کۆمپانیا نەوتییەکانی عێراق کارمەندەکانیان دەگوازنەوە کوەیت

دوا بەدوای کوژرانی عەلی خامنەیی ڕێبەری باڵای شۆڕشی ئیسلامیی ئێران، بەرپرسانی باڵای ئەمریکا، بە گومانن، لەوەی کە ئۆپراسیۆنە سەربازییەكانی ئەمریکا و ئیسرائیل دژی کۆماری ئیسلامی لە ماوەیەکی نزیکدا ببێتە هۆی گۆڕینی ڕژێمەكە. هەر لەسەرەتای گرژییەكان، لەگەڵ ئێران و دوای هێرشەكانی رۆژی 28ی شوبات، بەرپرسانی ئەمریکا لە نێویاندا دۆناڵد ترەمپ، سەرۆکی ئەمریکا، ئاماژەیان بەوەداوە، ڕوخاندنی ڕژێمی سەرکوتكەری تاران، یەکێکە لە ئامانجە سەرەكییەكانی ئەمریکا، لەگەل پەکخستنی مووشەکی بالیستی و بەرنامە ئەتۆمییەكەی. لەنوێترین پێشهاتیشدا ترەمپ، یەکشەممە 1ی ئاداری 2026 ڕایگەیاند، داوا لە هەموو ئەو نیشتمانپەروەرە ئێرانییەكان دەکەم، کە تامەزرۆی ئازادین، ئەم دەرفتە بقۆزنەوە و وڵاتەکەیان وەربگرنەوە. وەك ئاماژەیەك بۆ ئەوەی خەڵكی خۆپیشاندان بكەن و دژی ئەو دەسەڵاتەی ئێستا راپەڕن.  بەڵام بەرپرسانی ئەمریکی،  نزیك لە دەزگای هەواڵگری (سی ئای ئەی) بە ئاژانسی رۆیتەزیان وتووە، گومانی جددیان هەیە لەوەی ئۆپۆزسیۆنی ئێران، توانای ڕووخاندنی ئەم ڕژێمە ئاینیەی هەبێت، كە لە ساڵی ١٩٧٩ەوە دەسەڵاتی بەدەستەوەیە، بەرپرسانی ئەمریكا نەیان شاردەوە، كە بەدووری نازانن، دوای سەرکوتکردنی ناڕەزایەتییەکانی مانگی یەكی ئەمساڵ و بەردەوامی هێرشە سەربازییەكان بۆ سەر ئەو وڵاتە، ئەم دەسەڵاتە بڕوخێت، بەڵام زۆر بەدووری دەزانن كە وادەی روخانەكەی بەم نزیكانە رووبدات. ئاژانسی رۆیتەرز ئاشكرایكردووە، هەڵسەنگاندنەکانی سی ئای ئەی کە لە چەند هەفتەی پێش هێرشكردنە سەر ئێران، پێشکەشی کۆشکی سپی کرابوون، ئەوە بووە، لە ئەگەری مردنی خامنەیی، كەسایەتیەكی توندڕەوی سوپای پاسداران یان پیاوێكی ئایینی توندڕەو جێگای دەگرێتەوە. رۆیتەرز رونیكردوەتەوە، بەرپرسانی ئەمریكا بەدووری دەزانن لێپرسراوانی سوپای پاسداران بە ئاسانی خۆیان بەدەستەوە بدەن، لەبەر چەند هۆكارێك لەوانە لە ماوەی رابردوودا، سوودمەندی یەكەم لە سەروەت وسامانی ئەو وڵاتە ئەوان بوون. هەروەها لە هەڵسەنگاندەكانی سی ئای ئەیدا، تەنها یەك راپۆرت، ئاماژەی بەوە داوە لە ئەگەری دروست بوونی دووبەرەكی، دەتوانرێت دەسەڵاتەك برۆخێت، لێپرسراوانی ئەمریكا جەختیان لەوە كردووەتەوە، كە مەرجی سەرەكی بۆ سەركەوتنی هەر شۆڕشێك، دروست بوونی دووبەرەكییە، بەڵام تا ئێستا ئەوە روینەداوە لە ئێران. پێشتریش، دۆناڵد ترەمپ، سەرۆکی ئەمریکا جەختی لەوە كردەوەتەوە، ئامانجی سەرەکیی لە دەستپێکردنی ئۆپەراسیۆنە سەربازییەکەی دژی تاران، دابینکردنی "ئازادی"یە بۆ خەڵکی ئەو وڵاتە و گۆڕینی دەسەڵاتە، داواشی لە خەڵكی ئێران كرد، دوای وەستانی بۆردوومانەکان "دەست بەسەر حکومەتەکەیاندا بگرن، بەڵام ئەوەی جێگەی سەرسوڕمانە، لەنوێترین لێدوانیدا ترمپ دەڵێت ، دەیەوێت كەناڵی پەیوەندی لەگەڵ ئێران بكاتەوە، ئەمەش ئاماژەیەكە بۆ ئەوەی واشنتن پێشبینی دەست لەکارکێشانەوەی حکومەت ناکات، یان نایەوێت ئەم حكوتەی ئێستا برۆخێت یان لانی كەم دەیەوێت بۆ ماوەیەكی كەم بمێنێتەوە. لەبەرامبەردا عەلی لاریجانی، سکرتێری ئەنجومەنی باڵای ئاسایشی نیشتمانیی ئێران رایگەیاند، هیچ دانوستاندنێک لەگەڵ ئەمریکا ناکەن، ئەمریكاو ئیسرائیلیشی بەوە تۆمەتباركرد هەوڵی هەڵوەشاندنەوەی وڵاتەكەی دەدەن، لێپرسراوانی ئەمریكا ئەوەشیان خستۆتەڕوو لە مانگی كانوونی دووەمەوە تاوتوێی ئەگەرەكانی دوای كوشتنی خامنەیی كراوە، ئایا دەبێتە هۆی گۆڕانێكی گەورە و بتوانرێت لە رێگەی دانوستانەوە مامەڵە لەگەڵ ئێران بكرێت لەسەر پرۆگرامە ئەتۆمییەكەی. بەرپرسانی ئەمریکی بە رۆیتەرزیان وتووە، لەكاتی ناڕەزایەتیەكانی كانوونی دووەمی ئەمساڵ ستیڤ ویتکۆف، نێردەی تایبەتی ترەمپ، چەند جارێك لەگەڵ رەزا پەهلەوی، كوڕی شا دەركەوت، ئەمەش پرسیاری بەدوای خۆیدا هێنا، ئایا دوای رۆخانی رژێمی ئێستای دەبێتە جێگرەوەی ئەم دەسەڵاتە، بەڵام ئەو بەرپرسانە رەشبینی خۆیان نیشانداوە و جەختیات لەوە كردەوەتەوە، هیچ كەسایەتییەكی ئۆپۆزسیۆن نییە كە لەلایین واشنتنەوە پاڵپشتیكراو بێت و ئەو توانایەی هەبێت بە كردەیی كۆنتڕۆڵی ئێران بكات. جۆناسان بانیكۆڤ، كە پێشتر لێپرسراوی باڵا بووە لە دەزگای هەواڵگری سی ئای ئەی، دەڵێت، لە كۆتاییدا ئەگەر هێرشەكانی ئەمریكا و ئیسرائیل وەستان، گەلی ئێران رژانە سەر شەقامەكان، بۆ كۆتاییهێنان بەم رژێمەی ئێستا، ئەو كات سەركەوتنیان بەندە بە هەڵوێستی سەربازە ئاساییەكانەوە، ئایا پشتی خەڵك دەگرن یان دژیان دەوەستنەوە، بەڵام ئەگەرێكی زۆرە پاشماوەكانی رژێم كە چەكیان بەدەستەوەیە، چەكەكانیان دژی خەڵك بەكار بهێنن بۆ پارێزگاریكردن لەم رژێمەی ئێستا.

دەسەڵاتی فڕۆکەوانی مەدەنی عێراق داخستنی ئاسمانی عێراقی بۆ ماوەی 48 کاتژمێری دیکە بەرووی سەرجەم فڕۆکەکانی هاتن و رۆیشتن و ترانزێت درێژکردەوە. دەسەڵاتی فڕۆکەوانی مەدەنی عێراق لە راگەیەندراوێکدا ئاشکرای کرد، داخستنی ئاسمانی عێراق بۆ ماوەی 48 کاتژمێری دیکە، کە لە کاتژمێر 12:00ـی  نیوەڕۆی ئەمڕۆ دووشەممە تاوەکو 12:00ـی نیوەڕۆی رۆژی چوارشەممە، درێژ دەکاتەوە. لە راگەیەندراوەکەدا هاتووە، ئەم بڕیارە لەسەر بنەمای هەڵسەنگاندنی بەردەوامی دۆخی ئەمنی و پەرەسەندنەکانی گرژییەکانی ناوچەکە هاتووە، ئاماژەی بەوەشدا، پاش پێداچوونەوەیەکی گشتگیر بۆ داتا پەیوەندیدارەکان بە مەبەستی دووبارە هەڵسەنگاندنەوەیان بەپێی هەر پەرەسەندنێکی نوێ دەردەچێت.  دەسەڵاتی فڕۆکەوانی مەدەنی عێراق راشیگەیاند، هێڵە ئاسمانییەکان و لایەنە پەیوەندیدارەکان ئاگادار دەکرێنەوە لە هەر نوێکردنەوەیەک کە لەم بارەیەوە دەربکرێت بەپێی پێویست.  هاوکات دوێنێ یەکشەممەش، دەسەڵاتی فڕۆکەوانی مەدەنی عێراق داخستنی ئاسمانی عێراق بۆ ماوەی 24 کاتژمێری دیکە بەڕووی سەرجەم فڕۆکەکانی هاتوو و رۆشتن و ترانزێتەوە درێژکردەوە کە تا کاتژمێر 12:00ی نیوەڕۆی ئەمڕۆ بەردەوام بوو.

رێکخراوی مانگی سووری ئێران نوێترین ئاماری قوربانییەکانی هێرشە ئاسمانییەکانی ئەمریکا و ئیسرائیلی بۆ سەر ناوچە جیاجیاکانی ئەو وڵاتە بڵاوکردەوە و رایگەیاند، تاوەکو ئێستا 555 کەس کوژراون. بەگوێرەی راگەیێندراوی مانگی سوور، "لە چەند رۆژی رابردوودا بەهۆی هێرشەکانی دووژمنەوە 131 شار و شارۆچکەی ئێران تووشی زیان و رووداوی جۆراوجۆر بوون"؛ ئاماژە بەوەش کراوە کە تیمەکانی فریاگوزاری بەردەوامن لە کارەکانیان بۆ گواستنەوەی تەرمەکان و گەیاندنی خزمەتگوزارییە پزیشکییەکان بۆ بریندارانی هێرشەکان.   مانگی سووری ئێران باس لەوە دەکات، لە ئەنجامی ئەم جەنگە زیاتر لە 100 هەزار کارمەندی فریاگوزاری و تیمەکانی رزگارکردن لە سەرتاسەری وڵاتدا خراونەتە "ئامادەیی تەواو"ەوە بۆ هاوکاریکردنی لێقەوماوان و ئەنجامدانی ئۆپەراسیۆنەکانی فریاکەوتن.   لە سێ رۆژی شەڕدا، هێرشە ئاسمانییەکان بۆ سەر پێگە جیاوازەکانی هێزە ئەمنییەکان لە ئێران و رۆژهەڵاتی کوردستان زیادیکردووە و بەو هۆیەوە لە چەندین پارێزگای ئەو وڵاتە زیانی گیانی و مادیی زۆر کەوتووەتەوە.   هێرشکردنە سەر پارێزگای سنە   لە بەیانی ئەمڕۆ دووشەممەوە 8 هێرشی ئاسمانی کراوەتە سەر بنکە و بارەگاکانی سوپا و هێزە ئەمنییەکانی دیکەی ئێران لە سنووری شاری سنە.   سەرلەبەیانی دوای 6 هێرشی یەک لە دوای یەک، قایمقامی سنە رایگەیاند، لانیکەم 3 هاونیشتمانی گیانیان لەدەستداوە.   نزیک نیوەڕۆش دوو ناوچە لە نزیک چیای ئاویەری سنە کرانە ئامانج.   بەرپرسانی سیاسی و سەربازیی ناوچەکە تا ئێستا هیچ زانیارییەکیان لەسەر شوێنی هێرشەکان و زەرەر و زیانەکانی رانەگەیاندووە.   تەرمی 22 پاسەوانی سنوور لە ئیلام بە خاک سپێردران    بەیانی ئەمڕۆ لە رێوڕەسمێکی جەماوەرییدا، تەرمی 22 ئەندامی هێزەکانی پاسەوانی سنووری ئێران لە شاری ئیلامی رۆژهەڵاتی کوردستان بە خاک سپێردران.   ئەو 22 کەسە لە ئەنجامی هێرشێکی ئاسمانیی ئیسرائیل بۆ سەر بنکەیەکی هێزەکانی پاسەوانی مێهران لە سنووری پارێزگاکە گیانیان لەدەستدابوو.   لە سێ رۆژدا 8 کەس لە پارێزگای هەمەدان کوژراون   بەڕێوەبەری گشتیی بنکەی شەهید و کاروباری خۆبەخشەکان لە پارێزگای هەمەدانی ئێران رایگەیاند، لە سێ رۆژی شەڕدا هەشت کەس لە سنووری ئەو پارێزگایە کوژراون.   بەپێی زانیارییەکانی ئەو بەرپرسە، قوربانییەکان خەڵکی ناوچە جیاوازەکانی پارێزگاکەن، بەجۆرێک پێنج کەسیان دانیشتووی شاری هەمەدان، دوو کەسیان خەڵکی شارۆچکەی تویسرکان و یەک کەسی دیکەش خەڵکی شارۆچکەی بەهارە.   لە راگەیێندراوەکەدا ئاماژە بەوەش کراوە، ئەو کەسانەی لە هێرشەکاندا کوژراون لە توێژە جیاوازەکانن و هاووڵاتیی مەدەنی، ئەندامانی هێزە چەکدارەکان و چەکدارانی بەسیجیان تێدایە.   کوژرانی سێ ئەندامی سوپای پاسداران لە لوڕستان    پەیوەندییە گشتییەکانی لقی پارێزگای لوڕستانی سوپای پاسداران بڵاویکردەوە، سێ ئەندامیان لە ئەنجامی هێرشە ئاسمانییەکانی ئەمریکا و ئیسرائیل بۆ سەر یەکێک لە بنکەکانی ئەو پارێزگایە کوژراون.   بەگوێرەی راگەیێندراوەکەی سوپای پاسداران، هێرشەکە رۆژی 28ی شوبات ئەنجامدراوە و تێیدا یەکێک لە بنکە و بارەگاکانی سەر بە سوپای پاسداران لە لوڕستان کراوەتە ئامانج.   سوپای پاسداران ناوی ئەو سێ ئەندامەی بڵاوکردووەتەوە کە لەو هێرشەدا کوژراون و بریتین لە "سەید محەممەد سادق حەیات غەیبی، سەید عەممار سەجادی و سەجاد مەنسووری."   27 کەس لە تەورێز کوژراون   بەڕێوەبەری گشتیی رووبەڕووبوونەوەی قەیرانەکان لە پارێزگای ئازەربایجانی رۆژهەڵاتی ئێران (تەورێز) رایگەیاند، لە دەستپێکی ئەم جەنگە و لە ئەنجامی هێرشە ئاسمانییەکانی ئیسرائیل و ئەمریکا بۆ سەر چەند ناوچەیەکی پارێزگاکە، 27 کەس کوژراون.   بەپێی زانیارییەکانی ئەو بەرپرسە، لە 48 کاژێری رابردوودا چەندین شوێن لە شارەکانی تەورێز، سەراب، مەراغە و شەبێستەر کراونەتە ئامانج.    بەڕێوەبەری گشتیی رووبەڕووبوونەوەی قەیرانەکان لە پارێزگای ئازەربایجانی رۆژهەڵاتی ئێران ئاماژەی بەوەشکرد: "تەنیا لە هێرشەکەی دوێنێ یەکشەممە، 2ی ئاداردا بۆ سەر شاری مەراغە، 15 کەس شەهیدبوون".   لە پارێزگای فارس 35 کەس کوژراون   بەڕێوەبەری گشتیی دامەزراوەی شەهیدانی پارێزگای فارسی ئێران رایگەیاند، لە ئەنجامی هێرشە ئاسمانییەکانی ئەمریکا و ئیسرائیل بۆ سەر ناوچە جیاجیاکانی ئەو پارێزگایە، تاوەکو ئێستا 35 کەس کوژراون و ئەگەری بەرزبوونەوەی ئامارەکەش هەیە.   بەگوتەی ئیبراهیم بیانی، بەڕێوەبەری گشتیی دامەزراوەی شەهیدانی پارێزگای فارسی ئێران، جگە لەو کەسانەی لە شاری لامەرد کوژراون، 13 کەسی دیکە لە شاری شیراز و ناوچەکانی دیکەی پارێزگای فارس بوونەتە قوربانی؛ هەروەها ئاماژەی بەوەش کردووە کە دوو کەسایەتیی دیاری پارێزگاکە لە تاران کوژراون و ئێستا ئامادەکاری دەکرێت بۆ گواستنەوەی تەرمەکانیان و بەخاکسپاردنیان لە پارێزگای فارس.   لە بەشێکی دیکەی زانیارییەکاندا هاتووە، بڕیارە کاژێر 15:00ی ئەمڕۆ مەراسیمی بەخاکسپاردنی 20 قوربانیی شاری لامەرد بەڕێوەبچێت، کە لە ئەنجامی بۆردوومانکردنی چەند ناوچەیەکی نیشتەجێبوون و هۆڵێکی وەرزشی لەو شارەدا گیانیان لەدەستدابوو.   هێرشەکانی ئیسرائیل – ئەمریکا بۆ سەر ئێران لە رۆژی شەممە 28-02-2026 دەستیپێکرد. ئەمریکا ناوی ئۆپەڕاسیۆنەکەی ناوەتە تووڕەیی ئەفسانەیی. ئیسرائیل ناوی ناوە نەڕەی شێر و ئێران بەڵێنی راستەقینە.

وەزیری دەرەوەی فەرەنسا ڕایدەگەیێنێت، ڕژێمی ئێران بەرپرسیارەتیی پەرەسەندنەکانی ڕۆژهەڵاتی ناوەڕاست لەئەستۆ دەگرێت و دەبێت هێرشەکانی بۆ سەر وڵاتانی ناوچەکە رابگرێت و ئامادەیی خۆشی بۆ هاوکارییکردنی وڵاتانی کەنداو دەربڕی.  شەڕ و ئاڵۆزیییەکانی نێوان ئیسرائیل، ئەمریکا و ئێران پێی نایە ڕۆژی سێیەم، ڕۆژهەڵاتی ناوەڕاست چووەتە نێو قۆناغێکی نوێی پڕ لە ناسەقامگیری و وڵاتانی جیهانیش لەبارەی دۆخەکەوە نیگەرانیی خۆیان دەردەبڕن. ژان نوئێل بارۆ، وەزیری دەرەوەی فەرەنسا، لە کۆنگرەیەکی ڕۆژنامەوانیدا ڕایگەیاند: "دەبێت بە زووترین کات کۆتایی بە پەرەسەندنی ڕۆژهەڵاتی ناوەڕاست بێت، ئێمە لە هیچ هێرشێك ئاگادار نەکراوینەتەوە و بەشدارییمان لە هیچ ئۆپەراسیۆنێکی سەربازیی نەکردووە." وەزیری دەرەوەی فەرەنسا، دەڵێت: دەبێت ئێران هێرشەکانی بۆ سەرناوچەکە ڕابگرێت، ڕژێمی ئێران بەرپرسیارەتیی پەرەسەندنەکانی ڕۆژهەڵاتی ناوەڕاست لەئەستۆ دەگرێت. فەرەنسا ئامادەیە بۆ بەشداری و بەرگریکردن لە وڵاتانی کەنداو و ئوردن. هاوبەشەکانمان لە ناوچەکە کراونەتە ئامانج، داوا دەکەین گرژی و ئاڵۆزییەکان کەمبکرێنەوە.   ئیمانوێل ماکرۆن، سەرۆکی فەرەنسا، لەگەڵ دەستپێکردنی شەڕەکە، ئیدانەی ‌هێرشەکانی ئێرانی کرد و بەبێ بنەما وەسفی کرد.

کەنەکە بانگەوازی لە هەموو پارت و ڕێکخراو و کەسایەتییەکان کرد بە ڕۆحێکی نیشتیمانی و بە درووشمی "نەورۆزی ئازادی و یەکڕیزی"ـەوە بەشداریی لە ئاهەنگەکانی نەورۆز بکەن. کۆنگرەی نەتەوەیی کوردستان (کەنەکە) بانگەوازی لە هەموو پارت و ڕێکخراو و کەسایەتییەکانی چوار بەشی کوردستان و دەرەوەی وڵات کرد بە ڕۆحێکی نیشتیمانی و بە درووشمی "نەورۆزی ئازادی و یەکڕیزی"ـەوە بەشداریی لە ئاهەنگەکانی نەورۆز بکەن، دەسکەوتەکانی گەلی کورد و بەرخۆدانی ڕۆژئاوا بپارێزن. کەنەکە دەڵێت: "نەورۆزی ناوەندیی ئامەد و تەواوی ئەورووپا بە ڕۆحێکی نەتەوەیی و ئیرادەی پتەوەوە، پێکەوە پیرۆز بکەن. هەروەها هیوادارین ئەمساڵ گەلەکەمان لە فرانکفۆرت و لە هەموو وڵاتانی ئەورووپا و جیهان پێکەوە جەژنی نەورۆز پیرۆز بکەن. پێویستە بە ئیرادە و یەکڕیزییەکی بەهێز پێکەوە جەژنی نەورۆز بگێڕین بۆ ئەوەی جارێکی دیکە ئیرادەی گەلەکەمان بۆ هەموو جیهان نیشان بدەین و پەیامی ئازادی و یەکڕیزیمان بە جیهان بگەیەنین. بانگەوازی ئێمە ئەوەیە کە هەموو کوردستانیان بە ڕەنگ و سیمبول و ناسنامەی خۆیانەوە دەست بدەنە دەستی یەک و نەورۆزی ٢٠٢٦ بکەنە نەورۆزی ئازادی و یەکڕیزیی خۆیان. ئێمە پێمان وایە هەلومەرجی ناوچەیی و ئەو قۆناغەی کە بزووتنەوە سیاسییەکانی کوردستانی تێیدایە، بەرپرسیارێتییەکی گەورە دەخاتە سەر شانی هەموومان. بۆیە جارێکی تر بانگەوازی خۆمان دووپات دەکەینەوە کە بە یەکێتی و بەدیهێنانی یەکڕیزیمان دەتوانین هێزی گەلەکەمان زیاد بکەین و ئامانجەکانمان بەدی بهێنین".

لە بەیاننامەیەکی هاوبەشدا، ئەمەریکا و بەحرەین و ئوردن و کوەیت و قەتەر و سعودییە و ئیمارات "بە توندی" سەرکۆنەی هێرشەکانی ڕژێمی ئێرانیان کرد و بە پەرەسەندنێکی مەترسیداریان دانا. ئەمەی خوارەوە دەقی بەیاننامە هاوبەشەکەیە: ویلایەتە یەکگرتووەکانی ئەمەریکا، بەحرەین، ئوردن، کوەیت، قەتەر، شانشینی سعودییە و ئیماراتی یەکگرتووی عەرەبی بە توندی ئیدانەی هێرشە بێ جیاوازی و بێباکانەکانی مووشەک و فڕۆکە بێفڕۆکەوانەکانی کۆماری ئیسلامی ئێران دەکەن بۆ سەر خاکە خاوەن سەروەرییەکان لە سەرانسەری ناوچەکە، لەنێویاندا بەحرەین، عێراق — لەنێویدا هەرێمی کوردستانی عێراق — ئوردن، کوەیت، عومان، قەتەر، شانشینی سعودیە، و ئیماراتی یەکگرتووی عەرەبی. ئەم هێرشە ئاسمانییە بێ پاساوانە خاکی خاوەن سەروەرییان کردە ئامانج و دانیشتوانی مەدەنییان خستە مەترسییەوە و زیانیان بە ژێرخانی مەدەنی گەیاند. کردەوەکانی کۆماری ئیسلامی گوزارشت لە پەرەسەندنێکی مەترسیدار دەکەن کە سەروەری چەند دەوڵەتێک پێشێل دەکات و سەقامگیری ناوچەکە دەخاتە مەترسییەوە. بە ئامانجگرتنی خەڵکی مەدەنی و ئەو وڵاتانەی کە بەشدار نین لە شەرانگێزی، ڕەفتارێکی بێباکانە و ناسەقامگیرکەرە." بەیەکگرتوویی پێکەوە دەوەستین لە بەرگریکردن لە هاووڵاتیان و سەروەری و خاکەکەمان و لە بەرامبەر ئەم هێرشانەدا مافی بەرگریکردن لە خۆمان دووپات دەکەینەوە. ئێمە پابەند دەبین بە ئاسایشی ناوچەکە و دەستخۆشی لە هاریکارییە کاریگەرەکانی بەرگری ئاسمانی و مووشەکی دەکەین کە ڕێگری کردووە لە لەدەستدانی ژیان و وێرانکاری زۆر زیاتر.

ئەمڕۆ یەکشەممە ژمارەیەک فڕۆکەی بێفڕۆکەوان و مووشەک ئاڕاستەی ئاسمانی هەولێری پایتەختی هەرێمی کوردستان کران و دەنگی تەقینەوەیەکی بەرزیش بیسترا. سیستەمی بەرگری ئاسمانی لە هەولێر ڕێگری لە هێرشەکان کرد. ڕۆژنامەنووس عەبدولحەمید زێباری، دانیشتووی هەولێر، بە دەنگی ئەمەریکای ڕاگەیاند، "دوو ڕۆژە هێرشەکان بۆ سەر هەولێر بەردەوامن، بەڵام هێرشەکەی ئێوارەی یەکشەممە بەهێزترین هێرش بوو." فەرماندەیی ناوەندیی ئەمەریکا (سێنتکۆم) ئەمڕۆ ڕایگەیاند، فڕۆکەخانەی نێودەوڵەتی هەولێر یەکێک بوو لە ژمارەیەک ئامانجی سڤیل کە لە دوو ڕۆژی ڕابردوودا لە لایەن ڕژێمی ئێرانەوە کراوەتە ئامانج. ڕۆژنامەنووس زێباری ڕایگەیاند، تا ئێستا نازانرێت هێرشەکان فڕۆکەی بێفڕۆکەوان بوون یان مووشەک، بەڵام سیستەمی بەرگری ئاسمانی زۆربەی هێرشەکانی پوچەڵ کردووەتەوە و دوکەڵ لە هەندێک ناوچەی هەولێرەوە بەرزبووەتەوە. ئاماژەی بەوەشکردووە، "هێشتا دوکەڵ و بڵێسەی ئاگرێکی زۆر لە ناوچەیەکی بەردەم دیواری فڕۆکەخانەی نێودەوڵەتی هەولێرەوە بەرەو ڕۆژهەڵات بەرز دەبێتەوە، هەروەها بڵێسەی ئاگریش دیارە." بەپێی ئەو گرتە ڤیدیۆییانەی لە سۆشیال میدیا بڵاوکراونەتەوە، ڕوونە کە پاشماوەی فڕۆکەیەکی بێفڕۆکەوان یان مووشەکێک لە شەقامی 120 مەتری هەولێر کەوتووەتە خوارەوە و دوکەڵی لێ بەرزدەبێتەوە. ڕۆژنامەنووس زێباری گوتی "تا ئێستا نازانرێت ئەو هێرشانە بە فڕۆکەی بێفڕۆکەوان یان مووشەک ئەنجام دەدرێن، بەڵام سیستەمی بەرگری ئاسمانی ڕێگرییان لێدەکات و زۆربەیان لە ئاسماندا لەناو دەچن." لە سەرەتای دەستپێکردنی ئۆپەراسیۆنی "توڕەیی ئەفسانەیی"ی ئەمریکا لە دژی ڕژێمی ئێران، هەولێر وەک دەیان ناوچەی دیکەی ڕۆژهەڵاتی ناوەڕاست، بووەتە ئامانجی مووشەک و فڕۆکەی بێفڕۆکەوانی ئێران و بریکارەکانی لە ناوچەکەدا. لە هەولێر بنکەیەک هەیە بۆ هێزەکانی هاوپەیمانی نێودەوڵەتی بە سەرۆکایەتی ئەمەریکا. بنکەکە دەکەوێتە تەنیشت فڕۆکەخانەی نێودەوڵەتی هەولێر.

دۆناڵد ترەمپ، سەرۆکی ئەمریکا لەبارەی سێ سەربازە کوژراوەکەیان بێدەنگی شکاند و دەڵێت، "ئەوان کەسی مەزنن، بەڵام ئێمە چاوەڕوان دەکەین ئەمە رووبدات، بەداخەوە دەکرێت ئەمە بەردەوامبێت". ترەمپ بە ڕۆژنامەی دەیلی مەیلی بەریتانی ڕاگەیاند، ئێستا لەگەڵ ژەنەراڵەکانمان لەسەر هێڵم و چاودێری هێرشەکان دەکەم، پێشبینی دەکەین هێرشەکانمان بۆ سەر ئێران چوار هەفتە یان کەمتر بەردەوام بێت. گەشبینم بە دەرئەنجامی هێرشەکان و پێشبینی دەکەم زۆر شتی ئەرێنی لە بەرژەوەندی ئەمریکا ڕووبدەن. لەبارەی هەوڵە دیپلۆماسییەکان، تڕەمپ ئاشکرای کرد، ئێران داوای دەستپێکردنی دانوستانەکانی کردووە، بەڵام ئەو ڕەتی کردووەتەوە و وتی، ئێرانییەکان ئێستا دەیانەوێت گفتوگۆ بکەن، بەڵام من پێم وتن دەبوایە هەفتەی ڕابردوو قسەتان بکردایە، نەک ئەم هەفتەیە، ئێستا شتەکان گۆڕاوە.

فەرماندەیی ناوەندیی هێزەکانی ئەمریکا (CENTCOM) لە راگەیەندراوێکی فەرمیدا ئامار و ئەنجامە سەرەتاییەکانی 24 کاتژمێری یەکەمی ئۆپەراسیۆنی ناسراو بە "Epic Fury" (تووڕەیی داستانئاسا)ی بڵاو کردەوە، تێیدا بە بەکارهێنانی پێشکەوتووترین تەکنۆلۆژیای سەربازی و بە بەشداریی هێزە ئاسمانی و دەریاییەکان، گورزێکی وێرانکەری لە ژێرخانی سەربازیی کۆماری ئیسلامی ئێران وەشاندووە و زیاتر لە 1000 ئامانجی لەناو خاکی ئەو وڵاتەدا پێکاوە. بەگوێرەی راگەیەندراوی سێنتکۆم ، ئەم ئۆپەراسیۆنە بە فەرمانی راستەوخۆی دۆناڵد ترەمپ، سەرۆکی ویلایەتە یەکگرتووەکانی ئەمریکا لە کاتژمێر 9:15ی بەیانی 28ی شوباتی 2026 دەستیپێکردووە و مەودای ئۆپەراسیۆنەکە تەواوی ناوچەکانی ژێر بەرپرسیارێتی سێنتکۆمی گرتووەتەوە. لە راگەیەندراوەکەدا هاتووە، هێزەکانی ئەمریکا لەم هێرشەدا ستراتیژییەکی چڕیان گرتووەتەبەر بۆ لەکارخستنی دەزگا ئەمنییەکان و هەڵوەشاندنەوەی توانای بەرگریی تاران، بەتایبەتی ئەو شوێنانەی کە بە سەرچاوەی هەڕەشەی خێرا دادەنرێن بۆ سەر بەرژەوەندییەکانی ئەمریکا و هاوپەیمانەکانی. لە راپۆرتەکەی سێنتکۆمدا هاتووە کە هێرشەکان بە وردی ژێرخانی هەستیاری ئێرانیان کردووەتە ئامانج، کە خۆی لە ناوەندەکانی فەرماندەیی و کۆنترۆڵ، بارەگا سەرەکییەکانی سوپای پاسداران و هێزە ئاسمانییەکانیان دەبینێتەوە. هاوکات لە رێگەی بۆردوومانە چڕەکانەوە سیستەمە یەکگرتووەکانی بەرگری ئاسمانی، سەکۆی مووشەکە بالیستییەکان و وێستگەکانی دژە کەشتی، لەگەڵ بەشێکی زۆر لە کەشتی و ژێردەریاییەکانی هێزی دەریایی ئێران و تۆڕە پەیوەندییە سەربازییەکانی ئەو وڵاتە تێکشکێنراون. بۆ ئەنجامدانی ئەم ئۆپەراسیۆنە بەرفراوانە، سوپای ئەمریکا تەواوی سەنگ و هێزی خۆی خستووەتە گەڕ، بە جۆرێک کە فڕۆکە بۆم بهاوێژە ستراتیژییەکانی جۆری B-2 و فڕۆکە جەنگییە پێشکەوتووەکانی وەک F-35، F-22، F-18 و F-16 بەشدارییان تێدا کردووە، ئەمە جگە لە بەکارهێنانی فڕۆکەی جەنگی ئەلیکترۆنی و فڕۆکە بێفڕۆکەوانەکانی جۆری ریپەر و سیستەمی مووشەکی هیمارس. هەروەها لە دەریاشەوە کەشتییە فڕۆکەهەڵگرە ئەتۆمییەکان و کەشتییە وێرانکەرەکان بە مووشەکی دوورمەودا بەشدارییان لە وێرانکردنی ئامانجەکاندا کردووە. لە ڕاگەیەندراوەکەدا ئاماژە بە بەکارهێنانی "توانای تایبەت" کە سوپای ئەمریکا رایگەیاندووە لەبەر هۆکاری ئەمنی و هەستیاریی دۆخەکە ناتوانن لەم لیستەدا ئاشکرای بکەن، ئەمەش ئاماژەیە بۆ بەکارهێنانی تەکنۆلۆژیایەکی نوێی جەنگی لەم رووبەڕووبوونەوەیەدا کە پێشتر رانەگەیەندراوە.

سەرۆک بارزانی و سەرۆککۆماری سووریا بە تەلەفۆن قسەیان کرد و ڕایانگەیاند، بۆ چارەسەری کێشە هەرێمییەکان پێویستە پەنا بۆ ڕێگەی ئاشتی و گفتوگۆ ببرێت. ڕاگەیێنراوی فەرمی: سەرۆکایەتی کۆماری سووریا بڵاویکردەوە، ئەحمەد شەرع سەرۆککۆماری سووریا لەڕێگەی پەیوەندییەکی تەلەفۆنی لەگەڵ سەرۆک بارزانی قسەیان کردووە، تێیدا باسیان لە پێشهاتەکانی ناوچەکە و کاریگەرییەکانی لەسەر ئاسایش و ئارامی هەرێمی کرد. ٠ لە پەیوەندییە تەلەفۆنییەکەدا، ئەحمەد شەرع بە سەرۆک بارزانی وتووە، گرنگە هەماهەنگی و پێکەوەکارکردن هەبێت بەجۆرێک ببێتەهۆی ئاسانکاری بۆ چارەسەری کێشە هەرێمییەکان لەڕێگەی ئاشتییانە و گفتوگۆوە. ٠ سەرۆک بارزانی و ئەحمەد شەرع هۆشدارییاندا لە مەترسییەکانی بەردەوامی گرژییە بێ پاساوەکان و بە ئامانج گرتنی وڵاتانی عەرەبی.  

وەزارەتی پێشمەرگەی حکوومەتی هەرێمی کوردستان راگەیەندراوێکی بڵاو کردەوە تێیدا هاتووە: کەناڵی (یەکى عێراقی - قناة الأولى العراقية) هەواڵێکی بڵاوکردووەتەوە، تێیدا ئاماژە بەوە دەدات کە گوایە هێزەکانی پێشمەرگە بارەگای لیوای (50)ی حەشدی شەعبییان لە پارێزگای نەینەوا بۆردومان کردووە. ​ئێمە لە وەزارەتی پێشمەرگە، وێڕای ڕەتکردنەوەی تەواوی ئەم هەواڵە، ڕایدەگەیەنین کە سەرلەبەری هەواڵەکە دوورە لە ڕاستییەوە. هێزەکانی پێشمەرگە لەم بارودۆخەدا هاوشان لەگەڵ هێزە ئەمنییەکانی تری عێراق، ئەرکی پاراستنی ئاسایشی عێراق و هەرێمی کوردستان جێبەجێ دەکەن و بە هیچ شێوەیەک بەشداریی هیچ ئۆپەراسیۆنێکی لەو جۆرەیان نەکردووە. ​وەزارەتی پێشمەرگە بە مافی یاسایی خۆی دەزانێت سکاڵا لەسەر کەناڵی (یەکى عێراقی) تۆمار بکات، لەسەر بڵاوکردنەوەی ئەم هەواڵە، کە هەوڵی نانەوەی فیتنە و تێکدانی ئاشتیی کۆمەڵایەتی و سیاسی دەدات لە نێوان پێکهاتەکانی عێراقدا.

ن: ئیسراء جەمال و: ئاراس سعید عەلی خامنەیی.. پیاوی یەکەمی ئێران، سەری ڕژێم و «ڕێبەری باڵای شۆڕشی ئیسلامی». ناوی تەواوی: عەلی جەواد حوسەینی خامنەیی--یه‌. * لە شاری مەشهەد لە پارێزگای خۆراسان لە ٨ی ئەیلوولی 1939 لەدایکبووه‌ * باوکی تورکێکی ئازەری بوو کە لە تەبریزەوە کۆچی کردبوو بۆ مەشهەد، هەر بۆیە ڕێبەر زۆر بە باشی زمانی تورکی دەزانی و باپیرەشی یەکێک بوو لە زانایانی شیعەی ئازەری لە نەجەف. * منداڵییەکی سەختی بەڕێکردووه‌؛ ئاماژەی بە شەوانێک دەکرد کە هیچیان نەبووە بیخۆن. دەیگوت دایکی لە جلە کۆنەکانی باوکی، جلی بۆ ئەو و براکانی دەدووری. * لەگەڵ براکانی لە گەڕەکێکی هەژاری مەشهەد لە ماڵێکدا گەورەبوو کە رووبەرەکەی تەنیا 70 مەتری چوارگۆشە بووه. * لە ساڵی 1964 هاوسەرگیری کرد كردووه‌ و به‌رهه‌مه‌كه‌ى شه‌ش منداڵه‌ بەناوەکانی (مستەفا، موجتەبا، مەسعوود، مەیسەم، بوشرا و هودا). *  لە تەمەنی چوار ساڵییەوە دەستی بە خوێندن و، و دواتریش دەستی بە لەبەرکردنی قورئان كردووه‌. *  دایکی (خەدیجە میردامادی) کە خۆی حافزی قورئان بوو، لە منداڵییەوە شیعر و ئەدەبی فارسی و هونەری ئیسلامی ئێرانی فێر کردووه‌. * لە ساڵی 1958 لەگەڵ باوکی چووه‌ته‌ نەجەف و ساڵی 1959 چووه‌ته‌ قوم، لەوێ بووه‌ته‌ قوتابیی چەندین شێخ کە دیارترینیان «خومەینی» بوو. * لە سەرەتای شەستەکاندا دەستی كردووه‌ بە بڵاوکردنەوەی بیری رووخاندنی ڕژێمی شا لە نێو قوتابییەکانیدا. *  یەکەم جار لە ساڵی 19657 خومەینی بینیووه‌ و کاریگەر بووه‌ بە بیرۆکەکانی و، ببووە یەکێک لە رەمزەکانی ئەو فەقیهە شیعانەی بەرگرییان لە «ویلایەتی فەقیهـ» دەکرد. * شەش جار دەستگیر کراووه‌، یەکەم جاریان لە ساڵی 1962 بوو بەهۆی بەشداریکردنی لە کۆبوونەوەیەکی ناڕەزایی بۆ پشتگیریکردنی دۆزی فەلەستین. *  دەزگای هەواڵگریی شا (ساڤاک) لە ساڵی 1965ەوە بۆ ماوەی 10 ساڵ  گەشتی دەرەوەی وڵاتی لێ قەدەغە کرد. * لە ساڵی 1978 گه‌ڕایه‌وه‌ مەشهەد بۆ رێبەرایەتیکردنی جووڵانەوەی شۆڕشگێڕی لەو پارێزگایە. * یەکێک بوو لە سەرکردەکانی شۆڕشی 1979 و دانوستانکارێکی سەرەکی بوو لە قەیرانی بارمتەکانی باڵیۆزخانەی ئەمریکا لە تاران. *  خومەینی ئەوی لە لیژنەی شۆڕشدا دانابوو. یەکێک لە بڕیارە گرنگەکانی دروستکردنی «سوپای پاسداران» بوو، کە خامنەیی سەرپەرشتی دەکرد. * لە کاتی شەڕی ئێران-عێراقدا ساڵانى (1980-1981)، بە شێوەی خۆبەخش لەبەرەی جەنگ لە ناوچەی «ئەهواز» بووه. *  لە 26ی حوزەیرانی 1981دا رووبەڕووی هەوڵێکی تیرۆرکردن بووەوە. بۆمبێکیان لەناو ئامێری تۆمارکردنی دەنگدا بۆ چاند، به‌ڵام رزگاری بوو، بەڵام بەهۆی ئەو رووداوەوە دەمارەکانی دەستی راستی پچڕان و ئیفلیج بوو. *یەکەم سەرۆکی سوپای پاسداران، ئیمامی جومعەی تاران و سێیەم سەرۆک کۆماری ئێران بوو بۆ ماوەی 8 ساڵ. * لە 3ی حوزەیرانی 1989، دوای کۆچی دوایی خومەینی، وەک رێبەری باڵای کۆمار هەڵبژێردرا. * چەندین کتێبی نووسیووه‌، هەروەها چەند کتێبێکی وەرگێڕاوه‌ لەوانە وەرگێڕانی کتێبەکانی (سەید قوتب) بۆ سەر زمانی فارسی. * جگە لە فارسی، عەرەبیی بە باشی دەزانی. دەگوترا زیندانییەکی ئەرمەنی زمانی ئینگلیزی فێرکردووە. * زۆر حەزی لە خوێندنەوەی رۆمان و چیرۆکی جیهانی دەکرد. پەیوەندیی لەگەڵ زۆرێک لە شاعیران هەبوو، لەوانە محەممەد مەهدی جەواهیری. *  ئالێکس فاتانکا دەڵێت: «ئەو زۆر کەللەڕەق بوو، بەڵام زۆر وریایش بوو، هەر بۆیەش هێندە لە دەسەڵاتدا مایه‌وه‌». * «موجتەبا»ى كوڕى وەک جێگرەوەی باوکی دەبینرا و پەیوەندییەکی توندی لەگەڵ سوپای پاسداران هەبوو. * لە گەنجیدا پێش شۆڕش جگەرەی کێشاوه‌، دوای 1979 رووی لە کێشانی "پایپ" کردووه‌، بەڵام لە ساڵی 1981 بە وەسیەتی خومەینی وازی لێهێناوه‌. * رۆژى شه‌ممه‌ 28ى شوباتى 2026 له‌ بۆردومانێكى هاوبه‌شى ئه‌مریكا و ئیسرائیلدا له‌ تاران كوژرا و به‌مجۆره‌،  فایلی ژیانی سیاسی و تایبه‌تى پیاوێک کە نیو سەدە بڕیاردەری یەکەمی تاران بوو، بۆ هەمیشە داخرا و ئێران دەچێتە ناو قۆناغێکی نوێ و نادیارەوە.

فەرماندەى ناوەندى ئەمریکا سێنتکۆم رایگەیاند، کە بەهۆى گرژییەکانى ناوچەکە، سێ سەربازیان کوژراوە و ژمارەیەکى دیکەش بریندارن، کە برینى پێنجیان سەختە. سێنتکۆم لە تۆڕى ئێکس بڵاوى کردۆتەوە کە لە کاتژمێر 09:30 بەکاتى بەیانى رۆژهەڵاتى ئەمریکا، لە رۆژى 1ى ئایار، سێ سەربازیان لە کاتى ئەرکدا کوژراون و پێنجى دیکەش بەسەختى بریندارن، کە وەک بەشێک لە ئۆپراسیۆنى ئەپیک فیورى بەشداربوونە. لە راگەیەندراوەکەى سێنتکۆمدا هاتووە کە چەند سەربازێکى دیکەیان بە سوکى برینداربوونە بەهۆى پارچەى تەقەمەنى و لەرزەى مێشک، کە بەهۆى دەنگى بەرزەوە برینداربوونە. سێنتۆم دەڵێت، ئێستا ئەوان لە پڕۆسەى چارەسەرکردنى بریندارەکاندان و وەڵامیشیان بۆ هێرشەکە دەبێت. هەروەها لەراگەیەندراوەکەدا هاتووە کە بۆ رێزگرتن لە خێزانى کوژراوەکان زانیارى زیاتر بڵاوناکەنەوە و لە 24 کاتژمێرى داهاتوو ناسنامەى کوژراوەکان ئاشکرا دەکرێن، پاش ئەوەى خێزانەکانیان ئاگادار دەکرێنەوە.

هێرشە هاوبەشەکانی ئەمریکا و ئیسرائیل بۆ سەر ئێران و وەڵامدانەوەکانی تاران، مەترسیی گەورەی لەسەر بازاڕی وزە دروستکردووە و رەنگە ببێتە هۆی بەرزبوونەوەی نرخی نەوت بۆ ئاستێک کە ساڵانێکە نەبیندراوە، بەتایبەت دواى ئەوەى ئەمرۆ ئێران کەشتییەکى نەوت هەڵگرى لە گەرووى هورمز کردە ئامانج. بەپێی رێکخراوی ڤۆرتێکسا کە تایبەتە بە چاودێریی جموجۆڵی وزەی جیهان، گەرووی هورمز رۆژانە نزیکەی 20 ملیۆن بەرمیلی پێیدا تێپەر دەبێت، کە دەکاتە نزیکەی پێنجیەکی نەوتی هەناردەکراوی جیهان و بەوەش گەروی هورمز بە شادەماری هەناردەی نەوت ناسراوە. میدیای فەرمیی ئێران، رۆژی 28-02-2026 بڵاویکردەوە، جموجووڵی کەشتییە نەوت هەڵگرەکان لە گەرووی هورمز راگیراوە و ئەروپییەکان داوایان لە کەشتییە نەوت هەڵگرەکانیان کردووە بە گەرووی هورمزدا هاتووچۆ نەکەن. ئاژانسی رۆیتەرز بڵاویکردەوە، ژمارەیەک لە گەورە کۆمپانیاکانی نەوت و بازرگانی، گواستنەوەی نەوت و سووتەمەنییان لە گەرووی هورمزەوە راگرتووە، ئەوەش بەهۆی هێرشەکانی ئەمریکا و ئیسرائیل بۆ سەر ئێران و وەڵامدانەوەی تاران. ئەمرۆ یەکشەممە 1ى ئادارى 2026، تەلە فزیۆنى فەرمى ئێران بڵاویکردەوە، کەشتییەکى نەوت هەڵگریان لە گەرووى هورمز کردوەتە ئامانج و ژێر ئاو کەوتووە، بەهۆى ئەوەى گوێى بە هۆشدارییەکانى سوپاى ئێران نەداوە. ئەندامێکى دیارى رێکخراوى ئۆپیک دەڵێت، مەترسییەکان زۆر جدین، گرفتى گەورە بۆ گواستنەوەى نەوت بۆ رۆژهەڵاتى ناوەڕاست دروست دەکات ، ئەگەر دۆخەکەش بەردەوام بێت، ئابوورى جیهان دووچارى داکشانەوە دەبێت. بۆپ ماکنالی، راوێژکارى کۆشکى پێشووى کۆشکى سپى بۆ کاروبارى وزە رایگەیاندووە، ئەگەرى هەیە بە هۆى داخستنى گەرووى هورمزەوە نرخى بەرمیلێک نەوت بۆ زیاتر لە 100 دۆلار بەرز بێتەوە. ئاماژەى بەوەشدا، ئێران خاوەنى ژمارەیەکى زۆر لە مین و مووشەکى کوورت مەودایە، بەوەش دەتوانێت رێگرى لە هاتوچۆکردنى کەشتیی نەوتى و جوڵەى کەشتیەوانى لە گەرووى هورمز بگرێت. بە گویرەى داتاکان، لە سالى 2025دا  رۆژانە 14 ملیۆن بەرمیل نەوت لە گەرووى هورمزەوە گوازراوەتەوە، ئەوەش یەک لەسەر سێى نەوتى جیهانە کە بە رێگەى دەریا دەگوازرێتەوە، لەو بڕەش 75%ى بۆ وڵاتانى ئاسیا رۆشتووە، بەتایبەتى چین، هندستان، ژاپۆن، و کۆریاى باشوور. لەلایەکى ترەوە، فوئاد حوسێن، وەزیری دەرەوەی عێراق، لە پەیوەندییەکی تەلەفۆنیدا لەگەڵ فەیسەڵ بن فەرحان، وەزیری دەرەوەی سعودیە، ئاماژەیان بە پێویستیی کارکردنی بەپەلە بۆ کۆنترۆڵکردنی قەیرانەکە و رێگریکردن لە فراوانبوونی کردە سەربازییەکان کردووە؛ هەروەها "جەختیان لە گرنگیی پاراستنی رێڕۆ ئاوییە گرنگەکان، بەتایبەتی گەرووی هورمز کردەوە، بەهۆی ئەو بایەخە ستراتیژییەی بۆ ئابووریی جیهان و ئاسایشی وزە هەیەتی."  فوئاد حوسێن ئاماژەی بەوە کرد، بەردەوامیی شەڕ دەبێتەهۆی تێکچوونی بازاڕی وزە و کاریگەریی نەرێنی لەسەر سەقامگیریی بازاڕی جیهانی دەبێت.

وەزیری بەرگری بەریتانیا دەڵێت، بنکە سەربازییەکانمان لە قوبرس لەلایەن دوو مووشەکی ئێرانییەوە کراوەنەتە ئامانج. جۆن هێلی، وەزیری بەرگری بەریتانیا رایگەیاند، دوو مووشەکی ئێران روەو قوبرس ئاڕاست کراون، هەزاران سەربازی بەریتانی لەو بنکەیە جێگیر کراون. وەزیری بەرگری بەریتانیا ئاماژەی بەوەشدا، وڵاتەکەی هەموو ئامادەکارییەکی سەربازی کردووە، سیستمی بەرگریان لە ناوچەکە بەهێز کردووە، داواش لە تاران دەکات بگەڕێتەوە بۆ دانوستان. ئەم هێرشەی ئێران لە کاتێکدایە، رۆژی شەممە 28ی شوباتی 2026، کیەر ستامەر، سەرۆک وەزیرانی بەریتانیا رایگەیاند، فڕۆکە جەنگییەکانی وڵاتەکەی " لە ئاسمان بوون وەک بەشێک لە ئۆپەراسیۆنی بەرگریی هاوبەش لە ناوچەکە" لە دژی هێرشە مووشەکییەکانی ئێران ئۆپەراسیۆنیان کردووە.  سەرۆکوەزیرانی بەریتانیا راشیگەیاندووە، ئەوە "بۆ پاراستنی گەلەکەمان، بەرژەوەندییەکانمان و هاوپەیمانەکانمان"ـە.