هاوڵاتی بەڕێوەبەری خوێندنی کوردی لە کەرکوک ڕایگهیاند:" لەیەكەم ڕۆژی كردنەوەی دەرگای خوێندنگەكاندا ئێمەش وەکو خوێندنی کوردی بەڵێن دەدەین وەکو مامۆستیانی بە ئەمەکی خوێندنی کوردی لەو شارە کە درێژەپێدەری هاوڕێکانمان دەبین، لەوانەی کە لە پێش ئێمە خزمەتیان کردووە و ئێستاش لەگەڵمان بەردەوامن لە خزمەتکردن. خوێندنی کوردی بەجێناهێڵین و سەریدەخەین و دەیکەینە سیمووبلێک لە شاری کەرکووک، زمانی شیرینی دایک سەردەخەین". شێرزاد رەشید، بەڕێوەبەری خوێندنی کوردی لە کەرکوک دوای ئەوەی بەشداری لە رێوڕەسمی یەکەم زەنگی دەستپێکی دەوامی بۆ ساڵی نوێی خوێندن 2021-2022 لە یەکێک لە قوتابخانەکانی خوێندنی کوردی لە شارەکە کرد، لە کۆنگرەیەکی رۆژنامەوانیدا رایگەیاند: "میلاکاتمان جێگیرە لەبەر ئەوەی لە دەوروبەری 700 تاوەکو 800 مامۆستای وانەبێژ لەسەر حکومەتی عێراق بە گرێبەست دامەزران بۆ خوێندنی کوردی، بۆ کەمیی میلاک ئەگەر هەبێت وەزارەتی پەروەردەی حکومەتی هەرێمی کوردستان ئامادەیی پیشانداوە بە وانەبێژ چارەسەری کەمیی میلاک بکرێت و فەرمانمان بۆ هاتووە ناوی وانەبێژان دەنووسین". شێرزاد رەشید لە روی پێداویستییەکانەوە، "بە بەردەوام ئەنجومەنی وەزیرانی هەرێمی کوردستان پێداویستییەکانمان دابین دەکات، لە روی پاکژی قوتابخانەکانەوە خۆ ئامادەکردن و مامۆستایان زۆر بە جۆش و خرۆشەوە هاتوونەتە پێشەوە. ئەنجامەکانی پار ساڵمان گەواهییە کە خوێندنی کوردی تاوەکو دێت کێشەکانی روو لە کەمی دەکات". بەڕێوەبەری خوێندنی کوردی لە کەرکووک دەشڵێت: "پاڵپشتی حکومەتی هەرێمی کوردستان و وەزارەتی پەروەردەش بۆ ئێمە درێژەپێدەری ئەو ئەنجامانە و ئەو سەرکەوتنانەیە کە بەدەستی دەهێنین، چونکە لە کۆتاییدا حکومەتی هەرێمی کوردستان و وەزارەتی پەروەردە لە هەرێمی کوردستان خۆی دامەزرێنەر و ئەندازیاری ئەو پرۆسەیەیە لە شاری کەرکوک و خۆشی دەبێت خاوەنداریێتی بکات و پەرەی پێبدات و پێشی بخات". لە میانی رێوڕەسمەکەش شێرزاد رەشید سوپاسی حکومەتی هەرێمی کوردستان کرد لە بەرامبەر ئەوەی "لە ساڵی 2003وە هەتا ئێستا قوتابخانە کوردییەکانی دامەزراند، لە پێنج قوتابخانەوە ئێستا خاوەنی 535 قوتابخانە و 37 باخچەی منداڵانین و نزیکەی 100 هەزار قوتابی و خوێندکار لە خوێندنی کوردی دەخوێنن". شێرزاد رەشید وتی: "هەرکاتێک تەوژمێک بۆ ئەوشارە هاتبێت خوێندنی کوردی لەناویدا ماوەتەوە، خوێندنی کوردی وەکو سیمبوولێکی نەتەوایەتی کوردایەتی ئەوشارەی پاراستووە، مامۆستایانی بە ئەمەکی خوێندنی کوردی پۆلەکانی خوێندنیان بەجێنەهێشت. جێی شانازی بوو کاتێک کوردستان رووی لە قەیرانکرد لە هەر شارێک بایکۆت روویدابێت لە قوتابخانەکانی خوێندنی کوردی لە کەرکووک رووینەدا. مامۆستایانی ئێمە ئامادەنەبوون قوتابی و خوێندکاری خۆیان بەجێبهێڵن، چونکە بڕوای تەواویان هەبوو هەرکاتێک ئەگەر قوتابییەکانی خۆیان بەجێبهێڵن ئەوکاتە خوێندنەکانی دیکە عەرەبی و تورکمانی دەبنە جێگرەوە بۆ خوێندنی کوردی". بەڕێوەبەری خوێندنی کوردی لە کەرکوک وتیشی: "ئێمەش وەکو خوێندنی کوردی بەڵێن دەدەین وەکو مامۆستیانی بە ئەمەکی خوێندنی کوردی لەو شارە کە درێژەپێدەری هاوڕێکانمان دەبین، لەوانەی کە لە پێش ئێمە خزمەتیان کردووە و ئێستاش لەگەڵمان بەردەوامن لە خزمەتکردن. خوێندنی کوردی بەجێناهێڵین و سەریدەخەین و دەیکەینە سیمووبلێک لە شاری کەرکووک، زمانی شیرینی دایک سەردەخەین، ئەمڕۆ لە شاری کەرکووک بە زمانی کوردی خۆمان دەخوێنین و پاڵپشتی تەواو دەکرێین لەلایەن حکومەتی هەرێمی کوردستان و وەزارەتی پەروەردەوە".
هاوڵاتی ھاتووچۆی عێراقی ڕایگهیاند:" یەکخستنی تابلۆی ئۆتۆمبێل لە رێککەوتنی ڤیەننا ھاتووە و زۆربەی وڵاتان جێبەجێیان کردووە". بڕیارە تابلۆی ئۆتۆمبێل لە نێوان ھەرێمی کوردستان و عێراق یەکبخرێت، بۆ ئەو مەبەستەش کۆمپانیایەکی ئەڵمانی تابلۆی نوێی ئۆتۆمبێل ھەڵدەستێت بۆ سەرتاسەری عێراق دروست دەکات و ژمارەکانیش بە ئینگلیزی دەنوسرێت و بۆ ھەر تابلۆیەکیش 30 ھەزار دینار لە خاوەنەکەی وەردەگیرێت. بەڕێوەبەرایەتی گشتی ھاتووچۆی عێراق دەڵێت، یەکخستنی تابلۆی ئۆتۆمبێل تەنھا لە عێراق نییە، بەڵکو زۆربەی وڵاتان جێبەجێیان کردووە، چونکە ئەو بابەتە دەکەوێتە ناو رێککەوتنی ڤیەننا، کە وڵاتانی پابەند کردووە بۆ یەکخستنی تابلۆی ئۆتۆمبێل بە جۆرێک ژمارەکەی روون بێت و بە زمانی ئینگلیزی نووسرابێت و لەبری ناوی پارێزگا ژمارە و کۆدی تایبەت دابنرێت. ئەوەش لە کاتێکدایە ئەگەر ئەو سیستمە جێبەجێ بکرێت، لە کاتی چونەدەرەوەی ئۆتۆمبێل بۆ وڵاتانی دەرەوە، پێویست بە گۆڕینی تابلۆی ئۆتۆمبێل ناکات.
هاوڵاتی ئەمڕۆ دابەشكردنی نەوتی سپی دەگاتە ناو شاری سلێمانی و نرخی نەوتی بازرگانی لە بازاڕدا دادەبەزێت. ئەمڕۆ دووشهممه 1ی تشرینی دووهمی 2021، محەممەد حەسیب، بەڕێوەبەرى نەوت و کانزاکانى سلێمانى راىگەیاندووە، "لە رۆژى پێنجشەممەوە لە مەڵبەندى پێنجى سلێمانییەوە دابەشکردنى نەوت دەستپێدەکات، پاشان مەڵبەندەکانى شەش، تاوەکو مەڵبەندى 10، ئەمانە ئەو مەڵبەندانەن کە ساڵى رابردوو بەشەنەوتیان بەرنەکەوتووە". پێشتر لە ناوچە شاخاوییەکان دەست بە دابەشکردنی نەوت کراوە و کە ناوچەکانی پێنجوێن، هەڵشۆ، شارباژێڕ، تەوێڵە و بیارە و چەند شوێنێکی دیکەی گرتەوە. بەوتەى محەممەد حەسیب، دواى تەواوبوونى بەشە نەوتى ساڵى رابردوو، دەست بە دابەشکردنی بەشەنەوتی ئەمساڵ دەکەنەوە کە سەرجەم شار و شارۆچکە و گوندانە دەگرێتەوە کە لە دواى ناوچە سارد و شاخاوییەکان ریزبەندییان بۆ کراوە. رۆژانە حکومەتى عێراق لە نێوان 20 تاوەکو 30 هەزار لیتر تەونى سپى بۆ سلێمانى دەنێرێت، هەرچەندە هێشتا روون نییە تاوەکو کەى بەردەوامدەبێت، بەڵام بەپێى رێککەوتنى هەولێر و بەغدا، پلان ئەوەیە کە تاوەکو تەواوبوونى بەشەنەوتى پار و ئەمساڵ، ناردنى نەوتەکە بەردەوام بێت.
هاوڵاتی ڕێبهرى باڵاى ڕهوتى سهدر ڕایگهیاند:" بهرنامهیهكى چاكسازیمان ههیهو دهمانهوێت ههركهس لهو بهرنامه بهشداریدهكات بێت بهشدارى حكومهتێكى زۆرینهى نیشتیمانى بكات". موقتهدا سهدر ڕێبهرى باڵاى ڕهوتى سهدر ڕایگهیاند، "بهرنامهیهكى چاكسازیمان ههیهو دهمانهوێت ههركهس لهو بهرنامه بهشداریدهكات بێت بهشدارى حكومهتێكى زۆرینهى نیشتیمانى بكات". سهدر ئهوهشیخستهڕوو، "مهرج نییه ههموان بهشداریى حكومهت بكهن ههندێك دهتوانن ببنه ئۆپۆزسین كه ئهمه بنهڕهتى پرۆسهى دیموكراسیه". ڕهوتى سهدر لهههڵبژاردنى 10ى ئهم مانگهدا 73 كورسى پهرلهمانى بهدهستهێناوهو وهك براوهى ههڵبژاردن لهئێستاوه گفتوگۆ لهگهڵ لایهنهكان دهكات.
هاوڵاتی سهرۆك كۆماری توركیا، دوای کۆبوونەوەی لەگەڵ جۆ بایدن هاوتا ئەمریکییەکەی رایگەیاند کە پشتگیری ئەمریکا بۆ چەکدارەکانی کورد لە سوریا بەردەوام نابێت وەک ئەوەی تا ئێستا ئەو کارەی کردووە. ئێوارەی ئهمڕۆ یەکشەممە 31ی تشرینی یهكهمی 2021، رهجهب تهیب ئهردۆغان، لە شاری رۆما لە کۆنگرەیەکی رۆژنامەنووسیدا وتی: "پەکەکە لە سوریا هێشتا چەک لە ئەمریکاوە وهردهگرن و ئێمەش لهو كاره نیگەرانین". لەبارەی دیدارەکە لەگەڵ جۆ بایدن سهرۆكی ئهمریكا، ئهردۆغان وتی: "من لە نیگەرانی خۆمان داوه ئەمریکا لەسەر ئەو پشتیوانییە سهربازییهی پەکەکە وەریدەگرێت لەگەڵ یەکینەکانی پاراستنی گەل". سەرۆکی تورکیا وتیشی: "پێموایە ئەم پرۆسەیە کە تا ئێستا بەردەوام بووە، دواتر بەم شێوەیە بەردەوام نابێت".
هاوڵاتی ئەڵمانیا ڕایگەیاند:" پۆلیسی فیدڕاڵی 23 کۆچبەری عێراقی و دوو قاچاغچی لە سنوری وڵاتەکەی و پۆڵەندا دەستگیکردووە و لەناویاندا منداڵیش هەیە و خێزانیش هەیە". ئاژانسی هەواڵی DWی ئەڵمانی بڵاویکردەوە، پۆلیس توانیویەتی 23 کۆچبەری عێراقی و دوو قاچاغچی دەستگیربکات لە سنورەکانی نێوان ئەڵمانیاو پۆڵندا، کە لەنێوا گیراوەکاندا خێزان هەیە. باسی لەوەشکردووە، لەکاتی پشکنینی رۆتینی بارهەڵگرێكدا ئەو کۆچبەرانە دەستگیرکراون کە چەند منداڵێکیشیان لەگەڵ بووە. ئاماژەی بۆ ئەوەشکردووە، سەرجەمی کۆچبەرەکان هەڵگری رەگەزنامەی عێراقی بوون و قاچاغچییەکانیش سووری بوون و لەکاتی هەڵکوتانەسەر بارهەڵگرەکە شۆفێرەکە و هاوڕێکەی رایانکردووە، بەڵام دواتر دەستگیرکراون.
.jpg)
هاوڵاتی سهرۆكى ههرێمى كوردستان دۆخ و ههواڵى لێقهوماوان و زيانمهندانى له پارێزگارى ههولێر پرسیوە و گوێبيستى رێكارهكان و پرۆسهى بههاناوهچوون و چۆنيهتيى مامهڵهكردنى لايهنه پهيوهندیداره حكومييهكان لهگهڵ دۆخهكه و لێقهوماواندا بوو. سهرۆكى ههرێمى كوردستان له پهيوهندييهكى تهلهفۆنيدا لهگهڵ ئومێد خۆشناو، پارێزگارى ههولێر، بهدواداچوونى بۆ زيانهكانى لافاو له ههولێر و چهند ناوچهيهكى سنوورى پارێزگاكه كرد. دەڵێت، لايهنه پهيوهندیدارهكانى راسپاردووه بۆ هاوكاريكردن و يارمهتيدانى لێقهومان و دابينكردنى پێداويستييهكانيان. نێچيرڤان بارزانى، سەرۆکی هەرێمی کوردستان دۆخ و ههواڵى لێقهوماوان و زيانمهندانى له پارێزگارى ههولێر پرسیوە و گوێبيستى رێكارهكان و پرۆسهى بههاناوهچوون و چۆنيهتيى مامهڵهكردنى لايهنه پهيوهندیداره حكومييهكان لهگهڵ دۆخهكه و لێقهوماواندا بوو. لە راگەیێندراوی سەرۆکایەتیی هەرێمی کوردستاندا هاتووە، "سهرۆكى ههرێمى كوردستان دووپاتى كردهوه كه سهرۆكايهتيى ههرێمى كوردستان له نزيكهوه بهدواداچوونى مهيدانى بۆ شوێنه زيانبهركهوتووهكانى لافاو دهكات و لايهنه پهيوهندیدارهكانى راسپاردووه بۆ هاوكاريكردن و يارمهتيدانى لێقهومان و دابينكردنى پێداويستييهكانيان." ههروهها رايگهياند کە "خۆشبهختانه" هيچ زيانێكى گيانى له لافاوهكان نهكهوتووهتهوه. لاى خۆيهوه ئومێد خۆشناو، پارێزگارى ههولێر وێڕاى پێشكهشكردنى پوختهيهك لهسهر شوێن و قهبارهى زيانهكان و دۆخهكه بهگشتى، سوپاسى سهرۆكى ههرێمى كوردستانى كرد بۆ پرسين و بهدواچوونى دۆخى لێقهومان و زيانمهندان و ئامادهيييان بۆ يارمهتيدان و هاوكاريكردنيان. بەهۆی لێزمە بارانەوە، رۆژی شەممە 30-10-2021، لافاوێکی زۆر لە چەند ناوچەیەکی هەولێر هەستا و زیانی زۆری ماددیی لێکەوتەوە. یەکێک لەو ناوچانەی زۆرترین زیانی پێگەیشتووە شاری زێڕینە. هاوکات زیانی ماددی بە هاونیشتمانیان لە مەلائۆمەر، گوندی کۆری و شارەدێی کۆڕێ لە پیرمام کەوت.
هاوڵاتی جێگری پێشووی سەرۆکی پەرلەمانی عێراق رایگەیاند:" ئەو پۆستە مافی کوردە و دەبێت لە نێوان پارتی و یەکێتی دا کەسێكی بۆ دیاری بکرێت و ئەوەش تاوەکو ئێستا یەکلایی نەکراوەتەوە و کەسیشی بۆ دیاری نەکراوە". بەشیر حەداد، جێگری پێشووی سەرۆکی پەرلەمانی عێراق ئاماژەی بەوەشکردووە، سەبارەت بە سەرۆکایەتی کۆماریش ئاماژەمان بەوەداوە کە ئەو پۆستە مافی کوردە و دەبێت لە نێوان پارتی و یەکێتی دا کەسێكی بۆ دیاری بکرێت و ئەوەش تاوەکو ئێستا یەکلایی نەکراوەتەوە و کەسیشی بۆ دیاری نەکراوە، چونکە پێویستی بە رێکەوتن هەیە لە نێوان ئەو دوو هێزە سەرەکییە. ئەوەشیخستۆتەڕوو، بەداخەوە ژمارەیەک میدیا و سۆشیاڵ میدیا بە بێ رەچاوکردنی کاری میدیایی، لێدوانەکەی بەندەیان بەجۆرێکی دیکە گواستەوە کە گوایە ئاماژەم بەوەداوە سەرۆکی کۆماری ئێستای عێراق ئەوە پۆستە وەرناگرێتەوە. ئەوەشیخستۆتەڕوو، ئێمە لێرەوە هەموو ئەو جۆرە لێدوانانە رەتدەکەینەوە و رایدەگەیێنین كه پێوسته ھەموو لایەک رەچاوی راستى و ئەمانەت بکەن له گواستنەوە و بڵاوکردنەوەی ھەواڵدا. دەقی روونکردنەوە: روونکردنەوەیەک لە د.بەشیر حەدادەوە لە لێدوانێكمان بۆ میدیایەکی عيراقى، ئاماژەمان بەوەدابوو کە به بۆچونی ئێمە ئەگەری ئەوە هەیە لە هەر سێ سەرۆکایەتییەکەی عێراقدا گۆڕانکاری بکرێت و کەسانی دیکەیان بۆ دیاری بکرێت. سەبارەت بە سەرۆکایەتی کۆماریش ئاماژەمان بەوەداوە کە ئەو پۆستە مافی کوردە و دەبێت لە نێوان پارتی دیموکراتی کوردستان و یەکێتی نیشتمانی کوردستان دا کەسێكی بۆ دیاری بکرێت و ئەوەش تاوەکو ئێستا یەک لایی نەکراوەتەوە و کەسیشی بۆ دیاری نەکراوە، چونکە پێویستی بە رێکەوتن هەیە لە نێوان ئەو دوو هێزە سەرەکییە، بەڵام بەداخەوە ژمارەیەک میدیا و سۆشیاڵ میدیا بە بێ رەچاوکردنی کاری میدیایی، لێدوانەکەی بەندەیان بەجۆرێکی دیکە گواستەوە کە گوایە ئاماژەم بەوەداوە سەرۆکی کۆماری ئێستای عێراق ئەوە پۆستە وەرناگرێتەوە. ئێمە لێرەوە هەموو ئەو جۆرە لێدوانانە رەتدەکەینەوە و رایدەگەیێنین كه پيوسته ھەموو لایەک رەچاوی راستى و ئەمانەت بکەن له گواستنەوە و بڵاوکردنەوەی ھەواڵدا. د.بەشیر خەلیل حەداد ٣١ی تشرینی دووەمی ٢٠٢١
هاوڵاتی سەرۆكی حكومەتی هەرێمی كوردستان رازامەندی دا لەسەر خەرجكردنی بڕە بودجەی تایبەت بۆ تەواو كردنی هەشت پڕۆژە لەهەموو شارەكان. ئەمڕۆ یەکشەممە 31ی تشرینی یەکەمی 2021، نوسراوێكی سەرۆكایەتی دیوانی وەزارەت بڵا,كراوەتەوە و تیایدا ئەوە رونكراوەتەوە ئەو پرۆژانە هەر یەكەی بەپێی تێچوەكەی مانگانە بڕە پارەكەی بۆ تەرخاندەكرێت تا تەواو بونی. لەنوسراوەكەدا ئەوەش رونكراوەتەوە:"، تهرخانكردنی ئهو بڕه پارهیه لهكاتێكدا دهبێت كه بهزوترینكات كۆمپانیاكه دهستبهكاربێتهوه له "پرۆژهی ئاوی دهربهندیخان" بهمهبهستی تهواوكردنی، ههروهها بهردهوام بێت لهكاركردن له پرۆژهی ئاوی پیرمام.
هاوڵاتی سەرۆکی ئەمریکا لەگەڵ رەجەب تەیب ئەردۆغان، سەرۆک کۆماری تورکیا کۆبووەوە. کۆشکی سپی رایگەیاند:" باسیان لە پرۆسەی سیاسی سوریا، گەیاندنی هاوکاریی مرۆیی بۆ ئەفغانستان و هەڵبژاردنەکانی لیبیا کردووە". ئەمڕۆ یەکشەممە 31ی تشرینی یەکەمی 2021، له چوارچێوهی دیدارهكانی لوتكهی G20 كه له ناوهندی كۆنگرهی نوڤۆلا بهڕێوهدهچن، جۆ بایدن، سەرۆکی ئەمریکا و رەجەب تەیب ئەردۆگان، سەرۆک کۆماری تورکیا کۆبونەوە، بەرلە كۆبونهوهكه و له میانی وێنه گرتنهكاندا، رۆژنامهنوسێكی ئهمریكی پرسی "پلانتان ههیه F-16 بدهن به توركیا؟" سهرۆكی ئهمریكا، جۆ بایدن له وهڵامدا وتی، "پلانی كۆبونهوهیهكی باشمان ههیه". بایدن جەختی لە پەیوەندیی تورکیا و وڵاتەکەی لەبواری بەرگریدا کردووە، بەڵام نیگەرانییەکانی وڵاتەکەیشی لەسەر دەستخستنی سیستمی ئێس 400 ـی روسی لەلایەن تورکیاوە بە ئەردۆغان وتووە.
.jpg)
هاوڵاتی وەزیری خوێندنی باڵا و توێژینەوەی زانستی رایگەیاند:" راستەوخۆ دەستوەردان لە پلانی وەرگرتن دەکات و زیادی دەکات". داوا لە قوتابیانیش دەکات بچنەوە ماڵەوە. ئەمڕۆ یەکشەممە 31ی تشرینی یەکەمی 2021، ئارام محەممەد قادر، وەزیری خوێندنی باڵا و توێژینەوەی زانستی و تیمی وەزارەتی خوێندنی باڵا سەردانی پەرلەمانی کوردستانیان کرد و لەگەڵ لیژنەی پەروەردە و خوێندنی باڵا و توێژینەوەی زانستی لە پەرلەمانی کوردستان لەسەر پرسی ناڕەزایەتی قوتابیان و خوێندکارانی دەرچووی 12 ئامادەیی لە زانکۆلاین کۆبوونەوە. دوای کۆبوونەوەکە د. ئارام محەممەد لە کۆنگرەیەکی رۆژنامەوانیدا رایگەیاند، "پلانی وەرگرتن بەپێی یاسا پلان بەشی زانستی دایدەڕێژێت و دەیداتە ئەنجوومەنی کۆلێژ، ئەنجوومەنی کۆلێژ بەرزی دەکاتەوە بۆ ئەنجوومەنی زانکۆ، ئەنجوومەنی زانکۆش دەینێرێت بۆ ناوەندەی وەرگرتن، بۆیە پلانی وەرگرتن دەسەڵاتی منی تێدا نییە وەکو وەزیر زیادی بکەم یان کەمی بکەم. بەڵکو زانکۆکان پلانیان ناردووە و ئێستاش گوێم لێدەبێت دەیانەویت من تۆمەتبار بکەن." وەزیری خوێندنی باڵا و توێژینەوەی زانستی ئەوەشی وت کە "من بەرپرسیارم لەو کارەی دەیکەم، بە کارێکی دادپەروەرانەی دەزانم، راستەوخۆ دەستوەردان دەکەم و پلانی وەرگرتن زیاد دەکەم، پرۆسەکەش دەخەمە سەر راستەرێگەی خۆی، هەموو خوێندکارانی کوردستانیش دڵنیا دەکەمەوە کەسیان لەسەر جادە نامێننەوە، هەموو ئەوانەی نمرە هاوشێوەکانیان لەکوێ وەرگیراوە و ئەو وەرنەگیراوە لە رێگەی پرۆسەی زانکۆلاین بەوپەڕی دادپەروەری و شەفافیەت و راستگۆییەوە جێبەجێی دەکەین." لەدوای گەڕانەوەی ناوی قوتابیانی 12ـی ئامادەیی، بەشێک لە قوتابیان لە شار و شارۆچکە جیاوازەکانی هەرێمی کوردستان خۆپێشاندان دەکەن. بەشێکیان نمرەی 99یان بەدەستهێنابوو و لە بەشی پزیشکیی گشتی وەرنەگیرابوون، بەشێکی دیکەیشیان گلەیی ئەوەیان دەکرد کە سەرەڕای ئەوەی نمرەکانیان لە سەروو 95ـەوەیە، بەڵام ئەو بەشەیان بۆ نەگەڕاوەتەوە کە خۆیان دایاننابوو. وەزیری خوێندنی باڵا رایگەیاند، "بڕۆنەوە ماڵەکانی خۆتان، تاوەکو ئێمە لێرە بین ناهێڵین هیچ کەسێک و هیچ سیستەمێک ستەمیان لێ بکات، هەڵە و کەموکورتیش رووبدات، کۆتایی دونیا نییە و دێینەوە سەر رێگە راستەکە و بۆیان چاک دەکەینەوە، دڵنیاشیان دەکەمەوە هیچ گرفت و کێشەیەک نامێنێت، هەر کێشە و گرفتێکیشیان هەبێت من لە سەنگەری داکۆکیکردنیان بووم و دەمێنمەوە، هەرچیشیان ویست با بێنە لای من لە ماڵەوە و لە وەزارەت لە خزمەتیان دەبم."
.jpg)
هاوڵاتی سەرۆكی حكومەتی هەرێمی كوردستان رایگەیاند:" گرنگی ھەمانگی نێوان ھەرێمی کوردستان و حکومەتی فیدراڵی و ھاوکاریی ھاوپەیمانیی نێودەوڵەتیی دووپات دەکاتەوە بۆ روبەڕوبونەوەی ھەڕەشەکانی تیرۆریستانی داعش و پڕکردنەوەی بۆشایی ئەمنی لە ناوچە کوردستانییەکانی دەرەوەی ئیدارەی ھەرێمی کوردستان." مەسرور بارزانی لە تویتێکدا نووسیویەتی، "زۆر خهمباربووم به شههیدبوونی دوو پێشمەرگەی قارەمان (خالید حەمید ھەیاس کاکەیی و ئاکۆ کەریم قادر) لە هێرشی شەوی رابردووی تیرۆریستانی داعش لە پردێ. پرسە و سەرەخۆشی لە كهسوكاریان و هەڤاڵەکانیان دەکەم و هاوبەشی خەمیانم." ئەو ھێرشە بە وتەی مەسرور بارزانی، "جارێکی دیکە گرنگیی ھەمانگیی نێوان ھەرێمی کوردستان و حکومەتی فیدراڵی و ھاوکاریی ھاوپەیمانیی نێودەوڵەتیی دووپات دەکاتەوە بۆ رووبەڕووبوونەوەی ھەڕەشەکانی تیرۆریستانی داعش و پڕکردنەوەی بۆشایی ئەمنی لە ناوچە کوردستانییەکانی دەرەوەی ئیدارەی ھەرێمی کوردستان." شەوی رابردوو لە بەرزاییەکانی زورگەزراو لە سنووری شارۆچکەی پردێ داعش هێرشی کردەسەر پێشمەرگە و بەهۆیەوە دوو پێشمەرگە بە ناوەکانی (خالید حەمید ھەیاس و ئاکۆ کەریم قادر) له لیوای 10ـی پیادهى سهر به وەزارەتی پێشمەرگە شەهیدبوون.
هاوڵاتی ئەندامی پەرلەمانی کوردستان رایدەگەیەنێت، لە کۆی نزیکەی 62 هەزار کورسی خوێندنی زانکۆو پەیمانگا، نزیکەی 26 هەزار کورسی حکومی بێبەرانبەر تەرخانکراون، ئەوانیتر تەرخانن بۆ پارە لە نێوان زانکۆی حکومی و زانکۆی ئەهلی. ئەمڕۆ یەکشەممە 31ی تشرینی یەکەمی 2021، عومەر گوڵپی لەپەیجی تایبەتی خۆی لەفەیسبوک باسی لەوەشکردوە، ئەمڕۆ لەهەڵەبجە "پێشوازی و پشتیوانمان لە قوتابیانی دەرچووی دوانزەی ئامادەیی کرد کە بەهۆی هەڵەی وەزارەتی خوێندنی باڵاو نەبوونی پلان و بەرنامەی نیشتیمانی حکومەت، ستەمیان لێکراوە." ئاماژەی بەوەشکردوە، "ئێمە دژی بە پارەکردنی خوێندنی زانکۆو پەیمانگاین، لە کاتێکدا دەستوور لەسەر حکومەتی پێویست دەکات کورسی خوێندن بێ بەرانبەر بۆ قوتابیان تەرخان بکات و دەرفەتی گونجاو بڕەخسێنێت."
هاوڵاتی سەرۆکی دامەزراوەی بەرگریی ئەلکترۆنیی ئێران ڕایگەیاند:" ئەو هێرشە ئەلکترۆنییە بۆ سەر سیستەمی دابەشکردنی بەنزینخانەکان، هاوشێوەی هێرشێکە کە کرایە سەر ڕێگەی ئاسن و بەندەری شەهید ڕەجایی و بەڕای ئێمە ئەم هێرشە کاری ئەمریکا و ئیسرائیلە بووە". غوڵامڕەزا جەلالی، سەرۆکی دامەزراوەی بەرگریی ئەلکترۆنی ئێران ڕایگەیاند:"لە وتووێژێک تەلەفزیۆنی فەرمیی ئێران ڕایگەیاند: "بەپێی ئەو لێکۆڵینەوانەی کراون و ئەو بەڵگانەی بەدەست هاتوون، ئەو هێرشە ئەلکترۆنییە بۆ سەر سیستەمی دابەشکردنی بەنزینخانەکانی ئێران لەلایەن دوو وڵاتی ئەمریکا و ئیسرائیلەوە جێبەجێ کراوە، ئێمە ئێستا بە وردی سەرقاڵی بەدواداچوونی ئەم پرسەین و لە هۆکارەکانی دەکۆڵینەوە و پاشان بە وردی ڕایدەگەیەنین". ئەو بەرپرسە ئێرانییە ئاماژەی بەوەش کردووە: "ئەو هێرشە کە زۆر ئاڵۆز بووە، کراوەتە سەر بەشێکی سیستەمی دابەشکردنی بەنزین کە چاککردنەوەی ئاڵۆزە و هاوشێوەی هێرشەکەی بەندەری شەهید ڕەجایی بووە و بێگومان کاری ئەمریکا و ئیسرائیلە". ئێوارەی ڕۆژی سێشەممەی هەفتەی پێشوو بەهۆی هێرشێکی ئەلکترۆنی بۆ سەر سیستەمی دابەشکردنی بەنزینی ئێران، سەرەنجام چوار هەزار و 300 بەنزینخانە لە سەرتاسەری ئێران لەکار کەوتن و هاوکات تابلۆ و بەنێرە ئەلکترۆنییەکانی سەرشەقامەکانیش لەکار کەوتن و لەکارکەوتنی بەنزینخانەکانی ئێران بووەتە هۆی گرفتی زۆر لە ئێران و هەتا ئێستا چارەسەر نەکراوە. لە چەند ساڵی ڕابردوودا هێرشی هاوشێوە کراوەتە سەر چەند بنکەیەکی ئەتۆمی و ناوەندی توێژینەوەی ئەتۆمی و سەربازی لە شوێنە جیاجیاکانی ئێران و هەموو کات ئەمریکا و ئیسرائیلی بەو هێرشانە تۆمەتبار کردووە. ساڵی 2018 بەهۆی گرانی بەنزین، لە سەرتاسەری ئێران خۆپیشاندانێکی بەربەڵاو دەستی پێکرد و خۆپیشاندانەکەش گرژی و ئاڵۆزیی زۆری لێ کەوتەوە و بەپێی زانیارییەکانی ئاژانسی (ڕۆیتەرز) و ناوەندەکانی داکۆکیکاری مافی مرۆڤ لەو خۆپیشاندانەدا هەزار و 500 کەس لە ئێران کوژران کە 50 کەسیان کورد بوون.
هاوڵاتی نێچیرڤان بارزانی رایگەیاند:" داعش هێشتا مهترسييهكى ڕاستهقينهيه و ههڕهشه له ئارامى و سهقامگيريى وڵات دهكات، بۆيه دهبێ به ئيراده و دهستێكى پۆڵايينهوه، به هاوكاريى و ههماههنگيى پێشمهرگه و سوپاى عيراق و هێزه ئهمنييهكان و به پشتگيريى هاوپهيماني نێودهوڵهتى تا لهناوبردنى يهكجارييان، ڕووبهڕوو و بهرهنگاريان ببينهوه". درەنگانی شەوی شەممە چەکدارانی داعش هێرشیان کردە سەر سەنگەرەکانی پێشمەرگە لە سنووری شارۆچکەی پردێ لە پارێزگای کەرکووک و بەهۆیەوە دوو پێشمەرگە شەهید بوون. ئەمڕۆ یەکشەممە 31ی تشرینی یەکەمی 2021، ، نێچیرڤان بارزانی، سەرۆکی هەرێمی کوردستان سەرەخۆشی لە کەسوکاری هەردوو شەهید (خالید حەمید هەیاس و ئاکۆ کەریم قادر) کردووە و هاوسۆزی بۆ هاوڕێ و هاوسەنگەرانیان دەربڕیوە. نێچیرڤان بارزانی رایگەیاندووە: ”دووبارهبوونهوهى بهردهوام و فراوانبوونى پهلامارهكانى تيرۆرستان، ئهو ڕاستييه دهسهلمێنێت كه داعش هێشتا مهترسييهكى ڕاستهقينهيه و ههڕهشه له ئارامى و سهقامگيريى وڵات دهكات“. سەرۆکی هەرێمی کوردستان بەپێویستی دەزانێت ”بە ئیرادە و دەستێکی پۆڵایین“ هێزەکانی پێشمەرگە و سوپای عێراق ”تا لهناوبردنى يهكجارييان، ڕووبهڕوو و بهرهنگاريان ببينهوه“. دەقی پەیامەکەی سەرۆکی هەرێمی کوردستان:.. پرسه و سهرهخۆشى له خێزان و كهسوكارى سهربهرزى ههردوو شههيدى گيانفيدا خالید حەمید ھەیاس و ئاکۆ کەریم قادر له لیوای ۱۰ی پیادهى سهر به وەزارەتی پێشمەرگە دهكهم كه شهوى ڕابردوو دواى ڕووبهڕووبوونهوهيهكى قارهمانانه له كاتى ڕاوهدوونانى تيرۆرستانى داعشدا له ناوچهى پردێ شههيد بوون و گيانى پاكيان به نيشتمان بهخشى. له دڵهوه هاوسۆز و هاوخهمى خێزان و كهسوكاريان و تهواوى هاوڕێ و هاوسهنگهرانيان و پێشمهرگه قارهمانهكانم. له نزيكهوه ههست به ئێش و ئازاريان دهكهم. له پهروهردگارى مهزن داواكارم گيانى شههيدان به بهزهيى و ميهرهبانيى خۆى شاد بكات و سهبوورى و دڵنهوايى به ئهوان و ئێمه و ههمووان ببهخشێت. دووبارهبوونهوهى بهردهوام و فراوانبوونى پهلامارهكانى تيرۆرستان، ئهو ڕاستييه دهسهلمێنێت كه داعش هێشتا مهترسييهكى ڕاستهقينهيه و ههڕهشه له ئارامى و سهقامگيريى وڵات دهكات، بۆيه دهبێ به ئيراده و دهستێكى پۆڵايينهوه، به هاوكاريى و ههماههنگيى پێشمهرگه و سوپاى عيراق و هێزه ئهمنييهكان و به پشتگيريى هاوپهيماني نێودهوڵهتى تا لهناوبردنى يهكجارييان، ڕووبهڕوو و بهرهنگاريان ببينهوه. سڵاو و دروود بۆ گيانى پاكى شههيدان. نێچيرڤان بارزانى سهرۆكى ههرێمى كوردستان 2021/10/31
