پێشەوا هەورامى: نەگەینە ڕێککەوتن دەکشێینەوە

هاوڵاتی وابڕیارە  دوانیوەڕۆی ئەمڕۆ دووشەممە، یەکەمین کۆبوونەوەی خولی سێیەمی ئەنجوومەنی پارێزگای کەرکووک ئەنجام بدرێت؛ بەڵام بەهۆی نەبوونی رێککەوتنی سیاسی لەنێوان لایەنەکان بۆ دابەشکردنی پۆستەکان، پێشبینی ناکرێت کۆبوونەوەکە ئەنجام بدرێت. ئەمرۆ دووشەممە 5/2/2024 لە  کاتژمێر ٢ ئەوە زۆرینەی ئەنجوومەنە نوێیەکانی پارێزگاکانی عێراق یەکەمین کۆبوونەوەی خۆیان ئەنجام دەدەن و سەرۆکی نوێی ئەنجوومەنەکان هەڵدەبژێردرێن بەڵام لە بەشێک لە پارێزگاکان، بەهۆی نەبوونی رێککەوتنی سیاسی، چاوەڕێ ناکرێت رێژەی یاسایی ئامادەبوونی ئەندامان تەواو ببێت و کۆبوونەوەکە بکرێت. بە گویرەی زانیارییەکان عەرەب و تورکمانەکان بایکۆتی کۆبونەوەکەی ئەمڕۆی ئەنجومەنی پارێزگای کەرکوکیان کردووەو گەر سەرجەم لایەنە کوردییەکانیش بەشداری بکەن کە هەشت کورسییان هەیە ڕێژەی "نیسابی یاسایی" تەواو نابێت و ناتوانن کۆبوونەوەکە بەڕێوەببەن، ئەمە لە کاتێکدایە هەموو لایەنەکان داوای پۆستی پارێزگار دەکەن و تاوەکو ئێستا هیچ رێککەوتنێکی سیاسی لەنێوانیاندا نییە. هاوکات لەم بارەیەشەوە فراکسیۆنی قیادە لە کەرکوک ڕایگەیاند لەگەڵ یەکیتی نیستیمانی کۆبونەتەوەو لە بارەی پۆستەکان لە ئەنجومەنی پارێزگاکە بەڵآم نەگەیشتوون بە ڕیککەوتن.  ئەنجوومەنی پارێزگای کەرکووک لە 15 ئەندام و ئەندامێکی کۆتای کریستیان پێکدێت. یەکێتی 5 کورسی و پارتی 2 کورسی هەیە، کورسییەکەی کریستیانیش نزیکە لە یەکێتی. لایەنە عەرەبییەکان شەش کورسی و تورکمانیش دوو کورسییان هەیە.  بڕیاریدان بۆ یەکلاکردنەوەی پرسەکان پێویستی بە 50 کۆ یەک هەیە، بەمەش دەبێت نۆ ئەندام لە کۆبوونەوەکان ئامادەبن.  

هاوڵاتی بە پێی بڕیارێکی فەرماندەی پۆلیسی کەرکوک هەر کەسێک بە دەمامک یان هەر پارچە قوماشێک دەموچاوی بشارێتەوە دەستگیردەکرێت. فەرماندەیی پۆلیسی کەرکوک ئەمڕۆ دووشەممە لە ڕاگەیەندراوێکدا  بڵاویکردەوە، لەمەدوا مامەڵەی یاسایی لەگەڵ هەرکەسێک دەکەن کە دەموچاوی داپۆشێت یان بیشارێتەوە بە دەمامک، یان هەرپارچە قوماشێک کە بۆ شاردنەوەی دەموچاو بەکاردەهێندرێت. ئاماژەی بەوەشکردوە، هەرسێک دەموچاوی بشارێتەوە ڕێوشوێنی یاسایی بەرامبەر دەگیرێتەبەر و وەک دوژمن مامەڵەی لەگەڵ دەکرێت. بڕیارەکەی پۆلیسی کەرکوک لەکاتێکدایە، لەمانگی 12ی ساڵی ڕابردو لەناو بازاڕی لەنگەی شاری کەرکوک، دوو پۆلیس لەلایەن کەسێکی نەناسراوە کە روخساری شاردبۆوە، دەستڕێژی گولـلەیان لێکراو یەکێکیان راستەوخۆ گیانی لەدەستدا.

هاوڵاتی ناوەندی راگەیاندنی هێزەکانی سووریای دیموکرات (هەسەدە) ئەمرۆ دوشەممە  رایگەیاند " ئەمڕۆ شەش شەڕڤانمان بەهۆی فڕۆکەیەکی بۆمبڕێژکراو کە سەرچاوەکەی بەکرێگیراوەکانی رژێمی سووریا بووە، شەهید بوون." ناوەندی ڕاگەیاندنی هێزەکانی سوریای دیموکرات ئەمڕۆ دوشەممە 2/5/2024 لە ڕاگەیەندراوێکدا بڵاویکردەوە، ئەو ناوچەیەی بۆردومانکراوە  ئه‌كادیمیایه‌كی مه‌شق و ڕاهێنانی له‌ مه‌یدانی له‌ كێڵگه‌ی عومه‌ر له‌ ڕۆژهه‌ڵاتی دێره‌زۆر . ڕاشیگەیاندووە، بنکەکەیان له‌ڕێگه‌ی فڕۆكه‌یه‌كی بێفڕۆكه‌وانه‌وه‌ كراوەتە ئامانج كه‌ سه‌رچاوه‌ی فڕۆكه‌ بێفڕۆكه‌وانه‌كه‌ ناوچه‌كانی ژێر ده‌سه‌ڵاتی به‌كرێگیراوانی سوریا بو. لەگەڵ ئیدانەکردنی هێرشەکە هەسەدە هەڕەشەی تۆڵەسەندنەوە دەکات و دەڵێت، "وەڵامی گونجاومان بۆ سەرچاوەی هێرشەکە دەبێت. هاوکات بەیانی ئەمڕۆ دووشەممەش  گرووپی  موقاوەمەی ئیسلامی لە عێراق لە ڕاگەیەندراوێکدا رایگەیاند، بە درۆنی بۆمبڕێژکراو هێرشیانکردووەتە سەر بنکەیەکی سەربازانی ئەمەریکا لە سنوری دێرەزور لەناو خاکی سوریادا و بەرپرسیاریتی هێرشەکەی گرتە ئەستۆ. هێرشەکەی  موقاوەمەی ئیسلامی، سێ رۆژ دوای هێرشەکانی ئەمەریکا بۆ سەر گرووپە چەکدارەکانی نزیک لە ئێران لە عێراق و سووریا دێت.

هاوڵاتی دوای ئەوەی مەڵبەندی هەولێری حیزبی شیوعی کوردستان لە بانگەوازێکدا ڕایگەیاند ئەمرۆ دووشەممە لە هەولێر بۆ داواکردن و گەیاندنی داواکاری مامۆستایان و فەرمانبەرانی ناڕازی کۆدەبنەوە و خۆپیشاندان دەکەن لە ئێستادا لە لایەن هێزێکی ئەمنییەوە بارەگای حیزبەکە گەمارۆدراوە. سەرچاوەیەکی تایبەت  بە هاوڵاتی ڕاگەیاند، "لە ئێستادا هێزێکی ئەمنی زۆر گەمارۆی بارەگای مەڵبەندی چواری حزبی شیوعی لە هەولێر داوە و ڕێگە نادەن بچنە دەرەوە"، ئەمەش دوای ئەوەی ئەو حزبە لە بانگەوازێکدا داوای لە مامۆستایان و فەرمانبەرانی هەولێر کرد ئەمڕۆ دووشەممە کاتژمێر ١٠ بەرەوە ئەنجومەنی وەزیران بەڕێبکەون و خۆپیشاندان ئەنجام بدەن. دوێنێ یەکشەممە حزبی شیوعی کوردستان لە بانگەوازێکدا ڕایگەیاند "ڕۆژی دووشەممە، ٥/٢/٢٠٢٤، کاتژمێر ١٠ی بەیانی، بەمەبەستی داکۆکیکردن لەداخوازیەکانی سەرجەم چین و توێژەکان وبەتایبەتی لە خواستی مامۆستایان و فەرمانبەران گردبوونەوەیەک لەبەردەم ئەنجومەنی وەزیران ڕێکدەخات"، بەڵآم لە ئێستادا بەهۆی گەمارۆدانی بارەگای حزبەکەیانەوە ڕێگری لە دەستپێکردنی خۆپیشاندانەکە دەکرێت لە پارێزگای هەولێر. هاوکات دوای بانگەوازەکەی حزبی شیوعی کوردستان ،لەلایەن خۆیانەوە حزبی کۆمۆنیستی کرێکاری کوردستانیش ڕایگەیاند، لەگەڵ ئەوەی پشتیوانی لەم هەنگاوەدەکات، هاوکات "داوا لەسەرجەم ئەندامان و دۆستانی حیزب، هەروها مامۆستایان و فەرمانبەران و خەڵکی نارازی شاری هەولێر دەکات کە بەتەواوی تواناو ئامادەییەوە لەم گردبونەوەیەدا بەشداری بکەن".  ئەمەش لەکاتێکدایە زیاتر لە چوار مانگە مامۆستایانی سنوری سلێمانی بایکۆتی هۆڵەکانی خوێندنیان کردووە و خۆپیشاندان ئەنجام دەدەن بۆ داوا کردنی داواکارییەکانیان کە خۆی لە پێدانی شایستە داراییەکان لە کاتی خۆیدا و دەستپێکردنەوەی پلەبەرزکردنەوە و دامەزراندنی مامۆستایانی وانەبێژدا دەگرێتەوە.

هاوڵاتی گروپی مقاومەی ئیسلامی لە عێراق رایگەیاند، بەرەبەیانی ئەمڕۆ بە درۆنی بۆمبڕێژکراو هێرشیان کردووەتە سەر کێڵگەی نەوتی عومەر لە سنوری دێرەزور لە خاکی سوریا، کە بنکەیەکی سەربازییە و هێزەکانی ئەمەریکای تێدا جێگیرکراوە. بەیانی ئەمڕۆ دووشەممە گرووپی  موقاوەمەی ئیسلامی لە عێراق لە ڕاگەیەندراوێکدا رایگەیاند، بە درۆنی بۆمبڕێژکراو هێرشیانکردووەتە سەر بنکەیەکی سەربازانی ئەمەریکا لە سنوری دێرەزور لەناو خاکی سوریادا. هێرشەکەی  موقاوەمەی ئیسلامی، سێ رۆژ دوای هێرشەکانی ئەمەریکا بۆ سەر گرووپە چەکدارەکانی نزیک لە ئێران لە عێراق و سووریا دێت. درەنگانی شەوی هەینی رابردوو هێزی ئاسمانی ئەمەریکا وەک تۆڵەکردنەوەی خوێنی سێ سەربازی ئەمەریکیی و برینداربوونی دەیان سەربازی دیکەی بنکەی تاوەر22 لە ئوردن، هێرشێکی فراوانیان بۆ سەر بنکە و بارەگاکانی گرووپە میلیشیاکانی نزیک لە ئێران لە عێراق و سووریا ئەنجامدا، بە گوێرەی ئاماری فەرماندەیی ناوەندی ئەمەریکا لە 30 خوولەکدا، 85 ئامانجیان لە حەوت دامەزراوە بۆمببارانکردووە، کە چوار لە سووریا و سێ لە عێراق بوون.

هاوڵاتی دەزگای ئاسایشی هەرێم ڕایگەیاند، بازرگانێکی ماددەی هۆشبەریان دەستگیرکردووە، کە بڕی یەک کیلۆگرام ماددەی هۆشبەر لە جۆری کریستاڵی پێ بووە. ئەمشەو، دەزگای ئاسایشی هەرێم، ڕاگەیاندراوێکی لەبارەی دەستگیرکردنی بازرگانێکی ماددەی هۆشبەر لە سنووری ئیدارەی ڕاپەڕین بڵاوکردەوە. لە ڕاگەیاندراوەکەی ئاسایشی هەرێمدا هاتووە:  هێزەکانی ئاسایشی ڕاپەڕین بە هەماهەنگی بەڕێوەبەرایەتی نەهێشتنی ماددە هۆشبەرەکانی دەزگای ئاسایش، دوای بەدواداچوون و چاودێریکردنی وورد بە بڕیاری دادوەر لە ڕۆژی ٢٠٢٤/٢/٢ توانیان بازرگانێکی ماددەی هۆشبەر لەنزیک ناحیەی (ژاراوە)ی ئیدارەی ڕاپەڕین دەستگیربکەن و دەستبگرن بەسەر بڕی ( ١ )کیلۆ گرام ماددەی هۆشبەر لە جۆری کریستاڵ. هاوکات لە ئێستادا تۆمەتبار بەماددەی (٢٦)لەیاسای بەرەنگاربونەوەی ماددە هۆشبەرەکان و کارتێکارە ئەقڵییەکان ڕاگیراوە و لێکۆڵینەوە لە دۆسییەکەی بەردەوامە. 

هاوڵاتی کەشناسی هەرێم رایگەیاند، لەمرۆوە شەپۆلێکی دیکەی بەفر و باران هەرێم دەگرێتەوە و تا رۆژی سێشەممە بەردەوام دەبێت، و شارەزایەكی كەشناسیش هۆشداری دەداتە ئەو ناوچانەی بەفری لێباریوە. پشتیوان ئیبراهیم، شارەزای كەشناسی و بومەلەرزەزانی بەهاوڵاتی راگەیاند، شەپۆلە بەفربارینەكەی ئێوارەی ئەمرۆ ناوچە شاخاوییەكان دەگرێتەوە و دەڵێت، ئەگەرێكی كەمی هەیە لەهەندێك ناوچە دابەزێتە خوارەوە و دامێنی ناوچە شاخاوییەكان لێی ببارێت .  دەشلێت، لەناو شارەكاندا بەفر و باران بەتێكەڵی دەبارێت و شارەكان سپی پۆش نابێت ئەم شارەزایە هۆشداری دەدات، لەو ناوچانەی پێشتر بەفری لێباریوە و پێی وایە بەپێی پێشبینییەكان، بەفرێكی زیاتریان لێدەبارێت . ئەوەشدەخاتەروو، شەپۆلەكە تا پێنج بۆ شەشی ئەم مانگە دەمێنێتەوە و كاریگەری دەبێت وتەكانی ئەم شارەزایە، دوای ئەوەدێت، ماوەی سێ رۆژە شەپۆلێكی بەفر و سەرما زۆربەی ناوچەكانی هەرێمی كوردستانی گرتۆتەوە

هاوڵاتی یەپەژە لە چوارچێوەی قۆناغی سێیەمی ئۆپراسیۆنی مرۆیی و ئاسایش کە ماوەی ٩ ڕۆژە بەردەوامە ، ژنێکی ئێزدی بە ناوی کۆڤان ئیدۆ خورتۆ لە کەمپی هۆڵ ڕزگار کرد. . یەکینەکانی پاراستنی ژنان (یەپەژە) لە ماڵپەڕی فەرمیی خۆیاندا ڕایگەیاند، لە چوارچێوەی قۆناغی سێیەمی “ئۆپەراسیۆنی مرۆیی و ئاسایش“ لە کامپی هۆڵ کە گیراوانی داعش و کۆچبەرەکانی سوریا و عێراقی تێدایەئەمڕۆ یەکشەممە 4ی شوباتی 2024 , کوڤان ئیدۆ خۆرتوو کە کچێکی ئێزدییە لە کەمپی هۆڵی رۆژئاوای کوردستان ئازاد کرا کە لەساڵی 2014 لە لایەن داعشەوە رفێندرابوو. بەگوێرەی ئەو زانیارییانەی یەپەژە بڵاوی کردۆتەوە، کۆڤان خەڵکی گوندی هێردانی سەر بە شێنگال لە باشووری کوردستانە. هێزەکانی سووریای دیموکرات هەسەدە و ئاسایشی رۆژئاوای کوردستان، بەبەشداریی هاوپەیمانیی نێودەوڵەتی، هەفتەی پێشوو ڕۆژی  شەممە 27ی کانوونی دووەم، لەناو کامپی هۆڵ قۆناغی سێیەمی ئۆپەراسیۆنی "مرۆڤایەتی و ئاسایش" ی لە دژی شانەکانی داعش دەستپێکرد. ئۆپەراسیۆنی "مرۆڤایەتی و ئاسایش" تیایدا هەسەدە بە بەشداری هێزەکانی هاوپەیمانان چەند ئۆپراسیۆنێکی جیاواز لە کەمپەکەدا ئەنجامدەدەن، ئەم ئۆپەراسیۆنە ئەندامانی شانەکانی داعش و وشک کردنی بازنەکانیان و دەستگیرکردنی خراپەکاران و لەوانەش ئەوانەی بەرپرسن لە هێرشە تیرۆریستیەکان و هاوکارەکانیان و هەروەها ئەوانەی بیرۆکەی ڕادیکاڵ و توندوتیژانە لەنێو منداڵاندا بڵاودەکەنەوە دەکاتە ئامانج.    

هاوڵاتی بەڕێوەبەری پەروەردەی رۆژهەڵاتی سلێمانی  رایگەیاند، ئەو منداڵەی ئەمڕۆ لە یەکێک لە قوتابخانەکانی تانجەڕۆ گیانی لەدەستداوە، بە مردنی کتوپڕ بووە و هیچ رووداوێکی بۆنی غاز و سۆپا لەو قوتابخانەیە نەبووە. بەڕێوەبەرایەتیی پەروەردەی ڕۆژهەڵات لە سلێمانی لە روونکردنەوەیەکدا بۆ رای گشتی بڵاوی کردەوە: "بەپێی ڕاپۆرتی پزیشکی دادوەری دەرکەوت کە کۆچی دوایی قوتابی لەوەند کاروان، لە پۆلی شەشەمی بنەڕەتی لە قوتابخانەی چەقڵاوای سنووری پەروەردەکەمان بەهۆی غازی سۆپاوە نەبووە، بەڵکوو هۆکاری نەخۆشی بووە."  ئاماژە بەوەش دراوە: "هیچ قوتابییەک لە سنووری پەروەردەکەمان تووشی تەنگەنەفەسی نەبوون و نەبراون بۆ نەخۆشخانە." هاوکات پزیشکی دادی سلێمانی ئاماژەی بەوەکردوە، کە منداڵەکە کێشەی دڵی هەبوە و دیواری دڵی ئەستور بوەو هەر ئەوەش هۆکاری گیانلەدەستدانەکەی بووە. ئەمەشلەکاتێکدایە سامان نادر، بەڕێوەبەری سەنتەری فریاکەوتنی سلێمانی بە هاوڵاتی ڕاگەیاند "ئەمڕۆ یەکشەممە ٤ی شوباتی ٢٠٢٤ لە قوتابخانەیەکی ناوچەی تانجەرۆ بەهۆی غازی سۆپاوە قوتابییەکی تەمەن ١٢ ساڵ لە ڕەگەزی نێر گیانی لەدەستدا". ئاماژەی بەوەشکرد "ژمارەیەک قوتابی دیکەش بەهۆی غازی سۆپاکەوە تووشی هەناسەتووندی بوون و ڕەوانەی نەخۆشخانە کراون بە مەبەستی چارسەرکردن"، بەڵام بە گوێرەی ڕاگەیەندراوەکەی پەروەردەی ڕۆژهەڵآت ئەو منداڵە بەهۆی نەخۆشی دڵەوە گیانیلەدەستاداوەو هیچ منداڵێکی دیکەش توشی تەنگەنەفەسی نەبوون بەهۆی غازەوە.

هاوڵاتی وەزارەتی بازرگانی عێراق ڕایدەگەیەنێت، سبەینێ دووشەممە یەکەمین بەشەخۆراکی مانگانەی ئەمساڵ دابەشدەکرێت. ئەمڕۆ یەکشەممە ٤ی شوباتی ٢٠٢٤ ئەسیر داود غەریزی، وەزیری بازرگانی عێراق ڕایگەیاند "یەکەمین بەشەخۆراکی مانگانەی ئەمساڵ لە سبەینێ دووشەممەوە بەسەر ھاوڵاتییاندا دابەشدەکرێت". ئاماژەی بەوەشکرد "کۆمپانیای گشتیی بازرگانی مادە خۆراکییەکان سەرجەم ئامادەکارییەکانی تەواوکردووە و مادە خۆراکییەکان لە کۆگای کۆمپانیاکەدا دانراون و داوا لە بریکارانی خۆراک دەکات سەردانیان بکەن بۆ وەرگرتنی پشکی ھاوڵاتییان". ئەوەشی خستەڕوو "ھاوڵاتییان دەتوانن لە سبەینێوە سەردانی بریکارەکانیان بکەن بە مەبەستی وەرگرتنی بەشەخۆراکی مانگانەیان کە شیر و ھێلکە و گۆشتی مریشک و گۆشتی بە نرخی پاڵپشتیکراو لەخۆدەگرێت".  وتیشی "بڕی سێ ملیۆن فەردە ئارد ئامادەکراوە بۆ ئەوەی لە ڕێگەی کۆبۆنی خۆراکەوە بەسەر ھاوڵاتییاندا دابەشبکرێت".

هاوڵاتی  لە قوتابخانەیەکی سنووری پارێزگای سلێمانی قوتابییەکی تەمەن ١٢ ساڵان بەهۆی غازی سۆپاوە گیانی لەدەستدا و چەند منداڵێکی دیکەش تووشی هەناسەتووندی بوون. سامان نادر، بەڕێوەبەری سەنتەری فریاکەوتنی سلێمانی بە هاوڵاتی ڕاگەیاند "ئەمڕۆ یەکشەممە ٤ی شوباتی ٢٠٢٤ لە قوتابخانەیەکی ناوچەی تانجەرۆ بەهۆی غازی سۆپاوە قوتابییەکی تەمەن ١٢ ساڵ لە ڕەگەزی نێر گیانی لەدەستدا". ئاماژەی بەوەشکرد "ژمارەیەک قوتابی دیکەش بەهۆی غازی سۆپاکەوە تووشی هەناسەتووندی بوون و ڕەوانەی نەخۆشخانە کراون بە مەبەستی چارسەرکردن، هەروەها تەرمی ئەو قوتابییەی گیانی لەدەستداوە براوەتە پزیشکی دادی سلێمانی". هەروەها بەڕێوەبەری قوتابخانەکە ڕەتیدەکاتەوە ئەو قوتابییە بەهۆی غازی سۆپاوە گیانی لەدەستدابێت، بەڵکو ئاماژەی بەوەکردووە کە خۆی نەخۆشی لەگەڵ بووە.  

هاوڵاتی هەردوو مەکتەبی سیاسییی پارتی دیموکراتی کوردستان و یەکێتیی نیشتمانیی کوردستان لە پارێزگای سلێمانی لە بەیاننامەیەکی هاوبەشدا ناوەڕۆکی کۆبوونەوەکەی ئەمڕۆیان ئاشکراکرد. ئەمڕۆ یەکشەممە ٤ی شوباتی ٢٠٢٤ هەردوو مەکتەبی سیاسیی پارتی دیموکراتی کوردستان و یەکێتیی نیشتمانیی کوردستان لە پارێزگای سلێمانی لە دەباشان بەڕێوەچوو، کۆبوونەوە دوای هەڵسەنگاندن و گفتوگۆ لەسەر بارودۆخی سیاسی و ئابووری  هەرێم و کێشەچارەسەر نەکراوەکان لەگەڵ حکومەتی فیدڕاڵ بە گشتی و بودجە و بژێوی ژیان و موچەی فەرمانبەران بە تایبەتی، لەلایەک و هەڵبژاردنەکانی  ئەنجوومەنی پارێزگاکان لەلایەکی دیکەوە، دوای بیروڕا گۆڕینەوە و لەبەرچاوگرتنی بەرژەوەندی باڵای نەتەوەیی و نیشتمانیی هاوڕابووین لەسەر ئەم خاڵانەی خوارەوە : ١ - هەردوولا کۆکبووین لەم قۆناغەدا لەپێناو بەرژەوەندی هاوڵاتییانی پارێزگای کەرکوک بە هەموو پێکهاتەکانییەوە پارێزگارێکی کورد دیاری بکرێت بۆ خزمەتی خەڵکی شارو شارۆچکەکان . ٢ - هەردوولا هاوڕابووین ئەرکی سەرشانی یەکێتی و پارتی و سەرجەم لایەنە کوردستانییەکانە قەوارەی هەرێم  بپارێزن و پارێزگاری لە دەستکەوتەکانی شۆڕش و خەبات و خوێنی شەهیدانى کوردستان بکەین . ٣ - بۆ چارەسەری کێشە سیاسی و ئابوورییەکانی هەرێم لەگەڵ حکومەتی فیدڕاڵی لەئاستێکی باڵا هەردوولا پێکەوە هەوڵی چارەسەرکردنی کێشەکان بەگشتی و بژیوی و ژیان و خزمەتگوزاری و بودجە و مووچە بدەین بە تایبەتی.

هاوڵاتی پێشنیوەڕۆی ئەمڕۆ لە ڕووداوێکی هاتووچودا لەسەر ڕێگەی هەولێر – دهۆک لە نزیک سنووری ناحیەی ڕۆڤیا کەسێک گیانی لەدەستدا.  بەرێوەبەری بنکەی هاتۆچووی ڕۆڤیا بە هاوڵاتی ڕاگەیاند "پێشنیوەڕۆی ئەمڕۆ یەکشەممە ٤ی شوباتی ٢٠٢٤ کاتژمێر ١١:٠٠ لەسەر ڕێگەی هەولێر - دهۆک ئۆتۆمبێلێکی جۆری کامری خۆی کێشا بە ئۆڤەر پاسی چەمە لە سنووری ناحیەی ڕۆڤیا، لە ئەنجامدا شۆفێری ئۆتۆمبێلە گیانی لەدەستداوە". لەبارەی ناسنامەی شۆفێرەکەوە بەرێوەبەری بنکەی هاتۆچووی ڕۆڤیا وتی "ئەو کەسەی گیانی لەدەستداوە ناوی (عەبدولخالق محەمەد ساڵح)ە و خەڵکی شاری دهۆکە".

هاوڵاتی دادگای فیدراڵی عێراق دووبارە بڕیاردانی لەبارەی یاسای هەڵبژاردنی پەرلەمانی کوردستان بۆ رۆژی ١١ی شوباتی ٢٠٢٤ دواخست. ئەمڕۆ یەکشەممە ٤ی شوباتی ٢٠٢٤ دادگای باڵای فیدراڵیی عێراق بۆ بڕیاردان لەبارەی سکاڵایەک کە لە دژی ژمارەیەک مادەی یاسای هەڵبژاردنی پەرلەمانی کوردستان تۆمارکراوە کۆبووەوە، لە دانیشتنەکەی ئەمڕۆیدا، دادگای فیدراڵی سکاڵاکەی یەکلایینەکردەوە و دانیشتنەکەی بۆ ١١ی شوباتی ٢٠٢٤ دواخست. ئەمە نۆیەمین جارە دادگای فیدراڵی بڕیاردان لەبارەی یاسای هەڵبژاردنی کوردستان دوابخات، رۆژی ٢١ی کانونی دووەمی ٢٠٢٤ دادگای باڵای فیدراڵیی عێراق بۆ جاری هەشتەم بڕیاردانی لەبارەی سکاڵاکەی بۆ ئەمڕۆ یەکشەممە دواخستبوو، بەڵام ئەمڕۆش جارێکی دیکە دواخرا. سکاڵاکە لە دژی پێنج مادەی یاسای هەڵبژاردنی پەرلەمانی کوردستان تۆمارکراوە کە تایبەتن بە ژمارەى کورسییەکانی پەرلەمان، یەک بازنەیی و فرە بازنەیی هەڵبژاردن و ژمارەی کورسی کۆتاکان لە پەرلەمانى کوردستان و، لەلایەن زیاد جەبار، سەرۆکی فراکسیۆنی یەکێتی لە خولی پێنجەمی پەرلەمانی کوردستان و ئامانج نەجیب شەمعوون، ئەندامى کریستیانەکان لە ئەنجومەنى پارێزگاى سلێمانى تۆمارکراون. ئەو مادانەی یاسای هەڵبژاردنی پەرلەمانی کوردستان کە سکاڵایان لەسەر تۆمارکراوە: مادەی یەکەم: پەرلەمانی کوردستان – عێراق لە (١١١) ئەندام پێکدێت. مادەی نۆیەم: هەرێمی کوردستان – عێراق بە یەک ناوچەی دەنگدان دادەندرێت و، بەسەر چەند مەرکەزێکی دەنگداندا دابەش دەکریت. مادەی ١٥: بۆ هەرێمی کوردستان، خشتە بەناوی دەنگدەران بۆ دەنگدان، بەپێی مەرکەزەکانی هەڵبژاردن ئامادە دەکرێن و بە ریزبەندی پیتە ئەبجەدییەکان رێکدەخرێن کە پیشە و ناونیشانیان و بەروار و جێگەی لەدایکبوونیان تێدا تۆمارکراوە. ئەگەر لە توانادا نەبوو ئەوە بکرێت، ئەو کاتە دەستەی باڵا بۆی هەیە رێگەیەکی دیکەی لەبارتر بۆ وەدی هێنانی مەبەستی پێویست دیاریبکات. مادەی ٢٢: ١- هەر کیانێکی سیاسی لە هەرێمی کوردستان – عێراقدا بۆی هەیە لیستێکی تایبەت بە ناوی پالێوراوەکانی خۆی لەسەر ئاستی کوردستان – عێراق بکات کە رێژەیەکی ئافرەتی تێیدا بێت لە سەدا ٣٠ کەمتر نەبێت و، ناوی پالێوڕاوەکانیش بە شێوەیەک ریزبەند کرابن کە نواندنی رێژەی ناوبراوی ئافرەتان لە پەرلەماندا گەرەنتی بکات. بە مەرجێک ژمارەی پاڵێوراوەکان لە هەر لیستێکی هەڵبژاردندا لە سێ پالێوڕاو کەمتر نەبن. ٢- لیستی پاڵێوراوەکان لە ماوەی (١٥) رۆژدا لە رێککەوتی راگەیاندنی وادەی هەڵبژاردن پێشکەش بە سەرۆکی دەستەی باڵا دەکرێت و هەموو بەڵگەنامەیەکی پێوە دەلکێندرێت کە لە مادەی ٢١دا داواکراون. مادەی ٣٦: ١- پێنج کورسی بۆ کلدان، سریان ‌و ئاشووری تەرخاندەکرێت. پاڵێوراوانی ئەو پێکهاتەیە کێبڕکێیان لەسەر دەکەن. ٢- پێنج کورسی بۆ تورکمان تەرخاندەکرێن و، پاڵێوراوانی ئەو پێکهاتەیە کێبڕکێیان لەسەر دەکەن. ٣- یەک کورسی بۆ ئەرمەن تەرخاندەکرێت و، كاندیده‌كانى ئەو پێکهاتەیە کێبڕکێی لەسەر دەکەن.

هاوڵاتی ژمارەی توشبووانی شێرپەنجە لە پارێزگای دهۆک گەیشتووەتە هەزار و 180 کەس، بەڵام لەو سنوورە تاوەکو ئێستا هیچ نەخۆشخانەیەکی تایبەت بە تووشبووانی نەخۆشی شێرپەنجە نییە. ئەمڕۆ 4ی شوباتی ٢٠٢٤ وەک ڕۆژی جهانی شێرپەنجە دیاریکراوە د.چەکدار ئەحمەد، یاریدەدەری بەڕێوەبەری سەنتەری شێرپەنجە لە نەخۆشخانەی ئازادی بە هاوڵاتی وت "لە سنووری پارێزگای دهۆک ژمارەی توشبووانی شێرپەنجە گەیشتووەتە هەزار و 180 تووشبوو، لەسەر ئاستی هەرێمی کوردستان رێژەی توشبوون بە شێرپەنجە لە پارێزگای دهۆک لە ١٢٪یە، شێرپەنجەی مەمک لە ئاستی یەکەمە و شێرپەنجەی سییەکانیش لە ئاستی دووەمە". ناوبراو وتیشی "تائێستا هیچ نەخۆشخانەیەکی تایبەتمان نییە بە تووشبووانی شێرپەنجە، تەنها سەنتەری تایبەت هەیە لە نەخۆشخانەی ئازادی، سەڕەرای ئەمە هەموو شتێک بۆ تووشبووان دابیندەکەین".