.jpg)
هاوڵاتی ئەندامێکی پێشووی ئەنجومەنی نوێنەرانی عێراق دەڵێت:"بڕیاری دادگای فیدڕاڵی لە بارەی نەوت و گازە دەبێت ببێتە ھۆی یەکخستنی لایەنە کوردیەکان و ھۆکاری بەھێزبوونیان". ئەمڕۆ چوارشەممە 16ی شوباتی 2022، بڵێسە جەبار فەرمان ئەندامی پێشووی ئەنجومەنی نوێنەرانی عێراق و هاوکات ئەندامی سەرکردایەتی یەکێتیی نیشتیمانی لەبارەی بڕیارەکەی دادگای فیدڕاڵیەوە لە لاپەڕەی خۆی لەفەیسبوک نوسیویەتی، ''بڕیارەکەی دادگای فیدراڵی وادەکات ببێتە ھۆی یەکخستنی لایەنە کوردیەکان و ھۆکاری بەھێزبوونیان و بە سیاسەتی ئابوری دا چونەوە، نەک ببێتە ھۆی تاوانبارکردنی یەکتری و تھدیدکردن و دژایەتی زیاتر و لاوازکردنی زیاتری ھەرێم.'' ئاماژەی بۆ ئەوەشکردووە، ''بە تەھدید و دژایەتی یەکتری ھیچ بەرھەم ناھێنین، کاتێتی پێداچونەوە بە تێکرای حکومرانی ھەرێم دا بکەینەوە و پێکەوە ڕێگری لە ھەڵوەشاندنەوەی ھەرێم بکەین.'' دوێنێ سێشەممە دادگای فیدراڵی عێراق ڕایگەیاند، ''بڕیاردراوە بە نادەستووری بوونی یاسای نەوت و گازی هەرێمی كوردستان و پابه‌ند ده‌كرێن به راده‌ستكردنی ته‌واوی داهاته‌كانی پەیوەست بە نه‌وت به به‌غدا.'' لە بڕیارەکەى دادگاى فیدڕاڵیدا ئەوەش هاتووە، ''حكومه‌تی هه‌رێمی كوردستان پابه‌ند كراوه كه وه‌زاره‌تی نه‌وت و دیوانی چاودێری دارایی عێراق چاودێری ته‌واوی گرێبه‌سته‌كانی فرۆشتنی نه‌وت و گاز بكه‌ن.''
عەمار عەزیز. دهۆك ئەحلام ئەمین ، كچێكی ئاوارەی ئێزیدییە لەپێناو دابینكردنی بژێوی ژیانی خێزانەكەی وازی لە خوێندن هێناوەو لە دوكانێكی گەص فرۆشیدا كار دەكات. ئەحلام ئەمین تەمەن 17 ساڵ ، پێنج خوشك و برایەكی هەیە لەلێدوانێكدا بۆ هاوڵاتی ئاماژەی بەوەكرد لە 2014 كاتێك ئاوارەی پارێزگای دهۆك بوون خانوویان بە كرێ گرتووەو مانگانە 150 هەزار دینار دەدەن، هەروەها وتیشی:" لە 2014 لە پۆلی شەشی سەرەتایی بووم، لەبەر داعش نەمتوانی هەموو تاقیكردنەوەكان بكەم ، كە هاتمە دهۆك جارێكی تر چوومە پۆلی شەشی سەرەتایی ئینجا بەردەوامیم دا خوێندن، بەڵام لەبەر خراپی دۆخی ئابووریمان وازم لە خوێندن هێناوەو حەزمكرد ئیشێك بكەم تا داهاتێك بۆخۆم و خێزانەكەم دابین بكەم". ناوبراو ئەوەشی خستەروو كە زۆر بەدوای كاردا گەراوەو لەگەڵ رێكخراوە نا حكومییەكان گفتوگۆی كردووە، بەڵام دواینجار بڕیار دەدات وەك كرێكارێك لە چێشتخانەیەك لەناو كەمپی شاریا كار بكات، ئەحلام وتی:" ماوەی شەش مانگە لە چێشتخانەیەكی ناوەندی كۆمەڵگای شاریا بوومە كرێكار، سەرەتا كرێی رۆژانەم 10 هەزار دینار بوو دواتر بووە بە 15 هەزار دینار". ئەحلام رۆژانە لە كاتژمێر 7و نیوی بەیانی تا 10 شەو لەو چێشتخانەیەدا كار دەكات" ڕاستە ماوەكەی زۆرە و پارەكە زۆر كەمە، بەڵام چی بەكەم هیچ ئیشی تر نیە بیكەم، ئەو بڕەیەی لەو كارە دەستم دەكەوێت بەشێكی بۆ خێزانەكەم خەرج دەكەمەوە " . ئەو كچە ئێزیدیە پێشیوابوو كە ئیشكردن هیچ عەیبی نیە" ڕاستە بۆ ژن تاڕادەیەك قورسە، بەڵام ئێستا كۆمەڵگا گوڕاوە شتێكی ئاسایی یە ژنیش وەكو پیاو كاربكات". ئەحلام لە دوكانی گەص فرۆشییەكەدا لەفەی مریشك و فەلافل و گەص ئامادە دەكات وەك دەڵێت:" رۆژانە سەد لەفەیەك دەفرۆشین و گرنگی زۆر بە پاك و خاوێنی دەدەین و زۆر كەس سەردانمان دەكات".
هاوڵاتی بەڕێوەبەرایەتی هاتوچۆی پارێزگای سلێمانی ئاگاداری ئەو شۆفێرانەی پاس دەکات کە کاری گواستنەوەی خوێندکاران دەکەن و چەند مەرجێکیان بۆ دیاری دەکات بۆ کارکردن. ئەمڕۆ چوارشەممە 16ی شوباتی 2022، بەڕێوەبەرایەتی هاتوچۆی پارێزگای سلێمانی ئاگاداری سەرجەم ناوەندی قوتابخانە و باخچەی ساوایان و دایەنگەکانی سنووری پارێزگای سلێمانی دەکات، ئەو پاسانەی کە کاری گواستنەوەی خوێندکار و قوتابی و منداڵان دەکات، پێویستە پابەند بن بەم خاڵانەی لای خوارەوە: -پێویستە بەپێی ژمارەی کوشنی ناو ئەو پاسانە نەفەر سەربخەن، بەپێی یاسای هاتوچۆ سەرخستنی نەفەری زیادە قەدەغەیە. -پێویستە هەموو پاسێک چاودێرێکی سەر بە ئیدارەی ئەو شوێنە کە پاسەکە کاری بۆ دەکات تیایدا بێت، ڕۆڵی ئەو چاودێرە ئەوەیە کە رێگە نەدات بەو شۆفێرە سەرکێشی و تیژڕەوی و بەکارهێنانی مۆبایل و رۆیشتن بە پێچەوانەی ئاڕاستە و پێچکردنەوە لە شوێنی قەدەغە یاخود گۆرانی و ئاوازێک بە دەنگێکی بەرز بە چەشنێک دابنێت کە ببێتە مایەی نەهێشتنی ئارامی سەرنشینانی ناو پاسەکە یاخود هەر سەرپێچییەکی دیکە بکات، بە پێچەوانەوە ئاگاداری ئیدارەی خۆی بکات لە رەفتاری ئەو شۆفێرە کە دەبێتە مایەی مەترسی رووداو و کارەساتی هاتوچۆیی نەخوازراو. -داواکارین لەو شۆفێرانەی کە ئەم ئاگادارییە دەیانگرێتەوە زیاتر هەست بە بەرپرسیاریەتی سەلامەتی سەرنشینی ناو پاسەکانیان بکەن و ئاگاداریان دەکەین کە رەفتارەکانیان لە کاتی سەرپێچی کردندا بە پێی یاسا و رێنماییەکانی هاتوچۆ لێپێچینەوە و لێپرسینەوەیان لەگەڵ دەکرێت و چاوپۆشی لە هیچ کەس و لە ژێر هەر پاساوێک ناکرێت. بەڕێوەبەرایەتی هاتوچۆی سلێمانی دەشڵێت، بە وردی چاودێری ئەم پرسە دەکەن. هاتوچۆ دەڵێت، لەکاتی هەبوونی هەر جۆرە سەرپێچییەک لەو پاسانەی کە ئەم ئاگادارییە دەیانگرێتەوە هاوڵاتییان دەتوانن پەیوەندی بکەن بە: کۆنترۆڵی هاتووچۆی سلێمانی ژمارە (188) هێڵی گەرمی سەنتەری هەماهەنگی پەیوەندییەکان – سلێمانی PJCCژمارە (100)
هاوڵاتی كۆمپانیاكانى دابینكردنى ده‌رمان بۆ فه‌رمانگه‌ى ته‌ندروستى سلێمانى خۆپیشاندانێكیان ئه‌نجامداو ڕایانگه‌یاند، وه‌زاره‌تى دارایی دواى ئه‌نجامدانى گرێبه‌ست ڕێنمایی داراییان ده‌ركردوه‌و به‌و ڕێنماییانه‌ش پاره‌یان پێنه‌دراوه، جه‌ختیشده‌كه‌نه‌وه، "ئێمه‌ش له‌مڕۆوه ده‌رمان بۆ ته‌ندروستى دابین ناكه‌ین". كۆمپانیاكانى دابینكردنى ده‌رمان له‌سلێمانى له‌كۆنگره‌یه‌كى ڕۆژنامه‌وانیدا كه په‌یامنێرى شارپرێس ئاماده‌یبوو بڕیاریاندا، له‌مڕۆ چوارشه‌ممه‌وه هیچ ده‌رمانێك بۆ فه‌رمانگه‌ى ته‌ندروستى سلێمانى‌و سنورى پارێزگاى سلێمانى‌و هه‌ڵه‌بجه دابین نه‌كه‌ن. كۆمپانیاكان ئه‌وه‌شیان ڕاگه‌یاند، ئێستا حكومه‌تى هه‌رێم 20 ملیار دینار قه‌رزاریانه‌و چونه‌ته بانك، له‌وێ پێیانوتراوه پاره هه‌یه، به‌ڵام وه‌زاره‌تى دارایی بڕیاریداوه پاره‌كه‌یان به 55 مانگ بۆ خه‌رجبكرێت‌و ئێستا ئه‌وه‌شیان پێنادرێت. زیاتر له‌سێ مانگه كێشه‌ى كه‌مى‌و نه‌بونى ده‌رمان له‌فه‌رمانگه‌ى ته‌ندروستى سلێمانى‌و سنورى پارێزگاى سلێمانى‌و هه‌ڵه‌بجه سه‌ریهه‌ڵداوه‌و حكومه‌ت‌و وه‌زاره‌تى ته‌ندروستى هیچ هه‌ڵوێستێكیان نه‌بوه.
سازدانی: ئارا ئیبراهیم ئەندامێكی خولی پێشووی پەرلەمانی عێراق دەڵێت جوڵاندنی دۆسییەی هەناردەكردنی نەوتی هەرێم لەلایەن دادگای فیدراڵییەوە جانبێكی سیاسی هەیەو پەیوەندی بەئاڵۆزییەكانی پرسی سەرۆك كۆمارو پێكهێكانی حكومەتەوە هەیە. ئەحمەد حاجی رەشید، ئەندامی خولی پێشووی كۆمەڵی دادگەری لەلیژنەی دارایی عێراق لەم چاوپێكەوتنەیدا زۆر بە راشكاوی لەبارەی جوڵاندنی سكاڵاكەی دادگای فیدراڵی قسە دەكات و دەشڵێت:» جوڵاندنی ئەم سكاڵایە لەم كاتەدا دادگای فیدراڵی شەرعییەتی بۆ دۆزیوەتەوە، ئەگینا لەیاسای بودجەی 2021دا تاكە بڕگە كە رێگە دەدات هەرێمی كوردستان خۆی نەوت هەناردە بكات و بیفرۆشێت جێگیركراو تێپەڕێندرا، بەڕەزامەندی هەماهەنگی شیعەكان بوو، بۆیە كەسیش سكاڵای نەكردو یاساكەی نەبردە دادگای فیدراڵی». هاوڵاتی: بڕیارەكەی دادگای فیدراڵی لەم كاتەدا كەتایبەتە بەنەوت و غازی هەرێم بۆچی؟ تاچەند پەیوەندی بەئاڵۆزییە سیاسییەكانەوە هەیە؟ ئەحمەد حاجی رەشید: ئەم بڕیارەی دادگای فیدراڵی تەنها بڕیارێك نییەو سێ سكاڵایە، سكاڵایەكیان وەزیری نەوتی عێراق لەدژی وەزیری سەرچاوە سروشتییەكانی هەرێم كردوویەتی، سكاڵایەكی دیكەیان ئەندامێكی پەرلەمانی عێراق بەناوی عەلی شەداد فارس لەدژی پەرلەمانی كوردستان كردوویەتی كە یاساو نەوت و غازیان دەرچواندووە، سکاڵای سێیەمیان لەساڵی 2014 كراوە لەدژی حكومەتی توركیا كردوویەتی كەنەوتی لەهەرێمی كوردستان كڕیوە بەبێ رەزامەندی وەرگرتن لەحكومەتی ئیتحادی عێراق. لەمێژووی سكاڵاكەوە كە لە 2012 تا 2022 لەجەكمەجی دادگای ئیتحادیدایەو جارێك دێتەوە سەر شاشەو جارێكی دیكە ونی دەكەن. كاتی خۆی لەگەڵ هەردوو هاوڕێی بەرێزم كاك وشیار عەبدوڵاو كاك سەركەوت شەمسەدین، سەردانێكی دادگای ئیتحادیمان كرد لەنزیكەوە چاومان كەوت بەهەموو دادوەرەكان، بەتایبەت میدحەت مەحمود، پرسیارێكمان ئاراستە كرد كە ئەو سكاڵایانە چۆنەو بۆچی ناوبەناو باسی دەكەن و دواتر ونی دەكەن، زۆر بە راشكاوی پێی وتین كە «ئەم سكاڵایانە زۆرجار كە هەرێم و عێراق نزیكدەبنەوە لەیەك پێمان دەڵێن كە سكاڵاكە بوەستێنن و كە ئاڵۆزی دروست دەبێت پێمان دەڵێن بیجوڵێنن»، بۆیە ئەم جوڵاندنی سكاڵایانە لەم كاتەدا لەلایەن دادگای ئیتحادییەوە چەند جانبە یاساییەكە لەخۆی دەگرێت، ئەوەندەش مەسجێكی سیاسییە بۆ ئەو ململانێیەی كەهەیە لەسەرۆك كۆمارو پێكهێنانی حكومەت و دەرئەنجامی هەڵبژاردنەكان، جانبێكی سیاسی وازحی هەیە، لەڕووی یاساییەوە هەر سكاڵایەك بچێتە دادگای ئیتحادی دواجار دەبێت یەكلایبكرێتەوەو مولزەمە وەڵامبداتەوەو نابێت واز لەو سكاڵایانە بهێنێت. هاوڵاتی: جوڵاندنی لەڕووی سیاسییەوە تا چەند پەیوەندی بەهاوپەیمانێتی نێوان لایەنە جیاوازەكانەوە هەیە؟ ئەحمەد حاجی رەشید: بەتەئكید پەیوەندی راستەوخۆی بەپرسی سەرۆك كۆمارو پەیوەندی راستەوخۆی هەیە بەو حلفەی كە پارتی و سوننەكان و سەدر دروستیان كردووە، زۆر بەڕاشكاوی ئەمە بەشێكە لەوە بەداخەوە برادەرانی پارتی دیموكراتی كوردستان بەبێ خوێندنەوەی واقعەكەو بەبێ ئەوەی بزانن چ لەزمەیەك دەدەن بەدەستەوە پارتی نوێنەرایەتی هەموو كورد ناكات و دواجار دەچێتە ناو هاوپەیمانێتییەكی سێ لایەنییەوە كە لەبەرانبەردا ئەم دۆسییانە دەجوڵێندرێت و دواتر باجەكەی خەڵكی هەرێمی كوردستان دەیدات. هاوڵاتی: بەڵام پارتی باس لەوە دەكات كە دادگای فیدراڵی بێلایەن نییەو نزیكە لەئێران و خودی نوری مالكی كە لەناو چوارچێوەی هەماهەنگی شیعەكان لەبەرەیەكدان دژ بە بەرەكەی سەدرو بارزانی و حەلبوسی؟ ئەحمەد حاجی رەشید: ئەگەر سەیری دادگای فیدراڵی بكەین لەسەرەتای ئەم كێشانەوە سێ سكاڵای هەماهەنگی شیعەكان (ئیتاری تەنسیقی) رەتكردووەتەوە لەدەرئەنجامی هەڵبژاردنەكان، لەمەسەلەی دانیشتنی پەرلەمان، كەواتە دادگای باڵا ئەو دۆسییانەی دەچێتە بەردەستی تەعامول لەگەڵ ناوەرۆكەكەی دەكات، ئەگەر وابووایە بەئیمتیاز ئەوا هەر لەسەرەتاوە دەرئەنجامی هەڵبژاردنەكان قبوڵ نەدەكرا لەكاتێكدا ئەو بەڵگانەی درانە دادگای فیدراڵی لەبارەی تەزویراتەوە، كە كەم كەس هەبوو دەیویت دەرئەنجامەكان قبوڵ دەكات، بەڵام قبوڵیشی كردو كۆبوونەوەی پەرلەمانی بەڕێكرد، كە باسم جەسام لەهەماهەنگی شیعەكان سكاڵای كردبوو تانەكەی قبوڵ نەكرا. گرفتێك لەعێراقدا هەیە ئەگەر دادگای فیدراڵی سكاڵایەكی یەكلایكردەوە لەزیانی هەر كەس بوو ئەوا دەڵێن دادگای فیدراڵی سەر بەفڵان دەوڵەتە، ئەگەر لەبەرژەوەندیدا بوو دەڵێن دادگایەكی میهەنییە. ناتوانین بڵێین دادگای فیدراڵی سەر بەهیچ لایەنێك نییە، بەڵام ئەوەمان لەبیر نەچێت كە دادگای فیدراڵی لەزۆربەی وڵاتان لەئاڵۆزییە سیاسسیەكانی زۆر وڵاتدا تەدەخول دەكات، بۆیە ئەوە جەمبەیەكی سیاسی تێدایە كە ئەمەیان یەكێكە لەو جەمبە سیاسییانەی دیكە. هاوڵاتی: پارتی رێبەر ئەحمەد-یان كاندید كردووە بۆ پۆستی سەرۆك كۆمار، لەبەرانبەر بەرهەم ساڵح كە كاندیدی یەكێتییە، پێتانوایە ئەگەر ئەم دوولایەنە نەگەنە رێككەوتن پرسی ناردنی 200 ملیار دینارەكە كێشەی تێدەكەوێت؟ ئەحمەد حاجی رەشید: مەسەلەی ناردنی 200 ملیار دیناری مانگانە كە لەبەغداوە رەوانەی هەرێم دەكرێت پەیوەندی بەخودی مستەفا كازمییەوە هەیە، تا ئەو بەتەمای ئەوە بێت بكرێتەوە بەسەرۆك وەزیران مەگەر لەحاڵەتێكدا ترسی ئەوەی هەبێت كە لەدادگای فیدراڵی سكاڵای لەسەر تۆمار بكرێت، ئەگینا بەیاسا تەحدید نەكرێت لەبودجەدا ناردنی 200 ملیارەكە لەلایەن مستەفا كازمییەوە بەردەوام دەبێت. سەبارەت بە رێبەر ئەحمەد كەكاندیدی پارتی دیموكراتی كوردستانە بابزانین ئایا كردنەوەی بابی دەرگای خۆپاڵاوتن دادگای فیدراڵی چی لەبارەوە دەڵێت، تەبعەن موخالەفەی یاسای ژمارە 8ی ساڵی 2012 یە كە بۆ خۆم گوێم لەسەرۆكی فراكسیۆنی پارتی بووەو ئەو بڕیاری كردنەوەی دەرگای خۆپاڵاوتنە نایاساییە، بەڵام دەبێت سەیری جانبە سیاسییەكە بكرێت ئایا مەحكەمەی ئیتحادی قوفڵ لەو مەسەلەیە دەدات بۆ ئەوەی عێراق. تائێستا ململانێیەك لەنێوان پارتی و یەكێتی هەیە كە نەشاراوەیە كەئایا هێزەكانی هاوپەیمانی سەدرو سوننەكان و بارزانی توانای ئەوەیان هەیە 180 ئەندام پەرلەمان كۆبكەنەوەو بیدەن بە رێبەر ئەحمەد، لەبەرانبەردا ئایا هاوهەمانگی شیعەكان قبوڵ دەكات رێبەر ئەحمەد بەبێ تەوافوق ببێتە سەرۆك كۆمار؟، تا ئەوكاتەی نەگەنە ئەو قەناعەتەی لەگەڵ هەڵبژاردنی سەرۆك كۆمار حكومەتی عێراقیش بكرێتە یەك پاكێج بۆ ئەوەی رێككبكەون، ئەگەر نا هەردوو هاوپەیمانەكە دانیشتنی پەرلەمان دەتوانن پەكبخەن. هاوڵاتی: ئەگەر پرسی سەرۆك كۆمار لەنێوان پارتی و یەكێتی چارەسەر بكرێت ئایا ئەو دۆسییەی سكاڵایانە دەخرێتەوە چەكمەجەكەی دادگای ئیتحادی؟ ئەحمەد حاجی رەشید: دادگای فیدراڵی پێش ئەوەی سەیری جانبە یاساییەكە بكات سەیری جانبە سیاسییەكەی دەكات، كە جانبە سیاسییەكەی زانی بەرژەوەندی باڵای عێراقی تێدایەو نابێتە هۆی ئاڵۆزی ئینجا شەرعییەت دەدۆزێتەوە بۆ ئەو قەزییە. جووڵاندنی ئەم سكاڵایە لەم كاتەدا دادگای فیدراڵی شەرعیەتی بۆ دۆزیوەتەوە، ئەگینا لەیاسای بودجەی 2021دا تاكە بڕگە كە رێگە دەدات هەرێمی كوردستان خۆی نەوت هەناردە بكات و بیفرۆشێت جێگیركراو تێپەڕێندرا، بەڕەزامەندی هەماهەنگی شیعەكان بوو، بۆیە كەسیش سكاڵای نەكردو یاساكەی نەبردە دادگای فیدراڵی. یەكێتی و پارتی لەوە دەرچوون بەبێ شەریكەكانیان بڕیار بكەن، یەكێتی بەبێ هەماهەگنی شیعەكان و پارتی بەبێ سەدرو سوننەكان تازە دوو جەبهە دروست بووە لەعێراقدا كە خەریكی ئێسقان شكاندنی ئەوی تریانە، ئەو دۆسییەی دادگای فیدراڵی ناخرێتەوە چەكمەجەكەی دادگای فیدراڵی تا ئەوكاتەی تەوافوق لەسەر پۆستی سەرۆك كۆمارو پێكهێنانی حكومەتی عێراق نەكرێت. هاوڵاتی: پێتانوایە ئێران و وڵاتانی ئیقلیمی رۆڵیان هەیە لەم دۆخەی ئێستای عێراق؟ ئەحمەد حاجی رەشید: نەك ئێران هەموو وڵاتانی ئیقلیمی توركیاو ئیمارات و ئەردەن و تا رادەیەك سعودیەو دوورتریش بەریتانیاو ئەمریكا رۆڵیان هەیە تەنانەت روسیاش رۆڵی هەیە كە هاتۆتە سووریاوەو هاوپەیمانی ئێرانە كە دوو میحوەرین تا دەوڵەتە زلهێزەكان كە بەپێی بەرژەوەندی و گرنگیان بۆ عێراق.
هاوڵاتی- دهۆك دادگا دۆسیەی دادگایی كردنی (بێریڤان ئەیوب)ی بۆ 28 ئەم مانگە دواخست كەماوەی شانزە مانگە لەزینداندایەو پارێزەرەكەشی بە پێشێلكارییەكی زۆر گەورە وەسفی دەكات. بێریڤان ئەیوب، یەكێكە لەو ژنانە چالاكوانەی كەخاوەنی پێنج منداڵە بەتۆمەتی تێكدانی ئاسایشی نیشتمانی زیاتر لەساڵێك و چوار مانگە دەستگیركراوە. بڕیاربوو 14ی شوباتی 2022 دادگایی كردنی بێریڤان ئەیوب بەڕێوەبچێت، بەڵام دادگاییكردنەكەی بۆ رۆژی 28ی ئەم مانگە دواخرا. رێڤینگ یاسین، پارێزەری بێریڤان ئەیوب لەلێدوانێكدا بۆ هاوڵاتی ئاماژەی بەوەكرد كە بێریڤان ئەیوب بەپێی ماددەی ( 1) یاسایی ژمارە ( 21) ساڵی 2003 تۆمەتباركراوە، ئەم یاسایە تایبەتە بەو كەسانەی ئەمن و ئاسایش تێكدەدەن و سزاكەشی تازیندانی هەتا هەتایی دەچێت، وتیشی:»بڕیاربوو 14ی شوبات دادگایی كردنەكەی ئەنجامبدرێت، بەڵام بەهۆی ئەوەی كوڕی ئەو دادوەری كە بڕیاربوو دۆسیەكەی بەڕێوەببات توشی رووداوێكی هاتۆچوو بوو، ئەو دادوەرە وتی ناتوانم لەلایەك دڵم لەسەر كوڕەكەم بێت لەنەخۆشخانەكە لەلایەك دۆسیەكە بەڕێوەببەم، بۆیە بۆ 28 ی ئەم مانگە دوایخستووە». ناوبراو ئەوەشی خستەڕوو كە وەكو تیمی پارێزەرانی بێریڤان لەهەولێرو سلێمانی و دهۆك تائێستا رێگەیان نەداوە وەكالەی بۆ دروستبكەن» كەیسەكە و بێریڤانیشمان نەبینیوە، بەڵام دۆسیەكەی لەگەڵ گیراوانی تری بادینانە». پارێزەرەكەی بێریڤان ئەوەشی دووپاتكردەوە كە پێویست بوو دۆسیەكەی لەماوەی شەش مانگدا كۆتایی پێبێت لەسەر ئەو ئەساسەی كە ئەمە كچێكی كوردە زیاتر لەساڵێكە لەزینداندایە بەبێ ئەوەی دادگایی بكرێت، وتیشی:» پێشیلكاریەكی یاسایی زۆر گەورەیە لەبەرئەوە بەرگری لێ‌دەكەین». سەرۆكی فراكسیۆنی كۆمەڵی دادگەری دەڵێت:» بێریڤان ئەیوب لەسەر داواكردنی مافی خەڵك و گەندەڵیی و لێبرینی پاشكەوتی مووچەی فەرمانبەران زیندانی كراوە، ئەو یەكێكە لە رفێنراوانی بادینان». عەبدولستار مەجید سەرۆكی فراكسیۆنی كۆمەڵی دادگەری لەپەرلەمانی كوردستان بۆ هاوڵاتی وتیشی:» ئەم كەیسەش وەكو هەموو كەیسەكانی تر بەحزبی و سیاسی كراون، ئەم ژنە دایكی پێنج منداڵە، لەئەنجامی ئەو زوڵمە گەورەیەی بەرامبەر كراوە، دووچاری كێشەی كۆمەڵایەتی بووەتەوە، بەپێی زانیارییەكانم هاوسەرەكەی بێریڤانی تەڵاقداوە». عەبدولستار مەجید وتیشی:» رێگەی پێنەدراوە منداڵەكانی ببینێت، ئەمە ستەمێكی زۆر گەورەیە بەداخەوە پەرلەمانی كوردستان كە گەورەترین دەزگای شەرعییە هیچ هەڵوێستێكی نیە، تەنیا چەند پەرلەمانتارێك قسە لەسەر دۆسەیەكە دەكەن، بەڵام پەرلەمانیش بووە سێكوچەی حزب و حكومەت « . عەبدولستار مەجید داوا دەكات كە بۆ یەكجاریش بێت دادگاو دادوەركان بێلایەنانەو سەربەخۆیانە مامەڵە لەگەڵ كەیسی ئەو ژنە بكەن و كۆتایی بەو زوڵمە گەورەیە بهێنن كە لەبەرامبەری كراوە، وتیشی:» چۆن دەكرێت 16 مانگ لەزینداندا بێت و منداڵەكانی خۆی نەبینێت».
هاوڵاتی سەرۆكی هەرێمی كوردستان لەدرەنگانێكی شەوی رابردوودا پەیامێكی لەبارەی جووڵاندنی سكاڵا لەسەر دۆسییەی نەوت و غازی هەرێم لەلایەن دادگای فیدراڵییەوە بڵاوكردەوەو تێیدا ئەوە دووپاتدەكاتەوە كە»بڕیارەكەی دادگای فیدراڵی لەئەرزی واقعدا قابیلی جێبەجێكردن نابێت». نێچیرڤان بارزانی، سەرۆكی هەرێمی كوردستان دەڵێت:»لەكاتێكدا عێراق بەدۆخێكی ئاڵۆزی سیاسیدا تێدەپەڕێت، بەداخەوە بڕیارێكی دادگای باڵای فیدرالیی عێراق كە یاسای نەوت و گازی هەرێمی كوردستان بە نادەستووری دادەنێت، هەرێمی كوردستانی تووشی نیگەرانییەكی گەورە كرد». ناوبراو دەشڵێت:» پێمانوایە ئەم بڕیارەی دادگای باڵای فیدراڵی كە پشتی بەیاسایەكی سەردەمی رژێمی پێشوو بەستووە، بنەماكانی فیدراڵی و مافە دەستوورییەكانی هەرێمی كوردستانی پشتگوێ خستووەو لەگەڵ گیانی دەستوورو سیستمی فیدراڵیدا نایەتەوە، لەسەر ئەرزی واقعیش قابیلی جێبەجێكردن نابێت». هاوكات ئەوەش دەخاتەڕوو كە ئەم بڕیارە هەروەها كێشەكانی نێوان حكومەتی فیدراڵی عێراق و حكومەتی هەرێمی كوردستان لەسەر دۆسیەی نەوت و گاز ئاڵۆزتر دەكات كە بەدرێژایی ساڵانی رابردوو هەوڵی چارەسەركردنیان دراوەو لەچەند قۆناغێكدا هەنگاوی بەرەو چارەسەركردن هەڵێناوە. هاوكات ئەوە دووپاتدەكاتەوە كە پێیانوایە دادگای باڵای فیدراڵی لەجیاتی ئەم بڕیارە، دەبوایە بڕیار بدات كە حكومەتی فیدراڵی عێراق لەگەڵ حكومەتی هەرێمی كوردستان بەپێی دەستوور لەسەر كێشەكان و پرسی نەوت و گاز بگەنە چارەسەرێك كە لەبەرژەوەندیی تەواوی عێراقدا بێت. نێچیرڤان بارزانی ئەوەش رووندەكاتەوە كەچاوەڕوانییان لەدادگای باڵای فیدراڵی عێراق هەیەو داوا دەكەن پێداچوونەوە بەبڕیارەكەیدا بكات و بنەماكانی دەستوورو سیستمی فیدرالی رەچاو بكات بۆ ئەوەی مافە یاسایی و دەستوورییەكانی هەرێمی كوردستان پێشێل نەكرێن و نەبنە هۆی ئاڵۆزبوونی زیاتری دۆخی سیاسی كە زیان بەبەرژەوەندییەكانی عێراق بەگشتی بگەیەنێت.
هاوڵاتى ئەمڕۆ سەرۆکی هەرێمی کوردستان لە مەراسیمی کۆچی دوایی رۆژ نوری شاوەیس دا پەیامێکی پێشکەش کرد و رایگەیاند:" بە پێكەوەبوون زۆر دەستكەوتمان دەستدەكەوێت، بە ترازان و دووركەوتنەوە، دڵنیاتان دەكەمەوە هیچ لایەنێك لە كوردستان هیچ شتێكی دەستناكەوێت نێچیرڤان بارزانی دووپاتی کردەوە و ووتی:" ئەو كاتە و ئێستاش مەرجی سەركەوت ئەوەیە كە كورد دەبێت یەكڕیز بێت، دەبێت یەك دەنگ بێت بۆ دەستكەوتەكان نەك بۆ پۆست و پایە". هەروەها جەختی کردەوە کە دەبێ هه‌وڵ بده‌ين دەستكەوته‌كان بە یەكڕیزی بپارێزين و پەرەیان پێ بدەین و خەباتی پێكەوەیی بكەین بۆ ئەو ئامانجانەی لە پێناویاندا زۆر قوربانیمان. نێچیرڤان بارزانی جەختی کردەوە کە هەموو لایەکمان بە یەكڕیزی و بە یەكبوون و بەیەكەوە دەبێت هەوڵ و تێكۆشانمان بەردەوام بێت بۆ بەدەستهێنانی مافە دەستوورییەكانی هەرێمی كوردستان سەرەڕای هەموو جیاوازییەك، سەرەڕای هەموو بۆچوونێك، مەرجی سەركەوتنمان و مەرجی تێپەڕاندنی ئەو قۆناغەشمان تەنیا و تەنیا ئەوەیە یەكڕیز بین و بەیەكەوە بین. هەروەها وتیشی: بە پێكەوەبوون زۆر دەستكەوتمان دەستدەكەوێت، بە ترازان و دووركەوتنەوە، دڵنیاتان دەكەمەوە هیچ لایەنێك لە كوردستان هیچ شتێكی دەستناكەوێت.
هاوڵاتی موقتەدا سەدر، ڕێبەری ڕەوتی سەدر داوای لەپەرلەمانی عێراق كرد رۆڵی چاودێری و یاسادانانی خۆی كارا بكات، ئەویش لەپێناو بەرژەوەندی گەلی عێراق. موقتەدا سەدر، لەتویتێكدا نوسیویەتی: كاری پەرلەمان تەنها لەپێناو پێكهێنانی حكومەت نییە یاخود سێ سەرۆكایەتیەكە، بەڵكو پێویستە ڕۆڵی كارابكات لەبواری چاودێری و یاسادانان لەپێناو بەرژەوەندی گەلی عێراقی ستەم لێكراو. سەدر لە تویتەكەیدا داوای لەپەرلەمانتاران كردووە چەند كارێكی دیكەش ئەنجام بدەن، لەوانەش كاراكردنی رۆڵی چاكسازی پەرلەمان و لێكۆڵینەوە و بانگهێشتكردنی هەركەسێك گومانی گەندەڵی و كەموكورتی لەسەربێت، ئەویش لەڕێگەی پەلەكردن لە پێكهێنانی لیژنەكانی پەرلەمان و گوێ بەوە نەدرێت ئەو كەسانە سەر بە چی نەتەوە و پێكهاتەیەكن یاخود چی پلەیەكی وەزیفییان هەبووە لە حكومەتەكانی پێشوودا. سەدر هەر لە تویتەكەیدا دەشڵێت: پێویستە پەرلەمانتاران تەئكید لەسەر كاراكردنەوەی پرۆژە خزمەتگوزاریەكان بكەنەوە كە لەخزمەت گەلدایە و ئەو پرۆژانەش دەستپێبكرێنەوە كە وەستاون، ئەوانەی كەموكورتیشیان هەبووە لە حكومەت و كۆمپانیاكان لێپێچینەوەیان لەگەڵ بكرێت. یەكێكی دیكە لەداواكاریەكانی موقتەدا سەدر بۆ پەرلەمانتارانی عێراق ئەوەیە پەلە بكەن لە پێكهێنانی حكومەتێكی چاكسازیخوازی نوێ كە زۆرینەی نیشتیمانی بێت و بەدوور بێت لەوەی وەكو كێك ببەخشرێتەوە. لەخاڵی كۆتایی داواكاریەكانی موقتەدا سەدر بۆ پەرلەمانی عێراق ئەوەش هاتووە: رۆڵی چاودێری پەرلەمان كارابكرێت و بەتوندی ڕێگربێت لە دەستێوەردانی حزبی و دادوەری بە سیاسیكراو.
هاوڵاتى وەزیری پێشمەرگە رایگەیاند:"پرۆسەی خانەنیشینی بەردەوام دەبێت و هەوڵەكانی وەزارەت بۆ تەواوكردنی دۆسیەو خشتەی پلەبەرزكردنەوەی ئەفسەران تەواو بوەو چاوەڕوانی گەڕانەوەن لە ئەنجومەنی وەزیران". وەزارەتی پێشمەرگەی حکومەتی هەرێمی کوردسستان ڕایگەیاند، وەزیری پێشمەرگەو راوێژكارانی باڵای هێزەكانی هاوپەیمانان لەعیراق پرسی چاكسازی و پەرەسەندنەكانی وەزارەتی پێشمەرگەو بەردەوامیدان بەپڕۆسەی خانەنیشنی و پلە بەرزكردنەوەی ئەفسەران تاوتوێ کردووە. ئەمڕۆ سێشەممە 15ی شوباتی 2022، لە راگەیاندراوێکدا وەزارەتی پێشمەرگەی حكومەتی هەرێمی كوردستان بڵاویکردەووە، ''شۆڕش ئیسماعیل وەزیری پێشمەرگە لەگەڵ راوێژكارانی باڵای ئەمریكاو هۆڵەنداو بەریتانیا لەهاوپەیمانی نێودەوڵەتی كۆبۆتەوە، لەو كۆبونەوەیەدا كە بۆردی باڵای چاكسازی وەزارەتی پێشمەرگەو تیمی بەدواداچونی سەرۆكایەتی ئەنجومەنی وەزیران تیایدا ئامادەبون، تاوتوێی هەنگاوەكانی چاكسازی و لەمپەڕو ئاستەنگەكانی كراوە.'' ئەوەشخراوەتەڕوو، ''ستایشی هێزەكانی هاوپەیمانانی كردوە بۆ پرۆسەی چاكسازی و رێكخستنەوەی هێزەكان كە بۆتە هۆكاری پێشكەوتن و گەشەسەندنی زیاتری پێشمەرگەو بەرزكردنەوەی توانستی سەربازیان لەتەواوی سێكتەرەكانەوە.'' وەزیری پێشمەرگە باسی لەوەشکردووە، ''پرۆسەی خانەنیشینی بەردەوام دەبێت و هەوڵەكانی وەزارەت بۆ تەواوكردنی دۆسیەو خشتەی پلەبەرزكردنەوەی ئەفسەران تەواو بوەو چاوەڕوانی گەڕانەوەن لە ئەنجومەنی وەزیران.''
هاوڵاتى دادگای فیدراڵی عێراق ڕایگەیاند:" فرۆشتنی نه‌وتی هه‌رێم به‌سه‌ربه‌خۆ نایاساییه و یاسای نەوت و گاز لە هەرێمی کوردستان نادەستورییە و دژی دەستووری عێراقە". ئه‌مڕۆ دادگای فیدراڵی له‌عێراق له‌سه‌ر سكاڵای ئەندامی ئەنجومەنی نوێنەرانی عێراق، كە لەسەر فرۆشتنی نەوت بەشێوەی سەربەخۆ لەلایەن حكومەتی هەرێمە تۆماری كردبوو، بڕیاریدا. لە كۆبوونەوەکەدا دادگای فیدراڵی بڕیاری كۆتایی لەسەر سكاڵاكە دا و ڕایگەیاند، یاسای نه‌وت و غازی هه‌رێم پێچه‌وانه‌ی ده‌ستووری عێراقه، بۆیه بڕیاریدا فرۆشتنی نه‌وتی هه‌رێم بەشێوەی سه‌ربه‌خۆ نایاساییه. لە بڕیارەكەیدا دادگای فیدراڵی، حكومه‌تی هه‌رێمی پابه‌ندكرد به وه‌زاره‌تی نه‌وت و دیوانی چاودێریی دارایی عێراقیش به‌دواداچون بۆ فرۆشتنی نه‌وت و غازی هه‌رێم ده‌كات. لەماوەی ڕابردوودا، هه‌ریه‌كه له‌وه‌زیری نه‌وتی عێراق و ئه‌ندامێكی ئه‌نجومه‌نی پارێزگای به‌سره و چه‌ند په‌رله‌مانتارێك سكاڵایان له‌سه‌ر حكومه‌تی هه‌رێم تۆمار کرد، سه‌باره‌ت به ناده‌ستووریی بوونی یاسای نه‌وت و گاز و فرۆشتنی نه‌وتی هه‌رێم به‌شێوه‌ی سه‌ربه‌خۆ تۆماركرد.
هاوڵاتى وەزارەتی کارەبای هەرێمی کوردستان رایگەیاند:" پێوەری زیرەکی کارەبا تا ئێستا توانیویەتی (60,682) سەرپێچی لەسەر تۆڕەکانی کارەبا لەسەر ئاستی هەرێمی کوردستان دەستنیشان بکات، کە زۆترینیان لە پارێزگاکانی سلێمانی و هەولێر بوون. ئەمڕۆ سێشەممە 15-2-2022، وەزارەتی کارەبای هەرێمی کوردستان لەراگەیەنراوێکدا ئاماژەی بەوەشکردوە، "پێوەری زیرەکی کارەبا تا ئێستا توانیویەتی (60,682) سەرپێچی لەسەر تۆڕەکانی کارەبا لەسەر ئاستی هەرێمی کوردستان دەستنیشان بکات. تیمەکانیشمان راستەوخۆ دەچنە شوێنی سەرپێچییەکان". ئەوەش هاتووە، "بە پێی ئەم نەخشەی خوارەوە، هێڵە سوورەکان ناو و شوێنی سەرپێچی لەسەر تۆڕەکانی کارەبا لە سەنتەری شاری هەولێر پیشان دەدات و تیمەکانی کارەبا بۆ لابردنی سەرپێچییەکان، راستەوخۆ دەچنە شوێنی سەرپێچییەکان." ژمارەی سەرپێچییەکانی سەر خزمەتگوزاریی کارەبا لەسەر ئاستی پارێزگا و ئیدارە سەربەخۆکان کە رێگەی پێوەری زیرەکەوە دەستنیشان کراون: هەولێر 15,885 سەرپێچی سلێمانی 20,676 سەرپێچی دهۆک 17,553 سەرپێچی هەڵەبجە 1,849 سەرپێچی گەرمیان 4,718 سەرپێچی
هاوڵاتى سەرۆکی هەرێمی کوردستان ڕایگەیاند:" هه‌رێمى كوردستان پابه‌نده به‌وه‌ى هه‌ڵبژاردنه‌كان له كاتى خۆياندا بكرێن و ده‌ستووريش ده‌بێ كۆكه‌ره‌وه و په‌سندى هه‌مووان بێت و بۆ ئه‌م مه‌به‌سته له‌گه‌ڵ به‌غداش هه‌ماهه‌نگى بكرێت." به‌يانيى ئه‌مڕۆ سێشه‌ممه نێچيرڤان بارزانى، سه‌رۆكى هه‌رێمى كوردستان پێشوازى لە شاندەکە کرد و لە کۆبوونەوەیەکدا بەپێی راگەیێندراوی سەرۆکایەتیی هەرێمی کوردستان، "پرۆسه‌ى سياسى له عێراق، هه‌ڵبژاردن و ئاكامه‌كانى، دانيشتنى يه‌كه‌مى ئه‌نجوومه‌نى نوێنه‌رانى عێراق و هه‌ڵبژاردنى ده‌سته‌ى سه‌رۆكايه‌تيى په‌رله‌مان، هه‌نگاوه‌كانى دواى ئه‌وه و گرنگي پشتگيريى كۆمه‌ڵگه‌ى نێوده‌وڵه‌تى له پرۆسه‌ى ديموكراسى له عێراق تاوتوێكران." نێچيرڤان بارزانى، سەرۆکی هەرێمی کوردستان دواى خستنه‌ڕووى پوخته‌يه‌ك ده‌رباره‌ى كۆى دۆخه‌كه، جه‌ختى له‌وه كردووەتەوە كه "عێراق و هه‌رێمى كوردستان پێويستييان به ئارامى و سه‌قامگيرييه بۆ ئه‌وه‌ى بتوانرێت به‌رنامه‌يه‌ك جێبه‌جێ بكرێت كه له به‌رژەوه‌نديى ته‌واوى پێكهاته‌كانى عێراقدا بێت." بەپێی راگەیێندراوەکە، هه‌ردوولا جه‌ختيان له پته‌وكردنى په‌يوه‌ندييه‌كانى عێراق و هه‌رێمى كوردستان له‌گه‌ڵ به‌ريتانيا كرده‌وه و لايه‌نى به‌ريتانى سوپاسى هه‌وڵه‌كانى نێچيرڤان بارزانى كرد بۆ پته‌وكردنى په‌يوه‌ندييه‌كان له‌گه‌ڵ به‌ريتانيا. هه‌روه‌ها باس له په‌يوه‌ندييه‌كانى هه‌رێمى كوردستان و وڵاتانى دراوسێ كرا. لايه‌نێكى ديكه‌ى كۆبوونه‌وه‌كه دۆخى ناوخۆى هه‌رێمى كوردستان بووە کە تێیدا باس له په‌يوه‌نديى نێوان لايه‌نه سياسييه‌كان كرا و تيشك خرايه سه‌ر هه‌ڵبژاردنه‌كانى هه‌رێمى كوردستان و پرۆسه‌ى نووسينه‌وه‌ى ده‌ستوور. نێچيرڤان بارزانى دووپاتى كرده‌وه كه "هه‌رێمى كوردستان پابە‌نده به‌وه‌ى هه‌ڵبژاردنه‌كان له‌كاتى خۆياندا بكرێن و ده‌ستووريش ده‌بێ كۆكه‌ره‌وه و په‌سندى هه‌مووان بێت و بۆ ئه‌م مه‌به‌سته له‌گه‌ڵ به‌غداش هه‌ماهه‌نگى بكرێت."
.jpg)
هاوڵاتى راگەیاندنی پەرلەمانی عێراق رایگەیاند:" دوای ئەوەی دەرگای خۆکاندیدکردن بۆ پۆستی سەرۆک کۆمار کۆتاییهات، ژمارەی ئەو کەسانەی خۆیان بۆ پۆستەکە کاندیدکردووە گەیشتوەتە 60 کەس و تائێستاش وادەی ئەنجامدانی دانیشتنی هەڵبژاردنی سەرۆك دیارینەكراوە. بەیداء خزر، بڕیاردەری پەرلەمانی عێراق لەلێدوانێکدا ئاماژەی بەوەشکردوە، لەقۆناغی یەکەمی کردنەوەی دەرگای خۆکاندیدکردن بۆ پۆستی سەرۆک کۆمار 24 کەس ناوی خۆیان پێشکەش کردبوو، بەڵام دوای ئەوەی چوارشەممەی ڕابردوو جارێكی دیكە دەرگای خۆكاندیدكردن كرایەوە، لەئێستادا ژمارەی کاندیدان گەیشتوەتە 60 کەس. ئاماژەی بەوەشکردوە، تەنها سەرۆکایەتی پەرلەمان دەتوانێت ناوی کاندیدەکان ئاشكرابکات، تائێستاش پەرلەمان وادەیەكی نوێی بۆ دانیشتنی هەڵبژاردنی سەرۆك كۆمار دیارینەکردووە. رۆژی یەکشەممە 13-2-2022 دادگای فیدڕاڵی خۆكاندیدكردنی هۆشیار زێباری، كاندیدی پارتی دیموکراتی کوردستانی بۆ پۆستی سەرۆک کۆمار رەتکردەوە، هاوکات ئێوارەی هەمان رۆژیش دەرگای خۆکاندیدکردن بۆ پۆستی سەرۆک کۆمار کۆتایی هات.
.jpg)
هاوڵاتى وته‌بێژی ئیئتلافی ده‌وڵه‌تی یاسا ڕایگەیاند:" ئه‌سته‌مه بەبێ یەکێتی کۆبوونەوەی پەرلەمان بۆ هەڵبژاردنی سەرۆک کۆمار ناکرێت". ئه‌مڕۆ دووشه‌ممه 14ی شوباتی 2022 بەهادین نوری، وتەبێژی دەوڵەتی یاسا کە بەشێکی سەرەکی هەماهەنگی شیعەکان لەخۆدەگرێت ڕایگەیاند، "چوارچێوەی هەماهەنگی ئومێدی دەخواست کە هێزە کوردییەکان یەک کاندیدیان هەبێت بۆ پۆستی سەرۆک کۆمار." لەبارەی‌كاندیدكردنی رێبه‌ر ئه‌حمه‌د، وه‌ك كاندیدی نوێی پارتی بۆ پۆستی سەرۆک کۆمار، وتەبێژەکەی دەوڵەتی یاسا وتی "ئەستەمە دانیشتنی پەرلەمان بۆ هەڵبژاردنی سەرۆک کۆمار بەبێ چوارچێوەی هەماهەنگی و یەکێتی بەڕێوەبچێت." "ناڕەزایی چوارچێوەی هەماهەنگی لەوەی کە ئێستا دەگوزەرێت بۆئەوەیە کە پێکهاتەی شیعە نەبێتە بچوکترین پێکهاتە لە پەرلەمان و پرۆسەی سیاسی، به‌زۆریش كه‌س نابێته ئۆپۆزسیۆن و لە پرۆسەی سیاسیدا شتی وا نییە، حکومەتیش بەبێ چوارچێوەی هەمانەنگی پێکناهێنرێت"، به‌هادین نوری وای وت. ئه‌وه‌ش له‌كاتێكدایه كه هه‌ر ئه‌مڕۆ بافڵ تاڵەبانی، هاوسه‌رۆكی یه‌كێتی لە بەغدا پێشوازیکرد لە سەرکردەکانی چوارچێوەی ھەماھەنگی کە پێکھاتبوون لە نوری مالکی سەرۆکی ھاوپەیمانی دەوڵەتی یاسا، ھادی عامری سەرۆکی ھاوپەیمانی فەتح و قەیس خەزعەلی ئەمینداری گشتی بزوتنەوەی عەسائیب ئەھلی حەق. به‌پێی راگه‌یه‌ندراوێكی نوسینگه‌ی بافڵ تاڵه‌بانی، له كۆبونه‌وه‌كه‌دا دۆخی سیاسی، ئەمنی و ھەنگاوەکانی پێکھێنانی حکومەتی نوێی عێراق گفتوگۆیان لەبارەوە کراوە و هەوڵی لێکتێگەیشتن و درووستکردنی نزیکایەتیی لەپێناو پێکھێنانی حکومەتێکی تەوافقی نیشتمانیی خزمەتگوزار لەلایەن لایەنەکانەوە هەبووە. "یەکێتی و چوارچێوەی ھەماھەنگی سووربوونی خۆیان دووپاتکردەوە بۆ چارەسەکردنی سیاسییانە و ئاشتییانەی ھەموو قەیرانەکان و رزگارکردنی وڵات لەم دۆخەی تێدایە"، راگه‌یه‌ندراوه‌كه وای وتبوو.
.jpg)
