هاوڵاتی کەناڵی تەلەفیزیۆنی حووسیەکانی یەمەن رایگەیاند، کە بە هۆی هێرشی ئاسمانی هێزە هاوبەشەکانی ئەمریکا و بەریتانیاوە لە شەو و رۆژی رابردوودا 14 کەس کوژراون و 30 کەس بریندار بوون. سێنتکۆم ، ناوەندی فەرماندەیی هێزەکانی ئەمریکا، رایگەیاند، ئەم هێرشانە لە تۆڵەی هێرشێ حووسییەکاندا بووە بۆ سەر کەشتییەکان لە دەریای سوور. سێنتکۆم وتیشی، بە مووشەک 13 شوێن لە یەمەن کە بە دەست حووسییەکانەوە بووە کراوەتە ئامانج، هەروەها 8 درۆنی حووسییەکان خراوەتە خوارەوە. لە چەند مانگی رابردوودا، حووسییەکان بەردەوامن لە هێرشکردن بۆ سەر کەشتییە بازرگانی و سەربازییەکان لە دەریای سوور. رۆژی چوار شەممە 29ی ئایار حووسییەکان رایانگەیاند درۆنێکی ئەمریکی لە جۆری MQ-19یان لە پارێزگای مەعاریب لە باشووری رۆژهەڵاتی یەمەن خستۆتە خوارەوە، هاوکات راشیانگەیاند، هێرشیان کردە سەر 6 کەشتی لە دەریای سوور.
هاوڵاتی سەرۆک کۆماری عێراق ئیمزای لەسەر لەسێدارەدانی 8 کەسکردووە كه تاوانی تیرۆیان به‌سه‌ردا ساغبووه‌ته‌وه و سه‌ربه رێكخراوی داعش بوون. ئەمڕۆ هەینی 31ی ئایاری 2024، ئاژانسی هه‌واڵی فرانس پرێس، له زاری چه‌ند سه‌رچاوه‌یه‌كی ئه‌منیی و ته‌ندروستی عێراقه‌وه رایگەیاند سزای له‌سێداره‌دانه‌كانی دوێنێ پێنج شه‌ممه 30 ی ئایاری 2024، به‌سه‌رپه‌ره‌شتی تیمی وه‌زاره‌تی داد له گرتوخانه‌ی حوت له شاری ناسریه‌ی پارێزگای زیقاری باشوری عێراق، جێبه‌جێ كراون. سه‌رچاوه‌یه‌كی پزیشكی به ئاژانسه‌كه‌ی راگەیاندووە، ته‌رمی له‌سێداره‌دراوه‌كان راده‌ستکراوەنەوە. به‌گوێره‌ی یاسای عێراق، تاوانه‌كانی تیرۆر و كوشتن، سزاكه‌یان له‌سێداره‌دانه، به‌ڵام بۆ جێبه‌جێكردنی سزای له‌سێداره‌دان ده‌بێت سه‌ره‌تا سه‌رۆك كۆمار ئیمزای له‌سه‌ر بكات و ئه‌و 8 كه‌سه‌ی، كه سزای له‌سێداره‌دانیان به‌سه‌ردا جێبه‌جێ كراوه، به‌گوێره‌ی مادده‌ی 4ی یاسای روبه‌ڕووبوونه‌وه‌ی تیرۆر حوكمدراون. ئەمەش لە کاتێکدایە له مانگی رابردووه‌وه، ئه‌مه سێیهەمین گروپی تاوانباری تیرۆرن، كه له عێراق سزای له‌سێداره‌دانیان به‌سه‌ردا جێبه‌جێ بكرێت، له 22 نیسانی رابردوودا ده‌سه‌ڵاتدارانی عێراق سزای له‌سێداره‌دانی 11 كه‌س له 6ی ئایاریشدا سزای له‌سێداره‌دانی 11 كه‌سی تر جێبه‌جێ كرد. جێگای ئاماژەیە، کە دادگاكانی عێراق له‌م ساڵانه‌ی دوایدا سه‌دان حوكمی له‌سێداره‌دان و زیندانی هه‌تاهه‌تاییان بۆ ئه‌و كه‌سانه ده‌ركردووه كه سه‌ربه گروپه تیرۆرستییه‌كان بوون، ئه‌مه‌ش تۆمه‌تێكه كه سزاكه‌ی ده‌گاته ئاستی له‌سێداره‌دان ئه‌گه‌ر هاتوو تۆمه‌تباری بكوژ له ریزی ئه‌و گروپانه‌دا بێت. له‌ماوه‌ی رابردووداشدا ، عێراق له‌لایه‌ن رێكخراوه‌كانی مافی مرۆڤه‌وه روبه‌ڕووی ره‌خنه بووه‌وه، تۆمه‌تبار كرا به‌وه‌ی پرۆسه‌ی دادگایكردنه‌كان به‌شێوه‌یه‌كی خێرا به‌ڕێوه‌ده‌بات و له‌ژێر ئه‌شكه‌نجه‌داندا، دانپێدانان له ده‌ستگیركراوان وه‌رده‌گرێت.
هاوڵاتی کەشناسی هەرێم، سبەی شەممە پلەکانی گەرما نزمدەبێتەوە و ئاسمانیش ساماڵ دەبێت. ئه‌مڕۆ هه‌ینی 31ی ئایاری 2024، كه‌شناسی هه‌رێم رایگه‌یاند، ئه‌مڕۆ ئاسمان ساماڵ ده‌بێت له‌گه‌ڵ بوونی تۆزێكی سووك، سبەی شەممەش پله‌كانی گه‌رما نزیك ده‌بنه‌وه و ئاسمان ساماڵ ده‌بێت له‌گه‌ڵ به‌رزبوونه‌وه‌ی تۆز و خۆڵ، له تۆماركراوه‌كانی دوێنێ. دەشڵێت، رۆژی شه‌ممه 1ی حوزه‌یرانی 2024، ئاسمان ساماڵ دەبێت، پلەکانی گەرما نزمتر دەبێتەوە بە رێژەى چوار بۆ پێنج پله لە تۆمارکراوەکانى ئەمڕۆ. دەستەى گشتى کەشناسیى عێراقیش لای خۆیەوە رایگەیاند، "ئەمڕۆ هەینى پلەکانى گەرما بەراورد بە رۆژانى پێشتر لەناوچەکانى باشوور و ناوەڕاستى عێراق نزمدەبنەوە، بەڵام لەهەرێمى کوردستان هاوشێوەى رۆژانى پێشتردەبێت، بۆ رۆژی شەممەو یەکشەمەش دەڵێت، رۆژى شەممە، پلەکانى گەرما لەتەواوى وڵات نزمدەبنەوە، خێرایی با زیاد دەکات و تۆز و خۆڵ لەهەوادا دەبێت و رۆژى یەکشەممە پلەکانى گەرما کەمێک بەرزدەبنەوە". بەرزترین پلەکانی گەرمای پێشبینیکراو بە پلەی سیلیزی لە هەرێمی کوردستان، هەولێر: 35 سلێمانى: 35 دهۆک: 33 زاخۆ: 34 هەڵەبجە: 37 کەرکوک: 37 سۆران: 33 حاجی ئۆمەران: 24 گەرمیان: 39.
هاوڵاتی بەڕێوەبەرایەتی کارەبای سلێمانی، رایگەیاند، بەرنامەی کارکردنی موەلیدەی گەڕەکەکان لە رۆژی 1ی حوزەیرانی 2024, دەگۆڕێت و دەبێت بە 24 کاتژمێری. ئەمڕۆ هەینی30 ی ئایاری 2024، بەڕێوەبەرایەتی کارەبای سلێمانی خاوەن موەلیدە ئەهلییەکان ئاگاداردەکاتەوە و دەڵێت، کە بەرنامەی کارکردنی موەلیدەی گەڕەکەکان لە رۆژی 1ی حوزەیرانی 2024, دەگۆڕێت و دەبێت بە 24 کاتژمێری. ئەوەشی خستۆتەڕوو، هەرکاتێک کارەبای نیشتیمانی کوژایەوە دەبێت کاربکەن و کارەبا بەهاوڵاتیان بدەن.
هاوڵاتی وه‌زاره‌تی ته‌ندروستی عێراق، تێچووی رۆژانەی جگەرەکێشان لە عێراق 6 ملیار دینارە، له‌سه‌دا 20%ئه‌و کەسانەشی جگەرەکێشن له سه‌رووی ته‌مه‌نی 18 ساڵیه‌وه‌یە. ئەمڕۆ هەینی31ی ئایاری 2024، وه‌سیم گه‌یلان یاریده‌ده‌ری به‌ڕێوه‌به‌ری به‌رنامه‌ی ڕووبه‌ڕووبوونه‌وه‌ی جگه‌ره كێشان له وه‌زاره‌تی ته‌ندروستی عێراق رایگه‌یاند، "تێچووی رۆژانەی جگەرەکێشان لە عێراق 6 ملیار دینارە، به رێژه‌ی له‌سه‌دا 40% بۆ 50% عێراقییه‌كان به‌هۆی كاریگه‌رییه‌كانی جگه‌ره‌كێش و دوكه‌ڵی جگه‌ره‌وه زیانی زۆریان به‌رده‌كه‌وێت". ئه‌وه‌شی خسته‌ڕوو، "پیاوان زۆرینه‌ی هه‌ره زۆری جگه‌ره كێشانن له عێراق، تێچووی رۆژانه‌ی جگه‌ره‌كێشان له عێراق شه‌ش ملیار دیناره و پێشبینی ده‌كرێت له هه‌ر 10 خوله‌كێك كه‌سێك له عێراق به‌هۆی كاریگه‌رییه‌كانی جگه‌ره كێشانه‌وه ده‌مرێت".
هاوڵاتی لە پارێزگای كەركوك ژنێكی تەمەن 25 ساڵ بەهۆی نەخۆشی تای خوێنبەربوون گیانیلەدەستدا. ئەمڕۆ هەینی 31ی ئایاری 2024، بەشی ڕاگەیاندنی بەڕێوەبەرایەتی ڤێرتەرنەری كەركوك رایگەیاند، "ژنێكی تەمەن 25 ساڵی خەڵکی پارێزگای کەرکوک بەهۆی نەخۆشی تای خوێنبەربوون گیانیلەدەستدا، هەڵمەتێكی چڕیش بۆ ڕشتنی دەرمان لە گوند و كێڵگەكان بۆ كۆنترۆڵكردنی نەخۆشییەكە ئەنجامدەدرێت.". دەشڵێت، "لەدوای ئەنجامدانی پشکنین بۆی دەرکەوتووە ئەو ژنە توشی نەخۆشی تای خوێنبەربوون بووە بەهۆیەوە گیانیلەدەستداوە". هاوكات د.سەباح نوری لە بەڕێوەبەرایەتی نەخۆشخانەی ڤێرتەرنەری فێركاری لە كەركوك ڕایگەیاند، "هەڵمەتێكی چڕ بۆ ڕشتنی دەرمان لە گوندەكان دەستپێدەكەن، بە تایبەت لە گوندی مەقام، كە ئەو حاڵەتی تێدا دەركەوتووە". راشیگەیاند، "هۆشداری لەبارەی نەخۆشییەكە و ڕێگەكانی خۆپارێزی بڵاودەكەنەوە".
هاوڵاتی سەرۆکایەتی پەرلەمانی عێراق لە رێگەی نوسراوێکەوە رایگەیاند، رۆژی 3ی حوزەیران بۆ پەسەندکردنى خشتەکانى بودجەى گشتى عێراق دیاریکراوە و دانیشتنێک دەکەن بۆ پەسەندکردنی. ئەمرۆ هەینی31ی ئایاری 2024، سەرۆکایەتى پەرلەمانى عێراق لە رێگەی راگەیاندراوێکەوە، رۆژى دووشەممە 3ى حوزەیرانى بۆ پەسەندکردنى خشتەکانى بودجەى گشتى عێراق دیاریکرد. بەگوێرەى راگەیەندراوەکەی سەرۆکایەتی پەرلەمان، کە ئاڕاستەى ئەندامانى پەرلەمان کراوە، "دانیشتنەکە کاتژمێر سێی پاشنیوەڕۆ رۆژی دوشەممە دەستپێدەکات". ئەمەش لە کاتێکدایە، پەرلەمانى عێراق بۆ پەسەندکردنى خشتەکانى بودجەى 2024 وەرزى یاسادانانى بۆ ماوەى مانگێک و تاوەکو نۆى حوزەیران درێژکردووەتەوە، بەڵام زیاتر لە 80 پەرلەمانتار بۆ بەجێهێنانى فەریزەى حەج چوونەتە سعودیە، ئەوەش پەسەندکردنى خشتەکانى بوجەى 2024 لە ماوەى درێژکراوەى وەرزى یاسادانان ئەستەم دەکات. بەگوێرەى زانیارییەکان، پێش جەژنى قوربان، خوێندنەوەى یەکەم و دووەم بۆ خشتەکانى بودجەی 2024 دەکرێت، بەڵام پەسەندکردنیان دەکەوێتە دواى جەژن. جێگای ئاماژەیە، رۆژى 19ی ئایار ئەنجوومەنى وەزیرانى عێراق خشتەکانى بودجە و کورتهێنانى پەسەندکرد و رۆژى 20 ئایار ئاڕاستەى سەرۆکایەتیى پەرلەمان کرد.
هەوراز حوسێن هاوڵاتی، وارشۆ ئەوە دوو رۆژە کۆریای باکوور سەدان زەرفی زبڵی بە باڵۆندا بۆ کۆریای باشوور ناردووە. لە زەرفەکاندا هەموو جۆر پیساییەکی وەکو پارچەی جل، دایبی، پیسایی ئاژەڵ و پاشماوەی جگەرەی تێدایە. رۆژی چوارشەممە 30-5-2024، کیم یۆ جونگ، خوشکەکەی سەرۆکی کۆریای باکوور پشت راستیکردەوە، کە بە باڵۆندا پیسایی و زبڵیان بۆ کۆریای باشوور بە مەبەستی 'هەڕەشەکردن" و وەک وەڵامێک بۆ چالاکڤانەکانی ئەو وڵاتە ناردووە. لە شەوی سێشەممەوە، لانیکەم 260 باڵۆن کە زەرفی زبڵیان پێوە لکاوە لە کۆریای باکوورەوە رەوانەی کۆریای باشوور کراون و لە شوێنی جیا جیای ئەو وڵاتەدا دۆزراونەتەوە. کۆریای باشوور دەستبەجێ دەستی بە لێکۆڵینەوەی لە زەرفە زبڵەکان کردووە و رایگەیاندووە، لە لێکۆڵینەوە سەرەتاییەکاندا دەرکەوتووە هیچ مادەیەکی زیانبەخشی کیمیایی، بایۆلۆجی یان تیشکدەرەوە لە نێو زەرفەکاندا نەبوون. ئەمە جاری یەکەم نییە لە کۆریای باکوورەوە زەرفی زبڵ یان کەرەستەی دیکە بۆ دراوسێ هاونیشتمانەکەی بنێردرێت. لە 2016دا ژمارەیەک باڵۆن، کە زبڵ و سیدی پەستێنراو و پەڕەیان تێدابوو، بۆ کۆریای باشوور نێردران و لە کاتی بەربوونەوەیاندا زیانیان بە ژمارەیەک ئۆتۆمبێل گەیاند. مێژووی ئەم کارە بۆ جەنگی نێوان هەردوو کۆریا دەگەڕێتەوە لە ساڵی 1950 بۆ 1953، کە وەک شەڕێکی دەروونی بەرامبەر یەکتر بەکاریان دەهێنا و زبڵ و نوسراوی هەراسانکەریان لە نێو زەرفدا بە باڵۆندا بۆ یەکدی دەنارد.
هەوراز حوسێن هاوڵاتی، وارشۆ ئاژانسی پۆلیتیکۆ دەڵێت، لە زاری دوو بەرپرسی باڵای ئەمریکاوە زانیویانە، جۆ بایدن بە نهێنی رێگەی بۆ ئۆکراینا کردووەتەوە چەکی ئەمریکا بۆ هێرشکردنە سەر ناو خاکی رووسیا بەکاربهێنن. رۆژی پێنجشەممە 30-5-2024، بەرپرسێکی باڵای ئەمریکا کە نەیویستووە ناوی ئاشکرا بکرێت بە ئاژانسی پۆلیتیکۆی راگەیاندووە، "سەرۆک کەمێک لەمەوبەر تیمەکەی راسپاردووە رێگە بە ئۆکراینا بدەن چەکی ئەمریکا بۆ بە گژداچوونەوەی هێرشی رووسیا بۆ سەر شاری خارکیڤ، لە ناو رووسیاوە، بەکاربهێنن". واتە ئۆکراینا بۆی هەیە لەو کاتەدا کە زانیاری هەیە لە ناو رووسیاوە، هێرشی مووشەکی یان ئاسمانی دەکرێتە سەر، لەکاتی روودانی هێرشەکەدا یان پێش روودانی، بە چەکی ئەمریکا هێرش بکاتە سەر هێزەکانی رووسیا. ئەو بەرپرسە باڵایەی ئەمریکا ئەوەی ئاشکراکردووە، ئەمریکا هێشتا رێگەی نەداوە بە ئۆکراینا چەکەکانی بۆ هێرشی دوور مەودای قووڵی ناو خاکی رووسیا بەکاربهێنرێت. واتە، ئۆکراینا دەتوانێت هێزەکانی رووسیا کە لە ناوچە سنوورییەکانی رووسیا جێگیرکراون بکاتە ئامانج. دوای هێرشی دووبارەی سەرەتای ئەم مانگەی رووسیا بۆ سەر هەرێمی خارکیڤی ئۆکراینا، کیێڤ داوای لە ئەمریکا کرد ئەو گەمارۆیەی لەسەر هێرشەکانی داینابوو بە چەکی ئەمریکی بۆ ناو خاکی رووسیا لابدات. رووسیا لە رابردوودا ئەوەی بە روونی بە وڵاتانی رۆژئاوا راگەیاندووە، بە هیچ جۆرێک سازش لەسەر هێرشکردنەسەریان بە چەکی ئەو وڵاتانە ناکەن و وەڵامی زۆر توندیان دەبێت.
هەوراز حوسێن هاوڵاتی، وارشۆ ئەو وێنەیەی ماوەی هەفتەیەکە لە تۆڕە کۆمەڵایەتییەکان بڵاوبووەتەوە و کەمپی رەفەح لە غەززە نیشاندەدات، بە زیرەکی دەستکرد دروستکراوە. وێنەکە تاوەکو رۆژی چوارشەممە 45 ملیۆن جار لە تۆڕە جیا جیاکاندا بڵاوکراوەتەوە. وێنەکە سەرەتا لە ئینستاگرام بڵاوەی کرد و لە دواتردا بەکاربەرێکی تیکتۆک لەسەر وێنەکە قسەیکرد و لە کەمتر لە 24 کاژێردا ئەویش 10 ملیۆن تەماشاکەری هەبووە. پاشان رۆژی دووشەممە وێنەکە لە تویتەر دانراوە تاوەکو ئێستا 8 ملیۆن کەس سەیریان کردووە و 188 هەزار کەس ریتویتیان کردووە. وێنەکە بە زیرەکی دەستکرد دروستکراوە و لەسەری نوسراوە، هەموو چاوەکان لەسەر رەفەحن، ئەوەش وەک هاوسۆزییەک بۆ خەڵکی رەفەح و ئەو هێرشانەی دەکرێتە سەریان. هەرچەندە لە سەرەتای دەستپێکی جەنگی نێوان فەڵەستین و ئیسرائیلەوە، لاپەڕەکانی پاڵپشتیکاری فەڵەستین بەردەوام بڵاوکراوەی زۆریان لەسەر فەڵەستین بڵاوکردووەتەوە، بەڵام لە دوای هێرشەکەی رۆژی یەکشەممەی ئیسرائیلەوە بۆ سەر رەفەح کە 45 هاووڵاتی سیڤیل تێیدا کوژران، سەرنجی جیهان لەسەر رەفەح زیایکردووە. سوپای ئیسرائیل هەر دوای رووداوەکە هاتە دەنگ و باسی لەوەکرد، لە هێرشەکەدا دوو فەرماندەی باڵای حەماس کراونەتە ئامانج و بنیامین ناتانیاهو، سەرۆکوەزیرانی ئیسرائیل هێرشەکەی بە هەڵەیەکی تراژیدی ناوبرد. لە حەوتی تشرینی یەکەمی ساڵی رابردوودا، چەکدارانی بزوتنەوەی حەماس پەلاماری ئیسرائیلیاندا و 1200 هاووڵاتی سڤیلیان کوشت و زیاتر لە 250 کەسیشیان بە بارمتەگرت. دوای ئەو رووداوە، ئیسرائیل بانگەوازی جەنگی دژی بزوتنەوەکە راگەیاند و تاوەکو ئێستاش جەنگەکەی بۆ سەر غەززە بەردەوامە. لە هێرشەکانی ئیسرائیلدا بۆ سەر ئەو ناوچەیەی فەڵەستین، تاوەکو ئێستا 36 هەزار کەس کوژراون.
هەوراز حوسێن هاوڵاتی، وارشۆ سوپای ئیسرائیل رایگەیاندووە، تەواوی سنووری نێوان باشووری غەززە و میسریان کۆنترۆڵکردووە. سوپای ئیسرائیل دەیەوێت بە کۆنترۆڵکردنی تەواوەتی ئەو ناوچەیە بتوانێت زیاتر هێزی خۆی بەسەر حەماسدا بسەپێنێت. رۆژی پێنجشەممە 30-5-2024، دانیاڵ هاگاری، گوتەبێژی سوپای ئیسرائیل رایگەیاند، کۆنترۆڵی تەواوەتی سنووری غەزەیان لەگەڵ حەماسدا کردووە، کە سوپای ئیسرائیل بە گەرووی فلادیلفیا ناوی برد. هاگاری گوتی، "گەرووی فیلادلفیا وەک هێڵێکی ئۆکسجین وابوو بۆ حەماس، کە لە رێگەیەوە چەکی بۆ ناو غەززە دەهێنا". ئەو سنوورەی غەززە و میسر تەنیا سنووری غەززە بوو کە ئیسرائیل کۆنترۆڵی نەکردبوو. سوپای ئیسرائیل بەردەوامە لە هێرشەکانی بۆ سەر رەفەح کە ئێستا نیوەی زیاتری دانیشتوانە 2 ملیۆن و 300 هەزارییەکەی غەززەی تێدا ئاوارەن. ئەمە لەکاتێکدایە دادگەی باڵای نەتەوەیەکگرتووەکان زیاتر لە هەفتەیەکە داوای لە ئیسرائیل کردووە، هێرشەکانی رابگرێت. هەروەها رۆژی چوارشەممە 29ی ئەم مانگە، ئیسرائیل بۆ جاری یەکەم تانکی بۆ ناوەندی شاری رەفەح نارد، ئەمەش لەکاتێکدایە کۆمەڵگەی نێودەوڵەتی داوایان لێکردبوو کاری لەو جۆرە نەکات. لە حەوتی تشرینی یەکەمی ساڵی رابردوودا، چەکدارانی بزوتنەوەی حەماس پەلاماری ئیسرائیلیاندا و 1200 هاووڵاتی سڤیلیان کوشت و زیاتر لە 250 کەسیشیان بە بارمتەگرت. دوای ئەو رووداوە، ئیسرائیل بانگەوازی جەنگی دژی بزوتنەوەکە راگەیاند و تاوەکو ئێستاش جەنگەکەی بۆ سەر غەززە بەردەوامە. لە هێرشەکانی ئیسرائیلدا بۆ سەر ئەو ناوچەیەی فەڵەستین، تاوەکو ئێستا 36 هەزار کەس کوژراون.
هاوڵاتی کۆمسیۆنی باڵای سەربەخۆی هەڵبژاردنەکانی عێراق ئاگاداری دەنگدەران دەکاتەوە، بۆ ئەوەی پەلە بکەن لە سەردانیکردنی نزیکترین بنکەی تۆمارکردنی لە شوێنی نیشتەجێبوونیان بۆ تۆمارکردنی داتای بایۆمەتری. ئەمڕۆ پێنجشەممە 30ی ئایاری 2024، ئۆفیسی کۆمسیۆنی باڵای سەربەخۆی هەڵبژاردنەکانی عێراق لە هەولێر رایگەیاند، "لە دوای 2ی6ی2024 ناتوانیت داتای بایۆمەتری خۆت تۆمار بکەیت و بۆ دڵنیابوون لە بەشداریکردن لە هەڵبژاردنی پەرلەمانی هەرێمی کوردستانى – عێراق 2024 پێش ئەو وادەیە خۆیان تۆماربکەن". ئاماژەی بەوەشکردووە، "رۆژی هەینی 31ی5 و رۆژی شەممە 6ی1 دەوامی فەرمییە لە بنکەکانی تۆمارکردنی سەر بە ئۆفیسی هەڵبژاردنەکانی پارێزگاکانى هەرێمى کوردستان".
هاوڵاتی ئەمڕۆ پێنجشەممە 30ی ئایاری 2024، کۆبوونەوەى ئەنجوومەنی وەزارەتی کارەبا بە سەرپەرشتیی کەمال محەمەد ساڵح، وەزیری کارەبا و ئامادەبوونى بریکار، راوێژکاران، بەڕێوەبەرانی گشتیی کارەبای پارێزگاکان و ئیدارە سەربەخۆکان بەڕێوەچوو و چەند بڕیارێکی گرنگی تێدا درا. بڕیار لەسەر جێبەجێکردنی دادپەروەری لە دابەشکردنی کارەبا لە نێوان پارێزگاکان درا. یەکێکی تر لە بڕیارەکان برتیبوو لە زیادکردنی کارەبا و لە وەرزی هاویندا بەرهەمهێنانی کارەبا لە وێستگەکانی بازیان و خەبات و ماس و هەوڵ دەدرێت یەکەیەکی دیکەی وێستگەی کواشی بە گازوایل بەگەڕ بخرێت و چاککردنەوەی یەکەکانی وێستگەکانیش ئەگەر زۆر پێویست نەبێت نەخرێتە وەرزی هاوین. وەزارەتى کارەبا دەشڵێت، "تیمەکانی هێڵەکانی پاڵەپەستۆی بەرز وێڕای ئەوەی چاکسازییان لە هێڵەکانی کارەبا کردووە، لە ئامادەباشیدان بۆ چارەسەرکردنی هەر کێشەیەکی تەکنیکی، هەرلە کۆبوونەوەکەشدا بڕیاری کارپێکردن و تەواوکردنی پرۆژەی پێوەری زیرەک لە شارەکان دراوە".
هاوڵاتی ئەمڕۆ پێنجشەممە 30ی ئایاری 2024، دوای نزیکەی مانگێک لە بێسەروشوێنی نەجمەدین محەمەد تەمەن 75ساڵ لە شاخی قەرەداغ، تەرمەکەی درایەوە دەستی کەسوکارەکەی. جێگای ئاماژەیە، نەجمەدین محەمەد تەمەن 75ساڵ نزیکەی مانگێک لە بێسەروشوێن بوونی لە شاخی قەرەداغ، دوێنێ 29ی ئایاری 2024 لە رێگەی دوو هەنگەوانەوە تەرمەکەی دۆزرایەوە و ئەمڕۆش گەیەندرایە پەیمانگای پزیشکی دادی سلێمانی و درایەوە دەست کەسوکارەکەی. پێشتریش، بەڕێوەبەرایەتی پۆلیسی پارێزگای سلێمانی بڵاویکردەوە، دوای ئەوەی هاووڵاتییەک بەناوی (نەجمەدین محەمەد ساڵح) تەمەن 75 ساڵ لەڕۆژی 1ی ئایاری 2024ەوە لەماڵ چوبوە دەرەوەو چارەنوسی نادیار بوو، هێزەکانی پۆلیس بەردەوامبون لەگەڕان و پشکنین و لێکۆڵینەوەکانیان بۆ دۆزینەوەی هاووڵاتییەکە و سەرەنجام 29ی مانگ تەرمی هاووڵاتییەکە لەقۆپییەکانی قەرەداغ دۆزرایەوە. وتیشی، لەئێستادا تیمەکان سەرقاڵی گواستنەوەی تەرمەکەن بۆ پزیشکی دادوەریی بەمەبەستی لێکۆڵینەوە لەهۆکاری گیانلەدەستدانی هاووڵاتییەکە. هاوكات ئه‌مڕۆ پێنجشه‌ممه 30ی ئایاری 2024، كوڕی، هاووڵاتییه كۆچكردووه‌كه لە بەردەم پزیشکی داد، رایگه‌یاند: باوکیان لە 1ی ئایارەوە لە باخەکەی خۆیانەوە رووی لە کەژوکێوی ناوچەی قەرەداغ کردووە، دوای پچراندنی پەیوەندییەکان لەگەڵیدا و بەدواگەڕانێکی زۆر بۆماوەی 29 رۆژ، دوێنێ چوارشەممە ئاگادارکرانەوە لە بوونی تەرمێک لەو ناوچەیە کە گوماندەکرا باوکیان بێت، دواتر بەهاوکاری قایمقامی قەرەداغ و لایەنەپەیوەندیدارەکانی توانراوە ئەو تەرمە لە شاخەکە بهێنرێتە خوارەوە چونکە لە شوێنێکی سەختدا بووە.
هاوڵاتی ئەمڕۆ پێنجشەممە 30ی ئایاری 2024، جومانە غەلای، وتەبێژی كۆمسیۆنی باڵای سەربەخۆی هەڵبژاردنەكان لە لێدوانێكدا بۆ میدیاكان رایگەیاند، لە پارێزگاكانی هەرێم زیاتر لە 143 هەزار دەنگدەر كارتی دەنگدانیان نوێكردووەتەوە و هەفتەی داهاتوو دەست بە دابەشكردنی دەكەن. جومانە غەلای، وتیشی، كۆمسیۆن كارتی بایۆمەتری ئەو دەنگدەرانەی هەرێمی كوردستانی چاپكردووە كە لە ماوەی 1ی شوبات تا 10ی ئازاری رابردوو داتاكانیان نوێكردۆتەوە. ئەوشی خستەڕوو، ئەو دەنگدەرانەی كارتی بایۆمەترییان بۆ چاپكراوە گەیشتووەتە 143 هەزار و 632 كەس كە بەسەر پارێزگاكانی سلێمانی، هەولێر و دهۆك دابەشبوون. سەبارەت بە ژمارەی کارتەکانی دەنگدان لە هەرێمی کوردستان ئاماژەیبەوەکرد، كارتەكان بەپێی پارێزگاكان، سلێمانی 42 هەزار و 856 كارت، هەولێر 67 هەزار و 476 و دهۆكیش 33 هەزار و 300 كارتە. دەشڵێت، لە هەفتەی داهاتووەوە دەستدەكرێت بە دابەشكردنی كارتەكان لە 173 ناوەندی تۆماركردن.
