێنەكان درەنگ دەگەن. زۆر چالاكی هەیە بەتایبەت خستنە خوارەوەی هەلیكۆپتەر ڤیدیۆكەی هەیە، وێنەكانی هەیە، بەڵام هێشتا نەگەیشتووە بەدەست ناوەندی راگەیاندنی هەپەگە، هەر بۆیە وەكو ناكۆییەك با نەبینرێت، ئاماری شەڕ بەڕێگەی ئامێری بێتەل دەوترێت و هەمان رۆژ بڵاودەكرێتەوە، بەڵام بەڵگەو دیكۆمێنتی ئەوانە درەنگتر دەگاتە ناوەندی راگەیاندن و چاپەمەنی هەپەگە، كە بۆ رای گشتی بڵاویبكاتەوە.     ئەو شوێنانەی  كە مقەڕو ئەرتەشی توركی لێیە بۆ ئەوەی گەریلا  هێرش نەكات، چەكدارانی پارتی بوونەتە قەڵغان، چونكە ئەوان دەزانن گەریلا هێرش بكات تورك دەكوژرێت نایانەوێت چەكداری تورك بكوژرێت، چەكدارەكانی پارتی پاسەوانی بامەڕنێ و كانی ماسێ و شیلادزێی قەرەقوولەكانی توركیا دەكەن، لەلایەكی دیكەوە  هەموو زانیارییەكی هەواڵگری دەدەنە سەبازانی توركیا، ئامانج نیشانی توركیا دەدەن.   هاوڵاتی: لەمیدیاكانی خۆتانەوە داوا دەكەن كە خەڵك پاڵپشتی بەرخودانی گەریلا بكەن، لەوكاتەوەی ئۆپەراسیۆن دەستی پێكردووە ئایا خەڵك پەیوەندی بە گەریلاوە كردووە؟ زاگرۆس هیوا: لەچوار بەشی كوردستان پەیوەندی كردن بە گەریلاوە هەیە، لە باكورو باشورو رۆژئاڤا و رۆژهەڵات، تائێستا بەسەدان كەس پەیوەندیان كردووە، تا ئێستاش لەباشووری كوردستان بەدیاری كراوی هەندێكیان ڤیدیۆكەشیان بڵاودەكەنەوە زیاتر بووە بەهۆی كاردانەوە بەرانبەر ئەو هێرش و داگیركارییانەی توركیاوە. لەهەر چوار بەشی كوردستانەوە پشتیوانییەكی بەهێزی گەریلا هەیە بۆ خۆڕاگری لەئەوروپاش هەیە، لەباشوور حزبی زەحمەتكێشان و حزبی شوعی و بەشێكی زۆر لە پەرلەمانتارەكان و خۆپیشاندان كرا لەبەردەم یوئێن لەهەولێر، زیاتر لەسەد رۆشنبیر كۆبوونەوەیان كرد لە مێرگەپان و ئیدانەیان كرد و كەمپینی چالاكی گەل لە هەرێمی سلێمانی و راپەرین و دەربەندیخان هەیە، خەڵك بەهۆی سەركەوتنی گەریلا لە دەربەندیخان شیرینی بڵاوكردەوە، لەئەوروپاوە هاتوون كە لەگەڵ هەموو لایەنەكان كۆبوونەوە، ئەمانە پاڵپشتی بەهێزە بۆ گەریلاكان. هاوڵاتی: لە شەڕی توركیا بەرانبەر گەریلا پێتانوایە بە فعلی پارتی هاوكاری توركیا دەكات ئایا گەیشتووەتە قۆناغێكی مەترسیدار؟ زاگرۆس هیوا: پارتی دیموكراتی كوردستان بەشێوەی ئاكتیڤ لەناو ئەو هێرشەدایە، راستە هێزی چەكداری خۆی نەجوڵاندووە لەدژی گەریلا، بەڵام هێزی چەكداری پارتی هەموو ئاسانكارییەك بۆ توركیا دەكەن كە توركیا هێزەكانی لەسەر گەریلا سەركەوتوو بێت.  یەك ئاسانكاری و سیاسی و میدیایی لەبواری وتارەكەیاندا رەوایەتی دەكات، ئەوەی هێرشدەكات مافدارە ئەوەی بەرگری دەكات تاوانكراوەو وای نیشان دەدات، میدیای پارتی ئەو شەڕە دەشارێتەوەو وەكو میدیای ئەكەپەو مەهەپە دەیانەوێت ئەو شەڕە بشارنەوە. لەهەموو شوێنێ بۆمبێك بتەقێت هەموو میدیا باسی دەكات، لەكوردستاندا دوو هەزار جار بۆردومانكراوە لانی كەم  رۆژانە شانزە رۆكێت و بۆمب بەكاردەهێنێت سوپای تورك باسی ناكەن، تا ئێستا 30 هەزار بۆمب كە لەفرۆكەوە فرێ دراوەو تەقیوەتەوە ئەوان دەیشارنەوە، ئەگەر لەبامەڕنێ تەیارەی تورك منداڵێك شەهید دەكات لەجیاتی توركیا تۆمەتبار بكەن ناوێرن دەڵێن پەكەكەیە، لەهەموو شوێنێك پەكەكە تۆمەتبار دەكەن، ئەوە گەورەترین پشتیوانییە بۆ توركیا. هەموو دبلۆماسییەك و پاكانە كردن بۆ داگیركارییەكەی زمانی میدیاشی هەر هەمان شتە، لەبواری عەسكەری وەك بڵێت دەست و پێ كلیل بكات، پارتی هەموو هەرێمەكانی گەریلای ئابۆڵقە داوە، بۆ ئەوەی نە ئەرزاق بچێت نە چەك و جبەخانە بچێت، بۆ ئەوەی هەرێمەكانی گەریلا نەتوانن هاوكاری یەك بن، هەموویان هێزی پارتی بەزێرەڤانی و چەتەی رۆژو بە لەشكری گوڵان و سوپای بارزانەوە هەموو گەمارۆی هەرێمەكانی گەریلایان داوە.  ئەو شوێنانەی  كە مقەڕو ئەرتەشی توركی لێیە بۆ ئەوەی گەریلا  هێرش نەكات، چەكدارانی پارتی بوونەتە قەڵغان، چونكە ئەوان دەزانن گەریلا هێرش بكات تورك دەكوژرێت نایانەوێت چەكداری تورك بكوژرێت، چەكدارەكانی پارتی پاسەوانی بامەڕنێ و كانی ماسێ و شیلادزێی قەرەقوولەكانی توركیا دەكەن، لەلایەكی دیكەوە  هەموو زانیارییەكی هەواڵگری دەدەنە سەبازانی توركیا، ئامانج نیشانی توركیا دەدەن.  ئەگەر توركیا شتێكیشی پێی نەزانێت كە شوێنی گەریلا پارتی دیموكراتی كوردستان پێیان دەڵێت، پارتی بۆ شەڕی توركیا پێشنگایەتی دەكات، بەتایبەت لەسەر هێرشی كوڕەژارۆدا بۆ ئەوەی كاردانەوەی گەل دروست نەبێت بەرانبەر لەشكری تورك، چونكە گەلی ئامێدی  و شیلادزێ و ئاكرێ قینیان لەتوركیایە بۆ ئەوەی ئەو عەسكەرانە لە رای گشتی بشارنەوە هەموو جلی زێرەڤانیان لەبەركرد، چونكە سەر چیای كوڕەژارۆ لەوێ جلی خۆیان گۆڕی و جلی لەشكری توركیان لەبەركردەوە.  ئەو هەموو هەلیكۆپتەرە لە شیلادزێ و بامەڕنێ و ئامێدی هەستان كە چوونە سەر كوڕەژارۆ، پارتی هەموو  هاوكارییەكی موكین بۆ ئەرتەشی توركیا پێشكەش دەكات، هێز هەبووە خیانەتی كردووە، بەڵام بەدرێژایی مێژوو هیچ خیانەتێك وەك پارتی خیانەتی لەمیللەتی خۆی نەكردووە.    تائێستا سوپای تورك بەدیاریكراو 792 جار چەكی كیمیاوی بەدیاریكراوی لەدەستپێكی ئۆپەراسیۆنی چنگی قوفڵ بەكارهێناوە، نزیكەی 15 جار بەچەكی تێرموبارەك هێرش كراوە، بەچەكی نیو كلەری ئەتۆمی هێرش كراوە   هاوڵاتی: توركیا چەكی كیمیاوی بەكاردەهێنێت، پێتانوایە بۆ چەكی كیمیاوی بەكاردەهێنێت ئایا ناتوانێت بەرگری بكات؟  زاگرۆس هیوا: دوژمنی كورد لەبەردەم خۆڕاگری كورددا نەیتوانیوە بە چەكی موتەعارف (Conventional) نەیتوانیوە خۆڕاگری كورد بشكێنێت، بۆیە بەدرێژایی سەدان ساڵ دوژمنانی كورد بەردەوام كاتێك لە رێگەی یاسای شەڕەوە كاتێك كە شەڕەكەیان بەگوێرەی یاسای نێونەتەوەیی شەڕ بووە، نەیانتوانیوە خۆڕاگری كورد تێكبشكێنن ئەوكاتە پەنایان بردووە بۆ شێوازی ناموتاعارف.  بۆ نمونە دەوڵەتی بەریتانیا هەموو رۆژهەڵاتی ناوەڕاستی داگیر كرد لەبەرانبەر كورد نەیتوانی ئامانجەكانی بپێكێت، كورد خۆڕاگری كرد، سیاسەتی بەریتانیا نەیتوانی پێشبكەوێت و جێگیر بێت، ئەو كاتە بۆ یەكەمجار لەشەڕی جیهانی یەكەمدا بەریتانیا تەیارەی لە دژی كورد بەكارهێنا لەدژی عوسمانی بەكارینەهێنا، بەڵكو لە رەواندز و سلێمانی دژی كورد بەكاریهێنا، ئەوانە هەموو هی ئەوكاتە بوو. لەكاتی كۆمەڵكوژی دەرسیمدا كاتێك ئەتاتورك نەیتوانی بەرانبەر خۆڕاگری دەرسیم بگات بەئامانجەكانی خۆی، ئەو كاتە چەكی كیمیاوی لە ئەشكەوتەكاندا بەكارهێنا، 70 هەزار كەس بەو چەكە شەهید بوون.  نمونەی ئەنفال و كیمیابارانی هەڵەبجە لە باشووری كوردستان هەمان چەك بەكارهاتووە،  ئێستا لە هەرێمی زاپ توركیا هەموو چەكێكی موتەعارفی (Conventional)ناتۆی لەبەردەستدایە، بەڵام ناتوانێت و ئەنجامی نەبووە، هەر بۆیە سەرلەشێوازی ناموتەعارف دەكات (چەكی كیمیاوی، چەكی تێرموبارەك، چەكی ئەتۆم)ن، ناوەكین، چەكی كیمیاوی لەساڵەكانی نەوەدەكاندا تا ئێستا بەكاریهێناوە بەتایبەت لەم یەك دوو ساڵەی دواییدا، لەدژی تونێلەكانی شەڕو ئەشكەوتەكان، چونكە سوپای تورك جەسارەتی ئەوەیان نییە لەناو ئەشكەوت و تونێلەكان شەڕ بكەن، هەر بۆیە چەكی كیمیاوی بەكاردەهێنن كە حەوت جۆرن، هەروەها كە چەكی كیمیاویش كاریگەری نابێت بەهۆی تەكبیری گەریلاكانەوە، چەكی تێرموبارەك بەكاردەهێنێتن بەڵگەمان بەدەستموەیەو بۆ رای گشتی  ئاشكرامان كردووە. ئێستا نە چەكی كیمیاوی نە تێرموبارەك ئەمساڵ كە نەبووەتە چارە بۆیان كە خۆڕاگری گەریلا بشكێنن، سەریان لەچەكی ناوەكی داوە، ئەوەش  شتێكە بۆ خۆیان دەیڵێن و ئێمە بانگەشەی بۆ ناكەین، لەدەستی دەرچوو یەكێك لەو ژەنەراڵانەی تورك كە لەدژی گەریلا شەڕی كردووە لە پرۆگرامێكی تەلەفزیۆنیدا ئەو شتەی ئاشكرا كردووە، دەڵێن ئێمە پێنج هەزار چەكی ناوەكی تاكتیكیمان هەبووە بەرانبەر گەریلا بەكارمانهێناوە،  ئەو كەناڵەش كەقسەی تێدا كرد سی ئێن ئێن تورك بوو، بەڵام هەرزوو كەناڵەكە ئەو قسەیەی سڕییەوە، بۆیە توركیا دەیەوێت ئەوە بشارێتەوە. بەڕاستی تا ئەو ئیعترافەمان نەبینی گومانمان هەبوو لەبەكارهێنانی، بەڵام كە ئەو ژەنەراڵەی تورك ئیعترافی كرد ئیدی بەتەواوی سەلمێنرا كە چەكی ناوەكی بەكاردەهێنن.  لەهەندێ ئەشكەوتدا كە ئەو چەكە بەكارهێنراوە كاریگەری لەسەر لاشەی شەهیدانی گەریلا هەیە كە لەئەشكەوتی پێرێس بەكارهێناون لەئەشكەوتی وەرخەلێ و خاچەسور بەكارهێندراوە، لەو شوێنانە جەنازەی گەریلا دوو حاڵەتە، یەكیان ئەوەیە ئەو جەنازەیە وەك خۆڵی لێدێت زوو هەڵدەوەشێتەوە، یان بەتەواوەتی تواوەتەوە، ئەوانە ئاسەواری چەكی نیوكلێرن، چەكی ناوەكی تاكتیكین، ئەمە راستە گەریلای پێ شەهید دەبێت، بەڵام ئەمە لەدرێژخایەندا  زۆر كاریگەری لەسەر نەتەوەی كورد دەبێت كە لە كوردستانی عێراقدا ژیان دەكات. كاریگەری چەكی نیوكلێری ناوەكی ئەو كاریگەریانەی كە دروستی دەكات لەسەر سروشت و (Genetics) هەموو ئەوانە مەترسیدارن، بەڵام نە چاپەمەنی هەرێم ئەو شتە رووماڵ دەكات، نە چاپەمەنی ئەوروپی، لەحاڵەتێكدا ئەو تاوانە رۆژانە روودەدات لەبەرانبەر گەریلاو لەبەرانبەر  گەلی كورد. ئێمە نمونەی چەكی تێرموبارەكمان ناردووە بۆ رێكخراوە نێودەوڵەتییەكان و یوئێن، بەڵام بەداخەوە، چونكە بەرژەوەندی سیاسی و ئابوریان لەگەڵ توركیا هەیە قبوڵی ناكەن، پشكنین و  لێكۆڵینەوەی لەسەر بكەن، دەڵێن ئێمە تەنیا كاتێك ئەو شتانە لێكۆڵینەوەی لەسەر دەكەین كە فاكتەرێكی نێودەوڵەتی بێت، وەك ئەوەی لەبواری ئابووری توركیا هاوكاری ئەم رێكخراوە دەكات یان رەشووەمان پێدەدات، ئەم چەكە ئەتۆمیانە هەموو بەزانیاری ناتۆو ئەمریكا و بەریتانیان بەڵام هەموویان دەنگیان كپ كردووە، چونكە لەبەرژەوەندی ئەواندایە كورد لەناو بچێت، ئەو كوردەی دەبینن كە نۆكەرو دەستەمۆی خۆیان بێت، ئەوان ئەوەیان دەوێت، ئەوان كوردی ئازادیان ناوێن لەبەرئەوە هەموو تاوانەكانی توركیا چاوپۆشی لێدەكەن، تائێستا سوپای تورك بەدیاریكراو 792 جار چەكی كیمیاوی بەدیاری كراوی لەدەستپێكی ئۆپەراسیۆنی چنگی قوفڵ بەكارهێناوە، نزیكەی 15 جار بە چەكی تێرموبارەك هێرش كراوە، بەچەكی نیو كلەری ئەتۆمی هێرش كراوە، لەئەنجامی ئەوانەدا 13 هەڤاڵمان شەهید بوون بەچەكی كیمیاوی.   ئەردۆغان ئەوە نییە كە تەنها دژی پەكەكە بێت، ئەردۆغان دژی هەموو  گەلی كوردە، دونیا بەوە دەزانێت، هەندێك رەنگە خۆیان گێل بكەن بڵێن ئەردۆغان دۆستی ئێمەیە پەیوەندیمان باشە لەگەڵی، بەڵام جۆن بۆڵتن كە راوێژكاری ئاسایشی نیشتمانی بوو لەكابینەكەی دۆناڵد ترەمپ لەكتێبەكەی نووسویەتی" لای ئەردۆغان باشترین كورد كوری مردووە" لەوە بەڵگەی باشتر دەبێ چی هەبێت.   هاوڵاتی: توركیا لەماوەی رابردوو بە فرۆكەی بێفرۆكەوان لەكەلار فەرهاد شبلی و چەند هاوڕێیەكی دیكەی شەهید كرد، بۆچی ئەمانە روودەدەن؟ زاگرۆس هیوا: سەبازی توركیا هێزو توانای بەرانبەر گەریلا نییە، هەربۆیە پشتی خۆی دەبەستێت بەدرۆن و ئەو تەكنەلۆجیایەی لەبەردەستیدایە، بەڵام لەڕووبەرووبونەوەدا سەربازی توركیا ئیرادەی شەڕكردنی دەستەویەخەی لەگەڵ گەریلادا نییە، هەر بۆیە پەنا دەبات بۆ ئەو شێوازە ناخەلاقیانە كە ئەنجامی بدات، ئەو كەسانەی لەكەلار شەهید كران خەڵكی رۆژئاوای كوردستان بوون، چەكدار نەبوون و ئینسانی مەدەنی بوون بۆ چارەسەری تەندروستی و سەردان هاتبوون، توركیا چونكە ناتوانێت زەڕبە لە گەریلا بدات لەهەر شوێنێكی دیكە كوردێكی ئازاد ببینێت هێرش دەكات و وەكو گەریلا حسابی بۆ دەكات، ئەو هێرشە لەو چوارچێوەیەدا پێویستە بخوێنینەوە. هاوڵاتی: ئەو رووداوەكەی كەلار لەتوركیاوە 380 كم دوورە، ئەم فڕۆكە بێفرۆكەوانە تەنها 150 كم دەتوانێت، سیخوڕەكان دەوریان هەیە كە ئەم رووداوانە روودەدەن یان فرۆكەكان لەهەرێمەوە هەڵدەستن؟ زاگرۆس هیوا: دەسەڵاتی فاشیزیم كاتێك یاسای پەرەسەندن و پێشكەوتنی فاشیزم هەیە كاتێك هێرشی كردە سەر لایەنێك لەوەی كە زوڵمی لێكردووە دانە بەدانە دێت سەر ئەوانیش لەناوی دەبات، لەفاشیزمی هیتلەردا سەلمێندراوە كە بەرانبەر گەلی یەهودییەكان كردوویەتی و بەكارهێنرا، ئەو تەجروبەیەش لەگەڵ مرۆڤایەتی بینیویانە هاوبەشیان كردووە، ئەگەر بەفاشیست نەڵێت ستۆپ هەر بۆیە ئێستا ئەردۆغان هیتلەری رۆژهەڵاتی ناوەراستە، ئەگەر ئێستا لایەنە سیاسییەكانی كوردستان بڵێن تەنها ئیشی بەپەكەكەیە ئیشی بەئێمە نییە، بەرانبەر ئەردۆغان هەڵوێست وەرنەگرین سبەی ئەردۆغان دێت هێرشی درۆن و هێرشی كیمیاوی لەسەریان دەكات. مەسەلەی ئەردۆغان ئەوە نییە كە تەنها دژی پەكەكە بێت، ئەردۆغان دژی هەموو  گەلی كوردە، دونیا بەوە دەزانێت، هەندێك رەنگە خۆیان گێل بكەن بڵێن ئەردۆغان دۆستی ئێمەیە پەیوەندیمان باشە لەگەڵی، بەڵام جۆن بۆڵتن كە راوێژكاری ئاسایشی نیشتمانی بوو لەكابینەكەی دۆناڵد ترەمپ لەكتێبەكەی نووسویەتی" لای ئەردۆغان باشترین كورد كوری مردووە" لەوە بەڵگەی باشتر دەبێ چی هەبێت.  ئەو كەسانەی كە ئاشقی ئەمریكان دەبێت لەوە تێبگەن، زۆر بەحەز دەكەن و وێنەیان لەگەڵ دەگرن، بەرانبەر بەم راستییە چی دەڵێن هەر بۆیە پێویستە  لەبەرانبەر هێرشەكانی دەوڵەتی توركیا كەس بێدەنگ نەبێت،  ئەگەر بێدەنگ بیت سبەی لە تۆش دەدات تۆ بێدەنگ بیت هێرش دەكات، من بێدەنگ بم هێرشم دەكاتە سەر، ئەوە یاسای فاشیزمە لەهەموو دونیادا، ئەو فرۆكە بێفرۆكەوانانە شوێنیان هەیە لەباشورەوە هەڵدەستن و راداریان هەیە لەباشورەوە هەڵدەكرێت، پارتی دیموكراتی كوردستان هەموو ئیمكانیاتێكی داوە بە توركیا لەباشورەوە كۆنترۆڵی درۆنەكان بكات و هێرشی درۆن ئەنجام بدات، لە باتیڤاو باشیف و ئامێدی و ئاكرێ، وەكو دی فرۆكەی بێفڕۆكەوان بەتەنها ناتوانێت ئەو زەرەرە بدات ئەگەر سیخورێك نەبێت، هەربۆیە سیستمی پاراستنی پارتی لەخزمەت دەزگای میتدایەو چاوساغی بۆ درۆنەكان دەكەن، پارتی ئەو رێگەیەی بۆ كردونەتەوە، ئەوان سیخوڕی دەكەن، ئەگەر زانیاری نەدەن ئەی چۆن چوار وڵاتپارێزی رۆژئاوا سیاسی لەناو ئوتومبێلدان و شەهید بكات، ئەوانەی  لەگەڵی هاوكاری دەكەن و ئەوانەی چاوپۆشی دەكەن، هەڵوێست  وەرناگرن هاوبەشی ئەو تاوانانەن.  هاوڵاتی: بۆچوونتان چیە شەش لایەنی ئۆپۆزسیۆن بەبێ هەدەپە لە توركیا كۆدەبنەوە؟ زاگرۆس هیوا: ئەو شەش لایەنە ئۆپۆزسیۆنەی توركیا من باسی بنكەی جەماوەرییەكەیان ناكەم، بەڵام وەكو سیاسەتی زیهنیەتیان جیاوازیان لەگەڵ ئەردۆغان و باخچەلی نییە،  لەتوركیا یاسایەكی نهێنی سیاسەت كردن هەیە، ئەویش ئەوەیە كە تۆ دژی كورد بیت، ئەگەر دژی كورد نەبیت نە دەهێڵن سیاسەت بكەیت، نە دەهێڵن بچیتە ناو حكومەت و پەرلەمانەوە، ئەگەر بەرەغمی ئەو شتە بكەویتە پەرلەمان و بتوانیت سیاسەت بكەیت، ئەوكاتە رێگەی زیندانت بۆ دەكرێتەوە هەمان شت كە بۆ هەدەپە  و هاوسەرۆكانی و پەرلەمانتاران و سەرۆك شارەوانییەكان و ئەندامانیان كراوە، هەر بۆیە زیهنیەتی ئەو شەش پارتە لەبەرانبەر كورد و بەرانبەر بە دیموكراسی زۆر جیاواز نییە لەزیهنیەتی ئەردۆغان و باغچەلی، نایانەوێت هەدەپە لەوچوارچێوەیەدا جێگەی بگرێتەوە، حزب هەیە لەسەدا سفر پۆینت یەكی هەیە، بەڵام بردویانەتە ناو ئەو كۆبوونەوەیە، بەڵام هەدەپە بەپێی راپرسییەكانی خۆیان دەنگەكانی نزیك لەسەدا 15% و لەوێدا جێی نابێتەوە، كولی زیهنیەتی دەوڵەت  كە لەسەر ئەساسی دژە كورد ئەو لایەنە ئۆپۆزسیۆنانەش زاڵە.   ئێستا ئەردۆغان هەوڵدانی ئەوەیە كورد قەتڵ و عامی فیزیكی و فەرهەنگی و جینۆسایدی سیاسی بكات، دانوساندن كاتێك دەبێت كە تۆ بتوانی سیاسەتی ئەوان تێكبشكێنێت، سوپای داگیركەری ئەوان تێكبشكێنیت، بتوانی ئیرادەی شەڕخوازی و پاوانخوازی ئەردۆغان تێكبشكێنی، ئەوكاتە دانوساندن دەكرێ هەبێ.   هاوڵاتی: گۆشەگیری سەر عەبدوڵا ئۆجەلان چ پەیامێكی لێ دەخوێننەوە؟ زاگرۆس هیوا: ئەو سیاسەتی دژوارە كە لەئیمراڵی پەیڕەو دەكرێت ئەوە تەنها سیاسەتی  توركیا نییە، لەئیمراڵی تەنها پاسەوانی ئەو زیندانییەیە، سیاسەتەكەی لەلایەن ئەوروپاو ئەمریكاوە دیاری دەكرێت، چونكە ئەو هێزەی كە رێبەر ئاپۆی دەستگیركرد با لای تۆ بێت و پاسەوانی بكە كە ئەمریكاو بەریتانیاو ئەوروپایە، ئیسرائیلە ئەو سیستمەیان گۆشەگیریان داڕشتووە لەبەرانبەر رێبەر ئاپۆ. بەو كەسانە هەیە كە سیاسەتی ئەوروپاو دیموكراسی ئەوروپا پەیامم بۆیان هەیە سیستمی ئەو بەدیموكراسی و حقوق دەزانن،  ئەوە غەفڵەتێكی گەورەیە، هەر كوردێك تۆزێ بیربكاتەوە كە سیاسەتی ئەوروپا  نە مافی مرۆڤە نە دیموكراسییە، ئەوانە تەنها دەمامكێكن بۆ ئەوەی ئەوروپا تۆزێ خۆیان جوان نیشان بدەن بۆ رای گشتی جیهان دیموكراسی و مافی مرۆڤ وەكو دەمامك  بەكاردەهێنن، بەڵام لەمەسەلەی كورددا ئەو دەمامكە دەكەوێت، لەمەسەلەی عەبدوڵا ئۆجەلان ئەو دەمامكە دەكەوێت. سیاسەتی ئەوروپا رێبەر ئاپۆیان دەستگیر كردو بەشێوەیەك تەسلیمی توركیان كردەوە، هەمان هێزیش بەرپرسی گۆشەگیرییە. بانگم لە رۆشنبیران و مامۆستایانی زانكۆ و چین و تووێژەكانی كۆمەڵگە لەسیاسەتمەداران هەیە كە ئەوروپا وەكو ناونیشانی دیموكراسیی نیشان نەدەن، ئەوروپا دووڕووە، گەلی ئەوروپا ناڵێم، بەڵام بەداخەوە لەلایەن دەوڵەتی سیاسەتی ئەوروپا دیموكراسیی دەكەنە خزمەت خۆیانەوە، ئەو دیموكراسیەی هەیە دووڕووییانەیە. رێبەر ئاپۆ بەگۆشەگیری و لە ئیمراڵی 24 ساڵە لەژێر زەویدا وەكو وایە لەناو تابوتێكدا بێت لەدوو بە سێ مەتری بێت، دوو ساڵە كەس نەیتوانیوە بیبینێت، بەتایبەت ساڵێك زیاترە لە 25ی نیسانی ساڵی رابردوو هیچ كەسێك نەیتوانیوە هیچ هەواڵێكی لێ وەربگرێت،  ئێ ئەمە بەگوێرەی كام یاسا، رای گشتی كورد سیاسەتی ئەوروپا وەكو سیستم بە دیموكراسی نەبینن ئەوانەی وا دەیبینن خۆیان دەخافڵێنن. هاوڵاتی: هیچ رێگایەك بۆ دانوساندن هەیە لەگەڵ توركیا بۆ ئاشتی و راوەستانی شەڕ؟ زاگرۆس هیوا: پێویستە خوێندنەوەی نوێ بۆ ئێستا بكەین، قۆناغی ئێستا جیاوازە لەگەڵ قۆناغی 2012 ئێستا ئەردۆغان هەوڵدانی ئەوەیە كورد قەتڵ و عامی فیزیكی و فەرهەنگی و جینۆسایدی سیاسی بكات، دانوساندن كاتێك دەبێت كە تۆ بتوانی سیاسەتی ئەوان تێكبشكێنێت، سوپای داگیركەری ئەوان تێكبشكێنیت، بتوانی ئیرادەی شەڕخوازی و پاوانخوازی ئەردۆغان تێكبشكێنی، ئەوكاتە دانوساندن دەكرێ هەبێ.  قۆناغی ئێستا قۆناغی خۆڕاگری و شەڕە لەبەرانبەر فاشیزمی توركیاو خیانەتی پەدەكە، دانوساندن، هەر هەوڵێكی دانوساندن دێتە واتای چەك دانان و تەسلیم بوون ئەوەش قەبوڵ كراو نییە، ئەگەر دانوستاندن هەبێ لەسەر بنەمای توركیا دەست لەو سیاسەتەی جینۆسایدو نكۆڵی و داگیركراییەی هەڵبگرێت. هاوڵاتی: چ پەیامێكتان هەیە بۆ گەلی كورد دەربارەی تاوانەكانی ئەردۆغان و باخچەلی بەرانبەر گەلی كورد؟ زاگرۆس هیوا: نەك تەنها كورد گەلی عەرەب و هەموو گەلانی خۆرهەڵاتی ناوەڕاست بەهەموو پێكهاتەی ئاینی و نەتەوەیی لەبەرانبەر هێرشێكی فاشیزمدان، چوارچێوەیەی فاشیزم هەیە(ئەكەپە، مەهەپە، داعش، پارتی)یە ئەمانە چوارگۆشەیەكی فاشیزمن كاری ئەوان ئەوەیە كە پاكتاوی نەژادی بكەن بۆ بەرژەوەندی خۆیان پێویستە هەموو گەلانی كوردو عەرەب و هەموو گەلانی ناوچەكە  بەرانبەرئەم چوارگۆشە فاشیستە هەڵوێستیان هەبێت. هەمان مورەبەعی فاشستی دواكەوتوویی و پاشەڕۆیەتی كە لەكەسایەتی( ئەكەپە، مەهەپە، داعش، پارتی)یدا هەیە ئەوان بوون كۆمەڵكوژیان لە شەنگال ئەنجامداو تا ئێستاش ئەو كۆمەڵكوژییە بەردەوامە، هاوكاری پارتی و توركیاو داعش و مەهەپە واتا هاوكاری ئەردۆغان و باخچەلی و بارزانی و ئەبوبەكر بەغدادی بوو كە ئەو كۆمەڵكوژییە لە شەنگال ئەنجامدراو ئێستاش لەژێر ناوی رێكەوتنی شەنگال  كە توركیا بە فرۆكەی درۆن هێرش دەكات منداڵ دەكوژێت، لەنەخۆشخانەكان دەدات و مرۆڤی نیشتمانپەروەر دەكوژێت و دەیكاتە ئامانج كە بەرانبەر داعش شەڕیان كردووە و دەیانەوێت بەم پاشەرۆیەتییە زاڵ بن. پێویستە  هەموو گەلانی رۆژهەڵاتی ناوەراست هەڵوێستیان هەبێت بەرانبەر ئەو چوارگۆشە فاشیزمە هوبێت،كە بەداخەوە هێزی نێونەتەوەیی و ناتۆو ئەمریكاو بەریتانیا پشتیوانی ئەم چوار گۆشە فاشیزمە دەكەن. لێرەوە داوا لە ناتۆو ئەمریكاو بەریتانیا دەكەم كە پشتیوانی ئەم چوار گۆشە فاشیستە نەكەن چ بەراستەوخۆ یان بە ناراستەوخۆ.    

ئارا ئیبراهیم وتەبێژی كۆماجڤاكێن كوردستان(كەجەكە) زانیاری زۆر وردو نەبیستراو دەربارەی ورەی رووخاوی سوپاكەی ئەردۆغان ئاشكرا دەكات و دەڵێت:" ئەو سەربازانەی چالاكی گەریلا بەرانبەریان دەكرێت و لێیان دەكوژرێت، دواتر ئەوانەی ماونەتەوە بەپەلە دەیانگۆڕن بۆ ئەوەی ئەو ترس و دڵەڕاوكێیە نەگات بەسەربازانی دیكەیان". زاگرۆس هیوا، وتەبێژی كۆماجڤاكێن كوردستان(كەجەكە)، بەهاوڵاتی وت:"  لەناوەڕاستی مانگی نیسانی ئەمساڵەوە كە ئۆپەراسیۆنی سوپای تورك دەستی پێكردووە تائێستا هەزارو 203 سەربازی تورك كوژراون". هەروەها وتیشی:" ئەو هەژمارەیە هەڤاڵان چوونەتە سەر جەنازەكەیان و بەچاوی خۆیان بینیویانن، رەنگە زۆرتریش بن، تا جەنازە نەبینن ناڵێن ئەوەندە كوژراو هەیە، ئەوانەشی كە رەنگە كوژرابێت و ژمارەكە نادەن بەئێمە ، ئەو ئامارانە ئەوانەیە كە گەریلا بینیویەتی كوژراوەو چووەتە سەر جەنازەكەیان". هەروەها لەبارەی شەرو پێكدادانەكانی سوپای تورك و گەریلا لەباكوری كوردستان، وتەبێژی كۆماجڤاكێن كورستان ئەوەشی ئاشكرا كرد كە" بەدیاریكراوی بیست سەربازی تورك لەشوێنی جیاجیا لەئامەدەوە تا وان كوژراون لەماوەی دوو مانگی رابردوودا". هاوكات ئەوەشی روونكردەوە كە چالاكی ناوشارەكان لەڕێگەی تیمەكانی تۆڵەسەندنەوەی (هەپەدەهە) ئەنجام دەدرێت، وتیشی:"(هەپەدەهە) بزوتنەوەیەكی شۆڕشگێڕییە بۆ هەموو توركیایە نەك تەنها بۆ باكوری كوردستان، لە ئەستەنبوڵەوە بیگرە تا دیاربەكرو ئامەد  هەم (یەپەسە) یەكینەكانی پاراستنی سڤیل، ئەو چالاكیانە ئەنجام دەدەن، شوێنی ئیكۆنۆمی فاشیستەكان و ئەو شوێنانەی كەوەكو سەرچاوەی داهاتی ئەكەپەو مەهەپەن كە هی جەماعەتی ئەردۆغان و باغچەلین ئەوانە دەكەنە ئامانج". زاهرۆس هیوا ئەوەشی دووپاتكردەوە كە ئەو لەشكرانەی بەو شێوەیە دادەبەزێنرێن لە هەرێمەكانی زاپ و ئاڤاشین و كوڕەژارۆو هەموو هەرێمەكانی دیكە"گورزی گەریلایان بەردەكەوێت هەموو دەروونیان تێكدەچێت، ئەو شتەی كە پێیان دەوترێت و ئەو واقعەی لەسەر ئەرزی واقع دەیبینن یەكناگرێتەوە، لەبەرئەوە زۆر دەترسن تووشی ترس و تۆقین و دڵەراوكێ دەبنەوە، ئەگەر سەیری ڤیدیۆی چالاكییەكانی گەریلا بكەیت تەنانەت سەربازەكان دەست و لاقیان ناكرێتەوە كەوەڵامیش بدەنەوەو چۆكیان دەشكێت".  

هاوڵاتی سەرۆكی حكومەتی هەرێمی كوردستان لەگەڵ بەرپرسی یەكەمی میدیاكاندا كۆبووەوەو لە سێ كاتژمێردا زۆر پرسی گرنگ وەڵامدرانەوە، مەسرور بارزانی وتی:" چاكسازی تەنها سزادانی گەندەڵكاران نییە، چاكسازی بە سیستم دەكرێت". مەسرور بارزانی، سەرۆكی حكومەتی هەرێمی كوردستان ئەوەشی دووپاتكردەوە كە "بێگومان سیاسەتی حكومەتی هەرێم ئەوە نییە هیچ كەسێك لەسەر بیروبۆچوونی سیاسی بگیرێت بەهیچ شێوەیەك، هەرگیز لەگەڵ ئەوە نیم ئازادی رادەربڕین سنووردار بكرێت". مەسرور بارزانی، سەرۆكی حكومەتی هەرێمی كوردستان رۆژی دووشەممە 20ـی حوزەیرانی 2022 لەشاری هەولێر لەدیدارێكدا لەگەڵ بەڕێوەبەرو نوێنەرانی ژمارەیەك لە دەزگاكانی راگەیاندنی هەرێمی كوردستان، كە تاریق فاتیح سەرنووسەری رۆژنامەی هاوڵاتی ئامادەیبوو لەسەر پرسەكانی پەیوەست بە دۆخی ژیانی هاووڵاتیان، ئازادی رادەربڕین، كێشەكانی نێوان هەرێم و بەغدا، چاكسازیەكانی حكومەت، كاری رۆژنامەوانی، پرسی نەوت و فەرمانبەران و چەندین پرسی دیكە قسەیكرد. سەبارەت بەئینتیمای خەڵك و خۆشەویستی وڵات لەوەڵامی یەكێك لەپرسیارەكان سەرۆكی حكومەتی هەرێمی كوردستان، وتی: "كاتێك رەخنە دەگیرێت یان باسی ئەدای حكومەت یان دەسەڵات دەكرێت، ئەركی رۆژنامەنووس ئەوەیە چۆن بتوانن خۆشەویستی وڵات لەناو دڵی خەڵكدا بهێڵێتەوە، هەر هیچ نەبێ ئێوە نابێ دەسەڵات بەخاوەنی ئەو وڵاتە بزانن، بەڵكو دەبێ خەڵك بە خاوەنی وڵات بزانن". هەروەها وتیشی:" كەواتە نابێ خەڵك دڵ رەش بكرێت لە خۆشەویستی بۆ نیشتمان، خۆتان كە رەخنە لە دەسەڵات و كەموكوڕییەكان دەگرن، هیچ نەبێ بەرنامەیەكیشتان هەبێت كە چی بكەن، بۆ ئەوەی پەیوەندی خەڵك لەگەڵ نیشتمان دروستبكەنەوە، یان بەرنامەتان چی بووە، من نەمبینیوە بەرنامەتان هەبێت بۆ ئەوەی ئینتیمای هاووڵاتیان بۆ نیشتمان زیاد بكەن، سەرۆكی حكومەتی هەرێم باسی لەوەشكرد كە" ئەمە رەخنەیەكە هەقە خۆتان ئەو رەخنەیە لەخۆتان بگرن، من دان بەوەدادەنێم رەنگە ئێمە لەحكومەت كەمتەرخەمی ئەوەمان هەبووبێت كە هەموو زانیارییەكان بەئێوەو هاووڵاتیان نەگەیشتووە، هەرچەند بەدڵنیاییەوە دەڵێم لەم كابینەی حكومەتدا زیاتر لەهەموو كابینەكانی تر لێدوان دراوە، روونكردنەوە دراوەو دیدار ئەنجامدراوە، هەروەها لەگەڵ پەرلەمانی كوردستان زۆرترین بەشداری لەدانیشتنەكانی پەرلەمان هەبووە، جگە لەوەی وەزیرەكان ئامادەی كۆبوونەوەكانی پەرلەمان بوونە، لەئاستی بەڕێوەبەرە گشتییەكان بەشداریكردن هەبووە لەكۆبوونەوەی لیژنەكانی پەرلەمان، بەڵام دیارە هێشتا لەو ئاستەدا نییە كە ئێوە رازی بن، هاووڵاتی هەقی خۆیەتی لەهەموو ورەكارییەكانی حوكمداری و حوكمڕانی ئاگادار بێت".   كاتێك دەستمان بەو كابینەیە كرد، وتم دەبێت بزانین حكومەت چ مومتەلەكاتێكی هەیە، لە هەموو حكومەت ئەوەی كە تۆماركرابوو و بۆیان هێنام، وتیان 28 مومتەلەك لەسەر ناوی حكومەت تۆماركراوە، ئەمەش نەك لەبەر ئەوەی نەبوو، بەڵام تۆمارنەكرابوو، ئێمە هەر لەم كابینەیە لیژنەمان پێكهێنا بۆ ئەوەی بزانین ئێمە چیمان هەیە، دوای ماوەیەك هاتنەوە 36 هەزار مومتەلەكات بەناوی حكومەت هەبوون كە ئێستا تۆماركراون   بەراوردكاری سەبارەت بەخۆ بەراوردكردنی هەرێمی كوردستان لەگەڵ وڵاتانی پێشكەوتوو، مەسرور بارزانی، لەوەڵامی پرسیارێكدا وتی: "ئەوە تموحێكی زۆر باشە كە ئێمە هەوڵبدەین باشتر هەنگاو بنێین، نەك لەئاستی ناوچەكەدا بمێنینەوە، بەڵام بیرتان نەچێت لە هەموو كۆمەڵگەیەكی دیموكراسی و پێشكەوتوو تەنها دروشم نییە، بەڵكو بەرپرسیاریەتی هاوبەش هەیە، هاووڵاتیش بەرپرسیاریەتی هەیە بەرامبەر نیشتمانەكەی، تەنیا ئەرك ناكەوێتە سەرشانی دەسەڵات و حكومەت، دەبێ هاووڵاتیش ئەركی خۆی لەبەرچاوبگرێت، باسی ئەوروپا دەكەن، فەرموون بزانن بەرپرسیاریەتی هاووڵاتی لەئەوروپا چییە، ئایا ئەو بەرپرسیاریەتییە لەلایەن هاووڵاتییان و میدیاكاران هەڵگیراوە، ئەمە پرسیارێكە خۆتان وەڵامەكەی دەزانن". لەوەڵامی پرسیارێك سەبارەت بەدەستگیركردنی رۆژنامەنووسان و ئازادی كاری رۆژنامەوانی، سەرۆكی حكومەت وتی: "باسی ئەوە دەكەن رۆژنامەنووس لەسەر كۆمێنت گیراوە، من ناڵێم بەشێوەیەكی قەتعی ئەوە نەبووە، بەڵام بێگومان سیاسەتی حكومەتی هەرێم ئەوە نییە هیچ كەسێك لەسەر بیروبۆچوونی سیاسی بگیرێت بەهیچ شێوەیەك، هەرگیز لەگەڵ ئەوە نیم ئازادی رادەربڕین سنووردار بكرێت، بەڵام ئازادی و تۆمەت بەخشینەوە دوو شتی جیاوازن، هاوڵاتی لەهەر ئاستێك بێت، رۆژنامەنووس یان پزیشك بێت یان دەسەڵاتدار بێت بەرامبەر بە یاسا ئەركێكی هەیە نابێ پێشێلی مافی خەڵكی تر بكات و نابێ تۆمەت بەخشینەوە بەئازادی پێناسە بكات، هەروەها دەبێ هەموو كەس لەبەردەم یاسا یەكسان بێت، لەلایەك ئێوە وادەڵێن و لەلایەكی دیكەش رەخنە لەدادگاكان دەگرن، كاتێك دادگا بڕیار لەسەر كارێكی نادروستی كەسێك دەدات ئێوە جارێكی تر دێن دادگا تاوانبار دەكەن دەڵێن بۆچی ئەو بڕیارەی داوە، رۆژنامەنووس وەك هەر هاووڵاتییەكی دیكە بەرپرسیارە بەرامبەر بەیاسا، ئەگەر كەسێك بەناوی پزیشك بێت مومارەسەی پیشەی پزیشكی بكات و پزیشك نەبێت لە ئەنجامی ئەو كارەی دەیكات خوا نەخواستە هاووڵاتییەك لەناو دەستی گیان لەدەستبدات، ئێوە وەك رۆژنامەنووس هەڵا دەنێنەوە و دەڵێن دەبێ ئیجرائات بەرامبەر ئەو كەسە بكرێت، چونكە پیشەكەی ئەو نەبووە سوو ئیستیفادەی كردووە، ئەمە راستە بۆ هەموو پیشەكانی دیكەش، كەسێك رۆژنامەنووس نەبێت نابێ بەناوی رۆژنامەنووس مامەڵەی لەگەڵ بكرێت، رۆژنامەنووسیش وەك هەموو هاووڵاتیانی دیكە تاكێكی ئەم كۆمەڵگەیە دەكرێ هەڵە و شتی نایاسایی بكات، هەموومان بەخۆشمەوە پێویستە بەرامبەر یاسا ملكەچ بین".    با بە ژمارە پێتان بڵێم پێشتر 25%ی داهاتی نەوت بۆ مووچە دەگەڕایەوە، من ناڵێم داهاتی كوردستان لەبەر ئەوەی هەندێكی بۆ كولفەی كۆمپانیاكان دەگەڕێتەوە هەندێك بۆ قەرزەكان دەچێت، هەندێكی بۆ گواستنەوەی نەوت ئەمە هەمووی داهاتە بەڵام كولفەیە، حكومەتی هەرێم ناچارە ئەو پارەیە بداتەوە، لەگەڵ ئەوەش ئێمە هاتین ئەو رێژەیەمان لە 25% بۆ 42% بەرز كردەوە، كە وایە داهاتی زیاتر بۆ گەنجینەی حكومەت دەگەڕێتەوە تەنها بۆ مووچە".   شەڕی گەندەڵی سەبارەت بە بەشداریكردنی رۆژنامەنووسان لەشەڕی گەندەڵی، مەسرور بارزانی رایگەیاند: "لەوانەیە وابێت، دەبێ ئەم كەمتەرخەمییە لەبەرچاو بگیرێت، لەمەودوا زیاتر سوود لە توانای رۆژنامەنووسان وەربگیرێت، بۆ ئەوەی ئەو بەرنامە چاكسازییە كە حكومەت هەیەتی و ئەو كارانەی دەیكات زیاتر روونبكرێنەوە، منیش دەمەوێت ئێوەی رۆژنامەنووس بەشدارو پشتیوان بن، بۆ ئەوەی بەیەكەوە شەڕی بنبڕكردنی گەندەڵی بكەین، زۆرم پێمخۆشە ئێوەش بەشداربن ئەگەر ئێوە ئامادەیی ئەوەتان هەبێت، ئامانجی ئەم كۆبوونەوەیەش ئەوە بووە كە ئەم پچڕانە نەبێت، هیوادارم ئەم كۆبوونەوەیە بە خاڵێكی ئیجابی وەربگرن، كە ئەم دانیشتنە دەكەین دیارە هەست بەوەكراوە كە بۆشاییەك هەیەو دەمانەوێت ئەو بۆشاییە پڕبكەینەوە، دانیشتنەمان لێرە پێكەوە نیشانەی ئەوەیە نیەتی ئەوەمان هەیە دەمانەوێت زیاتر لێك نزیك بینەوە و سوود لەتواناكانی ئێوەش وەربگرین". لە وەڵامی پرسیارێك سەبارەت بە پارەی سیاسییەكان بۆ راگەیاندن، مەسرور بارزانی، ئاماژەی بەوەدا: "بەڕێزێك باسی ئەوەی كرد فڵان و فڵان خاوەن پڕۆژەی میدیایین، راستە من نایبینم هیچ یەكێك لە ئێوە بێلایەن بن، هەر یەكێكتان لەلایەن كەسێك یان لایەنێكی سیاسی پاڵپشتی دەكرێن، بۆیە داوا لەوەزارەتی رۆشنبیری و خۆشتان دەكەم، ئەوانەی لەلایەن لایەنە سیاسییەكان پاڵپشتی دەكرێن دیارن راگەیاندنی فەرمی حزبەكان سەرچاوەی داراییان دیارە لە كوێوە دێت، بەڵام هەقە ئەوانەی سەرچاوەی داراییان دیار نییە با ئەوانیش ئەو راستیە بۆ خەڵك روونبكەنەوە، پێویستە وەزارەتی رۆشنبیری بۆ خەڵك ئاشكرای بكات كە سەرچاوەی دارایی ئەمانە لەكوێ هاتووە، بۆ ئەوەی خەڵكیش بزانێت". یاسای كاری رۆژنامەوانی سەرۆكی حكومەت، سەبارەت بەكاری رۆژنامەوانی رایگەیاند: "پێویستە یاسای رۆژنامەگەری كە لەكوردستان هەیە رەچاو بكرێت، بۆ ئەوەی هیچ رۆژنامەنووسێك بەدەر لەیاسا كار نەكات و ئەو ئەرك و بەرپرسیاریەتییەی لەسەر شانیەتی جێبەجێی بكات، ئێوە وەك رۆژنامەنووس ئەركی ئەوەتان هەیە هاووڵاتییان ئاگادار بكەنەوە، لەهەمانكاتدا ئەركی ئەوەشتان هەیە خەڵك لەنیشتمان و كوردستان نزیك بكەنەوە، خۆشەویستی وڵات و دەسەڵات تێكەڵ نەكەن، دوو شتی جیاوازن، بەڵام من ئەوەم نەبینیوە، نەمبینیوە ئێوە پڕۆژەیەك پێشكەش بكەن كە هاووڵاتی نیشتمانەكەی خۆی خۆشبوێت، نەمبینیوە كار لەسەر ئەوە بكەن هاووڵاتی شانازی بەمێژووی پڕ سەروەری گەلەكەی بكات كە هەزاران شەهیدو قوربانی داوە، ئەگەر لەدەسەڵات یان لایەن و كەسایەتیەك ناڕازین، مانای ئەوە نییە حوكم بەسەر مێژوودا بدەن و پەلاماری بدەن، پێموانییە لەهیچ وڵاتێك ئەمە قبووڵ بكرێت، بەتایبەتی لەوڵاتی دەوروبەر، ئەوەی ئێوە دەتوانن لە هەرێمی كوردستان ئەنجامی بدەن تەحەداتان دەكەم ئەگەر بتوانن لە هیچ وڵاتێكی دراوسێ بەو جۆرە قسە بكەن، فەرموون بڕۆن لەوڵاتێكی دراوسێ تۆمەت ببەخشنەوە یان ئیهانەی مەرجەعیەت و موقەدەساتی ئەو وڵاتانە بكەن بزانن لێتان قبووڵ دەكەن، كەس لێتان قبووڵ ناكات، كەواتە رادەی ئازادی دەربڕین لە هەرێمی كوردستان بەراورد ناكرێت بەوڵاتانی ناوچەكە، ئازادی رادەربڕین لە هەرێمی كوردستان زۆر لەوە زیاترە كە هەندێك كەس دەیانەوێت پێناسەی بۆ بكەن". بازگەكان لەوەڵامی پرسیارێك لەبارەی خراپی رێگاو بازگەكان لەنێوان شارەكانی هەرێمی كوردستان، سەرۆكی حكومەت وتی: "ئەمە 30 ساڵە حوكمڕانی لە هەرێمی كوردستان هەیە، هەموو ئەو كەموكوڕیانەی دەیبینن هی ئەم كابینەیە نییە، دەبوایە لەماوەی ئەم 30 ساڵە ژێرخانێكی ئابووری بەهێز دروست بكرێت، كە پێویست نەبوایە ئێستا ئێمە باسی ئەو كێشانە بكەین، منیش پێم خۆشبوو لە حكومەتێكدا حوكمڕانی بكەم كە هەموو شت زۆر باش بوایە و ئیشی زیاترم كردبا، بەڵام ناكرێ ئەوەی خراپ كراوە هەمووی رووبەڕووی ئەم كابینەیە بكرێتەوە، منیش خۆزگەم دەخواست هیچ بازگەیەك لە هەرێمی كوردستان نەبوایە، بەڵام ئەوە لەبەر ئەوە نییە تەنها لەبەر ئەوەی لەنێوان هەولێر و سلێمانی هەبن، لەنێوان هەولێر و دهۆكیش هەیە لەنێوان هەموو شارەكانی كوردستان بازگە هەن، ئەمەش لەبەرئەوەی هێشتا مەترسی تیرۆر لەسەر كوردستان ماوە، هێشتا شانە نوستووەكانی داعش و تیرۆرستان لەلایەن هێزە ئەمنییەكان دەستگیر دەكرێن، ماددە هۆشبەرەكان لەم شار بۆ ئەو شار هاوردە دەكرێن، كە ئەمە دەبن بە مەترسی گەورەتر لەسەر كۆمەڵگەی ئێمە، بازگەكان بۆ ئەوە نییە سنوورەكانی ئیداری ئەم پارێزگا لەگەڵ ئەو پارێزگا لە یەكتر جیا بكاتەوە، بەڵكو بۆ ئەوەیە ئەم مەترسیانە بڕەوێننەوە، هیوادرم رۆژێك بێت هیچ مەترسییەك لە هەرێمی كوردستان نەمێنێت و بازگەكان هەڵبگیرێن، سەرەڕای ئەوەش دەبێ پێداچوونەوەیەكی جددی بكرێت، كە بە هیچ شێوەیەك بازگەكان رەنگدانەوەی دوو ئیدارەییان پێوە دیار نەبێت".   وڵاتانی دراوسێ بە تەنیا ناتوانن ئەوە بكەن ئەگەر یارمەتیان نەدرێت، ئەو درۆنانە لەكوێوە دێن؟ لەلایەن توركیاوە بۆردومانی ناوچەكانی هەرێمی كوردستان دەكرێت بە حیساب پەكەكەی لێیە، ئەگەر پەكەكە خەمی هەرێمی كوردستانیەتی و دەزانێت توركیا ئەوان وەك بیانوو بەكاردێنێت بۆ پەلاماردانی هەرێمی كوردستان بۆ ئەو بیانووە نابڕن و شوێنەكان چۆڵ ناكەن     زیندانی سیاسیی؟! مەسرور بارزانی، لە وەڵامی پرسیاری رۆژنامەنووسێك لەبارەی زیندانیانی سیاسی وتی: "خۆم لەگەڵ ئەوە نیم هیچ كەسێك لەسەر بیروباوەڕی سیاسی بگیرێت، بەڵام سوو ئیستیفادە كردن لەپیشەی رۆژنامەنووسی یان سیاسەت یان هەر پیشەیەكی تر نابێ قبووڵ بكرێت، كەسێك بیەوێت خزمەتی وڵاتەكەی بكات و بەئازادی رادەربڕێت هەقی خۆیەتی، بەڵام سوو ئیستیفادەكرن لە پیشەكەی بۆ مەرام و ئامانجی دیكە، ئەمە كاری یاساو دادگایە، باوەڕ بكەن خۆم حوكمم بەسەر هیچ كەس نەداوە، لەگەڵ ئەوەش نیم هیچ دەسەڵاتێكی سیاسی مافی ئەوەی هەبێت حوكم بەسەر هیچ كەسێكدا بدات، ئەگەر ئێوە كێشەتان لەگەڵ دادگا هەیە رەخنەكان ئاراستەی دادگا بكەن نەك حكومەت، من متمانەم بە دادگاكانی خۆمان هەیە و رێزیان دەگرم، ئەگەر دادگا بڕیارێك بدات ئەركی حكومەتە جێبەجێی بكات". مەسرور بارزانی: میدیای سێبەرم نییە دەربارەی كاری میدیای سێبەر، سەرۆكی حكومەتی هەرێمی كوردستان رایگەیاند: "باسی ئەوە كرا كە من میدیای سێبەرم هەیە، من هیچ میدیای سێبەرم نییە، بەهیچ شێوەیەكیش پاڵپشتی میدیایەكی سێبەری واناكەم پەلاماری خەڵك بدات، دووپاتیدەكەمەوە هەقە وەزارەتی رۆشنبیری سەرچاوەی داهاتی هەموو دەزگاكانی راگەیاندن بۆ خەڵك ئاشكرا بكات، بۆئەوەی دیاربێت لە كوێوە پشتیوانی دەكرێن و لە كوێ ئاراستە دەكرێن". بێئومێدی خەڵك لەوەڵامی هەندێك لە رۆژنامەنووسان كە دەڵێن "خەڵك بێئومێدە و رۆژانە وڵاتانی دراوسێ بۆردومانی ناوچە سنوورییەكانی هەرێمی كوردستان دەكرێت"، مەسرور بارزانی، ئەوەی خستەڕوو: "ئەوە راستە، بەڵام دەبێ بپرسین خەڵك نائومێدە یان نائومێد كراوە، یان هەوڵی نائومێدكردنی خەڵك دەدرێت، ئەمە دوو شتی جیاوازن، بەداخەوە من دەبینم لەجیاتی هەوڵی بەرزكردنەوەی مۆڕاڵی خەڵك بدرێت، بە بەرنامەیەكی رێكخراو هەوڵی دابەزاندنی مۆڕاڵی خەڵك دەدرێت، كێشەی بچووك زۆر گەورە دەكرێن و دەستكەوتەكان بەبێ نرخ پێشان دەدرێن، كە پەلاماری هەرێمی كوردستان دەدرێت خەتای حكومەتی هەرێم نییە، ئەگەر خوێندنەوەیەكی قوڵی سیاسی و ستراتیژی بۆ دۆخی ناوچەكە بكەن، راستە لەناوچەیەكی زۆر قەیراناویی و ناخۆشداین، قەزیەی كورد هێشتا چارەسەر نەبووە، هێشتا لەگەڵ حكومەتی عێراق نەگەیشتووینەتە چارەسەر لەگەڵ وڵاتانی دراوسێ كێشە هەیە، هەندێك لایەن لەجیاتی هاوكاریكردنی كیانی هەرێمی كوردستان وەك كیانێكی دانپێدانراوی یاسایی بكەن، بەداخەوە هەوڵی تێكدانی دەدەن، دەستی هەندێك لایەنی سیاسیشی تێدایە، وڵاتانی دراوسێ بە تەنیا ناتوانن ئەوە بكەن ئەگەر یارمەتیان نەدرێت، ئەو درۆنانە لەكوێوە دێن؟ لەلایەن توركیاوە بۆردومانی ناوچەكانی هەرێمی كوردستان دەكرێت بەحیساب پەكەكەی لێیە، ئەگەر پەكەكە خەمی هەرێمی كوردستانیەتی و دەزانێت توركیا ئەوان وەك بیانوو بەكاردێنێت بۆ پەلاماردانی هەرێمی كوردستان بۆ ئەو بیانووە نابڕن و شوێنەكان چۆڵ ناكەن، بەڵام بەداخەوە هەندێك لە راگەیاندنەكانی خۆمان كە دێن باسی ئەوە دەكەن لەجیاتی راستی بابەتەكە بۆ خەڵك باس بكەن، لایەنگری دەكەن و ناتوانن خۆتان لەوە دەرباز بكەن، ئەگەر پەكەكە نەبێ توركیا هیچ بیانووێكی نابێ بۆردومانی هەرێمی كوردستان بكات، هەموو ئەو بۆردومانانەی دەكرێنە سەر هەرێمی كوردستان دروستكراون، بەهیچ شێوەیەك هەرێمی كوردستان نەبووەتە پەناگە بۆ دروستكردنی مەترسی لەسەر شوێنێكی دیكە بەتایبەتی دراوسێكانی، بەڵام كەس ناڵێ لەخۆڕایی بۆردومانت دەكەم، بەڵكو دەبێ بیانوێك بدۆزێتەوە، وەك بینیمان لە بۆردومانكردنی هەولێر چەندین تۆمەت خرانە پاڵ هەرێمی كوردستان، هیچ بەڵگەیەكیش نەخرایەڕوو كە راستی و دروستی ئەو تۆمەتانە پشتڕاست بكاتەوە ئەسڵ و ئەساسی نەبوو، هەرێمی كوردستان نەبووەتە شوێنێك بۆ دروستكردنی مەترسی لەسەر وڵاتانی دراوسێ، هەروەها لە عێراق هەندێك هێزی لەیاسا دەرچوو بەدرۆن و مووشەك بۆردومانی هەرێمی كوردستان دەكەن، ئەگەر باوەڕیان بە پێكەوەژیان و بنەماكانی دەستوور هەبێت نایەن بەبێ بڕیاری حكومەتی فیدراڵ ناوە ناوە بۆردومانی هەرێمی كوردستان بكەن، ئێمە بەپێی توانا رووبەڕووی هەڕەشەكان بووینەتەوە، ئێمە نە لەگەڵ شەڕین نە دەمانەوێت شەڕ لە ناوچەكە هەبێت، دەمانەوێت چۆن ئێمە رێزی دەوروبەر دەگرین ئەوانیش رێز لە هەرێمی كوردستان بگرن". دەبێت سیستەم رێكبخەین مەسرور بارزانی لەوەڵامی پرسیارێكی دیكەدا وتی: "باوەڕناكەم ئەو بێئومێدییە هەبێت ئێمەش خەڵك دەبینین، راستە كەموكوڕی هەیە و تموحی ئێمە زۆر لەوە زیاترە و دەمانەوێت خزمەتێكی زیاتری خەڵكی خۆمان بكەین، بەو ئیمكانیەتەی لەبەر دەستە و ئەو هەموو ساڵەی رابردوو نابێ وا سەیر بكرێت كە ئێمە لێی بەرپرسین لەو قەیران و گرفتانەی كە تووشی خەڵك بوونە، سەرەڕای ئەوەش بەرنامەمان هەبووە و كارمان لەسەر كردووە، بەڵام هەنێك لەو هەنگاوو چاكسازییەی گرتوومانەتە بەر رەنگە ماوەیەكی دیكە ئەنجامەكەی دەربكەوێت، دروستكردنی ژێرخانێكی ئابووری دروستكردنی بینایەك نییە ئێوە بەچاو بیبینن، دوای ماوەیەكی دیكە ئێوە دەبینن ئێمە چیمان كردووە لە كەرتی كشتوكاڵ و پیشەسازی و ریفۆرم". لەبارەی پرۆسەی چاكسازی و رووبەڕووبوونەوەی گەندەڵكاران،  سەرۆكی حكومەتی هەرێمی كوردستان وتی: "چاكسازی تەنها سزادانی گەندەڵكاران نییە، چاكسازی لە سیستەم دەكرێت نەك تەنیا لەخەڵك، ئەگەر سیستمێك هەبێ و هەركەسێك بێت بتوانێت بەردەوام بێت لەگەندەڵی ئەوە هەرگیز گەندەڵی كۆتایی نایەت، دەبێ سیستمەكە وا رێكبخرێتەوە كە دەرفەتی گەندەڵی تێدا نەمێنێت، ئێمە میكانیزمان هەیە بۆ چاكسازی و ریفۆرم لەسیستمەكە، ئەوەی تر بۆ دادگا دەمێنێتەوە، هەر كەسێك سكاڵای لەسەر گەندەڵی فڵان و فڵان كەس هەیە با پێشكەشی دادگای بكات با دادگا بە ئەركی خۆی هەڵسێ و ئیجرائات بكات، بەڵام سەبارەت بە حكومەت ئێمە دەمانەوێت چاكسازی لە سیستەم و ژێرخانی ئیدارەدا بكەین، كە چۆن بتوانین رێگری لە گەندەڵی و بەهەدەردانی سامانی گشتی بكەین".     ئەمە 30 ساڵە حوكمڕانی لە هەرێمی كوردستان هەیە، هەموو ئەو كەموكوڕیانەی دەیبینن هی ئەم كابینەیە نییە، دەبوایە لەماوەی ئەم 30 ساڵە ژێرخانێكی ئابووری بەهێز دروست بكرێت...بەڵام ناكرێ ئەوەی خراپ كراوە هەمووی رووبەڕووی ئەم كابینەیە بكرێتەوە     دۆسیەی نەوتی هەرێم سەبارەت بەدۆسیەی نەوت لەهەرێمی كوردستان، مەسرور بارزانی، ئاماژەی بەوەدا: "ئێوە پرسیارتان لە هەموو شت كردووە و ئێمەش وەڵامان داونەتەوە، بەڵام ئەگەر بە كورتیش بێت جارێكی دیكە لێرە باسی دەكەم، جێی سەرنج و پێكەنینە كە دەوترێت خەڵك بە بڕیاری دادگای فیدراڵی دژی هەرێمی كوردستان دڵخۆشن یان بەهۆی نەوتەوە هەرێم قەرزدار بووە، دەوترێ پێشتر حكومەتی فیدراڵی بودجەی بۆ هەرێمی كوردستان هاتووە و بەهۆی هەناردەكردنی نەوت بڕاوە، لە نووسینی دەستوور خۆم یەكێك بووم لەو شاندەی لە بەغدا بووین لەنووسینەوەی دەستوور بەشداربووین، یەكێك لەخاڵە گرنگەكان ئەوەیە كە ئەو سامانە سروشتییەی لە هەرێمی كوردستان هەیە لە خزمەتی خەڵك بەكاربهێنرێت، ئەگەر سەیر بكەن تاساڵی 2003 هەرچی سەروەت و سامانی سروشتی هەرێمی كوردستان بووە دزراوە و بڕدراوە، داهاتەكەی دراوە بە بۆمب وڵاتەكەی ئێمەیان پێ خابوور كردووە، سەروەت و سامانی ئێمە دژی هاووڵاتیانمان بەكارهێنراوە، كراوە بە چەك و كیمیایی و ئەو هەموو تاوانە دەرهەق بەگەلی كورد كراوە. سەبارەت بەنەوتی كەركووك مەسرور بارزانی وتی :"ئەگەر ئێوە نەوتی كەركووك بە نەوتی كوردستان بزانن، كە من پێموایە كەركووك بەشێكە لەكوردستان و ئەو نەوتەی چەندین ساڵ لەوێ بڕدراوە، دەبوایە بۆ ئاوەدانی كوردستان و هەموو عێراق بەكاربهێنرێت، بەڵام بەشی كوردستان لەو داهات و سەروەت و سامانە چی بووە؟ جگە لە وێرانكاری و ئەنفالكردن و ئەو هەموو تاوانكارییەی دژی هەرێمی كوردستان كراوە، لە نووسینەوەی دەستوور ئێمە ویستمان ئەو مافە بۆ خەڵكی كوردستان بگەڕێتەوە، هەوڵدرا یاسای نەوت و غاز لە حكومەتی فیدراڵی پەسەند بكرێت، ساڵی 2007 رەشنووسێك ئامادەكرا بۆ ئەوەی یاسای نەوت و غاز دروست بكرێت، بەڵام حكومەتی عێراقی نەهاتە پێشەوەو ئەو یاسایە نەچووە پەرلەمان، ئەگەر ئەوە هەبوایە ئێمە لە چوارچێوەی ئەو یاسایە رەفتارمان دەكرد، دواتر بەپێی دەستوور یاسای نەوت و غاز لەپەرلەمانی كوردستان پەسند كرا، هەرچی لە هەرێمی كوردستان ئەنجامدراوە بەپێی ئەو یاسایە بووە، ئێمە یاسای نەوت و غازمان هەبووە، بەڵام تائێستاش حكومەتی فیدراڵی ئەو یاسایەی نییە، ئەوكاتە لێكتێگەیشتن لەنێوان حكومەتی فیدراڵی و حكومەتی هەرێم هەبوو تا یاسای نەوت و گاز لەپەرلەمانی عێراق پەسند دەكرێ، حكومەتی هەرێم دەتوانێت كاری خۆی بكات، ئێستا دادگای فیدراڵی پەنا دەباتەبەر یاسایەك كە لەساڵی 1976 بۆ حكومەتێكی مەركەزی نووسراوە، دوای ئەوە عێراق گۆڕانكاری بەسەرداهاتووە لەحكومەتێكی دیكتاتۆری بووەتە حكومەتێكی فیدراڵی، بەڵام ئایا ئەو یاسایەی لەساڵی 1976 نووسراوە رەنگدانەوەی دەستووری عێراقە؟ بەهیچ شێوەیەك وا نییە، حكومەتی عێراق یاسای نییە، جگە لەوە كە دەوترێت حكومەتی فیدراڵ بەهۆی هەناردەكردنی نەوتی هەرێم بودجە بۆ هەرێمی كوردستان نانێرێت راست نییە، ساڵی 2014 یەك بەرمیل نەوت هەناردە نەدەكرا كە بودجەی هەرێمی كوردستان بڕدرا، ئەگەر پێیانوایە هۆكارەکە نەوتی كوردستانە ئەوكاتە هیچ نەوتێك هەناردە نەدەكرا، دوای بڕینی بودجەی هەرێم بۆ چارەسەركردنی قەیرانی دارایی و ئابووری بڕیاری هەناردەكردنی نەوتی دا، كۆمپانیاكانیان بەپێی ئەو یاسایەی لە پەرلەمانی كوردستان دەركرا هێنایە كوردستان و دوای ئەوە نەوتی هەرێمی كوردستان هەناردەی دەرەوە كرا، دوای ئەوەش رێككەوتنی تر كراوە جار بەجار بودجە بۆ هەرێم هاتووە، بەڵام بڕینی بودجە بە هیچ شێوەیەك پەیوەندیدار نەبووە بەوە، چونكە دوای بڕینی بودجە هەرێم نەوتی هەناردە كردووە، ئینجا خەڵك پێی خۆشە دادگای بەناو فیدراڵی ئەو بڕیارەی دەركردووە، ئێمە دژی بڕیاری دادگای فیدراڵی نین، بەڵام كوا دادگای فیدراڵی لەعێراق، لەدەستوور هاتووە دەبێ دادگای فیدراڵی بەپێی ئەو رێكارانە دروستبكرێ و كارا بكرێت، كام دادگای فیدراڵی لەعێراق بەپێی دەستوور دروستكراوە، ئەم دادگایە لەسەردەمی برێمەر هەبووە و تائێستا بەردەوامە، بەڵام بەهیچ شێوەیەك بەپێی ماددەی دەستووری دروست نەكراوە، تائێستا دادگای فیدراڵی كە بگونجێت لەگەڵ دەستوور لەعێراق بوونی نییە، ئێمە دژی دادگای فیدراڵی نین، بەڵام حكومەتی عێراق دادگای فیدراڵی نییە، بەڵكو دادگایەكە بەناوی فیدراڵی ئیشوكارەكان دەكات، ئەگەر هەشبێت هیچ دادگایەكی فیدراڵی ماددەیەكی دەستووری هەموار بكاتەوە، بەبێ ئەوەی ئەو ماددە دەستوورییە بچێتە ریفراندۆم، دەستوور بە ریفراندۆم هەموار دەكرێتەوە نەك بە بڕیاری دادگا، هەڵوێشتی هەرێمی كوردستان دیار بوو، هەر چوار سەرۆكایەتی بڕیارەكەیان رەتكردووەتەوە، چونكە نا یاساییە و سیاسیی بووە و لایەنێكی سیاسیی لە پشت بڕیارەكە بووە، ئەم هەموو ساڵە بۆچی تا ئەمساڵ هەڵبژاردنەكان كران و هاوپەیمانیەتی سیاسی كرا ئەو بڕیارە كارا نەكرا، هۆكارەكە چی بوو، ئەگەر هۆكارێكی سیاسی لە پشت بڕیارەكە بووبێت دەبێ وەكو خۆی باس بكرێت، ئینجا كە خەڵك بڕیارەكەی پێخۆشە چی، هەرێمی كوردستان وەكو عێراقی لێبێت؟ وەكو كام شاری عێراق؟ تكایە پێم بڵێن كام شاری عێراق لە هەولێر و سلێمانی و دهۆك خۆشترە؟ كام خزمەتگوزاری عێراق لەهی هەرێمی كوردستان باشترە؟ 95%ی داهاتی عێراق بەدەستی حكومەتی فیدراڵییەوەیە ئەگەر بەو داهاتە نەیانتوانی بێت خزمەتگوزاری بكەن، كە هێشتا ئاوی خواردنەوەو بابەتی تەندروستی و پەروەردە ئەگەر بەراوردی بكەیت بەهەرێمی كوردستان لە قۆناغێكی زۆر پاشكەوتوودایە و ئێمە زۆر لە پێشترین بە 5%ی داهاتی عێراق ئێمە ئەوەمان كردووە، بە هەموو كەموكوڕییەكان كوردستان بووەتە پەناگەی ملیۆنان مرۆڤ كە شوێنەكانی دیكەی عێراق بەهۆی قەیرانی ئابووری و ئەمنی هاتوونەتە هەرێمی كوردستان و بەشوێنێكی ئارامیان بینیوە بۆیە هاتوونەتە ئێرە".   ئێوە وەك رۆژنامەنووس ئەركی ئەوەتان هەیە هاووڵاتییان ئاگادار بكەنەوە، لەهەمانكاتدا ئەركی ئەوەشتان هەیە خەڵك لە نیشتمان و كوردستان نزیك بكەنەوە، خۆشەویستی وڵات و دەسەڵات تێكەڵ نەكەن، دوو شتی جیاوازن   سەبارەت بەدۆسیەی نەوت و غاز سەرۆكی حكومەتی هەرێم وتی :"حكومەتی عێراق 12 ملیار دۆلاری داناوە بۆ لێگەڕان و پێشخستن و دەرهێنانی نەوت كە لەسەر بودجەی نەوت حیساب نییە، بەڵكو لە بودجەی سیادی عێراق تەرخانكراوە، بە هیچ شێوەیەك ناچێتە سەر كولفەی دەرهێنانی نەوت، ئەگەر ئەوە حیساب بكرێت كولفەكە زیاترە، دووەم كێڵگەكانی نەوت لە شوێنێك بۆ شوێنێكی دیكە جیاوازییان هەیە لەهەندێك شوێن ئاسانترە و لە هەندێك شوێن زەحمەتترە، سێیەم كۆمپانیای سۆمۆ كە بە حیساب كۆمپانیای بەرپرسە لەدەرهێنان و فرۆشتنی نەوتی عێراقی كۆمپانیایەكە لە سەردەمی رژێمی بەعس دروستكراوە و تاكو ئێستا گۆڕانكاری بەسەردا نەهاتووە بە هیچ شێوەیەك رەنگدانەوەی حكومەتێكی فیدراڵی پێوە دیار نییە، ئەگەر سۆمۆ گۆڕانكاری بە ستراكچەرەكەی دا بكرێت و بۆ كۆمپانیایەكی فیدراڵی و جێگری سەرۆكی سۆمۆ ببێت بەكەسێكی خەڵكی كوردستان و مافی ڤیتۆی هەبێت لەسەر بڕیارەكان بۆ ئەو نەوتەی لەهەرێمی كوردستان دەفرۆشرێت، وەكو هی عێراقی لێبێت كە چۆن و بەچەند دەیفرۆشن، هەروەها لە یاسای نەوت و غازی هەرێم باسی ئەوە كراوە هەرێم دوو كۆمپانیا دروست بكات كۆمپانیانی نیشتمانی، كۆمپانیانی فرۆشتنی نەوت، كە كۆمۆ ناونراوە و هاوشێوەی سۆمۆ بێت و لەگەڵ سۆمۆ ئیش بكات بۆ هەناردەكردنی نەوت، سۆمۆ هاتووە هەر كەسێك نەوتی كوردستان بكڕێت هەڕەشەیان لێكردووە و پێیان وتون ئێوە هەقی كڕینی نەوتی كوردستانتان نییە بە نایاسایی لەقەڵەمی داوە، كۆمپانیایەك ئەو حەقە بە خۆی دەدات كە بڕیار لەسەر نەوتی هەرێمی كوردستان بدات، ئەمە وایكرد كڕیارەكان بێن بەوەزارەتی سامانە سرووشتییەكانی هەرێم بڵێن نەوتی ئێوە مەترسی لەسەرە، لەبەر ئەوە دەبێ بەنرخێكی هەرزانتر پێمان بفرۆشن ئەگەرنا ئێمە ناتوانین بیكڕین، كەواتە هۆكارێك بۆ هەرزانتر فرۆشتنی نەوتی كوردستان خودی كۆمپانیای سۆمۆیە، دواتریش هاتووە رەخنەی لە هەرێمی كوردستان گرتووە و دەڵێ نەوتی ئێوە هەرزانتر فرۆشراوە، لەم كابینەیە ئێمە هاتین بانگی هەموو كڕیارەكانی نەوتمان كرد، پێمان وتن بەو داشكاندنەی كە بەئێوە دراوە، ئێمە چیتر ئەوە قبووڵ ناكەین، دەبێ ئەو نرخە كەم بكرێتەوە، لەهەر بەرمیل نەوتێك 3 تا 4 دۆلارمان بۆ خەزێنەی حكومەت گێڕاوەتەوە، ئەگەر ئەو هەڕەشانەی سۆمۆ نەبێت ئەو جیاوازییە لە نرخی هەرێم لەگەڵ عێراق نابێت، كە بەردەوام ئەو هەڕەشانە لەسەر كۆمپانیاكانی كڕیاری نەوتی هەرێمی كوردستانن، با بە ژمارە پێتان بڵێم پێشتر 25% داهاتی نەوت بۆ مووچە دەگەڕایەوە، من ناڵێم داهاتی كوردستان لەبەرئەوەی هەندێكی بۆ كولفەی كۆمپانیاكان دەگەڕێتەوە هەندێك بۆ قەرزەكان دەچێت، هەندێكی بۆ گواستنەوەی نەوت ئەمە هەمووی داهاتە بەڵام كولفەیە حكومەتی هەرێم ناچارە ئەو پارەیە بداتەوە، لەگەڵ ئەوەش ئێمە هاتین ئەو رێژەیەمان لە 25% بۆ 42% بەرز كردەوە، كە وایە داهاتی زیاتر بۆ گەنجینەی حكومەت دەگەڕێتەوە تەنها بۆ مووچە". فەرمانبەرانی هەرێم سەبارەت بەزۆری ژمارەی مووچەخۆران لەهەرێمی كوردستان مەسرور بارازانی، وتی: "پرسیار ئەوەیە بۆچی ئەوەندە مووچەخۆرمان هەیە؟ من حەزدەكەم ئەو پرسیارە لە 30 ساڵی رابردوو بكەن، لەجیاتی ئەوەی هەلی كار بۆ خەڵك دروست بكرێت كە ئەو هەموو فشارە نەخرێتە سەر حكومەتی هەرێم بۆ دامەزراندن، تەنیا ئەوە كراوە كە خەڵك لە حكومەت دابمەزرێت هەر نەوەیەك  هاتووە ئەو قوتابیانەی لە زانكۆ دەرچوونە چاویان لەوە بووە كە حكومەتی هەرێم دایانبمەزرێنێت رێژەی مووچەخۆر زیاد بوو، مووچەخۆرو فەرمانبەر دوو شتی جیاوازن كە بەداخەوە من نەمبینی لە راگەیاندنەكان ئاماژەی پێبكرێت لە جیاوازی نێوان حكومەتی هەرێم و حكومەتی فیدراڵ، حكومەتی عێراقیش رێژەی مووچەخۆری زۆرە، بەڵام ئەوان چیان كردووە هاتوون جیایان كردووەتەوە شەهیدانە، پەككەوتووان، زیندانی سیاسیی لەمیزانیەی سیاسی پێیان دەدەن، تەنها مووچەی فەرمانبەران بەناوی مووچە دەدرێت، لەكوردستان هەموویان مووچەخۆرن بەفەرمانبەر و زیندانی سیاسی و شەهیدانەو پەككەوتووان، بۆیە لەهەرێمی كوردستان ژمارەكە زۆرە، بەڵام دیسان ئێمە بەردەوام بین لەسەر ئەوەی ژمارەی مووچەخۆر زیاتر بكەین یان هەلی كار بۆ خەڵك دروستبكەین، بۆ ئەوەی حكومەت لە دوای توانای خەڵك بگەڕێت، كێ بەتوانایە بێتە ناو حكومەت، نەك خەڵك هیچ توانای نەبێت بكرێت بە مووچەخۆر، ئەمە لە روانگەی ئابوورییەوە كارێكی هەڵەیە كە حكومەت تەنها شوێنی دامەزراندن بێت، دەبێ هەلی كار دروستبكرێت و كەرتی تایبەت پەرەی پێبدرێت، شتی وا دروستبكرێت كە حكومەت مەمنون بێت خەڵك ئیشی بۆ بكات، هێندە هەلی كار زیاد بكرێت مووچەی لە كەرتی تایبەت زیاتر بێت هەوڵبدات لە كەرتی تایبەت ئیش بكات نەك لە حكومەت، بەڵام ئەمە خەتای ئەو كابینەیە نییە ئێستا خەریكی ئەوەین بیگۆڕین گرنگی زیاتر بە كەرتی تایبەت بدەین و هەلی كاری زیاتر بڕەخسێنین، ئەوكاتە خەڵك لەجیاتی بێت لە حكومەت بە ملیۆنێك یان دوو ملیۆن ئیش بكات با بچێت لە كەرتی تایبەت بە 5 ملیۆن ئیش بكات، بەو شێوە داهاتی حكومەتیش زیاتر دەبێت و فشار لەسەر حكومەت كەمتر دەبێت هەروەها لەكەرتی تایبەت باجی زیاتر بە حكومەت دەدرێت كەواتا داهاتی حكومەت زیاتر دەبێت، ئەم پرۆسەیە بە رۆژێك و دوو رۆژ ناكرێت، بەڵام پرۆسەیە و كاری لەسەر دەكەین".   جیاوازی شارەكان؟! لەوەڵامی ئەوەی كە دەوترێت سەرۆكی حكومەت جیاوازی لەنێوان شارەكان كردووە، مەسرور بارزانی رایگەیاند: "بەهیچ شێوەیەك ئەوە وانییە، من لەو رۆژەی كە سوێندم خواردووە وتوومە دەبێ سەرۆكی حكومەتێك بم لەزاخۆ تاوەكو كەلار و خانەقین حوكمڕانی بكات، هەروەها جێگری سەرۆكی حكومەتیش، جێگری سەرۆكی حكومەت  بێت لە زاخۆ تا خانەقین، بەهیچ شێوەیەك جیاوازی نەبێت و رەنگدانەوەی دوو ئیدارەیی نەبێت، ئەوە شتە ناخۆشەكانی پێشترە تائێستا ماوە، هەرچەند هەوڵیش دەدرێت، بەڵام رێگری هەیە بۆ ئەوەی ئەو سنوورە خاوبێتەوە، ئەگینا من حەز دەكەم لەهەموو كوردستان وەكو یەك حوكمڕانی تێدا بكرێت، بەڵام تەداخولاتی سیاسی لە حوكمڕانیدا تائێستا ئەو كێشەی ‌هێشتووەتەوە، بەڵام مانای ئەوە نییە ئیشی لەسەر ناكرێت، ئیشی لەسەر دەكرێت و ئومێد دەكەم رۆژێك دابێت ئەو هەڵە تێگەیشتنە بڕەوێنینەوە". سەبارەت بەنەمانی پارە لەبانكەكانی سلێمانی مەسرور بارزانی وتی:"ئەم قسەیە زۆر كرا، راست نییە، سلێمانی بە موڵكی هیچ لایەنێك نازانم، تا گەمارۆی ئابووری بخرێتەسەر، هەولێر و دهۆك بەموڵكی هیچ لایەنێك نازانم، تا بڵێم لەبەر ئەو لایەنە یارمەتی دەدەم، كوردستان هی هەموومانە، هەموومان خاوەنی ئەم كوردستانەین، دەبێت بەم جۆرەش كاربكەین. بە هیچ شێوەیەك فشار نەخراوەتە سەر سلێمانی، سەرچاوەی داهاتی هەرێمی كوردستان سێ شتە، لەعێراقەوە دێت، یاخود لە نەوت و سەرچاوە نانەوتییەكانەوە دێت، داهاتی ناوخۆی هەر پارێزگایەك جیاوازە، هەندێك پارێزگا زیادی كردووە و هەیە زیادی نەكردووە، لەسلێمانی داهاتی نانەوتی وەك پێویست كۆنەكراوەتەوە و نەگەڕاوەتەوە بۆ حكومەت،كە دەبوایە ئەو كورتهێنانە پڕ بكرێتەوە. نرخی نەوت سەبارەت بەنرخی نەوت مەسرور بارزانی وتی :"نرخی نەوت راستە هەڵكشاوە، بەڵام پێشتر بەشی مووچە و بودجەی نەكردووە، حكومەتی عێراق لە 29 مانگی رابردوو تەنیا 13 مانگ پارەی ناردووە. هەرێمی كوردستان تەنیا حكومەت نییە، هاووڵاتیانی كوردستانیشە، ئێوە بەرگریتان لەمافی هاووڵاتیان كردووە بەرامبەر بەحكومەتی فیدراڵی، حكومەت بێ هاووڵاتی نرخی چییە، ئەگەر ئێوە پشتیوانی حكومەت و هاووڵاتی نەبن، كێ پشتیوانییەتی. دەبێت ئێوە پشتیوانی هاووڵاتیان و حكومەتی هەرێم بن بۆ ئەوەی داكۆكی لەمافە پێشێلكراوەكانمان بكەین. دەبوایە ئاراستەی رەخنەتان بەرامبەر بە حكومەتی فیدراڵی بێت، نەك حكومەتی هەرێم. داواكاری یاسایی و سیاسیی و داراییمان كردووە، كە پێشێلی مافی دەستووریمان كردووە، دەبێت بەیەكەوە بەرگری بكەن و پشتیوانی بكەین، ئێمە هیچ جۆرە جیاوازییەكمان نەكردووە، دوای ئەوەی هەستمان كردووە، داهاتی زیاترمان لەبەردەستە، لەگەڵ بەرپرسانی ئیداری سلێمانی و هەڵەبجە كۆبووینەوە و بڕیارمان داوە هەرچی داهات هەیە تەرخان بكرێت، بۆ مووچە، راستە دواكەوتووە، بەڵام هەبووە، ئێوە پێویستە وەك خۆیان شتەكان بە خەڵك بگەیەنن، حەز دەكەم بیر لەوە بكەینەوە لە رابردوو چیمان بەسەرهات، دوای چەند مانگێك لە پێكهێنانی حكومەت كۆرۆنا هات، جووڵە وەستا، بەغدا ناردنی پارەی راگرت، داهاتی نەوت بووە سفر، ئێمە بەچاكسازیی و كەمكردنەوەی خەرجیی بەردەوامیمان دا بەكارەكان، خەرجی حكومەت لە 200 ملیۆن دۆلارەوە كەمكرایەوە بۆ 30 ملیۆن دۆلار، داهاتی ناوخۆمان زیاد كرد، توانیمان تەنیا بەوە، لە 79%ی مووچە دابین بكەین، تەنیا ئەوەمان پێكرا، دەبوایە بەغدا هاوكاریمان بكات، بەڵام نەیكرد، ملیۆنێك ئاوارە و پەنابەر لەكوردستان هەن، دەبوایە لەخەرجی سیادی عێراق پشكیان بۆ تەرخان بكرێت، بەڵام هیچیان بۆ نەدراوە، ساڵانە زیاتر لە ملیارێك و نیو دۆلار بۆ خەرجی ئاوارە و پەنابەران و كەمپەكانە. بەدەیان هەزار قوتابی لەشوێنەكانی دیكەی عێراقەوە هاتوون ئێمە پێداویستیان بۆ دابین دەكەین و بوونەتە بار بەسەرمانەوە و حكومەتی عێراق هیچی نەكردووە. سەبارەت بە پشكی بەرپرسان و پڕۆژەكان سەرۆكی حكومەت وتی : "پێم خۆشە نموونەم بۆ بنێرن و هەر پڕۆژەیەك داوای پشكیان لێكرد، با بێت من رووبەڕووی یاسایان دەكەمەوە، دەوترێت قاچاغچێتی زیادی كردووە، راستە، بەڵام لە هەموو سنوورەكان وەك یەك نییە. من داوام كرد، ئێستاش داوا دەكەم، وەزارەتی ناوخۆ و پێشمەرگە هێزی هاوبەش دروست بكەن و یەكەمجار لە بادینانەوە دەستپێبكەن، ئینجا بچنە شوێنەكانی دیكە بۆ ئەوەی رێگری لەو قاچاغچێتییە بكەن و ئێستاش سوورم لەسەر ناردنی ئەو هێزانە. نامەوێت بچمە ناو ئەو وردەكارییە، بەڵام سیاسەتی حكومەت ئەوە نەبووە، رێگری نەكرێت، بەڵام كە هەوڵەكە دراوە، وتراوە ئەوە بكرێت شەڕ دەبێت، ئێستا خەریكین رێگەیەك دەدۆزینەوە بۆ كۆنترۆڵكردنی ئەو بابەتە، من نامەوێت كێشە قووڵتر بكرێت و دەمەوێت چارەسەری كێشەكە بكرێت. مەسرور بارزانی وتیشی: "دەوترێت لە بوارەكانی كۆمەڵایەتی و پەیوەندییەكان پاشەكشێ كراوە، ئەمە بە رەهایی نابێت، دەبێت داتاو پێوەر هەبێت بۆ هەڵسەنگاندنی حكومەت و بزانین پاشەكشەی كردووە یان پێشكەوتووە. سەبارەت بە رێگری لەپەیامنێران، مەسرور بارزانی وتی :"من لەگەڵ ئەوە نیم، ئاگاداریش نیم، سیاسەتی حكومەت نەبووە، رێگری لە هیچ پەیامنێرێك بكات، بە راگەیاندنی دەسەڵات و دەرەوەی دەسەڵات، هەندێك كات كێشەیەك بووە، یان لە شەڕی داعشدا دەچوون لایڤیان دەكرد، ئەمە لایەنی ئەمنیی پێی خۆش نییە، رەنگە مەترسی دیكەی بەدواوە بێت، ئەم شتانە نابێت راستەوخۆ باس بكرێن، رێگری لەوە ناكرێت بە رێگری لەئازادی رادەربڕین و رووماڵی هەواڵ پێناسە بكرێت، دەمانەوێت لە میدیا نزیك بین و هیوادارم ئەم كۆبوونەوەیەش وا لێكبدەنەوە. لەوەڵامی پرسیارێك سەبارەت بەكۆبوونەوەی حكومەت لە سلێمانی، سەرۆكی حكومەتی هەرێم وتی :"هیچ جیاوازییەك لەنێوان هیچ شوێنێك و بستێكی خاكی كوردستان ناكەم، شوێنی كۆبوونەوەكان دیارە، رەنگە رێك نەكەوێت لە رووی تەكنیكییەوە، ئەگینا هیچ كێشەم نییە لەهەر كوێیەك بێت. سەبارەت بە بیست هەزار یەكەی نیشتەجێبوون لەهەرێمی كوردستان كە بڕیاری دروستكردنی دراوە، مەسرور بارزانی وتی :"وتوومانە هەمووی بكرێتە ئۆنلاین و دەبێت شتێكی باش درووست بكرێت و ئەوەی دەكرێت، دەبێت كوالێتی بەرز بێت و مەترسی لەسەر ژیانی داهاتووی خەڵك درووست نەكات. لەوەڵامی پرسیارێكی دیكەدا مەسرور بارزانی وتی :"پەیوەندی بە كونسوڵخانەكانەوە دەكرێت و هەرچی خراپە لەپەنای دەرگا شاراوەكان بەو خەڵكە دەوترێت، باسكردن و خراپكردنی وڵات و نەتەوەو دەسەڵاتی خۆت بۆ خۆت خراپە، رەخنەت هەبێت بە دەسەڵاتی خۆتی بڵێ، بۆ بە بیانییەكانی دەڵێی، چی پێ دەكرێت؟ یارمەتیت دەدات؟ با حكومەتی خۆت یارمەتیت بدات، ئێمە ناترسین لە كەموكورتییەكان، بەڵام وەڵامی خۆمان هەیە، هەندێك شت هەیە كاریگەری لەسەر پرسی نیشتمانی و نەتەوەیی هەیە و دەبێت خۆتان لەبەرچاوی بگرن. سەبارەت بە مەترسی كەمئاوی لەوەڵامی پرسیارێكدا سەرۆكی حكومەت وتی :"ئەولەویەتی ئێمە دابینكردنی ئاوی خواردنەوەیە، سەرچاوەی ئاومان بارانە، رووبارەكانە، كە دراوسێكان گرتوویانن، ئاوی ژێرزەوییە، كە بە داخەوە سەدان مەتر دابەزیوە، ئاو پێویستە هەبێت، كە نەبێت دەبێت بزانین چۆن چارەسەری بكەین، ئاوی قورس پاككراوەتەوە و بۆ خواردن ناشێت و بۆ ئەو جۆرە شتانە بەكاردەهێنرێت.     ئێمە نین رێكناكەوین، ئێمە چەندین جار شاندمان نادرووەتە بەغدا بۆ ئەوەی رێكبكەوین، بەڵام ئێمە دەستوورمان هەیەو رێككەوتن لەگەڵ خۆڕادەستكردن دوو شتی جیاوازن، ئێمە دەڵێین: با دەستوور حەكەم بێت و هەرچی ئەركی دەستوورییە لەسەر شانی ئێمە جێبەجێی دەكەین، بەڵام هەرچی مافی دەستووریشمان هەیە دەبێت رێزی لێبگیرێت، بەغدا دەیەوێت ئێمە ئەركەكە جێبەجێ بكەین، بەڵام مافی ئێمە نەدات، ئەگەر بەغدا ئامادە بێت بێتە پێشەوە لەگەڵ ئێمە رێكبكەوێت، ئێمەش ئامادەین لەگەڵ بەغدا رێكبكەوین     ئینتیما مەسرور بارزانی لەوەڵامی پرسیارێكدا سەبارەت بەئینتیمای نیشتیمانی وتی :"زۆر لەو دیدارانەم بینیوە، كە پەیامنێرەكە تەحریكی خەڵك دەكات، پێی دەڵێت: كاكە تۆ نانت نییە و ئاوت نییە، رات لەسەر فڵان شت چییە، ئەمە بۆ خۆی هاندانە، خەڵك ئینتیمای هەیە، بەڵام هەندێك سەریان لە خەڵك تێكداوە، ئەگینا خەڵك وڵاتی خۆی خۆشدەوێت، ئەركی ئێوەیە خەڵك هانبدەن وڵاتی خۆی خۆش بوێت. لەبارەی دۆخی پێشمەرگە، سەرۆكی حكومەت وتی :"دەوترێت لە نۆرەی بەنزینم ناتوانم بەرگری بكەم، ئەی ئەو پێشمەرگەیەی لە هێڵی پێشەوەیە، ئەویش ماڵ و منداڵ و ژیانی نییە؟ بۆچی ئەو دەتوانێت بەرگری بكات، بەڵام كەسێكی دیكە لە نۆرەی بەنزینە ناتوانێت! لەكوردستان زیاتر لە 2 ملیۆن ئۆتۆمبێل تۆمار كراون، ئەگەر رەوشی ژیانی خەڵك ئەوەندە خراپە بۆچی دوو ملیۆن ئۆتۆمبێلی تۆمار كراو لەكوردستان هەن؟! لەدرێژەی قسەكانیدا سەبارەت بە قەیرانەكانی هەرێم، مەسرور بارزانی وتی :"لافاو بووە، گرانی بووە، كۆرۆنا بووە حكومەت لەوێ بووە، بە هەموو جومگەكانییەوە ئامادەیی هەبووە، بۆ نموونە لە رووی سووتەمەنی، بەداخەوە حكومەتی عێراق بڕی پێویست بۆ سووتەمەنی نەنارد، بە مووشەك لەپاڵاوتگەیەك درا، ئەمە وایكرد قەیرانێك درووست بێت، ئێوەی راگەیاندنكاران داواتان كرد، كە رێگری لەهێنانی ماددەی خراپ بكرێت، لەسەر پێشنیازی ئێوە حكومەت كۆمەڵێك رێكاری بۆ كۆنترۆڵكردنی هاوردەی بەنزین گرتەبەر، حكومەت دەیەوێت تەنیا بازرگان سوودمەند نەبێت، بەڵكو هاووڵاتی سوودمەند بێت. پشتیوانی لە بازرگانانیش دەكات، بەڵام نایەوێت بارگرانی تەنیا لەسەر هاووڵاتیان درووست بێت. دوای قەیرانەكە، حكومەتی هەرێم بڕیاری پێویستیی دا بۆ هەڵگرتنی گومرگ. سوپاس بۆ خوا قەیرانەكە تا رادەیەك چارەسەر بووە، بەڵام هەمووی چارەسەر نەبووە، چونكە لەهەموو جیهاندا ئەو قەیرانە هەیە لەبەریتانیا و ئەمریكاش، كاتێك نرخی سووتەمەنی بەرز بوو، نرخی هەموو شتێك بەرز دەبێتەوە، چونكە هەموو شتێك بە سووتەمەنی دەكرێت، تائەو ئاستەی كەرەستەی خواردن كە بۆ كوردستان دێت، گواستنەوەشی زیاد دەبێت، چونكە پەیوەستە بە گرانبوونی نرخی سووتەمەنی، بۆیە گرانییەكە دەچێتە سەر نرخی خواردنەكە، بۆ ئەوەی بارگرانی نەكەوێتە سەر خەڵك، حكومەتی هەرێمی كوردستان هاتووە هەندێك رێككاری گرتووەتەبەر، بۆ نموونە گومرگی لەسەر هاوردەكردنی ئەم جۆرە شتانە كەمكردووەتەوە، لەهەندێك شوێن 10 سەموون بوو بە هەزار دینار، بوو بەهەشت سەموون، یەكسەر خەڵك هاواری لێهەڵسا، حكومەت بۆ ئەمە كارەباكەی لەسەر فڕنەكان كردە بێ بەرامبەر، حكومەت شتی كردووە، ئەمە نییە نەیكردبێت، زۆر شت كراوە، جیا لەمە، زیاتر لە 20 ملیۆن دۆلار بۆ پشتیوانیكردن لە نرخی بەنزین خەرجكراوە، بۆ مەسەلەی پڕۆژەكان، ئێمە جیاوازیمان لەهیچ پڕۆژەیەك نەكردووە، بەڵام بازرگانەكان خۆیان دێن داوای ئەنجامدانی پڕۆژە دەكەن، حكومەت ناتوانێت پڕۆژە بكات، كاتێك بازرگان دێت حكومەت تەنیا هەڵسەنگاندنی بۆ دەكات، دواتر بڕیاری لەسەر دەدات، لەهەر شوێنێك یاخوود لە پارێزگایەك خەڵك هاتبێت داوای ئەنجامدانی پڕۆژەی كردبێت، ئەمە خەتای حكومەت نییە". سەبارەت بەدۆخی سلێمانی مەسرور بارزانی وتی :"بەڕێزێك دەڵێت، لە سلێمانی هیچی بەسەر هیچەوە نەماوە، یاخوود نۆرەی بەنزین هەشت سەعاتە، مووچەخۆر گلەیی دەكات، بەڕێزان كاتی خۆی داوایەك كرا، وتم ئێمە دەبێت بزانین سەرچاوەی داهاتی ئەم حكومەت و وڵاتە چەندە، داهاتی نەوت دیارە، دیلۆیتە یاخوود فڵانە، ئەمانە هەموویان دیارن، بەڵام سەرچاوەی داهاتی ناوخۆمان دیار نییە دەبێت بزانین چەندە، وتمان دەبێت هەمووی بگەڕێتەوە بۆ وەزارەتی دارایی، هەموو وەزارەتێكیش چوارچێوەی دیاریكراوی هەیە، داوامان كرد بزانین داهاتەكە چەندە، دوای ئەوە داوایەكی زۆر كرا بەحیساب ئەوكات تۆمەت خرایە پاڵ من بەحیساب من قۆرخی دەسەڵاتم كردووە، دەسەڵاتەكان بۆ خوارەوە شۆڕ ناكەمەوە، هەر لەسەر ئەم داوایە پێیانم وت فەرموون ئەمە دەسەڵات، بەڵام دەسەڵات لەگەڵ بەرپرسیارێتی دەبێت، تەنیا ئەوە نییە كە تۆ تەنیا دەسەڵاتت هەیە، دەبێت بەرپرسیارێتی ئیداری و داراییش وەربگریت، دەسەڵاتەكەن هەمووی دراوەتەوە پارێزگاكان، من باسی سلێمانی ناكەم، هەموو پارێزگاكان وەك هەڵەبجە، هەولێر و دهۆك، چونكە مەسەلە ئەوە نییە تەنیا هەولێرە بەرامبەر بەسلێمانی، هەموو پارێزگاكان دەسەڵاتیان بۆ شۆڕ كراوەتەوە، ئەگەر كێشە لە پارێزگایەك هەبووبێت، دەبێت لەئیدارەی محەلی پارێزگاكە بپرسم بۆچی ئەم كێشە سەریهەڵداوە، ئەگینا حكومەت بە چاوێكی یەكسان لەگەڵ هەموو پارێزگاكان مامەڵەی كردووە، من حەز دەكەم هەموو خەڵك لە تەلاری ئاڵتوونیدا بژین، بەڵام ئیمكانییەتی ئەم وڵاتە ئەمەیە، ئێمە دەمانەوێت زیاتری بكەین، زیادكردنی ئیمكانییات و داهات پێویستی بەكاری هاوبەشە، ئێوەش دەبێت یارمەتیدەری ئێمە بن، ئەگەر كارێكی باشمان كرد دەستخۆشییمان لێبكەن، بۆ ئەوەی ئێمە بتوانین هەنگاوێكی باشتر بهاوێژین، بەڵام چی باشەت كرد، هەر بەخراپە لێكدرایەوە، رێگەت لێگیرا، خەڵكێك هەیە بەرژەوەندی تێكچووە، ئیتر لەسەر ئاستی سیاسی بێت یاخوود لەسەر ئاستی كەسی بێت، دەسەڵاتیشی هەیە بیەوێت بەرامبەر بەحكومەتەكە هەرچی باشە بەخراپ پیشانی بدات، چونكە خۆی هەست بەمەترسی دەكات نایەوێت ئەم حكومەتە سەركەوتوو بێت، ئێمە هەمیشە باسمان لەمەترسییەكان كردووە، وتوومانە مەترسی داعش هێشتا ماوە، مەترسی قەیرانی تەندروستی باسكراوە، بەخۆشمان و بەوەزیرەكانیشەوە، ئەگەر قەیرانی ئابووری هەبووبێ باسمان كردووە، سووتەمەنی و زیادبوونی نرخ هەمووی باسكراوە، لەبەرامبەردا رێكاریشمان گرتووەتەبەر، یەك لەوانە مەسەلەی ئاسایشی خۆراك، پێشبینی ئەوەمان كردووە ئەگەر قەیرانێك هەبێت، خوانەخواستە هیچ نەبێت لە برسان نەمرین، چەندین كۆگاكامان دروستكرد و پڕۆژەی حكومەتمان دروستكرد، بە پشتیوانی كەرتی تایبەت پڕۆژەی ئاسایشی خۆراك و كارگەكانمان دروستكرد، بۆ ئەوەی ئێمە هیچ نەبێت پشت بەخۆمان ببەستین، بەڵام هەمووشی بەدەست خۆمانەوە نییە، بەداخەوە ئەمساڵ بەهۆی كەمبارانی، داهاتی جووتیاران وەك ساڵانی پێشوو نەبووە، نەك لەبەر ئەوەی حكومەت بەرهەمەكانیان وەرنەگرتووە، داوامان لە جووتیاران كردووە، بەرهەمەكانیان زیاد بكەن، بۆ ئەوەی نەك تەنیا بەشی خۆمان بكات، بەڵكو بتوانین هەناردەی دەرەوەش بكەین". پاراستنی زمانی كوردی مەسرور بارزانی وتی: "من داوامكردووە، كە نابێت پرسی زمان بكرێتە قوربانی هیچ شتێك و دەبێت گرنگیی پێبدرێت، دەبێت هەموومان گرنگی بەزمانی كوردی بدەین، ئێستا هەر یەكێكمان بچێتە دەرەوەو لەهەر وڵاتێكی دیكە بیەوێت بخوێنێت دەبێت زمانی ئەو وڵاتە بزانێت، ئەی بۆچی یەكێك بیەوێت بێت لە كوردستان بخوێنێت‌ زمانی كوردی نەزانێت! دەبێت گرنگیی پێبدەین، ئینجا ئەگەر كەمتەرخەمی هەیە، ئەوا‌ بێگومان كاری زیاتری لەسەردەكەین. كێشەكانی كارەبا سەبارەت بەكێشەی كارەبا، سەرۆكی حكومەتی هەرێم وتی :" ئێمە دوو كێشەی كارەبامان هەیە، یەكێكیان پەیوەندی بەسووتەمەنییەوە هەیە، ئەوی دیكەشیان پەیوەندی بەوێستگەكانەوە هەیە، چونكە هەرچەند من پسپۆڕی كارەبا نیم، بەڵام وەك بۆم باسكراوە، لەگواستنەوەدا كارەبایەكی زۆر بەهەدەر دەچوو، بەهۆی ئەو سیمەی بۆ گواستنەوە بەكارهاتووە، ئەوەی كێشەیە ئەوە نییە كە ئێمە توانای دابینكردنی كارەبامان نەبێت، تا ئێستاش ئێمە نزیكەی 7 هەزار مێگاوات توانای بەرهەمهێنانی كارەبامان هەیە، لەوانەیە بۆ دوو ساڵی داهاتوو ئەو رێژەیە زیاتریش بكرێت، بەڵام سووتەمەنیمان نییە بۆ بەكارخستنی ئەو هەموو كارەبایە، چونكە بەشێكی غازەو پەیوەندیی بەكورد ئۆیڵەوە هەیە، كە ئەمە بەداخەوە تێچووەكەی زۆرە و ببوو بەتاكە داهات و سەرچاوەی مووچەش بۆ هەرێمی كوردستان، بۆیە لەبری ئەوەی بدرێت بە كارەبا، دەفرۆشرا، چونكە تەنها ئەوەمان هەبوو، ئێمە سیاسەتمان هەیە بۆ ئەوەی غازەكە لەماوەیەكی كەمدا زیاد ببێت و ئەو غازەش بەر لەهەموو شتێك بۆ بەرژەوەندی خەڵكی كوردستان بەكاردەهێنرێت. رێكارەكان بەرامبەر شوێنە نەشیاوەكان سەرۆكی حكومەتی هەرێمی كوردستان وتی :"لەسەر ئەوەی كە چی كراوە بەرامبەر بەو شوێنە نەشیاوانە، جارێ هیچ پیشەیەكی یاسایی گوناه نییە، لەسەر مۆدێلكردن بێت، ئەگەر یاسایی بێت گوناه نییە، ئێمە وڵاتێكی داخراو نین و نەمانوتووە ئەمە رێگەپێدراوە و ئەمە رێگەپێدراو نییە، بەڵام رێكار لەسەر شوێنی نایاسایی لەهەموو شارەكانی كوردستان كراوە نەك تەنها لەهەولێر، لەهەموو ئەو شوێنانەی نایاسایین كاری نایاسایی و بەدڕەوشتی كراوە، داخراون و رێكاری یاسایی بەرامبەر بەتاكەكان و بەرپرسەكان و خاوەن خانەكان و ئەو كەسانەی خراپ بەكارهێنانیان كردووە، گیراوەتەبەر". لەبارەی دروستكردنی پەیوەندییەكی پتەوتر بۆ گەیاندنی زانیاری بۆ راگەیاندن، مەسرور بارزانی وتی:" منیش داوا دەكەم لەوتەبێژ و حكومەت میكانیزمێكی باشتر بدۆزنەوە بۆ ئەوەی ئەو پەیوەندییە پتەوتر بكرێت و زانیاری زیاتر بەهاووڵاتییان و رۆژنامەنووس و دەزگاكانی راگەیاندن بدرێت، بۆ ئەوەی ئەوانیش زیاتر هاوكارمان بن". رێككەوتن لەگەڵ بەغدا سەرۆكی حكومەت لەوبارەیەوە وتی :"ئێمە نین رێكناكەوین، ئێمە چەندین جار شاندمان نادرووەتە بەغدا بۆ ئەوەی رێكبكەوین، بەڵام ئێمە دەستوورمان هەیەو رێككەوتن لەگەڵ خۆڕادەستكردن دوو شتی جیاوازن، ئێمە دەڵێین: با دەستوور حەكەم بێت و هەرچی ئەركی دەستوورییە لەسەر شانی ئێمە جێبەجێی دەكەین، بەڵام هەرچی مافی دەستووریشمان هەیە دەبێت رێزی لێبگیرێت، بەغدا دەیەوێت ئێمە ئەركەكە جێبەجێ بكەین، بەڵام مافی ئێمە نەدات، ئەگەر بەغدا ئامادە بێت بێتە پێشەوە لەگەڵ ئێمە رێكبكەوێت، ئێمەش ئامادەین لەگەڵ بەغدا رێكبكەوین، پێموایە دەبێت ئێوە ئەو شاهێدییە بۆ ئێمە بدەن، كە چوونی چەندین شاندی هەرێمی كوردستان بۆ بەغدا چەندین جار، یان بانگهێشتكردنی ئەوان بۆ ئەوە بووە لەگەڵ بەغدا رێكبكەوین، بەڵام ئێمە ‌ناتوانین نە من و نە هیچ كەسێك لەم حكومەتە مافی ئەوەی نییە لەسەر حیسابی مافە دەستوورییەكانی هەرێمی كوردستان سازش بكەین". خراپ بەكارهێنانی رۆژنامەوانی و یاسای دیجیتاڵی سەرۆكی حكومەت وتی :"لەناو هەموو پیشەیەكدا مەرج نییە هەموو كەسێك وەك یەك بن، مرۆڤی باش و خراپ لەهەموو شوێنێك هەیە، مرۆڤ هەیە كە ئەجێندای تایبەتی هەیە، ئەم جۆرە شتانەش هەمووی دیارە، بۆیە پێویستە وەزارەتی رۆشنبیری هەندێك موكومتر بێت لەسەر ئەوەی كە هەم بۆ پشتیوانیكردنی كاری رۆژنامەوانی و هەمیش بۆ رێگریكردن لە خراپ بەكارهێنانی رۆژنامەوانی بەناوی رۆژنامەگەری، ئەوەی یاسای دیجیتاڵی بێت دەبێت تێگەیشتبێت، من خۆم یەكێك بووم لەوانەی كە زۆر پاڵپشتی ئەوە بووم و ئێستاش دەڵێم: با بچێتە پەرلەمان، بەڵام بەداخەوە لایەنەكانی دیكە لەحكومەت پێیان وابوو ئەم یاسای دیجیتاڵە رادەربڕین سنووردار دەكات، بۆیە ئەوان گەڕاندییانەوە". خاوەندارێتی میدیا سەرۆكی حكومەت رایگەیاند:كە دەڵێن بەحیساب من میدیام هەیەو پشتگیری میدیا دەكەم و فڵان كەس میدیای هەیە و پشتگیری میدیا دەكات، لە هەموو جیهان میدیا لەلایەن كەسانێك یان لایەنێكەوە پشتگیری دەكرێت، ئیتر ئەوە چ رێكخراو، كەسایەتی سیاسی یانیش حزب بن، بەڵام گرنگ ئەوەیە ئاشكرا بێت كێ پشتگیری میدیا دەكات، گرنگ ئەوە نییە كێ لەپشتییەتی، گرنگ ئەوەیە كەسەكە دیار بێت، جا هەر كەسێك بێت، بۆ ئەوەی بۆ هەموو كەسێك دیار بێت، بەڵام ئەوانەی دیار نین با ئەوانیش دیار بن، كێ پشتیوانی ئەم راگەیاندنانە دەكەن، ئەگەر خەڵكە با ئەو خەڵكەش دیاربێت و سەرچاوەی داهاتیان دیار بێت". تۆمەتبەخشینەوە بەناوی رۆژنامەوانی لەوەڵامی پرسیارێكی دیكەدا مەسرور بارزانی وتی :" بەهیچ شێوەیەك ئێمە رێگریمان نەكردووە لە رۆڵی میدیا، بەپێچەوانەوە، من بە هەموو شێوەیەك پشتیوانی میدیام و دەمەوێت میدیایەكی بەرپرس و راستگۆ لەگەڵ خۆی و لەگەڵ خەڵك هەبێت، بەڵام ناشبێت تۆمەتبەخشینەوە بەناوی راپۆرت و میدیاو میدیاكاری پێناسە بكەین، هەموو كەسێك مافی ئەوەی هەیە رێگری لەوە بكات كەتۆمەتی پێ ببەخشرێتەوە؟، جا ئەمەش یەكێكە لەتۆمەتەكان، من لەسەرەخۆم قبووڵی ناكەم، زۆر جار ئەوە هەبووە كاتێك پرێسكۆنفرانس سازدەكرێن هیچ كەسێك بانگهێشت ناكرێن، ئەوەی دێت و ئەوەی ناهێت كەس رێگری لێناكات، بەرپرسان هەن لەگەڵ فڵان و فڵان كەناڵ قسە ناكەن، ئەوە نیشاندانی هەڵوێستە، چونكە بەداخەوە ئەو كەناڵانە لەبری ئەوەی پرۆفیشناڵانە كار بكەن، بەئەجێندایەكی پێشوەختە دێن، وەزیر لەوانەیە قەناعەتی نەبێت بەشێوەیەكی بێلایەنانە قسەی لەگەڵ بكرێت، ئەگینا كەس رێگەی لەوەزیر نەگرتووە لەگەڵ هیچ میدیاكارێك قسە بكات". سەبارەت بەتوندوتیژی بەرامبەر ژنان سەرۆكی حكومەت وتی :"توندوتیژی لەگەڵ ئافرەتان زیادیكردووە، جگە لەكاك قوباد كەسی دیكە هیچی نەكردووە، كاك قوباد بەناوی حكومەت كردوویەتی، كاك قوباد ئەگەر بەشێك بێت لە حكومەت، كەواتە حكومەت كردوویەتی، ناكرێت هەر كەسێكمان كارێك بكەین بەناوی خۆمانەوە بیكەین، دەبێت بەناوی حكومەت هەر هەموومان بەرپرسیار بین، بەداخەوەش كە رێژەی توندوتیژی نەك تەنها بەرامبەر بە ئافرەت، بەڵكو بەرامبەر هەموو هاووڵاتیان زیادیكردووە، دەبێت رێگری لێبكرێت، ئێمەی چیمان كردووە! زۆر شتمان كردووە، مەسەلەی كۆكردنەوەی چەكی نایاسایی، گرتنی تاوانباران، رێگریكردن، بەڵام لەوە گرنگتر ئەوەیە كە لەڕووی پەروەردەییەوە كۆمەڵگەی خۆمان وا پێبگەیەنین لە توندوتیژی دووربكەوێتەوە". خستنەڕووی داتاكان لەوەڵامی پرسیارێكی دیكەدا مەسرور بارزانی وتی :"من سوپاستان دەكەم، تۆزێك بە خێرایی یەك دوو شتی دیكە هەیە بۆتان باس دەكەم لەڕووی دارایی و ئابووری، ئێمە داهاتی دەروازەكان بەڕێژەیەكی بەرچاو و بەجۆرێك بۆ سێ بەرامبەر زیادیكردووە، لە ساڵی 2016 داهاتەكە 563 ملیار دینار بووە، لە ساڵی 2021 گەیشتووەتە ملیارێك و 690 ملیۆن دینار، خەرجی حكومەت لە 200 ملیۆن بۆ 70 ملیۆن دۆلار كەمكراوەتەوە، داهاتی نەوت لە رێژەی 25% كە بۆ وەزارەتی دارایی گەڕاوەتەوە، بۆ 41% بەرزكراوەتەوە، كەمكردنەوەی هەر بەرمیلێك نەوت بۆ نزیكەی 4 دۆلار كەمكراوەتەوە، ئەمەش بۆ گەنجینەی گشتی گەڕاوەتەوە، كاتێك دەستمان بەو كابینەیە كرد، وتم دەبێت بزانین حكومەت چ مومتەلەكاتێكی هەیە، لەهەموو حكومەت ئەوەی كە تۆماركرابوو و بۆیان هێنام، وتیان 28 مومتەلەك لەسەر ناوی حكومەت تۆماركراوە، ئەمەش نەك لەبەر ئەوەی نەبوو، بەڵام تۆمارنەكرابوو، ئێمە هەر لەم كابینەیە لیژنەمان پێكهێنا بۆ ئەوەی بزانین ئێمە چیمان هەیە، دوای ماوەیەك هاتنەوە 36 هەزار مومتەلەكات بەناوی حكومەت هەبوون كە ئێستا تۆماركراون". هەنگاوەكانی چاكسازی مەسرور بارزانی وتی :"لەوەزارەتی ناوخۆ زۆر شت كراوە، بۆ ئەوەی چاكسازییەكان بەئاراستەی كەمكردنەوەی رۆتین و فەراهەمكردنی خزمەتگوزارییەكان بن، بۆ نموونە بنكەی دەرهێنانی پاسپۆرت، 5 بنكەی نوێی دەرهێنانی پاسپۆرت كراونەتەوە لەسۆران، كۆیە، چەمچەماڵ، ئاكرێ و زاخۆ و لەپلانیشدایە، یەكەیەكی دیكە لە قەزای ئامێدی بكرێتەوە و یەكێكیش بۆ قەزای پێنجوێن لە پلاندایە، 50 بنكەی تۆماری كارتی نیشتمانی لە سەرانسەری هەرێمی كوردستان كراونەتەوە، دامەزراندنی سیستەمی نوێی شۆفێری و ساڵانەی ئۆتۆمبێل بەپێی ستانداردی جیهانی، كە بەم نزیكانە دەكەوێتە ‌كار و بەپێی پلان ئەم خزمەتگوزارییە نوێیە لە 22 بنكە پێشكەش بەهاووڵاتییان دەكرێت، بەگەڕخستنی سیستمی گرێبەستی ئەلیكترۆنی بۆ كڕین و فرۆشتنی ئۆتۆمبێل، زیادكردنی داهات بە رێگەی دانانی رسووماتی ڤیزا و نشینگە، دانانی رێنمایی بەرگری شارستانی و سەلامەتی گشتی، كە تایبەتە بەدانانی ستانداردەكانی بەرگری شارستانی لەباڵاخانە و شوێنە گشتییەكان و وێستگەكانی سووتەمەنی، لەئاستی یاسایی دوو پڕۆژەیاسای گرنگ پەسەندكران و دەركران، كە یاسای كۆمپانیا ئەمنییەكان و یاسای چەكە لەهەرێمی كوردستان، كە ئەمە بۆ ئەوەیە چەكە نایاساییەكان لەهەرێمی كوردستان كۆبكرێنەوە، لەسێكتەری ئاوەدانكردنەوە و نیشتەجێكردن، ئاوەدانكردنی 60 پڕۆژەی رێگەوبان بە بودجەی 854 ملیار دینار كە 1212 كیلۆمەتر بەرهەمیان هەبووە، لەوەش 92 كیلۆمەتر دووسایدە و چەندین رێگەی یەكساید و توونێل و پردی گەورەی لەخۆگرتووە، بەگشتی 12 ملیۆن مەتردووجا قیرتاوكردنی لەخۆگرتبوو، ئەمە هەموو كراوە كاتێك ئێمە لەقەیرانی ئابووریشدا بووین، لە سێكتەری وەبەرهێنان، كابینەی نۆیەم گرنگی تایبەتی بەپڕۆژەی پیشەسازی و كشتوكاڵ داوەو هانی وەبەرهێنانی داوە،‌، تائێستا لە كابینەی نۆیەم 194 پڕۆژە لە سێكتەری جۆراوجۆر مۆڵەتیان پێدراوە بەسەرمایەی 11 ملیار و 155 ملیۆن دۆلار، سێكتەری كشتوكاڵ، كە خاڵێكی گرنگ بووە بۆ ئەم كابینەیەو بیستوومانە، دەبێت زۆر زۆر گرنگی بەو سێكتەرە بدەین، بۆ هەمەجۆركردنی داهات و پێموایە ئەمە سەروەتێكی لەبننەهاتووە، دەبوایە گرنگییەكی زۆر زیاتری پێ بدرابایە و لە ئێستادا بۆ ئێمە ببایە جێگرەوەی نەوت و غازیش، بەڵام ئێستاش درەنگ نییە، بۆ ئەوەی كاری زیاتری لەسەر بكەین، لەم كابینەیەدا كەرتی كشتوكاڵ هەشت بەرامبەر ئاستەكەی بەرز بووەتەوە، لە رێگەی دەرچواندنی یاسای سەرپەرشتیارانی پڕۆژە كشتوكاڵییەكان، كەدەبێتە هۆكاری رەخساندنی زیاتر لە 5 هەزار هەلی كار لەسەرجەم پڕۆژەكانی كەرتی تایبەتی بواری كشتوكاڵییەكان بۆ بەشەكانی كشتوكاڵ و ڤێتەرنەری، هەروەها دامەزراندنی پڕۆژەكانی بەبازاڕكردنی گەنم كە خۆی لە 13 كارگەی جۆراوجۆر دەبینێتەوە، بۆ پاراستنی ئاسایشی خۆراك و توانای ئەمباركردنی  500 هەزار تۆن گەنمی جوتیارانی هەیە،‌ جگە لەوەی لە كەرتی تایبەتیش كارگەی تایبەتی خۆراك دامەزراوە، لەم كابینەیەدا زیاتر لە 280 پڕۆژەی سێكتەرە جۆراوجۆرەكانی سامانی ئاژەڵی مۆڵەتی پێدراوە، جگە لە 30 هەزار خانووی پلاستیكی بۆ بەرهەمە كشتوكاڵییەكان دروستكراوە، مۆڵەت بە 2659 كۆمپانیای خۆماڵی دراوە، جیا لە مۆڵەتدان بە  87 كۆمپانیای بیانی و 553 كارگە،  جیا لەوەش 3 سایلۆ بەگوژمەی 58 ملیار دینار و  19 كۆگاش دروستكراون، لە سێكتەری كارەبادا، لە ئێستادا 310 مێگاوات كارەبا بەرهەم دەهێنین، بەڵام توانای بەرهەمهێنانی 6903 مێگاوات وەك ژێرخان هەمانە، تاساڵی 2023 بڕی 2493 مێگاواتی دیكەش دەتوانین بەرهەم بهێنین، تا مانگی تشرینی یەكەم ئێمە دەتوانین 650 مێگاواتی دیكە بخەینە سەر سیستمەكە، كە 2493 مێگاواتە لە (كۆمباڵ سایكڵ)، (هایدرۆ پاوەر)، (سۆڵار) و (فڵایدگارس)و ئەمانە ئیزافەی سەر سیستمی كارەبا دەكرێن، لەم كابینەیەدا 615 مێگاوات بەڕێژەی 19.4% كارەبا زیادی كردووە، یەكەمجارە لەهەرێمی كوردستان و عێراق توانیمان بڕی 165 مێگاوات كارەبا لەگازی راكێشراو بەرهەم بهێنین، هەروەها ئەنجامدانی پڕۆژەی پێوەری زیرەك بووە هۆی كەمكردن و بەفیڕۆچوونی لە 45% بۆ 31%، هێشتا زۆرە دەبێت ئەوەش كەمبكرێتەوە، بەم پڕۆژەیە توانیمانە 14% داهاتی كارەبای بەفیڕۆچوو بۆ گەنجینەی حكومەت بگەڕێنینەوە، كەواتە پێوەری زیرەك كارەبا زیاتر ناكات، بەڵام داهاتی بەفیڕۆچوو بۆ گەنجینەی حكومەت دەگەڕێنیتەوە، لەبارەی سێكتەری شارەوانی و گەشتوگوزار، بریتین لەبنبڕكردنی زێدەڕۆیی لەسەر موڵكی گشتی، ئەنجامدانی پڕۆژەی ستراتیژی رێگاوبان لەهەموو شارە گەورەكانی هەرێمی كوردستان، وەك شەقامەكانی 150 مەتری لەهەولێر، 100 مەتری لەسلێمانی، شەقامی بارزان لە دهۆك، بەداخەوە كاتێك تەمویل دەكرێن هەندێجار ئەو پارەیە وەك خۆی نادرێت، لێرەوە دەمەوێ سوپاسی كەرتی تایبەت بكەم، لەكارەكانیان بەردەوامن بۆ جێبەجێكردنی ئەم پڕۆژانەو تۆماركردنی بەرزترین ئاستی هاتنی گەشتیار بۆ ساڵی 2021 كە گەیشتووەتە زیاتر لە 4 ملیۆن گەشتیار، ئەمەش بەبەراورد بەساڵانی پێشتر بەرزترین ئاست بووە، ئەگەر ئێمە ئەم جۆرە پڕۆژانە ئەنجام بدەین، ئاستی هاتنی گەشتیار بۆ كوردستان زیاتر دەبێت، لە سێكتەری پەروەردە، شوێنی نوێ بۆ زیاتر لە 60 هەزار قوتابی دابینكراوە، لە رێگەی دروستكردنی 57 باڵەخانەی تازە، تاكۆتایی كابینەی نۆیەم ئەم ژمارەیە دەگاتە 100 هەزار شوێن بۆ قوتابی، لەكەرتی خوێندنی باڵاو توێژینەوەی زانستی پڕۆژەكان بریتین لەكەمكردنەوەی كرێی خوێندن بۆ قوتابیان لەم كابینەیەدا بە رێژەی 100%، لەماوەی سێ ساڵی كابینەی نۆیەم ئەو قوتابیانەی لە رێگەی زانكۆ لاینەوە داواكارییان پێشكەشكردووە، دەرفەتی خوێندن بۆ هەر هەموویان رەخسێندراوە، هەروەها دابینكردنی كورسی خۆڕایی بۆ سەرجەم منداڵانی شەهیدان، دابینكردنی كورسی خوێندن بۆ سەرجەم قوتابیانی كەركووك، شەنگال و خانەقین، جیا لەدابینكردنی 6 هەزار كورسی خوێندنی باڵا بۆ دیبلۆم، ماستەرو دكتۆرا، هەروەها دابینكردنی پاڵپشتی دارایی بۆ خوێندنی ئەكادیمی بۆ ساڵی 2022 مانگانە بە بڕی 7 ملیار و 500 ملیۆن دینار، لەكەرتی تەندروستیشدا دانانی دوو یاسای بەرەنگابوونەوەی ماددەی هۆشبەر و یاسای مافی نەخۆش، هەروەها رێكخستنەوەو دانانی رێنمایی تایبەت بە نەخۆشخانە و سەنتەرە تایبەتەكان و كەمكردنەوەی نرخ بە رێژەی 40%، دابینكردنی ئامێرەكانی چارەسەری تیشك و كردنەوەی سەنتەری زیاتر بۆ شێرپەنجە، لەبواری چارەسەریدا، زیاتركردن و فراوانكردنی دامودەزگا تەندروستییەكان و ئەنجامدانی نەشتەرگەرییەكان بە رێژەی 76% لە كەرتی گشتی و 24% لە كەرتی تایبەت، خزمەتكردنی كەسوكاری شەهیدان و ئەنفالكراوان، خەرجكردنی زیاتر لە 19.5 ملیار دینار كرێی خوێندنی كەسوكاری شەهیدان و ئەنفالكراوان و زیندانیانی سیاسی، دەركردنی زیاتر لە 11 هەزارو 141 فەرمان بۆ دابەشكردنی زەوی بەسەر كەسوكاری شەهیدان، ئەنفالكراوان و زیندانیانی سیاسی، تاپۆكردنی 200 شوقە و 75 خانووی سەروەران و هەروەها تاپۆكردنی 1500 پارچە زەوی بۆ كەسوكاری شەهیدان، ئەنفالكراوان و زیندانیانی سیاسی كە لەساڵی 2011 پێیان دراوە، وێڕای دانانی داتابەیسێكی دابینكردنی خزمەتگوزاری بۆ كچ و كوڕی شەهیدان و ئەنفالكراوان، بۆ دابینكردنی خزمەتگوزاری بۆیان، لەوەزارەتی داد، 57 فەرمانگەی دادنووسی بە ئەلیكترۆنی كراوە، لەكۆی 68 فەرمانگە، هەروەها كردنەوەی 13 فەرمانگە و جێگرایەتی داواكاری گشتی تۆماركردنی خانووبەرە، دادنووس و جێبەجێكردنی مناڵە ناكامەكان، لەسێكتەری پاراستن و چاككردنی ژینگە، هەلی كار بۆ 807 دەرچووانی بواری ژینگە دابینكراوە، كە وەك چاودێری ژینگەیی لەسەر پڕۆژەكانی كەرتی تایبەت دامەزراون، كە مووچەیان لەسەر خاوەنی پڕۆژەكە دەبێت، لە كابینەی نۆیەمدا 24 پڕۆژە یاسا ئاراستەی پەرلەمانی كوردستان كراوە، لەلایەن لیژنەكانی حكومەت لەئاستی وەزارەت و بەڕێوەبەرە گشتییەكان زیاترین سەردانی پەرلەمان كراوە، جیا لەوەش زیاترین كۆبوونەوە لەم كابینەیەدا كراوە، هەروەها زیاترین روونكردنەوەو پێدانی زانیاری لەم كابینەیەدا دراوە، دانانی داتا سەنتەرێكی ناوەندی بۆ بە ئەلیكترۆنیكردنی خزمەتگوزارییەكان كە لەماوەیەكی نزیكدا لەهەرێمی كوردستان دەكەوێتە كار، كە هەموو وەزارەتەكان و بەڕێوەبەرایەتییەكان بەم داتابەیسە دەبەسترێنەوە، دەبوایە زۆر زووتر لە ئێستادا بكرێت، كە دەبووە كارئاسانی زیاتر لەسەر خوێندنەوەو دیراسەتكردن و پلاندانان لەهەموو پڕۆژەكانی حكومەت، لەداهاتوودا كاری زیاتریش دەكەین، من تەواو بووم، سوپاس بۆ پشوودرێژی و گوێگرتنان، پەنا بەخوا لەداهاتوودا پەیوەندییەكی باشتر لەنێوان ئێمە و ئێوە دروست بێت، ئێوەش بتوانن ئەركی خۆتان بەشێوەیەكی پڕۆفیشناڵانە جێبەجێ بكەن، هەر هەموومان بتوانین خزمەتی زیاتری خەڵكی خۆمان بكەین، ئەوانیش لێمان رازی بن.      

سازدانی: سەركۆ جەمال بەرپرسی لقی پێنجی پارتی لەبەغدا دەڵێت:" پارتی هێشتا سوورە لەسەر نەكشاندنەوەی كاندیدەكەی بۆ پۆستی سەرۆك كۆماری عێراق و ئەو پۆستە بەمافی خۆی دەزانێت". شوان محەمەد تەها، بەرپرسی لقی پێنجی پارتی لەبەغدا لەم چاوپێكەوتنەدا لەگەڵ هاوڵاتی دەشڵێت:"لەپاش مام جەلال هیچ سەرۆك كۆمارێك نەیتوانیوە بەرگری لەمافەكانی خەڵكی كوردستان بكات". هاوڵاتی: پارتی دیموكراتی كوردستان لەئێستادا لەبارەی پۆستی سەرۆك كۆمار بۆچوونی چییە؟ سەبارەت بەپرسی سەرۆك كۆمار سیاسەتی پارتی دیموكراتی كوردستان زۆر روونە، لەسەرەتاوە باسمان كردووە ئەو پۆستە پۆستی كوردە، بەڵام بەداخەوە یەكێتی دەڵێت پۆستی ئێمەیە، ئێمە دەڵێین پۆستی كوردە، لەدواجاردا وەكو پارتێكی سیاسی كە خاوەنی زۆرینەی كورسیەكانی هەرێمی كوردستانین لەپەرلەمانی عێراق بەمافی خۆمانی دەزانین ئێمەش كاندیدێكمان هەبێت. هاوڵاتی: لەگەڵ یەكێتی لەسەر ئەو پرسە گفتوگۆكان بەچی گەیشتوون؟ شوان محەمەد: ئەگەر یەكێتی نیشتیمانی كوردستان ئامادەبوایە گفتوگۆ لەسەر ئەو بابەتە بكات كە گفتوگۆی لەسەر نەكردو یەكلایەنە بڕیاریدا كە ئەو پۆستە پشكی ئەوانە، ئەوا هیچ پێوەرێك نییە ئەو پۆستە هی ئەوان بێت، تەنها عینادیكردنی یەكێتییە لەسەر ئەو بابەتە، ئێمە وەكو پارتی دیموكراتی كوردستان ڤیتۆمان لەسەر كەس نییە، بەڵام كاندیدی خۆمان هەیە بۆ پۆستی سەرۆك كۆمارو تائێستا كاندیدی ئێمە بۆ ئەو پۆستە رێبەر ئەحمەدە، هیچ كێشەیەكمان لەگەڵ دكتۆر بەرهەم نییە یاخود كەسێكی دیكە بێت، تەنها ئەوەیە خوێندنەوەی  دیكە بۆ ئەو بابەتە دەكرێت، ئێمە پێمانوایە ئەگەر ئەو پۆستە دەستی پارتی بكەوێت دەتوانین باشتر بەڕێوەی ببەین. هاوڵاتی: بۆچی پرسی سەرۆك كۆمار لەنێوان یەكێتی و پارتی بووە بەگرێكوێرە و رێكناكەون لەسەری؟ ئایا هۆكارەكە دكتۆر بەرهەمە یاخود چی؟ شوان محەمەد: مەسەلەی ڤیتۆ زۆر قسەی لەسەر دەكرێت، ئێمە كێشەمان لەگەڵ كەسەكان نییە، كێشە دكتۆر بەرهەم ساڵح نییە، كێشەی ئێمە ئەوەیە  لەپاش مردنی بەڕێز مام جەلال پۆستی سەرۆك كۆمار لەبەغدا نەیتوانیوە داكۆكی لەمافەكانی خەڵكی كوردستان بكات، تەنانەت نەیتوانیوە بەرگری لەمافەكانی خەڵكی كوردستان بكات، بۆیە پێمان وایە ئەگەر پارتی ئەو پۆستە وەربگرێت دەتوانین بەشێوەیەكی باشتر كار لەسەر ئەو بابەتە بكرێت، چونكە پۆستی سەرۆك كۆمار تەنها پۆستێكی تەشریفاتی نییە، بەڵكو رۆڵێكی گرنگی دەبێت ئەگەر كەسێكی شیاو لەو شوێنە دابنرێت.   پارتی دیموكراتی كوردستان خاوەن قەزیەیە، هەرێمی كوردستان لەئەستۆی ئێمەو هێزە كوردستانیەكاندایە بۆیە دەرگای گفتوگۆی سیاسی لەگەڵ لایەنەكان نە داخراوە و نە دایدەخەین   هاوڵاتی: پارتی دانوساندنی لەگەڵ هەماهەنگی شیعەكان دەستپێكردووە دوای ئەوەی سەدر بڕیاری كشانەوەیدا لەپەرلەمان؟ شوان محەمەد: سەبارەت بەپەیوەندی ئێمەو رەوتی سەدر، بەڵێ لەهاوپەیمانی رزگاركردنی نیشتیمان پێكەوەبووین، بەداخەوە كە رەوتی سەدر كشایەوە، ئێمە سەر بەهیچ لایەنێكی سیاسی نین و هاوپەیمانین، لەچوارچێوەی بەرژەوەندیەكانی هەرێمی كوردستان دەڕوانینە هاوپەیمانێتی، بەوە هاوپەیمانیەكە دەپێوین كە چەند لەبەرژەوەندی خەڵكی هەرێمی كوردستان تەواو دەبێت. هاوڵاتی: مەرجتان چییە بۆ گفتوگۆ لەسەر پێكهێنانی حكومەت و بەشداریكردن لەپرۆسەی سیاسی عێراق؟ شوان محەمەد: پارتی دیموكراتی كوردستان خاوەن قەزیەیە، هەرێمی كوردستان لەئەستۆی ئێمەو هێزە كوردستانیەكاندایە بۆیە دەرگای گفتوگۆی سیاسی لەگەڵ لایەنەكان نە داخراوە و نە دایدەخەین، بەڵام پەیوەندی ئێمە لەسەر بنەمای بەرژەوەندیەكانی هەرێمە كە ئایا كێ دەتوانێت زیاتر بەپیری مافەكانی خەڵكی كوردستانەوە بێت. هاوڵاتی: ئێستا پارتی بارەگای لەبەغدا هەیە؟ دوای ئەوەی بارەگاكە لەلایەن چەند شوێنكەوتوویەكی شیعەوە سوتێندرا؟ شوان محەمەد: سەبارەت بە بارەگای پارتی دیموكراتی كوردستان لەبەغدا، ئێمە لەباشوری عێراق و لەبەغداش بارەگامان هەیە، تەنانەت یەك كاتژمێریش بارەگای ئێمە دانەخراوە و كارو چالاكیەكانی پارتی لەبەغداو شارەكانی دیكەی عێراق بەردەوامە، دەتوانین بڵێین بارەگا ئاستەنگ نییە لەبەردەم كارو چالاكییە سیاسیی و كۆمەڵایەتیەكانی پارتی لەبەغدا، بارەگای پارتی لەبەغدا لەكاتی رووداوەكەوە بەردەوامەو یەك سەعاتیش لەكارنەكەوتووین. هاوڵاتی: ئەو وەفدەی پارتی دیموكراتی كوردستان كە لەبەغدان دەستیان بەگفتوگۆ كردووە؟ شوان محەمەد: سەبارەت بەچوونی وەفدی پارتی بۆ بەغدا، ئێمە هیچ وەفدێكمان نەهاتووەتە بەغدا، ئەو بەڕێزانەی ناویان دەهێنن خۆیان دانیشتووی بەغدان، بەڕێز فوئاد حسێن لەبەغدایە كاك بەنگین ماڵی لەبەغدایە، كاك شاخەوانیش بۆخۆی جێگری سەرۆكی پەرلەمانی عێراقە، بەڵام ئەو بەڕێزانە راسپێردراون بۆ كاروباری بەغداو لەبەغدا ئامادەن.  

سازدانی: ئارا ئیبراهیم نوێنەری باكورو رۆژهەڵاتی سوریا (رۆژئاڤای كوردستان) لەهەرێمی كوردستان ئاماژە بەوە دەدات لەسەر هەموو كوردێك واجبە بەرخودان بكات دژی سوپای ئەردۆغان و تەنها نیەتی قڕكردنی گەلی كوردە لەباشور بێت یان رۆژئاڤای كوردستان. ئەڤین سوێد، نوێنەری باكورو رۆژهەڵاتی سوریا (رۆژئاڤای كوردستان) لەهەرێمی كوردستان، لەم چاوپێكەوتنەیدا لەگەڵ هاوڵاتی دەشڵێت:» ئەولەویەتی قەدەسە رزگاركردنی ئەو ناوچانەیە كە لەلایەن سوپای تورك و میلیشیاكانەوە داگیر كراوە، چونكە رەوشێكی زۆر خراپ لەو ناوچانە بەڕێوەدەچێت». هەروەها ئەوەش دووپاتدەكاتەوە كەهەڕەشەكانی ئەردۆغان بۆ لەشكركێشی و داگیركاری لە رۆژئاڤای كوردستان جدییەو وتی:» هێزەكانی سوریای دیموكرات هەموو رۆژێك لە شەڕدان دژی سوپای تورك و چەتەكانی و ئامادەن بەرخودان بكەن بەگیانی خۆیان بۆ پاراستنی خەڵكی رۆژئاڤای كوردستان». هاوڵاتی: خوێندنەوەتان بۆ هەڕەشەكانی ئەردۆغان چیە كە جارێكی دیكە دەیەوێت لەشكركێشی بكاتە سەر باكورو رۆژهەڵاتی سوریا( رۆژئاڤای كوردستان)؟ ئەڤین سوێد: لە راستیدا لەساڵی 2016 بەشێوەی فەرمی ئەردۆغان بەبەرچاوی هەموو دنیا وتی ئەز دەخوازم ئیمپراتۆریەتی عوسمانی زیندووبكەینەوەو توركیای ئێستا فراوان بكەینەوە، هەروەها باكورو رۆژهەڵاتی سوریای باسكرد كە ئەوە خاكی توركیایە، بۆیە لەسەر ئەو بنەمایە ساڵی 2016 لە جەرابلوس  و هەرێمی دەردووری داگیر كرد، هەرێمی عەفرین لە 2018 و سەرێكانی و گرێ سپی لە 2019 هەموو لەچوارچێوەی ئەو پلانەی ئەردۆغاندا بوو كە داگیركران. ئەو هێرشانەی سوپای ئەردۆغان لەباشوری كوردستان ئەنجامی دەدات هەمووی لە خزمەتی ئەو نەخشەیەدایە بۆ فراوانكردنی توركیاو گەڕانەوەی ئیمپراتۆریەتی عوسمانی و دەیەوێت جارێكی تر میساقی میللی بگەڕێنێتەوە.  ئەردۆغان دەمێكە هەڵمەتێكی داگیركاری لەسەر باشووری كوردستان وەشاندووە بەتایبەت بەرانبەر هێزی تەڤگەری ئازادی ( پەكەكە)، ئەوانیش دەزانن پلانی ئەردۆغان چیەو بەرخودانی ئەو پلانەی دەكەن و بەواجبی سەرشانی خۆیانی دەزانن، چونكە بەردەوام ئەردۆغان دەیەوێت هێرش بكات و پاوانخوازی خۆی بكات. ئەردۆغان لەعەفرین هەتا دێرك لە رۆژئاڤای كوردستان هەتا سنوری باشوری كوردستان دەیەوێت وەكو هەرێمێكی گەورە داگیری بكات لەژێر ناوی (هەرێمێكی ئارام)، هەرێمێكی ئارام دروست دەكات بۆ ماڵباتی چەتەو  توركمان و كەسوكاری داعش تا بیهێنێتە ئەو ناوچانەو نیشتەجێیان بكات. ئەردۆغان هەرێمی عەفرینی وەكو هەرێمێكی چەتەكان لێكردووەو رۆژانە رفاندن كوشتن داگیركردن و هەموو كردەوەیەكی دژی مرۆڤایەتی لەناو عەفریندا ئەنجامدەدرێت، بەهەمان شێوە لەگرێ سپی و سەرێكانی، بۆیە بەرخودانی كردن دژی لەشكركێشی و داگیركاری خاكی كوردستان لە رۆژئاڤا بێت یان لە باشووری واجبی هەموو كوردێكە.   هێزەكانی سوریای دیموكرات هەموو رۆژێك لە شەڕدان دژی سوپای تورك و چەتەكانی و ئامادەن بەرخودان بكەن بەگیانی خۆیان بۆ پاراستنی خەڵكی رۆژئاڤای كوردستان   هاوڵاتی: واتا چەند كەس بەهۆی داگیركارییەكانی سوپای ئەردۆغان و میلیشیاكانیەوە ئاوارەبوون؟ ئەڤین سوێد: 300 هەزار تەنها لەعەفرین ئاوارە بوون، لەسەرێكانی 200 هەزار كەس و لەگرێسپی 150 هەزار كەس ئاوارە بوون، ئەوانە هەموویان بڵاوبوونەتەوە، هەندێكیان لە كەمپەكاندا دەژین، هەندێكیان لەباژارو شارەكانی دیكەی رۆژهەڵات و باكوری سوریا نیشتەجێبوون، هەندێكیشیان رۆیشتوون بۆ دەرەوەی وڵات. بەڕاستی ئەو خەڵكانەی عەفرین و گرێسپی و سەرێكانی، رەوشێكی گەلێك زەحمەت بەڕێ دەكەن كە ماڵ و موڵكیان داگیركراوە لەلایەن چەتەكانی توركیاوە، هێزەكانی سوریای دیموكرات ئەولەویەت دەدات بە رزگاركردنی ئەو هەرێمانەی لەلایەن سوپای تورك و چەتەكان داگیركراون و گەڕانەوەی بۆ ئەو كەسانەی ئاوارە بوون. هاوڵاتی: سوپای تورك و میلیشیاكانی چەند ناوچەی خاكی رۆژئاڤای كوردستان و سوریایان داگیركردووە؟ ئەڤین سوێد: هەرێمێكە عەفرین و نسبەیەكی كەم پێكهاتەی دیكەی تێدا بوو لەسەدا 95% كورد بوون، سەرێكانی و گرێسپی پێكهاتەی عەرەب و ئەرمەن و چەركەسی تێدا بوو بەهەمان شێوە لەكوردیشی تێدابووە و ژیانیان دەكرد كە پێشتر كە لەژێر دەسەڵاتی ئەنجومەنی خۆسەردا بوو هەموو كەس بە رەوشێكی ئازاد و ئارام مامەڵەیان كردووە و ئەنجومەنی خۆسەر هەموویانیان دەپاراست. ئەو سیاسەتەی ئەردۆغان دیمۆگرافی ناوچەكانی گۆڕیوەو هەتا جێگەی پیرۆزیشیان تێكداوەو لەشوێنی ئەوان كۆمەڵەی كوەیتی و قەتەری و میلیشیاكانی تێدا نیشتەجێ كردووە. سوپای تورك و میلیشیاو چەتەكانی (عەفرین، گرێسپی، سەرێكانی، ئیدلیب، مارع، جەرابلوس) داگیركردووە، مەخابن ئەو بێدەنگییەی دەوڵەتی سوریا كە چەندین ناوچەی داگیر كردووەو ئەوان بێدەنگن بەرانبەر دەوڵەتی تورك، دەبوو حكومەتی سوریا رێگری بكردایە لەسەر ئەو لەشكركێشیانەی ئەردۆغان كردوویەتی، بەڵام تائێستا بێدەنگە. هاوڵاتی: رێككەوتنێكی نێودەوڵەتی هەیە كە جارێكی دیكە ئەردۆغان هێرش نەكات و ئەو وڵاتانە بەتایبەت ئەمریكاو روسیا رایبگرن؟ ئەڤین سوێد: رێككەوتنی نێودەوڵەتی هەیە راستە، بەڵام ئەو وڵاتانە هەڵوێستێكی شەرمنانەیان هەیە  بەرانبەر ئەو هەڕەشانەی ئەردۆغان دەیكات، ئەمریكا دەڵێت:» لەشكركێشی لە باكورو رۆژهەڵاتی سوریا، كاریگەری لەسەر شەڕی داعش نەكات»، واتا هەسەدەیان بۆ شەڕی داعش دەوێت، ئەمریكا پەیامێك نادات كە ئێمە شەریكێكی راستەقینەی هێزەكانی سوریای دیموكراتین بۆ پاراستنی خاكی باكورو رۆژهەڵاتی سوریا، یان ناڵێن ئێمە هاوبەشی (مەسەدە)ین بۆ ئاوەدانكردنەوەی باكورو رۆژهەڵاتی سوریا. ئەگەر ئەردۆغان هێرش بكاتەسەر رۆژئاڤای كوردستان كە  زیندانی داعش لە كەمپی (هوڵ) هەیە كە داعشیان تێدایە دەبێتە مەترسی گەورە نە بۆ خەڵكی باكورو رۆژهەڵاتی سوریا، بەڵكو مەترسیی بۆسەر ئەمریكاو جیهانیش هەیە. ئەوە هێزەكانی سوریای دیموكراتن كە زیاتر لە 70 هەزار چەكدارو ماڵباتی كەسوكاری داعشیان لە كەمپ و زیندانەكاندا راگرتووە، كە 35 هەزار كەسیان عێراقین و عێراق ئامادە نییە وەریانبگرێتەوە، بۆیە پێویستە لەسەر ئەمریكاو روسیاو وڵاتانی دیكەش بەر بەهێرشی سوپای تورك و چەتەكان بگرن. لەماوەی رابردوو لە حەسەكە داعش هێرشی كردەسەر (زیندانی غوێران) بۆ ئەوەبوو كە داعش و ماڵ و منداڵەكانی داعش ئازاد بكرێت ئەوە لە پلانی ئەردۆغان و چەتەكانیدا بوو، ئەوانەی كە دەستگیركران لە زیندانی غوێران دانیان بەوەدا كە توركیا پلانی داناوەو بۆ ئەوە بووە بچنە پاڵ توركیا و چەتەكانی كە پڕچەك بكرێنەوەو دژی هێزەكانی سوریای دیموكرات جارێكی دیكە بەكاریان بهێننەوە. هاوڵاتی: ئەمریكا تا چەند بەپێداویستی سەربازیی هاوكاری هێزەكانی سوریای دیموكرات دەكات، ئەگەر لەشكركێشی توركیا بكرێت؟ ئەڤین سوێد: راستییەك هەیە كە ئەو هاوكاریە سەربازیانەی كە ئەمریكا بۆ هێزەكانی سوریای دیموكرات دەیكات(قەسەدە) دەیكات بۆ شەڕی دژی داعش بەكاریاندەهێنێت. بە راستی ئەگەر هێرش و لەشكركێشی ئەنجام بدرێت رەوشێكی گەلێك زەحمەت دەردەكەوێت، ئەگەر هێرشی نوێ بكەن كاریگەری لەسەر شەری داعش دەبێت مەترسی گەورەی لێ دەكەوێتەوە. هاوڵاتی: ئەگەر هێرشی سوپای ئەردۆغان جارێكی دیكە بكرێت، بەرخودانی فراوان دەكرێت؟ ئەڤین سوێد: خەڵكی باكورو رۆژهەڵاتی سوریا ئەو بیركردنەوەیەیان هەیە كە هەتا 2023 هەڵبژاردنی سەرۆك كۆمارو پەرلەمانی توركیا كە لەمانگی حوزەیران ئەنجامدەدرێت، ساڵوەگەرا سەد ساڵەی ئیتفاق لۆزانە ئەو خەتەری گەورە لەسەر گەلی كوردو هەرێمی كوردان هەیە، ئێستا هێرش بۆ سەر رۆژئاڤای كوردستان هەیە، هێرش بەردەوام هەیەو قەسەدە بەرگری دەكات. بۆیە گەلی كوردو هێزەكانی سوریای دیموكرات ئەوەیان دووپاتكردووەتەوە كە ئەوان لەگەڵ ئاشتی و دیالۆگدان نە لەگەڵ شەڕ، بەڵام ئەگەر لەشكركێشی بكرێت هێرشی پێچەوانە ئەنجام دەدەن، واتا هێرش بۆ سەر ئەو ناوچانەش كە لەلایەن سوپای تورك و چەتەكانەوە داگیركراون، بەڵێ بەرخودانی مەزن ئەنجام دەدەن. ئەردۆغان بۆ قڕكردنی كوردان ناوەستێت، ئەگەر كورد كارو خەبات نەكات بەرانبەری لەئێستاو داهاتوودا خەتەری زیادەیە هەیە لەسەر دەستكەوتەكانی كوردستان لەباشوری كوردستان و رۆژئاوای كوردستان، هەیەو باژارێ عەفرین و سەرێكانی و گرێسپی وەكو نمونەیەكی زیندوو وایە. هاوڵاتی: وەكو نوێنەرایەتی باكورو رۆژهەڵاتی سوریا چیتان كردووە بۆ كردنەوەی تەواوی دەروازەی سمێڵكا؟ ئەڤین سوێد: دەروازەی سمێلكا كراوەیە بۆ حاڵەتی ئینسانی وەك نەخۆشی گران و قورس و دەربازكردنی حاڵەتی تایبەتی، بۆ مەسەلەی خواردەمەنی و كاڵاو پێداویستییەكان خەڵكی باكورو رۆژهەڵاتی سوریا ئەساسەن بۆ ئەو رەوشە پێداویستی خۆیان بۆ ماوەی 10 ساڵ تەئمین كردووە، بەڵێ گەمارۆ هەیە لەسەر خەڵكی رۆژئاڤاو هیوادارم بە دیالۆك ببێتە چارەسەركردن. هاوڵاتی: جەنەراڵ مەزڵوم كوبانێ پەیوەندی لەگەڵ پارتی دیموكراتی كوردستاندا چۆنە؟ ئەڤین سوێد: راستی ناتوانم بەناوی ئەوەوە قسە بكەم، بە فكراندنە ئێمە ئەوەیە كە پەیوەندی لەگەڵ هەموو لایەنێكی باشووری كوردستاندا هەبێت و باوەڕمان بە دیالۆگ و دانوساندن هەیە ئەگەر شتێكیشی هەبێت چارەسەری بكەین

      سازدانی: ئارا ئیبراهیم     وتەبێژی بەنزینخانەكانی سلێمانی ئەوە ئاشكرا دەكات بەنزینی 690 دیناری بۆ سلێمانی نەماو پاڵاوگەی كەڵەك رێككەوتنی لەگەڵ عێراق هەیەو ئامادەنین بۆ سلێمانی بنێرن. بەهمەن قادر، وتەبێژی بەنزینخانەكانی سلێمانی لەم چاوپێكەوتنەیدا لەگەڵ هاوڵاتی دەشڵێت:»تاكە چارەسەر ئەوەیە حكومەتی هەرێم و عێراق رێكبكەون بۆ هێنانی بەنزین، یان حكومەتی هەرێم خۆی نەوتی خاو بداتە پاڵاوگەكان تا سوتەمەنی(بەنزین) بدرێتە بەنزینخانەكان بەنرخێكی گونجاو». هاوڵاتی: بەنزینی 690ی كەی دەگات؟ بڕەكەی چەندە؟ بەهمەن قادر: بەنزینی 690 دیناری هەشت و نۆی ئەم مانگە لەڕێگەی 29 تانكەرەوە گەیشتە پارێزگای سلێمانی و هەڵەبجەو ئیدارەی گەرمیان و راپەرین، بڕەكەی ملیۆنێك لیتر بوو، لە دوو رۆژدا دابەش كراوە، بەڵام بەداخەوە لە 10 ئەم مانگەوە بەنزینەكە نەهاتووە. هاوڵاتی: بۆچی راگیراوەو بەتەواوی چی دیكە نایەت یان هۆكارەكەی چییە؟ بەهمەن قادر: ئەوەی كە هەیە حكومەتی عێراق خۆی پێویستی بە سوتەمەنییە و بەشی موسڵا و دەوروبەری سوتەمەنی كەمەو فشار لەسەر پاڵاوگەی كەڵەك هەبووە، هەتا ئەوەی خۆیان وەستابێـت عێراق ئامادە نییە بۆ سلێمانی رەوانە بكات. هاوڵاتی: چارەسەر چییە كاك بەهمەن، دواجار خەڵك زەرەرمەندی یەكەمە؟ بەهمەن قادر: ئەو رێككەوتنەی كراوە رێككەوتنێكی نابەرامبەر و شەفەییە و رێكەوتنێكە بەدڵی ئێمە نییە، رێككەوتن كە كرا هەقە بەشێوازێكی باشتر بكرێت و پێویستە لەهەردوو لادا سیستەمێك هەبێت بۆ ئەوەی بەنزینی 690 دیناری بەردەوام بێت. هاوڵاتی: گرێبەستەكە چۆن بووە وا كێشەی تیابووە؟ بەهمەن قادر: گرێبەستەكە گرێبەستێكی تەواو نەبووە و هەر بەزارەكی بووە و ئەگەر بە زارەكی نەبووبێت چۆن گرێبەست ئاوایە ئەوان بە تاقەتی خۆیان ئیلتیزامات دەكەن هەر كات بیانەوێت رایدەگرن هاوڵاتی: واتە ئێوە لە پاڵاوگەی كەڵەكەوە بۆتان دێـت؟ بەهمەن قادر: بەڵێ‌ لە كەڵەكەوە بۆمان دێـت. هاوڵاتی: هەوڵی ئێوە وەك بەنزینخانەكانی سلێمانی چییە؟ بەهمەن قادر: ئێمە لە نزیكەی 90 بەنزینخانە هەشت بەنزینخانە لەسنوری پارێزگای سلێمانی ئەو بەنزینە دابەشدەكەین و ئەوەی كە قسەبێت كردومانە و داوادەكەین كە ئەو پڕۆسەیە گەورەبكرێت و ئەگەر بۆیان ئەكرێـت حكومەتی هەرێمی كوردستان و حكومەتی عێراق رێكبكەون ئێمە هەر ئەوەندەمان دەسەڵات هەیە كە داوابكەین بەردەوام بێت، بەڵام تا ئێستا هیچ وەڵامێكی ئەرێنیمان وەرنەگرتووە. هاوڵاتی: پاڵاوگەی كەڵەك و حكومەتی عێراق وەڵامیان چی بووە؟ بەهمەن قادر: تا ئێستا هیچ شتێك نەبووە و وەكو قسەیەك هاتووە نەك وەكو رەسمی دەڵێن كە خۆمان پێویستمان بووە، ئێ كە خۆیان پێویستیان بێت نایدەن بەئێمە و دەبێت لەخۆیان زیادبێت ئینجا دەیدەن بەئێمە. هاوڵاتی: پێتانوایە دەبێت وەزارەتی سامانە سروشتییەكان نەوتی خاو بداتە پاڵاوگەی بازیان لە سلێمانی و كەڵەك لەهەولێر بۆ ئەوەی بەشێكیش بۆ بەنزینخانەكانی سلێمانی و هەڵەبجەو ئیدارەی راپەرین و گەرمیان تەرخان بكرێت؟ بەهمەن قادر:خۆی لەم كاتەدا چارەسەری خێرا دەبێت كاری بۆ بكرێت، دیارە ئێمە پاڵاوگەی حكومیمان نییە و پاڵاوگەی مەدەنیمان هەیە، پاڵاوگە مەدەنییەكانیش بێگومان ئەبێ‌ چۆن رێككەوتنی لەگەڵدا بكات ئەگەر حكومەتی هەرێم بچێـت نەوتی خاوی هەبێـت و پێیان بدات و لەگەڵیان ئیتیفاق بكات  و پێدەچێت ئەمەش قورس بێت، چونكە تا ئێستا هیچ هەنگاوێكی كرداری نەنراوە بۆ ئەو پڕۆسەیە. هاوڵاتی: پێتوانییە چەند رۆژی دیكە ناڕەزایەتی دروست ببێت لەسەر بەرزبوونەوەی نرخی بەنزین بە تایبەتی كە كاڵاو پێداوستیش لەگەڵی گران بووە؟ بەهمەن قادر: ئێمە داوا دەكەین كە حكومەتی هەرێم لەم كاتەدا بەپەلەو خێرا هەنگاو بنێت بۆ چارەسەركردنی مەسەلەی بەنزین، هیوادارم پەلەی تێدا بكەن و چارەسەرێك بدۆزنەوەو هەرچی ئاسانكارییە و لەدەستیان دێـت بیكەن. هاوڵاتی: خەڵك شەقام بگرێـت و ئۆتۆمبێل بوەستێـت ئەمە چارەسەرە كە بەشێك لە شۆفێران بۆ هاوڵاتی باسیان كردووە؟ چونكە نرخی بەنزین زۆر گران بووە نزیكبووەتەوە لە دۆلارێك بۆ یەك لیتر؟ بەهمەن قادر: خەڵك و شۆفێران شەقام بگرن بەوە چارەسەر نابێت، چونكە چەندێك تۆ ئەتوانیت لەسەر جادە بوەستیت دە خولەك نیو كاتژمێر ئەی كارەكەت؟ لەمەسەلەی نرخی بەنزیندا، ئێمە وەكو سلێمانی ئێستاش لەگەڵا هەولێر جیاوازیمان زۆرەو چەند ساڵی رابردوو ئێمە بەردەوام حساباتمان و نرخەكەمان كەمتر بووە لەهەولێر و دهۆك و بەفشاری بازرگانان و بەنزینخانەكان بەردەوام ئێمە هاوسەنگیمان راگرتووە. ئێستا لەهەولێر بەنزینی جۆری سۆپەر بە هەزار و 600 دینارەو لەسلێمانی بە هەزار و 400 دینارە،  موحەسەن لەهەولێر بە هەزار و 400 دینارە و لەسلێمانی بە هەزار و 325دینارە، بەهەمان شێوە لە جۆری بەنزینی نۆرماڵ، لەهەولێر بە هەزارو 300 دینارەو لە سلێمانی بە هەزارو 200 دینارە، واتا ئێمە لەسلێمانی كارێكمان كردووە كە تا بتوانین و مەجالی تێدا بێت بارگرانی بۆ سەر هاووڵاتیان زیاد نەكەین. ئێمە ئومێد دەكەین حكومەتی هەرێم هەوڵبدات و مەسەلەی سوتەمەنی چارەسەر بكات لە پارێزگای سلێمانی و هەڵەبجەو ئیدارەی راپەرین و گەرمیاندا، چونكە ئەوەش لە قازانجی بەنزینخانەكاندایە كە نرخەكەی هەرزان بكرێت. هاوڵاتی: پێتانوایە چارەسەری كۆنكرێـتی تەنها ئەوەیە كە حكومەت نەوتی خاو بداتە پاڵاوگە مەدەنییەكان بۆ دابین كردنی بەنزین، یان رێگەی دیكە هەیە بۆ چارەسەر؟ بەهمەن قادر: دەتوانن لەگەڵا حكومەتی عێراقیشدا رێككەوتن بكەن و هەر لەو پاڵاوگانەوە خۆیان لەوەدەچێ بتوانن شت بكەن ئەگەر بەگوێیان بكەن، بەڵام چارەسەر ئەوەیە یان ئەو 690 دینارییە زیادبكرێـت یان خۆیان ئەوكارە بكەن، بەڵام ئەوە پێنج رۆژ بەسەر هاتنی بەنزینی 690 دینارییەكە تێپەڕ بووەو تائێستا هیچ دیار نییە، تەنانەت لەگەڵ بەرهەمە نەوتییەكانی سلێمانی قسەمان كردووەو دەڵێن پاڵاوگەی كەڵەك رێكەوتنی لەگەڵ حكومەتی عێراق هەیەو نەوتی خاوی پێدەدات بۆ موسڵ و دەوروبەری، بۆیە گرنگە هەموو بەرپرسانی پەیوەندیدار لەسەر ئەم پرسە بێنە سەر خەت.  

  ‎سازدانی: كاوەڕەش. بەریتانیا ئەو كوردەی بووە ئەندامی ئەنجومەنی شارەوانی ئەركێكی دیكەشی پێسپێردرا كە بەزۆرینەی دەنگ وەك (جێگری پارێزگار - لەندەن لامبس) هەڵبژێردراو بۆ هاوڵاتی دەڵێت:» كۆكردنەوەی هەموو وزەو تواناكان زامنی ئەوە دەكات لۆبییەكی باش بۆ كورد دروست بكەین». سەرباز سەید عەلی بەرزنجی، لەم چاوپێكەوتنەیدا لەگەڵ هاوڵاتی دەشڵێت:» ژمارەیەكی ئێجگار زۆری كورد لەهەموو ئاست و باكگراوندی ئەكادیمی و پسپۆڕی جیاواز پشتگیریان كردووین بەچەندان رێگای جیاواز، ئەو رووحە یەكگرتووییە هەستێكی خۆشت پێدەبەخشێت كە هەستی یەكبوون و گەورە بیركردنەوە دەبینیت، خەڵكی ئێمە زۆر مەردو لەخۆبووردوون». هاوكات ئەوەش دووپاتدەكاتەوە كە»پەنابەران دەبێت شەرەفمەندانە مامەڵەیان لەگەڵ بكرێت ناكرێت وەك تاوانبار مامەڵەیان لەگەڵ بكرێت و بخرێنە ناو جیاوازیە سیاسییەكانی حزبەكانی بەریتانیاو بكرێنە چەكی ململانێی سیاسی، ئەوان پێویستیان بەهاریكاری و سۆزە».  ‎‏هاوڵاتی: ئەگەر خۆت بتەوێ وەك چیرۆكێكی كورت، ژیانی خۆت بەیان بكەی؟ سەرباز بەرزنجی: ناوم سەرباز سەید عەلی بەرزنجی لەسەرەتاكانی تەمەنمەوە لە لەندەن دەژیم، لەقۆناغەكانی قوتابخانەی ئامادەییەوە لە لەندەن خوێندوومە. وەك پەنابەر هاتوومە بەریتانیا، بەڵام ئێستا (هاوڵاتی بەریتانیم) وەك دەزانن پەنابەر ناتوانێت خۆی كاندید بكات بۆ پۆستی سیاسی، ساڵانی زۆر كارو چالاكی سیاسیمان هەیە لەناو سیاسەتی بەریتانیا چەندان پۆستی حزبیمان وەرگرتووەو تەكلیف كراوین بۆ زۆر بەرپرسیاریەتی تر. پێش ئەوەی ئەو بەرپرسیاریەتیە وەربگرم و ئێستا كە بەرپرسیاریەتیم هەیەو دوای تەواوبوونی بەرپرسیاریەتیەكەم هەروەك خۆمم، باوەڕبوونم بەتێكۆشان بۆ چاكەی گشتی و خزمەتی خەڵك ناگۆڕێت، هەر بەردەوام دەبم لەخزمەتی كۆمەڵگاو خەڵك و كارئاسان كردنی ژیانی خەڵك بەپێی توانای خۆمان    ‎‏هاوڵاتی: وەرگرتنی ئەو بەرپرسیارێتییە وەك كوردێك چی لەژیانی تۆدا دەگۆڕێت؟ سەرباز بەرزنجی: كە باسی لەندەن دەكەین خۆشە وەك خۆی تێی بگەی باسی زیاتر  لە 10 ملیۆن مرۆڤ دەكەین، هەرێمی لەندەن، لەندەن ریجن بەتەنها لەندەن چەند هێندەی هەرێمی كوردستانە، سەنتەری ئابوری ئەوروپا، ناوەندی بڕیاری جیهانە، دەسەڵاتەكانی مەیە لەندەن لەهەرێم زیاترە، پڕۆژەی ستراتیژی و گواستنەوە، فڕۆكەخانەكان تەنزیم دەكات. ناتوانین بەراوردی بكەین بەسیستمی كوردستان، هەر وڵاتەو هەیكەلیەتی ئیداری جیاوازە، لێرە لامەركەزیە، لەئەمریكا پێی دەڵێن گاڤنە لەبەریتانیا پێی دەڵێن مەیە، مەیە Mayor گەورەترین دەسەڵاتی شارە، لەئەڵمانیا بەسەرۆكی وڵات دەڵێن راوێژكار. لەبەریتانیا  بەسەرۆكی پەرلەمان دەڵێن سپیكەر كەتەرجومەی كوردی بكەیت واتە قسەكەر، تێگەیشتن لەسیستمی وڵات بەگوگڵ ترانسلەت ناكرێت. وەك ئاگادارن لە ٥/٥/٢٠٢٢ هەڵبژاردنی شارەوانیەكان لەوڵاتی بەریتانیا ئەنجامدران. بۆ ئەو مەبەستە دوای كێبڕكێیەكی دیموكراسیانەو بەدەنگی راستەوخۆی هاووڵاتیان وەك ئەندامی ئەجومەنی شارەوانی متمانەی دەنگدەرانمان بەستهێنا لەو بازنەیەی لێی كاندید كرابووین. دواتر لەڕۆژی ٢٥/٥/٢٠٢٢ لەڕێوڕسمێكی شایستەو تایبەتدا، ئەنجومەنی شارەوانی بەبەشداری سەرجەم ئەندامە هەڵبژێردراوەكانی و بەئامادەبوونی ژمارەیەك ئەندام پەرلەمان  و نوێنەری تایبەتی خاوەن شكۆ شاژن، لەپڕۆسەیەكی روون و دیموكراسیانەدا، سەرەڕای ئەركی ئەنجومەنی شارەوانی ئەركێكی ترم پێسپردرا، بەزۆرینەی دەنگی ئەندامانی ئەنجومەن وەك جێگری پارێزگار - لەندەن لامبس هەڵبژێردراین، لای ئێمە 2 هەزارو 400 كارمەندی هەیە. ئەو بەرپرسیاریەتیەم بۆ ئەوە وەرنەگرتووە ژیانی خۆم بگۆڕم، چونكە پێش ئەو بەرپرسیاریەتیەش ژیانم باش بووەو لەبواری تایبەتمەندێتی خۆم سەركەوتوبووم، وای دەبینم من دەبێت چ بكەم بۆ ئەركەكەم نەك ئەرك و مەسئولیەتەكە چی بۆ من دەكات. پێش ئەوەی ئەو بەرپرسیاریەتیە وەربگرم و ئێستا كە بەرپرسیاریەتیم هەیەو دوای تەواوبوونی بەرپرسیاریەتیەكەم هەروەك خۆمم، باوەڕبوونم بەتێكۆشان بۆ چاكەی گشتی و خزمەتی خەڵك ناگۆڕێت، هەر بەردەوام دەبم لەخزمەتی كۆمەڵگاو خەڵك و كارئاسان كردنی ژیانی خەڵك بەپێی توانای خۆمان  .   ئێمە هەموو هەوڵێك دەقۆزینەوە بۆ ئەوەی بەكۆمەڵگای بەریتانیا بڵێن كە پەنابەران تاوانكار نین   هاوڵاتی: ئەوەندەی ئاگاداربین بەڕیزتان و دوو كوردی دیكە، لەشارەوانیەكانی لەندەن بوونتان هەیە، لەهەمانكاتدا ئەندام پارلەمان و وەزیری پەروەردەش كوردە، بۆ رەوشی كورد، كاریگەری چیتان دەبێت بۆ هەر  چوار پارچەكەی كوردستان؟ سەرباز بەرزنجی: ئێمە كاركردنمان بەو ئاراستەیەیەو هیواداریشن بتوانین بەهەموومان كاریگەریمان هەبێت، بەداخەوە لەزۆرێك لەوڵاتانی جیهان و لەبەریتانیاش ژمارەیەكی بەرچاوی كورد بوونی هەیە، خەڵكی زۆر بەتواناو دڵسۆزمان هەیە، بەڵام وزەو تواناكان نارێكخراون، پەرت و لێك دوورن، كۆكردنەوەی هەموو وزەو تواناكان زامنی ئەوە دەكات بەهەموومان لۆبییەكی باش بۆ دۆزی رەوای كورد دروستبكەین. بێگومان منیش هەوڵی تەواوی خۆم دەدەم تا ئەو لێك نزیكبوونەوەیە دروست بكەین، نەك هەر لەنێوان سیاسییەكان، بەڵكو سەرجەم تووێژەكان، ئەكادیمی و پیشەیی  و كۆمەڵایەتی ئەو پەیوەندییە سیاسییانەی ئێمە لەڕێگای پێگەكەمان لەحكومەتی بەریتانی و لەحزب دروستمان كردووە، بێگومان هاوكاری باش دەبێت، زۆر ئاسانتر دەتوانین دەنگمان بگات بەناوەندی بڕیاری بەریتانیا. وەك چۆن لەڕابردوو ئەو هەلانەمان قۆستۆتەوە بۆ خزمەتی دۆزی رەوای كوردو گەیاندنی ئازارەكانی كورد لەداهاتووش بەردەوام و سوورتر دەبین لەسەر ئەو رێگایە. ‎‏هاوڵاتی: لەلەندەن سەدان نەتەوەو كلتوری جیاواز بوونی هەیە، وەك كوردێك، كێن ئەوانەی دەنگیان بەتۆ داوە؟ ئایا بەپشتیوانی كوردەكان یان متمانەی ئینگلیزەكانیشت بەدەستهێناوە؟ سەرباز بەرزنجی: لەڕاستیدا ئێمە وەك كورد ژمارەو رێژەمان هێندە كەمە هەر پلەبەندیشمان بۆ نەكراوە چ جای بگاتە ئەوەی كاریگەری هەبێت لەسەر هەڵبژاردن، لێرە كەسێك جنسیەی بەریتانی نەبێت ناتوانێت بەشداری پڕۆسەی سیاسی بكات و دەنگ بدات، بۆیە دەنگدەرانی ئێمە خەڵكی بەریتانی بوون، لەگەڵ ئەوەشدا زۆر خۆشحاڵ بووم چەندان گەنجی كوردی هەر چوار پارچەی كوردستان ئامادەیی خۆیان دەربڕیوە بۆ هەر ئەركێك  بتوانن بیكەن بۆ پشتگیری ئێمە. ژمارەیەكی ئێجگار زۆری كورد لەهەموو ئاست و باكگراوندی ئەكادیمی و پسپۆڕی جیاواز پشتگیریان كردووین بەچەندان ێگای جیاواز، كۆمێنت بڵاوكردنەوە، پەیوەندی، ئەو رووحە یەكگرتوویە زیاتر دڵخۆشم دەكات ئینشاڵا زیاتر پەرەی پێبدەین، هەستێكی خۆشت پێدەبەخشێت كە هەستی یەكبوون و گەورە بیركردنەوە دەبینیت، خەڵكی ئێمە زۆر مەردو لەخۆبووردوون. ‎هاوڵاتی: لەئێستادا بڕیارێك هەیە بۆ رەوانەكردنی پەناخوازان بۆ رواندا، رەنگە بەشێك لەكوردە پەناخوازەكانیش بگرێتەوە، دەتوانن چی بكەن لەو بارەیەوە؟ سەرباز بەرزنجی: ئەو بڕیارە بەتەنها بۆ كورد نیە بۆ هەموو پەناهەندەیەكە لەهەر وڵاتێكی جیهانەوە بێت، بەڵام بۆ كورد سەختترو گرانترە، بڕیارەكە تائێستا نەچۆتە بواری جێبەجێكردنەوەو هیوادارین جێبەجێش نەكرێت، ئێمە پێمانوایە پەنابەران دەبێت شەرەفمەندانە مامەڵەیان لەگەڵ بكرێت، ناكرێت وەك تاوانبار مامەڵەیان لەگەڵ بكرێت و بخرێنە ناو جیاوازیە سیاسییەكانی حزبەكانی بەریتانیاو بكرێنە چەكی ململانێی سیاسی، ئەوان پێویستیان بەهاریكاری و سۆزە. ئێمە هەموو هەوڵێك دەقۆزینەوە بۆ ئەوەی بەكۆمەڵگای بەریتانیا بڵێن كە پەنابەران تاوانكار نین، لەگەڵ دەسەڵاتداران قسە دەكەین، لەگەڵ حكومەت و لەڕێگەی دۆست و هاوكارانمان لەپەرلەمان نەهێڵین بەئاسانی بڕیاری لەو شێوەیە تێپەڕێندرێن، لەگەڵ ئەوەشدا دەزانین بەربەست و پاڵنەرە سیاسیەكانی پشت ئەو بڕیارە زۆر جددین و ئاسان نیە بڕیارێكی ئاوا بوەستێندرێت، بەجددی هەوڵی خۆمان دەدەین هەرچیەك بكرێت درێغی ناكەین. ‎‏هاوڵاتی: لەئێستادا ژمارەیەكی بەرچاوی رەوەندی كوردی لەبەریتانیا بوونی هەیە، پەیامی ئێوە چیە بۆ ئەوان، تابتوانن خۆیان بنیادبنێن و كەسانی بەسودیان لێدەرچێ، بەكۆمەڵگای كوردی و بەریتانی؟ سەرباز بەرزنجی: پەیامی ئێمە بۆ هەموو كوردێك ئەوەیە لەهەر بوارێكدا كار دەكەیت بۆ خزمەتی خۆت و خەڵك بەكاری بهێنە، رابرووی خۆتان لەیاد مەكەن، بەڵكو خۆتانی پێ مۆتیڤەیت بكەن بۆ چاكەی گشتی، قیاسی سەركەوتن بەرژەوەندی كورت و تەسكی شەخسی نیە، ئەو ئیمپاكتەیە كە تۆ لەسەر مێژوو و میللەتت بەجێتدەهێڵیت. ئەوە تاكە كۆمەڵگا دروست دەكات، ئەوە تاكە كە بەدەستەجەمعی ئیش دەكات گۆڕانكاری دروست دەكات، هیوادارین نموونەی بەرزی بەها باڵاكان و پێكەوەژیان بن لەكۆمەڵگای بەریتانی. خۆم بەنوێنەر و هاوكارو برای هەموو كوردێك دەزانم لەهەر شوێنێكی دنیا بێت و پاڵپشتی و دەستخۆشیم بۆ هەموو كەسێكە كەژیانی خۆی بۆ خزمەتی چاكەی گشتی تەرخان دەكات. ‎‏هاوڵاتی: لەكاتی سوێندخواردن بۆ ئەندامیەتی ئەنجومەنی شارەوانی، جلوبەرگی كوردیت لەبەردابوو، ویستتان لەو رێگەیەوە پەیامێك بگەیەنن؟ سەرباز بەرزنجی: بەشداربوونمان لەم رێوڕەسمەدا بەجلوبەرگی كوردی هەموو حساباتێكی سیاسیم بۆ كردووەو مەسجێكی نەتەوەیی بووە، هەموو كەسیش پێی خۆش نەبووە، لەوانەیە خەڵكی رەگەزپەرست زۆر دژیشی بووبن، چەند پەیامێكی تیدابوو ‎مەبەستمان بوو پشانی جیهانی بدەین كە لەندەن هەلی وەرگرتنی پۆست و دەسەڵاتیش لەسەر بنەمای لێهاتوویی بۆ هەموان رەخساوە. جلوبەرگیش  سیمایەكی هەرە گرنگی كلتوری كوردییە، ئێمەش بەشوناس و باكگڕاوندی  خۆمان شانازی دەكەین، ویستمان بەڕای گشتی بەریتانیا بڵێین ئێمەش بەشێكین لەبنیاتنانی كۆمەڵگای بەریتانی و دەتوانین خزمەتی وڵاتەكە بكەین

  سازدانی: هاوڵاتی   فەرهاد سەنگاوی پێشمەرگەی دێرین و كەسایەتی سیاسی دەڵێت:» فشاری جەماوەری و میدیا زۆر گرنگە بۆ چارەسەركردنی كێشە داراییەكانی خەڵك، بەڵام میللەت تێكشكاوە دەبێت میللەت هۆشیار بكرێتەوە لەمافەكانی»، دەشڵێت:» پەشیمان نیم لەو خەباتەی لەشاخ كردوومە، چونكە یەكێتی حزبێكی نیشتمانی نەتەوەیی بوو بۆ هەر چوار پارچەی كوردستان». فەرهاد سەنگاوی، كەسایەتی سیاسی لەم چاوپێكەوتنەیدا لەگەڵ هاوڵاتی ئەوە دەخاتەروو كە» ئەو برادەرانەی كاتی خۆی پێیانوابوو هەڵبژاردن شاڕێی گۆڕانكاری گەورەیە، پێویستە بزانن هەڵبژاردن شاڕێی تەزویرەو هیچ گۆڕانكارییەك دروست ناكات». هاوڵاتی: لەشكركێشی بەردەوامە، چی بكرێت تا ببێتە فشارێك یا سنورێك بۆ سوپاكەی ئەردۆغان دابنرێت؟ فەرهاد سەنگاوی: لەلایەن ئەو گروپ و دامودەزگایانەی كەپێیان دەوترێت دامودەزگای حزبی ئەوەیان دەستی لێ بشۆ، چونكە خۆیان جۆرێك لە جۆرەكان بەشدارن لەو لەشكركێشییە، ئێمە داوای چی لە حكومەت و حزب بكەین لەكاتێكدا هەر بەناو حكومەتی هەرێم و حزبە. بەشێك لەهێرشەكە و لەشكركێشییەكە كە گومانم هەیە پارەی خەرجی لەشكركێشی توركیا لەپارەی نەوتی هەرێم بدرێت، لەبەرئەوە واز لەحكومەت و حزب بهێنین. خەڵك لەماوەی 30 ساڵی رابردوودا تاكەكانی كۆمەڵگا ئینتماكانیان لێ سەندراوەتەوە، بەڕێگای جۆربەجۆر، ئێستا مرۆڤی كورد كراوە بەمرۆڤێكی بەتاڵ لەبیروباوەڕو ئینتما و خۆشەویستی و رێز و خۆشەویستی بۆ خاك و وڵات، مرۆڤەكانی كوردو كۆمەڵگاكەمان كۆمەڵگایەكی بێ ئینتیمایە، هەموو پەیوەندییەكانی لێ سەندراوەتەوە پەیوەندی خێڵایەتی و كۆمەڵایەتی و تەنانەت خێزانیشی لێ سەندراوەتەوە، كاتێك كۆمەڵگا وای لێهات زۆر قورسە تۆ كارێكیان پێبسپێریت و رێكی بخەیت، پێویستە جارێكی تر كۆمەڵگا رێكبخرێتەوە وەفای رێزو خۆشەویستی و بیروباوەڕو ئینتیمای بۆ بگەڕێنیتەوە، كە ئەوانەت بۆ گەڕاندەوە ئەوكاتە ئەتوانی كاریان پێ بسپێریت. كوردستان وێران كراوە، دیوارو پردی لەناو برا بەمرۆڤەكان دروست دەكرێتەوە، ئەی ئەگەر مرۆڤەكان رووخان بەچی دروستیدەكەیتەوە، پێویستە مرۆڤەكان رێكبخەیتەوە دواتر نیشتمان بە مرۆڤەكان دروست بكەیتەوە. هاوڵاتی: خەڵك گلەیی هەیە لەحكومەتی هەرێم و دەڵێن پاش 30 ساڵ دۆخەكە خراپتر بووە؟ بۆچوونتان چییە؟ فەرهاد سەنگاوی: ئێمە حكومەتێكمان نییە بەناوی حكومەتی هەرێم، بەناو هەمانە، بەڵام بەكردەوە نیمانە تا پێی بڵێن ئەوە میللەتەكەی خۆتە پەروەردەو ژیان و ئینتیمای رێكبخە، ئەگەر حكومەت، حكومەتی هەرێم بوایە خۆی كارەكانی دەكرد بەبێ ئەوەی پێی بڵێن. حكومەتی دوو سێ كەس و بنەماڵەیەك هەیە، بەڵام حكومەتی هەرێم نابینم، حكومەتی خێڵەكی هەیەو حكومەتی هەرێم نییە. فشاری جەماوەری و میدیا زۆر گرنگە، تا فشار بكرێت بۆ چارەسەركردنی كێشە داراییەكانی خەڵك، بەڵام میللەت تێكشكاوە دەبێت میللەت هۆشیار بكرێتەوە لەمافەكانی. هاوڵاتی: بڕیارە هەڵبژاردنی پەرلەمان بكرێت، هەرچەند دیار نییە دەكەوێتە كەی؟ پێتوایە لەڕێگەی هەڵبژاردنەوە گۆڕانكاری دروست دەبێت؟ فەرهاد سەنگاوی: نەخێر ئەو برادەرانەی كاتی خۆی پێیانوابوو هەڵبژاردن شاڕێی گۆڕانكاری گەورەیە، پێویستە بزانن هەڵبژاردن شاڕێی تەزویرەو  هیچ گۆڕانكارییەك دروست ناكات، چونكە تۆ دەبێت پەرلەمانێكت هەبێت سەربەخۆ بێت و بریتی بێت لە رۆڵەكانی میللەت و كەسانی ئازاو لێهاتووبن، بەڵام ئێستا ئیش بۆ كوڕو كچەكانیان دەدۆزنەوەو دەڵێن كوڕەكەی فڵان كەس زانكۆی تەواو كردووەو كوڕەكەی فڵان شەهید بۆ پەرلەمان باشە، پەرلەمان پێویستی بەو كەسانەیە كە موخەزرەمن، كامڵن لەبیروباوەرو زانست و مەعریفەو تێربوون لە شتەكان. پەرلەمان نە هی كوڕی بەرپرس و كوڕو كچی شەهیدەكانە، نە هی كوڕو كچی سەرۆك عەشرەت و سەرۆك و مەسئولەكانە، ئەوانە هەموو رێزی خۆیان هەیە لەشوێنی خۆیاندا، مەبەستەكەم ئەوەیە پەرلەمان دەزگایەكە بۆ تەشریح و چاودێری پێویستە خەڵكانێك بچن كە بوونە پەرلەمانتار لەوێ بڵێن حزبەكەم خراپی كرد لەفڵان بەرنامەو بەهەڵوێست بن. خۆم خەڵكی سویدیم بینیوە دەنگی داوە بەپێچەوانەی حزبەكەی خۆی پێیان وتووە چۆن دەنگ دەدەیت بەو حزبە، وتوویەتی بەرنامەی ئەو حزبە باشترە لەو حزبەی خۆم، پەرلەمان لەئەوروپا پێی دەڵێن (windowdressing)جامغانە، ئەها لە جامغانەیەكدا پێڵاو یان كەلوپەل دادەنرێت خەڵك سەیری دەكات و دەیبینێت، پەرلەمان جامغانەیەكە بۆ دنیا كە بڵێن فڵان وڵات جامغانەیان هەیە. هاوڵاتی: بەدیلی هەڵبژاردن چیە بۆ گۆڕانكاری؟ فەرهاد سەنگاوی: بەدیلی هەڵبژاردن كۆمەڵگاكەیە كە دەبێت خەڵك پەروەردە بكرێت، دەست لەپەرلەمان بشۆن. پەرلەمان بووە بەدەستگایەك بۆ پەردە پۆشكردنی گەندەڵییەكان و جێبەجێ نەكردنی یاساكان، پرۆژەیاسایەك پەسەند دەكەیت و دەیكەیت بەیاسا، دەیدەیتە حكومەت جێبەجێی بكات، حكومەت لەسەر رەفەیەك دایدەنێت و حسابیشی هەر بۆ ناكات، ئەگەر لێشی بپرسی بۆچی ئەو یاسایە جێبەجێ ناكەیت دەڵێت وەختی نییەو پارە نییە، لەبەرئەوە پەرلەمان هیچ نییە. ئەگەر زەمینەكە ئامادە بێت بڕوام بەخەباتی چەكداری هەیە ئەگەر زەمینەكە ئامادە بێت بۆ گۆڕانكاری، چونكە تۆ پێویستە دیفاع لەگەلەكەت بكەیت، ئەمەی بەناوی حكومەتی هەرێمەوە هەیە خەریكە گەلەكەمان دەتوێنێتەوە، ئەو دەزگایانەی حكومەت و حزب بەشدارن لەتواندنەوەی میللەتەكەدا و داگیركاریدا. هاوڵاتی: پێتانوایە تەنها سێ لایەنی سەرەكی پێكهێنەری حكومەت (پارتی، یەكێتی، گۆڕان) بەرپرسیارن یان لایەنەكانی ئۆپۆزسیۆنیش؟ فەرهاد سەنگاوی: هەمووی بەشدارە، بەڵێ ئۆپۆزسیۆنیش بەهەمانشێوەی لایەنەكانی ناو حكومەت بەرپرسیارن، تەنانەت ئێمەش و دایك و باوكانی ئێمەش جوتیارێك و هەموو تووێژەكانی كۆمەڵگا بە موومەیەزاتی جیاواز، ئەو دایك و باوكەی سەربازێكی گوێڕایەڵی پەروەردە كرد ئەویش تاوانبارە، بۆیە هەموو گەورە دیارەكان ئەوانەی لەدەسەڵاتدان و پارەیەكی زۆری میللەت لەبەردەستیاندایە. هاوڵاتی: پارتی بەپێی بۆتۆگرافیای وای كردووە كە تووشی ئەوەبن توركیا لەشكركێشی كردووە، ئەمە چۆن لێك دەدەیتەوە؟ یەكێتی ئەگەر لەشوێنی پارتیدا بوایە هەمان رووداوی لەشكركێشی روویدەدا؟ فەرهاد سەنگاوی: یەكێتی لەزۆنی زەرددا بووایە جیاواز دەبوو هەمان شت نەدەبوو بۆ لەشكركێشی توركیا، حزبەكان خراپن، هەیە زۆر خراپە، مەسەلە بەس تەنها جوگرافیای ناوچەكە نییە كە پێی دەوترێت زۆنی زەردو هاوسنورە لەگەڵ توركیا، بۆ پەیەدە لە رۆژئاڤای كوردستان جوگرافییەكەی لەگەڵ عێراق و توركیاشدا هەیەو سنوری خراپتری هەیە بەراورد بەهەرێمی كوردستان، بەڵام پەیەدە چونكە هێزێكی پاك و خاوێن و دڵسۆزە بەنیشتمان و نەتەوەكەی بەهێزترە، سازش ناكات، پارتی پێویستی بەسازش نییەو خۆی حزبی سازشە، پارتی حزبی بەكارهێنان و نۆكەرایەتییە، پارتی خۆیان دەعوەتی توركیایان كردووە بێت و لەشكركێشی بكات و بەتوركیایان راگەیاندووە كە» ئاگات لێمان بێت و بمانپارێزن». هاوڵاتی: بۆچوونتان چییە لەسەر بەرگری پەكەكە بەرانبەر لەشكركێشی سوپاكەی ئەردۆغان؟ فەرهاد سەنگاوی: پەكەكە پێویستە وشیارترو وردتر مامەڵە بكات ، هەرچەند خۆی هۆشیارەو وردیشە، بەڵام لەم پرسەدا پێویستە وردتر بێت و خەبات و بەرخودانی خۆی بەردەوام بێت. هاوڵاتی: تۆ دەنگی شۆڕش بوویت لەشاخ، پێتوایە ئەم حزبانە لەڕێگەی گەندەڵیی و سپیكردنەوەی پارەوە سامانی ئەم میللەتە دەبەن بۆ خۆیان، كە هەندێك پێشمەرگەی دێرینیش دەڵێن پەشیمانین خەباتی پێشمەرگایەتیمان كردووە بەهۆی نیگەرانیان لەپارتی و یەكێتی؟ فەرهاد سەنگاوی: خەڵك تا رادەیەكی جیاواز ناحەقی نییە با وابیر بكاتەوەو بڵێت پەشیمانم لەخەباتی پێشمەرگایەتی، بەڵام بەش بەحاڵی خۆم لەخەباتی شاخ پەشیمان نیم، چونكە یەكێتی حزبێكی پاكو خاوێن و نیشتمانی نەتەوەیی بوو  بۆ هەر چوار پارچەی كوردستان، پاكیش بوو، پەشیمان نیم لەشتە باشەكان، چونكە سەنگەرەكەی جارانی یەكێتی جوان و نیشتمانی بوو. ئێستا یەكێتی تووشی كۆمەڵێك كێشەو دەردەسەری بووەتەوەو وازی لەكۆمەڵێك مەبادئ و بیروباوەری خۆی هێناوە ئەوە خراپەو رێزم بۆ یەكێتییە هەرە باشەكان هەیە لەهەر شوێنێكدا بن

    سازدانی: سەركۆ جەمال   عەلی حەمەساڵح دەڵێت:»چارەسەری گرانی نرخی بەنزین ئەوەیە لەناوخۆ نەوتی زیاتر بپاڵێورێت و حكومەتی هەرێم پاڵپشتی دارایی بكات». عەلی حەمەساڵح دەشڵێت:»چارەسەر ئەوە نییە بازرگانەكان بەنزین لەدەرەوە بهێنن، چونكە ئەوە بەپێی نرخی جیهانی دەبێت و گران دەكەوێت و لیترێك دەگاتە هەزارو 400 بۆ هەزارو 600 دینار». هاوڵاتی: هەرێمی كوردستان هاوشێوەی عێراق دەتوانێت پاڵپشتی دارایی بۆ سوتەمەنی (بەنزین) بكات لەئێستادا؟ عەلی حەمەساڵح: ئەگەر حكومەتی هەرێمی كوردستان نەوت بداتە پاڵاوگەكان بەتەنیا پاڵاوگەی كار دەتوانێت نزیكەی بەشی هەموو پێداویستی كوردستان بەنزین دابین بكات، بەڵام حكومەتی هەرێمی كوردستان هەر 25 هەزار بەرمیل دەپاڵێوێت، بازیان و قەیوان ئێستا بۆ عێراق كاردەكەن واتە حكومەتی هەرێمی كوردستان نەوتی خاوی ناداتێ، بەڵكو عێراق دەیداتێ، بۆیە بەرهەمەكەشی دەداتەوە بەعێراق. هاوڵاتی: پێشتر باستان كردووە كە بەنزینی 690 هەزار دیناری لە هەولێر هەیەو بۆ سلێمانی و دهۆك نییەو راگیراوە، بۆچی؟ عەلی حەمەساڵح: ئێستا حكومەتی هەرێمی كوردستان رۆژانە 23 بۆ 25 هەزار بەرمیل نەوت دەپاڵێوێت، ئەو نەوتەش نزیكەی ملیۆنێك لیتر بەنزین بەرهەمی هەیە، زیاتر بۆ كۆمپانیای سەن ئۆیل و كورد نەفتە، بەشێكی زۆری لەهەولێر و بەشێكی تریشی لەپارێزگای دهۆك دابەشدەكرێت، هیچی رەوانەی سلێمانی ناكرێت. هاوڵاتی: كەمتەرخەمی لەستافی تیمی حكومی یەكێتی و گۆران هەیە كەخەمی لێناخۆن؟ عەلی حەمەساڵح: بێگومان بەشی سلێمانی رۆژانە نزیكەی 400 هەزار لیترە ئەوە دوو ساڵ و شتێكە نەدراوە، بێگومان حكومەت بەرپرسە، بەڵام ئەگەر وردتری بكەیتەوە تیمی یەكێتی و گۆڕان لەحكومەت بەرپرسیارێتی زیاتریان لەئەستۆیە، لەبەرئەوەی زیاتر نوێنەرایەتی ئەو ناوچەیە دەكەن. هاوڵاتی: بێجگە نرخەكەی خراپی كوالێتییەكەی لەشۆسیال میدیاشدا باس دەكرێت، پێتانوایە چاودێری وردی بەنزین ناكرێت لەلایەن حكومەت و لایەنە پەیوەندیدارەكانەوە؟ عەلی حەمەساڵح: نەخێر چاودێری ناكرێت و ئەو بەنزینەشی كە لەبەنزینخانەكاندا هەیە كوالێتیان زۆر خراپە و پێشتریش چەندین جار ئەوەمان وتووە. هاوڵاتی: چارەسەر چییە كاك عەلی، دواجار ئەم وڵاتە و ئەم خەڵكە نابێت بەم دۆخەوە بژین؟ چی بكرێت؟ عەلی حەمەساڵح : چارەسەر ئەوە نییە بازرگان لەدەرەوە بیهێنێت، چارەسەر ئەوەیە لەناوخۆدا نەوت بپاڵێورێت.  ئەگەر سەیری نرخی بۆرسە بكەین لەدوبەی كە نزیكترین شوێنە بۆ بازاڕی سوتەمەنی نزیكەی هەزارو 400 بۆ هەزارو 600 دینارە، تادێتە ئێرە ئەگەر بەنزین بێت دەگاتە هەزارو 600  دینار ئەوپەڕی، ئەگەر تێكەڵەو بابەتێكی تر بێت ئەوەیان بابەتێكی ترە. چارەسەر بازرگانی نییە ئەگەر لەدەرەوە بهێنرێت پەیوەندی بەنرخی جیهانیەوە هەیە، تاكە چارەسەر ئەوەیە حكومەت خۆی پشتیوانی بكات ئەویش بەپاڵاوتنی سەرجەم جۆرەكانی سووتەمەنی. هاوڵاتی: هەڵبژاردن وەك دەردەكەوێت دوادەخرێت، دەڵێن كاك عەلی حەمەساڵح لیستی دەبێت و كاریشی بۆ كردووە؟ عەلی حەمەساڵح: پێشتریش وتوومە هەڵبژاردن ئەمساڵ ناكرێت و ناكۆكیەكانیش لەسەر كۆمەڵێك بابەتن وەكو كۆتاكان، تۆماری دەنگدەران، بازنەكان كە ئایا فرەبازنەبێت یان یەك بازنە بێت، باوەڕی ئێمە ئەوەیە بەرەیەكی جددی ناڕازی دروست بكرێت لەهەرێمی كوردستان

سازدانی: نیگار عومه‌ر سه‌رپه‌رشتیارى ئیداره‌ى گه‌رمیان ئه‌وه‌ دووپاتده‌کاته‌وه‌ که‌ داهاتی خاڵه‌ سنوریه‌کان  هیچی بۆ گه‌رمیان خه‌رج ناکرێت و ده‌گه‌ڕێته‌وه‌ بۆ گه‌نجینه‌ی حکومه‌ت. جه‌لال شێخ نوری، سه‌رپه‌شتیاری ئیداره‌ی گه‌رمیان، له‌م چاوپێکه‌وتنه‌یدا له‌گه‌ڵ هاوڵاتى ده‌شڵێت:" بۆ دووسایدکردنى شه‌قامى سلێمانى- که‌لار پێویستیان به‌ 65 ملیۆن دۆلاره‌و حکومه‌تى هه‌رێم وه‌ڵامیان ناداته‌وه‌ تا بودجه‌که‌یان بۆ خه‌رج بکه‌ن".  هاوڵاتی: له‌ماوه‌ی ئه‌مساڵدا چ پرۆژه‌یه‌ک کراوه‌ بۆ خه‌ڵکی گه‌رمیان؟  جه‌لال شێخ نوری: له‌ماوه‌ی ئه‌مساڵدا چه‌ندین پرۆژه‌ی وه‌به‌رهێنانی له‌گه‌رمیاندا ئه‌نجامدراوه‌ و چووه‌ته‌ بواری جێبه‌جێکردنه‌وە وه‌ک پرۆژه‌ی یه‌که‌ی نیشته‌جێبوون، پرۆژه‌ی بیناو مۆڵ و کارگه‌.  هاوڵاتی: ئایا حکومه‌تی هه‌رێم تاچه‌ند له‌ڕووی ماددییه‌وه‌ پشتیوانی کاره‌کانتان ده‌کات به‌تایبه‌ت پرسی وشکه‌ساڵی؟  جه‌لال شێخ نوری: حکومه‌تی هه‌رێم به‌هۆی قه‌یرانی داراییه‌وه‌ هاوکاری بۆ زۆرێک له‌پرۆژه‌کانی راگرتوه‌، به‌ڵام گه‌رمیان له‌ ئێستادا رووبه‌ڕووی وشکه‌ساڵی بووه‌ته‌وه‌. له‌ساڵی پاردا بڕه‌ پاره‌یه‌ک بۆ گه‌رمیان دیاری کرابوو که‌ ته‌رخان بکرێت بۆ رووبه‌ڕبوونه‌وه‌ی وشکه‌ساڵی توانیمان به‌شێوه‌یه‌کی باش هاوکاری لادێکان و جوتیاران و ئه‌و شوێنانه‌ بکه‌ین که‌پێویستی به‌وه‌ بوو هاوکاری بکرێن بۆ ئه‌وه‌ی بتوانین کاریگه‌ری وشکه‌ساڵی و که‌مئاوی که‌م بکه‌ینه‌وه‌.   له‌ پلانماندا هه‌یه‌ پرۆژه‌ی نیشته‌جێ بونی دیکه‌ بۆ هه‌موو چین و توێژه‌کان گه‌رمیان دروست بکه‌ین   هاوڵاتی: له‌زۆر شوێن ده‌بینێرت بیری نایاسایی له‌سنوری گه‌رمیاندا لێده‌درێت؟ جه‌لال شێخ نوری: ئێمه‌ هاوکاری ئه‌و لایه‌نانه‌ ده‌که‌ین که‌ به‌شێوه‌یه‌کی یاسایی بیر لێبده‌ن، له‌هه‌ر شوێنێ به‌شێوه‌یه‌کی نایاسایی بیر لێبدرێت ئێمه‌ رێگه‌ناده‌ین و ئیجرائات ده‌که‌ین. هاوڵاتی: گه‌رمیان مافی خۆیه‌تی ببێت به‌پارێزگا بۆ ئه‌و پرسه‌ هیچ هه‌نگاوێک ده‌نێن؟  جه‌لال شێخ نوری: گه‌رمیان زه‌مینه‌یه‌کی له‌باری هه‌یه‌ بۆ بوون به‌پارێزگابوونی چ شوێنی جوگرافیاکه‌ی چ ژماره‌ی دانیشتوانه‌که‌ی، به‌ڵام رێگرییه‌ک هه‌یه‌ له‌به‌رده‌م بوون به‌پارێزگابوونی ئه‌ویش کێشه‌ی ناوچه‌ دابڕاوه‌کانه‌، چونکه‌ له‌کاتی کێشه‌ی مادده‌ی (140) قه‌زاکانی که‌لار-کفری-چه‌مچه‌ماڵ-دوزخورماتوو ده‌بێ بگه‌ڕێته‌وه‌ بۆ سه‌ر که‌رکوک، بۆیه‌ ئه‌م بابه‌ته‌ رێگره‌و تائێستا چاره‌سه‌ر نه‌کراوه‌ زیاتر بابه‌تێکی سیاسییه‌.  هاوڵاتی: داهاتی خاڵه‌ سنورییه‌کان چه‌نده‌و چه‌ندی بۆ پرۆژه‌کانی گه‌رمیان خه‌رج ده‌کرێت؟ جه‌لال شێخ نوری: داهاتی خاڵه‌ سنوریه‌کانی په‌یوه‌ندی به‌وه‌زیری داراییه‌وه‌ هه‌یه‌و مانگانه‌ ده‌گۆڕێت، له‌و داهاته‌ش هیچی بۆ گه‌رمیان خه‌رج ناکرێت و ده‌گه‌ڕێته‌وه‌ بۆ گه‌نجینه‌ی حکومه‌ت له‌چوارچێوه‌ی یاسادا ده‌گه‌ڕێته‌وه‌ بۆ حکومه‌ت.  هاوڵاتی: شه‌قامی دوو سایدی که‌لار بۆ سلێمانی که‌ی ته‌واو ده‌کرێت، چه‌ند بودجه‌ی ده‌وێ؟ جه‌لال شێخ نوری: ئه‌گه‌ر چی ئێمه‌ پێویستمان به‌ 65 ملیۆن دۆلاره‌ بۆ ئه‌وه‌ی بتوانین رێگای که‌لار بۆ سلێمانی ته‌واوبکرێت و داواشمان له‌وه‌زاره‌تی داراییش کردووه‌ بۆ ئه‌م مه‌به‌سته‌، به‌ڵام تائێستا وه‌ڵامی پێویستمان نه‌دراوه‌ته‌وه‌و له‌هه‌وڵداین که‌بتوانین ئه‌و بودجه‌یه‌ی بۆ ته‌رخان بکرێت له‌ڕێگه‌ی ئه‌نجومه‌نی وه‌زیران.  له‌ماوه‌ی سێ ساڵی کابینه‌ی نۆیه‌مدا چه‌ند پرۆژه‌یه‌کمان هه‌بووه‌ که‌ داوامان کردووه‌ جێبه‌جێ بکرێت، به‌ڵام تا ئێستا جێبه‌جێ نه‌کراوه‌ وه‌ک پرۆژه‌ی ڕێگه‌وبان و په‌روه‌رده‌و گه‌شتوگوزارو ته‌ندروستی   هاوڵاتی: ئه‌و پرۆژه‌ ستراتیژییانه‌ کامانه‌ن که‌ له‌ئێستادا له‌گه‌رمیان بوونی هه‌یه‌؟  جه‌لال شێخ نوری: خۆشبه‌ختانه‌ له‌ئێستادا چه‌ند پرۆژه‌یه‌کی ستراتیژی له‌ناوچه‌که‌ بوونی هه‌یه‌، وه‌ک پرۆژه‌ی به‌نداوه‌کان، پردو رێگه‌وبانه‌کان و وه‌ک دووسایدی که‌لار بۆ کفری که‌لار بۆ ده‌ربه‌ندیخان، پرۆژه‌ی وه‌به‌رهێنان وه‌ک دروستکردنی یه‌که‌ی نیشته‌جێبوون که‌ له‌قه‌زای کفری و که‌لار جێبه‌جێکراوه‌.  هاوڵاتی: تاچه‌ند پشتیوانی پرۆژه‌ی نیشته‌جێبون ده‌که‌ن بۆ تووێژه‌ جیاوازه‌کان؟  جه‌لال شێخ نوری: له‌پلانماندا هه‌یه‌ که‌ پرۆژه‌ی نیشته‌جێ بوونی دیکه‌ بۆ هه‌موو چین و تووێژه‌کانی گه‌رمیان دروست بکه‌ین، هه‌رچه‌نده‌ چه‌ند پرۆژه‌یه‌کی باش دروستکراوه‌ بۆ مامۆستایان، فه‌رمانبه‌ران، ئه‌و چینانه‌ لێی سودمه‌ندبوون.  هاوڵاتی: خه‌ڵک نیگه‌رانه‌ له‌دۆخی ئابوری هه‌رێم، چی کراوه‌ ئه‌مه‌ کاریگه‌ری له‌سه‌ر جوڵه‌ی بازاڕ نه‌کات که‌ له‌ئێستادا سست بووه‌؟  جه‌لال شێخ نوری: گه‌رمیان ناوچه‌یه‌کی ستراتیژییه‌و جوڵه‌ی بازاڕی له‌ئاستێکی تاڕاده‌یه‌ک باشه‌ به‌حوکمی بوونی مه‌رزی په‌روێزخان و هاوسنوری له‌گه‌ڵ پارێزگای دیاله‌و سه‌ڵاحه‌دین، له‌داهاتوودا چه‌ندین هه‌لی کار ده‌ڕه‌خسێ له‌ڕێگه‌ی ته‌واوبوونی کارگه‌ی ئاسنی کفری. هه‌روه‌ها چه‌ند پرۆژه‌یه‌کی دیکه‌ که‌ ئه‌مانه‌ راسته‌وخۆ په‌یوه‌ندی به‌ژیانی رۆژانه‌ی خه‌ڵکه‌وه‌ هه‌یه‌.  ئه‌گه‌رچی دۆخی خراپی ئابوری رووبه‌ڕووی هه‌موو خه‌ڵکێک بووه‌ته‌وه‌ به‌تایبه‌تی په‌یوه‌ندی به‌لایه‌نی مووچه‌وه‌ هه‌یه‌ به‌هیوام له‌داهاتوودا ئه‌و گرفته‌ چاره‌سه‌ربکرێت.  هاوڵاتی: له‌گه‌رمیان ده‌یان سه‌رمایه‌دار هه‌ن ئێوه‌ قسه‌تان له‌گه‌ڵ کردوون بۆ ئه‌وه‌ی پرۆژه‌ی ستراتیژی له‌گه‌رمیاندا بکه‌ن؟  جه‌لال شێخ نوری: ئێمه‌ له‌گه‌ڵ سه‌رمایه‌داره‌کانی گه‌رمیان له‌ماوه‌ی رابردوودا کۆبوونه‌وه‌مان له‌گه‌ڵیان کردووه‌ به‌ڵێنمان پێیانداوه‌ که‌ بتوانن پرۆژه‌کانیان له‌گه‌رمیان جێبه‌جێ بکه‌ن و ئێمه‌ش کارئاسانیان بۆ بکه‌ین بۆ ئه‌وه‌ی زه‌ویان بۆ دابین بکه‌ین و زۆرێکیان ئاماده‌باشیان هه‌بووه‌ بۆئه‌وه‌ی که‌پرۆژه‌ جێبه‌جێ بکه‌ن.  هاوڵاتی: له‌ماوه‌ی سێ ساڵی کابینه‌ی نۆیه‌مدا گه‌رمیان چ داواکارییه‌کی هه‌بووه‌ جێبه‌جێ نه‌کراوه‌؟  جه‌لال شێخ نوری: ئێمه‌ له‌ئیداره‌ی گه‌رمیان له‌ماوه‌ی سێ ساڵی کابینه‌ی نۆیه‌مدا چه‌ند پرۆژه‌یه‌کمان هه‌بووه‌ که‌ داوامان کردووه‌ جێبه‌جێ بکرێت، به‌ڵام تائێستا جێبه‌جێ نه‌کراوه‌ وه‌ک پرۆژه‌ی رێگه‌وبان و په‌روه‌رده‌و گه‌شتوگوزارو ته‌ندروستی. هاوڵاتى: له‌گه‌رمیاندا چه‌ند کێلگه‌ی نه‌وتی هه‌یه‌و سوودی چی بووه‌ بۆ سنووره‌که‌؟  جه‌لال شێخ نوری: سێ کێلگه‌ی نه‌وتی هه‌یه‌و کێلگه‌ی نه‌وتی (حه‌سیره‌، چیاسورخ، کورده‌ میر)، سوودی هه‌بووه‌ بۆ ره‌خساندنی هه‌لی کار بۆ ناوچه‌که‌ که‌ڕۆژانه‌ هه‌زار تانکه‌ر نه‌وت ده‌گوێزنه‌وه‌و ئه‌مه‌ جگه‌ له‌وه‌ی چه‌ندین گه‌نج له‌نێو کێڵگه‌ نه‌وتیه‌کاندا کارده‌که‌ن.  

سازدانى: هاوڵاتى وته‌بێژى کۆمه‌ڵى دادگه‌رى  ئاشکراى ده‌کات لابردنى پاشگرى ئیسلامى و گۆڕینى ناوه‌که‌یان بۆ کۆمه‌ڵى دادگه‌رى که‌ هاوکات بووه‌ له‌گه‌ڵ هه‌ڵبژاردنى په‌رله‌مانى عێراق له‌و کاته‌که‌دا کۆمه‌ڵ باش نه‌یپێکاوه‌.  محه‌مه‌د حه‌کیم، وته‌بێژى فه‌رمى کۆمه‌ڵى دادگه‌رى له‌مچاوپێکه‌وتنه‌یدا له‌گه‌ڵ هاوڵاتى ده‌ڵێت:" ئاسۆى گۆڕانکارى له‌هه‌موارى یاساى هه‌ڵبژاردنى کوردستاندا ده‌بینین". کۆمه‌ڵى دادگه‌رى 31ى ئایار، ساڵیادى حزبه‌که‌یه‌تى و وته‌بێژى کۆمه‌ڵ له‌باره‌ى پرسى ناوخۆى حزبه‌که‌وه‌ وه‌ڵامى چه‌ندین پرس ده‌داته‌وه‌.   به‌جه‌نابى سه‌رۆکى کۆمه‌ڵم وتووه‌و لێره‌شه‌وه‌ رایده‌گه‌یه‌نم پێموایه‌ سێ شت ناکۆک بوون له‌زه‌مه‌نێکى که‌مدا یه‌کیانگرته‌وه‌، (کۆنگره‌ى کۆمه‌ڵ، هه‌ڵبژاردنى عێراق، ناوگۆڕینى کۆمه‌ڵ له‌کۆمه‌ڵى ئیسلامى بۆ کۆمه‌ڵى دادگه‌رى) پێموایه‌ کاته‌که‌ى جێى تێبینی بوون. حزب ده‌بوو کۆنگره‌که‌ى بخستایه‌ته‌ پاش هه‌ڵبژاردنى په‌رله‌مانى عێراق، ئه‌وکات ناوگۆڕینه‌که‌ش و ئه‌و تێبینییه‌ با رێژه‌یى بێت له‌سه‌رى دروست نه‌ده‌بوو، ته‌سه‌ورم وایه‌ له‌و کاته‌که‌دا کۆمه‌ڵ باش نه‌یپێکاوه‌ هاوڵاتى: پاش ئه‌و ته‌مه‌نه‌ له‌کۆمه‌ڵى دادگه‌رى، چى به‌ئه‌وله‌ویت داده‌نێن بۆ به‌ره‌وپێشبردنى کۆمه‌ڵ؟ محه‌مه‌د حه‌کیم: ساڵیادى حزب وێستگه‌یه‌که‌ بۆ به‌خۆداچوونه‌وه‌، هه‌موو ئه‌و وێستگانه‌ى بڕیویه‌تى له‌ته‌مه‌نى حزبایه‌تى خۆیدا، خاڵى ئه‌رێنى و نه‌رێنى تێدایه‌ به‌دیده‌کرێت، ده‌بێت له‌خاڵه‌ ئه‌رێنییه‌کانى زیاد بکات و خاڵه‌ نه‌رێنییه‌کانى وه‌کو ئه‌زمونێک له‌به‌رده‌ستى بێت و سوودى لێوه‌ربگرێت و له‌هه‌ڵه‌و که‌موکورتییه‌کان په‌ندى وه‌رگرتبێت تا بتوانێت رووبه‌ڕووى ته‌حه‌دییه‌کانى سه‌رده‌م ببێته‌وه‌، پێگه‌ى خۆى بپارێزێت و چاوى له‌وه‌ بێت پێگه‌ى به‌رزترو قایمتر بکات له‌هه‌رێمى کوردستان. پێموایه‌ وه‌کو به‌رپرسیارێتى کۆمه‌ڵ له‌م ئان و ساته‌ى کوردستان و عێراقى تێدایه‌، قورسه‌ و ئه‌رکێکى گه‌وره‌تر چاوه‌رێى ده‌کات و کۆمه‌ڵ ده‌توانێت رووبه‌ڕووى ئه‌و وه‌زعه‌ ببێته‌وه‌و به‌رپرسیارێتى خۆى ئه‌دا بکات به‌حوکمى ئه‌و ئه‌زموونه‌ى که‌ هه‌یه‌تى.    له‌عێراق و کوردستانیش مه‌رج نییه‌ ئه‌وه‌ى کورسى زۆر هێناوه‌ بۆ باشى خۆى و چالاکى خۆى بگه‌ڕێته‌وه‌ ده‌توانین بڵێین هه‌ڵبژاردنى په‌رله‌مانى عێراق وه‌کو یانسیب بووه‌ هاوڵاتى: له‌ماوه‌ى رابردوو له‌میدیاکانى خۆتاندا باس له‌وه‌ کرا که‌ عه‌لى باپیر، سه‌رۆکى کۆمه‌ڵ پڕۆژه‌یه‌کى بۆ به‌ره‌وپێشبردنى حزبه‌که‌ هه‌بووه‌و ده‌نگى پێویستى نه‌هێناوه‌، ئایا پڕۆژه‌که‌ى ره‌تکراوه‌ته‌وه‌؟ محه‌مه‌د حه‌کیم: پڕۆژه‌ى مامۆستا عه‌لى باپیر پڕۆژه‌ى هه‌مه‌لایه‌نه‌یه‌و هه‌ندێ له‌خاڵه‌کانى پێویستى به‌گۆڕینى په‌یره‌وى ناوخۆى کۆمه‌ڵ هه‌بووه‌، په‌یڕه‌وى نێوخۆى کۆمه‌ڵ ده‌ستکاریکردنه‌که‌ى کۆنگره‌ له‌کاتى پێویستدا داوه‌ته‌ ده‌ست ئه‌نجومه‌نى گشتى که‌ 52 که‌سن، ئه‌و ژماره‌یه‌ به‌ دوو له‌سه‌ر سێى ده‌نگى ده‌توانێت ده‌ستکارى په‌یڕه‌و بکات واتا 34 ده‌نگى ده‌وێت، واتا هه‌موو ئه‌ندامانى ئاماده‌ نابن، بۆیه‌ دوو له‌سه‌ر سێى هه‌موو ئه‌ندامانى کۆبوونه‌وه‌که‌ى ده‌وێت ئه‌گه‌ر 35 ئه‌ندامیش ئاماده‌بووبێت 34 ده‌نگی پێویست بووه‌. له‌به‌رئه‌وه‌ ئه‌و خاڵانه‌ى که‌ په‌یوه‌ست بوون به‌په‌یڕه‌وى ناوخۆ ده‌نگى نه‌هێناوه‌، ئه‌گه‌ر نا پڕۆژه‌که‌ى مامۆستا عه‌لى باپیر پڕۆژه‌یه‌کى هه‌مه‌لایه‌نه‌یه‌و زۆر بوار ده‌گرێته‌وه‌و داموده‌زگاکانى دیکه‌ى کۆمه‌ڵ هه‌م له‌ئه‌نجومه‌نى باڵاو هه‌م له‌ ئه‌نجومه‌نى دامه‌زرێنه‌ران و ده‌زگاو مه‌کته‌به‌کانى کۆمه‌ڵ رێنوییان له‌جه‌نابى سه‌رۆکى کۆمه‌ڵ وه‌رگرتووه‌و پڕۆژه‌که‌ى مامۆستا له‌به‌رده‌ستدا بۆ کارکردن و گه‌شه‌کردنى کۆمه‌ڵى دادگه‌رى. هاوڵاتى: ئۆپۆزسیۆنبوونى کۆمه‌ڵ تاچه‌ند واى کردووه‌ پێگه‌ى جه‌ماوه‌ریتان باشتر بکات؟  محه‌مه‌د حه‌کیم:پێموایه‌ کۆمه‌ڵ به‌وه‌ ناسراوه‌ تائێستا له‌سه‌ر یه‌ک خه‌ت هێناویه‌تى و یه‌ک مه‌وقیف و یه‌ک هه‌ڵوێسته‌، ئه‌زموونى ئۆپۆزسیۆن بوون کێشه‌ى زۆرى بۆ ئه‌ندامان و که‌وادیرو په‌رله‌مانتارانمان و سه‌رکرده‌کانى کۆمه‌ڵ دروست کردووه‌. کرۆکى سیاسه‌تى کۆمه‌ڵ ئه‌وه‌ له‌چه‌ند کابینه‌ى سه‌رکردایه‌تیدا بریتیه‌ له‌ به‌رژه‌وه‌ندى تاکى کوردستانى، واتا سیاسه‌تى ئێمه‌ ده‌خولێته‌وه‌ له‌به‌رژه‌وه‌ندى خه‌ڵکه‌وه‌، بۆیه‌ هه‌موو هه‌ڵوێسته‌کانى کۆمه‌ڵ هه‌مووى ته‌ماشابکه‌ له‌به‌رژه‌وه‌ندى تاکى کوردستان بووه‌و زۆرجار به‌رژه‌وه‌ندییه‌کانى خۆى خستۆته‌لاوه‌ له‌پێناو به‌رژه‌وه‌ندى گشتیدا. ئۆپۆزسیۆن بوون تاقه‌و تواناى زۆرى به‌کادیرانى کۆمه‌ڵ داوه‌، به‌شدارى چالاکانه‌ى خه‌ڵکى کۆمه‌ڵ له‌خۆپیشاندان و گردبوونه‌وه‌کان له‌ناڕه‌زایه‌تییه‌کان له‌ئۆپۆزسیۆنى په‌رله‌مانى هه‌موو ئه‌مانه‌ گه‌شه‌ى به‌کۆمه‌ڵ داوه‌. راسته‌ له‌مسته‌واى تموحدا نییه‌و خه‌ڵک چاوه‌ڕوانى زیاتر له‌ کۆمه‌ڵ ده‌کات، ئومێدم وایه‌ له‌ئاینده‌و داهاتووى نزیکدا له‌مڕۆوه‌ به‌پێى پێویستى و چاوه‌ڕوانییه‌کانى خه‌ڵکى کوردستان هه‌نگاو بنێن.  هاوڵاتى: په‌شیمان نین له‌لابردنى پاشگرى ئیسلامى، به‌تایبه‌ت له‌ هه‌ڵبژاردنى په‌رله‌مانى عێراق یه‌ک کورسیتان هێنا؟  محه‌مه‌د حه‌کیم: به‌جه‌نابى سه‌رۆکى کۆمه‌ڵم وتووه‌و لێره‌شه‌وه‌ رایده‌گه‌یه‌نم پێموایه‌ سێ شت ناکۆک بوون له‌زه‌مه‌نێکى که‌مدا یه‌کیانگرته‌وه‌، (کۆنگره‌ى کۆمه‌ڵ، هه‌ڵبژاردنى عێراق، ناوگۆڕینى کۆمه‌ڵ له‌کۆمه‌ڵى ئیسلامى بۆ کۆمه‌ڵى دادگه‌رى) پێموایه‌ کاته‌که‌ى جێى تێبینی بوون. حزب ده‌بوو کۆنگره‌که‌ى بخستایه‌ته‌ پاش هه‌ڵبژاردنى په‌رله‌مانى عێراق، ئه‌وکات ناوگۆڕینه‌که‌ش و ئه‌و تێبینییه‌ى که‌ تۆ باسى ده‌که‌یت با رێژه‌یى بێت له‌سه‌رى دروست نه‌ده‌بوو، ته‌سه‌ورم وایه‌ له‌و کاته‌که‌دا کۆمه‌ڵ باش نه‌یپێکاوه‌، کاتى کۆنگره‌و کاتى هه‌ڵبژاردنى په‌رله‌مانى عێراق ناکۆک بوون له‌گه‌ڵ یه‌کدا. هاوڵاتى: بۆ هه‌ڵبژاردنى په‌رله‌مانى کوردستان چۆن چاره‌سه‌رى ئه‌م پرسه‌ ده‌که‌ن؟ محه‌مه‌د حه‌کیم: پێموایه‌ ده‌رفه‌تێکى زۆر هه‌یه‌ کۆمه‌ڵ له‌که‌موکورتییه‌کانى هه‌ڵبژاردنى پێشوو ئه‌وه‌ى په‌یوه‌سته‌ به‌خۆیه‌وه‌ وه‌کو که‌موکورتى حزبى، ئه‌ما ئه‌وه‌ى په‌یوه‌سته‌ به‌یاساى نوێى هه‌ڵبژاردن و فره‌ بازنه‌یى کارى ده‌وێت له‌عێراق و کوردستانیش مه‌رج نییه‌ ئه‌وه‌ى کورسى زۆر هێناوه‌ بۆ باشى خۆى و چالاکى خۆى بگه‌ڕێته‌وه‌ ده‌توانین بڵێن هه‌ڵبژاردنى په‌رله‌مانى عێراق وه‌کو یانسیب بووه‌، حزب هه‌بووه‌ 40 کورسى هه‌بووه‌ له‌عێراقدا هاتۆته‌ سه‌ر دوو کورسى، ئه‌مه‌ش به‌ماناى ئه‌وه‌ نییه‌ ئێمه‌ وه‌ک کۆمه‌ڵ که‌موکوڕییه‌کانى خۆمان نه‌بینین. هاوڵاتى: کۆمه‌ڵ حه‌وت کورسى له‌ په‌رله‌مانى کوردستان هه‌یه‌، نییه‌تان هه‌یه‌ زیادى بکه‌ن یان کورسییه‌کانتان که‌مده‌بێته‌وه‌؟ محه‌مه‌د حه‌کیم: نه‌خێر هه‌رگیز، کۆمه‌ڵ چاوى له‌زیاتره‌و لاى هه‌موو کادرانى کۆمه‌ڵ چاوه‌ڕێى پێگه‌ى زیاترى کۆمه‌ڵ ده‌که‌ین پێمانوایه‌ ده‌رئه‌نجامیش ده‌بینین. بۆیه‌ ئێمه‌ وه‌کو کۆمه‌ڵ ئاسۆى گۆڕانکارى له‌هه‌موارى یاساى هه‌ڵبژاردنى کوردستاندا ده‌بینین بۆ ئه‌وه‌ى ئومێد لاى خه‌ڵک دروست ببێت و خه‌ڵکیش زیاتر به‌شدارى هه‌ڵبژاردن بکات.

‎سازدانی: کاوه‌ ڕه‌ش.به‌ریتانیا  کچه‌ کوردێک له‌ به‌ریتانیا یه‌کێکه‌ له‌ کاندیدان بۆ شاجوانى ئه‌و وڵاته‌و ده‌ڵێت:"به‌ته‌نها جوانی ڕووکه‌ش و ڕوخسارو له‌ش ولار مه‌رج نیه‌، به‌ڵکو کاره‌ خۆبه‌خشیه‌کان و خێرخوازى و ژینگه‌ دۆستى پێوه‌رن بۆ به‌شداریکردن. ڕۆزا کوردۆ ته‌مه‌ن 25 ساڵ کانیدید کراوه‌ بۆ به‌شداری له‌هه‌ڵبژاردنی شاجوانی که‌ ده‌رگای زیاتر ده‌کاته‌وه‌ بۆ تێکه‌ڵاو بوون له‌گه‌ڵ که‌سانی سیاسیی و هونه‌ری و چالاکوانانان. رۆزا له‌م چاوپێکه‌وتنه‌یدا له‌گه‌ڵ هاوڵاتى وتى:" یه‌کێکم له‌کاندیده‌کانی پێشبڕکێی شاجوانی و هیواده‌خوازم تاجی شاجوانی ئینگلته‌را بۆ ساڵی  2022 له‌سه‌ر بکه‌م". ‎رۆزا ئاماژه‌ى به‌وه‌شکرد که‌ کاتێک پێم وترا دیداره‌که‌ بۆ ڕۆژنامه‌ی "هاوڵاتی"یه‌، زۆرخۆشحاڵ بووم، وتیشى:"باوکم هه‌میشه‌ خوێنه‌رێکی به‌رده‌وامی رۆژنامه‌و سایتى هاوڵاتی"یه‌. ناوبراو ئاماژه‌ى به‌وه‌کرد که‌ هه‌ربه‌م دوایانه‌ش له‌گه‌ڵ دایک و باوکى بانگهێشتکراون بۆ چاوپێکه‌تنێک له‌ڕۆژنامه‌ی میرۆری به‌ریتانی، له‌سه‌ر کاری خۆبه‌خشی له‌لایه‌ن ئه‌ندام په‌رله‌مانی به‌ریتانی (باڕۆنیس نیکۆڵسۆن) که‌ئافرتێکه‌ زۆر دۆستی کورده‌و زیاتر  له‌30ساڵه‌ له‌نزیکه‌وه‌ کارله‌سه‌ر ڕه‌وشی عێراق و کوردستان ده‌کات، وتیشى:" ده‌مه‌وێ سوپاسی پشتگیری دایک و باوک و خاڵم بکه‌م، که‌ئه‌وان هه‌میشه‌ هانده‌رو ڕێخۆشکه‌رم بوون، تابگه‌م به‌خه‌ونه‌کانم". ‎وه‌ک ڕۆزا خۆی ده‌ڵێت، یه‌کێک له‌مه‌رجه‌کانی ئه‌وانه‌ی ده‌پاڵوێرێن بۆ پێشبڕکێ شاجوانی ئینگلته‌را، بریتیه‌ له‌وه‌ی ئه‌و کاندیده‌ ده‌بێ که‌سێکی چالاکی بواره‌کانی مرۆڤ دۆستی و ژینگه‌پارێزی و کارى خۆبه‌خشى بێت، وتی:" له‌و پێشبڕکێیه‌دا، به‌ته‌نها جوانی ڕووکه‌ش و ڕوخسارو  له‌ش و لار مه‌رج نیه‌، بۆ ئه‌وه‌ی به‌شداریبیت، به‌ڵکو کارو کرده‌وه‌ خۆبه‌خشیه‌کانى وه‌ک ژینگه‌ دۆستى و کارى خۆبه‌خشى  پێوه‌رن بۆ به‌شداریکرد ". ‎ڕۆزا کوردۆ، جگه‌له‌وه‌ی که‌خوێندکاری ساڵی چواره‌می زانکۆی وێستمینسته‌ره‌، له‌شاری له‌نده‌ن له‌به‌شی (biomedical sciences) هاوکات کاری په‌رستاریش ده‌کات، له‌یه‌کێک به‌ناوبانگترین سه‌نته‌ره‌کانی پزیشکی (NHS) له‌ناوچه‌ی هارلی شاری له‌نده‌ن. ‎ئه‌و کچه‌ کورده‌، ده‌شڵێت که‌ هه‌رله‌ته‌مه‌نی 16ساڵیه‌وه‌، خولیای بواره‌کانی نوسین و هونه‌ری تابلۆ کێشانى هه‌بووه‌و به‌شداری چه‌ندین پێشانگای تایبه‌ت و به‌ناوبانگی نمایشکردنی تابلۆکانى کردووه‌ له‌به‌ریتانیا. ‎هه‌روه‌ها له‌بواری نوسین و کتێبدا، ده‌یه‌وێ زیاتر بره‌و به‌تواناکانى  بدات و ئێستا کتبێکی نوێى ئاماده‌یه‌و چاپ و بڵاوی ده‌کاته‌وه‌ به‌ناوی(journey of a thousand Kurds) ‎کۆچی هه‌زاره‌ها کورد، وتیشى:" یه‌که‌مجار به‌ زمانى ئینگلیزى بڵاویده‌که‌مه‌وه‌و دواتریش بۆ خوێنه‌ری کوردزمانیش وه‌ری ده‌گێڕین". ‎ڕۆزا ساڵی 2018  له‌سه‌ر بانگهێشتی ڕۆژنامه‌ی میرۆری به‌ریتانی به‌شداری کۆنفراسێکی تایبه‌تی په‌رله‌مانی به‌ریتانیاى کردووه‌ ده‌رباره‌ی ڕه‌وشی کوردستانی عێڕاق. ئه‌و کچه‌ کورده‌ له‌ڕێی نوسین و چاوپێکه‌وتنه‌کانیدا له‌ڕۆژنامه‌کان ده‌خوازێ نه‌هامه‌تی و کۆمه‌ڵکوژیه‌کانی سه‌رکورد له‌مێژوودا به‌دونیای ده‌ره‌وه‌ بناسێنی، له‌دیدارێکی ئه‌م دوایانه‌ی ڕۆژنامه‌ی میرۆری به‌ریتانی ده‌ڵێت:" به‌شێکی زۆری ئه‌وکێشانه‌ی ئێستا له‌باشوری کوردستان هه‌ن، ڕه‌گ و ڕیشه‌یان ده‌گه‌رێته‌وه‌ بۆ سه‌رده‌می ڕژێمی سه‌دام حوسه‌ین و ڕژێمه‌کانی پێشوتر که‌ده‌ستیان هه‌بووه‌ له‌کۆمه‌ڵکوژیی و ئه‌نفال و کیمیاباران و ئاواره‌بونی کورد بۆ ده‌ره‌وه‌". ‎بۆیه‌ ده‌ڵێت:" وه‌ک کوردێکی په‌ناهه‌نده‌و مرۆڤدۆست، زۆر نیگه‌رانم له‌دواین بڕیاری حوکمه‌تی به‌ریتانیا بۆ ڕه‌وانه‌کردنی په‌ناخوازان بۆ ئه‌فریقاو به‌کارێکی قێزه‌ونی ده‌زانم دژ به‌ژیانی په‌ناخوازان، چونکه‌ ئێمه‌ش به‌و ڕۆژگاره‌ سه‌ختانه‌ی ئاواره‌یی و په‌ناهه‌نده‌ی تێپه‌ڕیووین". ڕۆزا ڕوونی ده‌کاته‌وه‌، که‌چۆن کاتێک له‌گه‌ڵ خێزانه‌که‌ی گه‌یشتوونه‌ته‌ به‌ریتانیا، ته‌نانه‌ت نه‌یانتوانیوه‌ به‌ئینگلیزی بدوێن و په‌یوه‌ندی بکه‌ن، به‌ڵام پاش هه‌وڵ و تێکۆشان، ئێستا له‌خێزانه‌که‌یاندا که‌سانی پارێزه‌رو کارمه‌ندی ته‌ندروستی و پیاوی بازرگان بوونیان هه‌یه‌. "هه‌موو ئه‌وانه‌ی فێری بووین و پێی گه‌یشتوین له‌ئه‌نجامی باوه‌ش بۆکردنه‌وه‌و پێشوازی لێکردنی ئه‌م ووڵاته‌ بووه‌ بۆکه‌سانی وه‌ک ئێمه‌، هه‌موومان که‌لتوورو حوکمه‌تی به‌ریتانیامان خۆش ده‌وێت به‌وه‌ی پێی به‌خشیون و کار ده‌که‌ین بۆئه‌وه‌ی پاداشتی کۆمه‌ڵگای به‌ریتانیا بده‌ینه‌وه‌، کۆچبه‌رانی وه‌ک ئێمه‌ ده‌توانن ببن به‌به‌شێک له‌به‌ڕێوه‌بردن و هاوکاری کردنی ووڵات له‌هه‌موو بواره‌کانی ژیاندا"، رۆزا واى وت. ‎ڕۆزاو خێزانه‌که‌ی، هه‌ڵگری ڕه‌گه‌زنامه‌ی به‌ریتانیان و ماوه‌ی 18 ساڵه‌ له‌گه‌ڵ خێزانه‌که‌ی، له‌شاری (پلیمۆس) ژیاون و دواتر ڕۆزا بۆ کارو خوێندن ناچار بووه‌ بچێته‌ له‌نده‌ن. ‎ڕۆزا ده‌ڵێت ئامانجی سه‌ره‌کی بۆ پێشبڕکێی شاجوانی ئه‌وه‌یه‌ که‌"بتوانم له‌و ڕێگایه‌وه‌ پڕۆژه‌یه‌کی خێرخوازیی دروست بکه‌م و سوودم بۆ کۆمه‌ڵگا هه‌بێت، تابتوانم داهاتویه‌کی گه‌ش بنیادبنێم". ‎هه‌موو که‌سێک ده‌توانێت به‌شداری ده‌نگدان بکات له‌ڕێگای ئه‌پێکه‌وه‌ به‌ناوی miss England ده‌نگ بدات، داوا ده‌که‌م پشتیوانیم بکه‌ن. ڕۆزا کوردۆ، ئه‌و کاته‌ی ته‌مه‌نی ته‌نها پێنج ساڵان ده‌بێت،  هاوشانی دایکی، ڕێگای پڕمه‌ترسی و مان و نه‌مانی هه‌نده‌ران ده‌گرنه‌به‌ر به‌دوای ژیانێکی باشترو پارێزراودا ده‌گه‌ڕان و به‌ڕێگای زه‌مینی و ده‌ریادا، دوای گه‌شتێکی پڕنه‌هامه‌تیی و ترسناک، خۆیان گه‌یاندۆته‌ به‌ریتانیا. "ئێمه‌ هه‌موو به‌و ناخۆشیانه‌دا  تێپه‌ڕیوین، بۆیه‌ ئه‌وه‌ به‌شێکه‌ له‌ژیانی ڕابردووی ئێمه‌. بۆیه‌ من ئێستا هه‌ست ده‌که‌م که‌من کێم. من ئه‌و که‌سه‌م که‌ئێستا له‌به‌ر ئه‌و شتانه‌ی به‌سه‌رماندا هاتووه‌ ده‌بێ بڕواو متمانه‌ی زیاترمان به‌خۆ بێت و هه‌وڵی چونه‌پێشه‌وه‌ بده‌ین بۆ خزمه‌تکردنی کۆمه‌ڵگاو مرۆڤایه‌تی"، رۆزا وا ده‌ڵێت.

سازدانی: ئارا ئیبراهیم یەكێك لەدامەزرێنەرانی یەكێتی دەڵێت:" نابێت تەنها حزبی رابردووبین لەخەبات و تێكۆشانی شاخ بین، ئیتر دەبێت ببینە حزبی ئایندەو دواڕۆژ كەچی دەتوانین بۆ میللەتی خۆمان بكەین، لەو رەوشە قورس و خراپەی كەهەیەتی". عومەر شێخ موس، یەكێك لەدامەزرێنەرانی یەكێتی نیشتمانی كوردستان لەم چاوپێكەوتنەیدا لەگەڵ هاوڵاتی دەشڵێت:" توركیا لە راستیدا یەك لەسەر سێی خاكی زۆنی زەرد كە لەژێر نفوسی پارتیدایە كۆنترۆڵی كردووە، ئەوەش لەدژی خواستی خۆیانیشە دەیان ساڵە داگیری كردووە، ئەوە زۆر زەرەرمەندە، توركیا بچێتە شوێنێك لێی ناكشێتەوە". هاوڵاتی: یەكێتی كەی و چۆن دامەزرا؟ عومەر شێخ موس: لەمانگی نیساندا، مام جەلال بەسەردان هاتبووە دەرەوەی وڵات، لەپاریسەوە تەلەفونی بۆ كردم دەمەوێت قسە بكەین و كاك كەمال فوئاد لە بەرلینە، پێكەوە دابنیشین چی بكەین باشە، ئیتر چووم بۆ بەرلین موناقەشەیەكی زۆرمان كرد، لەسەر ئەوە رێككەوتین كە مام جەلال  بگەڕێتەوە رۆژهەڵاتی ناوەڕاست ئەو برادەرانەی لە دەوروپشتی كۆبووبوونەوە كە دكتۆر فوئاد مەعسوم لەقاهیرەوە هاتبوو، كاك رەزاق فەیلی و عادل موراد لەئێرانەوە هاتبوون بۆ شام بۆلای مام جەلال،  لەوێ  شتێك گەڵاڵە دەكەین چ حزب و بزوتنەوەیەك دروستبكەین. لەوكاتەوە ئەوان بووبوون بە ئەندامی تەجەموعی عێراقی كە هەندێك خاڵیان نوسیبوو، دابویان بە تەجەموعی عێراقی، تەجەموعی عێراقی لەباتی ئەوان لەڕادیۆی دیمەشق بڵاویكردبووەوە، ئێمە پێمان ناخۆش بوو كە بڵاوكرابووەوە. ئیتر بڕیاربوو لە 16 تا 19ی مانگی ئایار بێت، بەڵام خستمانە 29،30،31، ئازار لەبەر مەسەلەی ڤیزا كە خەڵك بتوانن بێن بۆ بەرلین. لەوێ كەدانیشتین بەیانەكەمان بینی و موناقەشەی زۆر بوو، بزوتنەوە بێت سۆشیالیست بێت ماركسییەت بێتن شوعی بێت بۆ كوردستانی عێراق بێ یان بۆ هەموو پارچەكانی دیكەی كوردستانیش، لەسەر ئەوە ساغ بووینەوە كە مام جەلال بیری لێكردبووەوە بەپەسەندمان زانی لەو چوار برادەرەی لە دیمەشق لەگەڵ سێ برادەری دیكە كە لەكۆبوونەوەكە پەسەندكرا كە ببنە دەستەی دامەزرێنەر ( كاك نەوشیروانی رەحمەتی، من بووم، كەمال فوئاد بوو) لێ زیاد كراین بڕیارماندا رۆژی 1ی 6ی 1975 رۆژی رەسمی دامەزراندنی یەكێتی نیشتمانی بێت، بەیاننامەكەی پێشتر كە بەبێ موافەقەتی ئەوان لەدیمەشق بڵاوكرابووەوە هەندێك گۆڕانكاریمان تێدا كرد بەشێوەیەكی دیكە چاكمان كردو بۆ هەموو زمانەكانی دنیا وەرمانگێرا، ئێمە بەعەمدی ناومان نا (یەكێتی نیشتمانی كوردستان) ساغنەبووینەوە لەسەرئەوەی بۆ كوردستانی عێراق بێت یان بۆ هەموو بەشەكانی كوردستان بێت، من و كاك نەوشیروان لایەنگری ئەوەبووین كە ئەم رێكخستنە لەدواڕۆژدا ببێتە رێكخستنێك بۆ هەموو بەشەكانی كوردستان، بەداخەوە ئەوە نەبوو ئەو لایەنانەی كە پشتیوانیان دەكردین، ئامادەبوون تەنها بۆ كوردستانی عێراق پشتیوانیمان بكەن. هاوڵاتی: یەكێكن لەو حەوت كەسەی  یەكێتی نیشتمانی كوردستانتان دامەزراند، ئەوكات بەڕێزتان تەمەنتان 33 ساڵ بووە؟ عومەر شێخ موس: دەستەی دامەزرێنەر حەوت كەس بووین و ناوەكان دیارن پێویست ناكات ناویان بڵێم، هەنگاوێكی گەورەی مێژوویمان نا پاش ئەوەی كە شۆڕشی ئەیلول كۆتایی هاتوو گەلی ئێمە تووشی كارەساتێكی زۆر گەورە بوو، ئومێدمان بەو میللەتە بەخشیەوەو نیشانی دوژمنەكانماندا كە بزوتنەوەی كوردی تەواو نەبووە و هەموو كاتێك زیندووەو هەڵساوەتەوە، جارێكی دیكە دەست دەكات بەخەبات و تێكۆشان بۆ  مافەڕەواكانی بەشێوەیەكی شۆڕشگێرانەتر بەڕێبازێكی چاك و مۆدێرنتر لەجاران دەكەوێتە رێی خەبات. هەروەها بەباشكردنی پەیوەندییەكانی لەگەڵ بەشەكانی دیكەی كوردستان لەگەڵ هێزی پێشكەوتنخوازی جیهاندا، بەتایبەتی ئەو وڵاتانەی كەگەلی كورد تێیدا دەژین. ئەو هەنگاوەی دامەزراندنی یەكێتی تا رادەیەكی زۆر ئامانجە سەرەكییەكانی خۆی بەدەستهێنا. بەگەڕانەوە بۆ دەزگاكانی حزب و كۆنگرە یان پلینیۆمی فراوان بەڕێگای راست دەزانم، بە دیالۆگ لەگەڵ خەڵك و جەماوەر كادرانی ناو حزبەكە بتوانین كەموكوڕییەكان چارەسەر بكەین، پێویستی بەپڕۆسەو گفتوگۆیەكی فراوان هەیە لەناو ریزەكانی یەكێتی نیشتمانی كوردستان، لەبەرئەوەی تووشی قەیرانی گەورە بووە   هاوڵاتی: ئەمڕۆ 47 ساڵ تێدەپەڕێت بەسەر یادی یەكێتیدا، چ قسەیەكت هەیە وەك یەكێك لەدامەزرێنەرانی؟ عومەر شێخ موس: ئێمە بەهێزێكی بچووكەوە دەستمانپێكرد، توانیمان یەكێتی بكەینە ئەو هێزەی كە بوو، بۆچوونی فكری و سیاسی و ستراتیژیمان راست بوو، لەئەنجامدا سەدام حوسەین تووشی قەیران بوو و رووخان بوو، لەو وەختەوە ئومێدێكی گەورەمان بەڕاپەرینی جەماوەر هەبوو لەسەركەوتنی شۆڕشێكی گەورەدا، ئەوە بەدیكرا. كوردستان بەتەواوی وێران بوو، چ پاش شۆڕش و چ لەپاش رووخانی رژێمی سەدام حوسێن، وردە وردە جۆرە ئاوەدانییەك هەبوو، ئەگەر رەوشی كوردستان لەڕووی ئاوەدانی بەراورد بكەیت لەگەڵ ئەو كاتەدا پێشكەوتنێكی ئێجگار زۆر گەورە پەیدا بووەو دەستكەوتی زۆر گەورە بۆ میللەتی ئێمە پەیدا بووە لەلایەن هەموو لایەنەكان، بەڵام بەداخەوە هێشتا كەموكوڕی زۆرەو پێویستە چ حكومڕانی رێكوپێك بۆ مەسەلەی دادوەری كۆمەڵایەتی و رێكوپێككردنی خزمەتگوزاری لەوڵاتدا بێتەدی.  حزبەكانی ئێمە ئەو دەرسە گەورەیەی پێویستە لێوەربگرین نابێت تەنها حزبی رابردووبین لەخەبات و تێكۆشانی شاخ بین، ئیتر دەبێت ببینە حزبی ئایندەو دواڕۆژ كە چی دەتوانین بۆ میللەتی خۆمان بكەین، لەو رەوشە قورس و خراپەی كە هەیەتی. هاوڵاتی: لەدیداری یەكێتی بافڵ تاڵەبانی وەك سەرۆكی یەكێتی ناوی هێندرا، چ قسەیەكتان هەیە بۆ دۆخی ناوخۆی یەكێتی؟ عومەر شێخ موس: بەگەڕانەوە بۆ دەزگاكانی حزب و كۆنگرە یان پلینیۆمی فراوان بەڕێگای راست دەزانم، بە دیالۆگ لەگەڵ خەڵك و جەماوەر كادرانی ناو حزبەكە بتوانین كەموكوڕییەكان چارەسەر بكەین، پێویستی بەپڕۆسەو گفتوگۆیەكی فراوان هەیە لەناو ریزەكانی یەكێتی نیشتمانی كوردستان، لەبەرئەوەی تووشی قەیرانی گەورە بووە. یەكێتی هەموو كاتێك كە تووشی قەیران بووەو توانیویەتی ریزەكانی خۆی بپارێزێت و هەوڵەكانی خۆی بخاتەگەڕ چارەسەر بدۆزێتەوە، بە رای من پێویستە سەركردایەتی ئێستای یەكێتی كە نەوەی دووەم و سێیەمی یەكێتی نیشتمانین بەشێوەیەكی زۆر حزبیانە بەسنگفراوانی لەگەڵ كادران و ئەندامانی خۆیان چارەسەرێك بدۆزنەوە بۆ ئەوەی یەكێتی بگەڕێتەوە سەر رەوشی جارانی خۆی. بەباشی دەزانم هەموو دەزگاكانی یەكێتی بۆ رێكوپێك كردنی یەكێتی نیشتمانی، چ كاك بافڵ چ سەركردایەتی و مەكتەبی سیاسی كە هەنگاو بنێن رەوشەكە چارەسەر بكەن، لەهەموو دنیا حزب بەتاكە كەسێك بەڕێوە ناچێت. هاوڵاتی: یەكێتی یەكێكە لەهێزە پێكهێنەرو هاوبەشەكانی حكومەت، هاوشێوەی پارتی و گۆڕان، پێتانوایە پێویستە دۆخی خەڵك ئەولەویەتی كارەكانی بێت؟ عومەر شێخ موس: ئەوەم قبوڵە كە بەرپرسیارێتی لەسەر هەموو ئەو لایەنانە هەیە كە بەشدارن لە حكومەتدا، ئەوان دەبوو ریفۆرم و گۆڕانكاری گەورە بكەن رەوشی كوردستان چاك بكەن، لەبەرئەوەی ئیمكانیاتیان هەبووە، بەڵام بەداخەوە بۆچوونی تەسكی حزبیان رێگای لەوە گرتووە كە دەزگای نەتەوەیی دروست بكەن و دەزگاكانی حكومەت بەچاكی بخەنەگەڕ  بۆ ئەوەی لەگەڵ ئەم زەمانە بگونجێت رەوشی خەڵكەكە چاك بكەنەوە.  ئەوە مانای ئەوە نییە تەنها لەگەڵ یەكێتیم بێت، لەگەڵ بزوتنەوەی گۆڕان و پارتی دیموكراتی كوردستانیشمە، بەداخەوە راستە یەكێتی و گۆڕان لەحكومەتدان، بەڵام پارتی یەكلایەنە بەشی زۆری كارەكانی حكومەت، بڕیارەكان لەدەستی خۆیدایەو زۆربەی جومگەكانی كۆنترۆڵ كردووە زۆر بەداخەوە، بەتایبەت لەم ساڵانەی دیوایی لەكابینەی ئێستاو كابینەی هەشتەم و پێشتریش وابووە، چونكە ماوەیەكی زۆرە یەكێتی نەیتوانیوە قورسایی خۆی پیشان بدات، ئەوەش وایكردووە پارتی سوو ئیسفادەی لەم رەوشەی یەكێتی كردووە. پێویستە سەركردایەتی ئێستای یەكێتی كە نەوەی دووەم و سێیەمی یەكێتی نیشتمانین بەشێوەیەكی زۆر حزبیانە بەسنگفراوانی لەگەڵ كادران و ئەندامانی خۆیان چارەسەرێك بدۆزنەوە بۆ ئەوەی یەكێتی بگەڕێتەوە سەر رەوشی جارانی خۆی.     هاوڵاتی: یەكێتی سوورە لەسەر كاندیدكردنی بەرهەم ساڵح بۆ سەرۆك كۆمار؟ پێتوایە ئەو پۆستە بۆ یەكێتی چ گرنگییەكی هەیە؟ عومەر شێخ موس: منیش لایەنگرێكی بەهێزی هەڵبژاردنی كاك دكتۆر بەرهەم ساڵحم، چونكە بەلێوەشاوەترین كەسی دەزانم خاوەن ئەزمونەو  پەیوەندیەكی زۆر باشی لەگەڵ هێزە عەرەبییەكان و نێودەوڵەتییەكان هەیەو كەسێكی شایستەیە بۆ ئەو پۆستە. لەكاتی خۆی كە رێكەوتن لەنێوان یەكێتی نیشتمانی و پارتی كراوە،  بەتایبەتی لەنێوان مام جەلالی رەحمەتی و كاك مەسعود، سەرۆكایەتی كۆمار بۆ یەكێتی نیشتمانی بێت و سەرۆكایەتی هەرێم بۆ پارتی بێت، یان ئەگەر ئاڵوگۆڕی تێدا كرا پۆستەكان بەپێچەوانەوە بكرێتەوە، بەڵام ئەوكات پارتی داوای پۆستی سەرۆكی هەرێمیان كرد.  ئێستا ناكرێ لەو رێككەوتنە پەشیمان ببێتەوەو پارتی نفوس و دەسەڵاتی خۆی زیاتر بكات لەبەغداش لەجیاتی ئەوەی رێز لەو رێكەوتنە بگرێت. پۆستی سەرۆك كۆمار، لەسەر ئەو كەسە دەمێنێ كە پۆستەكە وەردەگرێت، چونكە سەرۆك  كۆمار دەسەڵاتی ئەوەندە زۆر نییە، بەڵام ئێمە بینیمان كە مام جەلال سەرۆك كۆمار بوو لەبەر عێراق و پێداویستییەكانی، مام جەلال بۆ خۆی توانی ناوەرۆكی دەسەڵاتی سەرۆك كۆمار زۆر زیاتر بكات لەوەی كە لەدەستوردا هەیە، بۆیە لەسەر كاك بەرهەم دەمێنێ كە حزبەكەی چەند پشتیوانی لێبكات و هێزەكان چەند پشتیوانی بكەن،  بۆ ئەوەی دەوری كاریگەری زیاتر ببینێ، لەوەدا ئەمینم كە دكتۆر بەرهەم پشتیوانی بكەن و دەرفەتی بۆ بڕەخسێنن دەتوانێت ئەو رۆڵە ببینێت.   توركیا لە راستیدا یەك لەسەر سێی خاكی زۆنی زەرد كە لەژێر نفوسی پارتیدایە كۆنترۆڵی كردووە، ئەوە لەدژی خواستی خۆیانیشە دەیان ساڵە داگیری كردووە، ئەوە زۆر زەرەرمەندە، توركیا بچێتە شوێنێك لێی ناكشێتەوە   هاوڵاتی: توركیا زیاتر لە 40 كیلۆمەتر خاكی هەرێمی بەزاندووە، بەبیانووی بوونی پەكەكە؟ پەكەكە پارتی تۆمەتبار دەكات كە هاوكاری توركیا دەكات؟ چ قسەكیتان هەیە وەك كەسێكی نەتەوەیی؟ عومەر شێخ موس: ساڵی رابردوو لەوتارێكمدا لە زانكۆی كۆیە بەشێوەی فەرمی باسی ناپەسەندی دروستبوونی شەڕی نێوخۆیم كرد، لەوێ دكتۆرای فەخریان پێبەخشیم، ئەوەبووە كە بەهەموو شێوەیەك شەڕی ناوخۆ لەناو هێزە كوردیەكان دروست نەبێت. ئێمە ئەزمونێكی زۆر تاڵمان هەیە لەشەری ناوخۆ لەهەموو بەشەكانی كوردستان، كوردستانی رۆژئاوا نەبێت. شەری ناوخۆ نێوان لایەنە كوردییەكان زیانێكی زۆر گەورەی بە پرسی نەتەوەیی گەیاندووە، بۆیە لە هەر شێوەیەك و شێوێنێك زەمینەی بۆ خۆش بكرێت بەراستی نازانم، بەگژیدادەچمەوە، چونكە هیچ موبەریرێك نییە ئەوە رووبدات.  توركیا لە راستیدا یەك لەسەر سێی خاكی زۆنی زەرد كە لەژێر نفوسی پارتیدایە كۆنترۆڵی كران ساڵە داگیری كردووە، ئەوە زۆر زەرەرمەندە، توركیا بچێتە شوێنێك لێی ناكشێتەوە، ئەوە نمونەی قوبرس-مان هەیە، نمونەی سوریامان هەیە، كوردستانی عێراقیش كە لێی ناكشێتەوە.نمونەیەكی دیكەیە. بۆیە هیچ جۆرە موبەریرێك نییە كە شەر دروست بێت، پەكەكە هەڵە دەكەن و هەڵەشیان كردووە، ئەوە تەبریر و بیانوو نادات كە زەمینە خۆش بكەین بۆ شەڕ، شەریان لەگەڵ بكرێت بەزەرەری خۆت و میللەتی خۆت دەگەرێتەوە.  

هاوڵاتى ئه‌ندامى کۆمیته‌ى به‌ڕێوه‌به‌رى (په‌.که‌.که‌) ڕایگه‌یاند، ئه‌وان له‌ مه‌یدانى جه‌نگدا به‌ ئه‌ندازه‌ى پێویست به‌هێزن و ده‌شڵێت:" چل و پێنج رۆژه‌ گه‌ریلا له‌شه‌ردایه‌، شه‌ڕێکى وه‌ها دژوار و قورس به‌رێوه‌ ده‌چێت، به‌ده‌م ئاسانه‌، فیداکاریه‌کى زۆر مه‌زنى ده‌وێت، به‌ڵام دوژمن تێکشکاوه‌، سه‌ره‌راى به‌کارهێنانى حه‌وت جۆر چه‌کى کیمیایى و چه‌ک و چۆڵى ده‌که‌یان". ئاژانسى هه‌واڵى فورات، نزیک له‌ پارتى کرێکارانى کوردستان(په‌که‌که‌) چاوپێکه‌وتنێکى له‌گه‌ڵ موراد قه‌ره‌یلان ئه‌ندامى کۆمیته‌ى به‌ڕێوه‌به‌ریى په‌که‌که‌ کردووه‌و تێیدا شیکاریى مانگ و نیوێکى شه‌ڕى له‌ دژى داگیرکه‌رى خسته‌روو قه‌ره‌یلان وتى:" ئێمه‌ ئاشتیخوازین و نه‌ شه‌ڕخوازین، ده‌مانه‌وێت پرسى کورد به‌رێ و رێبازى سیاسی، دیموکراسى چاره‌سه‌ر ببێ، پرسى کورد، پرسێکى کۆمه‌ڵایه‌تی، که‌لتورى و مێژووییه‌. ئه‌م پرسه‌ ده‌بێت به‌دیالۆگ چاره‌سه‌ر ببێ. له‌به‌ر ئه‌وه‌ى دوژمن له‌به‌رامبه‌رمان ئه‌مه‌ قه‌بوڵ ناکات، هه‌ر له‌سیاسه‌تى ئینکار و له‌ناوبردن پێداگره‌، ئه‌مڕۆکه‌ش له‌کوردستان شه‌ر بوونى هه‌یه‌. واتا ده‌بێت ئه‌مه‌ باش ببێته‌ مایه‌ى تێگه‌یشتن". ناوبراو وتیشى:" ئه‌و شه‌ڕه‌ى ئێمه‌ له‌کوردستان به‌رێوه‌ى ده‌به‌ین، شه‌ڕى مانه‌وه‌ و پاراستن و بوونمانه‌. شه‌ڕى ئازادییه‌. ده‌مانه‌وێت له‌سه‌ر ئه‌م خاکه‌وه‌ بژین، له‌ناونه‌چین و به‌ئازادانه‌ ژیان بکه‌ین. ئه‌م شه‌ڕه‌ له‌سه‌ر ئه‌م ئه‌ساسه‌ به‌رێوه‌ ده‌چێت. ئه‌وه‌ى هێرش ده‌کاته‌ ئێمه‌ نین، ده‌وڵه‌تى تورکه‌. ئه‌وه‌ى ده‌یه‌وێت پرسه‌که‌ به‌رێگه‌ى کۆشتن، به‌خوێنڕشتن چاره‌سه‌ر بکات، ئێمه‌ نین، ده‌وڵه‌تى تورکیایه‌". قه‌ره‌یلان باسى له‌وه‌شکرد که‌ "ده‌مانه‌وێت به‌شێوه‌یه‌کى عادلانه‌ پرسى کورد چاره‌سه‌ر ببێ، به‌ڵام ئه‌گه‌ر مل نه‌ده‌ن بۆ چاره‌سه‌رى و هه‌ر بیانه‌وێت پێداگرى له‌سه‌ر له‌ناوبردنمان بکه‌ن، بێگومان ئێمه‌ش تا کۆتایى خۆمان ده‌پارێزین. دۆژمن له‌به‌ریه‌ک هه‌ڵوه‌شاوه‌". له‌باره‌ى گۆشه‌گیرى له‌به‌رامبه‌ر رێبه‌رى گه‌لى کورد عه‌بدوڵا ئۆجالان ، ئه‌و ئه‌ندامه‌ى رێبه‌رى په‌که‌که‌ وتى:"شه‌ر به‌گۆشه‌گیرى ده‌ستى پێکرد. ئه‌م شه‌ڕه‌ى له‌کوردستان ئه‌مڕۆکه‌ به‌رێوه‌ ده‌چێت، شه‌ڕى له‌ناوبردنى گه‌لى کورده‌. ئه‌مه‌ش سه‌ره‌تا له‌ئیمرالییه‌وه‌ ده‌ستى پێ کرد، واتا سیسته‌مى ئیمرالی، سیسته‌مێکى پسکۆلۆژیک، ده‌روونی، سیسته‌مى ئه‌شکه‌نجه‌، سیسته‌مى قڕکردن و له‌ناوبردنى کۆمه‌ڵگه‌ى کورده‌. ئه‌و شه‌ڕه‌ى له‌وێ به‌رێوه‌ ده‌چێت، شه‌ڕى ده‌روونى له‌به‌رامبه‌ر به‌رێبه‌ر ئاپۆ و ئه‌و هه‌ڤاڵانه‌ى له‌ورن به‌رێوه‌ ده‌چێت به‌واتاى خۆى وه‌هایه‌". "ماوه‌ى پانزده‌ مانگه‌ هیچ زانیاریه‌ک له‌سه‌ر رێبه‌ر ئاپۆ و ئه‌و هه‌ڤاڵانه‌ى له‌وێ ده‌ژین، نییه‌. ئه‌م قۆناغه‌، قۆناغى ته‌کنه‌لۆجیا و ته‌له‌فۆن و ئینته‌رنێته‌، ده‌وڵه‌تى تورک  هه‌موو یاسا و رێسایه‌کى گه‌ردوونى به‌هى خۆشیه‌وه‌ بن پێ ده‌کات و رێگه‌ نادات هیچ زانیاریه‌ک له‌رێبه‌ر ئاپۆوه‌ وه‌ربیگیردرێت، رێگه‌ش ناده‌ن به‌ته‌له‌فۆنیش زانیارى لێوه‌ربگرین. مه‌گه‌ر ئه‌وه‌ نییه‌ ده‌ڵێن زیندانى له‌تورکیا مافى به‌کارهێنانى ته‌له‌فۆنى هه‌یه‌. مافى دیدارى زیندانى له‌گه‌ڵ بنه‌ماڵه‌ و پارێزه‌ره‌کانى هه‌یه‌. کاتێک ده‌وڵه‌تێک، یا رژێمێک له‌ئیمرالى هه‌رجۆره‌ یاسایه‌کى مرۆڤیی، گه‌ردوونی، ئه‌خلاقى یا هى خۆشى بن پێ ده‌کات، گه‌لۆ تۆ ده‌توانى به‌و ده‌وڵه‌ت چى بڵێى و چه‌ ناوێک له‌و ده‌وڵه‌ته‌ بکه‌ی. تۆ به‌چى ئه‌و ده‌وڵه‌ته‌ باوه‌ێ‌ بکه‌ی؟ ئه‌مه‌ ده‌وڵه‌تێکى چۆن، چۆنییه‌؟ نه‌ یاسا هه‌یه‌، نه‌ ئه‌خلاق هه‌ی"، قه‌ره‌یلان وا ده‌ڵێت. موراد قه‌ره‌یلان له‌باره‌ى شه‌ڕى ئێستاى نێوات سوپاکه‌ى ئه‌ردۆغان و گه‌ریلا وتى:" ئه‌مڕۆکه‌ له‌زاپ و ئاڤاشین و مه‌تینا شه‌ڕێکى دژوار به‌رێوه‌ ده‌چێت. شه‌ڕێکى نابه‌رابه‌ر بوونى هه‌یه‌. واتا له‌لایه‌که‌وه‌ به‌ده‌یان هه‌زار سه‌رباز، تانک"ده‌بابه‌"، تۆپ، فرۆکه‌ و چه‌کى کیمیایى و هه‌ر شێوه‌ چه‌کێک به‌کاردێنن، و له‌لایه‌کى تره‌وه‌ شۆڕشگێڕن گه‌لى کورد، گه‌ریلاکانى ئازادى کوردستان به‌چه‌کى فه‌ردی"شه‌خسی"، به‌بۆمبه‌ى ده‌ستى له‌به‌رخۆداندان و شه‌ر ده‌که‌ن. واتا له‌م شه‌ڕه‌دا هاوسه‌نگى بوونى نییه‌. به‌ڵام چى هاوسه‌نگى دروست ده‌کات؟ ئێراده‌ ئه‌م هاوسه‌نگیه‌ دروستى ده‌کات". هه‌روه‌ها وتیشى:" گه‌ریلا ئیراده‌ى هه‌یه‌، گه‌ریلا باوه‌ڕیان به‌ئیراده‌ى خۆیان و ئه‌و رێبازه‌ى که‌ شه‌ڕى بۆ ده‌که‌ن هه‌یه‌. واتا له‌به‌ر ئه‌وه‌یه‌ که‌ ماوه‌ى سى و هه‌شت ساڵه‌ شه‌ر به‌رێوه‌ ده‌به‌ین. هه‌رچه‌نده‌ش چه‌ندین جار ئاگربه‌ستیش پێکهاتبێت. هه‌رچنده‌ ئێمه‌ ده‌مانه‌وێت به‌رێ و رێبازى سیاسى چاره‌سه‌ر ببێت، به‌ڵام له‌به‌رامبه‌ر به‌م دۆژمنه‌ شێت و هار و دژوار و شۆڤینست بوونى هه‌یه‌. نه‌ژادپه‌ره‌سته‌، هه‌میشه‌ هه‌وڵده‌دات له‌ناومان ببات. له‌به‌ر ئه‌وه‌یه‌ که‌ ئێمه‌ سى و هه‌شت ساڵه‌ له‌به‌رامبه‌ر به‌م دۆژمنه‌ هۆڤ و ده‌ڕنده‌یه‌ شه‌ر ده‌که‌ین. بێگۆمان له‌گه‌ڵ ئێمه‌شدا هه‌ندێ ئه‌زموون درۆست بووه‌.  ئێمه‌ش به‌رێ و رێبازى نوێ شه‌ێ‌ ده‌که‌ین. ئێمه‌ش به‌رێبازێک شه‌ێ‌ ده‌که‌ین، که‌ هه‌م بتوانین ئه‌و ته‌کنه‌لۆجیایه‌ى له‌ده‌ستیدایه‌ چه‌ ته‌کنه‌لۆجیاى زه‌مینى و چه‌ ته‌کنه‌لۆجیاى ئاسمانى و چه‌ چه‌کى کیمیایى والا ده‌رخه‌ین ده‌جووڵینه‌وه‌، ئێمه‌ش رێ و رێبازى وه‌ها پێشده‌خه‌ین. ئه‌گه‌ر وه‌ها نه‌بێت که‌س ناتوانێت له‌و که‌ژۆ کێوه‌دا بژیت و له‌به‌رخۆ بدات.  بۆچی؟  چونکه‌ هه‌میشه‌ بۆردوومانه‌. زۆر جاریش جل و به‌رگى کیمیاباران له‌خۆمان ده‌که‌ین، چونکه‌ کیمیایى به‌کاردێنن. شه‌ڕێکى زۆر شه‌ت و مه‌رج هه‌یه‌. له‌به‌رامبه‌ر به‌وه‌ش به‌رخۆدانیه‌کى مێژوویى و پیرۆز به‌رێوه‌ ده‌چێت و وه‌هایه‌. ده‌بێت مرۆڤ بزانیت له‌به‌رامبه‌ر به‌وه‌ش بێگۆمان باوه‌ڕی، ئیراده‌بوون و ئه‌شقى وڵات هه‌یه‌. باوه‌ڕى به‌وڵات، ئازادى و دیمۆکراسى هه‌یه‌. نرخى مرۆڤایه‌تى هه‌یه‌. له‌به‌رامبه‌ر به‌وه‌ش وه‌حشیه‌ت و هه‌ر شێوازێکى پیس به‌کارهێنان هه‌یه‌. ره‌وشى شه‌ر وه‌هایه‌". قه‌ره‌یلان ورده‌کارى زیاترى باسکردو وتى:" به‌مشێوه‌یه‌ دووژمن له‌سه‌ره‌تاوه‌ رووى له‌هه‌رێمى زاپ یا هه‌رێمى رێکان و نێروه‌ کرد و کردیه‌ ئامانج. له‌وێدا گه‌یشته‌ بن به‌ست. چل رۆژى به‌سه‌ردا تێپه‌ڕی. سه‌ربازه‌کانیان مردن. گه‌ریلا هێرشى پێچه‌وانه‌ ده‌ست پێکرد، له‌و هێرشه‌ پێچه‌وانه‌دا هه‌م له‌کۆره‌ژارۆ و هه‌میش له‌ چیاى ره‌ش کۆژراویان زۆر بوو به‌تایبه‌تى به‌گروپی. ئه‌وان له‌وێدا گه‌یشتنه‌ بن به‌ست. له‌بنه‌مادا بنکه‌وتن. تا ئێستا سه‌رنه‌که‌وتوون و شکستیان هێناوه‌. له‌هیچ شوێنێکدا که‌ گه‌ریلا رێگه‌ى نه‌دابێ، نه‌یانتوانیووه‌ بکه‌ونه‌ ئه‌و شوێنانه‌. واتا به‌زه‌برى زۆر بیه‌وێت بکه‌وێته‌ ئه‌و شوێنانه‌ و ئیراده‌ى گه‌ریلا بن پێ بکات، پێکنه‌هاتووه‌. به‌ڵام له‌هه‌ندێک شوێندا له‌ناویه‌کدان و که‌وتوونه‌ته‌ ناو یه‌کدا. له‌مه‌سافه‌ى بۆمبه‌ى ده‌ستدا به‌یه‌که‌وه‌ یه‌کسته‌ویه‌خه‌ن و شه‌ر ده‌که‌ن. شه‌ڕێکى وه‌ها دژوار و قورس به‌رێوه‌ ده‌چێت. ئێستاکه‌ لێره‌دا ده‌ڵێیم، به‌ده‌م ئاسانه‌، به‌ڵام پێکهێنانى ئاسان نییه‌. زۆر زه‌حمه‌تى خۆى هه‌یه‌. فیداکاریه‌کى زۆر مه‌زنى ده‌وێت. "ئه‌گه‌ر فیداکاریه‌کى وه‌ها نه‌بێت خۆى له‌خۆیدا ئیمکانى ئه‌وه‌ نییه‌ شتێکى وه‌ها روو بدات. شتێکى وه‌ها ئاسان نییه‌، ئه‌وه‌ ماوه‌ى چل و چوار، چل و پێنج رۆژه‌ له‌گه‌ڵ ئه‌رته‌شێک که‌ به‌هه‌موو شێوه‌یه‌ک چه‌ک و چۆڵ به‌کاردێنێ و ته‌نانه‌ت چه‌کى قه‌ده‌غه‌کراوى کیمیاییش به‌کاردێنێت و ئه‌رته‌شێکى وه‌ها راوه‌ستینی. ئه‌مه‌ شتێکى ئه‌وه‌نده‌ ئاسان نییه‌. ناوه‌ڕۆکێکى ئه‌مه‌ هه‌یه‌. ئێستاکه‌ جێگه‌ى ئه‌وه‌ نییه‌ که‌ باسى لێوه‌ بکه‌م. پاش ئه‌وه‌ى گه‌یشته‌ بن به‌ست له‌ئێستادا شه‌ڕه‌که‌ى گواسته‌وه‌ بۆ رۆژئاواى ئاوى زێ. ئێمه‌ پێ ده‌ڵێن زاپ، ئاوى زاپ. یا لێره‌دا گردى جودى هه‌یه‌، گردى ئیف ئیم و گردى ئامێدیه‌ هه‌یه‌. هه‌ڤاڵانمان پێ ده‌ڵێن گردى هه‌کاری. له‌پشت ئامێدییه‌ گردى هه‌ره‌ بڵنده‌. ئێستاکه‌ شه‌ڕه‌که‌ى گواسته‌وه‌ ئه‌وێ. له‌وێدا ئه‌وه‌ چه‌ند رۆژه‌ شه‌ر و پێکدادان به‌رێوه‌ ده‌چێت. تا ئێستا له‌و شوێنه‌ى سه‌ربازانیان دابه‌زاندوه‌ هه‌ر له‌وێن و هه‌نگاوێک پێشڕه‌ویان نه‌کردوه‌. ده‌یانه‌وێت پێشڕه‌وى بکه‌ن، به‌ڵام هه‌رجاره‌ زه‌بریان به‌رده‌که‌وێت. ته‌نانه‌ت ژماره‌یه‌کى زۆر هه‌لیکۆپته‌ریشیان زه‌ربریان به‌رکه‌وتووه‌. هه‌ندێک له‌وانه‌ش ده‌که‌ون. به‌ڵام شێوه‌ى ئێمه‌ وه‌هایه‌ ئه‌گه‌ر به‌چاوى خۆمان نه‌بینین، ناڵێین ئه‌وه‌تا که‌وت. نمونه‌ ئه‌و گرده‌ى جودى له‌پاڵ زاپێ هه‌یه‌"، ئه‌و ئه‌ندامه‌ى به‌رێوه‌به‌رى په‌که‌که‌ واى وت. هاوکات ئه‌وه‌شى دووپاتکرده‌وه‌ که‌"هه‌ڤاڵان له‌وێدا له‌ دوو هه‌لیکۆپته‌رى سکۆرسکیان داوه‌. هه‌ڤاڵان ده‌ڵێین ئێمه‌ له‌یه‌کیانمان خست و دووکه‌ڵى لێهه‌ستا. له‌وێدا سه‌ربازگه‌یه‌کى سه‌ر سنور هه‌یه‌، له‌به‌رده‌م رووبارى چه‌لێیه‌. سه‌ربازگه‌ى گرێک. ده‌ڵێن هه‌ڵیانکۆتاوه‌ته‌ سه‌ر ئه‌و سه‌ربازگه‌یه‌ و ته‌قینه‌وه‌یه‌کى پێ‌ مه‌زن روویداوه‌. واتا موممکنه‌ ته‌قیبێته‌وه‌، له‌گه‌ڵ ئه‌وانه‌ى تێدان ده‌بێت له‌ناو چۆبێتن. به‌ڵام له‌به‌ر ئه‌وه‌ى به‌چاوى خۆیان نه‌یانبینیووه‌ که‌ له‌ناو چوونه‌. ده‌ڵێین زه‌برى به‌رکه‌وتووه‌. وه‌ها ده‌ڵێن.  به‌ڵام ئه‌وه‌ى که‌ ده‌ڵێن زه‌برى به‌رکه‌وتووه‌، ره‌نگه‌ کاتێک گه‌یشتنه‌وه‌ جێگه‌ى خۆشیان بته‌قێنه‌وه‌، یا له‌ناویش بچن. ئه‌وانه‌ى له‌ناودا به‌زۆرینه‌ ده‌مرن". ئه‌و ئه‌ندامه‌ى به‌رێوه‌به‌رى په‌که‌که‌ ئه‌وه‌شى باسکرد که‌" به‌راشکاوى ده‌ڵێم له‌م شه‌ڕه‌دا ده‌وڵه‌تى تورک زه‌ره‌رى زۆر ده‌بینێت. به‌ڵام بۆ راى گشتى بڵاو ناکاته‌وه‌. کۆژراویان زۆره‌ و زۆرتریش ده‌بێت. ده‌یانه‌وێت مرۆڤه‌کان بکۆژرێن، به‌ڵام هه‌ندێ ئه‌نجام وه‌ربگرێت. ئه‌ردۆغان ـ باخچه‌لى بێ مه‌رحه‌مه‌تى نیشان ده‌دات. ئه‌وانه‌ بۆ پاراستنى ده‌سه‌ڵاتداریه‌تى خۆیان ده‌یانه‌وێت منداڵانى تورک و کورد بده‌نه‌ کوشتن. به‌مشێوه‌یه‌ له‌سه‌ر خوێن ده‌سه‌ڵاتداریه‌تى خۆیان بۆنیاد ده‌نێن. له‌م شه‌ڕه‌دا هه‌ره‌ زێده‌ کیمیایى به‌کاردێنن. شتێک که‌ زیاتر له‌م شه‌ڕه‌دا پشتى پێ ده‌به‌ستن، کیمیاییه‌. نمونه‌ى ئه‌وانه‌ش زۆرن. له‌و کیمیایانه‌ى به‌کاریانهێناوه‌، تا ئێستا هه‌ڤاڵانمان حه‌وت جۆڕه‌یان پشتڕاستکردۆته‌وه‌. هه‌ڤاڵان چۆن ئه‌و کیمیایانه‌ پشتڕاست ده‌که‌نه‌وه‌؟ به‌ڕه‌نگ. وه‌کو نمونه‌ زۆرینه‌یان ره‌نگیان ره‌شه‌. وه‌کو قیره‌. واتا خودى قیره‌. شێوه‌یه‌کى تریان ره‌نگى زه‌رده‌، گازێکى وه‌هایه‌. یه‌کێکى دیکه‌ ره‌نگى زیووه‌. یه‌کێکى تر سه‌وزه‌ و بێ بۆنه‌. هه‌ندێ جۆریان بۆندارن. هه‌ندێکیشیان بێ بۆنن. هه‌ندێ جۆریشیان ره‌نگیان قاوه‌ییه‌. جۆرێکى تریشیان ره‌نگى سووره‌. بۆنى وه‌کو ئاوى ساوون"سابوون" هه‌یه‌. ئه‌و ئاوه‌ى که‌ جل و به‌رگى پێ شۆردرابێ. بۆنێکى وه‌هاى لێدێت. جۆرێکى ترى ئه‌و کیمیایانه‌ ره‌نگى سپییه‌. ئێمه‌ ده‌توانین له‌ڕێگه‌ى ره‌نگه‌وه‌ ئه‌و کیمیایانه‌ بناسیینه‌وه‌. واتا دیار ده‌بێت که‌ چه‌ندین جۆر گازى کیمیایى له‌به‌رامبه‌رمان به‌کاردێنن. وه‌هاش ده‌یانه‌وێت ئه‌نجام به‌ده‌ستبهێنن. ئێستا به‌دژوارى پشتیان به‌کیمیاباران به‌ستووه‌. ده‌یانه‌وێت به‌کیمیاباران ئه‌نجام به‌ده‌ستبهێنن. بۆ ئه‌وه‌ش راى گشتى گه‌له‌که‌مان، مرۆڤن پارێزڤانى مافه‌کانى مرۆڤ له‌به‌رامبه‌ر به‌چه‌کى قه‌ده‌غه‌کراوى کیمیایى ده‌بێت هه‌ڵوێست نیشان بده‌ن".  

سازدانی: ئارا ئیبراهیم   وتەبێژی كۆماجڤاكێن كوردستان(كەجەكە) هەموو زانیارییەك لەبارەی ئۆپەراسیۆنەكەی سوپاكەی ئەردۆغان دەخاتەڕوو و ئەوە دووپاتدەكاتەوە كە «شەڕ بەردەوامە، خۆڕاگری گەریلا لە زاپ و ئاڤاشین شكستی بەسوپای تورك هێناوە». زاگرۆس هیوا، وتەبێژی كۆماجڤاكێن كوردستان(كەجەكە) لەمچاوپێكەوتنەیدا لەگەڵ هاوڵاتى پارتی تۆمەتبار دەكات بەهاوكاری كردنی سوپاكەی ئەردۆغان و دەڵێت:»پەدەكە هەموو هاوكارییەكی سوپای تورك دەكات لەڕووی هەواڵگری و هەواڵگری سەربازی و راگەیاندن و پەیوەندییەكان و گەمارۆ خستنەسەر هەرێمەكانی گەریلا».، هەروەها دەشڵێت:» پارتی خۆیان دەڵێن دەستیان بەسەر هەزارو 200 ماسكدا گرتووە كە ئەو ماسكانە دەتوانێت گیانی هەزارو 200 گەریلا بپارێزێت،  بەڵام پەدەكە(پارتی دیموكراتی كوردستان) بەهاوكاری توركیا دەستبەسەر ئەو ماسكانەدا دەگرێت». هاوڵاتى: لەدوای ئۆپەراسیۆنی «چنگی قوفڵ» تائێستا زیانەكانی سوپاكەی ئەردۆغان چین؟ زاگرۆس هیوا: ئۆپەراسیۆنەكەی دەوڵەتی تورك كە لە 15ی نیسان و بەتایبەت لە 9ی شەوی 17ی نیساندا دەستی پێكرد، ئێمە دوای مانگێك ئامارێكمان بڵاوكردەوە كە لەماوەی مانگێكدا 427 سەربازی تورك كوژراون و 88 دیكەیان بریندار بوون، بەڵام لەدوای ئەو بەروارەوە تائێستا 155 سەربازی دیكەی تورك كوژراوە، واتا بەكۆی گشتی 582 كوژراو سەربازی سوپای تورك بەدەست و بەرخودانی گەریلا كوژراون.   شەڕ بەردەوامە، خۆڕاگریی گەریلا لــــەزاپ و ئاڤاشین شكستی بەسوپای تورك هێناوە   هاوڵاتى: سوپاكەی ئەردۆغان چەكی كیمیاوی بەكاردەهێنێت و وەك باستان كردووە كۆمەڵكوژی ئەنجامدەدات،  ئەو چەكە كیمیاویانە چۆن بەكاردەهێنێت و لەكوێوە دەستی دەكەوێت؟ زاگرۆس هیوا: توركیا زۆرجار چەكی كیمیاوی دژی گەریلا بەكارهێناوە لەساڵەكانی نەوەدەكان و دواترو ساڵی دوو هەزاریش، تائێستاش هەر بەكاریدەهێنێت. زۆرترین چەكی كیمیاوی لەلایەن سوپای توركەوە كە بەكارهاتووە لە 2020 زۆر زیادی كردووە، ساڵی رابردوو واتا 2021، بەدیاری كراوی 327 جار چەكی كیمیاوی دژی گەریلا بەكارهێناوەو 39 گەریلا شەهید بوون. ئەمساڵ بەتەكبیری تایبەتی هەڤاڵانی گەریلا كە دەرسیان لەوەی ساڵی رابردوو وەرگرتووە، زۆرتر تەكبیری سروشتیی ئەنجام دەدەن بەو هۆیەوە چەكە كیمیاویەكە كاریگەری كەمترە، بەڵام ئەمساڵ هەشت هەڤاڵی دیكەمان بەو چەكە كیمیاویانە شەهید بوون. دیارە یەكێك لەتەكبیریەكانی گەریلا، ماسكی بەرگری كردنە لەچەكی كیمیاوی، بەڵام پەدەكە(پارتی دیموكراتی كوردستان) گەمارۆی خستۆتەسەر هەرێمەكانی گەریلا، ئەو ماسكەش بەئاسانی بەدەستی گەریلا نەگەیشتتوەو پارتی خۆیان دەڵێن دەستیان بەسەر هەزارو 200 ماسكدا گرتووە كە ئەو ماسكانە دەتوانێت گیانی هەزارو 200 گەریلا بپارێزێت،  بەڵام پەدەكە(پارتی دیموكراتی كوردستان) بەهاوكاری توركیا دەستبەسەر ئەو ماسكانەدا دەگرێت و بەهەڵمەتی چەواشەكاری دەڵێت بۆ ئاژاوەنانەوەو تەقینەوە بووە. ئەو چەكە كیمیاویانە بەدیاری كراوی لەوڵاتانی ئەڵمانیاو بەریتانیا بەكاردێت، چوار جۆرن و هەندێكیشی دروستكراوی دەوڵەتی توركیا بۆ خۆیەتی، هەندێجار كە لەدژی تونێل و شوێنی داخراو بەكاریدەهێنێت هەرچ گازێك بەكاردەهێنێت لەشوێنی داخراو، چەكی كیمیاوی ئەگەر گازی فرمێسكڕێژ و بیبەریش بێت دەكەوێتە چوارچێوەی چەكی كیمیاییەوە و خۆی بەرهەمی دەهێنێت. مرۆڤ دەتوانێت بڵێت كە لەگەڵ چەكی كیمیاوی، (((تێرموبارەك))) بەكاردەهێنێت كە لەشەڕی ئێستای روسیاو ئۆكرانیا بەكاردەهێنرێت، وڵاتانی نێودەوڵەتی وشیارنین بەرانبەر ئەوەی بەكاریدەهێنێت، بەڵام سەردانمان كردووە بۆ دەزگا نێودەوڵەتییەكان، بەڵام توركیا بەرتیل و رەشووە دەداتە ئەو رێكخراوانەو ئەو رێكخراوانەش خۆیان لەپرسەكە لادەدەن، چونكە ئەو رێكخراوانە خەڵكانی توركیاو ئەڵمانیای تێدایەو نایانەوێت كێشە بۆ رێكخراوەكانیان دروست ببێت. پارتی ئابڵۆقەی خستۆتە سەر هەرێمەكانی گەریلا ، پارتی دەڵێت:» پەكەكە سوپای توركیای پەلكێش كردووەو توركیا رەوایە هاتووە، بەڵام پەكەكە هێزێكی نامەشروعەو توركیا هێزێكی مەشروعە، بچووكترین لۆمەی توركیا ناكات».   هاوڵاتى: سوپای ئەردۆغان هیچ شوێنێكیان كۆنترۆڵ كردووە لەدوای ئۆپەراسیۆنی»چنگی قوفڵ»؟ زاگرۆس هیوا: سوپای تورك بەحوكمی ئەوەی تەكنەلۆژیای پێشكەوتووی هەیەو بەكاریدەهێنێت و پارتی هەموو هاوكارییەكی لۆجستی دەكات و سەربازەكانی بۆ دەگوازێتەوە بەهەلیكۆپتەر سەربازەكان لەهەرێمی كوردستانەوە بۆ هەرێمەكانی گەریلا دەگوازرێنەوە، سوپای تورك لەشكری بڵاوكردووەتەوە، بەڵام نەیتوانیوە هیچ شوێنێك كۆنترۆڵ بكات، لەهەموو ئەو هەرێمانە سوپای تورك هەیەو گەریلاش هەیەو شەڕو پێكدادان بەردەوامەو سوپای توركیا نەیتوانیوە هیچ شوێنێك كۆنترۆڵ بكات، وەكو چۆن لەیەكەم رۆژی ئۆپەراسیۆنەكەیان شەڕو پێكدادان هەیە، ئێستاش بەهەمان شێوەیە سەختر بووە، چەكی (((تێر موبارەك))) و چەكی دیكەش بەكاردەهێنن بەرانبەر گەریلا. هاوڵاتى: پارتی تا چ ئاستێك هاوكاری سوپای توركیا دەكات؟ زاگرۆس هیوا: پەدەكە(پارتی دیموكراتی كوردستان) لەو ئۆپەراسیۆنەی توركیادا هەموو ئاسانكارییەك دەكات بۆ ئەوەی سوپای تورك بتوانێت هەرێمی زاپ و ئاڤاشین داگیر بكات، هاوكارییەكانی پارتی بۆ لەشكری داگیركەری توركیا لەبواری (هەواڵگری، هەواڵگری سەربازی، سیاسی، راگەیاندن، دبلۆماتی، لۆجستی، پەیوەندییە نێودەوڵەتییەكان) هاوكاری توركیا دەكات. پارتی وا نیشانی دەدات كەئەم ئۆپەراسیۆنەی تورك مافی خۆیەتی، پەكەكە تۆمەتبار دەكات، تەنانەت لەپەیوەندییە نێودەوڵەتییەكانیدا لەجیاتی ئەوەی توركیا شەرمەزار بكات و داوا بكات توركیا بكشێتەوەو هاتی سوپای تورك بە رەوا نیشان دەدات و پشتگیری دەكات، بەڵام بوونی گەریلا بە نامەشروع دادەنێت. پارتی ئابڵۆقەی خستۆتە سەر هەرێمەكانی گەریلا ، پارتی دەڵێت:» پەكەكە سوپای توركیای پەلكێش كردووەو توركیا رەوایە هاتووە، بەڵام پەكەكە هێزێكی نامەشروعەو توركیا هێزێكی مەشروعە، بچووكترین لۆمەی توركیا ناكات». هەوڵدانی سوپای تورك بۆ ئەوەیە هەرێمی زاپ و ئافاشین لێك جیابكاتەوەو گارەو حەفتانین و خواكورك لەیەك جیابكاتەوە و بۆ ئەوەی گەریلا نەتوانن تێیدا هاتوچۆ بكەن و چەك و خواردەمەنی بگەیەنن، هەر كەسێك بیەوێت هاوكاری پەكەكە بكات لەناو گەل زەختی دەخاتەسەر تەنانەت دەیكوژێت وەكو چۆن ساڵی رابردوو كەسێكیان كوشت لە رەنگ براك كە خەڵكی شیلادزێ بوو. هاوڵاتى: توركیا لەڕێگەی فڕۆكەی درۆنەوە بێجگە لەشكركێشییەكەی خەڵكی مەدەنی لەچەمچەماڵ و سلێمانی و شارباژێر دواتریش كەمپی مەخمور تیرۆر دەكات، بۆ ئەمەیان پێتانوایە كێ هاوكارییان دەكات؟ زاگرۆس هیوا: وەكو چۆن سەلمێندراوە، دەزگای میت بەهاوكاری دەزگای پاراستنی پارتی، توانیویەتی خۆی رێكبخات لەهەولێرو سلێمانی و كەركوك و دهۆك، سوپای تورك بەهاوكاری پارتی ئەم كارەی كردووە. دەسەڵاتی ئەو شارانە بەرپرسن لەپاراستنی گیانی هەموو كەسێك كە ژیان دەكەن، ئەم فرۆكەی كەشفە بەبێ زانیاری كەسێك لەو ناوچانەدا لەسەر زەوی ناتوانێت كاریگەری هەبێت، ئەوەی لەچەمچەماڵ و سلێمانی و مەخمور رودەدات هەمووی بەهۆی ئەو زانیاریانەوەیە كە دەزگای پاراستنی پارتی دەیداتە میت، كە پاراستنی پارتی رێكیدەخات و هاوكاری توركیا دەكات. دەسەڵاتی ئیدارەی زۆنی سەوزو یەكێتی پێویستە وشیار بێت لەبەرانبەر ئەو كارەی پاراستنی پارتی كردوویەتی و دەیكات لەناو خەڵك و دەزگا ئەمنییەكانداو تەكبیری بۆ دەكات. هاوڵاتى: گەریلای ژنان تا چ ئاستێك هاوشانی پیاوانی گەریلا رۆڵیان لەبەرخودان دژی سوپاكەی ئەردۆغان هەیە؟ زاگرۆس هیوا: گەریلای ژن، (یەژاستار) لەو شەڕانەدا رۆڵی پێشەنگایەتی دەگێڕن، لەئاستی شەڕڤان و هەم لەئاستی فەرماندەشدا، لەبەرەی پێشووەی ئەو شەڕەدان. یەكێك لەفەرماندەو گەریلای ژن، هەڤاڵ مزگین روناهی لەیەكەم رۆژەكانی ئۆپەراسیۆنەكەدا لەكاتی بەرپەرچدانەوەی دوژمن گەیشتە كاروانی شەهیدان، بەكردەوەو بەخوێنی خۆی سەلماندی كە پێشەنگی خۆڕاگرییە لەبەرانبەر داگیركەری و لەشكركێشی توركیادا، چونكە زیهنیەتی دەوڵەتی داگیركەری توركیا نەك تەنها دوژمنی گەلی كوردە، دوژمنی ژنیشە، زیهنیەتی ئەردۆغان لەسەر بنەمای دوژمنانەیەتی ژنە، لەبەرئەوە ژنان بەئەركی خۆیانی دەزانن  رووبەڕووی سوپای تورك ببنەوە. ئەو خۆڕاگرییەی گەریلای ژنان(یەژاستار) بەرانبەر ئەرتەشی توركیا دەیكات، خۆڕاگرییەكە لەسەر ناوی هەموو ژنانی كوردستان و رۆژهەڵاتی ناوین لەبەرانبەر دەسەڵاتێكی فاشیست و ژن كوژی وەك ئەردۆغان و دەوڵەت باغچەلییە.   دەنگی ئەكەپەو مەهەپە ئێستا بەپێی راپرسییەكان كەوتووەتە خوار لەسەدا 30%یەوە، ناتوانن ئەو زۆرینەیە بەدەستبهێنن و ببنەوە خاوەنی دەسەڵات، بەتایبەت ئەكەپە لەبەرئەوەی دەنگی زۆری دۆڕاند، چونكە چووە هاوپەیمانی لەگەڵ مەهەپەی دەوڵەت باغچەلی كردووە، دەنگەكانیان كەمتر بووەتەوە، مەهەپە ناتوانێت بەندی لەسەدا 10% تێپەڕ بكات، لەبەرئەوە بەندەكەیان هێناوەتەوە لەسەدا 7%، زۆرتریش دەنگەكانیان كەمدەكات.   هاوڵاتى: بڕیارە ساڵی داهاتوو هەڵبژاردن لەتوركیا بكرێت، پێتانوایە یەكێك لەئامانجەكانی ئەردۆغان بۆ ئەوەیە لەو هەڵبژاردنەدا شكست نەهێنێت؟ زاگرۆس هیوا: ئامانجی ئەم ئۆپەراسیۆنانە بۆ ئەوەیە كە بتوانن سەركەوتوو بن لە بۆ ئەوەی دەنگیان لەهەڵبژاردنەكاندا زیادبكات، لە 2021 لەهەرێمی گارە خۆیان تاقیكردەوەو شكستیان خوارد، لەبەرئەوە شكستیان خوارد هەڵبژاردنیان نەكرد. لەزاپ و مەتیناو ئاڤاشین خۆیان تاقیكردەوە دیسان شكستیان خوارد، ئەمساڵیش هاتوون خۆیان تاقیبكەنەوە بۆ ئەوەی كە بەو بنكە جەماوەرییە فاشیستەی خۆیان بڵێن كە ئەوە ئێمە سەركەوتنمان بەدەستهێنا بەرانبەر كوردو كوردمان پاكتاوكرد تا بچن بۆ هەڵبژاردن، یەكێك لەحساباتەكانی ئەم هەڵبژاردنەیە كە لە 2023 بڕیارە ئەنجام بدرێت. دەنگی ئەكەپەو مەهەپە ئێستا بەپێی راپرسییەكان كەوتووەتە خوار لەسەدا 30%یەوە، ناتوانن ئەو زۆرینەیە بەدەستبهێنن و ببنەوە خاوەنی دەسەڵات، بەتایبەت ئەكەپە لەبەرئەوەی دەنگی زۆری دۆڕاند، چونكە چووە هاوپەیمانی لەگەڵ مەهەپەی دەوڵەت باغچەلی كردووە، دەنگەكانیان كەمتر بووەتەوە، مەهەپە ناتوانێت بەندی لەسەدا 10% تێپەڕ بكات، لەبەرئەوە بەندەكەیان هێناوەتەوە لەسەدا 7%، زۆرتریش دەنگەكانیان كەمدەكات. وەزارەتی ناوخۆی توركیا خۆیان دەڵێن لەزستاندا هەزار ئۆپەراسیۆنمان ئەنجامداوە، گەریلا لەهەموو ناوچەكانی باكوری كوردستان چالاكی هەیەو بوونی هەیەو چالاكییەكانی كاریگەری گەورەی هەیە. بەڵام بۆ رای گشتی وا نیشانی دەدەن كەگەریلا لەباكور نەماوە.   هاوڵاتى: بەشێك لەنەیارانتان دەڵێن بۆ لەباكوری كوردستان چالاكیەكانتان كەمترن بەراورد بەباشوری كوردستان؟ زاگرۆس هیوا: وەكو چۆن گەریلا دژی سوپای داگیركەری تورك لەباشور چالاكی هەیە لەباكوریش هەمانە، بەدیاری كراوی چەند رۆژێك لەوان و فاراشین و لەناو شارەكاندا چالاكی هەیە، چاپەمەنی باشور لەجیاتی ئەوەی سەرچاوەی راگەیاندنی گەریلا بەبنەما وەربگرێت زۆرتر گوێ لەسەرچاوەی دەوڵەتی تورك دەگرێت.  هەندێ راگەیاندن بەڕەوایەتی پارتی دەڵێن پەكەكە لەباكور چالاكی نییە، چالاكییەكانی راناگەیەنن، ئەوە بەپێچەوانەیە لەباكور شەڕ هەیە، ئەو هەموو ئۆپەراسیۆنەی لەباكور دەكرێت سوپای تورك خۆیان باسی دەكەن، ئێستا لەماردین و شڕناخ و ئاماد ئۆپەراسیۆن و پێكدادان هەیە، بۆچی ئەوە راناگەیەنێت، ئەگەر شەڕ نییە بۆچی هێندە سوپای تورك ئۆپەراسیۆن ئەنجام دەدات. وەزارەتی ناوخۆی توركیا خۆیان دەڵێن لەزستاندا هەزار ئۆپەراسیۆنمان ئەنجامداوە، گەریلا لەهەموو ناوچەكانی باكوری كوردستان چالاكی هەیەو بوونی هەیەو چالاكییەكانی كاریگەری گەورەی هەیە. بەڵام بۆ رای گشتی وا نیشانی دەدەن كەگەریلا لەباكور نەماوە. راگەیاندنی باشور، نابێت گوێ لەچەواشەكاری بگرن، بەڵكو پێویستە گوێ لەناوەندەكانی چاپەمەنی پاراستنی گەل(هەپەگە) بگرن، بۆ هەواڵ و زانیاری كە ڤیدیۆی چالاكییەكان بڵاودەكاتەوە، سوپای تورك كوژراوەكانیان باس ناكات یان دەڵێت كەسێك یان دووان كوژراون، بەڵام بۆ خۆتان دەزانن لەڤیدیۆی چالاكییەكانی گەریلا دەبینن چەند سەربازی تورك دەكوژرێن، لەباكوری كوردستان چالاكییەكانی گەریلا لەباشوری كوردستان كاریگەرترو زیاترە. دژوارترین شەڕ نەك تەنها لە زاپ و ئاڤاشین هەیە، بەڵكو دژوارترین شەڕ لەئیمراڵی بەڕێوە دەبرێت كە رێیبەر ئاپۆ لەژێر ئەشكەنجەو گۆشەگیری زۆر دژواردایە بەدەر لەهەموو پێوانەیەكی ئەخلاقی دەوڵەتی و یاسایی.   هاوڵاتى: ئەردۆغان مەرجی بۆ وڵاتانی سویدو فینلەندا داناوە بۆ بوون بە ئەندامی ناتۆ كە چالاكوانەكانی پارتی كرێكارانی كوردستانیان تەسلیم بكرێت؟ بۆچوونتان چییە لەسەر ئەوە؟ زاگرۆس هیوا: ئەردۆغان دەڵێت پەكەكەمان لەناوبرد، لەباكور نەماوە، لەفڵان شوێن لاوازمان كردن، بەڵام لەهەموو پەیوەندییە دبلۆماسییەكانیدا دژایەتی كوردو پەكەكە دەكات، ئەوەتا بڵێین، مەسەلەی فینلەنداو سوید كە دەیانەوێت ببنە ئەندامی ناتۆ، ئەردۆغان دەڵێت دەبێت فڵان كەسمان تەسلیم بكەن، هەتا هەندێ كەس كە پێنج شەش ساڵە لەژیاندا نەماوە داوای دەكات، ئەمە نیشانەی زیهنییەتی دژە كوردی ئەردۆغان پیشان دەدات. ئەردۆغان مردووەكانی كوردیشی پێ تەحەمول ناكرێت، بۆ نموونە دەتوانم پێتان بڵێم جۆن بۆڵتن كە راوێژكاری ئاسایشی نیشتمانی ئەمریكا بوو لەكابینەكەی دۆناڵد ترەمپ، ئێ نە ئەندامی ناوەندی پەكەكەیەو نە ئەندامی كۆنسەی پەكەكەیە، جۆن بۆڵتن یەكێك بوو لەئەساییەكانی ئەمریكا، باسی كردووە كە»لای ئەرۆغان باشترین كورد، ئەو كوردەیە كە  مردووە» كە كەسێكی ئاوا بۆخۆی سەلمێنەری ئەو راستییەیە كە ئەردۆغان چەند دژی كوردە، بۆچی هەندێك پارتی دەیانەوێت پاكانە بۆ ئەردۆغان بكەن. ئەو قسانەی ئەردۆغان دەڵێت" پەكەكەمان لەناوبردووە" خۆی بەدرۆدەخاتەوە كە "پەكەكەمان لەناو بردووەو تەنها لەباشوور ماون و ئەویش لەناو دەبەین"، بۆ هەر كۆبوونەوەیەك ئەردۆغان باس باسی پەكەكەیە، ئەوە نیشانەی بەربڵاوی خەباتی پەكەكەیە و رزگاریخوازی كوردە، بەڵكو لەهەموو جیهاندا.  بەدیاریكراوی ئەوانەی لەو وڵاتانەن ئەندامی پەكەكە نین، بەڵكو كوردن و خاوەن هەڵوێستن، بۆ ئەردۆغان هەموو ئەو كوردانە ئامانجن و پێی وایە پێویستە پاكتاو بكرێن و زیندانی بكرێن، پەكەكە بیت و پەكەكە نەبیت ئەردۆغان ئامانجییەتی كورد پاكتاو بكات. گەریلا چۆن لەشەڕی داعشدا پێشەنگ بووە ئێستاش گەریلا لەشەڕی بەرانبەر داگیركاری توركیادا پێشەنگە. ئەردۆغان و داعش هیچ جیاوازییەكیان نییەو ئەوە دوو خەلیفەكەی داعش بوو كاتێك لەژێر حیمایەی ئەردۆغان بوون لەئیدلیب، لای سوپای توركیا بوون ئەمریكا كوشتیانی، ئەوە گەورەترین سەلمێنەری ئەو راستیەیە كە ئەردۆغان و داعش دوانەی سیاسی و ئایدۆلۆژین، نابێت هەڵبخەڵەتێین كەتوركیا ئەندامی ناتۆیە، ئەردۆغان دژی هەموو گەلی كوردە.   هاوڵاتى: حەوت ساڵە گۆشەگیری لەسەر عەبدوڵا ئۆجەلانە، بۆچی؟ زاگرۆس هیوا: لەهەموو یاسایەكی ئینسانی و ئەخلاقی بەدەر لەهەموو یاسای نێودەوڵەتی بەتایبەت یاسای توركیا ئەوە لەنیسانی 2015وە تائێستا گۆشەگیری زۆر دژوار لەسەر ئۆجەلان پەیڕەو دەكرێت، ئەو گۆشەگیرییە هیچ یاسایەكی دونیا قبوڵی ناكات، زیندانی گوانتانامۆی ئەمریكا ترسناكترین زیندانییە، بەڵام زیندانی ئیمراڵی بەدەیان جار لەزیندانی گوانتانامۆ زیاترە، تەنانەت ئەو شتانەی لەئیمراڵی تاقیدەكرێنەوە دواتر لەزیندانی دیكە بەكاریدەهێنن، سیستمێكە یەكێتی ئەوروپاو ئەمریكاش لێی بەرپرسیارن كەیاسا نێودەوڵەتی و مافی مرۆڤ بنپێ دەكەن، ئەشكەنجە هەیە، بۆ ئەوەی دەنگی ئۆجەلان نەگات بەگەلەكەی، بۆ ئەوەی كە دەنگی كپ بكەن ئەوەش بەشێكە لەو شەڕە سەرتاسەرییەی كە دژی گەلی كورد راگەیەندراوە، دژوارترین شەڕ نەك تەنها لە زاپ و ئاڤاشین هەیە، بەڵكو دژوارترین شەڕ لەئیمراڵی بەڕێوە دەبرێت كە رێیبەر ئاپۆ لەژێر ئەشكەنجەو گۆشەگیری زۆر دژواردایە بەدەر لەهەموو پێوانەیەكی ئەخلاقی دەوڵەتی و یاسایی. هاوڵاتى: هەماهەنگی توركیاو داعش چۆن پێناسە دەكەن؟  زاگرۆس هیوا: گەریلا لەپێشەوەی ئەو داگیركارییەی سەر باشووری كوردستان خۆڕاگری دەكات، ئەو شەڕە هیچ جیاوازی نییە لەهێرشەكانی داعش بۆ سەر باشووری كوردستان، توركیا ویستی سەرەتا لەڕێگەی داعشەوە باشووری كوردستان داگیر بكات، گەریلا یەكەم هێز بوو كەچوو لەبەرانبەریاندا شەڕی كرد لەشەنگال و شوێنەكانی دیكە، گەریلاو شەڕڤان و پێشمەرگە هەموو پێكەوە شكستیان بەداعش هێنا. ئێستا توركیا لەباكوورەوە هێرش دەكات لەسنوری باكووری هەرێمی كوردستانەوە هێرش دەكات، هەمان هێرشن و بەشێكن لەپیلانێكی دژ بەكورد، شەڕی داعش بەشێكی ئەو پیلانە بوون، تەواوكاری هێرشی داعشەو هیچ جیاوازییەك نییە لەنێوان شەڕی توركیاو داعشدا بۆ سەر باشووری كوردستان، پێویستە لەو چوارچێوەیەدا پێناسە بكرێت، گەریلا چۆن لەشەڕی داعشدا پێشەنگ بووە ئێستاش گەریلا لەشەڕی بەرانبەر داگیركاری توركیادا پێشەنگە. ئەردۆغان و داعش هیچ جیاوازییەكیان نییەو ئەوە دوو خەلیفەكەی داعش بوو كاتێك لەژێر حیمایەی ئەردۆغان بوون لەئیدلیب، لای سوپای توركیا بوون ئەمریكا كوشتیانی، ئەوە گەورەترین سەلمێنەری ئەو راستیەیە كە ئەردۆغان و داعش دوانەی سیاسی و ئایدۆلۆژین، نابێت هەڵبخەڵەتێین كەتوركیا ئەندامی ناتۆیە، ئەردۆغان دژی هەموو گەلی كوردە. هاوڵاتى: پێتانوایە دەبێت لەباشووری كوردستان چی بكرێت بۆ دژایەتی كردنی ئۆپەراسیۆنەكەی سوپای ئەردۆغان؟   زاگرۆس هیوا: كاردانەوەكان پێویستە بەرانبەر ئۆپەراسیۆنەكان زۆرتربكرێت، گەل لەهەر چوار بەشی كوردستان پشتیوانی گەریلا بێت و گەریلا بەتەنیا نەمێنێتەوە، هێزو لایەنە سیاسییەكان هەڵوێستیان هەبێت، لەهەموو بەشەكانی كوردستان گەریلا پاڵپشتی بكرێت. گوایە وانیشان دراوە كە ئۆپەراسیۆن كۆتایی هاتووەو خولوسی ئاكار، وەزیری بەرگری توركیا وای راگەیاندووە، بەڵام بابزانن ئۆپەراسیۆنەكەیان كۆتایی نەهاتووە بەدژواری شەڕ بەردەوامەو پێویستە هەموو كەس ئەوە بزانێت سوپای تورك پاشەكشەی نەكردووەو بەردەوامە لەهەڵمەتی دگیركاری، بەڵام خۆڕاگری گەریلا لەبەرانبەریاندا بەردەوامەو خۆتان دەیبینن گەریلا زاپ و ئاڤاشین و خواكوڕك و كورەژارۆی بۆ سوپای تورك كردووە بەدۆزەخ، بانگەوازی ئێمە بۆ هەموو چین و تووێژەكان رۆژنامەنووسان و نووسەران و رۆشنبیران و حزبە سیاسییەكان و مامۆستایانی ئاینی ئەوەیە بەهەڵوێستەكانیان دژی سوپای تورك و ئۆپەراسیۆنەكانیان بوەستنەوە