هاوڵاتی جێگری یەکەمی سەرۆکی ئەنجومەنی نوێنەرانی عێراق رایگەیاند، ھیچ ئاستەنگییەک لەبەردەم پڕۆژەی بودجەدا نەماوە و بەگوێرەی رێککەوتنەکانیش، سبەی دووشەممە ئەنجومەنی نوێنەران دەنگ لەسەر پڕۆژەکە دەدات. موحسین مەندەلاوی، جێگری یەکەمی سەرۆکی ئەنجومەنی نوێنەران شەوی رابردوو سەرۆکایەتی کۆبوونەوەی لیژنەی دارایی کرد و رایگەیاند، ھەموو لایەنە سیاسییەکان رێککەوتوون لەسەر پەسەندکردنی پڕۆژەیاسای بودجە، بەگوێرەی ئەو رێککەوتنەش سبەی دوشەممە لە کۆبوونەوەی ئەنجومەنی نوێنەراندا دەنگ لەسەر یاسای بودجە دەدرێت. هاوکات جەمال کۆچەر، ئەندامی لیژنەی دارایی پەرلەمانی عێراق بە رۆژنامەی "السباح"ی راگەیاند، "رۆژی دوشەممە رەشنوسی بودجە لە چوارچێوەی لیژنەی دارایی تەواو دەکرێت، چونکە ئەو بابەتە ماوەتەوە لە سێ بڕگە تێناپەڕێت و هەمو بابەتەکان یەکلایی کراونەتەوە، بەو پێیەی پرسی پشکی هەرێم و پرسی گواستنەوەکان و پرسی بڕیاردان لەسەر ئەو بڕگانە کە پەرلەمان بەنیازە بۆ بودجە زیاد بکات، ماونەتەوە". ئاماژەی بەوەشکرد، "سەبارەت بە تێپەڕاندنی بودجە، بە ئاسانی تێدەپەڕێنرێت لەبەر کۆمەڵێک هۆکار، یەکەمیان ئەوەیە کە هەموان چاوەڕێی بودجە دەکەن چونکە خزمەت بە هەمو چین و توێژەکانی کۆمەڵگا دەکات، دوەمیش ئەو بلۆکانەی کە پێکهێنەری حکومەتن خۆیان کۆنتڕۆڵی پەرلەمان دەکەن و بۆیە بودجە بە ئاسانی دەنگی لەسەر دەدرێت، سێیەمیش هیچ گۆڕانکارییەکی گەورە لەسەر بودجە نییە". ئەو ئەندامەی پەرلەمان وتیشی، "بودجەی ئەمساڵ کورتهێنانەکەی تێدەپەڕێنێت، هەروەها سەبارەت بە بودجەی دو ساڵی داهاتوش، سنوردارکردنێکی بۆ زیادکراوە". لیژنەی دارایی راپۆرتی کۆتایی خۆی لەسەر زیاتر لە ٩٠%ـی ماددەکانی پڕۆژەی بودجە ئامادە کردووە و لە چەند کاتژمێری داھاتوودا ئاڕاستەی سەرۆکایەتی پەرلەمانی دەکات. لەئێستادا ١٠ ئەندامی ئەنجومەنی نوێنەران کە زۆرینەیان سەر بە فراکسیۆنە شیعەکانن داوا دەکەن ھەرێم سەرجەم داھاتە نەوتی و نانەوتییەکانی رادەست بکات ئەو کات شایستە داراییەکانی بۆ بنێردرێت، نوێنەرانی کوردیش ئەو پێشنیازە رەتدەکەنەوە، بەوھۆیەش تەنھا پشکی ھەرێم لە پڕۆژەی بودجەدا یەکلایی نەکراوەتەوە.
هاوڵاتی ئێران جارێکی دیکە هەڕەشە لەهێزە کوردیەکانی دژبەری دەکات کە لەهەرێمی کوردستانن، فەرماندەیەکی سوپای پاسداران دەڵێت ئەگەر عێراق ئەو هێزانە دەرنەکات هێرش دەکەنەسەریان. محەمەد پاکپوور، فەرماندەی هێزی زەمینی سوپای پاسدارانی ئێران بە ئاژانسی هەواڵی تەسنیمی ڕاگەیاند: “چاوەڕێی ئەوە دەکەین حکومەتی عێراق ئەرکەکانی خۆی جێبەجێ بکات و کاتمان پێداون بۆ ئەو کارە و ئەگەر ئەوە نەکەن، ئەوا هێرشەکانی سوپای پاسداران بۆ سەر بنکە و بارەگاکانی ئەو حزبانە بەردەوام دەبن.” لەماوەی چەند مانگی ڕابردوودا و بە تایبەتی لە کاتی ناڕەزایەتییە سەرتاسەرییەکانی ئەم دواییەی ئێران، بنکە و بارەگای حزبەکانی ڕۆژهەڵاتی کوردستان، چەندین جار لە لایەن سوپای پاسدارانەوە بە مووشەک و فڕۆکەی بێفڕۆکەوان هێرشی کراوەتە سەر. ئێران حزبە کوردیەکان تۆمەتبار دەکات بە هاندانی ناڕەزایەتیەکانی دژ بە حکومەت لە ئێران و ناردنی چەک لە ڕێگای قاچاغەوە بۆ ئەو وڵاتە.تۆمەتەکەش بەردەوام لەلایەن حزبە کوردیەکانەوە ڕەتدەکرێتەوە.
هاوڵاتی وەزارەتی کشتوکاڵی حكومەتی هەرێمی كوردستان، شەش ڕێکاری بەپەلە بۆ ڕێگری لە پەرەگرتنی نەخۆشیی تای خوێنبەربوون دەرکرد،داوای کۆنترۆڵکردنی دیاردەی هێنانی ئاژەڵ بە شێویەکی نافەرمی دەکات. ڕێکارەکانی وەزارەتی کشتوکاڵ بۆ ڕێگری لە بڵاوبوونەوەی نەخۆشییەکە ئەمانەن: یەکەم: پێویستە ئاژەڵەکان لە سەربڕخانە فەرمییەکان سەر ببڕدرێن و بە پشکنین و مۆری فەرمیی ڤێرتێرنەری بچێتە بازاڕەوە؛ سەربڕینی ئاژەڵیش لەسەر ڕێگاکان و لاکۆڵانەکان قەدەغەیە. دووەم: دەبێت پشکنین بۆ ئاژەڵەکان پێش سەربڕین و دوای سەربڕین بکرێت، بە مەبەستی دڵنیابوونەوە لە تەندروستیی ئاژەڵەکە. سێیەم: پێویستە ڕێکارە تەندروستییەکان بۆ پۆشینی جلوبەرگی تایبەت و کەلوپەلی سەربڕین لە سەربڕخانەکاندا ڕەچاو بکرێت. چوارەم: کەرەنتینەکانی ئاژەڵ لە مەرز و فرۆکەخانەکاندا، پێویستە پشکنینی ورد بۆ ئەو ئاژەڵانە بکەن کە دێنە ناو هەرێمی کوردستان، بە مەبەستی دڵنیابوونەوە لە تەندروستیی ئاژەڵەکان. پێنجەم: وەزارەتی کشتوکاڵ ڕێکاری پێویست دەگرێتە بەر بە مەبەستی دابینکردنی دەرمانی شوشتنی ئاژەڵ بۆ لەناوبردنی مشەخۆری دەرەکی (قڕنە) کە هۆکاری سەرەکیی گواستنەوەی ڤایرۆسی نەخۆشیی تای خوێنبەربوونە لە نێوان ئاژەڵەکان، ئەم هەڵمەتە لەسەر ئاستی هەرێمی کوردستان دەبێت. شەشەم: کۆنترۆڵکردنی دیاردەی هێنانی ئاژەڵ بە شێوەیەکی نافەرمی و لە سنوورەکانی دەرەوە و نێوان هەرێمی کوردستان و عێراق، هەروەها ڕێگەگرتن لە هێنانی ئاژەڵ لەو پارێزگایانەی کە نەخۆشیی تای خوێنبەربوونی تێدا بڵاو بووەتەوە. وەزارەتی کشتوکاڵ جگە لە دەرکردنی چەند ڕێکارێک بۆ ڕێگری لە پەرەگرتنی ئەو نەخۆشییە، هانی هاووڵاتییان و گۆشتفرۆشانیش دەدات خۆیان بپارێزن و ڕێنماییە تەندروستییەکان جێبەجێ بکەن.
هاوڵاتی بەوتەی ئەندامێکی ئەنجومەنی کەمپی مەخمور گەمارۆدانی کەمپەکە لەسەر داوای تورکیایە و سوپای عێراق دەیەوێت تەلبەندی بکات و پاشان کامێرای لێ جێگیربکات، فەرماندەیەکی پێشمەرگەش دەڵێت تورکیا لە ساڵێکدا 11 جار بۆردوومانی کردووە. دوای ئەوەی لەشەوی ڕابردوەوە هێزێکی زۆری سەربازی عێراق دەوری کەمپی مەخموریانداوە، هاوڵاتیانی ناو کەمپەکە چوونەتە بەرامبەر سوپای عێراق و ڕێگە نادەن هێزەکە نزیکتر ببنەوە. بێوار ئەنوەر ئەندامی ئەنجومەنی کەمپی مەخمور بەهاوڵاتی وت: تائێستا ئەمە سێیەم جارە سوپای عێراق و پارتی دەیانەوێت کەمپی مەخمور تەلبەند بکەن و چاودێری بخەنەسەر. بەرپرسانى سوپای عێراق داوای کۆبوونەوەیان لە بەڕێوەبەرانى کامپی مەخمور کرد، بۆ ئەوەى گفتوگۆ لەسەر ئەو پرسە بکەن و ڕێگەیان بدرێت چوار دەوری کامپەکە تەلبەند بکەن، بەڵام دوای کۆبوونەوەیەکى درێژ نەگەیشتن بە هیچ ئەنجامێک. لە کۆبوونەوەکەدا بەرپرسانى سوپای عێراق سوربوون لەسەر ئەوەى کە دەیانەوێت دەوری کامپەکە تەلبەند بکەن، بۆ ئەوەى لەژێر کۆنترۆڵی خۆیان دابێت، بەڵام بەرپرسانى کامپەکە جەختیان لەوە کردوە کە بەهیچ شێوەیەک ڕێگە بەو کارە نادەن و بە هەموو توانایانەوە ڕووبەرووی ئەو هەوڵەی سوپای عێراق دەبنەوە. دوای بێئەنجامبوونى کۆبوونەوەکە، هاوسەرۆکی ئەنجومەنی گەلی مەخمور، فیلیز بوداک، ڕاگەیەنراوێکى بڵاوکردەوەو ڕایگەیاند: سوپای عێراق دەیویست ناوچەکە بە سەرباز و پۆلیس و سەربازەکانی گەمارۆ بدات بەبێ ئەوەی ئاگاداری خواست و ویستی ئێمە بن. وتیشی:" ئێمە خەڵکی مەخمور، نزیکەی ۳۰ ساڵە خواستی خۆمان ڕادەستی هیچ کەسێک نەکردووە، ئێمە حکومەتی عێراق هیچ یەکێک لە کێشەکانمان چارەسەر ناکات، ئاسایشی ئێمە ناپارێزێت و ئێستا دەیانەوێت تاوەر لە دەوروبەری کەمپەکە دابنێن." فیلیز بوداک ئەوەش خستەڕوو، "وەک ئەوەی هیچ هێرشێکی ئاسمانی لە کەمپەکەدا نەبێت، جارێکی دیکە بەبێ هیچ کێشەیەک، هیچ پێداویستییەکی ژیان نەبوو، ئایا تەنها کێشەکە ئەوەیە کە تاوەرەکان لە دەوروبەری کامپەکە دابنێن؟" هەروەها ئەوەشى وت: "ئێمە کاتژمێرێک ڕاوێژ و گفتوۆمان لەگەڵ یەکتر کرد، بەڵام ئەوان سوورن لەسەر دانانی تاوەر و قولەى چاودێر لە چوار دەوری کامپەکە ئەوان دەڵێن کە خەڵک ئەمەیان دەوێت، بەڵام ئێمە پێمان وتن کە گەل خاوەن ئیرادەی خۆیەتى و ئەمە قبوڵ ناکات، گەل ٣٠ ساڵە لێرە تێکۆشان دەکات." لەکۆتایشدا "هاوسەرۆکی ئەنجومەنی گەلی مەخمور باسی لەوە کرد، دوای گفتوگۆیەکى درێژ سوپای عێراق سورن لەسەر دانانى قولەو تاوەر، بەڵام گەلی ئێمە ئیرادەى خۆی تەسلیمی هیچ کەسێک ناکات، گەل ئیرادەى خۆی تەسلیمی دەوڵەتى تورک نەکردوە تەسلیمی عێراقیشی ناکات." کەمپی مەخمور لەقەزای مەخمورە سەر بەپارێزگای هەولێر لەهەرێمی کوردستان، کەمپەکە زیاتر لە 30 ساڵە پەنابەرانی باکوری کوردستانی تێدا نیشتەجێن و ئێستا ژمارەیان زیاتر لە 11 هەزار کەسە و زیاتر لەنیوەیان ژن و منداڵن
هاوڵاتی هاوڵاتیانی تورکیا لە دەرەوەی وڵات ئەمڕۆ دەتوانن لە کونسوڵخانە، باڵیۆزخانە و دەروازە سنوریەکان دەنگ بدەن. لە ٧٣ وڵات، ١٥١ ناوەند کراونەتەوە و ١٦٧ سندوق دانراون، هەڵبژاردنەکە تاوەکو کاتژمێر ٥ی ئێوارەی ٢٤ی مانگ بەردەوام دەبێت. لە ٢٨ی ئایاردا دوای ئەوەی پرۆسەی هەڵبژاردن لە ناوخۆی تورکیاش کۆتایی هات، دەنگەکانی دەرەوەی وڵات لە رێگەی ناوەندە دیپلۆماسییەکانەوە، رەوانەی تورکیا دەکرێن. بەگوێرەی ئەنجامە فەرمییەکان کە دوێنێ کۆمسیۆنی باڵای هەڵبژاردنەکانی تورکیا بڵاوی کردەوە، لە دەرەوەی تورکیا ملیۆنێک و ٦٧٦ هەزار و ٢٦٣ کەس و لە دەروازەکانیشدا ١٤٦ هەزار و ٨٤٧ کەس لە خولی یەکەمی هەڵبژاردندا دەنگیان دابوو، واتە ٥٣٪ی دەنگدەرانی دەرەوەی وڵات بەشداریان لە هەڵبژاردنەکاندا کردبوو. کۆمسیۆن ئاماژەی بەوەکرد، رەجەب تەیب ئەردۆغان، لە دەرەوەی تورکیا ٩٦٧ هەزار و ١٨٠ دەنگ و لە دەروازە سنوریەکان ٨٠ هەزار و ٥٦٧ دەنگی بەدەست هێناوە. هەروەها کەمال کڵچدارئۆغڵوش؛ لە دەرەوەی تورکیا ٦٦٥ هەزار و ١١١ دەنگ و لە دەروازە سنوریەکان ٥٦ هەزار و ٣١٨ دەنگی بەدەست هێناوە.
هاوڵاتی بەوتەی ئەندامێکی ئەنجومەنی کەمپی مەخمور گەمارۆدانی کەمپەکە لەسەر داوای تورکیایە و سوپای عێراق دەیەوێت تەلبەندی بکات و پاشان کامێرای لێ جێگیربکات، فەرماندەیەکی پێشمەرگەش دەڵێت تورکیا لە ساڵێکدا 11 جار بۆردوومانی کردووە. دوای ئەوەی لەشەوی ڕابردوەوە هێزێکی زۆری سەربازی عێراق دەوری کەمپی مەخموریانداوە، هاوڵاتیانی ناو کەمپەکە چوونەتە بەرامبەر سوپای عێراق و ڕێگە نادەن هێزەکە نزیکتر ببنەوە. بێوار ئەنوەر ئەندامی ئەنجومەنی کەمپی مەخمور بەهاوڵاتی وت: تائێستا ئەمە سێیەم جارە سوپای عێراق و پارتی دەیانەوێت کەمپی مەخمور تەلبەند بکەن و چاودێری بخەنەسەر. وتیشی: بەڵام ئێمە بەهیچ شێوەیەک ڕێگا بەوە نادەین چونکە بەپێی یاسای نەتەوەیەکگرتوەکان ئێمە پەنابەرین و بەبڕیاری ئەوانیش جێگیر بووین و هەمومان خەڵکی مەدەنین ئەو بڕیارەش لەسەر داوای تورکیایە کە دەیەوێت چاودێری توند بکرێتە سەر کەمپەکە. ئەو ئەندامەی ئەنجومەنی کەمپی مەخمور دەشڵێت پێشتر حکومەتی عێراقیان ئاگادار کردووەتەوە کە کەمپەکە پەنابەری سیاسین و تەلبەندکردنی کەمپەکە لەبەرژەوەندی عێراقدا نییە. بێوار ئەنوەر هۆشداریش دەدات لەوەی خەڵکی کەمپەکە ئەگەر گیانی خۆشیان بکەنە قوربانی ئامادەنین ڕێگە بدەن کەمپەکە تەلبەند بکرێت و چاودێرییان بخرێتەسەر. هەر لەوبارەیەوە غای فەیسەڵ فەرماندەی پێشمەرگە لەسنوورەکە بەهاوڵاتی وت: پێشر وەکو یەکێتی ناوبژیوانیمان کردووە و دانوستانمان ئەنجامداوە، جگە لەوەش بە بەردەوامی لە لایەن پارتییەوە ڕێگیریان لێ دەکرێت بە تایبەتی کابینەی نۆی حکومەتی هەرێمەوە ڕێگە نادرێت نەخۆشەکانیان ببەنە نەخۆشخانەکانی هەولێر و خواردن و پێداویستیان پێ بگات. غازى فەیسەڵ ئاماژەى بەوەشکرد، دەوڵەتی تورکیا لە ساڵێکدا ١١ جار کامپەکەی بۆردمان کردووە بە فڕۆکەی بێ فڕۆکەوان، پێویستە لە ئاسمانەوە بپارێزرێن، تەنیا دوژمنیش لە ناوچەکەدا، کە زیانی هەیە و پێویستە ڕووبەڕویان ببینەوە چەکدارانی داعشن. کەمپی مەخمور لەقەزای مەخمورە سەر بەپارێزگای هەولێر لەهەرێمی کوردستان، کەمپەکە زیاتر لە 30 ساڵە پەنابەرانی باکوری کوردستانی تێدا نیشتەجێن و ئێستا ژمارەیان زیاتر لە 11 هەزار کەسە و زیاتر لەنیوەیان ژن و منداڵن
هاوڵاتی سوپای عێراق هەوڵدەدات بە دەیان ئۆتۆمبێلی زرێپۆش دەوروبەری کەمپی پەنابەرانی مەخمور بە تەلی دڕکاوی گەمارۆ بدات. لە بەرەبەیانی ئەمڕۆوە هێزێکی سوپای عێراق دەوربەری کامپی مەخموری گرتوە و دەیەوێت بە بیانوی "پاراستنی کەمپەکەیە" بەهێز دەوروبەرى کامپەکە تەلبەند بکات، بەڵام دانیشتوانی کامپەکە لەبەردەم ئۆتۆمبێلەکانی ئەو هێزەکەدا گردبونەتەوە و رێگە نادەن بنکەی سەربازیی دروست بکەن. حکومەتی عێراق دەستی بە هەوڵەکانی بۆ گەمارۆدانی کەمپی پەنابەرانی مەخمور کرد و بۆ ئەوەش دەیەوێت دەوروبەری کامپەکە بە تەلی دڕکاوی بگرێت، دەیان ئۆتۆمبێلی زرێپۆش، بازگەکە و دەروازەی کامپەکەیان گرتووە و دەیانەوێت بچنە ناو کامپەکەوە و بە تەلی دڕکاوی دەورووبەری کامپەکە گەمارۆ بدەن. حکومەتی عێراقی دەیان ئۆتۆمبێلی سەربازیی بە چەک، شۆفڵ و حەفارە و تەلی دڕکاویی بە دەوروبەری کامپەکەدا بڵاوەپێکردوە و دەیەوێت دەوروبەری کامپەکە بە تەلی دڕکاوی گەمارۆ بدات، خەڵکی کەمپەکە دەستە دەستە بەرەو بازگەکە دەڕۆن و دژی ئەو هەوڵەی عێراق وەستاونەتەوە. ئەوە لە کاتێکدایە سوپای عێراق لە ۲۷ی کانوونی یەکەمی ۲۰۲۱ دا هەوڵی دابوو کەمپی مەخمور بە تەلی دڕکاوی گەمارۆ بدات، بەڵام بەهۆی نارەزائئ خەڵکی مەخمورەوە ناچاربوون بکشێنەوە و دەست لەو هەوڵەیان هەڵبگرن.
هاوڵاتی بەڕێوەبەرایەتی کەشناسی و بومەلەرزەزانی هەرێمی کوردستان رایگەیاند، ئەمڕۆ ئاسمان بە شێوەیەکی گشتی ئاسمانی هەرێم هەوری باراناوی دەبێت و هەورە بروسکەی لەگەڵدایە، سبەی یەکشەممەش ئاسمان هەوری تەواو دەبێت لەگەڵ بارینی باران لە هەندێک ناوچەدا و هەورە تریشقەشی لەگەڵدایە. بەشی پێشبینییەکانی کەشناسی لە وەزارەتی گواستنەوە و گەیاندن رایگەیاند، ئەمڕۆ بە شێوەیەکی گشتی ئاسمانی هەرێمی کوردستان هەوری باراناوی دەبێت و هەورە تریشقەشی لەگەڵدایە، هەندێک جار بارانبارین بە لێزمە دەبێت. پلەکی گەرما نزم دەبێتەوە بە (5 تا 7) پلەی سیلیزی بە بەراورد لە تۆمارکراوی رۆژی پێشوو. سەبارەت بە کەشوهەوای سبەی کەشناسی رایگەیاندووە، سبەی یەکشەممە ئاسمان هەوری تەواو دەبێت لەگەڵ بارینی باران لە هەندێ ناوچەدا و هەورە تریشقەشی لەگەڵدایە، لە دوای نیوەرۆ کاریگەری بارانبارین کەمتر دەبێت لە هەندێک ناوچە بە شێوەی نمە باران دەبارێت. بەرزترین پلەکانی گەرمای پێشبینیکراو بە پلەی سیلیزی: هەولێر: 30 سلێمانی: 27 دهۆک: 27 کەرکوک: 33 هەڵەبجە: 31 زاخۆ : 28 سۆران: 26 گەرمیان: 36
هاوڵاتی چیا نەوشیروان مستەفا بۆیەکەمجار لەسەر بەشداریکردنی لەبەرێوەبردنی بزووتنەوەی گۆڕان و پۆستی ڕێکخەری گشتی بۆ هاوڵاتی دەدوێت. چیا نەوشیروان مستەفا لەگفتوگۆیەکدا لەگەڵ سەرکۆ جەمال ڕۆژنامەنوس لەڕۆژنامەی هاوڵاتی ، باسی لەو دەنگۆیانە کرد کەلەسەر وەرگرتنی پۆستی ڕێکخەری گشتی گۆڕان لەلایەن ناوبراوەوە بڵاوبوونەتەوە، ئاماژەی بەوەکرد لەئایندەیەکی نزیکدا لەسەر ئەو پرسە و پرسەکانی دیکەی پەیوەست بەگۆڕان و هەرێمی کوردستان قسەی خۆی دەبێت، پەردەش لەسەر هەموو ناڕوونیەکان هەڵدەماڵێت. لەسەر بێدەنگی ناوبراو، چیا نەوشیروان مستەفا ڕونیکردەوە بەمزووانە لەدیدارێکدا لەگەڵ ڕۆژنامەنوسان وەڵامی سەرجەم پرسیارەکان دەداتەوە. لەدوای کۆچی دوایی نەوشیروان مستەفا کە ئەمڕۆ شەش ساڵ بەسەریدا تێپەڕی چەندین جار دەنگۆی ئەوە بڵاوبووەتەوە کە چیا نەوشیروان مستەفا دەیەوێت ڕۆڵی هەبێت لەناو گۆڕان دا و چاویشی لەپۆستی ڕێکخەری گشتییە.
هاوڵاتی ١٤ی ئایار هەڵبژاردنە چارەنووسسازەكەی توركیا بەڕێوەچوو، هەڵبژاردنی پەرلەمانی یەكلایی بووەوە و كورسی لایەنەكان لەپەرلەماندا ئاشكرا بوو، بەڵام هەڵبژاردنی سەرۆكایەتی یەكلایی نەبووەتەوەو كێبڕكێكە بەردەوامە. خولی دووەمی هەڵبژاردنی سەرۆكایەتی لە ٢٨ی ئەم مانگەدا بەڕێوە دەچێت، دەنگدانی دەرەوەی وڵاتیش لە ٢٠ی مانگدا دەستپێدەكات. كۆمسیۆنی هەڵبژاردنەكان كە ئۆپۆزسیۆن متمانەی پێ نییەو بەوە تۆمەتباری دەكات كە لەبەرژەوەندی دەسەڵات كاردەكات، هەنگاوێكی دیكەی ناوە كەگومانەكانی ئۆپۆزسیۆن زیاتر دەكات. كۆمسیۆن بڕیاری داوە لەو وڵاتانەی كەدەنگی كلچدارئۆغلۆ زیاترە ماوەی هەڵبژاردنی دەرەوەی وڵات لەپێنج رۆژەوە بۆ دوو رۆژ كەمبكاتەوە. لەوڵاتانی ئەمریكا، ئوستوراڵیا، بەریتانیا، ئیرلەندا، ئیسپانیا، ژاپۆن، كەنەدا و لیبیا كە تێیاندا كەمال كلچدارئۆغڵو كاندیدی هاوپەیمانی گەل و سەرۆكی گشتیی جەهەپە لەپێشەوەبووە، ماوەی دەنگدانی لەپێنج رۆژەوە بۆ دوو رۆژ كەمكردەوە. لەفەرەنسا، ئەڵمانیا، بەلجیكا و هۆڵندا كە رەجەب تەیب ئەردۆغان لە پێشەوەبوو، ماوەی دەنگدان دەستكاری نەكراوە. سینان ئۆغان كاندیدی هاوپەیمانی ئاتا كە لەخولی یەكەمی هەڵبژاردنی سەرۆكایەتیدا رێژەی ٥.٢٩٪ی دەنگەكانی بەدەستهێناوە، لە ئێستادا بووەتە ئەكتەری سەرەكی هەڵبژاردن و هەردوو كاندیدەكەی دیكە لەخولی دووەمدا پێویستیان بە دەنگەكانی ئەوەو بەتایبەتی كلچدارئۆغلۆ هەوڵدەدات دڵی ئۆغان رازی بكات.
هاوڵاتی بەپێی ئەو بەدواداچوونەی هاوڵاتی ئەنجامیداوە و ئەو زانیاریانەشی لەدەستەی سەربەخۆی مافی مرۆڤ و دادگاكانی هەرێمی كوردستان دەستیكەوتوون، لەهەرێمی كوردستان پێنج كەیسی تیرۆری رۆژنامەنوسی ماوەتەوە و بكوژانی ڕاستەقینەی ئاشكرانەكراون. یەكێك لەو كەیسانە كە كاوە گەرمیانییە بكوژە سەرەكییەكەی دەستگیركراوە بەڵام هێشتا كەسوكاری گومانیان هەیە لەوەی ئەو كەسەی لەپشتی كوشتنەكەیەتی بەرپرسێكی باڵایە و بكوژ تەنها جێبەجێكار بووە. ئەو كەیسانەشی تائێستا یەكلایی نەكراونەتەوە و گومانیان لەسەرە هەریەك لەكەیسەكانی (سەردەشت عوسمان و سۆرانی مامە حەمە و كاوە گەرمیانی و ویداد حسێن و عەبدولستار تاهیر شەریف)ە. هەروەها سەردەشت عوسمان یەكێك لەو رۆژنامەنوسانەیە لەهەرێمی كوردستان كە تیرۆركردنەكەی زۆرترین دەنگدانەوەی بەدوای خۆیدا هێناوە و لەڕۆژی 4-5-2010 لەهەولێر رفێندراو ڕۆژێك دواتر تەرمەكەی لەسەر رێگەی موسڵ دۆزرایەوە، تائێستاش كەسوكارەكەی و چالاكوانان داوای بەسزاگەیاندنی بكوژانی دەكەن و پێیان وایە لەسەر چەند وتارێك تیرۆركراوە. سەندیكای رۆژنامەنوسانی كوردستان و سەنتەری میترۆ وەك رۆژنامەنوسێكی تیرۆركراو هەژماریان كردووە، بەڵام قسەی بەرپرسانی ئەمنی ئەوکاتی هەولێر ئەوەبوو کە روداوەکە کارێکی تیرۆرستی بووە. بەشدار عوسمان برای سەردەشت عوسمان بەهاوڵاتی وت:»كەیسی تیرۆركردنی سەردەشت عوسمان لای حكومەت داخراوەو هەر باسیشی لێوەناكرێت «. «بەڵگەی زۆر لەبەردەستدا هەبوو كە دەتوانرا بكوژانی سەردەشت دەستگیربكرێن، بەڵام لەلایەن كاربەدەستانی باڵای حكومەتەوە پەردەپۆشكرا» بەشدار عوسمان وایوت. بەهۆی دۆسیەی كوشتنی ڕۆژنامەنوسان و چالاكوانان رێكخراوە نێودەوڵەتیەكان و تەنانەت وەزارەتی دەرەوەی ئەمریكاش لەڕاپۆرتەكانیدا رەخنەی توندیان لەهەرێمی كوردستان و عێراق گرتووە، بەڵام بەرپرسانی هەرێم و عێراق بەردەوام ڕاپۆرتە نێودەوڵەتیەكان ڕەتدەكەنەوە و باس لەوەدەكەن هەرێمی كوردستان ئازادی رادەربڕینی تێدایە. ئەم زانیارییانەو چەندین داتا لە ڕاپۆرتێکی ئەم هەفتەیەی ژمارە 2018 ی ڕۆژنامەی هاوڵاتی بڵاوکراوەتەوە . هاوڵاتی ناوو ژمارەی ئەو رۆژنامەنووسانە بڵاو دەكاتەوە كە 1999 تا 2019 تیرۆر كراون و باس لە جیاوازی ئامارەکان دەکات کە لەلایەن سەندیكای ڕۆژنامەنوسان و سەنتەری میترۆ بڵاوکراونەتەوە.
شەنای فاتیح بەڕێوەبەری چاودێری كۆمەڵایەتی سلێمانی ئاشكرای دەكات بەشێك لەبەساڵاچوان كەسوكاریان هەیەو ئامادەنین لەخۆیانیان بگرن و بەخێویان بكەن، دەشڵێت:» بەشێكی بەساڵاچووان لەباخچەی خانەكەدا دادەنیشن و كاتەكانیان بەیاری دۆمینەوە بەسەردەبەن». لەهەرێمی كوردستاندا چوار خانەی بەساڵاچووان هەیە ئەوانیش خانەی بەساڵاچووانی هەولێر-سلێمانی-دهۆك-گەرمیان، كە بەساڵاچووان لەخۆدەگرن بەچەند مەرجێكی تایبەت كە. مەرجەكانیش ئەوەیە پێویستە ژنان لەتەمەنی ٥٥ ساڵیداو پیاو لە ٦٠ ساڵیدا بێت و عێراقی بن و نەخۆشی گوازراوەو دەروونی نەبێت و بێ كەس بێت و شوێنی حەوانەوەی نەبێت. بەپێی ئامارێكی وەزارەتی كاروكاروباری كۆمەڵایەتی كەدەست هاوڵاتی كەوتووە، لەهەرێمی كوردستاندا لەكۆی چوار خانەی بەساڵاچووان لەشارەكانی هەولێرو سلێمانی و دهۆك و ئیدارەی گەرمیان 152 بەساڵاچوو دەمێننەوە كە لەهەولێر 44 پیاوو 24 ژن، سلێمانی 18 پیاوو شەش ژن، دهۆك 26 پیاو و 22 ژن، گەرمیان نۆ پیاوو سێ ژن و ئەم ژمارانە بەردەوام لەگۆڕانكاریدان. بەشێك لەخانە بەساڵاچووەكانی هەرێمی كوردستان كێشەی نەبوونی بودجەی پێویست و كەمی كارمەندیان هەیەو خێرخوازان مانگانە بەبڕە پارەیەك هاوكاری خانەكان دەكەن. ژیار جەلال بەڕێوبەری چاودێری كۆمەڵایەتی سلێمانی لەلێدوانێكدا بەهاوڵاتی وت:» ئەو بەساڵاچووانەی لەخانەی بەساڵاچووانی سلێمانیدا دەژین سەرجەمیان بێ كەسوكارنین، زۆربەیان كەسوكاریان هەیەو هەشیانە كەسوكاریان دیار نیە یاخود نەهاتوون بەدەمیانەوە». هەروەها وتیشی:» بەشێكی بەساڵاچووان لەباخچەی خانەكەدا دادەنیشن یان كاتەكانیان بەسەیری تیڤی و یاری دۆمینەوە بەسەردەبەن و بەشێكیشیان مۆڵەت وەردەگرن و دەچنە بازاڕ یان سەردانی كەسوكاریان دەكەن». بەڕێوەبەری چاودێری كۆمەڵایەتی سلێمانی لەسەر پرسی خزمەتگوزاری خانەكە باسی لەوەكرد كەخزمەتگوزاری تەندروستی چەند كاروبارێكی سادەی ڕۆژانە لەرێگەی بنكە تەندروستیەكانەوە ئەنجامدەدرێت و بۆ نەشتەرگەری گەورە دەبێت داوا لەخێرخواز یان نەخۆشخانەكان بكرێت بۆ ئەوەی بەبێ بەرامبەر یان بەنرخێكی كەمتر ئەنجامبدرێت و بۆ دەرمانەكانیشیان پێویستە بەڕێوەبەرایەتی دابینی بكات یان داوا لەخێرخوازان بكرێت خەرجیی دەرمان دابین بكەن. «هاتنی كەیسی نەگونحاوی وەك نەخۆشی دەروونی و عەقڵی، یان نەگونجانی تەمەنی بەساڵاچووەكە و هەروەها كەمی كارمەندی چاودێر و كارگوزار بۆ خزمەتكردنی بەساڵاچووەكە چەند گیروگرفتێكن لەخانەكەماندا هەیە». ژیار جەلال وای وت. بەڕێوەبەری چاودێری كۆمەڵایەتی سلێمانی ئەوەشی خستەڕوو: «بەشێكی خەرجی خانە بەساڵاچووەكان حكومەت دابینی دەكات، بەڵام سێ مانگ جارێك پارە وەرەدەگرن كە ئەویش لەكاتی خۆیدا نادرێت، هەروەها بڕێك پارەی خێرخوازیان هەیە كەمانگانە وەریدەگرن و خەرجی خانەكەی پێ دابین دەكەین». بەپێی شەریعەتی ئیسلام، واجبە لەسەر كوڕو كچ یان كەسوكار دایك یان باوك یان مام و خاڵ و پور و داپیرەو باپیرە یان هەر كەسوكاری بێت بەخێویان بكەن و پێداویستییەكانیان بۆ دابین بكەن، ئەوەش وەك پاداشتی خوای گەورە دادەنرێت، سەرباری ئەوەی رێژەی 95% خەڵكی هەرێمی كوردستان مسوڵمانن، بەڵام بەشێكی كەم لە كوڕان و كچان دوای هاوسەرگیریان ئامادەنین دایك و باوكیان لەخۆبگرن و خۆیان دەیانبەن بۆ خانەی بەساڵاچوان، ئەوەش بەكارێكی نامرۆڤانە دادەنرێت لەئاستی كۆمەڵایەتی و ئاینیدا. محەمەد زۆراب یەكێكە لەو بەساڵاچوانەی لەگەڵ هاوسەرەكەی تازە لەخانەی بەساڵاچوانی سلێمانی وەرگیراون، لەلێدوانێكدا بەهاوڵاتی وت:»من كەسوكارم هەیە هەم برا و هەم خوشكەزا، هاوسەرەكەشم بە هەمانشێوە». وتیشی:»بەڵام نە براكانم و نە خوشكەزاكانم نەیانگرتوومەتە خۆ هەرچەندە موڵكێكی زۆرم بۆ بەجێمابوو و پارەی موڵكەكانیشیان لەدەست دەركردم، ئێستاش ئامادەنین بەخێومان بكەن و خۆشمان منداڵمان نییە». وەك ئەو بەساڵاچووە دەڵێت:»هەرچەندە خانووشم هەیە، بەڵام بەهۆی باری تەندروستی خۆم و هاوسەرەكەم ناتوانین كاروباری ڕۆژانەمان ئەنجام بدەین و بەناچاری ڕوومان لەخانەی بەساڵاچوان كردووە».
هاوڵاتی ناوەندی ڕاگەیاندن و چاپەمەنی هەپەگە بڵاویکردەوە، گەریلاکان لە لجێی ئامەد کاروانێکی ئۆتۆمبێلی سەربازییان کردووەتە ئامانج کە بۆ ئەنجامدانی ئۆپراسیۆن جوڵەی پێکرابوو، لە ئەنجامدا ١٣ سەرباز کوژراون. ناوەندی ڕاگەیاندنى هەپەگە ڕایگەیاند: "٣٠ نیسان کاروانێکی ئۆتۆمبێلی سەربازی کە بۆ ئەنجامدانی ئۆپراسیۆنی سەربازی کەوتبووە ڕێ کراوەتە ئامانج، لە ئەنجامدا ئۆتۆمبێلێک تێکشکێندراوە و ١٣ داگیرکەر سزادراون." هەروەها ڕاگەیەندرا لەهەمان ناوچە لە ١٠ی ئایاردا لە ئەنجامی ئۆپراسیۆنێک کە دەستیپێکرابوو دوو گەریلا شەهیدبوون. دقی ڕاگەیەندراوەکەی هەپەگە تیایدا باسی لە پێکدادانەکان کردوە: ١. هەرێمی ئامەد -سوپای تورکی داگیرکەر لە وەرزی زستانەوە هەوڵ دەدات لە ناوچەی هەرێمی شەهید سەرخۆبوونی ناوچەی لجێی ئامەد شاخ بگرێت و تیایدا جێگیر بێت. لە هەمان کاتدا لە ناوچەی شاخی دۆڵی جومعە، گوندی سیڤەرەک، گوندی مەدرەسە و شاخی مێرگ دەستی بە دروستکردنی بنکەی سەربازی کرد. لەگەڵ ئەو هەوڵانەش سوپای تورکی داگیرکەر لە ٦ مانگی رابردوودا لە هەرێمە ئۆپراسیۆن و بۆسەی ئەنجامداوە. -هێزەکانمان لەو ناوچەیە لە ٣٠ نیساندا لە نێوان گوندەکانی مێرگێ و گوندی سیڤەرەک بە تاکتیکی سابۆتاژ کاروانێکی ئۆتۆمبێلی سەربازییان کردە ئامانج کە بەرەو ئۆپراسیۆن دەچوو و رێگرییان لێکرد. لە ئەنجامدا ئۆتۆمبێلێکی سەربازی تێکشکا و ١٣ داگیرکەر کە تیایدابوو سزادران. ئۆپراسیۆنەکان لە ناوچەکە تا ٥ی ئایار بەردەوام بوون و بێ ئەنجام کۆتاییان هات. -سوپای تورکی داگیرکەر ١٠ی ئایار لە هەمان هەرێم دەستی بە ئۆپراسیۆن کردەوە و لە ئەنجامی هێرشەکانی دوژمندا هاوڕێمان دڵگەش زاگرۆس و باوەر کۆرکماز شەهیدبوون. ٢. هەرێمی زاپ -لە ١٦ی ئایاردا کاتژمێر ١٤:٢٠ داگیرکەران کە هێرشیان کردبووە سەر گۆڕەپانی بەرخودانی شاخی ئێف ئێم رووبەڕووی خۆپاراستنی هێزەکانمان بوونەوە. ٤. هەرێمی مەتینا -لە ١٨ی ئایاردا کاتژمێر ١٤:٢٠ داگیرکەران هێرشیان کردە سەر گۆڕەپانی بەرخودانی شاخی هەکاری، بەڵام رووبەڕووی خۆپاراستنی هێزەکانمان بوونەوە. ٥. هێرشەکانی سوپای تورکی داگیرکەر؛ -١٧ی ئایار شاخی بەهار، شاخی جودی، شاخی ئێف ئێم، گۆڕەپانەکانی بەرخودانی شاخی ئامێدی، دەوروبەری گوندی سێگرێ و گۆڕەپانی دەشتی کافیای گارە ٢٢ جار بە فڕۆکەی شەڕ بۆردومان کران. – لە ١٦، ١٧ و ١٨ی ئایاردا سەنگەرەکانی بەرخودان لە گۆڕەپانی بەرخودانی شآخی ئێف ئێم و شاخی جودی، شاخی شەهید حەقی، شاخی شەهید کاموران، شاخی شەهید هێمن، هەرێمەکانی چلوچار، دەوروبەری روباری لۆلان و سیدای خوکورک ٣٧ جار بە کاتیوش، تانک و چەکی قورس بۆردومان کران. -لە ١٧ی ئایاردا دەوروبەری شاخی مەزڵوم، کۆردینە، وتونا، سەرزێرێ و گوندی تروانشی مەتینا ٧ جار بە هەلیکۆپتەر بۆردومان کران”.
هاوڵاتی وەزارەتی ناوخۆی حکومەتی هەرێمی کوردستان ئاگادارییەکی سەبارەت بە لۆگۆی تاکسی بڵاوکردەوە و تێیدا رایگەیاند، هەموو تاکسییەکانی هەرێمی کوردستان دەبێت تا 15ـی تەمووز لۆگۆیان پێوەبێت، هەر تەکسییەکیش دوا ئەو بەروارە بێ لۆگۆ ببیندرێت، لەلایەن پۆلیسی هاتووچۆوە سزای دارایی دەدرێت. بە گوێرەی ئەو ڕێنماییەی وەزارەتی ناوخۆ، پێویستە: 1. هەموو تاکسییەک لە شار وشارۆچکەکانی هەرێمی کوردستان تا 15ی تەمووزی 2023 مامەڵەی لۆگۆی تاکسییان تەواو کردبێت و لۆگۆیان لە تاکسیەکانیان دابێت. ２. 3 کارتی زانیاری داواکراویان لە ناو تاکسییەکانیان بە گوێرەی ڕێنمایی تایبەتمەند کە لە بەڕێوەبەرایەتی گواستنەوە بۆیان دروست دەکرێت، هەڵواسیبێت. 3. بە پێچەوانەوە لە دوای ئەو بەروارە دەسەڵات دەدرێتە ئەفسەری پۆلیسی هاتوچۆ کە لە کاتی بینینی تاکسی بێ لۆگۆ ڕاستەوخۆ سزای دارایی بۆ بنووسێت (بە بڕی ٤٠ چل هەزار دینار) و بە سیستم بۆی ڕەوانە بکرێت. ４. هەر شوفێرێکی تاکسی لە ماوەی مانگێک بڕی ئەو سزایەی دەکەوێتە سەری بە هۆی تەواونەکردنی لۆگۆوە یان سەرپێچیکردن بە دەستکاریکردنی لۆگۆ و کارتی زانیاری تاکسییەکە، لە بەڕێوەبەرایەتی هاتوچۆی تایبەتمەند یەکلا نەکاتەوە، سزاکەی دەبێتە دوو بەرامبەر. ５. هەروەها بە گوێرەی ڕێنماییەکە، تاکسی ناوشار ناتوانێت لە هێلەکانی دەرەوەی شار کار بکات و تەکسی هێلەکانیش ناتوانن لە ناوشار کار بکەن.
هاوڵاتی بزوتنەوەی گۆڕان بۆ یادی کۆچی دوایی نەوشیروان مستەفا،راگەیەندراوێک بڵاودەکاتەوە و ئاماژە بەوە دەکات، "پاش شەش ساڵ یار و نەریار گەیشتون بەو باوەڕەی کە بەرنامە و پاکێجانەى نەوشیروان مستەفا چارەسەرێکى بنەڕەتى بون بۆ کێشەکان. دەقی راگەیەندراوی شەشەمین ساڵیادی نەوشیروان مستەفا: هەینی، 19ی 5ی 2023 شەش ساڵ تێدەپەرێت بەسەر کۆچی دوایی بیرمەند و رۆژنامەنوس، شۆڕشگێڕ و ئەندازیاری راپەڕین و چاکسازی و گۆڕانکاری ڕەوانشاد نەوشیروان مستەفا ئەمین، ئەو رۆژە بۆ هاونیشتمانیان و ئازادیخوازان و نیشتمانپەروەران برینێکی ساڕێژنەکراوە. لە شۆڕشی نوێدا، پایەیەکی سەرەکی تێکۆشان و ئیرادە بو. لە ڕاپەرینی ئازاری 1991 ئەندازیار و فەرماندەی مەیدانی بو، لە دروستبونی حکومەتی هەرێمی کوردستاندا لە 1992، بەرگریکاری دەوڵەتی قانون و سوپای نیشتیمانی و ئابوری بەهێز و مافی هاوڵاتیان و پەرلەمانێکی بەهێز بو. لە دوای روخاندنی رژێمی بەعس لەگەڵ سەرکردە دیارەکانی دیکە سەلمێنەری مافەکانی کورد بو لە دەستوری عێراقدا، کە تاکو ئەم ساتەش قەڵغانی کوردە لە دانوستان لەگەڵ حکومەتی فیدراڵدا. ڕچە شکێن و دروستکەری یەکەمین هێزی ئۆپۆزسیۆنی مەدەنی و پەرلەمانی بو کە بزوتنەوەی گۆڕانە. قۆناغەکانی ژیانی سیاسی رەوانشاد پڕبون لە ئاڵنگاری و هەورازی سەخت، ئیرادەی بەهێز و پابەندن بون بیروباوەڕی رەوا و رۆشن بۆ زاڵ بون بەسەر تەواوی ئەو ئاڵنگارییانەدا. رەوانشاد تاکو دوا ساتەکانی ژیانی رۆحی روبەڕوبونەوەی لە دەست نەدا، بۆ خەڵک ژیا و گریانی قوڵی سەدان هەزار هاونیشتمانی سەلمێنەری ئەو راستیە بون، کە سەرکردەی نیشتمانی و ڕاستگۆو ڕیفۆرمخواز میللەتی لەگەڵدایە. هۆکاری ئەمەش رون بو، چونکە لای ئەو هێزی وڵات و حکومەت و سەرکردەکان لە زامنکردنی مافی خەڵکدایە و هێزی خەڵک و شەرعیەتی دیموکراتی سەرچاوەی فەرمانڕەواییە. لە ئامادەیی رەوانشاددا ئازادی و کەرامەتی هاوڵاتی کورد تا رادەیەکی زۆر پارێزراو بو، رەوانشاد کاری بۆ دەوڵەتی قانون، دادپەروری کۆمەڵایەتی، یەکسانی لە ماف و ئەرک، شەفافیەت، سوپایەکی نیشتیمانی، دادگا و دەسەڵاتی دادوەری سەربەخۆ و بەهێز، پەرلەمانی بەهێز و نوێنەری خەڵک کرد. هەمو ئەم ئامانجانە بۆ چاکەی گشتی و قازانجی خەڵک بو. هەر ئەوەش بو وایکردبو خەڵک متمانەی بە ڕەوانشاد و پڕۆژە سیاسی و ڕیفۆرمخوازیەکانی ببێت و لە ئامادەی رەوانشاددا 75% هاونیشتیمانیان متمانەیان بە پرۆسەی سیاسی و هەڵبژاردن هەبو، بەڵام ئەو متمانەیە تادێت لاوازتر دەبێت، ئەم راستیە بەڵگەنەویستە نیشاندەری سەنگی ئەو سەرکردە دەگمەنەیە. پاش شەش ساڵ یار و نەریار گەیشتون بەو باوەڕەی کە بەرنامە و پاکێجانەی ئەو چارەسەرێکی بنەڕەتی بون بۆ کێشەکان، رێگەی رزگار بون لە بازنەی قەیران و ناکۆکی و گەندەڵی و نادیموکراتی سیستەمی سیاسی هەر ئەو بەرنامەیە. ئەمڕۆ خواستی گۆڕانکاری سیاسی و سەربازی و ئابوری و بنیاتنانی دامەزراوەی نیشتیمانی بوە بە خواستی دەوڵەتە دیموکراتییە دۆستەکانی هەرێمی کوردستان، لە ناویاندا ئەمریکا، فەرەنسا، بەریتانیا، ئەڵمانیا، یەکێتی ئەوروپا و زۆر دەوڵەتی دیکە. یەکێک لە خەسڵەتە دیارەکانی ڕەوانشاد دەرفەتدان بو بە گەنجان و ژنان و هێنانە پێشەوەیان وەک سەرکردەی نوێ. ئەم یادە دەرفەتێکە بۆ ئەوەی هاورێکانی دوێنێ جارێکی دیکە ببنەوە بەهاورێ و هاوسەنگەر بۆ جێبەجێکردنی بەرنامەکانی، ئەمەش باشترین وەفایە بۆ ڕەوانشاد و خەڵکی کوردستان. ڕەوانشاد نەوشیروان مستەفا دونیابینیەکی فراوانی هەبو بۆ خەباتی گەلی کورد لە هەر چوار پارچەکەی کوردستان. هەرئەوەش بو وایکردبو سەرکردەکانی پارچەکانی تر لە کاتی سەخت و ئاڵنگاریدا پشتیان بە نەخشەڕێگا و پشتیوانیی ڕەوانشاد قایم بو. لێرەوەیە ڕۆڵ و پێگەی مێژویی ڕەوانشاد تەنها لە حیزب و بزوتنەوەیەکی سیاسیی و یەک پارچەی کوردستان سنوردار ناکرێ، بەڵکو وەک موڵکی خەڵک و خاکی کوردستان دەمێنێتەوە. لە کاتێکدا یادی شەشەمین ساڵیادی کۆچی دوایی رەوانشاد نەوشیروان مستەفا دەکەینەوە دەستێوەرانی حیزبی لەدامەزراوە نیشتمانیەکان زیاتر دەبێت، گەندەڵی و نادادی زیاتر بون، متمانەی هاوڵاتیان بە پرۆسەی سیاسی لاوازتر بوە. هەمو ئەمانەش هەڕەشەن لەسەر ئاسایشی نەتەوەیی و ئایندەی هەرێمی کوردستان. لەسەر ئەم بنەمایە، ئەمڕۆ لە هەمو کات زیاتر بیری سیاسی و روئیا و بەرنامەی نەوشیروان مستەفا زەرورە. پرۆژە و نەخشەڕێگای هەمەلایەنەکانی چارەسەری واقعی و رونن بۆ هەرێمی کوردستان و سەرکەوتن بەسەر ئاڵنگارییەکان و سود وەرگرتن لە دەرفەتەکان. ئەمەش ئەو ئیرادەی رەوانشاد نەوشیروان مستەفای ئەوێت. لەگەڵ ئەمانەشدا گرنگە ئەوەمان بیر بێت کە رەوانشاد دەیوت" لە هیچ حاڵەتێکدا نابێت خەڵک بێ ئومێد بێ. هەمیشە ئەبێ خەڵک چاوی لە ئاسۆبێ" رەوانشاد لە رۆژی هەینی، 22ی 12ی 1944 لە دایکبو، رۆژی هەینی 19ی 5ی 2017 کۆچی دوایکرد، رۆژی هەینی 19ی 5ی 2023 کە یادی شەش ساڵەی گیان شادبونی دەکەینەوە، دەکەین بە هەینی ئومێد و وەفا بۆ ئەو سەرکردە دەگمەنەی وەک خوێنبەری مێژو و ئێستا و داهاتوی گەلی کورد و ئازادیخوازان دەمێنێتەوە.
