تا ئێستا نزیکەی دوو ملیار بۆ هاووڵاتییانی چەمچەماڵ خەرجکراوە

    هاوڵاتى  تاڵیبان پێڵاوی پاژنەبەرز و جلوبەرگی رەنگاوڕەنگ و بۆنلەخۆدان لە ژنان قەدەغەدەكات، لەكاتیكدا پێشتریش چەند بڕیارێكی بۆ پیاوان و سەرتاشخانەكان دەركردبوو. یەكێك لە بەرپرسە باڵاكانی بزووتنەوەی تاڵیبان لەمیانی بەشداریكردنی لە بەرنامەیەكی راستەوخۆی كەناڵی "طلوع"ی ئەفغانی رایگەیاندووە: "نابێت ژنان پێڵاوی پاژنەبەرز لەپێبكەن بەهۆی ئەوەی كە بە رێگادا دەڕۆن دەنگ دەردەكات و هەست و ویستی گەنجان دەوروژێنێت". ئەمە جگە لەوەی دووپاتیكردووەتەوە، "پۆشینی جلوبەرگی رەنگاوڕەنگ لەلایەن ژنانەوە رێگەپێدراو نیە و ناشبێت كە هاتنە دەرەوە بۆنیان لەخۆیان دابێت". پێشتریش محەمەد ئەشرەف، راوێژكاری تاڵیبان لە زانكۆی كابول رایگەیاندبوو، "ئیسلامی راستەقینە رێگە بەهاتن و رۆیشتنی ژنان نادات بۆ زانكۆ، یان كاركردن". لە چەند رۆژی رابردووشدا تاڵیبان چەند بڕیارێكی بۆ سەرتاشخانەكان و شێوازی ریشتاشینی پیاوان دەركردبوو، لەسەرتاشخانەكانی پیاواندا رێگەی لە گوێگرتن لە میوزیك و گۆرانی گرت، شێوازەكانی ریشتاشینیشی بۆ پیاوان دیاریكرد و رێككدرنەوەی ریشی لەلایەن پیاوانەوە قەدەغەكرد. كۆمەڵگەی نێودەوڵەتی ترسیان لە رێكارەكانی تاڵیبان هەیە و چەندجارێكیش هۆشدارییانداوە كە دەبێت بزووتنەوەكە رێز لەمافی مرۆڤ بگرێت، بەپێچەوانەوە دان بە بزووتنەوەكە و حكومەتەكەیدا نانێن.

  هاوڵاتى پارێزگاری هەولێر رایگەیاند:" سوپاسی کونسوڵخانەی ئەمریکا لەهەرێمی کوردستان دەکەین کە بڕی 1.5 ملیۆن دۆلاری بۆ نۆژەنکردنەوەی قەڵای هەولێر تەرخانکرد". ئەمڕۆ پێنجشه‌ممه‌ 30ی ئه‌یلوولی 2021، ئومێد خۆشناو، پارێزگاری هەولێر لە كۆنگرەیەكی ڕۆژنامەوانیدا رایگەیاند:" سوپاسی کونسوڵخانەی ئەمریکا لەهەرێمی کوردستان دەکەن کە بڕی 1.5 ملیۆن دۆلاری بۆ نۆژەنکردنەوەی قەڵای هەولێر تەرخانکرد". هاوكات لە كۆنگرە ڕۆژنامەوانیەكەدا نیهاد لەتیف قۆجە، سەرۆکی کۆمیسیۆنی باڵای نۆژەنکردنەوەی قەڵای هەولێر رایگەیاندوە، لە ساڵی 2020ـەوە تاوەکو ئێستا نزیکەی سێ ملیۆن دۆلار لە قەڵای هەولێردا خەرجکراوە، کارکردنیش تێیدا بەردەوامە. لەئێستادا کارکردن بۆ نۆژەنکردنەوەی ژێرخانی قەڵای هەولێر بەردەوامە و بڕیارە مانگی حوزەیرانی 2022 کارەکانی کۆتاییان پێ بێت و لە ئێستادا 95%ی کارەکانی تەواو بوە، کە بریتییە لە چاککردنی شەقامە سەرەکییەکانی و راکێشانی هێڵی کارەبا و ئاوەڕۆ بۆی، زیاتر لە 80 خانوش تەواو کراون. قەڵای هەولێر زیاتر لە 490 خانوی تێدایە کە تاوەکو پێش ساڵی 2005یش زۆرینەی خانوەکان ژیانی تێدابو، لە ساڵی 2005 لەلایەن رێکخراوی یونسکۆوە بە یەکێک لە گرنگترین 100 شوێنەواری جیھان دەستنیشان کراوە. ئێستا کۆنترین شارە کە ژیان تێیدا بەردەوامە، چونکە نزیکەی 30 ساڵە خانەوادەیەک تێیدا لە شوێنی خۆیان ماونەتەوە و ژیان بەسەردەبەن، رۆژانە زیاتر لە دو هەزار کەس سەردانی دەکەن.  

  هاوڵاتى  وته‌بێژى پارتى  ڕایگەیاند: "خەڵکی کوردستان لەدروشمبازیی هەندێک سیاسی‌و حزب‌و لایەن تێربون، کارو کردەوەو خزمەتگوزارییان دەوێت". ئەمڕۆ پێنجشه‌ممه‌ 30ی ئه‌یلوولی 2021، لە بانگەشەی هەڵبژاردنى حزبه‌كه‌یدا لەقەزای شارەزور، مەحمود محەمەد ئەندامی مەکتەبی سیاسی‌و وتەبێژی پارتی  ڕایگه‌یاند، "ھەڵبژاردن زۆری نەماوەو مونافەسەکان زۆرن، خەڵکی زۆر دژی ئێمە قسە دەکات، من لێرەوە دەڵێم ھەر حزبێک حەقی خۆیەتی ھەڵمەتی ھەڵبژاردنی ھەبێت‌و باسی ڕابردوی خۆی بکات لەوەی چی کردوە". وتیشى:"ھەر حزب‌و کاندیدێکیش توێشوی پڕبێت، پڕناداتە کەس، ئەوەی ھەیە بەخەڵکی دەڵێ من ئەوەم‌و بۆ ئایندەش ئەوە دەکەم، خەڵکیش لەوێوە دەنگ بەو کاندیدە دەدات، بۆیە پێویستناکات خەڵک لەدڵەڕاوکێدا بھێڵینەوە بەقسەی زبری سەر تەلەڤزیۆن". دەشڵێت:"خەڵک لەدروشمبازیی هەندێک سیاسی‌و حزب‌و لایەن تێربون، کارو کردەوەو خزمەتگوزارییان دەوێت، ئەوەش لەوانەدا دەبیننەوە کە ئەزمونیان هەیە لەحکومڕانی، نەک ئەوانەی تەنها دروشمیان هەیە". وته‌بێژه‌كه‌ى پارتى باسى دۆخ‌و ژیان‌و گوزه‌رانى هاوڵاتیانى كردو ڕایگه‌یاند، "دەبێت ئەم ھەڵبژاردنە کێشەکانی خەڵکی چارەسەربکات، عێراق بەنەوت‌و ئاوو کشتوکاڵی دەتوانێت دوو دەوڵەتی وەک خۆی بژیەنێت، ئاستی ھەژاری لەعێراق لە 30% تێپەڕیوە، بێکاری لەھەندێک شوێندا 50% تێپەڕیوە، داھاتی سەرزەوی‌و ژێر زەوی لەگەڵ توانای مرۆیی بەکاربھاتایە، دەبوو عێراق یەکێک لەوڵاتە خۆشگوزەرانەکان بوایە". ئاماژه‌ به‌ئه‌زمونى حوكمڕانى حزبه‌كه‌ى ده‌كات‌و ده‌ڵێت:"حکومڕانیی باش‌و ئاوەدانی‌و پڕۆژە، لەو شوێنانەی پارتی حکومڕانی دەکات، جێبەجێدەکرێت، پلانەکانی پارتی بریتین لەئاوەدانکردنەوەو بەرزکردنەوەی ئاستی ژیانی خەڵکی‌و دابینکردنی خزمەتگوزاری". ئه‌وه‌شى وت:"پارتی دەیەوێت قەوارەی ھەرێم بپارێزرێت‌و خاکه‌كه‌ى لە لەتبون‌و پارچەبون بپارێزێت، گۆڕانکاریی زۆر ڕودەدات‌و گۆڕانکاریی زۆر خێراش بەڕێوەن کە خۆمان بۆ ئامادەکردون".

هاوڵاتى  وته‌بێژی پۆلیسی هه‌ولێر، رایگه‌یاند:" دوو كارمه‌ندی پۆلیسی شه‌قڵاوه‌، له‌كاتی ده‌ستگیركردنی دوو تۆمه‌تبار ته‌قه‌یان لێده‌كرێت و بریندار ده‌بن، یه‌كێكیان چوار گوللـه‌ی به‌ركه‌وتووه‌ و ئه‌وی دیكه‌شیان دوو گوللـه‌، تۆمه‌تبارێكی سه‌ره‌كی روداوه‌كه‌ش ده‌ستگیركراوه‌". ئەمڕۆ پێنجشه‌ممه‌ 30ی ئه‌یلوولی 2021، رائید هۆگر عه‌زیز، وته‌بێژی پۆلیسی هه‌ولێر، رایگه‌یاندووه‌، شه‌وی رابردوو هاووڵاتییه‌ك له‌ بنكه‌ی پۆلیسی بێترمه‌ی سه‌ر به‌ پۆلیسی شه‌قڵاوه‌، سكاڵای له‌سه‌ر دوو كه‌س تۆمار كردووه‌ كه‌ هه‌ڕه‌شه‌ی هه‌ڵكوتانه‌ سه‌ر ماڵه‌كه‌یان لێكردووه‌. دوای ئه‌وه‌ هێزێكی پۆلیس بۆ چاودێری و به‌دواداچوونی سكاڵاكه‌ ده‌چنه‌ شوێنی دیاریكراو، كاتژمێر دووی نیوه‌شه‌و، هه‌ردوو تۆمه‌تباره‌كه‌ به‌ناوه‌كانی (ا. ا. ع.) و (م. ک. هـ.) هەڵدەکوتنە سەر ماڵی هاووڵاتییه‌كه‌ كه‌ پێشتر له‌ پۆلیس سكاڵای تۆماركردبوو. وه‌ك وته‌بێژی پۆلیسی هه‌ولێر باسیده‌كات، "دوو تۆمه‌تباره‌كه‌ رووبەڕووی هێزەکانی پۆلیس بوونه‌ته‌وه‌ و ته‌قه‌یان كردووه‌، لە ئاکامدا دوو کارمەندی پۆلیس بەناوەکانی (رێبەند ئه‌رسەلان که‌مال) و (مه‌هدی عه‌بدوللـه‌تیف) بە سەختی بریندار بوون. ئێستا تۆمه‌تبارێكی سه‌ره‌كی رووداوه‌كه‌ له‌لایه‌ن ئه‌و هێزه‌ی پۆلیسی شه‌قڵاوه‌ ده‌ستگیركراوه‌ و په‌ڕاوی لێكۆڵینه‌وه‌ش بۆ رووداوه‌كه‌ كراوه‌ته‌وه‌.

هاوڵاتى  سوپاسالاری هێزەکانی ئەمریکا دانی بەوەنا ئەمریکا شەڕی ئەفغانستانی "دۆڕاند" کە 20 ساڵی خایاند و زەرەر و زیانی یەک تریلیۆن دۆلاری لە وڵاتەکە دا. ئەمڕۆ پێنجشه‌ممه‌ 30ی ئه‌یلوولی 2021،  مارک مایڵی، سوپاسالاری هێزەکانی ئەمریکا لە دانیشتنێکی ئەنجوومەنی نوێنەراندا دانی بە شکستی ئەمریکا نا لە شەڕی ئەفغانستان و هۆکارەکەشی بۆ دەرکردنی چەندین بڕیاری جیاواز لە ماوەی چوار ئیدارەی پێشووی ئەمریکا گەڕاندەوە. مایڵی بە لیژنەی هێزە چەکدارەکانی ئەنجوومەنی نوێنەرانی راگەیاند: "ئەم شەڕەمان لە 20 رۆژ یاخود 20 مانگ نەدۆڕاندووە، شەڕەکە پەیوەندی بە بڕیارە ستراتیژییەکانی رابردوو هەبووە کە بەردەوام گۆڕانکاری بەسەرداهاتووە و ئەم دۆخەی ئێستای ئەفغانستانی خوڵقاندووە". فەرماندە باڵاکەی ئەمریکا شێوازی کشانەوە خوێناوییەکەی ئەمریکای لە ئەفغانستان کە بە کوژرانی 13 هێزی مارینزی ئەمریکی و زیاتر لە  100 ئەفغانی کۆتایی پێهات، بە هۆکاری زیاتر فراوانبوونی درزی ناکۆکی و دووبەرەکی لەنێوان پارتە سیاسییەکانی نێوخۆی ئەمریکا گەڕاندەوەو کە سەرەکیترینیان هەردوو پارتی کۆماری و دیموکراتن. مایڵی وتی بەمدواییانە سەرنج و بایەخی گەورەی ئەمریکا لە ئەفغانستانەوە گۆڕا بۆ عێراق. گلەیی ئەوەی لە ئیدارە یەک بەدوای یەکەکانی ئەمریکا کرد کە کاریگەرانە مامەڵەیان لەگەڵ پاکستان نەکردووە، کە بە وتەی مایڵی بە درێژایی شەڕی ئەمریکا لە ناوچەکە وەکو پەناگەیەکی سەلامەت لەلایەن گرووپە چەکدارییەکان بەکارهاتووە. مارک باس لە شەڕی ئەفغانستان دەکات و دەڵێت: "لەو شەڕەدا کە کۆتاییەکەی ئەمە نەبوو کە ئێمە دەمانویست، لەڕووی پێکانی ئامانجە ستراتیژییەکانمان بۆ پاراستنی ئەمریکییەکان لە هەڕەشەکانی قاعیدە دۆڕاندنمان." لە کۆتایی قسەکانیدا مارک مەیڵی جەختدەکاتەوە دەبێت ئەمریکا لە شکستی لەمجۆرەدا، کە قوربانی و زیانی زۆری لێدەکەوێتەوە، وانەی زۆر فێربووبێت. ئەمریکا لە دوای هێرشەکانی 11ی سێپتەمبەر لە 2001 هێرشی کردە سەر قاعیدە لە ئەفغانستان، دوای 20 ساڵ لە شەڕی قاعیدەو تاڵیبان و کوژرانی 1882 ئەمریکی و زەرەر و زیانی زیاتر لە ملیارێک دۆلار، سەربازەکانی کشاندەوە و چەکدارانی تاڵیبانیش لە ماوەیەکی زۆر کەمدا دەستیان بەسەر تەواوی خاکی ئەفغانستاندا گرت.

هاوڵاتى لە ڕێنمایی یەکی نوێ دا دەستەڵاتی فڕۆکەوانی شارستانی عێراقی ڕایگەیاندووە، کە لە ئێستادا پشت بەستن بە بڕوانامەی نیۆدەوڵەتی تایبەت بە وەرگرتنی ڤاکسینی دژی کۆڤید 19 ی ھەڵپەساردوە. ئەمرۆ چوارشەممە، 29ی ئەیلوولی 2021، دەستەڵاتی فڕۆکەوانی شارستانی عێراق بڵاویکردەوە، "گەشتیاران و ھێڵە ئاسمانییەکان ئاگاداردەکەینەوە، کە لە ئێستادا پشت بەستن بە بڕوانامەی نیۆدەوڵەتی تایبەت بە وەرگرتنی ڤاکسینی دژی کۆڤید 19 ھەڵپەسێردراوە". ئاماژەی بەوەشکردووە، " بڕیارەکە هەموو گەشتیارانی عێراق لەکاتی گەشتکردنیان بۆ دەرەوەی وڵات دەگرێتەوە و تەنیا پەسەندکردنی پشکنینی (PCR) بە (72)کاتژمێر پێش ڕۆشتن و هاتنەوە کاری پێدەکرێت". ئەم بڕیارەی دەستەڵاتی فرۆکەوانی عێڕاق لە کاتێکدایە بڕیاردرابوو پاش وەرگرتنی دوو ژەمی ڤاکسینی کۆرۆنا و  بە دەستهێنانی کارتی ڤاکسین هاوڵاتی مافی ئەوەی هەبێت گەشتی دەرەوەی وڵات بکات، پێشتریش ڕێکخراوی تەندروستی جیهانی پێشتر داوایکرد وەرگرتنی ڤاکسین نەکرێت بە مەرج بۆ گەشتکردن.

هاوڵاتى  بەڕێوەبەرایەتی گشتی گەشتوگوزاری سلێمانی، داوا لە دەرچووانی ئەکادیمی گەشتوگوزار دەکات فۆڕمی دامەزراندنی ئەلکترۆنی پڕ بکەنەوە تا لە پڕۆژە گەشتیارییەکان دابمەزرێن.   بەڕێوەبەرایەتییەکە لە راگەیەندراوێکدا بڵاویکردووەتەوە کە دەرفەتی دۆزینەوەی سەدان هەلی کاری بۆ تەواوی دەرچووانی گەشتوگوزار (زانکۆ ، پەیمانگا ، ئامادەیی) خستووەتە بواری جێبەجێکردنەوە، کە بەپێی پێوەری ڕیزبەندی بڕوانامە و نمرە و ساڵانی دەرچوون، بۆ لەمەودوا لە پڕۆژە گەشتیارییەکانی کەرتی تایبەت لە پارێزگای سلێمانی دادەمەزرێن.   لە راگەیەندراوەکەدا هاتووە، دەرچووانی بوارەکە دوای تۆمارکردنی ناو و زانیارییەکانیان، لە لایەن گەشتوگوزاری سلێمانیەوە خولی راهێنانیان بۆ دەکرێتەوە و بەپێی پسپۆڕیان دەخرێنە سەر کار لە تەواوی ئەو پڕۆژانەی خاوەندارێتیان دەگەڕێتەوە بۆ کەرتی تایبەت کە ژمارەیان نزیکەی ١٥٠٠ پڕۆژەن.   دەقى راگەیەنراوەکە:   دەرفەتی هەلی کار بۆ سەدان دەرچووی ئەکادیمی گەشتوگوزار کرایەوە.   لە ئەمڕۆ ٢٠٢١/٩/٢٩ دەرچووان دەتوانن فۆڕمی ئەلکترۆنی پڕبکەنەوە تا لە پڕۆژە گەشتیارییەکان دابمەزرێن.   بەڕێوەبەرایەتی گشتی گەشتوگوزاری سلێمانی، داوا لە تەواوی دەرچووانی ئەکادیمی گەشتوگوزار دەکات فۆڕمی دامەزراندنی ئەلکترۆنی پڕ بکەنەوە تا لە پڕۆژە گەشتیارییەکان دابمەزرێن.   گەشتوگوزاری سلێمانی دەرفەتی دۆزینەوەی سەدان هەلی کاری بۆ تەواوی دەرچووانی گەشتوگوزار (زانکۆ ، پەیمانگا ، ئامادەیی) خستە بواری جێبەجێکردنەوە، کە بەپێی پێوەری ڕیزبەندی بڕوانامە و نمرە و ساڵانی دەرچوون، بۆ لەمەودوا لە پڕۆژە گەشتیارییەکانی کەرتی تایبەت لە پارێزگای سلێمانی دادەمەزرێن.   دەرچووانی بوارەکە دوای تۆمارکردنی ناو و زانیارییەکانیان، لە لایەن گەشتوگوزاری سلێمانیەوە خولی راهێنانیان بۆ دەکرێتەوە و بەپێی پسپۆڕیان دەخرێنە سەر کار لە تەواوی ئەو پڕۆژانەی خاوەندارێتیان دەگەڕێتەوە بۆ کەرتی تایبەت کە ژمارەیان نزیکەی ١٥٠٠ پڕۆژەن.   کەسی پاڵێوراو بۆ کارکردن پێویستە باجی تایبەتی بەڕێوەبەرایەتی گەشتوگوزاری سلێمانی بۆ دروست بکرێت و ئەو بەڕێوەبەرایەتیە ڕەزامەند بێت، ئەو کات خاوەن کاران دایاندەمەزرێنن لە پڕۆژەکانیان بەپێی پسپۆڕی و لێهاتووییان لە زمان و پسۆڕی و ئەزموونی کارکردنیان.   دامەزراندی دەرچووان، دوای بڕیاری ئەنجومەنی دەستەی گشتی گەشتوگوزار هەرێم هات کە بۆ لەمەولا مۆڵەت بۆ هیچ خاوەن پڕۆژەیەک نوێ ناکرێتەوە، گەر ڕێژەی لە ٣٠% ستافی کارکردنیان دەرچووانی ئەکادیمی بواری گەشتوگوزار نەبن.   تێیبینی :    ١/بە لە بەرچاوگرتنی بارودۆخی تەندروستی، پڕکردنەوەی فۆڕم تەنها بە شێوازی ئەلیکترۆنی دەبێت.   ٢/ژمارەی تەلەفون بە دروستی بنوسرێت، تا لەڕۆژانی داهاتوو لەلایەن گەشتوگوزاری سلێمانی پەیوەندی بەو کەسانە بکرێت کە ئامادە دەکرێن بۆ کارکردن.   ٣/هیچ خاوەن پڕۆژەیەکی کەرتی تایبەت ناتوانێت تاک لایەنە دەرچووان دابمەزرێنێت، تا ڕەزامەندی بەڕێوەبەرایەتی گشتی گەشتوگوزاری سلێمانی لەسەر نەبێت.   ٤/ پرۆسەی پڕکرنەوەی فۆڕمی ئەلیکترۆنی بە بەردەوامی و ٢٤ کاتژمێر کارایە بۆ پڕکردنەوە.   ٥/بۆ زانیاری زیاتر دەتوانن پەیوەندی بکەن بە داسیار محەمەد بەڕێوەبەری راگەیاندن و بە بازارکردن لە گەشتوکوزاری سلێمانی لە ڕێگەی ژمارە تەلەفونی ٠٧٧٠١٥٢١٩٢٩.  

شاناز حەسەن لەهەموو هەڵبژاردنەكاندا سەرەڕای جێگیركردنی كورسی بۆ ژنان بۆ گەیشتنیان بەپەرلەمان، بەڵام بەراورد بەكاندیدانی پیاو دەنگی كەمتر بەدەستدەهێنن، بەشێك لە رێكخراوەكانیش دەڵێن:» ژنان دەنگ نادەنە كاندیدە ژنەكان». بەپێی یاسای نوێی هەڵبژاردن، عێراق كراوەتە 83 بازنەی هەڵبژاردن بۆ ئەوەی 83 كاندیدی ژن بگاتە پەرلەمان لەكۆی 329 كورسی. بەپێی ئامارەكانی وەزارەتی پلاندانانی عێراق، ژنانی عێراق نیوەی كۆمەڵگە پێكدەهێنن، لەهەڵبژاردنی ساڵی 2018دا لەكۆی هەزارو 800 بەربژێری ژنان 87 ژن گەیشتنە پەرلەمانی عێراق، لەنێویاندا تەنها چوار ژنیان دەنگی پێویستیان بۆ كورسی پەرلەمان بەدەستهێنابوو. بۆ هەڵبژاردنی داهاتووی پەرلەمانی عێراق، لەكۆی 982 كاندیدی ژنان، 162یان وەكو كاندیدی سەربەخۆ بەشدارن و 820 دیكەیان لەنێو هاوپەیمانی و قەوارەی حزبەكاندان، هەندێك رێكخراو و چالاكوانی بواری ژنان پێیانوایە كەمی دەنگی ژنان و پەرلەمانتاری ژن لەناو پەرلەمانی عێراقدا پەیوەندی راستەوخۆی بەدەنگنەدانی خودی ژنانەوە هەیە بەكاندیدی ژن. یەكێتی ئافرەتانی كوردستان ئامارێكی هەڵبژاردنی رابردووی پەرلەمانی كوردستان بەنموونە دەهێنێتەوە، كە ژنان چەندە دەنگیان بەكاندیدی ژن داوە. ڤیان سلێمان، سكرتێری یەكێتی ئافرەتانی كوردستان لەلێدوانێكدا بەهاوڵاتى وت:»ئەگەر خولی پێنجەمی پەرلەمانی كوردستان لەبەرچاوبگرین، دەبینین ئافرەتان 15%ی دەنگەكانیان بۆ خۆیان مسۆگەر كرد». هەروەها باسی لەوەشكرد لەكاتێكدا بەپێی ئامارەكان زۆربەی دەنگدەران لەهەرێمدا ئافرەتن و وتی:» لەگەڵ ئەوەشدا ژنان كەمترین دەنگ بەدەستدەهێنن، هۆكارەكەی زیاتر دابونەریت و ئەو بیركردنەوانەیە كە سیاسەت تایبەتە بەپیاوان و ئافرەتان بڕوایان بەئەوە هەیە سیاسەت كاری پیاوە». سكرتێری یەكێتی ئافرەتانی كوردستان، جەختی لەوە كردەوە بۆ هەڵبژاردنی پەرلەمانی عێراق كاردەكەن بۆ ئەوەی هۆشیاری ئەوە لەنێو ئافرەتاندا بڵاوبكەنەوە كەدەنگ بەئافرەتان بدەن و وتیشی:» كارمان بۆ ئەوەیە ئافرەتان هۆشیار بكەینەوە پێویستە دەنگ بەئافرەت بدرێت، تا بەشداربن لە رەسمی چارەنووسی داهاتووی خۆی و چارەنووسی داهاتووی وڵاتەكەی و هەمان كار بكات كەپیاو دەیكات و هەمان پێگەی پیاوی هەبێت». هاوكات سەیوان رۆستەم، سەرۆكی رێكخراوی یەكێتی ژنانی كوردستان، لەلێدوانێكدا بەهاوڵاتى وت:» لەهەموو كۆڕو كۆبونەوەیەكدا زۆر گرنگی بەئەوە دەدەین كە زۆربوونی رێژەی ژنان لەهەر ناوەندێكی بڕیارداندا مانای ئەوەیە مافەكانی ژنان زیاتر دێتەدی و دەچێتە پێشەوە، بەڵام دەبینی ژنان زۆرجار دەنگی كەم دەهێنن ئەمە هۆكارەكەی ئەوەیە هەڵبژاردنی ناخی ژنان نین، لەگەڵ ئەوەی هەندێكیان زۆر جێگە دەستیان دیارە، بەڵام بەگشتی لەئاست داواكاری دەنگی ژندا نین». « كەمی دەنگی ژنان پەیوەندی بەفەرهەنگی كۆمەڵگەوە هەیە، كە  وایكردووە ژنان كەمتر دەنگیان پێبدرێت لەكاتێكدا سەركەوتنی ژن تەنیا پێویستی بەدەنگی ژن نیە، بەڵكو پێویستی بەكەسی ئازادیخوازیش هەیە كە متمانەیان پێبدەن»، سەیوان رۆستەم وای وت. بەشێك لە رێكخراوو چالاكوانی بواری ژنان پێیانوایە سەرژمێریەكی ورد لەبەر دەستدا نیە بۆ ئەم بابەتانە تا لێكۆڵینەوەی تێدا بكرێت. بەهار گوڵشاد، بەڕێوەبەری رێكخراوی ئێمە بۆ كاری ژنان (هەولێر) لەلێدوانێكدا بەهاوڵاتى وت:» تائێستا هیچ دیراسەیەكی زۆر ورد نیە تا بوترێت لەسەدا ئەوەندەی ژنان دەنگیان بەخودی ژن داوە، بۆیە پێم وایە ئەوە موتڵەق نیە». بەهار گوڵشاد ئەوەشی باسكرد كە هەموو كات وەك رێكخراوەكان پاڵپشتی ژنانی كاندیددەكەن و خولیان بۆ دەكەنەوە لەڕووی بەهێزكردنی سۆشیال میدیاو دروستكردنی كەمپین. نیاز عەبدوڵا، چالاكوانی بواری ژنان، لەلێدوانێكدا بەهاوڵاتى وت:»بەداخەوە لەكاتێكدا ژنان لۆمە دەكرێت كە هەلی یەكسان لەبەردەم ژنان و پیاوان وەك یەك نیە و ژنان كەمتر دەرفەتی  مومارەسەكردنی كاری سیاسییان هەیە، بۆیە گلەیی ئەوە لەژن بكرێت كە دەنگ بەكاندیدی ژن نادرێت و دەنگ كەم دەهێنێت رەوایەتییەكی بەهێزی نیە». « ئەو رێكخراوانانەی رەخنەی ئەوە لەژنان دەگرن كەمتر دەنگ دەهێنن، خۆیان سەر بەحزبن و دەرفەتی یەكسان بۆ ئەو ژنانە ناڕەخسێنن كە كاندیدیانن و ئەو رێگایانەی كە پێویستە لەبەردەم ژنان واڵابێت واڵای ناكەن، ئەوە دەرهاویشتەی ئەو ناهۆشیارییەیە كەدەیانەوێت ژن لەناو كۆمەڵگەدا ئامرازێك بێت بەدەست حزبە سیاسییەكانەوە»، نیاز عەبدوڵا چالاكوانی بواری ژنان وا دەڵێت. بەڕێوەبەری رێكخراوی دڵان بۆ كاروباری ژنان، دەڵێت:» تەنیا كۆمەڵگەو كلتور ئەوەی سەپاندووە كە ژنان كەمتر لەكاری سیاسەتدا سەركەوتوون». نیان عەلی، بەڕێوەبەری رێكخراوی دڵان بۆ كاروباری ژنان لەسلێمانی بەهاوڵاتى وت:»بونیەتی كۆمەڵگەی كوردەواری واهاتووە پیاوان كاری سیاسەتیان لێ جوانەو دەبێت ئەو مەودایە بۆ ئەوان جێبهێڵدرێت، لەكاتێكدا كە چەندین نموونەی ژنی سەركەوتوومان هەیە و بەداخەوە نەبووەتە هۆی رەواندنەوەی ئەو بیروباوەڕانە».

هاوڵاتى وتەبێژی وەزارەتی سەرچاوە ئاوییەکانی عێراق  ڕاگەیاند:" لە سەردانەکەی سەرۆک وەزیرانی عێراق و وەزیری سەرچاوە ئاوییەکانی عێراق بۆ ئێران چەند پرسێک تاوتوێ کراون، لەوانە پرسی وزە و ئاو و دابینکردنی پشکی عێراق". عەلی سامر وتەبێژی وەزارەتی سەرچاوە ئاوییەکانی عێراق بە ئاژانسی هەواڵی عێراقی ڕاگەیاندووە، لە سەردانەکەی سەرۆک وەزیرانی عێراق و وەزیری سەرچاوە ئاوییەکانی عێراق بۆ ئێران چەند پرسێک تاوتوێ کراون، لەوانە پرسی وزە و ئاو و دابینکردنی پشکی عێراق. ئاماژەی بەوەش کرد، شاندی عێراق لەگەڵ هەریەکە لە وڵاتانی ئێران و تورکیا هەوڵی گفتوگۆ دەدەن بۆ دابینکردنی پشک و مافەکانی عێراق لە ئاوی سەر زەوی. لەئیستادا تورکیاو ئێران بەشى زۆری ئاوی ئەو رووبارانەیان گرتووەتەوە کە لەو دوو وڵاتەوە دەڕژێنە خاکى عێراقەوە کە ئەوەش مەترسی نەک بۆ کشتوکاڵ بۆ ئاوی خواردنەوەش دروستکردوە.  

هاوڵاتى ئەندامێکی پەرلەمانی كوردستان، ئاشكرای دەکات، چەند كەسێك كە گوایە نفوسیان هەیە" ململانێ و بەریەككەوتنیان هەیە لەسەر عەلوەی پێنجوێن كە قازانجەكەی 25 ملیۆن دۆلارە. ئەمڕۆ چوارشەممە 29ی ئەیلەلی 2021 عەلی حەمەساڵح، ئەندامی پەرلەمانی کوردستان، لە نامەیەكدا بۆ قوباد تاڵەبانی، جێگری سەرۆكی حكومەتی هەرێم، رایگەیاندووە، "دڵنیام ئاگاداری ئەو ململانێ و بەریەککەوتنەی کە چەند کەسێک گوایە نفوسیان ھەیە لەسەر عەلوەی پێنجوێن دەیکەن، ھەڕەشە لە خەڵک دەکەن، شەڕەکە بۆ قازانجی 25 ملیۆن دۆلارە لەسەر حسابی خەڵکی پێنجوێن." باسیلەوەشکردووە، "ئەو عەلوەیە 30 ھەزار مەتر دوجایە، ئەگەر لەسەدا 50ی بکرێتە عەلوەو ئەوی دیکەش خزمەتگوزاری بێت، شوێنی ھەر عەلوەیەک 100 مەتر بێت، نرخی ھەر یەکەیەکی 100 مەتری بەلایکەم 200 ھەزار دۆلارە، تێچونی دروستکردی بە ھەموو خزمەتگوزاری 30 ھەزار دۆلارە واتە، ھەر عەلوەیەک 17 دەفتەر  قازانج دەکات و 150 عەلوەش  دەفرۆشرێت. کۆی قازانج  25 ملیۆن و 500 ھەزار دۆلارە." عەلی حەمەساڵح ئەوەشیخستۆتەڕوو، "ئەو پارەیە کە بەزمانی گشتی 2550 دەفتەر دۆلارە بۆ نەکرێتە خزمەتگوزاری بۆ پێنجوێن؟. لەكۆتاییشدا وتویەتی، "ئایا ئەمە دەکەن بۆ خزمەتی خەڵک؟ یان چەند کەسێک لەسەر حسابی خەڵک دەکەنە ملیۆنێر و سوڵحیان بۆ دەکرێت بۆ ئەوەی رێکبکەون و ئەم پارەیە بەش بکەن.

سازدانی: شاناز حەسەن بڕیار رەشید كاندیدی ژمارە 32ی لیستی هاوپەیمانی كوردستان لەچاوپێكەوتنێكدا لەگەڵ هاوڵاتى ئاماژە بەوە دەدات لەم هەڵبژاردنەدا هاوپەیمانی كوردستان دەبێتە یەكەم هێزی هەرێم و سێیەم هێز لەسەرتاسەری عێراق. هاوڵاتى: بەڕێزتان پێشتر لەمەكتەبی هەڵبژاردنەكانی یەكێتی بوون، تاچەند لیستی هاوپەیمانی كوردستان كانیدەكانی بەشێوەیەكی باش دابەشكردووە بەسەر بازنەكاندا؟ بڕیار رەشید: هیچ حزبێك نیە كە وەك یەكێتی دامەزراو بێت، چونكە لەسنوری جوگرافیای هەر بازنەیەكدا لانیكەم 10 بۆ 11 كۆمیتەی رێكخستنی هەبێت، یەكێتی خاوەنی ئامارێكی نوێیە كە سەرجەم ئەندام و لایەنگرو دەنگدەرەكانی یەكێتی لەخۆگرتووە، بۆیە دابەشكردنی كانیدەكان بەپێی ئەو ئامارە تازانە بەباشترین شێوە كراوە. هاوڵاتى: هاوپەیمانی كوردستانی لەهەندێك شوێن كاندیدی نیە وەك لەپارێزگاكانی دیالە؟ بڕیار رەشید: ئێمە دەمانەوێت لەهەر شوێنێك هەر كاندیدێك دابنێین، بەئەگەری لەسەدا 50 ئەگەری دەرچوونی هەبێت، بۆیە لەو ناوچانەدا تائێستا پێگەی كوردو دۆخی كورد ئەوەندە بەهێزنیە كەئێمە بتوانین و قوەتی ئەوەمان هەبێت كاندیدێك دەربچێنین، بەڵام بێگومان لەئێستاوە كاری بۆ دەكەین و لەداهاتوودا لەو ناوچانەش كاندیدمان دەبێت. هاوڵاتى: لەكاتی هەڵبژاردنەكاندا بەڵێنی زۆر بەخەڵك دەدرێت، بۆیە گلەیی خەڵكیش ئەوەیە كە لەدوای هەڵبژاردنەكان ئەم بەڵێنانە نابنە واقعی و كاریان بۆ ناكرێت، ئێوە تاچەند دڵنیایی دەدەنە دەنگدەری خۆتان؟ بڕیار ڕەشید:  ئێمە وەك لیستی هاوپەیمانی و لە رابردووشدا وەك یەكێتی بەڵێنی واقعیمان داوە، بۆیە ئەو بەڵێنانە واقعیبوون و زانیومانە لەئەرزی واقعدا دەتوانین جێبەجێی بكەین ئینجا بەڵێنمان داوەو كردوومانە، بۆیە ئەوەی كە ئێستاش كردوومانە بەبەڵێن سەد لەسەد بەنیەتی جێبەجێكردنەوە دەیكەین. بۆیە ئێمە كە دەنگی پێویست بەدەست بهێنین دەتوانین بەڵێنەكان بكەینە واقعی، بۆیە كە دەنگ نەهێنین ناتوانین هیچ بەڵێنیش جێبەجێبكەین، بۆیە ئەوە بەندە بەخواستی خەڵك خۆیەوە كە مەبەستیەتی ئەوەی ئێمە دەیڵێین جێبەجێ بكرێت دەنگمان پێبدەن. هاوڵاتى: قوباد تاڵەبانی وەك سەرۆكی لیستی هاوپەیمانی تاچەند كاریگەری هەیە؟ بڕیار رەشید: یەكەم گرنگی ئەوەیە كاك قوباد كوڕی جەنابی مام جەلالە و تاكو ئێستاش هیچ سەركردەیەكی سیاسی لەعێراقدا دروست نەبووەتەوە لەپێش جەنابی مام جەلال و لەدوای ئەویشەوە، كە بتوانێت هەموو لایەنەكان شیعەو سوننە رێكیان بخات. ئەو خۆشەویستی و رێزەی لەناو عێراقدا بۆ مام جەلال هەبووە بۆ هیچ سەركردەیەكی كورد نەبووە، بۆیە ئەویش دروستكراوی مام جەلالەو ئەو خۆشەویستی و رێزە دەچێتەوە بۆ ئەویش. قوباد تاڵەبانی ئەندامی سەركردایەتی و جێگری سەرۆكی حكومەتیشە، لێكتێگەیشتنێكی باشی هەیە بۆ كێشەكان و ئەقڵیەتی پێكەوە كاركردن و یەكڕیزی كە لەكۆتاییدا دەبێت بگەڕێینەوە بۆ بەغدا و كاركردنی پێشتر كردوویەتی وەك وەفدی سەردانیكار بۆ بەغدا رۆڵی هەیە، بۆیە زۆر گرنگی هەیەو رۆڵی بەرچاوی هەبووە. لەسەردانی بۆ بەغدا بینیمان كە گرنگیەكی زۆری هەیە بوونی قوباد تاڵەبانی وەك سەرۆكی لیستەكە. هاوڵاتى: بەڕێزتان وەك گەنجترین كانیدی لیستی هاوپەیمانی پلانتان چییە بۆ گەنجان بەتایبەت لەهەرێمی كوردستان زۆر گلەیی لەوە دەكرێت كاری بۆ نەكراوەو پەراوێزخراوە؟ بڕیار رەشید: پلانی ئێمە رەخساندنی دەرفەتی یەكسانە بۆ گەنجان، بەپێی بوارو بەپێی تواناو پسپۆڕییەكان بتوانین لەداهاتوودا كار بدۆزێتەوەو ئەم بوار رەخساندنە وادەكات بەپێی پسپۆری كەسەكان لەشوێنە گونجاوەكاندا كاریان دەستكەوێت  تابتوانێت داهێنان بكات لەو شوێنەدا كەكاری تێدادەكات و حەزیشی بۆی هەبێت و سەركەوتوو بێت. دواجار سوودی بۆ خۆی و بۆ كۆمەڵگە دەبێت، گرنگترین شت لەڕێگەی حكومەتەوە دەرفەتی كارەكان بڕەخسێنرێت. دەمانەوێت وابكەین ئەو بیرۆكەی قۆرخكاریەی كەهەیە كە كەرتی حكومی بۆتە خزمەتی كەرتی تایبەت نەمێنێت، بۆ نموونە هەموو ئەو دامەزراوانەی كە لەلایەن كەرتی تایبەتەوەیە لەلایەن حكومەتەوە سەرپەرشتی بكرێت، بۆیە ئەوكاتە دامەزراندن و دەركردنیش بەدەست حكومەت دەبێت نەك بەدەست یەك شەخسی دیاریكراو. هاوڵاتى: قسەتان چییە بۆ هاووڵاتیان لەم بانگەشەیەی هەڵبژاردندا؟ بڕیار رەشید: ئەگەر هاووڵاتیان دەیانەوێت نموونەی سێ ساڵ و چوار ساڵی رابردوو دووبارە بكەنەوە ئەوە دەتوانن دەنگ بدەن بەلایەنەكانی دیكە وەك نەوەی نوێ و پارتی، ئەگەر دەیانەوێت ئەوەی ئەم دوو مانگە هەیەو موچە بەتەواوی چاكبووە، هەوڵی یەكێتی بووە و دەنگ بدەنە هاوپەیمانی كوردستان. بۆیە ئەگەر هاووڵاتیان دەیانەوێت ئەمە بەردەوام بێت دەبێت دەنگ بەهاوپەیمانی بدەن و كێشەكانیان لە بەغدا چارەسەر دەبێت، بەڵام دەنگبدەن بە لایەنەكانی دیكە ئەو دووبەرەكیەی ماوەی رابردوو لەبەغدا دروست دەبێتەوە و بیركردنەوەی تاكڕەوی زاڵتر دەبێت، هەموو كێشەكان سەرلەنوێ  سەرهەڵدەدەنەوە، چونكە پارتی خۆی لەگەڵ بەغدا كێشەی هەیەو بەردەوام خۆی دووردەخاتەوە. دەنگدان بە نەوەی نوێ واتە دەنگدان بەپارتی، بۆیە ئەوان لەزۆر شوێن كاندیدیان بۆ یەكتری جێهێشتووە. هاوڵاتى: پێتان وایە وەك هاوپەیمانی كوردستان چەند كورسی بەدەستدەهێنن؟ بڕیار رەشید: ئێمە ژمارەی كورسیمان هەژمار نەكردووە، بەڵام لەكوردستاندا دەبینە هێزی یەكەم و لەعێراقیشدا دەبینە هێزی سێیەم، وەك كۆتا راپرسی كەئێستا لەبەر دەستماندایە. هاوڵاتى: زۆری كاندیدی سەربەخۆ كاریگەری لەسەر دەنگەكانی لیستی هاوپەیمانی نابێت؟ بڕیار رەشید: جەماوەری یەكێتی دەنگ بەیەكێتی دەدات نەك بەكاندید، بۆیە دەنگ بەشەخسێك نادات، بۆیە كەسێك كە پێشتر یەكێتی بووەو ئێستا بەكاندیدی سەربەخۆ بەشداری كردووە تەنیا دەنگی لایەنگیرانی خۆیان و كەسوكاری دەبات نەك دەنگی یەكێتی، بۆیە دەنگدەرەكانمان دەنگ بەیەكێتی دەدەن.

هاوڵاتى سەرۆککۆماری تورکیا، سەبارەت بە هاریکاری لەگەڵ رووسیادا لە پیشەسازی بەرگرییدا دەڵێت، "لە کۆبوونەوەکانی کۆمەڵەی گشتیی نەتەوە یەکگرتووەکاندا، لەبارەی هەندێک بابەتەوە پرسیارمان لێکرا و ئێمەش وەڵاممان دایەوە، پاشەکشە لە هەنگاوەکانمان ناکەین". رەجەب تەیب ئەردۆغان لە نوسینگەی فەرمی سەرۆکایەتی رووسیا، لەگەڵ ڤلادیمیر پوتین کۆبووەوە. بەپێی هەواڵێکی ئاژانسی ئەنادۆڵ، رەجەب تەیب ئەردۆغان باسی لەوە کردووە، کە ڤایرۆسی کۆرۆنای نوێ زۆر دۆستی لە یەکتر جیاکردووەتەوە و سەرەڕای گرتنەبەری هەموو رێوشوێنەکان، بەرەنگاری ڤایرۆسەکە لە هەلومەرجێی زۆر سەختدا بەڕێوەدەچێت. هاوکات، سەرۆککۆماری تورکیا سوپاسی سەرۆکی رووسیای کرد لەو پشتیوانییەی پێشکەشی کرد لە کۆنترۆڵکردنی ئەو ئاگرەی لە تورکیا کەوتەوە و سەرەخۆشی ئاراستە کرد بۆ ئەو فڕۆکەوانە رووسیایەی لە میانی کوژاندنەوەی ئاگرەکەدا گیانی لەدەست دا و وتی، ''بەڕاستیی دۆستان لەم جۆرە رۆژە سەختانەدا دەردەکەون''. ئەردۆغان باسی لەوە کرد کە پەیوەندییەکانی تورکیا-رووسیا لە بوارە سیاسیی، سەربازیی، ئابووریی و بازرگانییەکاندا بەشێوەیەکی زۆر جیاواز خۆی نیشان داوە و رایگەیاند، ''هەرچەندە هەندێک بەرز و نزمی بەشی هەیە لە قەبارەی بازرگانییدا، بەڵام لەئێستادا لە دۆخێکی باشدایە. من باوەڕم وایە کە دەچێتە دۆخێکی باشترەوە". ئەردۆغان، ئاماژەی بەوەشکرد، کە دروستکردنی وێستگەی ناوکی ئاککویو درێژەی هەیە و لە کاتی دیاریی کراودا تەواو دەبێت و وتی، ''پێم وایە ساڵی داهاتوو، دەتوانین یەکەی یەکەم بکەینەوە. کارێکی چڕ دەکرێت. لەئێستادا، 13هەزار کەس تیایدا کار دەکەن کە 10 هەزاریان تورک و سێ هەزاریان رووسیاین، بەڵام نزیکەی هەموویان لە رووسیا خوێندوویانە، بەدڵنیایییەوە ئەمەش دەبێتە هۆی پتەوکردنی پەیوەندییەکانی نێوانمان".

هاوڵاتى سەرۆکی هاوپەیمانی کوردستان، ڕایگەیاند: "بەپێی ئەو توانایانەی لە بەردەستماندا ھەبووە توانیومانە كێشەكان چارەسەر بكەین" وتیشی، " قەسەم بەخوا پارتی ئەو ڕۆژە بەچاوی خۆی نابینێت بە تەنیا حكومی كوردستان بكات". ئەمرۆ چوارشەممە 29ی ئەیلوولی 2021. کەرنەڤاڵی هاوپەیمانی کوردستان لە گەرمیان بەڕێوەچوو، لە میانی کەرنەڤاڵەکدا کە هاوپەیمانی کوردستان پێنج کاندیدی لەو سنورەدا هەیە، قوباد تاڵەبانی وتارێکی پێشکەشکردوو ڕاشیگەیاند، "ھەندێ لەو كاندیدانەی خۆیان كاندید كردووەتەوە لە چوار ساڵی ڕابردوودا یەك قسەیان لە پەرلەمانی عێراق نەكردووە". ئەو ئاماژەی بەوەشکرد، "بۆ دابینكردنی بودجە بۆ كوردستان دەرگای لایەنە عێراقیەكان نەما لێینەدەین، ئێمە بەبێ هاشوو هوش کارمان دەکرد، ئەوانیش بەقیڕە قیڕ هەر خەریکی موزایەدە بوون". هاوکات، قوباد تاڵەبانی ئەوەی خستەڕوو، "کێشەی نیشتەجێ بوون بە تەواوی چارەسەر دەکەین بەتایبەت بۆ خەڵکی هەژارو کەمدەرامەت، هەرچەندە بەپێی ئەو توانایانەی لە بەردەستماندا ھەبووە توانیومانە كێشەكانی گەرمیان چارەسەر بكەین". دەربارەی حاکم و حکومەکردنی کوردستان قوباد تاڵەبانی، پەیامێکی بۆ پارتی دیموکراتی کوردستان ناردو وتی، "پارتی ھەموو ھەوڵێكدەدات پێگەی یەكێتی و گۆڕان لاواز بكات، قسەم بەخوا پارتی ئەو ڕۆژە بەچاوی خۆی نابینێت بە تەنیا حكومی كوردستان بكات". ئەوەشی خستەڕوو، پارتی پێی خۆشە خەڵک دەنگ بە هێزە بێ کاریگەر و بچوکەکان بدات چونکە پارتی هەموو هەولێک دەدات پێگەی یەکێتی و گۆران لاواز بکات، دەشڵێت" پارتى دەیەوێت  شتێک نەمێنێت بەناوی هاوسەنگی هێز لە کوردستان بۆ ئەوەى خۆى  دەبێتە ئاغاو کوێخای ئەم کوردستانەو لە هەولێرو بەغداش هەر قسە قسەى ئەو دەبێت، بۆیە قەسەم بە خوا ئەو رۆژە بەچاوی خۆیان نابینن".

هاوڵاتى وەزارەتی تەندروستی رایگەیاند:"  له‌ 24 کاتژمێری ڕابردووی تایبەت بە نەخۆشی ڤایرۆسی کۆڕۆنا له‌ هه‌رێمی كوردستان هەزارو 349 تووشبووی نوێ تۆمار كراوه‌، هاوكات هەزارو 246 كه‌س چاکبوونه‌ته‌وه‌و په‌تاكه‌یان تیپه‌ڕاندوه‌. له‌ ماوه‌ی 24 كاتژمێری ڕابردوو هەشت هه‌زارو 430 پشکنینی نوێ ئه‌نجامدراوه‌ و به‌پێی ئه‌نجامی پشكنینه‌كانیش هەزارو 349 تووشبووی نوێ تۆمار كراوون، هاوكات ڕێژه‌ی چاکبوونه‌وه‌ له‌ په‌تاكه هەزارو 246 كه‌س بووه‌، هه‌ر به‌هۆی كۆڕۆناشه‌وه‌ له‌ 24 كاتژمێری ڕابردوو17 كه‌س بەهۆی كۆڕۆناوە گیانیان له‌ده‌ستداوه.

هاوڵاتى وتەبێژی حکومەتی هەرێم ڕایگەیاند:" هەوڵەکان بۆ دابەشکردنی نەوتی سپی خراونەتەگەڕ، هەندیک جار گرفتی سیولەمان دەبێت". ئەمڕۆ چوارشه‌ممه‌ 29ی ئه‌یلوولی 2021، جوتیار عادل وتەبێژی حکومەتی هەرێم لە کۆنگرەیەکی ڕۆژنامەنوسیدا ڕایگەیاند، هەوڵەکان بۆ دابەشکردنی نەوتی سپی خراونەتەگەڕ، سەبارەت سستی لە دابەشکردنی مووچەش دەڵێت، هەندیک جار گرفتی سیولەمان دەبێت. وتەبێژی حکومەتی هەرێم له‌باره‌ی دابه‌شكردنی نه‌وتی سپی ماڵان، رایگەیاند، "ئه‌ركی حكومه‌تی هه‌رێم ئه‌وه‌یه‌ خزمه‌تگوزاری به‌هاوڵاتیان بگه‌یه‌نێت، له‌ڕوی دابینكردنی نه‌وتی سپیشه‌وه‌ هه‌وڵه‌كان خراونه‌ته‌گه‌ڕ، وه‌زیری سامانه‌ سروشتیه‌كانی هه‌رێم و وه‌زیری نه‌وتی عێراق رێكه‌وتنێكی باشیان كردوه‌، ئێمه‌ش له‌ناوچه‌ شاخاویه‌كان ده‌ستپێده‌كه‌ین چونكه‌ زۆربه‌ی زۆری دانیشتوانی ئه‌و ناوچانه‌ هه‌ژار و كه‌مده‌رامه‌تن و زستانیش زووتر ده‌ستپێده‌كات و قۆناغ به‌قۆناغ دێینه‌ خواره‌وه‌ تا ده‌گاته‌ ناوشاره‌كان بۆ دابه‌شكردنی نه‌وتی سپی". سه‌باره‌ت به‌سستی له‌ دابه‌شكردنی مووچه‌ی فه‌رمانبه‌ران، جوتیار عادل ئاشكرایكرد، "هه‌ندێكجار گرفتی سیوله‌مان ده‌بێت، به‌ڵام ئومێده‌وارین ئه‌م پرۆسه‌یه‌ سست نه‌بێته‌وه‌ و دوانه‌كه‌وێت، ئه‌گه‌رنا حكومه‌تی هه‌رێم هه‌موو هه‌وڵێكیداوه‌ له‌و واده‌یه‌ی دیاریكردوه‌ له‌كاتی خۆی موچه‌ دابه‌شبكات و دوانه‌كه‌وێت". سه‌باره‌ت به‌هه‌میشه‌یی كردنی فه‌رمانبه‌رانی گرێبه‌ست، وته‌بێژی حكومه‌تی هه‌رێم وتی، "نامانه‌وێت شتێك بڕیاری له‌سه‌ر بده‌ین كه‌ ببێته‌ بانگه‌شه‌ی هه‌ڵبژاردن، به‌ڵام به‌هه‌میشه‌ییكردنی گرێبه‌سته‌كان له‌به‌رنامه‌ماندایه‌، نه‌مانویستوه‌ پێش هه‌ڵبژاردنه‌كان بكه‌وێت، ده‌مانه‌وێت كه‌ خه‌ڵك بزانێت حكومه‌ت جدییه‌ و پێشبینی ده‌كه‌م ئه‌مه‌ له‌زووترین كاتدا چاره‌سه‌ر بكرێت".