سەرۆک بارزانی و محەممەد ئەلحەسسان کۆبوونەوە

هاوڵاتی پارێزگاری سلێمانی رایگەیاند:" لەچەند رۆژی داھاتوودا دەست بەدابەشکردنی ئەو بڕە نەوتە دەکرێت رەوانەی سلێمانی کراوە". دەشڵێت:" تا ئێستا بڕی ملیۆنێک و ٥٠٠ لیتری بۆ پارێزگای سلێمانی ناردووە".  ئەمڕۆ شەممە 16ی تشرینی یەکەمی 2021، ھەڤال ئەبوبەکر پارێزگاری سلێمانی لە کۆنگرەیەکی رۆژنامەنوسیدا رایگەیاند:" ھۆکاری گران بوونی نرخی نەوتی سپی و غاز پەیوەندی بە حکومەتەخۆجێیەکانەوە نییە، بەڵکو پەیوەندی بە حکومەتی ھەرێم و حکومەتی فیدڕاڵی و بازاڕی نێودەوڵەتییەوە ھەیە". پارێزگاری سلێمانی وتیشی:" لەم رۆژانەدا دەست بە دابەشکردنی ئەو بڕە نەوتەدەکەن کە حکومەتی فیدڕاڵی ناردوویەتی". لەبارەی گرانبوونی بەنزین و گازۆیلەوە باسی لەوەکرد: ئەمانە لە پاڵاوگە ناوخۆییەکان بەرھەمناھێنرێن، ھەریەک لە حکومەتی ھەرێم و حکومەتی فیدڕاڵی نەوتی خاو بە پاڵاوگە ناوخۆییەکان نادەن، بۆ ئەمەش پشتییان بە بازاڕی نێودەوڵەتی بەستووە. دەشڵێت:" لە ئێستادا بازاڕی نێودەوڵەتی خواستێکی زۆری لەسەرە و بەرھەمھێنانیش کەمە".ئاماژەی بەوەشدا، لە ئێستادا گفتوگۆھەیە بۆ چارەسەرکردنی گرفتەکە، ھەرگرفتە و ھۆکارەکەشی جیاوازە. پارێزگاری سلێمانی ئاماژەی بەوەشدا، گرفتی غاز پەیوەندی بە چاککردنەوەی پرۆژەی غازی کۆرۆمۆرەوە ھەیە کە لەلایەن کۆمپانیای دانا غازەوەچارەسەر دەکرێت و بەنیازە لە چەند رۆژەی داھاتوودا بەرھەمەکانی بۆ دوو ئەوەندە و بەرێژەی ٥٠٪ بەرزبکاتەوە. لەبارەی گرانبوونی نەوتی سپییەوە، ھەڤاڵ ئەبوبەکر ئەوەشی خستەڕوو، حکومەتی فیدڕاڵی بەڵێنی داوە بۆ ھەموو ماڵێک بەرمیلێک نەوت دابین بکات و لە ١ی ئەم مانگەوە بینێرێت، بەڵام تا ئێستا بڕی ملیۆنێک و ٥٠٠ لیتری بۆ پارێزگای سلێمانی ناردووە. لەبارەی دابین کردنی بەنزین و گزۆیلەوە، ھەڤاڵ ئەبوبەکر پارێزگاری سلێمانی ئەوەشی خستەڕوو، "داوامان لە بازرگانەکانی کردووە لە ھەر شوێنێکەوە بەنزین بھێنن کار ئاسانییان بۆ دەکەین و دەرفەتیان بۆ دەرەخسێنین". وتیشی، ھیوا دەخوازن کاتێک بازرگانەکان لە بازاڕی نێودەوڵەتی سوتەمەنی دابیندەکەن، ئەو دەستپێشخەرییە ناوەختییانە نەمێنن کە ھەیە، تا بتوانرێت لە کورترین ماوەدا کێشەکە چارەسەربکرێت. لەبارەی ئەگەری گرانبوونی نرخی غازەوە و ئەو رێکارانەی بەرامبەر بریکارەکان دەگیرێنەبەر، پارێزگاری سلێمانی ئاشکرای کرد، لە ئێستادا غاز لە سلێمانی گراننەبووە، لیژنەکانی قایمقامییەتی سلێمانی و یەکە کارگێڕییەکان و چاودێری بازرگانی بەوردی  چاودێری ئەم بابەتە دەکەن.  لەبارەی ھاوردەکردنی بەنزین لە ئێرانەوە، ئاماژەی بەوەشدا، لە ئێستادا بەھۆی ئەوەی ئێران دەتوانێت بە نرخی بۆرسە سوتەمەنی بفرۆشیت، کە گرانترە لە نرخی پێشووی، ئەمەش وای کردووە گرانتر بکەوێت لە عێراق و ھەرێمی کوردستان. ئەمە لەکاتێکدایە، ھەر ئەمڕۆ ئومێد خۆشناو پارێزگاری ھەولێر رایگەیاند:" بەھۆی چاککردنەوەی وێستگەی کۆرمۆر گرفتی غاز لە تەواوی کوردستاندا سەریھەڵداوە و لەگەڵ خاوەن کارگەکان و وەزارەتی سامانە سروشتییەکان لە گفتوگۆدان بۆ چارەسەرکردنی ئەو گرفتە". ئاماژەی بەوەشدا" '' دڵنیایی بە ھاووڵاتییان دەدەین کە قەیران دروست نابێت و نرخی غاز بەرزنابێتەوە و لێپێچینەوەمان لەگەڵ بریکارەکانی غاز کردووە و لەمەودوا لێپێچینەوەکانمان توندتریش دەکەین''.

هاوڵاتی كۆمسیۆنی باڵای سەربەخۆی ھەڵبژاردنەكان لەعێراق رایگەیاند:" 95% ی ژماردن و جیاكردنەوەی دەنگەكان لە سێ ھەزار و 681 وێستگە تەواوكراون". ئەمڕۆ شەممە 16ی تشرینی یەکەمی 2021،عیماد جەمیل، ئەندامی تیمی راگەیاندن لە كۆمسیۆنی باڵای سەربەخۆی هەڵبژاردنەكان، لە لێدوانێكی رۆژنامەوانییدا ئاشكرایكردووە، تا ئێستا 95% ی ژماردن و جیاكردنەوەی دەنگەكان لە سێ ھەزارو 681 وێستگە تەواوكراون. عیماد جەمیل، باسی لەوەشكردووە، ئەنجامەكانی ژماردن و جیاكردنەوەی دەنگەكان بەدەست و ئەلیكترۆنی ھاوچەشن بوون. راشیگەیاندووە، تائێستا 356 تانە لەسەر ئەنجامە بەراییەكانی ھەڵبژاردنەكانی پێشوەختەی ئەنجوومەنی نوێنەرانی عێراق لە كۆمسیۆن تۆماركراون و گوتی: "تا ئێستا كۆمیسیۆن 85%ی تانەكانی تەواوكردووە". عیماد جەمیل، ئاماژەی بەوەشداوە، ئەنجوومەنی كۆمیسیاران، بڕیاری خۆی لەبارەی تانەكانەوە دەدات.  

  هاوڵاتی  لە بەشێک لە شارو شارۆچکەکانی هەرێمی کوردستان خۆپیشاندانی مامۆستایانی وانەبێژ دەستیپێکردەوە.   ئەمڕۆ شەممە 16ی تشرینی یەکەمی 2021،  خۆپیشاندانی وانەبێژان لە شاری سلێمانی لەبەردەم بینای پەرورەدی گشتی دەستیپێکرد و لە راگەیەنراوێكدا كە ئاراستەی حكومەتی هەرێم و پەرلەمانی كوردستانیان كردوە، داوا دەكەن حكومەت بەبێ جیاوازی و لەسەر بنەمای خزمەت و ساڵانی دەرچوون، هەلی دامەزراندنی هەمشەییان بۆ بڕەخسێنێت. داواش دەكەن لەكاتی دامەزراندنیاندا بە هەمیشەیی پێویست دەكات ساڵانی خزمەتیان بۆ هەژماربكرێت و وەڵامی هەردوو داواكارییەكانیان لە زوترین كاتدا بدرێتەوە، بەپێچەوانەوە تا جێبەجێكردنی داواكارییەكانیان ناگەڕێنەوە بۆ هۆڵەكانی خوێندن. هەر بەپێی زانیارییەکان، هەر ئەمڕۆ بەشێك لە مامۆستایانی وانەبێژ لە قەزایی ڕانیە و قەڵادزێ و هەڵەبجە و گەرمیان و دەربەندیخان و سنوری بەردەڕەش گردبونەوە و ناڕەزایەتییان ئەنجام داو داوای دامەزراندنی هەمیشەیی و پێدانی شایستە داراییەکانیان دەکەن.   

هاوڵاتی بایدن رایگەیاند: "رێگە بەرەو سەرکوتکاری دەچێت دەبێت لەبیرمان نەچێت، بە لەناوبردنی راستییەکان دەستپێدەکات. ئێستا دەبینین لە جیهاندا مافەکانی مرۆڤ و بەها دیموکراسییەکان لەژێر هەڕەشە و هێرشدان. ئێستا لە جیهاندا بەراورد بە 15 ساڵ لەمەوبەر وڵاتانی دیموکراسی کەمترن".  ئەمڕۆ شەممە 16ی تشرینی یەکەمی 2021، لە وتارێكیدا لە ناوەندی مافەکانی مرۆڤی سەر بە زانکۆی کۆنێکتیکیتی ئەمریکی، جۆ بایدن، سەرۆكی ئەمریكا رایگەیاند:"رێگە بەرەو سەرکوتکاری، دەبێت لەبیرمان نەچێت، بە لەناوبردنی راستییەکان دەستپێدەکات. ئێستا دەبینین لە جیهاندا مافەکانی مرۆڤ و بەها دیموکراسییەکان لەژێر هەڕەشە و هێرشدان. ئێستا لە جیهاندا بەراورد بە 15 ساڵ لەمەوبەر وڵاتانی دیموکراسی کەمترن. ئەمە قبووڵکراو نییە. بۆیە لە یەکەم رۆژی دەستبەکاربوونم هەنگاوی کۆنکرێتیم نا و مافەکانی مرۆڤم خستە چەقی سیاسەتەکانی دەرەوەی ئیدارەکەم و جەختم لە سەرکردایەتی ئەمریکا لە جیهان لەم بوارەدا کردەوە." بایدن ئاماژەی بۆ ئەوەشكرد : تاوان دژی مرۆڤایەتی بەڕێکەوت روونادات، بەڵکو بژارەیە و لەلایەن کەس و سەرکردەکانەوە کاری بۆ دەکرێت و وتی:" کاتێك کە تەماشای ئەمڕۆی جیهان دەکەین، بەداخەوە ناتوانین بڵێین دڕندەیی نەماوە. سەرکوتکردنی ئیگۆرە موسڵمانەکان لە چین و مامەڵەی دڕندانەی ئەنجوومەنی سەربازی دژی کەمینەی رۆهینگا و هەروەها تووندوتیژی و دەستدرێژی سێکسی و برسیکردنی خەڵکی سیڤیل لە باکووری ئەسیوپیا، ئەوانە بەشێکن لەو کارانەی کە پاشەکشەیان بە دیموکراسییەت کردووە". مافەکانی مرۆڤ و بەرگریکردنی لە دیموکراسییەت ئەو پەڕاوەیە کە سەرۆکی ئەمریکا بەردەوام جەختی لێدەکاتەوە و تێکەڵ بە سیاسەتی دەکات. سەرۆکی ئەمریکا وتیشی"کاتێك کە باس لە بارودۆخی خراپی مافەکانی مرۆڤ لەو وڵاتانە دەکەین، بەو واتایە نایێت کە دژیان بووەستین و شەڕیان لەگەڵ بکەین، بەڵکو بەرپرسیارییەتی سەر شانمانە لانیکەم لەئاستیاندا بێدەنگ نەبین". رێکخراوی هیومەن رایتس وۆچی ئەمریکی لە کۆی 197 وڵاتی جیهان، 20 وڵات بە خراپترین لە ئاست دیموکراسی و مافی مرۆڤ پۆلێنکردووە، لەسەرووی هەموویانەوە، میانمار، ئەریتیریا، لیبیا، کۆریای باکوور؛ هەروەها لە لیستەکەیدا وڵاتانی سووریا، تورکمانستان، کوبا و سعودیە و چەند وڵاتێكی دیکە دەبیندرێن.

هاوڵاتی بەڕێوەبەری گشتی فەرمانگەی گەڕاندنەوەی پارەکانی سەر بە دەستەی دەستپاکی رایگەیاند: " نزیکەی 17 ملیۆن و 700 هەزار دۆلار گەڕایەوە سەر حسابەكەمان". موعتەز عەباس، بە ئاژانسی فەرمی حکومەتی عێراقی راگەیاندووە،"کۆی ئەو بڕە پارەیەی لە ناوخۆ و دەرەوەی وڵات گەڕێنراوەتەوە نزیکەی 17 ملیۆن و 700 هەزار دۆلار بووە". ئاماژەی بەوەشداوە،" فەرمانگەکەیان هەوڵیداوە کۆی دوو ملیار و 200 ملیۆن دۆلار بگەڕێنێتەوە کە لەلایەن دادگاکانی وڵاتەوە فەرمانی گێرانەوەی بۆ دەرکراوە". لەبارەی ئەو بڕە پارەیەی بلۆککراوە و فەرمانی گێڕانەوەیان بۆ دەرکراوە بریتییە لە یەک ملیار و 417 ملیۆن و 900 هەزار و 842 دۆلار و 33 ملیۆن و 582 هەزار و 725 یۆرۆ و دوو ملیۆن و 329 هەزار و 521 جونەیهی ئیستەرلینی بەریتانی و 951 ملیار و 428 ملیۆن و 263 هەزار و 286 دیناری عێراقی و 720 هەزار و 529 دیناری ئەردەنی و سێ هەزار و 652 فرەنکی سویسری. موعتەز عەباس، باسی لەوەشکردووە،" دەست بەسەر 14 موڵک و پێنج پشکی کۆمپانیای جۆراوجۆردا گیراوە". بەڕێوەبەری گشتی فەرمانگەی گەڕاندنەوەی پارەکانی سەربە دەستەی دەستپاکی، وتیشی" توانراوە بڕی چوار ملیۆن و 170 هەزار دۆلار لە چەند وڵاتێکی دیکە لە دەرەوەی عێراق بلۆک بکرێت و بەم نزیکانە دەگەڕێنرێنەوە". ئەمە لەکاتێکدایە، دەستەی دەستپاکی عێراق لەسەرەتای مانگی ئەیلولەوە رایگەیاند، کۆی ئەو بڕە پارەیەی دەستی بەسەردا گیراوە و بەشێکی گەڕێنراوەتەوە بۆ سەر هەژماری بانکی گەنجینەی گشتی بریتی بووە لە 253 ملیار و 586 ملیۆن و 273 هەزار و 295 دیناری عێراقی و چوار ملیار و 920 ملیۆن و 96 هەزار و 137 دۆلار.

هاوڵاتی پارێزگاری هەولێر رایگەیاند: " هۆکارەکەشی ئەوەیە کێڵگەی کۆرمۆر لە سیانەکردندایە و رێژەی غازی شل کە بۆ ماڵان دابیندەکرێت کەمبوەتەوە". دەشڵێت:" خەڵك لە دڵەڕاوکێندا زیاتر غاز دەکڕن قەیران دروست دەبێت". ئومێد حۆشناو، پارێزگاری هەولێر ئەمڕۆ شەممە لەمیانی کۆنگرەیەکی رۆژنامەوانیدا لەبارەی گرانبونی نرخی غازی ماڵان رایگەیاند: "ماوەیەک پێش ئێستاش گرفتی غاز هەبو، چارەسەر کرا، ئێستا ئەو کێشەیە تەنها لە سنوری پارێزگای هەولێر نیە بەڵکو لە هەرێمی کوردستان هەیە، هۆکارەکەشی ئەوەیە کێڵگەی کۆرمۆر لە سیانەکردندایە و رێژەی غازی شل کە بۆ ماڵان دابیندەکرێت کەمبوەتەوە، ئێمە بە بەردەوامی لەگەڵ وەزارەتی سامانە سروشتیەکان و خاوەن کارگەکان لە گفتوگۆداین و خەڵک لە دڵەڕاوکێندا و زیاتر غاز دەکڕن پێیان وایە قەیران دروست دەبێت". پارێزگاری هەولێر لەبارەی وادەی چارەسەری نرخی غاز وتی: "لە چەند رۆژی رابردو سەردانی کارگەکانمان کرد و لەگەڵیاندا دانیشتین و لەگەڵ نوێنەری کۆمپانیای بەرهەمهێنانی غاز و سامانە سروشتییەکان گفتوگۆمان کرد، رێککەوتین لەسەر ئەوەی کە ئەو رێژەیەی کە بۆ هەولێر دابیندەکرێت زیادبکرێت، پێشتر 15 تانکەر رەوانەی هەولێر دەکرێت بەڵام ئێستا 20 تانکەری رەوانە دەکرێت و تاوەکو دو هەفتەی تر کە سیانەکردن تەواو دەبێت دۆخەکە دەگەڕێتەوە کاتی خۆی". لەبارەی کێشەی بەنزین، ئومێد خۆشناو وتی، "بەپێی وتەی وتەبێژی حکومەتی هەرێم، کێشەیەک لە جێبەجێکردنی رێککەوتنی نێوان هەرێم و بەغدا بۆ رەوانەکردنی بەنزین لە بەغداوە دروستبوە، بەم نزیکانە شاندێکی وەزارەتی سامانە سروشتییەکان دەچێتە بەغدا ئێمەش وەکو پارێزگاکان پێی نیگەرانین و نامانەوێت نرخی بەنزین بەرزبێتەوە و بە بەردەوامی لەگەڵ وەزارەتی سامانە سروشتیەکان لەگفتوگۆداین و نامانەوێت بەرزببێتەوە". ئاماژەی بەوەشکرد، ئەو دڵنیایی دەدات کە قەیرانی غاز دروستنابێت و نرخەکەی بەرزنابێتەوە، تەنها ئەو دو هەفتەیەی کە سیانەکردن تەواوبو نرخەکەی دادەبەزێت، "بۆ ئەوەی رێگری بکەین لە گرانبونی نرخی غاز ئیجرائات لەگەڵ بریکارێکی غاز کراوە، هەر ئۆتۆمبێلێکی فرۆشتنی غاو پۆلیسێکی لەگەڵدا دەبێت بۆ ئەوەی دڵنیا ببین کە نرخەکەی گران ناکەن".    

  هاوڵاتی ئەندامی لیژنەی دانوستانکاری رەوتی سەدر، ڕایگەیاند، "حکومەتی داهاتوو جێگەی سازان سیاسی نییە" دەشڵێت، " کاندیدمان بۆ سەرۆک وەزیران ئامادەیە". نەسار روبەیعی سەرۆکی دەستەی سیاسی سەدر و ئەندامی لیژنەی دانوستانکار بە ئاژانسی هەواڵی عێراق- ی ڕاگەیاند، "حکومەتی داهاتوو حكومه‌تى سازان نیه‌ و دەبێتە حکومەتێک کە لەلایەن لایەنە سیاسییەکانەوە بەڕێوەدەبرێت و نابێتە سەر کۆدەنگی سیاسی بۆ ئەوەی کێشەی هەموو پێکهاتەکان بێت و ئۆپۆزسیۆن لە هەموو پێکهاتەکان بێت".  وتیشی،"ڕەوتی سەدر سیسته‌مى پشك پشكێنه‌ ده‌كاته‌ سیسته‌مى نیشتمانى" ،و ئەوەشی وت "کوتلەی سەدر بە ئاشکرا رایدەگەیەنێت کە کاندیدی ئەوان بۆ سەرۆکوەزیران لە لایەن ڕەوتی سەدرەوەیە". ئاماژه‌ى به‌وه‌كرد،"حکومەتی داهاتوو ڕاستەوخۆ بەرپرسیارە لە ڕەوتی سەدر و هەموو شکستەکان له‌ ئه‌ستۆ ده‌گرێت". سەدرییەکان کە براوەی هەڵبژاردنی 10-10ـەن چاویان لە گرتنە دەستی پۆستی سەرۆکوەزیرانە بۆ خۆیان. دەوڵەتی یاسای نووری مالیکیش رایگەیاندووە، هاوئاهەنگییەکانیان بەردەوامن بۆ پێکهێنانی گەورەترین فراکسیۆنی پەرلەمانی بەمەبەستی پێکهێنانی حکومەتی نوێ و دەڵێن، هەوڵی زۆر هەیە بۆ قایلکردنی رەوتی سەدر بۆ بەشداریکردن لە چوارچێوەی ئەم هاوئاهەنگییە.  تاوەکو دێت شەڕی لایەنە سیاسییەکانی نێو ماڵی شیعە بۆ وەرگرتنی پۆستی سەرۆکوەزیران و پێکھێنانی حکومەتی داھاتووی عێراق گەرمتردەبێت، دواجار ھەر لایەنێک بتوانێت زیاتر لە 167 کورسیی پەرلەمانی لەھاوپەیمانییەتییەک کۆبکاتەوە، ئەویان سەرۆکوەزیران دەستنیشان دەکات و کابینەی داھاتووی حکومەتی عێراق پێکدەھێنێت.

  هاوڵاتی وەزیری سەرچاوە ئاوییەکانی عێراق رایگەیاند:" ڕەجەب تەیب ئەردۆغان واژۆی لەسەر ئەو یاداشتی لەیەکتێگەیشتنە کردوە کە لەنێوان عێراق‌و تورکیا لەسەر پرسی ئاو". دەڵێت:" یەکێک لەبڕگەکانی بریتییە لەوەی پشکێکی دادپەروەرانە لەئاوی هەردوو ڕوباری دیجلەو فورات بۆ عێراق بەربدرێتەوە". ئەمڕۆ شەممە،  مەهدی حەمەدانی وەزیری سەرچاوە ئاوییەکانی عێراق لەلێدوانێکی ڕۆژنامەوانیدا وتویەتی:"ڕۆژی چوارشەممەی ڕابردوو سەرۆکی تورکیا واژۆی لەسەر ئەو یاداشتی لەیەکتێگەیشتنە کردوە کە لەنێوان عێراق‌و تورکیا لەسەر پرسی ئاو لەنێوانیاندا واژۆکراوە، دوای واژۆکردنیشی لەلایەن ڕەجەب تەیب ئەردۆغانی سەرۆکی تورکیا، ڕێککەوتنەکە کەوتۆتە بواری جێبەجێکردنەوە". حەمەدانی ئاماژەی بەوەکردوە، وەزارەتی دەرەوەی تورکیا بەشێوەیەکی فەرمی لەسەر پەسەندکردنی ڕێککەوتنەکە ئاگاداریکردونەتەوە کە یەکێک لەبڕگەکانی بریتییە لەوەی پشکێکی دادپەروەرانە لەئاوی هەردوو ڕوباری دیجلەو فورات بۆ عێراق بەربدرێتەوە. لەماوەی چەند مانگی ڕابردودا تورکیا بەشێوەیەکی بەرچاو پشکی ئاوی عێراقی لەهەردوو ڕوباری دیجلەو فورات کەمکردبۆوە، ئەوەش مەترسیی ئەوەی لێدەکرا کارەساتێکی ژینگەیی‌و تەندروستیی گەورەی لەو وڵاتە لێبکەوێتەوە. بەرپرسێکی عێراقی ئاماژەی بەوەکردوە، لەدۆسیەی ئاودا بەرەوپێشچونی باش لەپەیوەندییەکانی نێوان عێراق‌و تورکیادا دروستبوە، بەشێوەی ئەوەی حکومەتی کازمی لەماوەیەکی کەمدا لەو بوارەدا بەدەستیهێناوە، چەندین دەیەیە بەدەستنەهاتوە.

  هاوڵاتی دەستەی دەستپاکی بڕی ئەو پارانەی  ئاشکرا کرد کە بە دزی و بردن لە عێراق براونەتە دەرەوە یان لە ناوخۆی وڵاتدا بوون زیاتر لە دوو ملیار دۆلاریش بڕیاری گەڕاندنەوەی دراوە.   موعتەز عەباسی، بەڕێوەبەری گشتی فەرمانگەی گەڕاندنەوەی پارەكان لە دەستەی دەستپاكی عێراق، رایگەیاند: كۆی ئەو پارە براو و دزراوانەی تا كۆتایی ساڵی ٢٠٢٠ گەڕێندراونەتەوە بۆ خەزێنەی دەوڵەت پێکهاتووە لە یەك ملیار و ٤١٧ ملیۆن و ٩٨٤ هەزار دۆلار و ٣٣ ملیۆن و ٥٨٢ هەزار و ٧٢٥ یۆرۆ، دوو ملیۆن و ٣٢٩ هەزار و ٥٢١ پاوەندی بەریتانی، ٩٥١ ملیار و ٤٢٨ ملیۆن و ٢٦٣ هەزار دیناری عێراقی و ٧٢٠ هەزار و ٥٢٩ دیناری ئوردنی و سێ هەزار و ٦٥٢ فرەنكی سویسری بووە. ئەو بە میدیای فەرمی عێراقی ڕایگەیاندووە، دەستەی دەستپاكی دەستیگرتووە بەسەر ١٤ خانوبەرە و پێنج پشكی كۆمپانیای جۆراوجۆردا. عەباسی وتوشیەتی: چوار ملیۆن و ١٧٠ هەزار دۆلاری دیکە لە دەرەوەی وڵات دەستی بەسەردا گیراوە و چاوەڕوانی گەڕاندنەوەیانین و كۆی ئەو پارانەش كە بڕیاری گەڕاندنەوەیان دراوە، دوو ملیار و ٢٠٠ ملیۆن دۆلارە.

هاوڵاتی وەزیری دەرەوەی ئەمریکا رایگەیاند:" واشنتن پشتگیری لە هیچ هەوڵێکی ئاساییکردنەوەی پەیوەندییەکان لەگەڵ حکومەتی سووریا ناکات، تاوەکو ئەو کاتەی چارەسەرێکی سیاسی بۆ قەیرانی ئەو وڵاتە دەدۆزرێتەوە".  ئەمڕۆ هەینی 15ی تشرینی یەکەمی 2021، بلینکن لەكۆنگرەیەكی ڕۆژنامەوانیدا  لەگەڵ وەزیرانی دەرەوەی ئیمارات و ئیسرائیل رایگەیاند:" ئەوان پاڵپشتییان لە هەوڵەکانی ئاساییکردنەوەی پەیوەندییەکان لەگەڵ حکومەتی سووریادا نەکردووە و لە داهاتووشدا نایکەن و هیچ سزایەکیشی لەسەر هەڵناگرن و هەڵوێستیشیان ناگۆڕن. وتەکانی ئەنتۆنی بلینکن، وەزیری دەرەوەی ئەمریکا لە کاتێکدان، ژمارەیەک لە وڵاتانی رۆژهەڵاتی نێوەڕاست کە هاوپەیمانی ئەمریکان هەوڵدەدەن پەیوەندیی ئابووری و دیپلۆماسی لەگەڵ دیمەشق دروستبکەنەوە.  لە کۆتایی مانگی ئەیلوولدا، ئوردن کە هاوپەیمانێکی بەهێزی واشنتنە، دەروازەی جابری سنووریی خۆی لەگەڵ سووریادا بەتەواوی کردەوە.  هەروەها رۆژی 3-10-2021 شا عەبدوڵڵا، پادشای ئوردن بۆ یەکەمجار دوای دەیەیەک، پەیوەندییەكی تەلەفۆنی لەگەڵ بەشار ئەسەد، سەرۆکی سووریا ئەنجامدا، دوای ئەوەی کە وەزیرانی دەرەوەی هەردوو وڵات چەند رۆژێک پێشتر لە پەراوێزی کۆبوونەوەی کۆمەڵەی گشتیی نەتەوە یەکگرتووەکان لە نیویۆرک کۆببوونەوە.  دوای دەستپێکردنی شەڕی ناوخۆی سووریا لە ساڵی 2011دا، شا عەبدوڵڵا داوای لە بەشار ئەسەد کرد واز لە پۆستەکەی بهێنێت و ئوردنیش بووە یەکێک لەو وڵاتانەی کە لە رێگەیەوە یارمەتی بۆ گرووپەکانی دژی ئەسەد دەنێردرا.ئەمریکا لە ساڵی 2012ەوە، پەیوەندییە دیپلۆماسییەکانی لەگەڵ سووریا هەڵپەساردووە.  بلینکن ئاماژەی بەوەدا کە لەم نۆ مانگەی رابردووی دەسەڵاتی ئیدارەی بایدندا واشنتن سەرنجی لەسەر زیادکردنی ناردنی یارمەتیی مرۆیی بۆ سووریا، بەردەوامیدان بە شەڕی دژی داعش و پێداگیرکردن لەسەر لێپرسینەوەی حکومەتەکەی بەشار ئەسەد بووە.  ئەمریکا سزای قەیسەری بەسەر حکومەتی سووریادا سەپاندووە کە ساڵی رابردوو بە ئامانجی زیادکردنی گوشار لەسەر بەشار ئەسەد، کەوتە بواری جێبەجێکردنەوە.

هاوڵاتی كۆمسیۆنی باڵای سەربەخۆی هەڵبژاردنەكان لەعیراق ئاشكرایكرد، لەئێستادا رێوشوێنی پێوستیان گرتووەتە بەر بۆ بەدواداچوونی ئەو سكاڵایانەی لەدەنگدانی تایبەت و گشتی ئەنجوومەنی نوێنەران بەدەستیان گەیشتووە. حەسەنێت لەیس، بەرپرسی بەشی سكاڵا لەكۆمسیۆن، ئەمڕۆ هەیینی ئاشكرایكرد، لەدەنگدانی تایبەت و گشتی 356 سكاڵایان بەدەست گەیشتووە، بەشێوەیەك 27 یان تایبەتن بە دەنگدانی تایبەت و 329 یان تایبەتن بەدەنگدانی گشتی. وتیشی، سكاڵاكان پۆلێن دەكرێن بۆ سوور، ئەویش ئەو سكاڵایانە دەگرێتەوە كەكاریگەریان لەسەر ئەنجامی هەڵبژاردنەكان دەبێت، لەگەڵ سكاڵای سەوز كەلەئێستادا  لێكۆڵینەوەیان لەسەر دەكرێت، هەر سكاڵایەكیش یەكلا بووەوە لەلایەن ئەنجوومەنی كۆمسیاران بڕیاری لەبارەوە دەدرێت. بەگوێرەی یاساكانی كۆمسیۆن، حەوت رۆژ دیاریكراوە بۆ پێداچوونەوە بە سكاڵاكان، دواتر لەماوەی 10 رۆژدا دەسەڵاتی دادوەری بڕیاری پێویستیان لەبارەوە دەدات، دواجار ئەنجامەكان رادەگەیەنرێن.

هاوڵاتی ئێران كەخاوەنی (18%)ی یەدەگی نەوتی جیهانە دەكەوێتە ریزبەندی سێیەم گەورەترین وڵاتی نەوتیی، بۆ دابینكردنی بڕی پێویستی بەنزین لەناوخۆی وڵاتەكەی ماوەی (15) ساڵ ئەو سوتەمەنییەی لەدەرەوە هاوردە كردووە، بەڵام سزا نێودەوڵەتییەكان وای كرد ببێتە یەكەم هەناردەكانی بەنزین لە رۆژهەڵاتی ناوەڕاست. ئێران تاساڵی (2018) ناچار بووە رۆژانە بڕی (27) ملیۆن تا (40) ملیۆن لیتر بەنزین لەدەرەوە بۆ وڵاتەكەی هاوردە بكات لەكاتێكدا لەناوخۆی وڵاتەكەشیدا بڕی زیاتر لە (52) ملیۆن لیتر بەنزینی بەرهەمهێناوە، بۆیە بۆ دابینكردنی بەنزینی پێویست بۆ وڵاتەكەی پەنای بۆ توركیا بردووە. ئاژانسی هەواڵی رۆیتەرز ئاشكرای كردووە لەساڵی (2020) سەرەڕای سزاكانی ئەمریكا، وڵاتی ئێران بەبەهای نزیكەی (20) ملیار دۆلار بەنزین و ماددەی پتڕۆكیمیایی لە رێگەی دەریاو وشكانییەوە رەوانەی وڵاتانی (پاكستان، ئەفغانستان، عێراق، ئیمارات) كردووە لەكاتێكدا بەرپرسانی ئێران تەنها دانیان بەوەدا ناوە كە تەنها بەبڕی سێ ملیار دۆلار بەنزین لە سنورە وشكانییەكانەوە بۆ وڵاتانی دراوسێ بەتایبەت عێراق و ئەفغانستان و پاكساتان رەوانە كراوە. رۆیتەر ئاماژەی بەوەكردوە ئێران بەبەرزكردنەوەی ئاستی پاڵاوگەكانی بەرهەمهێنانی بەنزینی بە رێژەی (600%) بەرز كردووەتەوە و بەوەش بووە بەیەكەم هەناردەكاری بەنزین لە رۆژهەڵاتی ناوەڕست و ئێران ئەوەی بەشۆڕشی بەنزین ناوەزەد كردووە كەوەرچەرخانێكی گەورەیە لەمێژووی وڵاتەكەیدا چونكە پێشتر بەهۆی قەیرانی بەنزین و گرانبوونی ئەو سوتەمەنییە سەرهەڵدان و ناڕەزایەتیی لەئێران سەریهەڵداو سەرەڕای گیانلەدەستدانی ژمارەیەك خۆپیشاندەر، دەسەڵاتی ئێرانی تالێواری هەڵدێر برد. بەپێی بەراوردەكان ئێران تاساڵی (2018) ناچاربووە ئەو بڕە بەنزینەی كەهاوردەی وڵاتەكەی كردووە بەنرخێكی هەرزانتر لەتێچووەكەی رادەستی هاووڵاتیانی بكات، بەڵام بەبەرزكردنەوەی ئاستی بەرهەمهێنانی بەنزین بە رادەیەك كەهەناردەی دەرەوەی بكات توانیویەتی داهاتی ناوخۆو دەرەوەی ساڵانەی بەهۆی بەنزینەوە كەپێشتر نەیبووە بگەیەنێتە زیاتر لە (23) ملیار دۆلارو ئەمەش بووەتە سەرچاوەیەكی گرنگی داهات بۆ حكومەتی وڵاتەكە. تڕەمپ و بەرهەمهێنانی بەنزین لەئێران دۆناڵد ترەمپ، سەرۆكی پێشوی ئەمەریكا لەساڵی (2018) رایگەیاند كە لە رێككەوتنی ئەتۆمیی ئێران و وڵاتانی (5+1) دەكشێتەوە و بەسەپاندنی سزای نوێ دژی تاران ئاستی هەناردەی نەوتی ئەو وڵاتە دەگەیەنێتە سفر، واتە رێگریی دەكات لەهەناردەكردنی نەوت و بەرهەمە نەوتییەكان، بەڵام ئەو هەڕەشەیەی ترەمپ بووە مایەی خێر بۆ ئێران، چونكە كۆماری ئیسلامی ئێران بۆ كەمكردنەوەی سزاكان و خۆدورخستنەوە لەكڕینی بەنزین بە تایبەت كە بەهای دراوی تمەن دابەزینی بەرچاوی بەخۆیەوە بینیبوو، بڕیاری دا ئاستی بەرهەمهێنانی بەنزین لە رۆژانە (59) ملیۆن لیترەوە بۆ رۆژانە (120) ملیۆن لیتر بەرزبكاتەوە واتە دوو هێندەی رابردوو. بەرپرسانی ئێران روونیان كردووەتەوە بە لەبەرچاوگرتنی سزاكانی ئەمەریكا و بەرزبوونەوەی ئاستی بەكارهێنانی بەنزین لەناوخۆی وڵاتەكەدا و بەرزبوونەوەی بەهای دۆلار ناچاربوون رۆژانە نزیكەی (40) ملیۆن لیتر بەنزین لەدەرەوە هاوردە بكەن، بەڵام بڕیاریان داوە بەبەرزكردنەوەی ئاستی پاڵاوگەكان بەتایبەت پاڵاوگەی (ستارەی خەلیجی فارس) كەپێشتر رۆژانە سێ ملیۆن لیتر بەنزینی بەرهەمهێناوە، بۆ (107) ملیۆن لیتر بەرزبكەنەوە و ئەمەش بەگەورەترین بازدان لەبەرهەمهێنانی بەنزین ئەژمار دەكرێت كە بۆ سوككردنی باری قورسی سزا نێودەوڵەتییەكان و سزاكانی ئەمەریكا ئەنجامدراوە. بەنزینی ئێران لەهەرێمی كوردستان و لوبنان و ڤەنزوێلا بەپێی ئامارەكان، هەرێمی كوردستان (80%)ی بەنزینەكەی لەوڵاتی ئێرانەوە هاوردە دەكرێت لەكاتێكدا بەنزین لەو وڵاتە نرخێكی زۆر هەرزانی هەیەو نرخی هەر لیترێكی ناگاتە (200) دینار، بەڵام ئەو بەنزینەی لەئێرانەوە رەوانەی هەرێم و عێراق دەكرێت و كواڵیتییەكەشی بەجیاوازییەكی زۆرە لەبەنزینی ناوخۆی ئەو وڵاتە كەمترە، نرخەكەی دەگاتە زیاتر لە (800) دینار بۆ هەر لیترێك. ئەو بەنزینەی ئێران لەناوخۆی وڵاتەكەیدا بەكاری دەهێنێت كوالێتییەكەی لەئاستی پێوەرەكانی ئەوروپادایە بۆ ژینگەو بزوێنەرەكانی ئۆتۆمبێل، شارەزایانی سوتەمەنی ئەو وڵاتە دەڵێن كوالێتیی بەنزینی ناوخۆی ئێران خاوەنی بڕوانامەی كوالێتیی و ستانداردی (یۆرۆ4) و (یۆرۆ 5)ە. ئێران كەخاوەنی هەرزانترین بەنزینە لەجیهاندا لەماوەی رابردوو ئاستی هەناردەكردنی بەنزینەكەی بەشێوەیەكی بەرچاو كەمكردووەتەوە و ئەوەش كاریگەریی هەبووە لەسەر بەرزبوونەوەی نرخی سوتەمەنی لەهەرێمی كوردستان. لەمانگی نیسانی ئەمساڵەوە نرخی بەنزین لەهەرێمی كوردستان بەبەردەوامی لەبەرزبوونەوەدا بووە بەجۆرێك نزخی هەرلیترێك بەنزینی نۆرماڵ گەیشتووەتە (700) بۆ (800)دینارو هۆكارەكانی ئەو بەرزبوونەوەی نرخەش دەگەڕێتەوە بۆ بڕیارەكانی حكومەتی هەرێمی كوردستان و كەمبوونەوەی ئاستی هەناردەی بەنزین لەلایەن ئێرانەوە، چونكە ئەو وڵاتە ئاستی هەناردەی رۆژانەی بەنزینی خۆی لە (160) هەزار بەرمیلەوە بۆ هەشت هەزار بەرمیل كەمكردووەتەوە. نەسرەتوڵا سەیفی، راوێژكاری وزەی ژووری بازرگانیی ئێران لەلێدوانێكدا بۆ ئاژانسی هەواڵی كاری ئێران (ئیلنا) رایگەیاندووە ئەزموونی وڵاتەكە ئەوە دەردەخات كە هەموو ساڵێك لەوەرزی سەرماو زستاندا ئاستی توانای پاڵاوگەكانی ئێران دادەبەزێت و ئەوەش وا دەكات بەرهەمهێنانی بەنزین بەشێوەیەكی بەرچاو كەم بكات، چونكە ئاستی هەناردەی بەنزین لە (1/4/2021) زیاتر لەیەك ملیۆن (174) تۆن بەنزین بووە، بەڵام ئەو بڕە لە (1/10/2020) بووە بە سفرو نەتوانراوە بەردەوامیی بەهەناردەكردنی بەنزین بدرێت. لەگەڵ ئەوەی بەرپرسانی ئێران ئاستی هەناردەی بەنزینی وڵاتەكەیان بە روونی ئاشكرا ناكەن بەڵام لەمانگی (9)ی ئەمساڵدا سایتی ناشناڵ نیوز (thenationalnews) ئاشكرای كرد كە كەشتییەكی گەورەی ئێران بڕی (33) هەزار تۆن بەنزینی لە رێگەی بەندەری بانیاس لەسوریاوە بۆ لوبنان گواستوەتە وەك هاوكاریی كۆماری ئیسلامی ئێران بۆ حزبوڵای لوبنان. بەپێی پێوانە جیهانییەكان هەر تۆنێك بەنزین هەزارو (351) لیترەو ئەو (33) تۆن بەنزینەی كەئێران بۆ لوبنانی ناردووە دەكاتە (44) ملیۆن و (583) هەزار لیتر كەدەبێتە یەك لەسەر سێی ئەو بڕە بەنزینەی كەئێران رۆژانە هەناردەی دەكات، بۆیە دوور نییە ئێران لەجیاتی هەناردەی بەنزین بۆ هەرێم، یارمەتیی حزبوڵڵای لوبنان بدات بۆ چارەسەریی قەیرانی سوتەمەنی لەو وڵاتە بەتایبەت كە حزبوڵڵا گەورەترین هاوپەیمانی كۆماری ئیسلامی ئێرانە. ئێران دوای وڵاتی ڤەنزوێلا خاوەنی هەرزانترین بەنزینە لەجیهاندا كەنرخی هەر لیترێكی دەگاتە (10) سەنت، بەڵام ئەو وڵاتە تاساڵی (2019) بۆ دابینكردنی بەنزین پشتی بەوڵاتی توركیاو چەند وڵاتێكی دیكە بەستوەو توانیویەتی لەكۆتایی ئەو ساڵەدا ئاستی بەرهەمهێنانی بەنزینی بە رێژەی 620٪ بەرزبكاتەوە و سەرەڕای دابینكردنی بەنزینی ناوخۆی وڵاتەكە،  بەنزینەكەی بۆ وڵاتانی عێراق، پاكستان ، ڤەنزوێلاو ئیمارات و ئەفغانستان و پاكستان هەناردە دەكات و بەیەكەم هەناردەكاری بەنزین لە رۆژهەڵاتی ناوەڕاست لەقەڵەمدرا. ئەگەرچی ئێران لە رووی بەرهەمهێنانەوە بەسێیەم وڵاتی نەوتیی جیهان ئەژمار دەكرێت، بەڵام ئەو وڵاتە لەماوەی (15) ساڵدا رۆژانە (27) ملیۆن لیتر تانزیكەی (40) بەنزینی بۆ دابینكردنی سوتەمەنی، لەوڵاتانەوە بەتایبەت لەتوركیاوە هاوردە كردووە. بەكار‌هێنانی رۆژانەی بەنزین لەئێران دەگاتە رۆژانە (85) بۆ(86) ملیۆن لیتر لەكاتێكدا سیستمی سوتەمەنی بزوێنەری زۆربەی ئۆتۆمبێلەكانی ئەو وڵاتە بۆ بەكارهێنانی غاز رێكخراوەو بەرپرسانی سوتەمەنیی لەئێران ئاماژەیان بەوە كردووە، ئاستی بەكارهێنانی سوتەمەنی و بەتایبەت بەنزین لەسەردەمی سەرهەڵدانی كۆرۆناوە كەمی كردووە،  بەڵام پێشتر رۆژانە (115) ملیۆن لیتر بەنزین بەكاردەهێنرا، بۆیە ئاستی هەناردەی بەنزین لەسەردەمی كۆرۆنادا بۆ هەشت هێندەی رابردوو بەرزبووەوە. ئێران لەساڵی رابردوودا بەبەهای دوو ملیارو (900) ملیۆن دۆلار بەنزینی بۆ وڵاتانی دەرەوە، بەتایبەت عێراق و هەرێمی كوردستان رەوانە كردووە، بەڵام  لە چوار مانگی ئەمساڵدا تەنها بەبەهای (700) ملیۆن دۆلار بەنزینی رەوانەی دەرەوەی وڵاتەكەی كردووە لەكاتێكدا نرخی بەنزین بۆ دوو هێندە بەرزبووەتەوەو ئەوەش ئاماژەیە كەبڕی هەناردەی بەنزینی ئێران بۆ وڵاتانی دەرەوە زۆر كەمی كردووە. سایتی ئارگۆس كە تایبەتە بەبڵاوكردنەوەی هەواڵەكان و شیكارییەكانی نەوت و سوتەمەنی لەبازاڕەكانی جیهان ئاشكرای كردووە ساڵی (2020) ئاستی هەناردەی بەنزینی ئێران حەوت ملیۆن و (800)هەزار تۆن بووە كە دەكاتە(160) هەزار بەرمیل لە رۆژێكدا بەڵام ئەو بڕە لەمانگی تەمموزی ئەمساڵەوە بۆ رۆژانە هەشت هەزار بەرمیل دابەزیوە. گومان دەكرێت ئێران دوور لەچاوی ئەمەریكاو وڵاتانی جیهان بەشێوەیەكی نهێنی بڕێكی بەرچاو لەبەنزینی بەرهەمهێنراوی وڵاتەكەی رەوانەی لوبنان و ڤەنزوێلا بكات بەتایبەت كە ئەو دوو وڵاتە لەقەیرانی قوڵی سوتەمەنیدان و ئەمریكاش ئێران تۆمەتبار دەكات كە بەهۆی هەناردەكردنی سوتەمەنی بۆ ئەو دوو وڵاتە دەبێتە هۆی سەپاندنی سزای زیاتر لەلایەن واشنتۆنەوە بەرامبەر حزبوڵڵای لوبنان و دەسەڵاتدارانی ڤەنزوێلا. راگرتنی هەناردەی بەنزین و گازئۆیل لەئێرانەوە لەماوەی رابردوودا هەواڵێك لە میدیاكانی ئێران بڵاوبووەوە كە بەپێی فەرمانێكی نووسراوی عەباس میرزایی، جێگری بەرێوەبەری هەناردەو هاوردەی سوتەمەنیی كۆماری ئیسلامی ئێران؛ هەناردەی سوتەمەنی لە رێگەی وشكانییەوە بۆ ماوەیەكی كاتی رادەگیرێت و هەواڵەكەش لە میدیاكانی هەرێمی كوردستان بەو شێوەیە بڵاو كرایەوە كە هەناردەی سوتەمەنی بەتایبەت بەنزین لەئێرانەوە بۆ هەرێم رداگیرێت و قەیرانی بەنزین روو لەهەرێمی كوردستان دەكاتەوە، لەكاتێكدا بەپێی ئەو نووسراوە « راگرتنی هەناردەی سوتەمەنی لە رێگەی سنورە وشكانییەكانەوە بەتەواوەتی چاوەڕەوان نەكراوە» واتە دوای ماوەیەكی كاتی هەناردەكردنی سوتەمەنی بەردەوام دەبێت و لەبەشێكی دیكەدا روون كراوەتەوە بەهۆی بەرزبوونەوەی ئاستی خواستی بەنزین لەناوخۆی ئێران پێویستە لە سێ رۆژی داهاتوودا بەرپرسان بەهەماهەنگی و رێكخستنەوەی ئاستی خواست و بەكارهێنان و هەناردەكردنی سوتەمەنی چارەسەری دۆخەكە بكرێت. لەو نووسراوەدا كە لە رێككەوتی (30/9/2021) دەرچووە ئاماژە بەوە كراوە لەماوەی سێ رۆژی دوای كۆبوونەوەی بەرپرسان لەسەر چۆنیەتی هەناردەی سوتەمەنی بەتایبەت بەنزین بڕیارو رێكاری نوێ رادەگەیەنرێت ئەمەش ئاماژەیە كە فەرمانەكە بەشێوەیەكی كاتییە ئەگەرچی قەیرانی گرانبوونی بەنزین لەهەرێمی كوردستان لەمانگی نیسانەوە بەردەوامەو تائێستاش چارەسەر نەكراوە بەڵام هۆكارە سەرەكییەكانی گرانبوونی بەنزین یان قەیرانی سوتەمەنی ناگەڕێتەوە بۆ ئەم بڕیارەو فەرمانەكانی بەرپرسانی سوتەمەنی ئێران سەبارەت بە هەناردەكردنی بەنزین.  ئێران بەهۆی ئەو سزا نێودەوڵەتییانەی لەسەریەتی ناچارە بۆ دەستخستنی داهات و قەرەبووكردنەوەی كورتهێنانی بودجەی وڵاتەكەی بەردەوام بێت لەفرۆشتنی سوتەمەنی بۆ وڵاتانی دراوسێ بەتایبەت كەسنورێكی هاوبەشی زۆری وشكانیی هەیە بۆیە پێناچێت ئەو وڵاتە دەستبەرداری فرۆشتنی بەنزین بێت، چونكە ئاستی بەرهەمهێنانی لەزۆربەی پاڵاوگەكانی خۆی بەرزكردووەتەوە ئەویش لەپێناوی تێپەڕاندن و سوككردنی باری قورسی سزاكانی ئەمەریكا لەدژی وڵاتەكەی.

هاوڵاتی فه‌رمانگه‌ی میدیا و زانیاری حكومه‌تی هه‌رێمی كوردستان رایگەیاند، بڕیاردرا بە خەرجكردنی زیاتر لە 15 ملیار دینار بۆ جێبەجێكردنی چەند پڕۆژەیەك لە سێكتەرە جیاجیاكان لە ئیدارەی گەرمیان. ئەمڕۆ هەینی 15ی تشرینی یەکەمی 2021، لە راگەیەندراوێكدا فه‌رمانگه‌ی میدیا و زانیاری حكومه‌تی هه‌رێمی كوردستان بڵاویکردەووە،" له‌ چوارچێوه‌ی بەرژەوەندی گشتی و جێبه‌جێكردنی كارنامه‌ی كابینه‌ی نۆیه‌می حكومه‌تی هه‌رێمی كوردستان و به‌ مه‌به‌ستی گه‌یاندنی خزمه‌تگوزاری بۆ هاوڵاتیانی كوردستان. لە ڕاگەیاندراوەکەدا ئەوەش هاتووە، ''مه‌سرور بارزانی، سه‌رۆكی حكومه‌تی هه‌رێمی كوردستان بڕیاری دا به‌ ته‌رخانكردن و خه‌رجكردنی گوژمه‌ی 15 ملیارو 826 ملیۆن دینار بۆ جێبه‌جێكردنی چه‌ندین پڕۆژه‌ له‌ سێكته‌ره‌ جیاجیاكانی (ڕێگه‌وبان، ئاو، ته‌ندروستی، شاره‌وانیه‌كان، په‌روه‌رده، ئاودێری، كاره‌با وئاوەدانکردنەوە)، له‌ ئیداره‌ی گه‌رمیان." ئەوەشخراوەتەڕوو، "ئه‌م بڕه‌ پاره‌یه‌ به‌شێوه‌ی نه‌ختینه‌و قۆناغ به‌ قۆناغ له‌سه‌ر بودجه‌ی وه‌به‌رهێنانی ئیداره‌ی گه‌رمیان خه‌رج ده‌كرێت."

هاوڵاتی پارتی بە دەنگی دانیشتووانی کوردی زوممار و ناوچەکانی دیکەی قەزای تەلەعفەر، توانی لە بازنەی چواری نەینەوا کورسییەک بەدەستبێنێت.  شارۆچکەی زوممار سەر بە قەزای تەلەعفەرە و یەکێکە لەو شوێنانەی کە دەکەوێتە سنووری مادەی 140. زوممار لەنێوان باشووری کوردستان و رۆژئاوای کوردستانە ، زیاتر لە 110 هەزار کەس تێیدا نیشتەجێن و زۆرینەیان کوردن. لەئێستادا كۆمسیۆن سەرقاڵی ژماردنەوەی دەستی دەنگەكانە، لەكاتێ:دا ئەنماجی بەرایی هەڵبژاردنی پەرلەمانی عێراقی راگەیاندووە و زۆربەی لایەنەكان رەخنەیان لە ئەنجامەكان هەیە.

هاوڵاتی ئەندامێکی وەفدێكی چاودێریی یەکگرتووی ئیسلامی کوردستان لە بەغدا رایگەیاند:" کێشەی کورسییەکەی زاخۆ لە بەرژەوەندی یەکگرتوو یەکلابوویەوە و عومەر کۆچەر سەرکەوتنی بەدەستهێنا". لە بازنەی دووەمی دهۆک کە زاخۆیە، سەگڤان یوسف، كاندیدی پارتی دیموکراتی کوردستان بە پلەی یەکەم سەرکەوتووە، بەڵام لەسەر پلەی دووەم، رکابەرییەکی تووند لەنێوان عەبدولواحید ئەحمەد، كاندیدی پارتی و عومەر کۆچەر، كاندیدی سەربەخۆ (یەکگرتوو پاڵپشتی دەکات) هەیە. موسەننا ئەمین، كاندیدی سەرکەوتووی یەکگرتوو و ئەندامی وەفدی چاودێریی ژماردنەوەی دەنگەکان لە بەغدا لە فەیسبووکی خۆی نووسیویەتی: "کێشەی کورسییەکەی زاخۆ لە بەرژەوەندیی یەکگرتوو یەکلابوویەوە و دوای ژماردنی 88 سندووق کە کێشەی تێدا بوو دەرنجام، كاندیدەکەی یەکگرتوو سەرکەوت". بەوتەی موسەننا ئەمین ئەنجامەکان بەمشێوەن کە عومەر کۆچەر 4 هەزار و 36 دەنگ، عەبدولواحید ئەحمەد سلێڤانەیی 3 هەزار و 53 دەنگ و جیاوازییەکانیان 936 دەنگە.