لیژنەی خەڵاتی نۆبڵی ئاشتی لەسەر بانگەشەکانى ترەمپ هاتە دەنگ

هاوڵاتی نرخی کارەباى مۆلیدەی پرۆژەکانی نیشتەجێبوون بۆ مانگی حوزەیران دیاریکرا، بریتییە لە 254 دینار بۆ هەر کیلۆواتێک کە بەراورد بە مانگی رابردوو زیادی کردووە. ئەمڕۆ پێنجشەممە، 27ی حوزەیرانی 2024، بەڕێوەبەرایەتیی گشتی کارەبای سلێمانی رایگەیاند، لیژنەی باڵای دیاریکردنی نرخی کارەباى کۆمەڵگەکانی نیشتەجێبوون (ستییەکان) کۆبوونەوەیەکی سازکرد و تیایدا نرخی کیلۆواتی کارەبای موەلیدەی بۆ مانگی حوزەیران دیاریکرد، کە بریتییە لە 254 دینار بۆ هەر کیلۆواتێک. دەشڵێت، بەگوێرەی نرخی گازوایل لە بازاڕ و ئەو توێژینەوەیەی بۆ خەرجی مۆلیدەی ستییەکان ئامادەکراوە، نرخی یەک کیلۆوات بۆ کاتژمێرێک کارەباى موەلیدەى پرۆژەکانی نیشتەجێبوون بۆ مانگی حوزەیران بریتییە لە 254 دینار. ئاماژەی بەوەشکرد، مانگى ئایار نرخى کیلۆواتێک کارەباى مۆلیدەی پرۆژەکانی نیشتەجێبوون 250 دینار بووە. جەختی لەوەشکردەوە، پێویستە سەرجەم پرۆژەکانی نیشتەجێبوونی سنووری پارێزگای سلێمانی پابەندبن بە نرخەکەوە، بە پێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە.  

مەهران رەمەزان هاوڵاتی، سلێمانی پاش سێ ساڵ و چەندین دانیشتنی دادگە، دواجار دادوەر سزای زیندانی تاهەتایی بەسەر کەسێک بەناوی ڤیکتۆر میرسکۆی سەپاند، کە سێ ئەندامی خێزانێکی کوردی لە گوندی ڤەڵچانسکۆی پارێزگای ڤارۆنیژی رووسیا کوشت. بەگوێرەی پەڕاوی لێکۆڵینەوە و دانپێدانانەکانی ڤیکتەر میرسکۆی بکوژی سێ هاوڵاتییە کوردەکە، کێشەکە لەسەر مانگایەک بووە، کە بکوژ ویستویەتی مانگاکە لەو خێزانە کوردە بکڕێت، بەڵام ئەوان پێیان نەفرۆشتووە و مانگاکەیان سەربڕیوە، بۆیە میرسکۆی لە بنکەی پۆلیسی ناوچەکە سکاڵا لە دژی یەکێک لە ئەندامانی خێزانە کوردەکە بەناوی گولیستان تۆمارکردووە، بەڵام پۆلیس لایەنی خێزانە کوردەکەی گرتووە. ڤیکتۆر میرسکۆی دوای کوشتنی سێ هاووڵاتییە کوردەکە، هێرش دەکاتە سەر بنکەی پۆلیسی ناوچەکە و کارمەندێکی پۆلیس بریندار دەکات. لە کاتی گەڕانی هێزە ئەمنییەکانی رووسیا بەدوای تۆمەتباردا، رووبەڕووی هێزە ئەمنییەکان دەبێتەوە، دواتر بەبرینداری دەستگیری دەکەن. هەروەها تاوانبار لە بەردەم دادوەر دانی بە تاوانەکەیدا ناوە و پەشیمان نەبووەتەوە لە کوشتنیان، تەنیا گوتوویەتی، کوشتنی منداڵە تەمەن پێنج ساڵەکە بەڕێکەوت بووە. جێگای ئاماژەیە، شەوی 16 لەسەر 17ی ئەیلوولی 2021 لە گوندی ڤەڵچانسکۆی پارێزگای ڤارۆنیژی رووسیا، سێ ئەندامی خێزانێکی کوردی نیشتەجێی گوندی ڤەڵچانسکۆی پارێزگای ڤارۆنیژی رووسیا بەناوەکانی گولیستان ئیبراهیمۆڤای تەمەن 59 ساڵ، نادیر تەمەن 19 ساڵ و عەزیزی 5 ساڵان، کە سەرقاڵی بەخێوکردنی ئاژەڵبوون، لە لایەن کەسێکی بەڕەچەڵەک رووس، بەناوی ڤیکتەر میرسکۆی کوژران.  

هاوڵاتی له‌ وه‌زاره‌تی دارایی و ئابووری هه‌رێم لیستی مووچه‌ی مانگی شه‌شی فه‌رمانبه‌ران و مووچه‌خۆران ئاماده‌كراو ئه‌مڕۆ ره‌وانه‌ی به‌غدا ده‌كرێت. ئەمڕۆ پێنجشەممە، 27ی حوزەیرانی 2024، سەرچاوەیەک لە وەزارەتی دارایی و ئابووری هه‌رێم رایگەیاند، لیستی مووچەی مانگی شەشی  فەرمانبەران و مووچه‌خۆرانی هەرێم ئامادەکراوە و هەر ئەمڕۆ رەوانەی بەغدا دەکرێت. دەشڵێت، لیسته‌كه‌ به‌ هه‌ردوو شێوازی كاغه‌زی و سیدی ئاماده‌كراوه‌ و واژووی له‌سه‌ر كراوه‌ بۆ ئه‌وه‌ی ره‌وانه‌ی به‌غدا بكرێت.

هاوڵاتی تەڤگەری ئازادی، پەیامێک ئاراستەی لایەنە سیاسیەکان دەکات و کۆمەڵگە لە زەنگێکی مەترسیدار ئاگادار دەکاتەوە و دەڵێت، پێویستە کوردستانییان و گەلانی عێراق، لەبەرامبەر ئەو داگیرکارییەی سوپای تورکیا بۆ سەر خاکی باشوری کوردستان، بێدەنگ نەبن. ئاماژەی بەوەشکردووە، "ھاتنەناوەوەی سەدان تانک و زرێپۆش و ھەزاران سەربازی سوپای تورکیا، بەبیانوی ھەبوونی گەریلاکانی پارتی کرێکارانی کوردستان، لە رۆژانی 22 و 23 حوزەیران بۆ ناو خاکی ھەرێمی کورستان و عێراق، لە سنوری پارێزگای دھۆک، پێشھاتێکی مەترسییدارە و لە ناوەڕۆکدا پیلانێکە بۆ داگیرکاریی و دەستبەسەرداگرتنی خاکی باشوری کوردستان بەشێوەیەکی ھەمیشەیی". دەقی پەیامەکەی تەڤگەری ئازادی: تەڤگەری ئازادیی لایەنە سیاسییەكان و كۆمەڵگە لە زەنگێكی مەترسییدار ئاگادار دەكاتەوە پەرلەمانتاران، سەۆکی کۆمار و سەرۆکی ئەنجومەنی وەزیرانی عێراقی فیدراڵ، لەبەردەم تاقی کردنەوەیەکی گەورەدان، چۆن وەڵامی ئەو داگیرکاریی و دەست درێژەیەی سوپای تورکیا ئەدەنەوە؟ پێویستە کوردستانییان و گەلانی عێراق، لەبەرامبەر ئەو داگیرکارییەی سوپای تورکیا بۆ سەر خاکی باشوری کوردستان، بێدەنگ نەبن و خاوەن ھەڵوێستی نیشتمانیی و ئەخلاقیی بن. لەمێژووی گەلانی عێراقدا، نەبووە داگیرکاریی قبوڵ بکرێت، ھاتنەناوەوەی سەدان تانک و زرێپۆش و ھەزاران سەربازی سوپای تورکیا، بەبیانوی ھەبوونی گەریلاکانی پارتی کرێکارانی کوردستان، لە رۆژانی 22 و 23 حوزەیران بۆ ناو خاکی ھەرێمی کورستان و عێراق، لە سنوری پارێزگای دھۆک، پێشھاتێکی مەترسییدارە و لە ناوەڕۆکدا پیلانێکە بۆ داگیرکاریی و دەستبەسەرداگرتنی خاکی باشوری کوردستان بەشێوەیەکی ھەمیشەیی. ھێزە سیاسییە نیشتمانییەکان و گەلانی عێراق، دەبێت ئەو بێ ھەڵوێستییەی حکومەتی فیدراڵ و ھاوکارییەکانی «پارتی-بنەماڵەی بارزانیی» بۆ سوپای داگیرکەر رەتبکەنەوە و شەرمەزاری بکەن. ئەوەی رووئەدات، پێشێلکارییەکی تەواوی یاسا نێودەوڵەتییەکان و پێشێلکردنی سەروەریی خاکی عێراقە و ژیان و ئاسایشی ھاووڵاتییانی بەتەواوی خستووەتە ژێر ھەڕەشەو مەترسییەوە، پەرلەمانتارانی عێراق دەبێت خاوەنداریی لەو سوێند خواردن و بەڵێنە بکەن کە خوێندویانە داویانە بەگەلی عراق، چۆن و بەچ شێوەیەک بەرگریی لەخاک و سەروەریی وڵاتەکەیان و ھاووڵاتییانیان دەکەن؟ سەرۆکایەتیی کۆمار و سەرۆک وەزیرانی عێراق و بەرپرسانی دیکەی حکومەتی عێراق، لەبەردەم تاقیکردنەوەیەکی گەورەدان، چۆن وەڵامی ئەو دەستدرێژییە ئاشکرایەی دەوڵەتی تورکیا ئەدەنەوە، ئەو داگیرکارییەی سوپای تورک ھیچ پاساوێک ھەڵناگرێت. ئەوەی بەرەوروی ئەو داگیرکارییە وەستاوەتەوە و بەرگریی دەکات، ھێزی پاراستنی گەلانە، ھەر ئەو گەریلایانە بوون فریای شەنگال و ئێزدییەکان کەوتن و لە کۆمەڵکوژیی و لەناوبردنی یەکجاریی رزگاریانکردن. نابێت حکومەت و گەلانی عێراق، ئەو رۆژانەیان لە بیر بچێتەوە، کە حکومەتەکەی ئەردۆغان و تیرۆریستەکان و ھێزە وابەستەکانی بۆ پارچەکردنی خاک و گەلانی عێراق، ھاوکار و پشتیوانیی داعشیان دەکرد، بەسەدان ھەزار ھاووڵاتیی لەھەموو نەتەوە و پێکھاتەکانی گەلانی عێراقی کردنە قوربانیی؛ موسڵ و ئەنبارو نیوەی شار و شارۆچکەو خاکی عێراقیان پێ خاپورکرد. لە جیاتی ئەوەی حکومەتی فیدراڵ لە رێگەی رێوشوێنە یاساییە نێودەوڵەتییەکان، داوای یاسایی لەسەر دەوڵەتی تورکیا و ھاوکارەکانی و داعش تۆمار بکات، کە بەسەدان بەڵگە سەلمێنراوە، بە پێچەوانەوە بەو بێدەنگیی و بێ ھەڵوێستییەی دەبێتە بەشێک لەو وێرانیی و داگیرکارییە لەسەر خاکی خۆی! ئێمە وەک تەڤگەری ئازادیی کۆمەڵگەی کوردستان، وەک ئەرکێکی نیشتمانیی و ئەخلاقیی، وێڕای شەرمەزارکردنی بێ ھەڵوێستیی حکومەتی عێراق و ھاوکارییەکانی پارتی بۆ سوپای تورکیا، بە ئەرکی ئەخلاقیی و مێژوویی خۆمانی دەزانیین، لە ھەموو ئاستێکدا کار بۆ بەرەنگاربونەوەی ئەو داگیرکارییە بکەین. لەسەر ئەو بنەمایە، بانگەواز لە تەواوی ئەو لایەنانەدەکەین کە ناخوازن لەژێر سێبەر و رەحمەتی سوپای داگیرکەراندا بژین، دەبێت خاوەنداریی لە سەروەریی و شکۆی گەل بکەین و بەیەک ریز لەگەڵ گەلەکەمان بوەستین و داگیرکاریی و خیانەت تێک بشکێنیین. گەلی ئێمە بە کورد و عەرەب و تەواوی پێکھاتەکانیەوە، لەبەرامبەر داگیرکاریی و پێشێلکردنی سەروەرییە نیشتمانییەکانیی، ھەرگیز لایەن و ھێز و حکومەتێک پەسند ناکات کە بێھەڵوێست بێت. تەڤگەری ئازادیی کۆمەڵگەی کوردستان 27/6/2024

هاوڵاتی ئەلینا رومانسكی دەڵێت، هەڵبژاردن بۆ چەندین جار دواخرا لەپێناو هەرێمی كوردستان و عێراقێكی دیموكراتی هیوادارین هیچ دواخستنێكی تر روونەدات. ئەمڕۆ پێنجشەممە، 27ی حوزەیرانی 2024، ئەلینا رومانسكی باڵیۆزی ئەمریكا لە عێراق، لە تۆڕی كۆمەلایەتی ئێكس نوسیوویەتی، پێشوازی لە راگەیاندنی ئەنجامدانی هەڵبژاردنی پەرلەمانی كوردستان دەكەین لە 20ی تشرینی یەكەم. ئەوەشی خستۆتەڕوو، داوا لە حكومەتی هەرێمی كوردستان دەكەین زامنی پاك و بێگەردی هەڵبژاردن و رۆشنی بكات. ئەلینا رومانسكی ئاماژەی بەوەشکردووە، "دەستخۆشی لە هەوڵەكانی سەرۆكی هەرێم دەكەم". دەشڵێت، هەڵبژاردن بۆ چەندین جار دواخرا لەپێناو هەرێمی كوردستان و عێراقێكی دیموكراتی هیوادارین هیچ دواخستنێكی تر روونەدات.

هاوڵاتی دوای چەندین جار درێژكردنەوەو دیاریكردنی رۆژی هەڵبژاردن، ئەمرۆ وادەی تۆماركردنی هاوپەیمانی و حزبەكان بۆ هەڵبژاردنی پەرلەمانی كوردستان كۆتایی دێت. ئەمڕۆ پێنجشەممە، 27ی حوزەیرانی 2024، وادەی تۆمارکردنی هاوپەیمانێتی و حزب و کاندیدە سەربەخۆكان بۆ بەشداریی لە هەڵبژاردنی پەرلەمانی کوردستان کۆتایی دێت. کۆتایی هاتنی وادەی پێشکەشکردنی داواکارییەکانی بەشداریی لە هەڵبژاردنی پەرلەمانی کوردستان، دوای رۆژێک دێت لە دیاریکردنی كاتی هەڵبژاردن لەلایەن سەرۆکایەتیی هەرێمی کوردستانەوە, کە رۆژی 20ی تشرینی یەکەمی 2024 بە وادەی بەڕێوەچوونی هەڵبژاردنی خولی شەشەمی پەرلەمانی کوردستانی دیاریكرد. جێگای ئاماژەیە، کۆمیسیۆنی باڵای سەربەخۆی هەڵبژاردنەکانی عێراق, رۆژی 24ی ئەم مانگە بۆ چەند جارێکیتر، سێ رۆژ ماوەی پێشکەشکردنی داواکارییەکانی بەشداریی هەڵبژاردنی پەرلەمانی درێژ کردەوە, بەگوێرەی بڕیارەکە درێژكردنەوەی وادەكە تا كۆتایی دەوامی فەرمی ئەمڕۆ 27 حوزەیران بەردەوام دەبێت.

هاوڵاتی لە ماوەی دوو رۆژی رابردوودا نرخی یەک ئۆنسە زێڕ لە 2340 دۆلارەوە بۆ 2300 دۆلار دابەزیوە. ئەمڕۆ پێنجشەممە، 27ی حوزەیرانی 2024، دوای کردنەوەی بازاڕەکانی ئاسیا، نرخی یەک ئۆنسە زێڕ بە کەمتر لە 2300 دۆلار مامەڵەی پێوەکرا. لە ماوەی دوو رۆژی رابردوودا نرخی یەک ئۆنسە زێڕ لە 2340 دۆلارەوە بۆ 2300 دۆلار دابەزیوە. ئەمڕۆش لە بازەڕەکاندا بە نزیکەی 2298 دۆلار مامەڵەی پێوەدەکرێت کە کەمترین ئاستی دوو هەفتەی رابردووە.

هاوڵاتی ئەمریکا پێشوازی لە دیاریکردنی رۆژی هەڵبژاردنی پەرلەمانی کوردستان دەکات لەلایەن سەرۆکایەتیی هەرێمی کوردستانەوە. ئەمشەو چوارشەممە 27ی حوزەیرانی 2024، ماتیۆ میلەر، وتەبێژی وەزارەتی دەرەوەی ئەمریکا بە تۆڕی میدیایی رووداوی راگەیاندووە، "ئێمە، پێشوازی لە راگەیاندنی 20ـی ئۆکتۆبەر وەک رۆژی هەڵبژاردنی پەرلەمانی کوردستان دەکەین". ئەوەشی وتوە، "هەڵبژاردنی هەرێمی کوردستان ئامرازێکی گرنگی پرۆسەی دیموکراسییە و ئێمە چاوەڕێ ئەوە دەکەین بەرپرسانی هەرێمی کوردستان دڵنیابن لەوەی هەڵبژاردنەکان ئازاد و، شەفافانە دەبن بەبێ هیچ دواخستنێکی دیکە." وتەبێژی وەزارەتی دەرەوەی ئەمریکا ئاماژەی بەوەشداوە، "وەزارەتی دەرەوەی ئەمریکا هەوڵەکانی نێچیرڤان بارزانی بۆ گەیاندنی لایەنە سیاسییەکان بە رێککەوتنێک لەبارەی هەڵبژاردن، بەرز دەنرخێنێت". ئەمڕۆ چوارشەممە 27ی حوزەیرانی 2024 نێچیرڤان بارزانی، سەرۆکی هەرێمی کوردستان رۆژی 20ی تشرینی یەکەمی 2024ی بۆ هەڵبژاردنی پەرلەمانی کوردستان دیاریکرد.

هاوڵاتی بە مەبەستی جێبەجێ کردنی قۆناغی کۆتایی پڕۆژەی یەکتربڕی ئارام لە شاری سلێمانی بۆ ماوەی نزیکەی هەفتەیەک شەقامی مەلیک مەحمود دادەخرێت. ئەمشەو چوارشەممە 26ی حوزەیرانی 2024، سەرۆکایەتیی شارەوانیی سلێمانی لە راگەیەندراوێکدا ئاگاداری شۆفێران و هاوڵاتییانی کردەوە، کە لە سبەینێ پێنجشەممە 27ی حوزەیرانی 2024 لە کاتژمێر 9:00ی بەیانییەوە بۆ ماوەی نزیکەی هەفتەیەک شەقامی مەلیک مەحمود لە ئاستی پڕۆژەی یەکتربڕی ئارام-دا بە هەردوو ئاراستە بەربەست دەکرێت بە مەبەستی جێبەجێکردنی قۆناخی کۆتایی پڕۆژەی یەکتربڕی ئارام. شارەوانیی سلێمانی ئاماژەی بەوەداوە، شۆفێران دەتوانن شەقامەکانی دەوروبەرو بەشێک لە شەقامی خزمەتگوزاری مەلیک مەحمود بەکاربهێنن وەک شەقامی جێگرەوە.

هاوڵاتی/ سازگار ئەحمەد لە ماوەی دوو هەفتەدا لە سنووری پارێزگای سلێمانی نرخی هەرسێ جۆرەکەی بەنزین 50 دینار بەرزبوونەتەوە، شارەزایەکی بواری نەوتیش دەڵێت، "ئەگەری بەرزبوونەوەی زیاتریش هەیە". ئەمڕۆ چوارشەممە 26ی حوزەیرانی 2024، بەهجەت ئەحمەد، شارەزا لە بواری نەوت لەبارەی بەرزبوونەوەی نرخی بەنزین بە هاوڵاتی راگەیاند، "ئەگەر هەیە نرخی بەنزین لە هەفتەی داهاتووەوە زیاتر بەرزبێتەوە، ئەگەر ئیدارەی سلێمانی رێکاری جدی نەگرێتەبەر بۆ رێگریکردن لە بەرزبوونەوەی نرخی بەنزین". ئەو شارەزایە وتی، "دەبێت ئیدارەی سلێمانی کار ئاسانی زیاتر بکات بۆ کۆمپانیاکانی هاوردەکردنی بەنزین لە ناوەڕاست و خوارووی عێراق، هەروەها هاوردەکردنی بەنزین لە دەرەوەی هەرێمی کوردستان". پێشی وایە، دەبێت پاڵاوگەکانی سنووری سلێمانی ئاستی بەرهەمهێنانی بەنزین زیاتر بکەن، بە تایبەتی لە ئێستادا کە نەوتی خاو زۆرە. ئەو شارەزایەی بواری نەوت هۆکاری بەرزبوونەوەی نرخی بەنزینی بۆ کەمبوونی بەنزین لە بازاڕەکانی هەرێمی کوردستان گەڕاندەوە، ئەمەش بەهۆی ئەوەی لە رۆژانی جەژندا گەشتیارێکی زۆر لە ناوەڕاست و باشووری عێراقەوە هاتبوونە هەرێمی کوردستان. وتیشی، "هۆکارێکی دیکە ئەوەیە لە ئێستادا وەرزی گەشت لە عێراق دەستیپێکردووە و جوڵەی هاوڵاتییان زیاتر بووە و خواست لەسەر بەنزین زیادیکردووە، بەڵام لە عێراق بەهۆی نرخی پاڵپشتیکراوەوە نرخی بەنزین بەرزنابێتەوە".

هاوڵاتی پیاوێکی تەمەن 33 ساڵ لە شاری سلێمانی کە پیشەی ئاژەڵدارییە تووشی نەخۆشیی تای خوێنبەربوون بووە. ئەمڕۆ چوارشەممە، 26ی حوزەیرانی 2024، دکتۆر سەرکار سورچی، گوتەبێژی وەزارەتی تەندروستیی هەرێمی کوردستان رایگەیاند، توشبوویەکی دیکەی تای خوێنبەربوون لە سلێمانی تۆمارکراوە و تووشبووەکەش پیاوێکی تەمەن 33 ساڵە کە پیشەی ئاژەڵداری بووە. ئەوەشی خستەڕوو، ئێستا لەژێر چاودێریی پزیشکیدایە و دۆخی تەندروستیی جێگیرە. جێگای ئاماژەیە، ئەمە چوارەم حاڵەتی تووشبوون بە تای خوێنبەربوونە کە لە هەرێمی کوردستان تۆمارکراون و یەکێکیان گیانیلەدەستداوە.

مەهران رەمەزان هاوڵاتی، سلێمانی سەنتەری ستراتیجی بۆ مافەکانی مرۆڤ رایگەیاند، لە ماوەی سێ ساڵی رابردوودا 38 هەزار بازرگان و بەکاربەری ماددەی هۆشبەر لە عێراق دەستگیرکراون؛ زۆرترین بازرگانیکردنیش بە ماددەی هۆشبەری کریستاڵە و دواتر کاپتاگۆن دێت. ئەمڕۆ چوارشەممە 26ی حوزەیرانی 2024، فازڵ غەراوی سەرۆکی سەنتەری ستراتیجی بۆ مافەکانی مرۆڤ لە عێراق رایگەیاند، بەڕێوەبەرایەتی گشتیی کاروباری ماددە هۆشبەرەکانی وەزارەتی ناوخۆی عێراق لە ماوەی سێ ساڵدا 38 هەزار بازرگان و بەکاربەری ماددە هۆشبەرەکانی دەستگیر کردووە. سەبارەت بە ئاماری دەستگیرکراوان و کەرەستە دەستبەسەردا گیراوەکان، جۆرەکەی ئاماژەی بەوەدا، ساڵی 2022، 17 هەزار بازرگان و بەکاربەری ماددەی هۆشبەر دەستگیرکراوە کە 123 کەسییان بیانی بوون، هەروەها بڕی ئەو کەرەستەیەی دەستی بەسەرداگیراوە نیو تۆن لە هەموو جۆرەکانی ماددەی هۆشبەر بووە، لەگەڵ 18 ملیۆن حەب. ئەوەشی خستەڕوو، ساڵی 2023، 7 هەزار بازرگان و بەکاربەری ماددەی هۆشبەر دەستگیرکراون و 12 تۆن ماددەی هۆشبەریش دەستی بەسەردا گیراوە. ئامارەکە بۆ ساڵی 2024 بەم جۆرەیە، 7 هەزار بازرگان و بەکاربەری ماددە هۆشبەرەکان دەستگیرکراون، هەروەها 12 تۆن ماددەی هۆشبەر و مادەی دەروونی دەستی بەسەردا گیراوە. سەرۆکی سەنتەری ستراتیجی بۆ مافەکانی مرۆڤ باسی لەوەکرد، رێژەی مامەڵەکردنی خراپ لە ناوچە هەژار نشینەکاندا گەیشتووەتە 17% و تەمەنی تۆمەتباران لە نێوان 15-30 ساڵی بووە. زۆرترین ماددەی خراپی هۆشبەری بەکارهێنراو لە عێراق بریتی بووە لە کریستاڵ کە 37.3%، بووە، هەروەها کاپتاگۆن 34.35% و جۆرەکانی دیکە 28.35% بووە. ئاماژەی بەوەشکرد، ساڵی 2022دا، 5 هەزار تۆن ماددەی هۆشبەر و ماددە دەروونییەکان و 54 ملیۆن حەبی هۆشبەر و 31 هەزار دەرزی و 9 هەزار بوتڵی ماددەی هۆشبەر لەناوبراون. فازڵ غەراوی جەختی کردەوە، لە ساڵی 2023دا بڕی دوو تۆن و 118 کیلۆگرام و 396 گرام ماددەی هۆشبەر، هەروەها چوار ملیۆن و 934 هەزار و 132 حەبە هۆشبەرەکان لەناوبراون. سەبارەت بە ساڵی 2024، سەرۆکی سەنتەری ستراتیجی بۆ مافەکانی مرۆڤ ئەوەی خستەڕوو، بڕی 42 کیلۆ و 322 گرام و 380 میلیگرام ماددەی هۆشبەر لەناو براون، هەروەها 772 حەبیش لەناوبراوە. لە کۆتایی قسەکانیدا غەراوی داوای لە حکوومەت کرد رۆژی 26ی حوزەیرانی هەموو ساڵێک وەک ڕۆژی نیشتمانی بۆ خۆپاراستن لە مەترسیی ماددە هۆشبەرەکان دیاری بکات. ئەوەشی گوت، هەڵمەتێکی نیشتمانی بۆ رێگریکردن لە مەترسی ماددە هۆشبەرەکان دەست پێبکات، هەروەها بەهێزکردنی هاوکاری نێودەوڵەتی لە بەرەنگاربوونەوەی ماددە هۆشبەرەکان و یاسای ماددە هۆشبەرەکانیش هەموار بکرێتەوە.  

هاوڵاتی دوای زیاتر لە چوار کاتژمێر لە دروستبوونی کێشە بۆ بەرهەمهێنانی کارەبا لە هەرێمی کوردستان، وەزارەتی کارەبا رایگەیاند، هەر ئەمڕۆ دۆخەکە ئاسایی دەبێتەوە.   ئەمڕۆ چوارشەممە 26ی حوزەیرانی 2024، وەزارەتی کارەبای هەرێمی کوردستان رایگەیاند، دوای زیاتر لە چوار کاتژمێر لە دروستبوونی کێشە بۆ بەرهەمهێنانی کارەبا لە هەرێمی کوردستان، هەر ئەمڕۆ دۆخەکە ئاسایی دەبیتەوە. دەشڵێت، بەهۆی پەستانی گازەوە لە کێڵگەی کۆرمۆر ناچار بووین یەکە یەکە، یەکەکانی بەرهەمهێنانی کارەبا بکوژێنینەوە لە ئێستادا دەست بە گواستنەوەی گاز لە کێڵگەی کۆرمۆر بۆ وێستگەکانی کارەبا کراوە و لە ماوەی دوو کاتژمێری داهاتوودا، دۆخی کارەبا ئاسایی دەبێتەوە.   ئاماژەی بەوەشدا، بەهۆی کێشە تەنیکییەکەی کێڵگەی کۆرمۆرەوە، دوو هەزار مێگاوات بەرهەمهێنانی کارەبا لە هەرێمی کوردستان کەمبووەتەوە، ئەگەر کێشەکان لەلایەن تیمی دانەگازەوە زوو چارەسەر نەکرێن 70%ی کارەبای هەرێمی کوردستان دەکوژێتەوە. جێگەی ئاماژەیە، 30ی تشرینی دووەمی 2023، کارەبای نیشتمانیی سەرجەم ناوچەکانی هەرێمی کوردستان کوژایەوە و رۆژی دواتر وەزارەتی کارەبا رایگەیاند، "بەهۆی گرفتێکی تەکنیکییەوە، کوژانەوەی گشتی لە سیستمی کارەبای هەرێمی کوردستان روویدا.

هاوڵاتی وتەبێژی پارتی دیموکراتی کوردستان رایگەیاند، “پارتیمان دەستدەکات بە ئامادەکارییەکان بۆ پرۆسەى هەڵبژاردنى پەرلەمان". دەشڵیت، "هیوادارین هەڵبژاردنێکى دیموکراسیانە و پاک و بێگەرد بەڕێوەبچێت کە ئاکامەکەى لە بەرژەوەندیى خەڵکى کوردستان دابێت". دوای ئەوەی سەرۆکی هەرێمی کوردستان ڕۆژی 20ی تشرینی یەکەمی ئەمساڵی بۆ ئەنجامدانی هەڵبژاردنی پەرلەمانی کوردستان دیاریکرد، مەحمود محەمەد، وتەبێژی فەرمی پارتی دیموکراتی کوردستان ڕایگەیاند، "پارتیمان دەستدەکات بە ئامادەکارییەکان بۆ پرۆسەى هەڵبژاردنى پەرلەمان". پارتی دیموکراتی کوردستان رایدەگەیێنێت، دواى راگەیاندنى وادەى هەڵبژاردنى خولى شەشەمى پەرلەمانى کوردستان لەلایەن سەرۆکى هەرێمى کوردستان، دەستدەکات بە ئامادەکارییەکان بۆ پرۆسەى هەڵبژاردنى پەرلەمان. دەقی راگەیێندراوی پارتی دیموکراتی کوردستان: لە ساڵى 2022 پارتیمان زۆر هەوڵى دا کە پێش تەواوبوونى وادەى یاسایى پەرلەمانى کوردستان ڕێکارەکانى پێویست بۆ هەڵبژاردنى خولى شەشەمى پەرلەمانى کوردستان دەست پێبکرێت، بەڵام بەداخەوە زۆر ئاستەنگ دروستکران، کە ئەو ئاستەنگانە بە زیانى پرۆسەى سیاسى و یاسایى بۆ هەرێمى کوردستان شکانەوە و رەنگدانەوەى خراپیان بەرامبەر دەسەڵات و مافەکانى هەرێمى کوردستان بەدواى خۆدا هێنا. لە دواى ئەوەش هەوڵماندا ئەو پێشنیارانەى هەبوون، بۆ پەرلەمانى هەڵبژێردراو جێبێڵین بۆ چارەسەرکردنیان بە شێوەیەکى یاسایى کە ئەمەش ڕێگرى لێکرا. بۆیە لە 18ی 3ی 2024 پارتیمان هەڵوێستى خۆى بۆ جەماوەرى تێکۆشەرى کوردستان ڕاگەیاند لەگەڵ دیاریکردن و ئاماژەدان بەو کەموکوڕى و نا دادپەروەریانەى کە هەبوون چ لە مافى پێکهاتەکان هەتا کێشەى پەنجەمۆر و هەوڵى بێبەشکردنى سەدان هەزار کەس لە دەنگدان. ئەمانە و چەندین بابەتى دیکەى پەیوەندار بە رێکارەکانى پرۆسەى هەڵبژاردنەوە، کە دواى ئەم هەڵوێستەى پارتیمان بەشێک لەو تێبینى و کەموکوڕیانە چارەسەرکران و بەشێکیشیان لە چارەسەرکردن دان، هەرچەندە هەموو چارەسەریەکان لەسەدا سەد نەبوون بەڵام بەشێک لە مافەکان بۆ پێکهاتەکانى کوردستان گەڕایەوە و، بابەتەکانى دیکەش بەشێکی باشیان چارەسەرکراون، بۆیە دواى ڕاگەیاندنى وادەى هەڵبژاردنى خولى شەشەمى پەرلەمانى کوردستان لەلایەن بەرێز سەرۆکى هەرێمى کوردستان، پارتیمان دەستدەکات بە ئامادەکارییەکان بۆ پرۆسەى هەڵبژاردنى پەرلەمان. هیوادارین هەڵبژاردنێکى دیموکراسیانە و پاک و بێگەرد بەڕێوەبچێت کە ئاکامەکەى لە بەرژەوەندیى خەڵکى کوردستان دابێت. مەحموود محەممەد گوتەبێژى پارتى دیموکراتى کوردستان 26-6-2024

هەوراز حوسێن هاوڵاتی، سلێمانی رۆژی پێنجشەممە 27ی ئەم مانگە، کاتژمێر 4:00ی سەر لەبەیانی بەکاتی هەولێر، یەکەم دیبەیتی هەڵبژاردنی سەرۆکایەتیی ئەمریکا بەڕێوەدەچێت و دۆناڵد ترەمپ، سەرۆکی پێشووی ئەمریکا و جۆ بایدن، سەرۆکی ئەمریکا رووبەڕووی یەک دەبنەوە. دیبەیتەکەیان 90 خولەک دەخایێنێت و بە یەکێک لە گرنگترین و هەستیارترین دیبەیتەکانی هەڵبژاردنی سەرۆکایەتی ئەمریکا دادەنرێت. ترەمپی تەمەن 78 ساڵ و بایدنی تەمەن 81 ساڵ دووان لە پیرترین بەربژێرانی سەرۆکایەتی ئەمریکان و بایدن پیرترینە لە مێژووی ئەو وڵاتەدا. چاوەڕواندەکرێت لە دیبەیتەکەدا رووبەڕووبوونەوەی قورس و قسەی رەق و نافەرمی زۆر بەکاربێت. دۆناڵد ترەمپ لەو چوار ساڵەی کۆشکی سپی جێهێشتووە، زۆرترین هێرشی کردووەتە سەر جۆ بایدن. هەردوو بەربژێر بۆ کاتژمێر و نیوێک دیبەیت لەبارەی ئابووری، جەنگ، کۆچ و داهاتووی دیموکراسیی ئەمریکا دەکەن. ئێستا لە راپرسییەکاندا ترەمپ و بایدن بە نزیکەیی وەک یەک وان، یەک هەڵەی بچووک یان دەربڕینێکی ناجۆر دەکرێت کاریگەریی گەورەی لەسەر تێڕوانینی گەلی ئەمریکا بەرامبەر ئەو دوو بەربژێرە هەبێت. دۆناڵد ترەمپ و لایەنگرانی رەخنەی توند لە تەمەنی جۆ بایدن، سەرۆکی ئەمریکا دەگرن و باس لەوە دەکەن بایدن ناتوانێت جارێکی دیکە ببێتەوە بە سەرۆکی ئەمریکا، بەڵام ئەگەر دۆناڵد ترەمپ هەڵبژێرێتەوە بە سەرۆکی ئەو وڵاتە، ریکۆردەکەی جۆ بایدن وەک پیرترین سەرۆکی ئەمریکا دەشکێنێت. بە گوێرەی راپرسییەکی هاوبەشی نیویۆرک تایمز و سیەنا کۆلێج، 73٪ی دەنگدەرانی ئەمریکا لایان وایە بایدن زۆر پیرە بۆ بوونەوە بە سەرۆکی ئەمریکا جارێکی دیکە. هەرچەندە دۆناڵد ترەمپ تەنیا 3 ساڵ لە بایدن منداڵترە، بەڵام تەنیا 43٪ی دەنگدەران لایان وایە باش نییە ببێتەوە بە سەرۆکی ئەمریکا. مایکرۆفۆنی بەردەم هەریەک لە بەربژێرەکان لە کار دەخرێت ئەگەر نۆرەی خۆیان نەبوو بۆ قسەکردن، هەروەها لە ستۆدیۆکەدا هیچ ئامادەبوویەکی لێ نابێت تاوەکو دەنگە دەنگ و هەرا و هوریا بکەن لە دوای قسەکانی بایدن و ترەمپ. دوایین جار ئەو دوو بەربژێرە لە دیبەیتێکدا رووبەڕووی یەکدی بووبنەوە 29ی ئەیلوولی 2020 بوو لە شاری ناشڤێڵی ویلایەتی تێنیسی.