ئیسرائیل بەیەک مەرج ئامادەیە بۆ ئاگربەست لەغەززە

  راپۆرتی:  تیمی کوردستانی عێراقی ڕێکخراوی CPTی ئەمریکی هێرش و بۆردوومانەکانی سوپای تورکیا لە شەش مانگی یەکەمی ئەمساڵدا: • لە ١ی کانوونی دووەم بۆ ٣٠ی حوزەیران، سوپای تورکیا (١،٦٧٨) هێرش و بۆردوومانی بۆ سەر خاکی هەرێمی کوردستان ئەنجامداوە. • (١،٤٨٤) هێرش بۆ سەر سنوری پارێزگای دهۆک، (١٤٠) هێرش بۆ سەر سنوری پارێزگای هەولێر، (٥٤) هێرش بۆ سەر سنوری پارێزگای سلێمانی و (سفر) هێرشیش بۆ سەر سنوری پارێزگای نەینەوا بووە. • بە هۆی هێرش و بۆردوومانەکانی سوپای تورکیا لە شەش مانگی یەکەمی ئەمساڵدا، (٩) هاووڵاتی مەدەنی بونەتە قوربانی بە شێوەیەک (٣) هاووڵاتی شەهید و (٦) هاووڵاتی تری مەدەنی برینداربوون. • لە شەش مانگی یەکەمی ئەمساڵدا، سوپای تورکیا (١،٢٣٢) هێرشی لە ڕێگەی تۆپباران، (٣٩٧) هێرشی لە ڕێگەی فڕۆکەی جەنگی و فڕۆکەی بێفڕۆکەوان، (٤٣) هێرشی لە ڕێگەی هەلیکۆپتەر، (٥) هێرشی لە ڕێگەی بەکارهێنانی چەکی سوک و (١) هێرشی لە ڕێگەی تەقینەوە ئەنجامداوە. • بە تەنیا لە مانگی حوزەیراندا، سوپای تورکیا، (٥٥٠) هێرشی بۆ سەر هەرێمی کوردستان ئەنجامداوە کە (٥٤١) هێرشیان بۆسەر سنوری پارێزگای دهۆک و (٩) هێرشیان بۆ سەر سنوری پارێزگای هەولێر بوون. بە بەراورد بە مانگی ئایار، ژمارەی هێرشەکان لە مانگی حوزەیراندا بە ڕێژەی (٨٪) زیادیانکردووە. • لە دوای ڕاگەیاندنی ئاگربەستی یەکلایەنەی پەکەکە لە مانگی ئادار، سوپای تورکیا هیچ هێرش و بۆردوومانێکی بۆ سەر سنوری پارێزگای سلێمانی ئەنجامنەداوە. تیمی کوردستانی عێراقی ڕێکخراوی CPTی ئەمریکی بۆ خوێندنەوەی تەواوی ڕاپۆرتەکە، گرتە لەسەر ئەم بەستەرەی خوارەوە بکە: https://static1.squarespace.com/.../%28Kurdish%29+Turkish...

  سەرۆک وەزیرانی ئیسرائیل هەڕەشەى توند لەحەماس دەکات، ئەوەش دەخاتەڕوو دوای گەیشتن بە ڕێککەوتنی ئاگربەست، کۆتایی بە شەڕدەهێنێت. کەناڵی ١٣ی ئیسرائیلی بڵاویکردەوە، بنیامین ناتانیاهۆ، سەرۆکوەزیرانی ئیسرائیل، لە ماوەی ٦٠ ڕۆژدا دوای گەیشتن بە ڕێککەوتنی ئاگربەست، کۆتایی بە شەڕی کەرتی غەززە دەهێنێت و ئامادەیی خۆی بۆ ئەو پرسە دەربڕیوە. ناتانیاهۆ لە میانی دیداری لەگەڵ بنەماڵەی دەستگیرکراوەکان لە واشنتۆن وتی: ئێمە دەمانەوێت کۆتایی بە شەڕی غەززە بهێنین دوای ئاگربەستی 60 ڕۆژە. ڕوونیشیکردەوە، ئیسرائیل هەوڵدەدات بۆ کۆتاییهێنان بە شەڕی کەرتی غەززە و گەڕاندنەوەی سەرجەم دەستگیرکراوان دوای ئەو ئاگربەستەى کە لە ڕێککەوتنەکەدا هاتووە لەگەڵ حەماس. سەرۆک وەزیرانی ئیسرائیل وتی: ڕێگە نادەم حەماس لە ستریپدا بمێنێتەوە، ئەوە ڕوونادات، من دەستبەرداری ئەم بابەتە نابم، بەڵام دڵنیا دەبمەوە کە هەمووان دەڕۆن، تەنانەت دوا دەستگیرکراویش. مەحاڵە بگەینە ڕێککەوتنێکی هەمەلایەنە. بەڵام لە نێوان ڕۆیشتنی هەشت دەستبەسەرکراوی یەکەمی زیندوو و ڕۆشتنی دواهەمینیان وەک بەشێک لە پلانی ویتکۆف، ئێمە لەو ماوەیەدا کاردەکەین بۆ کۆتاییهێنان بە تەواوی دەستبەسەرکراوەکە جەنگ. لەلایەکى دیکەوە، مارکۆ رۆبیۆ، وەزیری دەرەوەی ئەمەریکا رایگەیاند، ئەمریکا گەشبینە بە گەیشتن بە رێککەوتنی ئاگربەست لە غەززە و پرسی ئاگربەستی بە چەکدانانی حەماسەوە بەستەوە لە غـەززە. رۆبیۆ لە لێدوانێکی ڕۆژنامەوانیدا رایگەیاند، پرسی ئاگربەست بە چەکدانانی حەماس چارەسەر دەبێت و سەبارەت بە کشانەوەی ئیسرائیلیش لە غەززە، وتی؛ "ئیسرائیل بە کشانەوەی تەواوەتی لە غەززە رازی نابێت." ناوبراو لە کۆبوونەوەی لوتکەی کۆمەڵەی گەلانی باشووری رۆژهەڵاتی ئاسیا (ئاسیان) لە مالیزیا وتی: پێموایە ئێمە نزیکترین، رەنگە نزیکتر لەوەی کە لە ماوەی پێشوودا بووین. ئاماژەی بەوەشکرد، ئێوارەی چوارشەممە لەگەڵ ویتکۆف قسەی کردووە سەبارەت بە شەڕی غەززە.

  وتەبێژی سەرۆکایەتیی هەرێمی کوردستان دەڵێت، دامودەزگا حکومیەکان هەموو ئامادەکارییەکان کردوە بۆ ئەوەى ئەو پرۆسەیە بەسەرکەووتویی بەڕێوەبچێت لەوناوچەیەى کە پێشتر ڕێککەوتنى لەسەر کراوە. لەکۆنگرەیەکى ڕۆژنامەوانیدا لەزاخۆ، ئێوارەى ئەمڕۆ دڵشاد شەهاب وتەبێژی سەرۆکایەتیی هەرێمی کوردستان لەبارەی چەکدانان و هاتنی شاندەکان قسەى کرد. دڵشاد شەهاب وتى: سەرکردایەتى هەرێمى کوردستان لە قۆناغى سەختیشدا لایەنگرى ئاشتى بووە، دەمانەوێت ئەم پرۆسەیە بەسەرکەوتوویی بەڕێوەبچێت، سەرکەوتنى ئەمە سەرکەوتنى ئاشتییە، دەمانەوێت هێمنایەتى بگەڕێتەوە بۆ ناوچەکە. ئەو باسى لەوەشکرد: ڕەئى نەگۆڕو بەردەوامى جەنابى سەرۆکى هەرێمیش ئەوەیە ئاشتى و پێکەوە ژیانە چ لەناوخۆى کوردستان چ لەعێراق چ لەڕۆژهەڵاتى ناوەڕاست، داموو دەزگاپەیوەندیدارەکانیش ڕاسپێردراون بۆ ئەوەى هاریکارى تەواوى ئەو پرۆسەیەبن کە سبەینێ لەشوێنێکى دیاریکراو بەرێوە دەچێت کەپێشتر رێککەوتنى لەسەر کراوە. ئەو وتى: ئێمە هێشتا لەسەرەتای پرۆسەکەداین، هەرچەندە پرۆسەکە بابەتێکی نێوخۆی تورکیایە، بەڵام ئێمەش وەکو هەرێمى کوردستان یاریدەدەر دەبین سوپاسى ئەو متمانەیەشیان دەکەین. لەبارەى کێن ئەوانەى بەشدارى مەراسیمەکە دەکەن، دڵشاد شەهاب وتى: ئێمە هیچ لایەکمان بانگهێشت نەکردوە تەنها میواندارى پرۆسەکە دەکەین و هاریکار دەبین ئەمە پرۆسەیەکى ئەمنیە زیاتر، چونکە لایەنێکى ڕاستەوخۆى پرۆسەکە نین، هەمووئەوانەى دێن میوان نین ماڵى خۆیانە، دەم پارتى و بەشێکى شاندەکان هاتوون، حەتمەن لایەنى تورکى و پەکەکەش ئاگادارى ئەم بابەتەن.     وتەبێژی سەرۆکایەتیی هەرێمی کوردستان ئەوەشى خستەڕوو هەرێمی کوردستان لایەنێکی زیانمەندی شەڕی تورکیا و پەکەکە بوو و دڵنیام هەرێمی کوردستان بایەخێکی زۆر بەو ناوچانە دەدات کە لە شەڕەکە زیانیان بەرکەوتبوو.     گوتەبێژی سەرۆکایەتیی هەرێم جەختی لەوە کردەوە، لە داهاتوودا حکوومەتی هەرێم گرنگی زۆر بە ئاوەدانکردنەوەی هەموو ئەو ناوچە  دەڤەرانە دەدات، بەهۆی شەڕ و ئاڵۆزییەکان زیانیان بەرکەتووە و دانیشتوانەکانیان نەیتوانیوە تێیدا به‌ ئارامی بژین. بڕیار وایە سبەی هەینی، 11ـی تەممووزی 2025، ڕێوڕەسمی چەکدانانى  پەکەکە لە سنووری پارێزگای سلێمانی بەڕێوە بچێت. 

  گروپێک کە پێکهاتبوون لە نوێنەری ڕێکخراوەکانی کۆمەڵگەی مەدەنی و ڕۆشنبیران و نووسەران لە شارى ئامەدى باکورى کوردستانەوە بەڕێکەوتن بۆ شارى سلێمانى بۆ ئامادەبوون لە مەراسیمى چەک لەناوبردن. بڕیارە سبەینێ 11ی تەمموز، گروپی یەکەمی چەکدارانی پەکەکە چەکەکانیان لە ناوچەیەکی سنوری پارێزگای سلێمانی دابنێن بکەن و چەکدانانی فەرمی دەستپێبکات.  ئاژانسی میزۆپۆتامیا ڕایگەیاند ئەو گروپە کە نزیکەی 150 کەسن و لەبەردەم یاریگای ئامەدەوە کۆبوونەوە کەمێک لەمەوبەر بەڕێکەوتن بەرەو سلێمانى بۆ چاودێرێکردن و ئامادەبوون لە مەراسیمى چەک لەناوبردنەکە سبەینێ هەینى بەرێوەدەچێت.    بەگوێرەی ئەو زانیارییانەی لە سەرچاوە جیاجیاکانەوە بڵاوکراونەتەوە، بڕیارە سبەینێ هەینی 11ـی تەمموز، گروپی یەکەمی چەکدارانی پەکەکە کەژمارەیان ٣٠ گەریلایە چەکەکانیان لە ناوچەیەکی پارێزگای سلێمانی لەناوببەن. كۆما جڤاكێن كوردستان "كەجەكە" لەبارەی مەراسیمی "لەناوبردنی چەك" لەلایەن گەریلاكانی پەكەكە راگەیەندراوێكی بڵاوكردەوە و رایگەیاند "شوێنی دیاریكراو ئاشكراناكرێت بەڵام پاس بۆ گواستنەوەی ئامادەبووان دابینكراوە". كۆما جڤاكێن كوردستان "كەجەكە" لە راگەیەندراوێكدا رایگەیاند:" مەڕاسیمی لەناوبردنی چەك، سەرلەبەیانی ڕۆژی هەینی 11ـی تەمموز، كاتژمێر 8:00 بۆ 9:00 بەڕێوەدەچێت، شوێنی دیاریكراو ئاشكرا ناكرێت، بەڵام پاس دابینكراوە و هەموو بەشداربوان دەگەنێتە شوێنێك نزیك لە شوێنی دیاریكراوی مەڕاسیمەكە،  بۆ ئەو مەبەستە لە (هۆتێل ئاشوور) لە شارۆچكەی دوكان ئامادە بن". “بەشداربوونی ڕۆژنامەنووسان پێویست بە هیچ خۆتۆمارکردنێکی پێشوەختە ناکات، بەڵام پێویستە باجی تایبەتی ڕۆژنامەوانیی و ناسنامەتان پێ بێت و خۆتان بناسێنن، لەو شوێنەی کە بۆی دەبرێن بۆ ڕووماڵکردن، مەڕاسیمەکە لە شاشەیەکی گەورەوە نیشان دەدرێت، هەروەها دەتوانن بە خواستی خۆتان دیمەن و دەنگی خامی مەڕاسیمەکە بەدەستبهێنن، ئەو شوێنە کارەبای لێ دەبێت، بە هۆکاری ئەمنیی ناتوانن لێدوان لە ئەندامانی گرووپەکە وەربگرن، بەڵام قسەکردن لەگەڵ چاودێرەکان ئاساییە”. کەجەکە وا دەڵێت. هەرچەند تا دوو رۆژ لەمەوبەر بڕیار بوو ڕێوڕەسمی چەكدانانەكە لە لایەن ڕۆژنامەنووسانەوە ڕووماڵ بكرێت و بە شێوەی ڕاستەوخۆ پەخش بكرێت، كەچی ڕاگەیەندراوێكی ناوەندی ڕاگەیاندنی كەجەكە لە درەنگانی شەودا بووە جێی سەرنج.

  وەزارەتى بازرگانیى عێراق، رایگەیاند، بڕیارى باج خستنەسەر عێراق لەلایەن ئەمریکاوە، هەناردەى نەوتى عێراق بۆ ئەمریکا ناگرێتەوە. پاشئەوەى دۆناڵد ترەمپ، سەرۆکى ئەمریکا، حکومەتى عێراقى ئاگادار کردەوە، کە لە 1ـى ئابى داهاتووەوە، باجى گومرگى بەرێژەى لە 30% دەخاتەسەر هەر بەرهەمێکى عێراق، هاوردەى ناوخۆى ئەمریکا بکرێت، وەزارەتى بازرگانیى عێراق، روونیکردەوە، ئەو بڕیارەى ترەمپ، هەناردەى نەوتى عێراق بۆ ئەمریکا ناگرێتەوە و لێخۆشبوونى بۆ کراوە. رۆژى چوارشەممە، 9ـى تەمموز، دۆناڵد ترەمپ، سەرۆکى ئەمریکا، نامەیەکى ئاڕاستەى محەمەد شیاع سودانى، سەرۆکوەزیرانى عێراق کرد و تیایدا لەبارەى پێناسی گومرگیى ئەمریکا، عێراقى ئاگادار کردووەتەوە، کە واشنتن لە 1ـی ئابەوە باجی گومرگی بەرێژەی %30 بەسەر هەر بەرهەمێکی عێراقدا دەسەپێنێت، کە هەناردەی ئەمريکا دەکرێت، ترەمپ لە دەقی نامەکەيدا ئاماژەی بەوەکردووە، نامەکە هێزی پەيوەندييە بازرگانييەکانی نێوان عێراق و ئەمريکا پيشاندەدات، هەرچەندە ئەمريکا بازرگانييەکی کەمی لەگەڵ عێراق هەيە. رۆژی سێشەممە، دۆناڵد ترەمپ لە رێگەی نامەوە 14 وڵاتی ديکەی ئاگادارکردەوە لە سەپاندنی باجی گومرگی بەرێژەی %40 بەسەر کاڵای هاوردەی ئەو وڵاتانەدا لەنێویاندا بەنگلادیش، ژاپۆن و کۆریای باشوور.

  هاوسەرۆکایەتی کۆنسەی بەڕێوەبەریی کۆما جڤاکێن کوردستان ڕایدەگەیەنێت بڕیارمان داوە ئەو هەنگاوانەی کە ڕێبەر ئاپۆ لە ئێمەی دەوێت، جێبەجێ بکەین. ئێمە ئەم هەنگاوە نوێیە بە لەبەرچاوگرتنی گەلەکەمان و گەلان دەنێین. بەڵام دەبێت لەوە تێبگەن کە پرۆسەکە بە شێوەیەکی یەکلایەنە یان تەنها بە هەنگاونانی ئێمە پێش ناکەوێت. لە بەیاننامەکەیدا کەجەکە بڵاویکردەوە کۆماری تورکیا و حکومەتی ئێستای هێشتا بەگوێرەی پێویستییەکانی پرۆسەکە و ئەو هەنگاوە بەرچاوانەی کە ئێمە گرتوومانەتەبەر، هیچ هەنگاوێکیان نەناوە. دەقی ڕاگەیاندراوەکە بەم شێوەیەیە: "ڕێبەر عەبدوڵا ئۆجالان بۆ بەرەو پێشبردنی پرۆسەی ئاشتی و کۆمەڵگەی دیموکراتیک، بانگەوازییەکی نوێی کرد. ئەم بانگەوازە دوێنێ بڵاوکرایەوە و ڕای گشتی لە ناوەڕۆکی ئاگادارکرایەوە. پێش هەموو شتێک خۆشحاڵین کە دەنگ و دیمەنی ڕێبەر عەبدوڵا ئۆجالان گەیشتە دەرەوە. ئێمە لەو باوەڕەداین ئەمە بۆ گەلەکەمان و هەموو دۆستانمان بەهەمان شێوە جێگای دڵخۆشی بووە. بەم بۆنەوە کە ڕێبەر عەبدوڵا ئۆجالان لەلایەن گەل و دۆستانەوە بە جۆشەوە گرنگی پێدەرێت، بە ڕێزدارییەوە سڵاویان لێدەکەین و حەسرەتی خۆشەویستی و پیزانینی خۆمان پێشکەش دەکەین. ئەم بانگەوازییە کە لەلایەن ڕێبەر ئاپۆ دەستی پێکردووە، دووەم بانگەوازییە لە دوای بانگەوازییەکی ٢٧ی شوباتی ٢٠٢٥. ئەم بانگەوازییە هاوشێوەی بانگەوازییەکەی ٢٧ی شوبات مێژووییە. ڕێبەر ئاپۆ لەو بانگەوازە مێژووییەدا پڕۆسەی "ئاشتی و کۆمەڵگای دیموکراتیک"ی لە ڕووی ڕێباز و ئامانجە بنەڕەتیەکانیەوە کۆکردەوە، ئەو پێشکەوتنانەی تا ئێستا بەرهەم هاتووە و ئەو هەنگاوە پێویستانەی بۆ داهاتوو دەبێت بنرێت، پێشکەش کرد. ڕێبەر ئاپۆ جارێکی تر بە وتنی: "بەردەوامم لە پشتیوانیکردنی 'بانگەوازی ئاشتی و کۆمەڵگەی دیموکراتیک' کە لە ٢٧ی شوباتی ٢٠٢٥ ڕاگەیەندرا" ئیرادەی بەهێز و ئاشکرای خۆی نیشاندا. ئێمە وەک تەڤگەری ئازادی ئەم بانگەوازییە مێژووییەی ڕێبەر عەبدوڵا ئۆجالانمان هەڵسەنگاند و بەپێویستی دەزانین ئەو ئەنجامانەی کە لەسەری یەکدەنگین بە ئاشکرا بۆ گەلەکەمان و ڕای گشتی بڵاو بکەینەوە. تەواوی پشتیوانی خۆمان بۆ پرۆسەی "ئاشتی و کۆمەڵگای دیموکراتیک" کە بە بانگەوازی ٢٧ی شوباتی ٢٠٢٥ ڕاگەیەندرا، نیشاندا و بە تەواوەتی ئەرکەکانمان جێبەجێ دەکەین. تا ئێستا بە گوێرەی باوەڕی خۆمان بۆ بانگەوازی "ئاشتی و کۆمەڵگای دیموکراتیک" و ئەرکی مێژوویی کە بۆ بەدیهێنانی ئامانجەکانی ئەم بانگەوازە، بڕیاری ستراتژیمان داوە ولەو چوارچێوەدا هەنگاومان ناوە. گەلەکەمان بە وریایی و هەستیارییەوە و بە باوەڕێکی گەورەوە لە پشت ئەم پرۆسە مێژووییەوە کە ڕێبەر ئاپۆ پەرەی پێداوە وەستاوە. لەم قۆناغەدا کە پێ گەیشتووین، کۆماری تورکیا و حکومەتی ئێستای هێشتا بەگوێرەی پێویستییەکانی پرۆسەکە و ئەو هەنگاوە بەرچاوانەی کە ئێمە گرتوومانەتەبەر، هیچ هەنگاوێکیان نەناوە. ئێمە ئەمانە دەبینین و دەزانین. لەگەڵ ئەوەشدا، بە پێی ئەو باوەڕەی کە بە ئامانجەکانی 'بانگەوازی ئاشتی و کۆمەڵگای دیموکراتیک' بەدەستهاتووە، ئێمە پشتیوانیمان لە پرۆسەکە کردووە. هەروەها بە هەستیارییەکی گەورەوە هەوڵماندا ئەم هەڵوێستە درێژە پێبدەین. لەو بڕوایەداین ئەو هەوڵدانانەمان کە لەم بوارەدا دیارە، بۆ ئەم بانگەوازە مێژووییە نوێیە، ڕایدەگەیەنین کە هەنگاوی ڕوونتر کە ڕێبەر ئاپۆ لە ئێمەی دەوێت جێبەجێ دەکەین. ئێمە ئەم هەنگاوە ڕوونە، وەک هەنگاوەکانی دیکە کە ناومانە، بۆ نیشاندانی گرێدراوبوونمان بە ڕێبەرعەبدوڵا ئۆجالان نیشان دەدەین و بەو باوەڕەی کە گەلەکەمان و مرۆڤایەتی بە ڕێگەی مانیفێستی کۆمەڵگای دیموکراتیک بە ئازادی بژین، هەنگاو دەنێین. ڕێبەر ئاپۆ لە بانگەوازییەکەی لە ١٩ی حوزەیرانی ٢٠٢٥ ڕایگەیاند، پێویستە هەمووان بەرپرسیارێتی خۆیان جێبەجێ بکەن و ئەو هەنگاوە پێویستانەی کە دەبێ بنرێن دەست نیشانکرد و ئەوەی کە چۆن پرۆسەکە بڕواتە پێشەوە خستەڕوو. بۆیە پێویستە دەست نیشانکردنەکانی ڕێبەر ئاپۆ لەبەرچاو بگیردرێن و لێی تێبگەین. ئەم بانگەوازییە تەنها پەیوەندیی بە ئێمەوە نییە، بەڵکو لەهەمان کاتدا بۆ دەوڵەتیشە، بەتایبەتی پەرلەمان، هەموو دامەزراوە سیاسییەکان و کەسانی بەرپرسیاریش دەگرێتەوە. هەتا ئەمڕۆ ئێمە بەگوێرەی بەرپرسیارێتی مێژوویی خۆمان و بە هەستیارییەکی گەورەوە هەنگاوی ستراتژیمان ناوە. ئێستا، بڕیارمان داوە ئەو هەنگاوانەی کە ڕێبەر ئاپۆ لە ئێمەی دەوێت، جێبەجێ بکەین. ئێمە ئەم هەنگاوە نوێیە بە لەبەرچاوگرتنی گەلەکەمان و گەلان دەنێین. بەڵام دەبێت لەوە تێبگەن کە پرۆسەکە بە شێوەیەکی یەکلایەنە یان تەنها بە هەنگاونانی ئێمە پێش ناکەوێت. بۆیە پێویستە بە شێوەیەکی ڕاست و دروست لە پرۆسەکە نزیک ببنەوە و هەنگاوی پێویست بنرێت. لەسەر ئەو بنەمایە دەبێت دیل گرتنی ڕێبەر ئاپۆ کە پرۆسەی کۆمەڵگای دیموکراتیکی پەرە پێداوە، کۆتایی بێت و ئازاد بکرێت. چونکە ئەگەر ڕێبەر ئاپۆ ئازاد بکرێت، ئەم پرۆسەیە دەتوانێت بەرەو پێشەوە بچێت و بگات بە ئامانجەکانی. هەروەها بە پێچەوانەوە مەحاڵە بە بەردەوامبوونی بارودۆخی ئێستا پرۆسەکە بەرەو پێش بچێت. دووەم، بۆ سیاسەتی دیموکراتیک و سەروەری یاسا، پێویستە هەموو ئەو کارانەی پێویستە بکرێت. پێویستە سیاسەت و پەرلەمان لەم بوارەدا دەستپێشخەری بکەن و بەو پێیە هەنگاو بنێن. پرۆسەیەک و پێشکەوتنێکی مانادار تەنها بەمشێوەیە بەدی دێت. لە ئەنجامدا، لە کاتێکدا کە ئێمە ئیرادەی خۆمان بۆ هەڵگرتنی ئەم هەنگاوە مێژووییە نیشان دەدەین، هەروەها بە پێویستی دەزانین بە هەمان هەستی بەرپرسیارێتیەوە ئەوەی کە پێویستە بکرێت دووپاتی بکەینەوە. هیوادارین ئەوەی وتوومانە لێی تێبگەن و لەو بارەوە کاری لەسەر بکرێت. ئێمە بەو باوەڕەوە هەنگاو دەنێین کە وەک چۆن تا ئێستا ناومانە، لەمەو بەدواش بۆ ئەوەی دەستکەوتی گەورەی بۆ گەلەکەمان بێت، بەردەوام دەبین. ئێمە هێشتا بەو باوەڕەی کە ئەم هەنگاوە وەڵامی خۆی دەدۆزێتەوە و پرۆسەی "ئاشتی و کۆمەڵگەی دیموکراتیک" سەردەکەوێت هەنگاو دەنێین."

  دووشەممەی داهاتوو دادگای فیدراڵی دادبینی بۆ سکاڵایەکی تایبەت بە مووچەی هەرێمی کوردستان دەکات، سکاڵاکە داوا لە دادگای فیدراڵی دەکات فەرمانی وەلائی بۆ خەرجکردنی مووچە دەربکات. دادگای فیدراڵی، ڕۆژی دووشەممەی داهاتوو 14ـی تەممووزی 2025ـی دیاریی کرد بۆ کۆبوونەوە لەبارەی  خەرجکردنی مووچەی فەرمانبەرانی هەرێمی کوردستان و دەرکردنی بڕیاری وەلائی لەم بارەوە. سکاڵا ئاڕاستەی دادگای فیدراڵی کراوە و داوای گرەنتی لە وەزارەتی دارایی عێراق کراوە بۆ خەرج کردنی مانگانەی مووچەی مووچەخۆرانی هەرێمی کوردستان بێ دواکەوتن، بێ ئەوەی پرسەکە تێکەڵ بە ناکۆکییەکە سیاسییەکانی نێوان حکوومەتی هەرێمی کوردستان و حکوومەتی فیدراڵ بکرێت.  7ـی تەممووزی 2025، کۆبوونەوەی یەکەمی ڕاوێژکاریی بە سەرۆکایەتییە تازەکەی و ئامادەبوونی ئەندامەکانی کرد، بە مەبەستی گفتوگۆ دەربارەی شێوازی کاری دادگا. 19ـی حوزەیرانی 2025  "شەش ئەندامی سەرەکی و سێ ئەندامی یەدەگی دادگای فیدراڵی عێراق، دەستیان لە کار کێشایەوە، لە کاتێکدا بڕیار بوو هەمان ڕۆژ دادگا، دەربارەی کێشەی مووچە و شایستە داراییەکانی هەرێمی کوردستان کۆببێتەوە و بڕیارێکی وەلائی دەربکات." دەقى ڕاگەیەندراوەکە.. دادگای باڵای فیدراڵی عێراق بڵاویكردەوە: رۆژی (14)ی ئەم مانگەی دیاریكردووە بۆ كۆبونەوە لەبارەی  سكاڵایەك كە لەلایەن فەرمانبەررانی هەرێمەوە پێشكەشەكراوە، تیایدا داوای  فەرمان سالاری كراوە لە دادگا، بۆ پابەندكردنی وەزارەتی دارایی فیدراڵی بە پێدانی دەستبەجێ مووچە بە فەرمانبەران و خانەنشینان و کەسوکاری شەهیدان و سودمەندانی چاودێری کۆمەڵایەتی لە هەرێم، تا ئەو کاتەی ئەم داوایە یەکلایی.

عەبدولزەهرە هینداوی گوتەبێژی وەزارەتی پلاندانانی عێراق ڕایگەیاند، ئەمڕۆ کۆبوونەوەی لیژنە وزارییەکە بەڕێوەناچێت و وادەی کۆبوونەوەی داهاتووش دیارنییە. ئەو لیژنە وەزارییەی ئەنجومەنی وەزیرانی عێراق بۆ چارەسەری کێشەی نەوت و مووچەی هەرێمی کوردستان پێکیهێنا، دوێنێ یەکەم کۆبوونەوەی ئەنجامدا و بەگوێرەی راگەیەندراوی كۆبوونەوەكەش هەردوو پێشنیازی هەرێمی کوردستان و عێراق لەبارەی هەناردەکردنەوەی نەوت، بڕی نەوتی پێویست بۆ بەکاربردنی ناوخۆ، رادەستکردنی داهاتی نانەوتی و تەوتینکردنی مووچەی مووچەخۆران تاوتوێکراون. ئەندامانی لیژنەکە جەختیان لە گرنگی بەردەوامبوونی گفتوگۆكان کردووتەوە بۆ چارەسەری کێشەکان و دەستەبەرکردنی مافی مووچەخۆرانی هەرێمی کوردستان، بەڵام گوتەبێژی وەزارەتی پلاندانان بەزوومی گوت، دیارنییە کەی گفتوگۆکان دەستپێدەکەنەوە. لەلایەکی دیکەوە و هەر لەبارەی هەوڵەکان بۆ چارەسەری کێشەکان، رێباز حەملان راوێکاریی ئابووریی سەرۆکوەزیرانی هەرێمی کوردستان گوتی، چارەسەری کێشەی مووچەخۆران لە کۆتا رۆژەکانیدایە و یەکلادەبێتەوە.

  فراكسیۆنی هاوپەیمانیی دەوڵەتی یاسا لە پەرلەمانی عێراق دەڵێت: نوری مالیکی، سەرۆکی هاوپەیمانێتیەكەیان، تاکە کاندیدی سەرۆک وەزیران دەبێت لە خولی داهاتووی پەرلەماندا. عەقیل فەتلاوی، وتەبێژی فراكسیۆنی دەوڵەتی یاسا، لە لێدوانێكی رۆژنامەوانیدا رایگەیاند: تاکە کاندیدی ئێمە بۆ سەرۆک وەزیران نوری مالیکیە، بە لەبەرچاوگرتنی ئەزموون و شارەزاییەکەی، کە وایكردووە شایستەی ئەوە بێت سەرکردایەتی قۆناغی داهاتوو بکات. ئاماژەی بەوەشکرد:خەڵک بە جۆش و خرۆشەوە پێشوازی لەم  کاندیدکردنە دەكەن و، مالیکی بە گونجاوترین بژاردە دەزانن بۆ تێپەڕاندنی ئەو ئاستەنگانەی روبەڕوی وڵاتەکە دەبێتەوە، جەختیشیکردەوە لەوەی "مالیکی چارەسەرە". ئەم لێدوانەی فەتلاوی، یەکەم راگەیاندنی فەرمی هاوپەیمانییەتیەكەیە، لەبارەی كاندیدەكەی بۆ پۆستی سەرۆک وەزیران، دوای بڕیاری دياريكردنى نورى مالیکی وەک کاندیدی ژمارە (١)ى هاوپەیمانیی دەوڵەتی یاسا لە چوارچێوەی بازنەی بەغداد.

  كۆما جڤاكێن كوردستان "كەجەكە" لەبارەی مەراسیمی "لەناوبردنی چەك" لەلایەن گەریلاكانی پەكەكە راگەیەندراوێكی بڵاوكردەوە و رایگەیاند "شوێنی دیاریكراو ئاشكراناكرێت بەڵام پاس بۆ گواستنەوەی ئامادەبووان دابینكراوە". كۆما جڤاكێن كوردستان "كەجەكە" لە راگەیەندراوێكدا رایگەیاند:" مەڕاسیمی لەناوبردنی چەك، سەرلەبەیانی ڕۆژی هەینی 11ـی تەمموز، كاتژمێر 8:00 بۆ 9:00 بەڕێوەدەچێت، شوێنی دیاریكراو ئاشكرا ناكرێت، بەڵام پاس دابینكراوە و هەموو بەشداربوان دەگەنێتە شوێنێك نزیك لە شوێنی دیاریكراوی مەڕاسیمەكە،  بۆ ئەو مەبەستە لە (هۆتێل ئاشوور) لە شارۆچكەی دوكان ئامادە بن". دەقی ڕاگەیاندراوەکەی کەجەکە پەیوەست بە مەراسیمی چەک لەناوبردن وەهایە: مەڕاسیمی لەناوبردنی چەک، سەرلەبەیانی ڕۆژی هەینی ١١ـی تەمووز، کاتژمێر ٨:٠٠ بۆ ٩:٠٠ بەڕێوەدەچێت، شوێنی دیاریکراو ئاشکرا ناکرێت، بەڵام پاس دابینکراوە و هەموو بەشداربوان دەگەیەنێتە شوێنێک نزیک لە شوێنی دیاریکراوی مەڕاسیمەکە، بۆ ئەو مەبەستەش لە (هۆتێل ئاشوور) لە شارۆچکەی دوکان ئامادە بن. بەشداربوون پێویست بە هیچ خۆتۆمارکردنێکی پێشوەختە ناکات، بەڵام پێویستە باجی تایبەتی ڕۆژنامەوانیی و ناسنامەتان پێ بێت و خۆتان بناسێنن، لەو شوێنەی کە بۆی دەبرێن بۆ ڕووماڵکردن، مەڕاسیمەکە لە شاشەیەکی گەورەوە نیشان دەدرێت، هەروەها دەتوانن بە خواستی خۆتان دیمەن و دەنگی خامی مەڕاسیمەکە بەدەستبهێنن، ئەو شوێنە کارەبای لێ دەبێت، بە هۆکاری ئەمنیی ناتوانن لێدوان لە ئەندامانی گرووپەکە وەربگرن، بەڵام قسەکردن لەگەڵ چاودێرەکان ئاساییە. هەرچەند تا دوو رۆژ لەمەوبەر بڕیار بوو ڕێوڕەسمی چەكدانانەكە لە لایەن ڕۆژنامەنووسانەوە ڕووماڵ بكرێت و بە شێوەی ڕاستەوخۆ پەخش بكرێت، كەچی ڕاگەیەندراوێكی ناوەندی ڕاگەیاندنی كەجەكە لە درەنگانی شەودا بووە جێی سەرنج. كەجەكە لە ڕاگەیەندراوەكەیدا ئاماژەی بەوە داوە كە بەهۆی دۆخی ئەمنیەوە، ناچاربوون لە ماوەیەكی كورتدا وردەكارییەكان سەبارەت بەو مەراسیمە بگۆڕن كە پلانی بۆ دانرابوو لە سلێمانی بەڕێوەبچێت و دەڵێت: "مەراسیمەكە بەو شێوەیەی كە پلانی بۆ دانرابوو ئەنجام دەدرێت، بەڵام ڕاستەوخۆ پەخش ناكرێت و ڕۆژنامەنووسانیش ناتوانن ئامادەی بن".

  سەرچاوەیەکى ئاگادار ڕایگەیاند، حکومەتى هەرێمی کوردستان تەنیا 48 کاتژمێر مۆڵەت بە بەغدا دەدات بۆ ناردنی مووچەی فەرمانبەران، ئەگەر وەڵامێکی ئەرێنی نەداتەوە، ئەوا دەست دەکات بە جێبەجێکردنی ئەو بژاردانەی کە لەبەردەمیدان، کشانەوەش لە پڕۆسەی سیاسی عێراق یەکێکە لە بژاردەکان. ئەمڕۆ لیژنە پێنج کەسیەکە یەکەم کۆبونەوەی خۆی لە بەغدا ئەنجامدا، دوای ئەوەی رۆژی 8-7-2025 لەلایەن سەرۆک وەزیرانەی عێراقەوە پێکهێنرا بۆ چارەسەرکردنی کیشەکانی نێوان هەولێر و بەغداد. فراکسیۆنی پارتی بڕیاریداوە ئیتر بەشداری هیچ دانیشتنێکی پەرلەمانی عێراق نەکات هەتا بەغدا بە ئەرێنی وەڵام دەداتەوە و شایستە داراییەکانی خەڵکی کوردستان دەنێرێت، ئەمە وەکو هەنگاوی یەکەمە. لەلایەکى دیکەوە لیژنە وەزارییەکەى عێراق بۆ چارەسەرى کێشەکانى نێوان هەولێر و بەغدا یەکەم کۆبووونەوەی خۆی کرد، بە گوێرەى راگەیێنراوێکى وەزارەتى پلاندانانى عێراق، کۆبوونەوەکە بۆ تاوتوێکردنی دۆسیە هەڵپەسێراوەکانی نێوان حکومەتی فیدراڵی و حکومەتی هەرێمی کوردستان بووە.     لە راگەیێنراوەکەدا هاتووە: "لە کۆبوونەوەکەدا، هەردوو کارنامەی پێشکێشکراوی حکومەتی فیدراڵی و هەرێمی کوردستان خرانەڕوو، کە چەند تەوەرێکی گرنگیان لەخۆگرتبوو؛ لەوانە، دۆسیەی هەناردەکردنی نەوت و میکانیزمەکانی رێکخستنی، بڕى بەکارهێنانى ناوخۆیی بەرهەمە نەوتییەکان، هەروەها رادەستکردنی پشکی گەنجینەی فیدراڵی لە داهاتە نانەوتییەکان لەلایەن هەرێمی کوردستانەوە، جگە لە گفتوگۆکردن لەبارەی بەجێکردنى مووچەی فەرمانبەران."   لیژنەکە سێشەممە 8ـی تەممووز پێکهێنرا بۆ ئەوەى هەردوو رەشنووسی هەولێر و بەغدا لە بارەى داواکارییەکانى نێوانیان لەبارەى پرسى نەوت و مووچە یەکبخەن.

  سەرۆکوەزیرانی عێراق، ڕایدەگەیەێت حکومەت پلانێکى هەیە بۆ سنووردارکردنی چەک لە دەوڵەتداو لەسەر ئەو کارەشى بەردەوامە. ڕۆژى چوارشەممەـ نووسینگەی ڕاگەیاندنی سەرۆک وەزیرانی عێراق لە ڕاگەیەندراوێکدا ئەوەى خستوەتەڕوو محەمەد شیاع سودانی، سەرۆک وەزیرانی عێراق سەردانی میوانخانەی میری هۆزەکانی بەنی حەسەنی لە قەزای ئەلحەیدەریەکردوە لە پارێزگای نەجەف. سودانی لەگەڵ شێخ و کەسایەتییەکانی قەزاکە و خەڵکی گشتی کۆبووەتەوە، لەبەشێکى قسەکانیدا ئەوەى ڕوونکردەوە، ڕێگە بە هیچ لایەن و قەوارەیەک نادەین لە پرەنسیپ و نەگۆڕەکان لابدات، بەتایبەتی کاتێک باس لە سەروەری یاسا دەکەین کە هەمووان دەپارێزێت. ئەو جەختیشی لەوە کردەوە "دەوڵەت، بە دامەزراوە فەرمییەکانییەوە، بەرپرسیارە لە بڕیاری ئاشتی، شەڕ، یان پەیوەندییەکانی دەرەوە"، بەرتەسککردنەوەی چەک بۆ دەوڵەت یەکێکە لە بنەماکانی بنیاتنانی دەوڵەت و حکومەت بەپێی پلانێک بۆ گەیشتن بەو ئامانجە بەردەوامە".  ناوبراو هێمای بۆ ئەوەش کرد کە "عێراق لەناو ناوچەیەکی پڕ لە توندوتیژیدایە و نزیکە لە شەڕەکەو ئەو دەستدرێژییەی ئیسرائیل لەئێران دەستی پێکردوە. سودانی هەر لەو سەردانەیدا لە بارودۆخی ژیان و کۆمەڵایەتییان ئاگادارکراوەتەوە، داواکاری و پێداویستییەکانیشی وەرگرتووە، سوپاسی هۆزەکانی بەنی حەسەنی کردووە بۆ ئەو بانگهێشتە میهرەبانانە و لە نێو گەلەکەماندا بوون لە قەزای ئەلحەیدەرییە، کە وێستگەیەکی ناوەندی لەسەر ڕێگای حاجیان پێکدەهێنێت و پەناگەیەک بۆ هەموو سەردانکەران لەڕۆژانی ڕژێمی دیکتاتۆرو ئەمڕۆش خزمەتی سەردانکەرانی دەکەن. دووپاتیشی کردەوە "سەردانەکەی بۆ پارێزگاری نەجەفی پیرۆز درێژەپێدەری بەرنامەی حکومەتە و پشتڕاستکردنەوەی دروشمی حکومەتی خزمەتگوزارییە، بەو پێیەی ئێستا سەرجەم پارێزگاکان شاهیدی پڕۆژەی خزمەتگوزارین کە هاوتەریبن لەگەڵ هیوا و قوربانیدانی عێراقییەکان". ڕوونیشی کردەوە کە "ئێمە پابەندین بە پاراستنی بەرژەوەندییە باڵاکانی عێراق و عێراقییەکان، و ڕێگە نادەین وڵاتەکەمان بەشێک بێت لە گۆڕەپانی شەڕ و ململانێکان". ئەلسودانی لە کۆتایی قسەکانیدا وتی: ئێمە بەردەوام دەبین لە پڕۆسەی بنیاتنانەوە و گەشەپێدان و ئاوەدانکردنەوەی وڵاتەکەمان، بە تێڕوانینێکی یەکسان و بێ جیاکاری بۆ هەموو عێراقییەکان، بە سپێکترۆمە هەمەچەشنەکانیانەوە.

  نێچیرڤان بارزانی، سەرۆکی هەرێمی کوردستان و قاسم ئەعرەجی، راوێژکاری ئاسایشی نەتەوەیی عێراق کۆبوونەوە و تیایدا جەختیان لەسەر گرنگیی هەماهەنگیی ئەمنیی نێوان پێشمەرگە و سوپای عێراق، دوورخستنەوەی عێراق لە کێشەکانی ناوچەکە و پاراستنی سەقامگیری کردەوە.   ئەمڕۆ چوارشەممە، 9ی تەممووزی 2025، نێچیرڤان بارزانی، سەرۆکی هەرێمی کوردستان پێشوازی لە قاسم ئەعرەجی، راوێژکاری ئاسایشی نەتەوەیی عێراق و شاندێکی یاوەری کرد.   بەپێی راگەیێندراوێکی سەرۆکایەتیی هەرێمی کوردستان، لە کۆبوونەوەکەدا دوا پێشهاتە ئەمنییەکانی عێراق تاوتوێ کراون و هەردوولا هاوڕا بوون لەسەر گرنگیی بەردەوامیی هاریکاریی ئەمنیی نێوان هێزەکانی پێشمەرگە، سوپای عێراق و هێزە ئەمنییەکان. هەروەها، لە بەشێکی دیکەی گفتوگۆکاندا، باس لە دوا هەوڵ و هەنگاوەکانی پرۆسەی ئاشتی لە تورکیا کرا.   سەبارەت بە دۆخی رۆژهەڵاتی نێوەڕاست و کاریگەرییەکانی لەسەر ناوچەکە، نێچیرڤان بارزانی و قاسم ئەعرەجی هاوڕا بوون کە پێویستە عێراق تێکەڵی کێشە و ئاڵۆزییەکان نەکرێت و کار بۆ پاراستنی ئارامی و سەقامگیریی وڵات بکرێت.   لایەنێکی دیکەی کۆبوونەوەکە، کە رێبەر ئەحمەد، وەزیری ناوخۆی هەرێمی کوردستان ئامادەی بوو، تایبەت بوو بە پرسی پاراستنی ئاسایشی سنوورەکان و چەند بابەتێکی دیکەی ئەمنی.

  بەپێى ڕاپۆرتێکى هەواڵگری بەهۆى هێرشەکانى ئیسرائیل و بەردەوامى شەڕەکە، ئێران نیوەی کۆگای مووشەکەکانی لەدەستداوە، تاران نزیکەی سێ هەزار مووشەکى بەکارهێناوە لەشەڕەکەداو ئێستا نزیکەی هەزار مووشەکی ماوە. لەکاتێکدا ئاگربەست هەیە، ئێران بەردەوامە لە هۆشداریدان بە ئەمریکا و ئیسرائیل کە توانای زیانگەیاندنی بەرچاوی هەیە لە ئەگەری دەستپێکردنەوەى جەنگدا. کاربەدەستانی ئێران بانگەشەی ئەوەیان کردووە کە وڵاتەکەیان توانای ئەنجامدانی هێرشی مووشەکی ڕۆژانەی هەیە بۆ ماوەی دوو ساڵ، ئەو بانگەشەیە کە زیاتر لێکۆڵینەوەی شارەزایانی سەربازی و شرۆڤەکارانی هەواڵگری لە ڕۆژئاوای بۆ خۆی ڕادەکێشێت. بەپێى شیکاری هەواڵگریە ئاماژە بەوە دەکات کە ئەم لێدوانانەی ئێران ڕەنگە زیانێکی بەرچاو بشارنەوە، بەگوێرەی فۆکس نیوز. بەگوێرەی ڕاپۆرتێکى هەواڵگری، تاران بە جبەخانەیەک کە بە نزیکەی ٣٠٠٠ مووشەک و ٥٠٠ بۆ ٦٠٠ لانچەر مەزەندە دەکرێت، ململانێکانی دەستپێکردووە. بەڵام تا کۆتایی ئەو شەڕەی کە بە "جەنگی ١٢ ڕۆژە" ناسرا، کە زنجیرەیەک هێرشی ئیسرائیلی لەخۆگرتبوو کە کۆگاکانی عەمبارکردنی سەربازی و دامەزراوە بەرهەمهێنانەکانی کردە ئامانج، دواتر هێرشەکانی ئەمریکا بۆ سەر شوێنە ئەتۆمییەکان و وەڵامدانەوەی ئێران، جبەخانەی ئێران کەمکرابووەوە بۆ نێوان هەزار بۆ هەزار و ٥٠٠ مووشەک و تەنها ١٥٠ بۆ ٢٠٠ مووشەک هەڵگر. لەم پێوەندییەدا فۆکس نیوز لەزارى چەند شارەزایەکى دامەزراوە سەربازى و بەرگرییەکانى ئێرانەوە دەڵێت: بە لەبەرچاوگرتنی ئامانجە مووشەکهاوێژەکانی ئیسرائیل، ڕژێمی ئێران تا دێت ناچارە لەنێوان بەکارهێنانی ئەو مووشەکانە یان لەدەستدانیان هەڵبژێرێت. لای خۆیەوە، دانی سیترینۆڤیچ، پسپۆڕی ئێران لە ئینستیتیوتی لێکۆڵینەوەکانی ئاسایشی نیشتمانی، ئاماژەی بەوەدا کە "گۆڕینی شێوازەکانى هەڵدانی دوای ئەوەی ئیسرائیل تواناکانی بەرهەمهێنانی لەناوبرد، لەڕادەبەدەر قورس دەبێت". سیترینۆڤیچ بۆ فۆکس نیوز زیادی کرد: ئیسرائیل هێرشی کردە سەر هەموو شوێنێک کە ئێرانییەکان مووشەکیان لێ دروست دەکرد. ئاماژەی بەوەشکردووە، ڕەنگە ئێران بتوانێت بە مووشەکەکانی هێرش بکاتە سەر ئیسرائیل، "بەڵام بە سەدان نا". جەختی لەوە کردەوە کە سەرەڕای ئەو پاشەکشەیانەی ئێران تووشی بووە، بەڵام "هەروەها وەک گەورەترین هێزی مووشەکی بالیستی لە ڕۆژهەڵاتی ناوەڕاستدا دەمێنێتەوە". ئاماژەی بەوەشکرد، ئێمە ئەمەمان لە کاتی جەنگدا بینی، کاتێک ئێران توانی بچێتە ناو ئاسمانی ئیسرائیلەوە، تەنانەت لە کاتێکدا کە سیستەمی ئاسنی دۆم و سیستەمی ئەمریکی بەردەوام مووشەکی ڕێگرییان لێدەدا بۆ ئەوەی تەنها یەک مووشەکی بالیستیکی بوەستێنن.

  رەجەب تەیب ئەردۆغان، سەرۆککۆماری تورکیا لە پاش پەیامە ڤیدیۆییەکەی عەبدوڵڵا ئۆجەلان رایگەیاند، "دەیان ساڵە میللەتی ئێمە چاوەڕێی ئاشتییە و دەبێ پرۆسەکە زوو بەرەوپێش بچێت". عەبدوڵڵا ئۆجەلان، رێبەری زیندانیکراوی پەکەکە کە لە ساڵی 1999وە لە زیندانی دوورگەی ئیمرالییە، دوای نزیکەی 27 ساڵ پەیامێکی ڤیدیۆیی بڵاوکردەوە.    ئەردۆغان سەرۆکی پارتی داد و گەشەپێدان لە کۆبوونەوەی گروپی پەرلەمانی پارتەکەیدا لەپەرلەمان وتارێکى پێشکەشکرد، وتى: کاتێک دیواری تیرۆر ڕووخێنرا ان شاءاللە هەموو شتێک زۆر باشتر دەبێت. براوەکان هەموو وڵاتەکەمان دەبن، کورد، تورک، عەرەب.  سەبارەت بەدیدارەکەى لەگەڵ شاندى ئیمرالى ئەوەى خستەڕوو ڕۆژی دووشەممە پێشوازیم لە شاندی پارتی دیموکرات کرد. ئەو دەڵێت: دیدارێکی زۆر بەرهەمدار و بنیاتنەرمان لەگەڵ ئەوان ئەنجامدا. ئێمە ئامانجی خۆمان بۆ تورکیایەکی بێ تیرۆر دووپات کردەوە. ئێمە دەچینە قۆناغێکەوە کە لە ڕۆژانی داهاتوودا هەواڵی ئەرێنیمان پێدەگات. هیوادارین ئەم پڕۆسە بەختەوەرییە لە زووترین کاتدا بە سەرکەوتوویی تەواو بێت، بەبێ ئەوەی هیچ ڕووداوێک ڕووبدات. قسەکانی ئەردۆغان لە پاش پەیامە ڤیدیۆییەکەی عەبدوڵڵا ئۆجەلان، رێبەری زیندانیکراوی پەکەکە دێت کە سەرلەبەیانیی ئەمڕۆ بڵاویکردەوە. پەیامەکەی ئۆجەلان کە بەیانی ئەمڕۆ چوارشەممە، 9ی تەمموز بۆ رای گشتیی بڵاوکرایەوە، لە 19ی حوزەیرانی 2025 تۆمارکراوە.    ئۆجەلان لە پەیامەکەدا پێداگری لەسەر بانگەوازەکەی 27 ـی شوباتی ئەم ساڵی دەکاتەوە کە تێدا داوای خۆهەڵوەشاندنەوە و چەکدانانی لە پەکەکە کرد و دەڵێ، ئەو بانگەوازەی بۆ بەدەستهێنانی ئاشتی و بنیادنانی كۆمه‌ڵگه‌ی دیموكراسی کردووە.