هاوڵاتی بەڕێوەبەرایەتیی کەشناسی و بوومەلەرزەزانی هەرێمی کوردستان کەشوهەوای ئەمرۆ و سبەی بڵاوکردەوە. ئەمڕۆ یەکشەممە 16ی حوزەیرانی 2024، بەڕێوەبەرایەتیی کەشناسی و بوومەلەرزەزانی هەرێمی کوردستان رایگەیاند، "ئەمڕۆ ئاسمان ساماڵ و پەڵە هەور وە لە ناوچەکانى باکوور نیمچە هەوردەبێت، پلەکانی گەرما نزیک دەبنەوە لە تۆمارکراوەکانی دوێنێ". ئاماژە بەوەکراوە، "سبەینێ دووشەممە 17ی حوزەیرانی 2024، ئاسمان ساماڵ دەبێت لەگەڵ پەیدابوونى هەندێک پەڵەهەور و پلەکانی گەرماش کەمێک نزمتر دەبێتەوە بەراورد بە ئەمڕۆ". بەرزترین پلەکانی گەرمای پێشبینیکراو بە پلەی سیلیزی: - هەولێر : 42. - سلێمانی : 40 - دهۆک : 41 - کەرکوک : 44 - هەڵەبجە : 42 - زاخۆ : 42 - سۆران : 38 - حاجی ئۆمەران : 28 - گەرمیان : 46
هاوڵاتی سەرۆکی بەرەی گەل بەبۆنەی جەژنی قوربانەوە پەیامێکی پیرۆزبایی بڵاوکردەوە. ئەمڕۆ یەکشەممە 16ی حوزەیرانی 2024، لاهور شێخ جەنگی، سەرۆکی بەرەی گەل لە پەیامێکدا رایگەیاند، "بە بۆنەی هاتنەوەی جەژنی قوربانەوە، گەرمترین پیرۆزبایی ئاڕاستەی خوشک و برا مسوڵمانەکانمان دەکەم لە هەرێمی كوردستان و عێراق و جیهان". دەشڵێت، " پەروەردگاری مەزن نزای هەمووان قبووڵ بکات، جەژنێکی پڕ لە خێر و خۆشی و بەرەکەت بێت بۆ گەلەكەمان".
هاوڵاتی ئەمڕۆ شەممە 15ی حوزەیرانی 224، د. فازڵ نەبی بریكاری پێشووتری وەزارەتی دارایی عێراق رایگەیاند، حكومەتی عێراق داوای ناوی هەموو هێزە ئەمنییەكانی هەرێمی کوردستان دەكات و بە دوای بیانوودا دەگەڕێت كە كێشە بۆ ناردنی مووچە دروستبكات. د. فازڵ نەبی بریكاری پێشووتری وەزارەتی دارایی عێراق لە دیدارێكی تەلەفزیۆنیدا رایگەیاند، پێشتر رێككەوتن كرا بۆ ناردنی مووچەی مانگی چواری هێزە ئەمنییەكان، بەڵام حكومەتی عێراق داوای ناوی هەموو هێزە ئەمنییەكان داواكات و تا ئەم ساتە وەختەش چارەسەری ریشەیی بۆ بە بانكیكردنی مووچەی مووچەخۆرانی هەرێم و داهاتی ناوخۆ نەدۆزراوەتەوە. فازڵ نەبی ئەوەشی خستەڕوو، بابەتی نەوتی هەرێم كێشە بۆ مووچەی مووچەخۆران دروستناكات، بەڵام دەبێت لەسەر دەستپێكردنەوەی هەناردەی نەوت هەرێم و بەغداد بگەنە رێككەوتنی كۆتایی چونكە حكومەتی عێراق بە دوای بیانوودا دەگەڕێت كە كێشە بۆ ناردنی مووچە دروستبكات.
هاوڵاتی سەرۆكی لێژنە هاوبەشەكانی قایمقامییەتی سلێمانی، هەر دوکاندارێک نرخی کاڵاکان بەرز بکاتەوە ئەوە سزا دەدرێت، هەروەها زیاتر لە 40 لێژنە چاودێری بازاڕ دەکەن. ئەمڕۆ شەممە 15ی حوزەیرانی 2024، گۆران قادر، سەرۆكی لێژنە هاوبەشەكانی قایمقامییەتی سلێمانی، رایگەیاند، سەردان و بەدواداچوونەکانمان چڕتر دەکەینەوە تا درەنگانی شەو بۆ ئەوەی نرخ لە بازاڕ بەرز نەکرێتەوە، هەروەها لە بۆنە پشووەکانیشدا بەردەوام چاودێری بازاڕ دەکەین. دەشڵێت، هاووڵاتییان ئاگادار دەکەینەوە کە کاڵا و شتوومەکەکانیان لەو شوێنانە بکڕن کە فەرمین و مۆڵەتی کارکردنیان هەیە. ئەوەشی خستەڕوو، نزیکەی دوو تۆن نیو چەرەزات دەستی بەسەردا گیراوە، کە ماوەبەسەرچوو بوو، دانرابوو بۆ جەژن لە بازاڕ ساغبکرێتەوە، هەروەها رێگەنادەین هیچ خاوەن دوکانێک بۆنە ئایینی، نیشتمانیی و نەتەوییەکان بقۆزێتەوە و یاری بە نرخی کاڵاکان بکات.
هاوڵاتی .سەرۆکی هەرێمی کوردستان، له ژيانى ڕۆژانه و په‌يوه‌ندييه‌كانماندا تازه بكه‌ينه‌وه و لاپه‌ڕه‌ى نوێ له ڕێز و خۆشه‌ويستى و نيازپاكى و گيانى هاريكارى له‌گه‌ڵ يه‌كتردا بكه‌ينه‌وه. ئەمڕۆ شەممە 15ی حوزەیرانی 2024، نێچيرڤان بارزانى، سه‌رۆكى هه‌رێمى كوردستان رایگەیاند بەبۆنەی جەژنەی قوربانەوە پەیامێکی پیرۆزبای بڵاوکردەووە و رایگەیاند، له‌م بۆنه‌يه‌دا با چه‌مك و ماناكانى جه‌ژن له گه‌ردن ئازادى و لێبوردن و پێكهاتنه‌وه، له ژيانى ڕۆژانه و په‌يوه‌ندييه‌كانماندا تازه بكه‌ينه‌وه و لاپه‌ڕه‌ى نوێ له ڕێز و خۆشه‌ويستى و نيازپاكى و گيانى هاريكارى له‌گه‌ڵ يه‌كتردا بكه‌ينه‌وه. دەقی پەیامەکە... جه‌ژنى قوربان به گه‌رمى له هاووڵاتيانى خۆشه‌ويستى كوردستان و ته‌واوى موسڵمانان له عێراق و جيهان پيرۆز ده‌كه‌م. هيوادارم جه‌ژنى خێر و كامه‌رانى بێت و بۆ هه‌موو لايه‌ك ئارامى و ئاسووده‌يى له‌گه‌ڵ خۆيدا بهێنێت، هيواى سه‌لامه‌تى و پشوويه‌كى خۆش بۆ هه‌مووان ده‌خوازم. له‌م بۆنه‌يه‌دا با چه‌مك و ماناكانى جه‌ژن له گه‌ردنئازادى و لێبوردن و پێكهاتنه‌وه، له ژيانى ڕۆژانه و په‌يوه‌ندييه‌كانماندا تازه بكه‌ينه‌وه و لاپه‌ڕه‌ى نوێ له ڕێز و خۆشه‌ويستى و نيازپاكى و گيانى هاريكارى له‌گه‌ڵ يه‌كتردا بكه‌ينه‌وه. يه‌زدانى مه‌زن وڵات و گه‌له‌كه‌مان بپارێزێت. جه‌ژنى هه‌مووان پيرۆز بێت، هه‌موو ساڵێك به خۆشى.
هاوڵاتی ئەمڕۆ شەممە 15ی حوزەیرانی 2024، غەریب ئەحمەد، سەرۆكی لیژنەی ئەوقاف لە ئەنجومەنی نوێنەرانی عێراق راگەیاند، ئەو هاوڵاتییانەی لە عێراقەوە بە ڤیزای ساڵ چوونەتە سعودیە بەشێكی زۆریان نێردرابوونەوە بۆ شاری جددە كە بگەڕێنەوە بۆ شوێنی خۆیان و لەلایەن دامەزراوە رەسمییەكانی ئەو وڵاتەوە رێگرییان لێكرا كە لە رێگای دامەزراوە رەسمییەكانەوە نەهاتبێتن. دەشڵێت، لەدوای گفتوگۆكردنی ئێمە لەگەڵ باڵیۆزی سعودیە لە عێراق داوامانكرد كە ئاسانكارییان بۆ بكرێت. ئەوەشی خستەڕوو، لە ئێستادا كێشەی بەشێكی زۆر لەو حاجییانە چارەسەركرا كە بە ڤیزای ساڵ هاتبوونە سعودیە و بەشێكی زۆریان گەیشتوونەتە كێوی عەرەفە".
هاوڵاتی رێکخراوەکانی مافی مرۆڤ رایانگەیاند، بۆ جێبەجێکردنی سزای لەسێدارەدان، تۆمەتی هەڵبەستراو دراوەتە پاڵ دەستگیرکراوان. ئاماژەی بەوەشکردووە، جێبەجێکردنی سزای لەسێدارەدان لە عێراق پاڵنەری مه‌زهه‌بی و سیاسی لەپشتە، زۆرینەی لەسێدارەدراوان لە پێکهاتەی سوننەن. تەنیا لەماوەی چەند هەفتەی ڕابردوودا لانیکەم 63 کەس لە زیندانی ئەلحوت لە ناسریە لە سێدارەدراون، رێکخراوەکانی مافی مرۆڤ دەسەڵاتی دادوەری و جێبەجێکردن تۆمەتبار دەکەن بەوەی، تێوەگڵاون لە پێشێلکاریکردن بەرامبەر گیراوان و ناچارکردنیان بە دانپێدانی هەڵبەستراو بۆ دەرکردن و جێبەجێکردنی سزای لەسێدارەدان، هەروەها ئاماژە بەوە دەکەن جێبەجێکردنی سزاکە پاڵنەری سیاسی و مەزهەبی لەپشتە. ئەوەشیان خستۆڕوو، لانیکەم 63 سزای لەسێدارەدانی رانەگەیەندراو لە زیندانی ناسریە جێبەجێکراون، ئاشکرای دەکات دانپێدانانەکان لەژێر ئەشکەنجە کراون و پێوەرە نێودەوڵەتییەکان تێیاندا رەچاو نەکراوە. لە مانگی نیسانی 2024 رازاو ساڵحی، لێکۆڵەر لە رێکخراوی لێبوردنی نێودەوڵەتی گوتی، جێبەجێکردنی سزای لەسێدارەدان بەم دواییانە لە عێراق مەترسیدارە، گوتیشی، سیستەمی دادوەری لە پێشێلکردنی مافەکانی مرۆڤ تێوەگلاوە، پێویستە حکوومەتی عێراق دەستبەجێ سزاکانی لەسێدارەدان هەڵبوەشێنێتەوە". لە مانگی ئایاری 2024 نێردەی نەتەوە یەکگرتووەکان ئاماژەی بەوە کرد، لەسێدارەدانی بەکۆمەڵ و رڕگەیەندراو بەگوێرەی یاساکانی دژ بە تیرۆر مایەی نیگەرانییە. نایف شەممەری، ئەندامی ئەنجومەنی پارێزگای نەینەواش گوتی،پێویستە پێداچوونەوە بە لێکۆڵینەوە لەگەڵ گیراوانی سەردەمی داعش بکرێتەوە، گوتیشی، زۆینەی گیراوان بە پشتبەستن بە زانیاری نادروست دەستگیرکراون.
هاوڵاتی ئەمڕۆ شەممە 15ی حوزەیرانی 2024، وه‌زاره‌تی ته‌ندروستیی غه‌ززه ڕایگه‌یاند، به‌هۆی هێرشه به‌رده‌وامه‌كانی ئیسرائیله‌وه ژماره‌ی كوژراوان بۆ زیاتر لە 37 هه‌زار کەس بەرزبۆتەوە. ئەوەشی خستۆتەڕوو، تادێ به‌هۆی هێرشه‌كانی سوپای ئیسرائیل بۆ سه‌ر كه‌رتی غه‌ززه ژماره‌ی كوژراوان و برینداران زیاتر دەبن و له هه‌مان كاتدا دانیشتووان تووشی برسییه‌تیی و نه‌هامه‌تیی سەخت بوونە. ئاماژه‌ی به‌وەشكرد، به‌هۆی هێرشه به‌رده‌وامه‌كانی ئیسرائیله‌وه ژماره‌ی كوژراوان بۆ 37 هه‌زار و 296 كه‌س به‌رز بووه‌ته‌وه، هاوكات ژماره‌ی برینداران گه‌یشتووه‌ته 85 هه‌زار و 197 كه‌س. دەشڵێت، 70%ـی قوربانییه‌كان منداڵ و ئافره‌تن. ژماره‌ی قوربانییانی هێرشه‌كانی سوپای ئیسرائیل بۆ سه‌ر كه‌رتی غه‌ززه به‌رز بووه و سوپای ئیسرائیلیش له هێرشه‌كانی بۆ سه‌ر كه‌رته‌كه و لێدانی چه‌كدارانی بزووتنه‌وه‌ی حه‌ماسی فه‌ڵه‌ستینی به‌رده‌وامه. ڕۆژی 7ی ئۆکتۆبەری 2023، چەکدارەکانی بزووتنەوەی حەماس هێرشێکی بەرفراوانیان کردە سەر ئیسرائیل، لە هێرشەکەدا زیاتر لە هەزار و 400 ئیسرائیلی کوژران و سەدانی دیکەش بریندار بوون، هاوکات 240 هاووڵاتیی ئیسرائیل وەکوو بارمتە لەلایەن حەماسەوە ده‌ستبه‌سه‌ر كران.
هاوڵاتی لەگوندی شێخ لەنگەر سەربەناحییەی کوڵەجۆوە منداڵێکی تەمەن دوو ساڵان بەناوی ( محمد دڵشاد باقی) خنکا و گیانی لەدەستدا. ئێوارەی ئەمڕۆ شەممە 15ی حوزەیرانی2024، علی جەمال قدووری وتەبێژی پۆلیسی گەرمیان راگەیاند، لەگوندی شێخ لەنگەر سەربەناحییەی کوڵەجۆوە تەرمی منداڵێکی دوو ساڵان بەناوی ( محمد دڵشاد باقی) هێنرایە پزیشکی دادوەری قەزای کەلار کەبەهۆی خنکان بەئاو گیانی لەدەستدابوو. دەشڵێت، بەوتەی کەسوکاری کەدانیشتووی قەزای کفرین و بەسەردان هاتبوونە گوندی ناوبراو منداڵەکەیان لەماڵ دەرچوەو کەوتۆتە مەشروعی ئاوەوە کەنزیکی ماڵەکەیان بوەو لەئەنجامدا گیانی لەدەستداوە. ئاماژەی بەوەشکرد، لەئێستادا پەڕاوی لێکۆڵینەوەی بۆکراوەتەوەو پۆلیس دەستی بەلێکۆڵینەوە کردوە.
هاوڵاتی بەڕێوەبەرایەتیی کەشناسی و بوومەلەرزەزانی هەرێمی کوردستان لەبارەی کەشوهەوای سبەی راگەیەندراوێکی بڵاوکردەوە. ئەمڕۆ شەممە 15ی حوزەیرانی 2024، بەڕێوەبەرایەتیی کەشناسی و بوومەلەرزەزانی هەرێمی کوردستان رایگەیاند، "سبەی یەکشەممە 16ی حوزەیرانی 2024 ئاسمان ساماڵ دەبێـت لەگەڵ درووسبونی هەندێ پەڵە هەور، لە دوایی نیوەرۆ لە ناوچە شاخاویە سنوورییەکان ئەگەری بارینی تاوە بارانێکی کورت خایەن هەیە و پلەکانی گەرما نزیک دەبێت لە تۆمارکراوی ئەمرۆ". بەرزترین پلەکانی گەرمای پێشبینیکراو بە پلەی سیلیزی بۆ سبەینێ یەکشەممە: هەولێر : 43 سلێمانی : 39 دهۆک : 41 کەرکوک : 45 هەڵەبجە : 41 زاخۆ : 42 سۆران : 38 حاجی ئۆمەران : 27 گەرمیان : 46
هاوڵاتی بەڕێوەبەرایەتی کۆمەڵگای دەروازەی نێودەوڵەتی باشماخ هۆبەی راگەیاندن و پەیوەندییەکان هاوڵاتییان ئاگادار دەکاتەوە لەبارەی چوونی ئۆتۆمبێلێک بۆ ئێران. ئەمڕۆ شەممە 15ی حوزەیرانی 2024، بەڕێوەبەرایەتی کۆمەڵگای دەروازەی نێودەوڵەتی باشماخ هۆبەی راگەیاندن و پەیوەندییەکان رایگەیاند، "ئاگاداری بۆئەو گەشتیارە بەڕێزانەی کە بە ئۆتۆمبیلی تایبەتی خۆیان گەشت دەکەن بۆ وڵاتی ئێران لە بەرواری (2024/6/16) دەبێت تابلۆی ئۆتۆمبیلەکانیان (تابلۆی ژمارەکانیان تازەکان) بێت واتا تابلۆ کۆنەکان کاریان بۆ ناکرێت لە دیوی ئێران و رێگەیان پێ نادرێت گەشتەکەیان ئەنجام بدەن". ئاماژە بەوەشکراوە، "بۆیە داواکارین لە گەشتیاران و هاووڵاتیانی خۆشەویست پابەندبن بەڕێنماییەکانەوە ئەم بڕیارەش لەلایەن کۆماری ئیسلامی ئێرانەوە بڕیاری لەسەردراوە".
هاوڵاتی حامد تورکاشوەند لە شارى کرماشان لەلایەن ژمارەیەک چەکدارى نەناسراوەوە کوژراوە. ئەمڕۆ شەممە 15ی حوزەیرانی 2024، مەهدی قەنادی، بەرپرسی پەیوەندییەکانی دادگای شۆرشی پارێزگای کرماشان رایگەیاندووە، "ژمارەیەک چەکداری نەناسراو کاتژمێرێک پێش هاتنەدەرەوەی حامید لە ماڵەکەی بۆسەیان بۆ داناوەو لەگەڵ هاتنە دەرەوەیدا چوار گوللەی پێوە دەنێنن و دەستبەجێ دەکوژرێت". ئاماژەی بەوەشکرد، "چەکدارەکان هەڵهاتوون و بە بریاری دادوەر لێکۆڵینەوەو بەدواداچوون بۆ دەستگیرکردنی بکوژەکان دەستیپێکردووە". حامد تورکاشوەند بەرپرسی بەشی ئەمنی و سزای بازاڕەکانی شاری پاوەیەو ماڵەکەی لە شارى کرماشان بووەو لەوێ نیشتەجێ بووە.
هاوڵاتی وەزارەتی بازرگانی و پیشەسازی حکومەتی هەرێمی کوردستان رایدەگەیەنێت گەڕی دووەمی چەکی پارەی گەنمی جوتیاران گەیشتووە. ئەمڕۆ شەممە 15ی حوزەیرانی 2024، وەزارەتی بازرگانی و پیشەسازیی حکومەتی هەرێمی کوردستان رایگەیاند، "بڕی 20 ملیار دینار وەک گەڕی دووەمی چەکی پارەی گەنمی جوتیاران گەیشتووە و لە دوای جەژنی قوربانیش دەست بە رێکارە کارگێرییەکانی دابەشکردنی دەکرێت بەسەر جوتیاراندا". ئاماژە بەوەشکراوە، "لەو 20 ملیار دینارە 10ملیار دیناری پارەی گەنمی جوتیارانی سنوری سلێمانیییە و شەش ملیار دیناریشی پارەی گەنمی سنوری هەولێرە و چوار ملیار دیناریش پارەی گەنمی جوتیارانی دهۆکە".
هاوڵاتی كامەران عوسمان، بەتەنیا لەمساڵدا هەشت هاووڵاتی مەدەنی، بەهۆی بۆردومان و لەشكركێشییەكانی توركیا بۆ سەر خاكی هەرێم شەهیدبوون. ئەمڕۆ هەینی 14ی حوزەیرانی 2024، كامەران عوسمان لێپرسراوی بەشی مافی مرۆڤ لە ڕێكخراوی سی پی تی ئەمریكی رایگەیاند، زۆرترین هێرشی سوپای توركیا بۆ ناوچە سنورییەكانی پارێزگای دهۆك بووە. دەشڵێت، هێرشەکانی تورکیا بۆسەر ناوچەکانی هەرێمی کوردستان لە شەش مانگی رابردوودا بەم جۆرە بووە، پارێزگای دهۆك 365 هێرش و بۆردومان، پارێزگای هەولێر 356 هێرش و بۆردومان، پارێزگای سلێمانی 102 هێرش و بۆردومان و لە پارێزگای نەینەواش 10 هێرش و بۆردومان ئەنجامدراوە. ئاماژەی بەوەشکرد، بەتەنیا لەماوەی دوو ڕۆژی ڕابردوودا، سوپای توركیا 27 بۆردومانی بۆ سەر زنجیرە چیای مەتینا و گەلی ڕەشاڤا لە قەزای ئامێدی، چیای ساوێن لە بناری قەندیل، لوتكەی كوڕاشەڵ و بناری چیای كێوەڕەش لە ڕانیە، چیای جاسوسان لە قەزای پشدەر، گوندی كانی میرانی كۆماری و نزارە لە قەزای پێنجوێن ئەنجامداوە. کامەران عوسمان ئەوەشی خستۆتەڕوو، لە ماوەی 48 کاتژمێری رابردوودا توركیا 27 جار چەند ناوچەیەكی هەرێمی كوردستانی بۆردومانكردووە، لەمساڵیشدا 833 هێرشی ئەنجامداوە و بەوهۆیەوە هەشت هاووڵاتی شەهیدبوون
هاوڵاتی رێبەرانی وڵاتانی پیشەسازی و پێشکەوتووی دونیا ناسراو بە G7 لە راگەیاندنێکی هاوبەشدا کە رەشنووسەکەی بڵاو کراوەتەوە، کۆماری ئیسلامیان ئاگادار کردۆتەوە، کە چالاکییەکانی خۆی لە بواری پیتاندنی یۆرانیۆم رابگرێت. ئەسۆشەیتێدپرێس رۆژی هەینی 14ی حوزەیران لە راپۆرتێکدا باسی لەوە کرد رێبەرانی G7، لە راگەیاندنە هاوبەشەکەیاندا ئاماژەیان بەوەداوە، هیچ پاساوێکی نییە بەوەی پیتاندنی لەو ئاستەدا جگە لە مەبەستی سەربازی هیچ مەبەستێکیتری لە پشت بێت. لەم راگەیاندنەدا کە بڕیارە لە کۆتایی دانیشتنی رێبەرانی G7 لە ئیتالیا بڵاو بێتەوە، بە ئاشکرا باس لەوە کراوە ئێران نابێ بە هیچ شێوەیەک دەستی بە چەکی ئەتۆم بگات، یان پەرەی پێبدات. ئەم راگەیاندنەی G7 لە حاڵێکدا بڵاو ئەبێتەوە کە رۆیتەرز رۆژی پێنج شەممە 13ی حوزەیران، راپۆرتێکی ئاژانسی نێونەتەوەیی وزەی ئەتۆمی بڵاو کردەوەو باسی لەوە کرد ئێران بە خێرایی خەریکی جێگیرکردنی 174 سانتریفیوژە لە وێستگەی پیتاندنی یۆرانیۆمی "فێردۆ".
