هەسەدە: وەك هێزێكی بنەڕەتی دەمێنینەوە بۆ پارێزگاریكردن لە گەلەكەمان

 لەچوارچێوەى قۆناغى یەکەمى ئاگربەست و ئازادکردنى بارمتەکان، بڕیارە ئەمڕۆ حکومەتى ئیسرائیل لەچەند شوێنێکى جیاواز  هەزار و ٧١٦ فەلەستینی ئازادبکات. پرۆسەی ئاڵوگۆڕی بارمتە و زیندانییەکان لە نێوان حەماس و ئیسرائیلدا بەردەوامە، لەگەڵ رادەستکردنی حەوت بارمتەی دیکە لەلایەن حەماسەوە. هاوکات، لێدوان و هەڕەشەی دژبەیەک لەلایەن هەردوو لاوە، داهاتووی ئاگربەستەکەی خستووەتە ژێر پرسیارەوە. بەپێى ڕاپۆرتێکى ئاژانسى ڕۆیتەرز، ٢٥٠ فەلەستینی کە لە زیندانەکانی ئیسرائیلدا سزای هەتاهەتایییان بەسەردا سەپێنراوە، لە کەرتی ڕۆژئاوا و قودس و دەرەوەی وڵات ئازاد دەکرێن.  پاسەکان بە یاوەریی کارمەندانی خاچی سوور دەستیان بە جووڵە کردووە بۆ گواستنەوەی ئەو زیندانییە فەلەستینیانەی کە لەلایەن ئیسرائیلەوە دەستبەسەرکراون و ئازاد دەکرێن. بزووتنەوەی حەماس حەوت بارمتەی دیکەی زیندووی رادەستی خاچی سوور کرد. میدیاکانی ئیسرائیلیش پشتڕاستیانکردەوە کە سوپا ئەو بارمتانەی وەرگرتووەتەوە. لە دیمەنێکدا ، دۆناڵد ترەمپ، سەرۆکی ئەمریکا، لەنێو فڕۆکەکەیەوە راستەوخۆ سەیری پرۆسەکەی کردووە. سەرباری رێککەوتنی ئاگربەست، وەزیری بەرگریی ئیسرائیل جەختی لەسەر ئامانجە سەربازییەکانیان کردەوە و رایگەیاند، "حەماس لە چەک دادەماڵین و تونێلەکانی غەززە لەناو دەبەین." لێدوانەکەی ئیسرائیل لە کاتێکدایە کە بزووتنەوەی حەماس رێککەوتنەکە بە سەرکەوتنی خۆی دەزانێت و دەڵێت، "ئیسرائیل نەیتوانی بە هێز بارمتەکان ئازادبکات و ناچاربوو رێککەوتن بکات."

دواى ڕادەستکردنى یەکەم گروپى بارمتەکان، بزوتنەوەى حەماس ڕایگەیاند ئێمە هەموو هەوڵێکمان خستووەتەگەڕ بۆ پاراستنی دیلەکانی داگیرکەر لە کاتێکدا دوژمن قێزەونترین تاوان بەرامبەر بە دیلەکانمان ئەنجام دەدات. میدیاکانی ئیسرائیل بڵاویانکردەوە، پرۆسەی ئازادکردنی ئەو بارمتە ئیسرائیلییانەی لە غەززەن، دەستیپێکردوەو کەتیبەکانی عیززەدین قەسامیش ناوی ئەو 20 بارمتە ئیسرائیلییەی بڵاوکردەوە کە ئەمڕۆ ئازادیان دەکات. خاچی سووریش دەڵێت، 7 بارمتەی ئیسرائیلیان رادەست کراوە. کاروانی ئۆتۆمبێلەکانی خاچی سوور گەیشتنە غەززە بۆ وەرگرتنی بارمتەکان لە حەماس کە ئەمڕۆ ئازاد دەکرێن. حەماس ناوی 20 بارمتەی زیندووی ئاشکرا کردووە و ئەمڕۆ رادەستیان دەکاتەوە. ئیسرائیلیش دەستی بە ئامادەکاری کردووە بۆ ئازادکردنی نزیکەی دوو هەزار بەندکراوی فەلەستینی. بەرەبەیانى ئەمرۆ دووشەممە بزووتنەوەی ئیسلامی (حەماس) بەیاننامەیەکى بڵاوکردەو تیایدا دەڵێت: داگیرکەری نەیتوانی بە زۆر دیلەکانی ئازاد بکات و ناچار بوو ملکەچی مەرجەکانی بەرخۆدان و گرێبەستی ئاڵوگۆڕکردن بێت. هەروەها ئەوەش دەخاتەڕووو کە ئەوان ئێمە هەموو هەوڵێکمان خستووەتەگەڕ بۆ پاراستنی دیلەکانی داگیرکەر لە کاتێکدا دوژمن قێزەونترین تاوان بەرامبەر بە زیندانییەکانمان ئەنجام دەدات. هەر لەو بەیاننامەیەدا حەماس دەڵێن: پرسی زیندانیان تا ئەوکاتەی دوایین زیندانی ئازاد دەکرێت، لە پێشینەی کارەکانمان دەمێنێتەوە.

تێكەڵكردنی هێزەكانی سوریای دیموكرات بە سێ فیرقەو چەند لیوایەکی سەربازیی سوپا دەستپێدەكات بۆ ناو سوپای سوریا، کە لە حەسەکەو رەققە و دەیرزور بڵاوبونەتەوە، هێزەکانی ئاسایشی ناوخۆ تێکەڵ بەوەزارەتی ناوخۆی سوریا دەکرێت، هەسەدە پۆستی فەرماندەی فیرقەو هێزە ئەمنیەكانی لەدەستدا دەمێنێتەوەو بە تەواوبوونی پڕۆسەی یەکخستنیش، هێزێک نامێنێت بە ناوی (هەسەدە)، ئەو هێزانە ناوی ئەو فیرقە سەربازیی و هێزە ئەمنییانە هەڵدەگرن کە لەلایەن حکومەتی سوریاوە پەسەندکراون. سەرچاوەیەکی ئاگادار بۆ ماڵپەڕی تەلەفزیۆنی سوریا وردەکاری ئەو لێکتێگەیشتنانەی ئاشکرا کردووە کە لە نێوان حکومەتی سوریا و شاندێکی هێزەکانی سوریای دیموکرات (هەسەدە) ئەنجامدراوە، لەمیانی کۆبونەوەكەی رۆژی دووشەممەی رابردوو كە لە دیمەشق بەڕێوەچوو. بەگوێرەی ئەو سەرچاوەیە، لە دیدارەکەی دیمەشقدا، ئەحمەد شەرع، سەرۆکی سوریاو مەزڵوم عەبدی، فەرماندەی هێزەکانی سوریای دیموکرات، تۆم باراک، نێردەی تایبەتی ئەمریکا بۆ سوریاو، ئەدمیراڵ براد کوپەر، فەرماندەی فەرماندەیی ناوەندی ئەمریکا، ئامادەی بوون. دواتر دیدارێکی دیکە لە نێوان شاندی هەسەدەو، مورهەف ئەبو قەسرە، وەزیری بەرگری و حسێن سەلامە، سەرۆکی دەزگای هەواڵگری گشتی بەڕێوەچوو. ئەو سەرچاوەیە روونی کردووەتەوە: لێکتێگەیشتنەکانی نێوان ئەو دوو لایەنە بە نێوەندگیری ئەمەریکا بووەو رێككەوتون لەسەر ئەوەی تێكەڵكردنی هێزەكانی سوریای دیموكرات لەڕێی تێکەڵکردنی سێ فیرقە و چەند لیوایەکی سەربازیی سوپای هەسەدەوە بێت بۆ ناو سوپا، کە لە حەسەکەو رەققە و دەیرزور بڵاوبونەتەوە. بەگوێرەی ئەو سەرچاوەیە، هێزەکانی ئاسایشی ناوخۆ (ئاسایش)یش تێکەڵ بە هێزەکانی ئاسایشی وەزارەتی ناوخۆی سوریا دەکرێت.  ئاماژەی بەوەشداوە: هەسەدە پۆستی فەرماندەی فیرقەو هێزە ئەمنیەكانی لەدەستدا دەمێنێتەوە لە ناوچەکانی باکورو رۆژهەڵاتی سوریا، هاوشانی دامەزراندنی بەرپرس لەلایەن حکومەتی سوریاوە بە سازان، بەمەرجێک لە دانیشتوی ناوچەکە بن. بە تەواوبوونی پڕۆسەی یەکخستن، چیتر هێزێک نامێنێت بە ناوی هێزەکانی سوریای دیموکرات (هەسەدە) یان ئاسایش، ئەو هێزانە ناوی ئەو فیرقە سەربازیی و هێزە ئەمنییانە هەڵدەگرن کە لەلایەن حکومەتی سوریاوە پەسەندکراون. عەبدی و شەرع رێککەوتون لەسەر پێکهێنانی لیژنەی هاوبەش بۆ کارکردن لەسەر جێبەجێکردنی پرۆسەی یەکگرتنەوە هێزە سەربازی و ئەمنییەکان لە ماوەیەكی كورتدا. سەرچاوەکە راشیگەیاندووە: لێکتێگەیشتنەکانی نێوان سوریاو ئەمریکا بووەتە هۆی رەزامەندی حکومەتی سوریا بۆ پەیوەستبوون بە هاوپەیمانی نێودەوڵەتی دژی داعش. وتوشیەتی: سوپاو هێزە ئەمنییەکانی سوریا بە هەماهەنگی لەگەڵ هێزەکانی ئەمریکاو هاوپەیمانی نێودەوڵەتی، سەرکردایەتی ئۆپەراسیۆنەکانی دژی داعش لە سوریا دەکەن، دوای تەواوبونی یەکگرتنەوە لەگەڵ هێزەکانی سوریای دیموکرات.

ڕۆژنامەی وۆڵ ستریت جۆرناڵى ئەمریکى لەڕاپۆرتێکدا ئەوەى خستوەتەڕوو  حەماس بە ناوبژیوانان و ئیسرائیلی ڕاگەیاندووە،   ٢٠ بارمتە زیندوون ئەمشەو لەچەند جێگەیەکى جیاواز دەستدەکات بە ئازادکردنیان، سەبارەت بە تەرمى بارمتە مردووەکانیش ئەوەیان خستوەتەڕوو کە شوێنی هەندێک لە بارمتە کوژراوەکان نازانن. وەک بەشێک لە قۆناخی یەکەمی رێککەوتنەکە، حەماس 20 بارمتە دەگەڕێنێتەوە کە هێشتا لە ژیاندا ماون. لە بەرامبەر ئەوەشدا، ئیسرائیل دوو هەزار بەندکراوی فەلەستینی ئازاد دەکات.    ئوسامە حەمدان، بەرپرسی حەماس رۆژی شەممە لە چاوپێکەوتنێکدا  دەڵێت: بەپێی رێککەوتنە واژۆکراوەکە، بڕیارە ئاڵوگۆڕی زیندانییەکان بەیانیی رۆژی دووشەممە وەک رێککەوتنی لەسەر کراوە دەستپێبکات".   سەرۆکایەتیی میسر رایگەیاند، دوانیوەڕۆی رۆژی دووشەممە، ترەمپ و عەبدولفەتاح سیسی، سەرۆکی میسر، لە هاوینەهەواری شەرم شێخ لەسەر دەریای سوور، سەرپەرشتیی لووتکەی زیاتر لە 20 وڵات دەکەن. ڕۆژنامەى وۆڵ ستریت جۆرناڵى ئەمریکى لەڕاپۆرتەکەدا ئاماژەی بەوەشکردووە، حەماس بە ناوبژیوانان و ئیسرائیلی ڕاگەیاندووە، شوێنی هەندێک لە بارمتە کوژراوەکان نازانێت، ڕەنگە بەزەحمەت ئەو خشتەیەی 72 کاتژمێری بۆ گواستنەوەی تەرمەکان جێبەجێ بکات. هەروەها ئیسرائیل پێی وایە دیاریکردنی شوێنی تەرمەکان کاتێکی زیاتری دەوێت. بە وتەی یەکێک لە بەرپرسە باڵاکانی ئیسرائیل کە قسەی لەگەڵ کەناڵى N12 کردووە، گەڕانەوەی بارمتەکان هەوڵێک نییە لەلایەن حەماسەوە بۆ وەستان بۆ ماوەیەک، بەڵکو ئامادەکارییەکی ڕاستەقینەیە لەلایەن ئەو ڕێکخراوە تیرۆریستییە، بەتایبەتی لە چوارچێوەی دیاریکردنی شوێنی بارمتە کوژراوەکان. هەمان بەرپرس ڕوونی دەکاتەوە کە ئەمە ئۆپەراسیۆنێکی "گەورە"یە، لە ژێر نادڵنیایییەکی زۆردایە. بە وتەی ئەو، هەموو خشتە کاتییەکان بۆ ئیسرائیل ڕوون نین. مەزەندە دەکرێت کە قودس تەنها چەند کاتژمێرێک پێش گەڕانەوەی ڕاستەقینەیان زانیبێتی کەی بارمتەکان ئازاد دەکرێن. بەپێی یەکێک لەو سیناریۆیانەی کە لەبەرچاو دەگیرێن، بارمتەکان لە چەند خاڵێکەوە لە یەک کاتدا دەڕۆن. بەڵام ئەگەری ئەوە هەیە کە هەموو بارمتە زیندووەکان بگەنە هەمان خاڵی کۆبوونەوە، ئەمەش هاوتایە لەگەڵ ڕێککەوتنی نێوان لایەنەکان بۆ وەرگرتنی هەموو بارمتەکان بە یەکجار .  خاچی سوور کە شەوی ڕابردوو سەرۆکی وەفدەکەی بانگەوازێکی هەماهەنگی ئەنجامدا لەگەڵ ڕێکخەری زیندانییەکان و بێسەروشوێنەکان، گال هیرش، ئامادەیە بە نێوان ٦ بۆ ٨ ئۆتۆمبێلەوە بگاتە خاڵی کۆبوونەوەکە بۆ کۆکردنەوەی بارمتەکانى لاى حەماس. 

یسرائیل کاتز، وەزیری بەرگری ئیسرائیل، رایگەیاند کە گەورەترین ئاستەنگی بەردەم ئیسرائیل دوای قۆناغی گەڕاندنەوەی بارمتەکان، وێرانکردنی تەواوی تونێلە تیرۆریستییەکانی حەماسە لە غەززە. بەپێی پلانی ترەمپ، لەگەڵ کشانەوەی قۆناخ بە قۆناخی ئیسرائیل لە شارەکانی غەززە، هێزێکی فرەنەتەوە لە میسر، قەتەر، تورکیا و ئیمارات جێگەی دەگرێتەوە، کە لەلایەن ناوەندێکی فەرماندەیی بە سەرکردایەتیی ئەمریکاوە لە ئیسرائیل هاوئاهەنگیی بۆ دەکرێت. کاتز ئاماژەی بەوەدا کە ئەم کارە بە شێوەیەکی راستەوخۆ لەلایەن سوپای ئیسرائیلەوە ئەنجام دەدرێت، هەروەها لە رێگەی میکانیزمێکی نێودەوڵەتییەوە کە بە سەرۆکایەتی و چاودێری ئەمریکا دادەمەزرێت. وەزیری بەرگری ئیسرائیل جەختی لەوە کردەوە کە ئەمە واتای سەرەکی جێبەجێکردنی بنەمای بێچەککردنی غەززە و پووچەڵکردنەوەی چەکەکانی حەماسە. کاتز راشیگەیاند: "رێنماییم بە سوپای ئیسرائیل کردووە بۆ ئەوەی خۆیان بۆ جێبەجێکردنی ئەو ئەرکە ئامادە بکەن." ئەمەش لەکاتێکدایە بەرپرسێکی باڵای بزووتنەوەی حەماس رایگەیاند، بزووتنەوەکە بەیانیی رۆژی دووشەممە دەست بە ئازادکردنی ئەو بارمتە ئیسرائیلییانە دەکات، کە لە غەززە دەستبەسەرن، ئەمەش پێش ئەوەی دۆناڵد ترەمپ، سەرۆکی ئەمریکا سەرپەرشتیی لووتکەیەکی نێودەوڵەتی لەبارەی پلانی ئاشتییەکەی بۆ ناوچەکە لە میسر بکات. وەک بەشێک لە قۆناخی یەکەمی رێککەوتنەکە، حەماس 20 بارمتە دەگەڕێنێتەوە کە هێشتا لە ژیاندا ماون. لە بەرامبەر ئەوەشدا، ئیسرائیل دوو هەزار بەندکراوی فەلەستینی ئازاد دەکات.  ئوسامە حەمدان، بەرپرسی حەماس رۆژی شەممە لە چاوپێکەوتنێکدا بە ئاژانسی فرانس پرێسی گوت: "بەپێی رێککەوتنە واژۆکراوەکە، بڕیارە ئاڵوگۆڕی زیندانییەکان بەیانیی رۆژی دووشەممە وەک رێککەوتنی لەسەر کراوە دەستپێبکات". سەرۆکایەتیی میسر رایگەیاند، دوانیوەڕۆی رۆژی دووشەممە، ترەمپ و عەبدولفەتاح سیسی، سەرۆکی میسر، لە هاوینەهەواری شەرم شێخ لەسەر دەریای سوور، سەرپەرشتیی لووتکەی زیاتر لە 20 وڵات دەکەن.   رۆژی شەممە، ئەدمیراڵ براد کووپەر، فەرماندەی فەرماندەیی ناوەندیی ئەمریکا (سێنتکۆم)، ستیڤ ویتکۆف، نێردەی ترەمپ بۆ رۆژهەڵاتی نێوەڕاست و جەیرید کوشنەر، زاوای ترەمپ، سەردانی غەززەیان کرد.

عەباس عێراقچی، وەزیری دەرەوەی ئێران دڵێت: کۆماری ئیسلامی ئێران ناچێتە ناو ڕێککەوتننامەی "ئیبراهیم"ـەوە. لە چاوپێکەوتنی تەلەفزیۆنیدا شەوی شەممە عەباس عێراقچی، ئاماژەی بە قسەکانی مانگی ڕابردووی دۆناڵد ترەمپ دا کە ڕایگەیاند: لەوانەیە ئێرانیش بەشداری لە ڕێککەوتننامەی "ئیبراهیمی" بکات و پەیوەندییەکانی لەگەڵ ئیسرائیل ئاسایی بکاتەوە"، گوتی هیچ کات بەشداری لەو ڕێککەوتننامەیە ناکەین. عەباس عێراقچی، وەزیری دەرەوەی ئێران ڕایگەیاند: دۆناڵد ترەمپ، هەمیشە ئەو شتانەی کە حەزی لێیە بە شێوەی جۆراوجۆر دەردەبڕێت بۆیە لەخۆیەوە قسەی کردووە کە گوتویەتی ئێران پەیوەندییەکانی لەگەڵ ئیسرائیل ئاسایی دەکاتەوە و بەشداری ڕێککەوتنامەی ئیبراهیم دەکات. بەڵام ئەوە قسەیەکە ترەمپ کردوویەتی بۆیە هیچ کات وا نابێت و بەشدار نابین، هەروەها گوتی تەنانەت کۆماری ئیسلامی ئێران متمانەی به ئیسرائیل نییه لەبارەی ئاگربەستی غەززەشەوە. ڕێککەوتننامەی "ئیبراهیم" لە ساڵی 2020 بە ناوبژیوانی ویلایەتە یەکگرتووەکانی ئەمریکا لە نێوان ئیسرائیل و چەند وڵاتێکی عەرەبی " سەرەتا ئیمارات و بەحرەین و دواتر مەغریب و سودان" واژۆ کراوە، ئامانجی فەرمی ئەم پەیماننامەیە ئاساییکردنەوەی پەیوەندییە دیپلۆماسی و ئابووری و ئەمنییەکانی نێوان ئەو وڵاتانە و ئیسرائیلە. بە واتایەکی تر ئەو وڵاتانەی پێشتر دانیان بە ئیسرائیلدا نەناوە. دەربارەی دانوستانی ئێران و ئەمریکا عێراقچی ڕایگەیاند: ئێمە هیچ پەیامێکمان بۆ ئەمریکا نەناردووە و هیچ دانوستانێکیش تا ئەم ساتە لە ئارادا نییە.

سەرۆک وەزیرانی عێراق، بڕیاری داوە لیژنەیەکی باڵای نیشتیمانی دروست بکرێت سەبارەت بە سزاکانی گەنجینەی ئەمریکا کە بەسەر چەند کۆمپانیا و دامەزراوەی جیاواز سەپاندوویەتی. ئەمڕۆ شەممە 11ی تشرینی یەکەمی 2025، باسم عەوادی، وتەبێژی فەرمی حکومەتی عێراق رایگەیاند، "حکومەتی عێراق لە نزیکەوە بەدواداچوون بۆ بڕیارەکانی ئەم دواییەی گەنجینەی ئەمریکا دەکات سەبارەت بە سەپاندنی سزاکانی ئەمریکا بەسەر کۆمپانیای ئەندازیاری گشتی و هەندێک قەوارەی دیکە، بە بیانووی پەیوەندیکردنیان لەگەڵ ئەو لایەنانەی کە دژ بە بەرژەوەندییەکانی ئەمریکان". ئاماژەی بەوكرد، "محەمەد شیاع سودانی، سەرۆک وەزیرانی عێراق بڕیاریداوە بە پێکهێنانی لیژنەیەکی باڵای نیشتمانی کە پێکهاتبێت لە نوێنەرانی وەزارەتی دارایی، دەستەی باڵای وردبینی، کۆمیسیۆنی دەستپاکی، و بانکی ناوەندی، بۆ پێداچوونەوە بە دۆسیەی پەیوەندیدار و پێشکەشکردنی ڕاپۆرت و ڕاسپاردەکانی لە ماوەی 30 رۆژدا، لەوانە رێکاری یاسایی و کارگێڕی پێویست لە دژی ئەو سزایانە". عەوادی وتی، "عێراق پابەندە بە سەرجەم ئەو رێککەوتن و یاداشتنامە نێودەوڵەتیانەی واژۆیکردووە بە نیگەرانە بەرامبەر بەو سزایانی سەپێندراوە و داوایان لە نوێنەرانی نێودەوڵەتی کردووە کە پاڵپشتی عێراق بکەن". ئەمەش لەکاتێکدایە، لە چەند رۆژی رابردوودا وەزارەتی گەنجینەی ئەمریكا كۆمەڵێك سزای سەپاند بەسەر كەسایەتیی بانكی و كۆمپانیا عێراقییەكانی پەیوەست بە سوپای پاسدارانی ئێرانی و كەتیبەكانی حزبوڵا لەوانە كۆمپانیای موهەندس كە باڵی ئابووری حەشدی شەعبییە.  

سەرکردەیەکى بزووتنەوەى حەماس ئەوەى دووپاتکردەوە کە ئەوان بەشێوەى ڕاستەوخۆو هیچ نوێنەرێکیان لە پرۆسەی واژۆکردنى رێککەوتنەکە لەمیسر بەشدار نابێت، تەنها نێوەندگیرەکان و  بەرپرسانی ئەمریکی و ئیسرائیلی هەندێک لە وڵاتانى دیکە بەشدار دەبن. لە دووەم ڕۆژی ئاگربەست لە کەرتی غەززە ، لەکاتێکدا غەززییەکان بەردەوام بوون لەگەرانەوە بۆ ماڵە ڕووخاوەکانیان لە باشوورەوە بۆ باکووری شارەکە حەماس ڕایگەیاند کە بەشداری لە مەراسیمی واژۆکردنی ڕێککەوتنەکەدا ناکات کە بڕیارە لەڕۆژى دووشەمەى داهاتوو لە میسر ئەنجام بدرێت. حوسام بەدران، سەرکردە لە مەکتەبی سیاسی بزووتنەوەکە لە چاوپێکەوتنێکدا وتی: حەماس لە پرۆسەی واژۆکردندا بەشدار نابێت، تەنها نێوەندگیری و بەرپرسانی ئەمریکی و ئیسرائیلی بەشدار دەبن. هەروەها ئاماژەی بەوەشکرد، بزوتنەوەی حەماس وەڵامی هەر دەستدرێژییەکی ئیسرائیل دەداتەوە، ئەگەر جەنگ دەستپێبکاتەوە. بەدران پێشبینی دەکرد قۆناغی دووەمی دانوستانەکان لەگەڵ ئیسرائیل "سەختتر و ئاڵۆزتر" بێت. هەروەها باسی دوورخستنەوەی سەرکردەکانی بزووتنەوەی حەماس لە غەززە بە شتێکی بێمانا زانی. لەلایەکى دیکەوە، شەممە 11ـی تشرینی یەکەمی 2025، کۆشکی سەرۆکایەتیی فەرەنسا (ئەلیزێ)، لە ڕاگەیەنراوێکدا ئاماژەی بەوە دا، ڕۆژی دووشەممەی داهاتوو، ئیمانوێل ماکرۆن، سەرۆکی فەرەنسا سەردانی میسر دەکات. کۆشکی ئەلیزێ، هۆکاری سەردانەکەی ماکرۆنی ڕوون کردەوە و گوتی: ماکرۆن لە میسر، مەبەستیه‌تی پشتگیری لە جێبەجێکردنی ڕێککەوتنی ئاگربەستی نێوان ئیسرائیل و حەماس بکات. بە پێی ڕاگەیەنراوەکە، ماکرۆن لە سەردانەکەیدا هەنگاوەکانی داهاتوو لەگەڵ هاوبەشە ناوچەییەکان، سەبارەت بە جێبەجێکردنی پلانی ئاشتی لە کەرتی غەززە تاوتوێ دەکات.

ئەحمەد تورک لە کۆنفرانسێکدا لە مێردین قسەی کرد و ڕایگەیاند کە ڕۆژئاوا هێڵی سوورە بۆ کورد و بۆ تورکیا باشترە کوردان بە دراوسێی خۆی پەسەند بکات نەک هەتەشە. لە مێردین، دەستپێشخەریی یەکێتی دیموکراتیک، "کۆنفرانسی پێکەوە ژیانی گەلان، بیروباوەڕەکان و دیموکراتیکی میزۆپۆتامیا" بەرێوە برد. خەڵکێکی زۆر لە ئایین و گەلە جیاوازەکانەوە بەشدارییان لە کۆنفرانسەکەدا کرد. لە کۆنفرانسەکەدا جەخت لەسەر داوای چارەسەری دیموکراتیک و پێکەوە ژیانی گەلان کرایەوە. گوڵجان کاچماز سەیگیت، هاووتەبێژی دەستپێشخەری یەکێتی دیموکراتیک لە سەرەتای کۆنفرانسەکەدا قسەی کرد و ڕایگەیاند؛ بانگەوازی ڕێبەر ئاپۆ بۆ ئاشتی و کۆمەڵگەی دیموکراتیک مۆدێلێکی نوێی ژیانە بۆسەرجەم گەلانی ڕۆژهەڵاتی ناوەڕاست. سایگیت وتی: "بە کۆمەڵگەی دیموکراتیک، ژیانێکی نوێ بنیات دەنێین."  هەروەها محەمەد کاماچ، هاووتەبێژی دیکە، ئاماژەی بەوەدا کە گەلانی ناوچەکە بە درێژایی مێژوو بەهۆی ناسنامەیانەوە ڕووبەڕووی گوشارەکان بوونەتەوە و ڕایگەیاند: "ئێمە بەرگری لە پێکەوەژیان دەکەین، ئەم دەستپێشخەرییە فراوانتر دەبێت و دەبێتە کۆنگرەیەکی نەتەوەیی." ئەحمەد تورک، هاوسەرۆکی شارەوانی شاری گەورەی مێردین کە لە پۆستەکەی دوورخرایەوە و لە شوێنیدا قەیوم دانرا، ڕایگەیاند، سیاسەتی دیموکراتیک بەهێزتر دەبێت و وتی: "گەیشتن بە کۆمارێکی دیموکراتیک بە هەوڵی هاوبەشی گەلان دەکرێت." ئەحمەد تورک جەختی لەوە شکردەوە کە پێویستە لایەنە سیاسییەکان و کۆمەڵگەی مەدەنی بۆ داهاتووی گەلی کوردستان، پێکەوە هەنگاو بنێن. هەروەها تورک ئاماژەی بە پێشهاتەکانی سووریا کرد و وەبیری هێنایەوە کە کورد بۆ دەستەبەرکردنی ئاسایش و ئەمنیەتی خۆی پەنای بۆ چەک برد و وتی: "ئێستا داوا لە کورد دەکرێت چەکەکانیان دابنێن. بەتایبەت تورکیا. کەواتە، کێ لێرە ئاسایش و ئەمنیەت دابین دەکات؟ هەتەشە هیچ پۆلیسێکی نییە، هیچ سوپایەکی نییە. هەتەشە لەوێ هیچ دەسەڵاتێکی نییە لە ڕاستیدا. کەواتە کێ ئاسایش و ئارامی بۆ کورد دابین دەکات؟ جگە لەوە لەبری ئەوەی هەتەشە دراوسێی تورکیا بێت، با کورد بێت، ئایا جیهان کۆتایی دێت؟" ئەحمەد تورک بە جەخت کردنەوە لەوەی کە ڕۆژئاوا هێڵی سوورە بۆ کورد وتی: "ئەمڕۆ لە سەروبەندی دەرفەتێکی مێژوویین، ئەگەر نەمانتوانی هەڵسەنگاندن بۆ ئەم دەرفەتە مێژووییە بکەین، ڕۆژانی تاریک بۆ داهاتووی منداڵەکانمان بەجێدەهێڵین، لەم بارەیەوە بانگەوازی لە هەموو لایەک دەکەم، پێویست ناکات کەس خۆی تووشی سەرلێشێواوی بکات، تەنها بەسە دەستی کوردان بگرن و لە گەڵیان بکەونە پەیوەندییەوە." کۆنفرانسەکە بە پانێڵ و پێشکەشکردنەکانی نوێنەری گەلە جیاوازەکان بەردەوامە.

سەرۆکی یەکێتی کۆمپانیاکانی فڕۆکەوانی و گەشتیاری، لابردنی ئابڵوقەی تورکیا بەسەر ئاسمانی سلێمانی کاریگەری تەواو لە شارەکە دروست دەکات و دەبێتە بوژانەوەی ئابوری . عەتا ئەنوەر سەرۆکی یەکێتی کۆمپانیاکانی فڕۆکەوانی و گەشتیاری لە میانی بەشداریکردنی لە بەرنامەی دەنگی گۆڕاندا رایگەیاند، کردنەوەی ئاسمانی تورکیا بە ڕوی گەشتە ئاسمانییەکانی فڕۆکەخانەی سلێمانی کاریگەری لەسەر شارەکە دروست دەکات لە ڕوی گەستیارییەوەو دەشبێتە بوژانەوەی ئابوری ، دەشڵێت، ماوەی سێ هەفتە بۆ چوار هەفتەی پێویستە تابتوانرێت گەشتەکان دەستپێبکرێت  ئاماژەی بەوەشکردوە، بەهۆی ڕاگرتنی گەشتەکان  کۆمپانیاکان زەرەرو زیانێکی زۆریان بەرکەتوە بەڵام نەبۆتە هۆی داخستنی دەربارەی ژمارەی کۆمپانیا و نوسینگە ، سەرۆکی یەکێتی کۆمپانیاکانی فڕۆکەوانی و گەشتیاری دەلێت، لە سلێمانی ودەوروبەری 200 کۆمپانیا ونوسینگەو بریکاری گەشتیاری  بە پێی ئەو سیستەمانەی هەیە بۆ وڵاتی تورکیا  کە کاردەکەن ، نزیکەی 70 کۆمپانیا کاری تەواویان تەنها لەسەر تورکیا بوە لەبارەی ڤیزاش ئاماژەی بەوەشکردوە ، وڵاتی تورکیا ڤیزای پێویستە لە تەمەن 15 ساڵ تاوەکو 50 ساڵ و لە ئێستادا وەرگرتنی ڤیزا بەراورد بە ساڵانی رابردو  زۆر باشترە و ڕەفزبونەوەی ڤیزا کەمترە .

بەگوێرەى میدیاکانى یەکێتى، بڕیارە دوانیوەڕۆی ئەمڕۆ شەممە، 11-10-2025، بافڵ جەلال تاڵەبانی، سەرۆکی یەکێتیی نیشتمانیی کوردستان، سەردانی بەغداد بکات و لەگەڵ محەممەد شیاع سوودانی، سەرۆکوەزیرانی عێراق و ژمارەیەک بەرپرسی باڵا کۆببێتەوە، بە مەبەستی تاوتوێکردنی پرسی مووچە و جێبەجێکردنی رێککەوتنی نەوتی. سەرۆکی یەکێتیی نیشتمانیی کوردستان دەگاتە بەغداد و راستەوخۆ لەگەڵ محەممەد شیاع سوودانی، سەرۆکوەزیرانی عێراق کۆدەبێتەوە بۆ گفتوگۆکردن لەسەر کۆمەڵێک پرسی گرنگی نێوان هەولێر و بەغداد. بەپێی زانیارییەکان، ئامانجێکی سەرەکیی سەردانەکەی بافڵ جەلال تاڵەبانی، کە بە ئەندازیاری رێککەوتنی نەوتیی نێوان هەولێر و بەغداد دادەنرێت، بریتییە لە چاودێریکردنی جێبەجێکردنی رێککەوتنەکە و لابردنی سەرجەم ئاستەنگەکان لە بەردەمیدا، بە ئامانجی زیاتر لێک نزیککردنەوەی هەردوو حکومەت. هەر بەپێی زانیارییەکان، سەرۆکی یەکێتی لە کۆبوونەوەیدا لەگەڵ سوودانی، داوای ناردنی بەپەلەی مووچەی مووچەخۆرانی هەرێمی کوردستان دەکات. هەروەها داوا دەکات کە پرۆسەی دابەشکردنی مووچە رێکبخرێتەوە، بە جۆرێک کە مووچەخۆرانی هەرێم و عێراق پێکەوە و لە یەک کاتدا مووچەکانیان وەربگرن. جگە لە سەرۆکوەزیرانی عێراق، بڕیارە لەم سەردانەیدا بافڵ جەلال تاڵەبانی چاوی بە ژمارەیەک بەرپرسی باڵای حیزبی و حکومیی دیکە لە بەغداد بکەوێت.

دانیشتوانی شاری غەززە لەکاتی گەڕانەوەیان بۆ پشکنینی ماڵەکانیان کە بەهۆی بۆردومانی ئیسرائیلەوە وێران بوون، تووشی شۆک بوون: "ناتوانین ماڵەکانمان بناسینەوە و شەقامەکان هێماکانی خۆیان لەدەستداوە". هەر لەو ساتەوەی کە سوپای ئیسرائیل ئاگربەستی لە کەرتی غەززە ڕاگەیاند، دواى زیاتر لە دووساڵ هەزاران ئاوارە لە باشوورەوە بەرەو باکوور گەرانەوەو پشکنینیان بۆ ئەوەی لە ماڵەکانیان مابووەوە، کە لە داروپەردوودا کورتکرابووەوە. تەنانەت هەندێکیان بە پێ شەقامی ڕەشیدیان تێپەڕاندووە، گەشتێک کە لە دوو ساڵی ڕابردوودا پێی ڕاهاتوون. بەگوێرەی ئاژانسەکانى هەواڵ  هەندێکی دیکەش  لەهاوڵاتیانى غەززە گەڕاونەتەوە بۆ وێرانەکانی ماڵەکانیان لە خان یونس لە باشوور. هەموو دانیشتوانی باکووری غەززە ئاوارە بوون لە دوای هێرشی حەماس لە ٧ی تشرینی یەکەمی ٢٠٢٣ کە بووە هۆی شەڕی ئیسرائیل لەو ناوچەیە و لە ماوەی دوو ساڵی ڕابردوودا ناوچەکە بۆ داروپەردوو بچووک بووەتەوە. گرتە ڤیدیۆییە ئاسمانییەکان بەشێکی بەرفراوانی زەوی نیشان دەدەن کە جگە لە وێرانە هیچی تریان نییە. ژێرخانی نییە و کارەبا و ئاوی خواردنەوە نییە. ئەحمەد ئەبو وەتفا دەڵێت: "دوعا دەکەم خوای گەورە خەم و ناڕەحەتیمان لابدات و خەڵک بگەڕێنەوە سەر ماڵ و حاڵی خۆیان، ئەگەر خانووەکانیش وێران بکرێن، ان شاءاللە دەگەڕێینەوە". لەگەڵ دەستپێکردنی گەڕانەوەی خەڵک بۆ باکوور، دۆزینەوە تاریکەکان لەوێ چاوەڕێیان دەکرد. گرتە ڤیدیۆییەکانی شارەکە دەریدەخەن کە زۆرێک لە بینا فرە نهۆمیەکان بە تەواوی تەخت بوون و هەندێکی دیکەشیان بەهۆی تەقینەوەکانەوە لەیەکتر جیابوونەتەوە. وا دیارە تەواوی ناوچەکە بە تۆزی خۆڵەمێشی داپۆشراوە، زۆربەی کات هیچ ڕەنگێکی دیکە دیار نییە. محەممەد ئەبو سەلمیە، بەڕێوەبەری نەخۆشخانەی ئەلشیفا لە باکور بە سی ئێن ئێن-ی ڕاگەیاند، ڕۆژی هەینی تەرمی لانیکەم ٣٣ فەلەستینی لە شاری غەززە دەرهێنراونەتەوە، ئەمەش دوای ئەوەی سوپای ئیسرائیل لە هەندێک ناوچەی ئەو شارە کشایەوە. ئاماژەی بەوەشکرد، ناتوانرێت ناسنامەی بەشێک لە تەرمەکان دەستنیشان بکرێت، هەر بۆیەش ڕەوانەی نەخۆشخانە کراون و تیمەکانی پزیشکی دادوەری دەتوانن پشکنینیان بۆ بکەن هاوکات مەحمود باسال وتەبێژی بەرگری شارستانی غەززە ئێوارەی هەینی پشتڕاستی کردەوە کە "نزیکەی ٢٠٠ هەزار کەس ژمارەی ئەو هاووڵاتیانەن کە گەڕاونەتەوە باکوور". وتەبێژی هێزەکانی بەرگری ئیسرائیل ڕایگەیاند، ڕێگە بە خەڵک دراوە لە باشوورەوە بەرەو باکوور لە ڕێگەی شەقامی ئەلڕەشیدی کەنار دەریا و ڕێگای سەڵاح الدین لە ناوەڕاستی کەرتی غەززە جوڵە بکەن.

ڕۆژنامەی دى زێتى ئەڵمانى بە ڕاپۆرتێک وردەکارى ژیانى شاراوەى بەشار ئەسەد سەرۆکى پێشووى سوریاى لەشارى مۆسکۆى پایتەختى ڕوسیا ئاشکرادەکات، بەپێى ڕاپۆرتەکە ئەسەد بە ئازادی بەدەوری مۆسکۆدا دەسوڕێتەوە، سەردانی مۆڵێک دەکات و چەندین کاتژمێر یاری کۆمپیوتەر دەکات. لە مانگی کانوونی دووەمی ٢٠٢٤دا بەشار ئەسەد دیکتاتۆری سوریا بەرەو مۆسکۆ هەڵهات ، ئەمەش لە ناوەڕاستی کودەتایەکدابوو لە وڵاتەکەیدا کە ئەحمەد شەرعی هێنایە سەر دەسەڵات . ئێستا دوای نزیکەی ١٠ مانگ، ڕۆژنامەی دی زەیت ئەڵمانی توانیویەتی بگاتە شوێنی مانەوەو خۆ حەشاردانی ئەسەد لە پایتەختی ڕووسیا - کە ئاسمان ڕوتێکی لوکسە، کە خێزانەکە خاوەنی نزیکەی ٢٠ (یەکە) شوقەن لە سێ نهۆمدا. ئیستا بە تەواوی لە ژێر دەسەڵات و چاودێرى ڤلادیمێر پوتین و حکومەتى ڕوسیادا،  بەگوێرەی زانیارییەکان، پوتین "کۆنتڕۆڵى تەواوى لەسەر جموجوڵ و زانیاریەکانى داناوە ئەمەش بە وتەی ڕۆژنامەنووسێکی عەرەب کە قسەی لەگەڵ رۆژنامە ئەڵمانیەکە کردووە. ڕۆژنامە ئەڵمانییەکە قسەی لەگەڵ خ. کردوەو باسى ئەوەى کردووە کە ئەو لە "خێزانێکی کاریگەری سوریی" لەدایک بووە و لە منداڵیدا زۆرجار میوانی ماڵی بنەماڵەی ئەسەد بووە. لە تەمەنی گەورەییدا وەک ئەفسەرێکی پلە باڵا لە سوپادا کاری کردووە. هەروەها ئاماژەی بەوەشکرد کە ئەسەد لە ساڵی 2012 هەوڵیدا لەناویببات، ژمارەیەک پاسەوانی کوژراون،  پاشان بڕیاریداوە سوریا بەجێبهێڵێت، بەڵام لە ڕوانگەی ئەوەوە هێشتا ڕژێمی نوێ وەک بەشێک لە "نوخبەی کۆن" سەیری دەکات.  خ ـ بەرپرسە سوریەکە ئاماژەی بەوەشکردووە، ئەو زانیاریانەی لەگەڵ ڕۆژنامەکە ئاڵوگۆڕ کردووە لە "سەرچاوەی متمانەپێکراو"ەوە وەریگرتووە هەروەها ووتوشیەتى: ئەو و خێزانەکەی دەتوانن بە ئازادی لە مۆسکۆ جوڵە بکەن، ئەوان پاسەوانی کۆمپانیایەکی تایبەتی ئاسایش دادەمەزرێنن، کە لەلایەن حکومەتی ڕووسیا پارەی بۆ دابین دەکرێت. ئەو وتویەتى: ئیستا بەشارو بنەماڵەکەى لە سێ شوقەدا دەژین لە تاوەرێکدا کە مۆڵێکی بازرگانی لە ژێرەوەیە، ناوبەناو سەردانی ئەو شوێنە دەکات. جگە لەوەش هەمان کەس ئاشکرایکردووە کە "ئەسەد چەند کاتژمێرێک بە یاری ڤیدیۆیی ئۆنلاین بەسەر دەبات". بەوتەى هەمان سەرچاوە، باری تەندروستی ئەسمای هاوسەری ئەسەد لەڕادەبەدەر خراپە. لە ساڵی ٢٠١٨ تووشی شێرپەنجەی مەمک بووە و چاکبووەتەوە، بەڵام لە بەهاری ساڵی ٢٠٢٤ نەخۆشییەکە گەڕایەوە، ئاماژەی بەوەشکردووە، ئێستا بارودۆخی بە "ناجێگیر" دادەنرێت. جگە لەوەش، خ ئاماژەی بەوەشکردووە، ماهیر، برا بچووکەکەی ئەسەد، لە هۆتێلی فۆڕ سیزن لە شارەکەدا دەژی و "کاتەکانی بە سەرخۆشبوون و جگەرەکێشانی نێرگەلە بەسەر دەبات". سەرەڕای ئەو نهێنییە گەورەیەی کە لە دەوری حەشارگەی دیکتاتۆرە شاراوەکەدا هەبوو، ستافی ڕۆژنامەکە توانیان بچنە ناو بیناکەو لەوێ بریکارێکی خانووبەرەی ناوخۆییان ناسیوە کە بەناوی ساختەی ناتاشا خۆی ناساندوە. ئاماژە بەوەکراوە، ناتاشا لە هۆڵی چوونە ژوورەوە چاوەڕێی ستافى ڕۆژنامەکەى کردوەو چەند شوقەیەکى  پیشان داون لەڕووی بەرزی و دیزاینەوە هاوشێوەی شوقەی بنەماڵەی ئەسەدبووەو بە گوتەی ئەو، "زۆرێک لە سیاسەتمەداران بیانییەکان لەم تاوەرانەدا دەژین. لە نهۆمی ٦٧،  ناتاشا بە کارت و کۆدەکەی کردەوە. "شووقەکە مۆبیلیاتی تێدایە و بە تەواوی گونجاوە بۆ خەڵکی ڕۆژهەڵاتی ناوەڕاست کە ڕۆژێک چێژیان لە کۆشکەکانی دیمەشق، ئەبوزەبی یان دوبەی وەرگرتووە. دولابی جل و بەرگ  لەگەڵ چوارچێوەی زێڕین، دارە بەنرخەکان و قەنەفەی فراوان، هەروەها جێگەی نوستن و جێگەی شەوانە و ئاوێنەی ماکیاژ هەموویان مۆدێرن." بەپێی ڕۆژنامە ئەڵمانییەکە، "چێشتخانەکەى بریقەدار و مۆدێرن بووە، لەگەڵ چەندین ئامێری دروستکراوی ئەڵمانی. هەموو ژوورەکان تەلەفزیۆنی گەورە و بڵندگۆی ناوەوە و پەنجەرەی ئەرز تا سەقفیان لەسەر ئاستی هەورەکان هەیە، ئەوەی جێگەی سەرنجە، حەمامەکەیە. ​​هەمووی مەڕمەڕی کارارایە. بانیۆیەکی زەبەلاح و گەرمکراوی سیرامیک لەبەردەم پەنجەرەکەدا هەیە کە بەرزییەکەی چوار مەتر دەبێت". لە مانگی شوباتدا، لە هەنگاوێکی نائاساییدا، کوڕەکەی حافز کورتە ڤیدیۆیەکی لە مۆسکۆوە بڵاوکردەوە کە لە سۆشیال میدیادا بڵاوبووەوە - ئەمەش بووە هۆی ئەوەی فۆڵۆوەرەکانی هەوڵبدەن بە تەواوی بزانن لە کوێی شارەکەدایە. لە ڤیدیۆکەدا دەردەکەوێت کە حافز بەناو گەڕەکێکی ئاست بەرزی مۆسکۆدا دەڕوات، لە یەکەم دەرکەوتنیدا لە دوای هەڵهاتنی، و باسی ساتەکانی پێشووی دەکات. ئیدیعای کرد: هیچ پلانێک نەبوو، تەنانەت یەدەگیش نەبوو بۆ ئەوەی دیمەشق بەجێبهێڵێت، چ جای سوریا. دوای ئەوەی باوکی سەدان هەزار خەڵکی خۆی کۆمەڵکوژ کرد، ئەسەد جونیۆر وتی: لە ماوەی ١٤ ساڵی ڕابردوودا سوریا بە هەلومەرجێکی سەختدا تێپەڕیوە کە لە کۆتایی مانگی تشرینی دووەم و سەرەتای مانگی کانوونی دووەمی ڕابردوودا بەسەریدا تێپەڕیوە. هەروەها باسی لەوە کرد کە پێش ئەوەی ئەو ڕووداوانەی کە بوونە هۆی ڕووخانی ڕژێم دەستپێبکات، بۆ تەواوکردنی تێزی دکتۆرای خۆی گەیشتە مۆسکۆ، لە کاتێکدا دایکی ئەسما لەو کاتەدا دوای چاندنی مۆخی ئێسک لە پایتەختی ڕووسیا بوو. ڕوونیشیکردەوە، بڕیاربوو بۆ ماوەیەک لەو شارە بمێنێتەوە بۆ تەواوکردنی ڕێکارەکانی پەیوەست بە بڕوانامەکەی، بەڵام بەهۆی تێکچوونی دۆخی سوریا، لە 1ی کانونی یەکەمدا گەڕایەوە دیمەشق بۆ ئەوەی لەگەڵ باوکی و کەریمی برای بێت. دایکی بۆ تەواوکردنی چارەسەرەکەی لە مۆسکۆ مایەوە و خوشکەکەی بەناوی زەین ئەسەد لەگەڵیدا مایەوە. نووسیویەتی، لە ٧-٨ی کانوونی دووەم، ئەو ڕۆژانەی کە هێزەکانی ئۆپۆزسیۆن دەستبەسەرداگرتنی شارە سەرەکییەکانی سووریا و دیمەشقیان تەواو کرد، ئەو هێشتا لەو وڵاتە بوو و تەنانەت بانگەشەی ئەوە دەکرد کە کاتێک دەنگۆی ئەوە بڵاوبووەوە کە خێزانەکەی پێشتر هەڵاتوون، وێنەی خۆی لە پارکێکی ناوخۆیی گرتووە و وێنەکەی بڵاوکردووەتەوە.  هەروەها بانگەشەی ئەوەی کرد کە هیچ ئامادەکارییەک و هیچ شتێک نەکراوە کە ئاماژە بە ڕۆیشتنیان بکات، تا "بەرپرسێکی ڕووسی" هاتە ماڵەکەیان و داوای کرد سەرۆک ئەسەد بچێتە لازقییە - کە یەکێک لە بنکە سەرەکییەکانی هێزەکانی ڕووسیا لە سووریا هەڵکەوتووە. لە پۆستەکەدا نووسیویەتی "بەرەو فڕۆکەخانەی نێودەوڵەتی دیمەشق بەڕێکەوتین، نزیکەی کاتژمێر ٣ی بەیانی گەیشتینە فڕۆکەخانەکە لە کارمەندان چۆڵ بوو، لەنێویاندا تاوەری کۆنترۆڵ". "پاشان بە فڕۆکەیەکی سەربازی ڕووسیا چووینە لازقییە، لەوێ پێش بەیانی لە فڕۆکەخانەی خمەیمیم نیشتوینەتەوە".

مەزڵوم عەبدی فەرماندەی گشتی هێزەکانی سوریای دیموکرات رایگەیاند: بەمنزیکانە لیژنەیەکی سەربازیمان سەردانی دیمەشق دەکات، گفتوگۆ لەسەر گرێدانی هەسەدە بە هێزەکانی سوریا دەکەین. لە یادی 10 ساڵەی دامەزراندنی هێزەکانی سوریای دیموکرات، یەکینەکانی بەرەنگاربوونەوەی تیرۆر(YAT)  نمایشێکی سەربازییان ئەنجامدا و تیایدا مەزڵوم عەبدی باسی گرنگی خەباتی هەسەدەی کرد و جەختی لەسەر پاراستنی گەل و نیشتمان کردەوە.  مەزڵوم عەبدی رایگەیاند: هێزەکانمان رۆڵێکی کارا دەگێڕن لە چوارچێوەی سوپا بۆ روبەڕوبونەوەی نیرۆر لە سەرتاسەری وڵات و دەبنە سەرچاوە هێز بۆ سوپا. لە 10ـین ساڵیادی دامەزراندنی هەسەدە کە دەکاتە 10ی 10، مەزڵووم عەبدی پەیامێکی بڵاوکردەوە و پابەندبوونی خۆی بۆ بوون بە بەشێک لە سوپای سووریا و بەرگریکردن لە ناوچەکە دژی تیرۆریستان دووپات کردەوە.    ڕۆژی سێشەممەی ڕابردوو، مورهەف ئەبو قەسرە، وەزیری بەرگریی سووریا، ئاگربەستی دەستبەجێی بەدرێژایی هەموو هێڵەکانی پێشەوە لەگەڵ هەسەدە لە ناوچەکانی باکوور و باکووری ڕۆژهەڵاتی سووریا ڕاگەیاند، ئەوەش دوای دیداری مەزڵووم عەبدی لەگەڵ ئەحمەد شەرع، سەرۆککۆماری سووریا و ئەبو قەسرە لە دیمەشق.

ئەندامی شاندی ئیمراڵی پەروین بوڵدان ڕایگەیاند چاوەڕندەکرێت لە هەفتەکانی داهاتوودا شاندێک کە لە پێنج کەس پێكدێت سەردانی ئیمراڵی بکات، ئاماژەی بەوەشدا ڕێبەر ئاپۆ چاوەڕیی ئەوەیە کۆمیسیۆن دەستبەجێ بچێتە لاى ئەوو هاوکاری لە خێراکردنی پرۆسەکە بکات. پەیوەست بە ئێستای پرۆسەکە پەروین بوڵدان ئەندامی شاندی ئیمراڵیی دەم پارتی بەشداری بەرنامەی 'گوندەم'ـی مەدیا خەبەر تیڤی بوو. بوڵدان دەربارەی دیدارەکەی ٣ـی تشرینی یەکەم کە لەگەڵ عەبدوڵا ئۆجەلان ئەنجام درا زانیاری خستەڕوو. پەروین بوڵدان گوتی: "وەک شاندەکە سەردانی ئیمراڵیمان کرد. بەڕێز ئۆجالان چالاک، بە مۆراڵ و بە خۆ باوەڕبوو. دیدارێکی درێژ و بەرهەمدارمان ئەنجام دا. ئۆجالانێکی تەندرووست، بە بڕیار و بە جۆشمان بینین." بوڵدان ڕایگەیاند لەگەڵ زیندانیانی دیکەی ئیمراڵییدا دیدارێکی کورتیان پێکهێناوە و ئەمەی گوت: "هەڤاڵ حامیلی یەڵدر نەشتەرگەرییەکی بچووکی تێپەڕکردبوو، بەڵام کاتێکی هاتنی ئێمەی بیست  بەشداری دیدارەکە بوو. تەندرووستی زیندانییەکانی دیکەش باش بوو. لە هەلومەرجی بەڕێز ئۆجالاندا هێشتا هیچ گۆڕانکارییەک ڕووی نەداوە." بوڵدان لە هەڵسەنگاندنی بۆ پرۆسەکە ئەمەی گوت: "ئەو بانگەشانەی کە دەڵێن پرۆسەکە پەکی کەوتووە دوورن لە ڕاستییەوە. هەرچەندە لەسەرخۆیش بێت، بەڵام پرۆسەکە بەردەوامە. باشترکردنی هەلومەرجی کارکردنی بەڕێز ئۆجالان زۆر گرنگە. کاتێک هەلومەرجەکە گۆڕا دەتوانێت ڕاستەوخۆ بەشدری پرۆسەی ئاشتی ببێت." 'دەبێت هەردوولا بە خێرایی پێکەوە هەنگاو بنێت' بوڵدان باسی لەوەکرد ڕێبەر ئاپۆ لە کۆتا دیداردا گوتی پرۆسەکە لە قۆناغێکی یەکلاکەرەوەدایە و ئەمەی گوت: "بەڕێز ئۆجالان گوتی پێویستە پێکەوە هەنگاوی گرنگ بگیرێتەبەر، بە گرنگی تیشکی خستەسەر بابەتەکە. هۆشداریشیدا لەوەی گەر پێکەوە هەنگاوەکان نەگیرێتەبەر، ئەوا گرووپ و لایەنە دژەکانی پرۆسەکە بەهێزتر دەبن، هەموو کاتێک ئەم هۆشدارییە ئەدات. هەڵسەنگاندنی ئەوانەی کە دەیانەوێت پرۆسەکە تێکبدەن و ڕێگری بۆ درووستکەن و تا ئاستی کودەتاش دەکرێت بڕوات. دەمەوێت بڵێم نابێت پرۆسەکە دوابخرێت، پێویستە پێکەوە هەنگاوی خێرا بنرێت و ئاوا خاو بەڕێوەچوونی پرۆسەکە جێگەی 'مەترسییە'. لە دیدارەکاندا هەمیشە جەخت لەسەر ئەمە کراوەتەوە. شێوازی کارکردنی کۆمیسیۆن ڕەخنە دەکەین. هەمووکات دەڵێین دەبێت هەنگاوی پێویستی یاسایی بنرێت و گرنگە بۆ هەموارکردنەوەی یاساییش راوەستە بکات. پێویستە هەستیارییەکانی پرۆسەکە تێپەڕ بکرێت. ڕەنگە بە لەبەرچاوگرتنی هەموو ئەم هەستیارایانە پرۆسەکە بە هێواشی بڕوات، بەڵام دەبێت هەم لە هەلومەرجی بەڕێز ئۆجالاند گۆڕانکاری بکرێت و هەمیش پرۆسەی کۆمیسیۆن خێراتر ببێت و کارەکانی بە کۆتا بهێنێت. هاوکات کەوتووینەتە قۆناغێکەوە کە دەبێت چوارچێوەی یاسایی داڕێژرێت. بێگومان کۆمەڵگەیش لە نزیکەوە ئەم گۆڕاکاریانە دەبینی. لە لایەکەوە بێباوەڕەییەک بە پرسەکە هەیە و لە لایەکی دیکەشەوە بەشێک لە کۆمەڵگە هەن ڕەنخەی توند دەکەن. دەیڵێمەوە دەبێت هەردوو لایەن پێکەوە هەنگاوی خێرا بنێنن." "پێویستە کۆمیسیۆن بچێتە ئیمراڵی" پەروین بوڵدان ڕایگەیاند، ئەو کۆمیسیۆنەی کە لە چوارچێوەی پرۆسەکەدا لە پەرلەمان دامەزرا، بەرەو کۆتایی قۆناغی گوێگرتن دەچێت و لەوانەیە هەفتەی داهاتوو بە گوێگرتن لە ژنان و گەنجان، ئەم قۆناغە بە تەواویی کۆتایی پێ بێت. بوڵدان ئاشکرای کرد، کە کۆمیسیۆن لە بەردەوامییدا جارێکی تر گوێ لە وەزیری دەرەوە و سەرۆکی میت ئیبراهیم کاڵن دەگرێت و وتی: "دوای ئەوە باس لەوە دەکرێت، کە قۆناغی گوێگرتن کۆتایی دێت. هیوادارین دواتر کۆمیسیۆن بچێتە ئیمراڵی و دیدار لەگەڵ بەڕێز ئۆجالاندا بکات. لەو بارەیەوە بەڕێز ئۆجالانیش خاوەن هیوایەکی گەورەیە. لە دوایین دیدارماندا جارێکی تر بۆچوونەکانی لەسەر کۆمیسیۆن و ئەرکەکانی و چوونی بۆ ئیمراڵی خستەڕوو. ئاماژەی بەوە کرد، کە ئەو کۆمیسیۆنەی لە پەرلەمان دامەزراوە زۆر گرنگە. لە چەند دیداری ڕابردوودا ئەمەی بە شێوەیەکی بەردەوام باسکرد. ئەو لە نزیکەوە چاودێریی کارەکانی کۆمیسیۆن دەکات. لە هەموو دیدارێکدا، بەتایبەت لە شاندەکەی ئێمەوە، زانیاری لە بارەیەوە وەردەگرێت. لە کۆتا دیداردا ڕایگەیاند، کە ئەو ئاگادارە کە کات زوو تێدەپەڕێت و وتی، 'پێویستە کۆمیسیۆن بێتە ئیمراڵی.' بەڕێز ئۆجالان داوای ئەوە دەکات، کە ڕیتمی پرۆسەی ئاشتی و چارەسەری خێرا بکرێت. ڕایگەیاند، کە چوونی کۆمیسیۆن بۆ ئیمراڵی دەتوانێ ئەم ڕیتمە خێرا بکات. پێویستە کۆمیسیۆن دوای گوێگرتنەکان دیدار لەگەڵ بەڕێز ئۆجالاندا بکات، بەڕێز ئۆجالانیش چاوەڕێی ئەوەیە. تاوەکو ئێستا بەروارێکی ڕوون بوونی نییە. هیوادارین کە دوای یەک بۆ دوو هەفتەی تر، دوای کۆتاییهاتنی گوێگرتنەکان، شاندە پێنج کەسییەکەی ناو کۆمیسیۆن بچێتە ئیمراڵی." "پلان وایە شاندێکی پێنج کەسی بچێت" پەروین بوڵدان دەربارەی ئەندامانی کۆمیسیۆن کە چاوەڕوان دەکرێت بچنە ئیمراڵی هەڵسەنگاندنی کرد و وتی: "پلان وایە کە شاندێکی پێنج کەسی، کە لە نوێنەرانی پارتە خاوەن گرووپەکان پێک دێت بچێت. ئەو زانیارییانەی کە پێمان دراوە ئەوەیە. لە پەرلەمان ئەو پارتانەش هەن، کە گرووپیان نییە، ئەوانیش لە کۆمیسیۆندا بەشدارن. بەڵام ئەوەی کە داوا بکرێت لەو کەسانە ئاخۆ بچن یان نا، زانیارییەکی تەواو بوونی نییە. بەڵام لەبەرئەوەی نوێنەرانی پێنج پارتی سیاسی هەن، کە گرووپیان هەیە، بێگومان لە هەر یەک لەوان کەسێک دەچێت. ئەوەی کە ئاخۆ ئەوانەی گرووپیان هەیە بچن یان نا، دەمەوێت ڕایبگەیەنم کە هیچ شتێکی ئاشکرا لەم بارەیەوە بوونی نییە. ئەگەری چوونی بەڕێز نوعمان کورتولموش بۆ دوورگەکە بوونی نییە. شتێکی وەها باس نەکراوە. بەڕێز ئۆجالانیش باسی لەوە نەکرد. تەنها پلانی ئەوە هەیە، کە شاندە پێنج کەسییەکە، کە لە ئەندامانی کۆمیسیۆن پێکدێت، بچێت."