سەرچاوەیەک: تا ١٢٠ ملیارەکە نەنێردرێت موچە خەرج ناکرێت

  ئەحمەد تورک، ئەندامی شاندی ئیمراڵی، رەخنەی توندی لە هەمواری یاسای سزاکانی حکومەتی تورکیا گرت و رایگەیاند، لە ئاست چاوەڕوانییەکانیاندا نەبوە و بێهیوای کردون. ئەحمەد تورک، سیاسەتمەداری دیاری باکوری کوردستان و ئەندامی شاندی ئیمرالی لەمیانی بەشداریکردنی لە پانێلێکدا لە ماردین وتی: پرۆسەی ئاشتی تاکو ئێستا وەک پێویست بەرەوپێش نەچوە، بەتایبەت هەمواری یاسای سزاکان کە پێشکەشی پەرلەمانی تورکیا کراوە لە ئاست چاوەڕوانییەکانیاندا نەبوە. وتیشی: ئەگەر تورکیا لەپرۆسەی ئاشتیەدا لە ئاستی چاوەروانکراو بەشداری نەکات دۆڕاو دەبێت، چونکە هەموان لەسەر ئاستی نێودەوڵەتی دانیان بەوە ناوە کە ئەو هەنگاوانەی کە کورد گرتویەتیەبەر مێژویی بوە. ئەحمەد تورک لە بارەی چەکدانانی هێزەکانی ڕۆژئاوای کوردستانیش وتی، ئەو هێزە چەکدارەی کە ئەمڕۆ کورد پێکیانهێناوە تەنها ئامانجی بەرگریکردنە لە خۆیان و ئەمڕۆش هەڕەشەی داعش هەر هەیە، وتیشی،  ئەگەر ئەمڕۆ ئەو هێزانە چەکەکانیان، ئەوە بەو مانایە دێت کە دەیان هەزار چەکداری داعش کە لە کەمپێکی وەک هۆڵ دەستبەسەرن دوبارە دەست بە چالاکی دەکەنەوە. 

  کۆمیتەی ناوەندیی پارتی بە سەرپەرشتیی بارزانی کۆ دەبێتەوە و هەڵوێستی خۆی لەبارەی ڕاگرتنی مووچەی فەرمانبەرانی کوردستان ڕادەگەیەنێت.  بــە گوێرەی زانیارییەکان ئەمڕۆ، دووشەممە، 02-06-2025، کۆمیتەی ناوەندیی پارتی دیموکراتی کوردستان بە سەرپەرشتیی مەسعود بارزانی کۆ دەبێتەوە، تەوەری سەرەکیی کۆبوونەوەکەی کۆمیتەی ناوەندیی پارتی، تاوتوێکردنی بڕیاری وەزارەتی دارایی عێراق، بۆ ڕاگرتنی مووچەی فەرمانبەر و مووچەخۆرانی هەرێمی کوردستان، دەبێت.  ئەم کۆبوونەوەیە لە کاتێکدا بەڕێوە دەچێت، ڕۆژی پێنجشەممە، 29ـی ئایاری 2025، مەکتەبی سیاسیی پارتی دیموکراتی کوردستان لـە ڕاگەیەندراوێکدا ئــەوەی خستبووە ڕوو "ڕای گشتی عێراق و هەرێمی کوردستان ئاگادار دەکەینەوە کە حکوومەتی فیدراڵی بەردەوامە لە پێشێلکردنی مافە دەستوورییەکانی هەرێمی کوردستان، دوا پێشلکاریشی نووسراوەکەی دوێنێی وەزارەتی داراییە کە دژی دەستوور و بنەماکانی ڕێککەوتنی پێکهێنانی حکوومەتە و بە سیاسیکردنی قووتی خەڵکە." مەکتەبی سیاسیی پارتی باسی لەوەش کردبوو "ئەم بابەتە لە کۆبوونەوەی داهاتووی کۆمیتەی ناوەندیی پارتیمان لە 2-6-2025، دەخەینە بەرباس و بڕیاروەرگرتن و ئەگەر تا پێش جەژنی پیرۆزی قوربان، ماف و شایستە داراییەکانی خەڵکی هەرێمی کوردستان ڕەوانە نەکرێت هەڵوێستی جددیمان دەبێت و ڕایدەگەیەنین." هەفتەی ڕابردوو، تەیف سامى، وەزارەتى دارایی عێراق، بە نووسراوێکی فەرمی حکوومەتی هەرێمى کوردستانى ئاگادار کردووەتەوە لەوەى چیدیکە ناتوانێت لە ناردنى پارەی مووچە بەردەوام بێت، بە پاساوى ئەوەى بڕى پشکى دیاریکراوى خۆى لە یاسای بودجە تێپەڕاندووە و ئەوەى بەستووەتەوە بە پابەندبوون بە بڕیارى دادگەى فیدراڵی و یاسای بودجەى گشتى و دەڵێت: "19.2 تریلیۆن دینارى داهاتى نەوتى و نانەوتى رادەست نەکراوە."

  شاندی رۆژئاوای کوردستان و دیمەشق لەسەر چوار خاڵی سەرەکی رێککەوتن، پەیوەست بە جێبەجێکردنی رێککەوتنی نێوان مەزڵوم عەبدی و ئەحمەد شەرع، دۆسیەی گەڕانەوەی ئاوارەکان و چارەسەرکردنی کێشە هەڵپەسێردراوەکانی خوێندن لە پێشینەی کارەکانیانن. ئەمڕۆ یەکشەممە شاندێکی ئیدارەی خۆسەری باکور و رۆژهەڵاتی سوریا، لە دیمەشق لەگەڵ شاندێکی حکومەتی کاتی سوریا کۆبونەوە، بۆ هەماهەنگی و جێبەجێکردنی ئەو رێککەوتنانەی کراوە تەوەری سەرەکیی کۆبونەوەکان بوون. دەقی بەیاننامە؛ بەیاننامەی هاوبەشی کۆبونەوەی نێوان شاندی باکور و رۆژهەڵاتی سوریا و حکومەتی دیمەشق: لە کۆبوونەوەکەدا، هەردوولا کۆمەڵێک بابەتی جێی بایەخی  هاوبەشیان تاوتوێ کرد، و لەسەر ئەمانەی خوارەوە رێککەوتن: 1- پێکهێنانی لیژنە لاوەکی تایبەتمەندە، بۆ بەدواداچونی جێبەجێکردنی رێککەوتنی 10ی ئازار، کە لە نێوان مەزڵوم عەبدی، فەرماندەی گشتی هێزەکانی سوریای دیموکرات و ئەحمەد شەرع، سەرۆکی حکومەتی راگوزەر واژۆ کراوە. 2- هەوڵدان بۆ چارەسەرکردنی کێشە هەڵپەسێردراوەکانی پەیوەست بە دۆسیەی تاقیکردنەوە و ناوەندەکانی تاقیکردنەوە، بەجۆرێك مافی قوتابیان و سەلامەتی پرۆسەی خوێندن دەستەبەربكات. 3- گفتوگۆکردن لەبارەی میکانیزمەکانی ئاسانکاری گەڕانەوەی ئاوارەکان بۆ ناوچەکانی خۆیان و، کارکردن بۆ لابردنی ئەو  ئاستەنگانەی دەبنە بەربەست لە بەردەم ئەم گەڕانەوەیە. 4- کاراکردنەوەی دۆسیەی هەردوو گەڕەکی ئەشرەفیە و شێخ مەقسودو، هەوڵدان بۆ چارەسەرکردنیان بە شێوەیەک کە خزمەت بە سەقامگیری و ئاشتی مەدەنی بکات. هەردوولا جەختدەكەن لە پابەندبونیان بە گفتوگۆی بونیادنەر و هاوکاری بەردەوام، بەوشێوەی خزمەت بە یەکڕیزی و سەروەری سوریا دەكات، لەگەڵ بەدیهێنانی خواستەکانی گەلی سوریا بۆ ئاسایش و سەقامگیری. هەروەها رێککەوتن کرا لە ئایندەیەکی نزیکدا، دانیشتنێکی دیکە دیاری بکرێت بۆ تەواوکردنی گفتوگۆکان و بەدواداچوون بۆ جێبەجێکردنی ئەوەی رێککەوتنى لەسەر کراوە.

سەرۆکی حکوومەت باسی لە پرۆژەی هەژماری من دەکات و دەڵێت بۆ نوێکردنەوە و مۆدێرنکردنی سیستمی بانکیمان، دەستپێشخەری (ھەژماری من)مان ڕاگەیاندووە، کە ھاوشێوەی نییە لە ناوچەکەمان.  مەسرور بارزانی، سەرۆکوەزیرانی کوردستان، لە مەراسیمی دەرچووانی زانکۆی ئەمریکی - کوردستان لە دهۆک، وتارێکی پێشکەش کرد لەبەشێکى قسەکانیدا وتى: ئێمە پێداویستیە سەرەکییەکانی ژیانێکی مۆدێرن نەک تەنیا بۆ ئەمڕۆ، بەڵکو بۆ نەوەکانی داھاتووش دەستەبەر دەکەین. وەک بەشێکی سەرەکی ئەم پێشکەوتنە، پابەندین بە دابینکردنی کارەبایەکی بەردەوام لەڕێگەی (پرۆژەی رووناکی)یەوە و یەکێک لە گەورەترین ئاڵنگارییەکانمان دەگۆڕین بۆ گەورەترین دەستکەوت، ئەویش بە ڕووناککردنەوەی ماڵەکان و بەھێزکردنی پیشەسازی و بەجێگەیاندنی بەڵێنی کوردستانێکی گەش و ڕووناکتر.  سەرۆکی حکوومەتی هەرێمی کوردستان، ئاماژەى بۆ ئەوەشکرد بۆ نوێکردنەوە و مۆدێرنکردنی سیستمی بانکیمان، دەستپێشخەری (ھەژماری من)مان ڕاگەیاندووە، کە ھاوشێوەی نیە لە ناوچەکەمان. ئەم پڕۆژەیە ھاوکاری ھاووڵاتییان دەبێت بۆ ئەوەی ئاسانتر دەستیان بگات بە بانکی دیجیتاڵی و باشترکردنی شەفافیەت و ھاندان و فراونکردنی کولتووری کارسازی و بەرپرسیارێەتی.  بەشێکى دیکەى قسەکانى:  . پێزانینم بۆ ئەو پەیوەندییەی لە نێوان زانکۆکە و ئەمریکا هەیە, ئەم قۆناغە دەبێتە بناغەیەکی بەهێز بۆ داهاتوومان.  . واژۆكردنی گرێبەستە نوێیەكان لەگەڵ كۆمپانیا ئەمریكییەكان، قۆناغێكی گرنگە. . پڕۆژەی ڕووناکی دەبێتە ڕووناککردنەوە و گەشانەوەی هەموو هەرێمی کوردستان.  .  بۆ نوێکردنەوە و مۆدێرنکردنی سیستمی بانکیمان، دەستپێشخەری (ھەژماری من)مان ڕاگەیاندووە، کە ھاوشێوەی نییە لە ناوچەکەمان. . ئێستا ئێمە پێویستمان بە بیرکردنەوەی داهێنەرانە هەیە لە نێوان سێکتەرە جیاوازەکاندا. . لە بواری پەروەردە کارنامەیەکی گرنگمان هەیە، پڕۆژەی نوێمان بۆ پەروەردە و خوێندنی باڵا پێشکەش کردووە . . كوردستان بناغەیەكی بەهێزی دروستكردووە بۆ ئابووریی سەربەخۆ. پێشكەوتنەكانی ئەم قۆناغە زامنی داهاتوومان دەكات, پێویستمان بە بیركردنەوەی داهێنەرانە هەیە بۆ گەشاندنەوەی كوردستان. . كوردستان لەگەڵ زیرەكی دەستكرد هەنگاو دەنێت. . پرۆژەیەكی تەندروستی پێشكەش دەكەین بۆ سەرجەم بنكە تەندروستییەكان. . تەكنەلۆژیا ڕۆڵێكی گرنگی هەیە لە پێشخستنی پەروەردە و خوێندن. . مەبەستمانە نەوەیەكی خاوەن زانیاری بونیاد بنێین.

یسرائیل کاتز، وەزیری بەرگریی ئیسرائیل رایگەیاند، فەرمانی بە هێزەکانیان لە غەززە کردووە، بێ گوێدانە بەڕێوەچوونی دانوستانەکانی ئاشتی، پێشڕەوی بکەن بەرەو بەدیهێنانی ئامانجەکانی ئۆپراسیۆنە فراوانەکەیان. وەزیری بەرگریی ئیسرائیل راشیگەیاند، فەرمانی بەهێزەکانی وڵاتەکەی کردووە، هەموو تواناکانیان بەکاربهێنن بۆ پاراستنی سەربازەکانیان و لەباوبردنی حەماس. ئەمە لە کاتێکدایە، ئیدارەی ترەمپ چاوی لە رێککەوتنە بۆ راگرتنی جەنگی غەززە و گەڕاندنەوەى بارمتەکان، کە لەڕێگەی ستیڤ ویتکۆف، نێردەی تایبەتی ئەمریکا لە رۆژهەڵاتی ناوەڕاست، پێشنیازێکى بۆ ئاگربەستی غەززە پێشکەشکردوە و ئیسرائیل و حەماس داوای گۆڕانکاریی بەشێک لە خاڵەکانی پێشنیازەکەیان کردوە، لەدواین داواکاریشدا حەماس پێداگیری لەسەر ئاگربەستی هەمیشەیی دەکات و رەزامەندیشی پیشانداوە بۆ ئازادکردنی 10 بارمتە و 18 تەرمی ئیسرائیلی. هاوکات، گوتەبێژى دامەزراوەی مرۆیی غەززە کە ئەمریکا پشتیوانیی دەکات، رایگەیاندووە، ئەو دەنگۆیانەی باس لە کوژران و برینداربوونی دەیان کەس دەکەن لە نزیک دوو ناوەندی دابەشکردنی هاوکاریی مرۆیی، راست نین. گوتەبێژی دامەزراوەی مرۆیی غەززە راشیگەیاند، هاوکارییەکان بەباشی دابەشکراون و ئەو دەنگۆیانەی باس لە کوژرانی هاوڵاتییان دەکەن لەلایەن حەماسەوە، بۆ شێواندنی راستییەکان بڵاودەکرێنەوە.

  بارزانی رایدەگەیەنێت: تەنیا رێگەی چارەسەرکردنی کێشەکانی عێراق، پابەندبوونی هەموو لایەکە بە بنەماکانی هاوبەشی، هاوسەنگی و سازان لە چوارچێوەی دەستووردا. بەپێى راگەیەندراوێکى بارەگاى بارزانى، ڕۆژی یەكشەممە لە سەلاحەددین مەسعود بارزانی پێشوازی لە شاندی سەرۆك هۆز و شیوخ و كەسایەتی و ڕیشسپییە عەرەبەكانی پارێزگای نەینەوا كرد. لەو كۆبوونەوەیەدا بارزانی لە وتەیەكدا وێڕای ئاماژەدان بە مێژووی كێشەكانی نێوان گەلی كوردستان و حكوومەتەكانی عێراق جەختی لەوە كردەوە كە جێیی شانازییە ناكۆكیی نێوان گەلی كوردستان و حكوومەتەكانی عێراق هیچ كاتێك نەبووەتە هۆی ناكۆكیی نێوان گەلانی عێراق.  بارزانی جەختیشی لەوە كردەوە كە عێراقی دوای 2003 لەسەر بنەمای هاوبەشی و هاوسەنگی و سازان و لە چوارچێوەی دەستووردا دامەزراوە و تەنیا ڕێگەی چارەسەركردنی كێشەكانی عێراق پابەندبوونی هەموو لایەكە بەو بنەمایانە.  بارزانی پاڵپشتیی و هاوسۆزیی خۆی بۆ داواكاری و کێشەکانی خەڵكی پارێزگای نەینەوا ڕاگەیاند و ئەوەشی دووپات كردەوە كە پێویستە ڕێگە بدرێت دانیشتوانی نەینەوا خاوەنی بڕیار و چارەنووسی خۆیان بن. لە دیدارەكەدا شاندی میوان سوپاسی گەلی كوردستان و هەڵوێستی بارزانیان كرد كە لە ڕۆژانی تەنگانە و لە شەڕی تیرۆریستاندا میوانداریی سەدان هەزار ئاوارەی عێراقیان لە پارێزگای نەینەوا و پارێزگاكانی تری عێراق كردووە.   بەشداربووانی كۆبوونەوەكە وێڕای ئاماژەدان بە سەقامگیری و بووژانەوەی هەرێمی كوردستان داوایان كرد كە هەماهەنگی و هاوكاری و پێكەوەیی لەنێوان پارێزگاكەیان و هەرێمی كوردستاندا هەبێت. 

  وەفدی ئیدارەی خۆبەڕێوەبەری و حكومەتی دیمەشق كۆبوونەوە، ئەمەش یەکەمین دیداری نێوانیانە لە دیمەشقی پایتەختی سوریا کۆتایی پێهات. وەفدی ئیدارەی خۆبەڕێوەبەری باكور و رۆژهەڵاتی سوریا "رۆژئاوای كوردستان" لە دیمەشق لەگەڵ وەفدێكی دەسەڵاتدارانی حكومەتی نوێی سوریا كۆبوونەوە، ئەوەش لەچوارچێوەی هەوڵەكانە بۆ جێبەجێكردنی زیاتری خاڵەكانی ئەو رێككەوتنەی 10 ی ئاداری ئەمساڵ لەنێوان مەزڵوم عەبدی فەرماندەی هەسەدە و ئەحمەد شەرع سەرۆكی كاتیی سوریا واژۆكرا. سەرچاوەکان باسیان لەوە کردووە، پاشنیوەڕۆی ئەمڕۆ یەکشەممە، بەرپرسانی دیمەشق پێشوازییان لە شاندێکی ئیدارەی خۆسەر بە سەرۆکایەتیی فەوزە یوسف، سیاسەتمەداری کورد، و هەروەها عەبدولحەمید ئەلمەهباش، ئەحمەد یوسف، سەنحەریب بەرسووم، سۆزدار حاجی، مریەم ئیبراهیم، ​​و یاسر سلێمان لە نێویاندا کردووە. کۆبوونەوەی نێوان هەردوولا نزیکەی سێ کاتژمێری خایاند، ئەمەش یەکەم کۆبوونەوەی لەم جۆرە بوو لە دوای ئەنجامدانی ڕێککەوتنەکە لە نێوان دیمەشق و هێزەکانی سوریای دیموکرات. ئاماژەی بەوەشکرد، لە کۆبوونەوەی نێوان هەردوولادا بەرپرسێکی ئەمریکی دانیشتووی دیمەشق و لە وەزارەتی دەرەوەی ئەمریکا کاردەکات. لایەنی حکومی بە نوێنەرایەتی یاریدەدەری وەزیری ناوخۆی سوریا کە بەرپرسە لە ڕێککەوتنی حەلەب لە نێوان کورد و سەرۆکایەتی سوریا، هەروەها بەرپرسی ئەمنی شاری عەفرینی کوردنشینی سوریا، کە دانیشتووانی ئاوارەکانی لەلایەن ئیدارەی خۆسەرەوە داوای گەڕانەوەیان بۆ ناوچەکانی خۆیان دەکرێت، لەگەڵ دانیشتوانی ناوچەی تەل ئەبیاد و ڕاس ئەلعەین، کە بە زمانی کوردی بە "سەرێ کانی" ناسراوە. هەروەها بەرپرسانی دیکە لەگەڵ شاندی ئیدارەی خۆسەر پرسی ئەنجامدانی تاقیکردنەوەی کۆتایی بۆ خوێندکارانی قۆناغی ناوەندی و ئامادەیی لە ناوچەکانی کە هێزەکانی ئەمریکای تێدا ئامادەن وەک بەشێک لە هاوپەیمانی نێودەوڵەتی دژی داعش بە سەرۆکایەتی ئەمریکا تاوتوێ کرد. ئەوە ڕوون بووەتەوە کە بڕیارە لە دوای جەژنی قوربان لیژنەکان پێکبهێنرێن و دەست بە کارەکانیان بکەن، بەگوێرەی ئەوەی سەرچاوەیەکی نزیک لە شاندی ئیدارەی خۆسەر بە ماڵپەڕی ئەلعەرەبیەى ڕاگەیاندووە. هەروەها ئاماژەی بەوەدا کە ئەندامانی شاندەکە ئەمڕۆ یان سبەی دەگەڕێنەوە شوێنی نیشتەجێبوونیان لە باکوری ڕۆژهەڵاتی سوریا. ئەم كۆبوونەوەیە لە دیمەشق، تەواوكاریییە بۆ سێ كۆبوونەوەی پێشتر كە بۆ هەماهەنگی بووە لەنێوانیان و لە باكور و رۆژهەڵاتی سوریا بەڕێوەچووە، یەكەم دیدار لە 19 ی ئادار دەستیپێكرد واتە نۆ رۆژ دوای رێككەوتنی ئەحمەد شەرع سەرۆكی كاتیی سوریا و مەزڵوم عەبدی فەرماندەی هەسەدە، دیداری دووەمیش لە 12 ی نیسان بەڕێوەچوو، سێیەم كۆبوونەوەش هەفتەی رابردوو لە كەمپی هۆل بەڕێوەچوو. كۆبوونەوەكان بۆ ئەوەن خاڵەكانی رێككەوتنی نێوان مەزڵوم عەبدی و ئەحمەد شەرع جێبەجێ بكرێت.

  بە مەبەستی گفتوگۆکردنی لەسەر ڕێکارەکانی جێبەجێکردنی ڕێککەوتنەکەی ١٠ـی ئادار لە نێوان مەزڵووم عەبدی و ئەحمەد شەرع، شاندێکی ئیدارەی خۆبەڕێوەبەریی لەگەڵ شاندێکی دەسەڵاتی دیمەشق کۆبوویەوە. لە چوارچێوەی هەوڵەکان بۆ گەشەپێدانی گفتوگۆ و جێبەجێکردنی ڕێککەوتنی ١٠ـی ئاداری نێوان مەزڵووم عەبدی فەرماندەی گشتیی هێزەکانی سووریای دیموکراتیک (قەسەدە) و ئەحمەد شەرع، سەرۆکی کاتی دەسەڵاتی دیمەشق، ئەمڕۆ شاندێكی لە ئیدارەی خۆبەڕێوەبەریی دیموکراتیکی هەرێمی باکوور و ڕۆژهەڵاتی سووریا لەگەڵ شاندێکی دەسەڵاتی دیمەشق کۆبوویەوە. شاندەکەی باکوور و ڕۆژهەڵاتی سووریا کە لە ١٢ـی نیسان بوونیادنرابوو لە فۆزا یوسف، ئەندامی دەستەی بەڕێوەبەریی پەیەدە، عەبدولحامد هەمباش هاوسەرۆکی پارتی سووریای دواڕۆژ، سەنحاریب بەرسوم هاوسەرۆکی پارتی یەکێتی سریانی، ئەحمەد یوسف هاوسەرۆکی دەستەی دارایی لە ئیدارەی خۆبەڕێوەبەری، سۆزدار حاجی، ئەندامی کۆنسەی بەڕێوەبەری (یەپەژە)، مریەم ئیبراهیم هاوسەرۆکی دەستەی کاروباری کۆمەڵایەتی و کرێکاران لە ئیدارەی خۆبەڕێوەبەریی، یاسر سلێمان جێگری هاوسەرۆکایەتی ئەنجوومەنی گەلانی دیموکراتی لە باکوور و ڕۆژهەڵاتی سووریا، پێکهاتبوو. نوێنەرایەتی دیمەشق پێکهاتبوون لە محەمەد قەناتری جێگری نووسینگەی ئەمریکا لە وەزارەتی دەرەوەی سووریا، عەبدولغەنی محەمەد بەڕێوەبەریی ئاسایشی پارێزگای حەلەب، مەسعود بەتاڵ بەرپرسی دۆسییەی عەفرین لە بەڕێوەبەریی ئاسایشی ناوخۆ، زیاد فەواز عایش جێگری وەزیری ناوخۆ بۆ کاروباری مەدەنی. بەپێی لێدوانی وتەبێژی شاندەکەی باکوور و ڕۆژهەڵاتی سووریا، هەرردوو لایەن یەکدیان ناسی، هەروەها بەرنامەیەکی کاری هاوبەش بۆ درێژەدان بە گفتوگۆکان و داڕشتنی میکانیزمەکانی جێبەجێکردنی بڕگەکانی ڕێککەوتنی ١٠ـی ئاداری ٢٠٢٥ گفتوگۆیان لەبارەوە کرا. هەردوو لایەن جەختیان لەسەر ئەوە کردەوە کە کار بکەن بۆ چەسپاندنی سەقامگیریی و بەرەوپێشچوونی بەندەکانی ڕێککەوتنامەکە.

  لە ڕاگەیاندراوەکەی ناوەندی ڕاگەیاندن و چاپەمەنی هێزەکانی پاراستنی گەل (هەپەگە-نەڕەچە)دا گوتراوە: "٢١ـەمین ساڵوەگەری قەڵەمبازی مێژوویی ١ـی حوزەیران کە بە پێشەنگایەتی گەریلاکانی ئازادی کوردستان ئەنجام درا، سەرەتا لە ڕێبەری ئازادی هەموو گەلانی بندەست، ژن و گەنجان ڕێبەر ئاپۆ، وە لە بنەماڵەی شەهیدانمان کە بە خاوەنداریکردن لە ڕێ و ئامانجی شەهیدانمان ڕێگەی تێکۆشانیان بەرزکردەوە، لە گەلی وڵاتپارێزمان، لە دۆستانی گەلەکەمان و لە کۆیی هاوڕێیانمان پیرۆز دەکەین. لە کەسێتی هاوڕێیانمان؛ حوسەین ماهیر، ئەرداڵ، نوجان نورحەق، عادل بلکی، چیچەک کچی، ماهیر دێرسیم، کەنداڵ باز، نوودا کارکەر، ڕۆژین گەودا، ڕەشید سەردار، محمەد گۆیی، دیجلە عەفرین، سمکۆ ڕۆژهەڵات، ئاتاکان ماهیر، دەلال ئامەد، گوڵچیا گابار، فازڵ بۆتان و لەیلا سورخوێن دا بە خۆشەویستی، ڕێزداری، پێزانینێکی مەزن و پەیوەست بوونێکی بێ کۆتاوە یاد دەکەینەوە." درێژەی ڕاگەیاندراوەکە بەم شێوەیە: "لە ١٥ـی شوباتی ١٩٩٩دا، لە کەسێتی ڕێبەر ئاپۆدا لە دژی گەلەکەمان و تەڤگەری ئازادی کوردستان کە بە دڵنیاییەوە ئایندەیان ئازادە، هێرشی پیلانگێڕی نێونەتەوەیی ئەنجام درا. وێڕای بێ دەرفەتی و هێرشی مەزن، ڕێبەر ئاپۆ بەو پارادایمەیی کە پەرەی پێدا مەزنترین وەڵامی پیلانگێڕانی دایەوە. ڕێبەرێتیمان لەسەر بناغەی پارادایمی نوێ بۆ پێشخستنی چارەسەرییەکی دیموکراتیکانە لە تورکیا هەلێکی مەزنی مێژوویی ئافراند. لەسەر ئەم بناغەیە هێزەکانی گەریلامان لە بڕیاری کشانەوەی ٢ـی ئابی ١٩٩٩ هەتا ١ـی حوزەیرانی ٢٠٠٤ بۆ ماوەی پێنج ساڵ لە دۆخی ئاگربەستدا مایەوە بۆ چارەسەری دیموکراتیکانەی پرسی کورد بناغەیەکی مەزنی دامەزراند. بەڵام دەوڵەتی تورک هەوڵیدا ئەم قۆناغە بۆ لەناوبردنی تەڤگەرمان بەکاربهێنێت. قەڵەمبازی ١ـی حوزەیران کە لە ساڵی ٢٠٠٤دا پەرەی پێدرا، لە بەرانبەر سەپاندنی ناچەرەسەری و هێرشەکان پەرەی پێدرا، بە ناچاری بووە هەڵمەتێکی میژوویی کە کەوتە ڕۆژەڤەوە. تێکۆشانی شۆڕشگێڕی قەڵەمبازی ١ـی حوزەیران ڕاستی‌گەلێکی زۆری ئاشکرا کرد کە دەخواسترا بشاردرێتەوە. هەروەک چۆن قەڵەمبازی ١٥ـی ئابی ١٩٨٤ ڕێگری لە نکۆڵیکردن لە کورد گرت و پرسەکانی ڕاخستەسەر مێزی چارەسەری، قەڵەمبازی ١ـی حوزەیرانیش لە بە پێویستی کردنی چارەسەری و بەهێزکردنی بناغەکانییدا ڕۆڵێکی گرنگی گێڕا. قەڵەمبازی میژوویی ١ـی حوزەیران جارێکی دیکە سەلماندییەوە چەندە درووست و لە جێگەی خۆییدا بوو. زۆر بەڕوونی نیشانی دا پرسی کورد بە سیاسەتەکانی نکۆڵی، لەناوبردن و قڕکردن چارەسەر ناکرێت. پرۆسەی قەڵەمبازی ١ـی حوزەیران کە ٢١ـی بەسەردا تێپەڕ دەبێت، پێشنبینییە قوڵەکانی ڕێبەر ئاپۆ، ئەو پارادایمەی کە پەرەی پێداوە، ئەو سیاسەتانەیی پێکیهێناون و هەڵوێستە مێژووییەکەی لە ئیمراڵی چەندین جار پشتڕاست کراوەتەوە. کات و پێشکەوتن، مافداری و حەقیقەتی ڕامانەکانی ڕێبەر ئاپۆی سەلماندووەتەوە. میژوویی تێکۆشانی ٥٢ ساڵەمان زۆرباش نیشانی داین؛ کاتێک بە درووستی لە ڕێبەر ئاپۆ تێگەیشتین و هێزیی پێکهێانی وی نیشانی دا هەنگاو، سەرکەووتنی مێژوویی و ئامانجی گرنگ بە دەستهێندراون. وەک گەریلاکانی ئازادی کوردستان لە هێڵی میلیتانی ئاپۆییدا قوڵتربووین، دەڵێیین بەم هۆشمەندییە مێژووییەوە بۆ ئەو بەهایانەیی بە هەوڵدانی بێهاوتایی ڕێبەر ئاپۆ و ڕەنجی مەزنی گەلەکەمان بەدەستهێندراون بە خۆڕا نەچوون، تا ئێستا و لە ئێستاش بەدواوە ئەو بەرپرسیارێتییەیی دەکەوێتە ئەستۆمان جێبەجێ دەکەین. ڕایدەگەیەنین بە بڕیاریین بە مەزنکردنی ڕوحی فیدایی ئاپۆیی و قوڵکردنەوەی میلیتانی ئاپۆیی، بۆ مسۆگەرکردنی ئازادی ڕێبەر و گەلەکەمان، بە فیداییەوە لەسەر ئەو ڕێگەیە تێدەکۆشین کە ڕێبەرمان کێشاوێتی. ئێمە وەک گەریلاکانی ئازادی کوردستان و فیدایی ئاپۆیی، جارێکی دیکە ٢١ـەمین ساڵوەگەری قەڵەمبازی ١ـی حوزەیران لە گەلەکەمان، هاوڕێ و هەڤاڵامان پێرۆز دەکەین کە لە گۆڕەپانەکاندان و لە ٢٢ ساڵەی تێکۆشاندا هیوای سەرکەوتنیان بۆ دەخوازین."

فەرمانبەرانی هەرێمی کوردستان لە دژی پێنەدانی مووچە لە دادگەی باڵای فیدراڵیی عێراق سکاڵایان تۆمارکرد. دادگەکە دەڵێت، لە نزیکترین کات بڕیار دەدەن.   بەگوێرەی راگەیێندراوی دادگەی باڵای فیدراڵیی عێراق، ئەمڕۆ یەکشەممە، یەکی حوزەیرانی 2025، فەرمانبەرانی هەرێمی کوردستان لە دادگەکە سکاڵایان تۆمارکردووە. داوای بەردەوامبوونی خەرجکردنی مووچە لەوادەی دیاریکراوی خۆیدا دەکەن.   فەرمانبەران بۆ ئەو داوایەیان پشتیان بەستووە بە بڕیاری دادگەی فیدراڵی بە ژمارە 224 و یەکخراو بە ژمارە 269ـی فیدراڵی 2023 لە 21-2-2024.    فەرمانبەرانی هەرێمی کوردستان لە سکاڵاکەیاندا، داوا دەکەن دادگە فەرمان سالارییەک دەربکات و وەزارەتی دارایی فیدراڵی پابەند بکات بە جێبەجێکردنی ئەو بڕیارەی دادگەی فیدراڵی کە تێیدا هەریەک لە سەرۆکوەزیرانی عێراق و سەرۆکوەزیران هەرێمی کوردستان پابەند دەکات مووچەی سەرجەم کارمەندان بەجێ (تەوتین) بکەن.    سکاڵاکە لە دادگەی باڵای فیدراڵی عێراق بە ژمارە (104/ فیدراڵی/2025) تۆمارکراوە و دادگەی باڵای فیدراڵی دەڵێت، "لە نزیکترین کات بڕیار لەبارەی داواکارییەکە دەدات بۆ دەرکردنی فەرمان سالارییەکە."    ئەگەر دادگە بڕیاری سالاریی بدات، ئەوا وەکو هەڵکەوت عەزیز، پەیامنێری رووداو لە بەغدا دەڵێت، نووسراوەکانی وەزارەتی دارایی عێراق کاریان پێناکرێت و دەبێت راستەوخۆ دەست بە خەرجکردنی مووچەی مووچەخۆرانی هەرێمی کوردستان بکرێت.    چوارشەممەی هەفتەی رابردوو 28-5-2025 تەیف سامی، وەزیری دارایی عێراق نووسراوێکی ئاراستەی حکومەتی هەرێمی کوردستان کرد و تێیدا هاتبوو کە وەزارەت ناتوانێ لە ناردنی پارە بۆ هەرێمی کوردستان بەردەوام بێ، بەهۆی "تێپەڕاندنی پشکەکەی (12.67%) کە لە یاسای بودجەی فیدراڵیدا دیاریکراوە."   رۆژی 29-5-2025 وەزارەتی دارایی هەرێمی کوردستان راگەیێندراوێکی بە زمانی عەرەبی وەک وەڵامێک بۆ تەیف سامی بڵاوکردەوە و تێیدا هاتبوو: "ئەو رێڕەوەی وەزارەتەکەتان گرتوویەتییەبەر لە دیاریکردنی پشکی هەرێمی کوردستان پێچەوانەی دەستووری عێراقە؛ دیاریکردنی پشکی هەرێمی کوردستان دەبێت پشت بە داهاتە فیدراڵییە کۆکراوەکان ببەستێت نەک خەرجیی کردەیی".

  وەزارەتی ناوخۆی بەریتانیا بڵاویکردەوە، رۆژی شەممە هەزار کۆچبەر بە 18 بەلەم بە نۆکەندی ئینگلیزدا چوونەتە وڵاتەکەیان. ئەمەش ئەم ساڵ زۆرترین بووە لە رۆژێکدا و دووەم زۆرترین بووە لەو کاتەوەی ئاماری گەیشتنی کۆچبەران بەو وڵاتە تۆمار دەکرێن.    رۆژی شەممە، 31ـی ئایاری 2025، وەزارەتی ناوخۆی بەریتانیا بڵاویکردەوە، ئەمڕۆ هەزار کۆچبەر لە فەرەنساوە بە نۆکەندی ئینگلیزدا چوونە وڵاتەکەیان، ئەم ساڵ زۆرترین بووە لە رۆژێکدا کە پێشتر و لە یەکی ئەم مانگەدا 825 کۆچبەر چووبوون. وەزارەتەکە دەشڵێت، هێزی دەریاوانی فەرەنسا و وڵاتەکەیان رێگرییان لە 11 بەلەمی دیکەی کۆچبەران کرد ئەو نۆکەندە ببڕن.    کریس فلیپ، وەزیری سێبەری ئۆپۆزسیۆنی بەریتانیا رایگەیاند، "ئەمە رۆژێکی شەرمەزارییە بۆ حکومەتی پارتی کار". گوتیشی، حکومەت شکستیهێناوە لە کۆنترۆڵکردنی سنوورەکان. زۆرینەی وەزیرانی حکومەتی بەریتانیا وەزیری سێبەریان هەیە کە سەر بە ئۆپۆزسیۆنی وڵاتەکەن.    بە گوێرەی وەزارەتە بەریتانیەکە، ئەم ساڵ تاوەکو ئێستا 14 هەزار و 600 کۆچبەر چوونەتە وڵاتەکەیان کە 30٪ـی لە هەمان ماوەی پار و زۆرترینە لە هەمان ماوە لە ساڵی 2018ـەوە.    گەیشتنی ئەو ژمارە زۆرە کۆچبەرە بە بەریتانیا لەکاتێکدایە حکومەتی وڵاتەکە بە رێککەوتن لەگەڵ یەکێتیی ئەورووپا و ژمارەیەک وڵاتی دیکە چەندین رێککەوتنی بۆ رێگری لە گەیشتنی کۆچبەران بە وڵاتەکەی کردووە.    رۆژی سێی ئەیلوولی 2022، هەزار و 305 کۆچبەر چوونە بەریتانیا، ئەمەش زۆرترین بووە لە رۆژێکدا لەو کاتەوەی وڵاتەکە ئاماری چوونی کۆچبەران بۆ وڵاتەکەی تۆمار دەکات. 

  عادل رکابی، پەرلەمانتاری فراكسیۆنی سادیقون، لە پەرلەمانی عێراق دەڵێت: كێشەكانی نێوان بەغداد و هەرێم سیاسیە، چونكە یەكێك بیەوێت بگات بە چارەسەر. ئایا كێشە بە كێشیەكی تر كەڵەكە دەكات، یان هەوڵی چارەسەركردنی خودی كێشەكە دەدات؟، دەشڵێت: گرێبەستە نەوتییەکانی ئەم دواییەی هەرێمی کوردستان لەگەڵ واشنتۆن واژۆیكرد، كێشەكانی لەگەڵ بەغداد قوڵتر كردەوە. رکابی وتیشی: بڕیارەکانی دادگای فیدراڵی پابەندکەرن بۆ بەغداد و هەولێر، بەڵام تا ئێستا هەرێم بڕیارەكەی دادگاكە رەتدەكاتەوە سەبارەت بە تەوتیكردنی مووچە. ئەو پەرلەمانتارە، لە لێدوانێكدا بۆ كەناڵی " العهد" ئاماژەی بەوەشکرد: هەرێم پابەند نەبووە بە یاسای بودجە و بڕیارەکانی دادگای فیدراڵی، بەهۆی پابەندنەبوونەوە گەیشتن بەم ئەنجامە، تەنانەت پابەندبوون نییە بە رێككەوتنە سیاسیەكانیشەوە، ئەگەر هەرێم تەنها داهاتە نەوتییەكانی رادەست بكردایە زۆرینەی كێشەكانی چارەسەر دەبوون. رۆژنامەى شەرقلئەوسەت بڵاویکردەوە، سەرۆکوزیرانى عێراق بۆ چارەسەرکردنى کێشەکانى نێوان هەولێر و بەغداد پەنا بۆ ئەو کەسایەتییە کاریگەرانە دەبات کە لە کوردەوە نزیکن. بەگوێرەى رۆژنامەى شەرقلئەوسەت، سودانى نایەوێت گرژییەکانی نێوان هەولێر و بەغداد بەرەو ئاڵۆزیی بڕوات، بە تایبەت لەم ساتەوەختەى پێش هەڵبژاردنە پەرلەمانییەکەى عێراق، بۆیە دەیەوێت ئەو کەسانە بنێرێتە هەولێر کە نزیکن لە بەرپرسانی کورد، بەتایبەت بۆ چارەسەرکردنى کێشەى ئەم دواییە کە وەزیری دارایی بۆ فەرمانبەرانى هەرێمى کوردستانى دروستکردووە. میدیا عێراقییەکانیش باس لەوەدەکەن، هادی عامری بۆ هەمان مەبەست ئەمڕۆ سەردانی هەولێر دەکات و دەیەوێت لەو رێگەیەوە بە بەرپرسانى هەرێمى کوردستان بڵێ مووچەى مانگی ئایار دەنێردرێت، بەڵام بەشێوەی قەرز کە دواتر لە بەشە بوودجەی هەرێمی کوردستان دەبڕدرێت. رۆژنامەکە ئاماژەى بۆ ئەوەشکردووە، هەندێک کەس و لایەنی سیاسی لە بەغداد پێداگریی دەکەن لەسەر سزادان و بڕینى مووچەى هەرێمى کوردستان لە بەرامبەر رادەستنەکردنى داهاتى ناوخۆ وەک پێویست.

دەیەمین پاکێجی دادوەری کە لەلایەن ئاک پارتییەوە پێشکەش بە پەرلەمانی تورکیا کرا، سەرەڕای ناڕەزایەتی و رەخنەکانی ئۆپۆزسیۆن، لە لیژنەی دادوەری پەسەندکرا. پاكێجی هەمواری یاسای سزادان كه‌ له‌لایه‌ن فراکسیۆنی پارتی داد و گەشەپێدان (ئاكپارتی)ـیه‌وه‌ پێشكه‌شی‌ سەرۆکایەتیی په‌رله‌مانی توركیا كرابوو، له‌لایه‌ن لیژنه‌ی داد و یاساییه‌وه‌ په‌سه‌ند كرا. دوای پەسەندکردنی پاکێجەکە، چــــاوەڕێ دەکرێت له‌ چه‌ند ڕۆژی داهاتوودا له‌لایه‌ن ئه‌نجوومه‌نی گشتیی په‌رله‌مانه‌وه‌ گفتوگۆی له‌باره‌وه‌ بکرێت. ئاکپارتی، کە پارتی دەسەڵاتداری تورکیایە، لە چەند ڕۆژی ڕابردوودا، 10ـەمین پاکێجی هەمواری یاسای سزادانی پێشکەشی سەرۆکایەتیی پەرلەمانی ئەو وڵاتە کرد کە پارتی یەکسانی و دیموکراسیی گەلان (دەم پارتی) وەک هەنگاوێکی کردەیی بۆ پرۆسەی ئاشتی داوای کردبوو، بەڵام بەرپرسانی پارتەکە جەخت دەکەنەوە، پاکێجەکە چاوەڕوانییەکانیانی لە خۆ نەگرتووە. عەبدوڵا گولەر، سەرۆکی فراکسیۆنی ئاکپارتی لە پەرلەمانی تورکیا لەو بارەوە گوتوویەتی: "پاکێجەکە هەموارکردنەوەی یاسای سزادان و هەشت یاسای دیکە لەخۆ دەگرێت، لە 30 ماددە پێک هاتووە و ڕۆژی 31 ئەم مانگە لە لیژنەی دادی پەرلەمان گفتوگۆی لەبارەوە دەکرێت. ئامانجمان لە هەموارەکە، هێنانەدی دادپەروەرییە لە جێبەجێکردنی یاسای سزادان و هاوکات ڕێگریکردنە لە تاوان و بەدیهێنانی ئاسایش کۆمەڵایەتی." بەگوێرەی ئاماری وەزارەتی داد، زیاتر لە 403 هەزار سزادراو لە زیندانەکانی تورکیادا هەن. سەرۆکی فراکسیۆنی ئاکپارتی باسی لەوەش کرد "لە هەموارەکەدا 19 هەزار و 800 زیندانیکراو سوودمەند دەبن، کە بۆ دووەم جار تاوانیان کردووە و پاش بەسەربردنی سێ لەسەر چواری سزاکەیان لە زیندان، بە مەرج ئازاد دەکرێن. ژنان و منداڵان سوود لە هەموارەکە وەردەگرن. هەروەها پێشبینی دەکرێت 1500 بۆ 2000 زیندانی نەخۆش سوود لە هەموارکردنەکە وەربگرن." عەبدوڵا گولەر ئەوەشی خستە ڕوو "لە چوارچێوەی بەدیهێنانی ئامانجەکانی پرۆسەی تورکیای بێتیرۆر، هەوڵ و کاری زۆر بە پەرۆش و دڵسۆزانەمان هەیە. لە ڕۆژانی داهاتوودا لەم چوارچێوەیەدا، لە ڕووی ئاسایش و ئارامیی کۆمەڵگاکەمانەوە، بەردەوام دەبین لە کار و ئامادەکارییە جدییەکانمان. ئەگەر پێویست بکات هەمواری دیکەی تایبەت بە پرۆسەکە ئامادە دەکەین." لە لایەکی دیکەوە سێزای تەمەلی، بریکاری سەرۆکی فراکسیۆنی دەم پارتی ڕایگەیاندووە، لە پاکێجەکەدا کەموکووڕی زۆر جددی هەیە و چاوەڕوانییەکانییانی لەخۆ نەگرتووە. گوتیشی: گرنگترین بابەت ئەوەیە پاکێجەکە هەموارکردنەوە لە یاسای زیندانییانی سیایسی لەخۆ بگرێت، بەڵام لە پاکێجەکەدا نەهاتووە، بۆیە هەوڵی نەهێشتنی کەموکوڕییەکانی پاکێجەکە دەدەین.  ئەمە لە کاتێکدایە پارتی کرێکارانی کوردستان (پەکەکە) داوا لە دەسەڵاتدارانی تورکیا دەکات، چاکسازیی یاسایی بکەن، تا عەبدوڵلا ئۆجەلان، ڕێبەری زیندانیکراوی پەکەکە و بەشێکی زۆری زیندانیانی سیاسیی کورد کە چەندان ساڵە بە تۆمەتی جیاواز لە زینداندان، ئازاد بکرێن.  هەفتەی ڕابردوو، دوران کاڵکان، ئەندامی دەستەی کارگێڕیی پەکەکە لە نوێترین لێدواندا، لەبارەی پرۆسەی نوێی ئاشتی، بە میدیای ڕێکخراوکەی ڕاگەیاند "حکوومەتی تورکیا تەنانەت بچووکترین چاکسازیی یاسایی پێویستیشی بۆ سەرخستنی پرۆسەکە نەکردووە. ناکرێت پرۆسەکە بە هەنگاوی تاکلایەنە یان تەنها گوتاری نیازپاکی بەردەوام بێت. دەبێت دەسەڵات هەنگاوی جددی بۆ بنێت."

سەرۆکی هەرێمی کوردستان پیرۆزبایی 50 ساڵەی دامەزراندن و یۆبیلی زێڕینی یەکێتی لە بافڵ تاڵەبانی و سەرکردایەتیی حیزبەکە دەکات و دەڵێت، "كاروانى پێنج دەیە خەبات و تێکۆشانى يه‌كێتى، شایستەی رێز و پێزانینە".   نێچیرڤان بارزانی، سەرۆکی هەرێمی کوردستان لەبارەی رۆڵی مام جەلال دەڵێت، "لەم یاده‌دا بە رێزەوە دامەزرێنەری یەکێتی، خوالێخۆشبوو سەرۆک مام جەلال تاڵەبانی و هەموو ئه‌و شەهید و تێکۆشەرانه‌ بەبیر دەهێنینەوە کە لە ریزەکانی یەکێتیی نیشتمانیی کوردستاندا، قوربانیيان بۆ ئازادى داوه‌‌".    سەرۆکی هەرێمی کوردستان رایگەیاند، "جەخت لە ئاماده‌يى و رۆڵی گرنگی یەکێتى لە پرۆسه‌ى سياسيى هه‌رێمى كوردستان و عێراقدا ده‌كه‌ينه‌وه‌. هیوادارین ئەم یادە ببێتە هاندەرێکی بەهێزى پته‌وکردنی یەکڕيزيى نیشتمانی و پێکەوەیی لەنێوان هەموو لایەنە سیاسییەکان و پێکهاته‌کانی کوردستاندا بۆ بەرەنگاربوونەوەی ئاڵنگارييه‌كان، هه‌روه‌ها بۆ کارکردنی هاوبەش له‌پێناو پاراستنی دەستکەوتەکان و مافە دەستوورییەکانی هەرێمی کوردستاندا و دڵنیابوون لە داهاتوویەکی باشتر بۆ گەلى كوردستان".   دەقی پەیامەکە:   بەڕێز بافڵ جەلال تاڵەبانی سەرۆکی یەکێتیی نیشتمانیی کوردستان   سڵاو و رێز..   له‌ یادی (50) ساڵەی دامەزراندن و يۆبيلى زێڕينى یەکێتیی نیشتمانیی کوردستاندا، گه‌رمترين پيرۆزبايى پێشكه‌ش به‌ بەڕێزتان و سەرکردایەتی و تەواوی ئەندامان و جەماوەری یەکێتيی نيشتمانيى كوردستان دەکەم، هیوای سەرکەوتن و پێشکەوتنی بەردەوامتان بۆ دەخوازم.   لەم یاده‌دا بە رێزەوە دامەزرێنەری یەکێتی، خوالێخۆشبوو سەرۆک مام جەلال تاڵەبانی و هەموو ئه‌و شەهید و تێکۆشەرانه‌ بەبیر دەهێنینەوە کە لە ریزەکانی یەکێتیی نیشتمانیی کوردستاندا، قوربانیيان بۆ ئازادى داوه‌‌. كاروانى پێنج دەیە خەبات و تێکۆشانى يه‌كێتى، شایستەی رێز و پێزانینە.   جەخت لە ئاماده‌يى و رۆڵی گرنگی یەکێتى لە پرۆسه‌ى سياسيى هه‌رێمى كوردستان و عێراقدا ده‌كه‌ينه‌وه‌. هیوادارین ئەم یادە ببێتە هاندەرێکی بەهێزى پته‌وکردنی یەکڕيزيى نیشتمانی و پێکەوەیی لەنێوان هەموو لایەنە سیاسییەکان و پێکهاته‌کانی کوردستاندا بۆ بەرەنگاربوونەوەی ئاڵنگارييه‌كان، هه‌روه‌ها بۆ کارکردنی هاوبەش له‌پێناو پاراستنی دەستکەوتەکان و مافە دەستوورییەکانی هەرێمی کوردستاندا و دڵنیابوون لە داهاتوویەکی باشتر بۆ گەلى كوردستان.   نێچیرڤان بارزانی سەرۆکی هەرێمی کوردستان 2025/6/1  

  وەزیری دەرەوەی ئێران هۆشداری دەداتە لە هەر جۆرە وەڵامدانەوەیەک، ئەگەر وڵاتانی ئەوروپا راپۆرتی ئاژانسی نیودەوڵەتی وزەی ئەتۆم بۆ مەبەستی سیاسی بەکاربهێنن. ئاژانسی هەواڵی مهر بڵاویکردوەتەوە، عەباس عراقچی وەزیری دەرەوەی ئێران پەیوەندییەکی تەلەفۆنی لەگەڵ رافایل گرۆسی بەرپرسی گشتی ئاژانسی وزەی ئەتۆم ئەنجامداوە، عراقچی هۆشداری داوەتە گرۆسی لە کۆبونەوەی هەفتەی داهاتودا هۆشداری بداتە وڵاتانی ئەوروپی سەبارەت بە هەر جۆرە هەوڵێکی سیاسی دژی ئێران. هەروەها، داواشی لە بەرپرسی گشتی ئاژانسی وژەی ئەتۆم کردوە راستییەکان بخاتەرو تا ناوەندە نێودەوڵەتییەکان بۆ ئامانجی سیاسی خۆیان لە دژی گەلی ئێران هیچ هەنگاوێک نەنێن. وەزیری دەرەوەی ئێران راشیگەیاندوە، کاردانەوەیان دەبێت دژی هەر جۆرە هەوڵێکی نەگونجاو لەلایەن وڵاتانی ئەوروپاوە، هەروەها دەبێت بەرپرسیارییەتی هەر دۆخێک هەڵبگرن.