هەسەدە وەمدانەوەى هێرشەکانى ڕاگرت دانوستان دەستیپێکرد

  هاوڵاتی ئەمینداری یەکگرتوی پێیوایە ئەوەی لەپەرلەمانی کوردستان دەگوزەرێ، پاشەکشێ و قەیرانە و داوادەکات فریای شکۆی پەرلەمان و "سومعەی" کوردستان بکەون. دوای رووداوەکانی دوو رۆژی رابردوو پەرلەمانی کوردستان کە تێیدا گرژیی و ئاڵۆزیی لەنێوان پەرلەمانتاران دروستبوو، ئەمڕۆ لە تویتێکدا سەلاحەدین محەممەد بەهائەدین، ئەمینداری گشتیی یەکگرتو رایگەیاند: "ئەوەی لەپەرلەمانی کوردستان دەگوزەرێ ، پاشەکشێ و قەیرانە، نوێنەرانی میللەت دابەزنە ئەو ئاستە لە پێشێلکردنی پەیڕەو و پشتگوێخستنی هەموونەریت و ئادابێک بەپاساوی داکۆکی لەحیزب ؟!". ئەمیداری یەکگرتو بە پێویستی دەزانێت "سەرۆکایەتی پەرلەمان و لایەنە مەرجەعەکانی ئەم کەسە هەڵەکارانە، فریای شکۆی پەرلەمان و سومعەی کوردستان بکەون". لە دانیشتنی رۆژی 26-10-2021 پەرلەمانی کوردستان گرژی و ئاڵۆزی دروستبوو، ئەندامانی فراکسیۆنەکانی دیکە دەڵێن، جەلال پەرێشان، ئەندامی فراکسیۆنی پارتی دیموکراتی کوردستان قسەی نەشیاوی بە پەرلەمانتارانی دژی حیزبەکەی گوتووە. بەڵام خۆی لە کۆنگرەیەکی رۆژنامەڤانیدا رەتیکردەوە کە ئەو قسەیەی کردبێت. کۆبوونەوەکەی پەرلەمانی کوردستان کە دوو رۆژ بەردەوام بوو و تێیدا بەدواداچوون بۆ نرخی سووتەمەنیی و گرانبوونی بەنزین و گاز دەکرا، ئەمڕۆ بەهۆی گرژی و ئاڵۆزیی و بایکۆتی فراکسیۆنەکان جگە لە فراکسیۆنی پارتی و پێکهاتەکان هەڵگیرا.

  سازدانی: شاناز حەسەن پزیشكێكی كورد كەپسپۆری جەراحیە لەبەریتانیا گروپێك پزیشكی هێناوە بۆ هەرێمی كوردستان و بڕیارە چەندین نەشتەرگەری ئەنجامبدەن و دەڵێت:» لەهەرێمدا دەرمان وەرگرتن وەك گوڵەبەڕۆژە بەكاردەهێنرێت ئەوە شتێكی زۆر خراپە». دیاری فەرەیدون قادر، پسپۆری جەراحی لەبەریتانیا لەم چاوپێكەوتنەیدا لەگەڵ هاوڵاتی كارو چالاكی خۆیان باس دەكات كە هاتوونەتە هەرێمی كوردستان و دەشڵێت:» كەرتی تەندروستی لەهەرێمدا زۆربەی كراوە بەتایبەت، ئەمە كارێكی زۆر خراپە، چونكە خەڵكی بارودۆخی داراییان ئەوەندە باش نیە لەكاتێكدا لەوڵاتێكی وەك بەریتانیا لەسەدا 95 خەڵك بێ بەرامبەر دەرمان و چارەسەری وەردەگرێت».   هاوڵاتی: چۆن بوو بڕیارتاندا لەگەڵ كۆمەڵێك گروپ لەپزیشكانی بەریتانی سەردانی كوردستان بكەن؟ دیاری فەرەیدون: وەك پزیشكێك دەمزانی كوردستان شوێنێكە پێویستی بەخزمەتكردنە بەتایبەت لەبواری تەندروستی، بۆیە میوانداریی ئەم گروپەم كردووە بەهاوكاری وەزارەتی تەندروستی و وەزیرو  دەزگای خێرخوازی بارزانی و سەندیكای پزیشككان كەهاوكارمانن لەهێنانی گروپەكەو كارئاسانیكردن بۆ كاركردن، بۆیە زۆر سوپاسیان دەكەم. ئێمە گروپێكین زیاتر لە 50 پزیشكی پسپۆری جەراحی، هەر مانگەو گروپێكیان دێنە كوردستان و خزمەت دەكەین، بەپسپۆری جیاواز، ئێستا چوار پسپۆرین، پسپۆری ئێسقان و شكاوی، پسپۆری جوانكاری رووداوەكان، پسپۆری سوتاوی، پسپۆری شەویلگە لەشاری هەولێر رۆژانە نەخۆش دەبینن بەبێ بەرامبەرو نەشتەرگەری پێویستیان بۆ دەكرێت. نەخۆشەكان لەڕێگەی خێرخوازەكانەوە سەردانمان دەكەن، یاخود لەڕێگەی كەمپەكانەوە یان دەزگای خێرخوازی بارزانیەوە لەوێوە نەخۆشەكان دەنێرن، بەڵام ئێمە وەك گروپەكە ژمارە مۆبایلمان هەیە هەر كەس ویستی سەردانی پزیشكەكان بكات دەتوانێت پەیوەندی بكات و سەردانیان بكات، ئێمە دەمانەوێت زۆرترین خەڵكی هەژار سودمەند بن لەئێمەو نەشتەرگەری پێویستان بۆ بكرێت یاخود دەرمانی پێویست وەربگرن.   هاوڵاتی: چەند رۆژە هاتوونەتە هەرێمی كوردستان؟ رۆژانە چەند نەخۆش دەبینن؟ دیاری فەرەیدون: لەئێستادا پێنج رۆژە هاتووینەتە هەولێرو نەخۆشەكان دەبینین، رۆژانە لەشوێنە تایبەتەكانمان 80 نەخۆش دەبینین، بەڵام بەیانیانیش لەڕێگەی كەمپەكانەوە یان ناوەندێكی تایبەت هەبێت دەچین و چارەسەری نەخۆشەكان دەكەین. پلانی جیاواز جیاوازمان هەیە دەچینە نەخۆشخانەكان بۆ نموونە نەخۆشخانەی پێشمەرگە یان هەر شوێنێكی تر، پلانمان هەیە خزمەتی ئێزیدیەكان بكەین كە هاوكارییان زۆر پێویستە كەپسپۆرێكی دەرونیشمان هەبووە بۆ حاڵەتە دەرونییەكان. هاوڵاتی: خەرجیەكانتان لەكوێوە دابین دەكرێت كەنەشتەرگەری بەبێ بەرانبەر ئەنجامدەدەن؟ دیاری فەرەیدون: ئەم گروپە پزیشكە لەبەرنامەماندایە ساڵانە دوو ملیۆن دۆلار خەرج بكەین لەكوردستان لەبواری تەندروستیدا، ئەو پارەیە خێرخوازی گەورە گەورەیە  لەوڵاتە جیهانیەكاندا وەك ئیمارات و بەریتانیا و ئەم پارانە بەكاردەهێنرێت بۆ نەخۆش. ئێمە زیاتر جەختمان لەسەر ئەوەیە بەگروپێكی كەم بتوانین زۆرترین نەخۆش ببینین بۆ ئەوەی زۆرترینی بەشە پارەكە بۆ نەخۆشەكان بێت نەك ستافێكی زۆر. لەئێستادا ئەوانەی نەشتەرگەرییان پێویست بێت هەموویان دیاریدەكەین و ئامادەیان دەكەین تا 13ی ئەم مانگە گروپێكی دیكەش دێنەوە كوردستان و پێكەوە نەشتەرگەریەكان بەهەمان شێوە بێ بەرامبەر ئەنجامدەدەین. هاوڵاتی: وەك پزیشكێكی كورد كە لەبەریتانیادا كاردەكەن، چەند ساڵە وەك پزیشكێك لەگەڵ ئەو گروپانەدا كاری پزیشكی خێرخوازی ئەنجامدەدەن؟ دیاری فەرەیدون: ماوەی دە ساڵە كاری خێرخوازی دەكەم و ساڵانە شەش مانگ زیاتر دێمە كوردستان، بەڵام بەداخەوە زۆر كەس ناتوانێت ئاگاداری ئەم گروپە بن و پێویستە لەسەر راگەیاندنەكان هاوكارمان بن بۆ ئەوەی زۆرترین خەڵكی هەژارو موستەهەق بتوانێت سود لەم گروپە وەربگرێت. ئێمە گروپێكی تەنیا خێرخوزاین و پەیوەندیمان بەهیچ لایەن و حزبێكی هەرێمەوە نیە، تەنیا هاوكاریمان پێویستە بۆ ئەوەی زۆرترین كەس ئاگاداری ئەم گروپە بێت و سودی لێوەربگرێت بۆیە هەر لایەنێك و كەسێك هاوكاریمان بكات دەستخۆشی لێدەكەین، تەنیا ئامانجان ئەوەیە هەژارو كەسانی موستەهەق خزمەت بكرێت. هاوڵاتی: بۆچی هەولێرتان هەڵبژاردووە لەهەرێمی كوردستاندا؟ دیاری فەرەیدون: هەولێر وەك ئەوە هەڵبژێردراوە، كە ئاسانترە بۆ هاتوچۆو زۆربەی لایەنە تەندروستیەكانی لێیە، ئەگینا بۆ ئێمە هیچ شارێك و شوێنێك جیاوازی نیە و حەزدەكەین زۆرترین كەس لەسلێمانی و شوێنەكانی دیكەوە سەردانمان بكەن و خزمەتیان بكەین ده‌شمه‌وێت لێره‌وه‌ سوپاسى وه‌زاره‌تى ته‌ندروستى به‌تایبه‌ت دکتۆر سامان و ده‌زگاى خێرخوازى بارزانى و سه‌ندیکاى پزیشکان بکه‌م که‌ زۆر هاوکارمان بوون. هاوڵاتی: بۆچوونتان چییە لەسەر ئەوەی لەهەرێمی كوردستان كەرتی تەندروستی بەرەو كەرتێكی تایبەت دەڕوات و كەرتی گشتی كەمبووەتەوە بۆ خزمەتی نەخۆش؟ دیاری فەرەیدون: بەداخەوە كەرتی تەندروستی لەهەرێمدا زۆربەی كراوە بەتایبەت، خەڵكەكە لەحكومەت زۆر كەم دەتوانێت خزمەتگوزاری دەستكەوێت، كەئەمە كارێكی زۆر خراپە، چونكە خەڵكی بارودۆخی داراییان ئەوەندە باش نیە هەموویان بتوانن لەنەخۆشخانە تایبەتەكاندا دەرمان و چارەسەر وەربگرن. لەكاتێكدا لەوڵاتانی دەرەوە وەك بەریتانیا لەسەدا 95 خەڵك بەبێ بەرامبەر دەرمان و چارەسەری وەردەگرێت، دەرمان و بینین و نەشتەرگەری هەمووی بێ بەرامبەر، تەنیا ئەو كەسانەی خۆیان دەیانەوێت بەتایبەت پزیشكەكە ببینن دێنە نۆرینگەی تایبەت و سەردانت دەكەن. هاوڵاتی: نەخۆش كە دەچنە لای پزیشك رەچەتەیەكی دوورودرێژی بۆ دەنووسێت كە دەیان جۆر دەرمان بەكاربهێنێت، لە بەریتانیا ئەمە چۆنە؟ دیاری فەرەیدون: شتێكی زۆر خراپ لەهەرێمدا دەرمان وەرگرتنە، كە وەك گوڵەبەڕۆژە بەكاردەهێنرێت، هەر پزیشكێك دەچیت رەچەتەیەكت بۆ دەنووسێت لەشەش جۆر كەمتر نیە نرخەكەشی 200 هەزارە. زیاتر لە 15 ساڵە پرۆفیسۆری پسپۆری جەراحیم لەلەندەن سێ رەچەتەی ئاوام نەنووسیوە، هەر ناینووسین، چونكە ئەوە كاری ئێمە نیە ئەو دەرمانە زۆرانە بەخەڵك بكڕیت، بۆیە ئەوە زۆر خراپە كەدەرمان زۆر بەكاردەهێنرێت.

  هاوڵاتی موراد قەرەیلان فەرماندەی بڕیارگەی ناوەندی پاراستنی گەل(نەپەگە) ڕایگەیاند:" دەوڵەتی تورک لەبەرامبەر بەرخۆدانی گەریلا لە باشوری کوردستان شکستی هێنا، لەبەرئەوەش دەیەوێت هێرش بکاتە سەر ڕۆژئاوای کوردستان، لەوێش شکست دەهێنێت". ئەمڕۆ چوارشەممە 27ی تشرینی یەکەمی 2021  موراد قەرەیلان فەرماندەی بڕیارگەی ناوەندی پاراستنی گەل(نەپەگە) لە ڕێگای ئامێری بێتەلەوە بۆ گەریلاکانی ئازادی قسەیکرد و چەند پەیامێکی گرنگی بڵاوکردەوە، کە لەبەشێک لە پەیامەکەدا ده‌ڵێت:"گەریلا تاکتیک و بەرەوپێشچوونی بەخۆیەوە بینیوە لەسەر هەوڵدانی ڕاست و خوێندنەوەی پارادیگمای ڕێبەر ئاپۆ و ڕاست خوێندنەوەی کات، لەم چوارچیوەیەشدا گەریلای ئازادی کوردستان کەوتە هەوڵدانی گۆڕانکاری لەسەر بنەمای گەریلای نوێ، گەریلای پسپۆڕ لە شیوازەکانی شەڕ دروست بوو، لە مەیدانەکانی ئازاد لەسەر بنەمای پاراستنی ستراتیژ وردبوونەوە دروست بوو، ڕێگاکانی ژێرزەوی و شەڕی تونێل وەک تاکتیک پێشخرا و لەگەڵ دەستپێکردنی هەنگاوی بازەکانی زاگرۆس و جەنگی خابور، گەریلا پیلانەکانی ڕژێمی ئاکەپە و مەهەپەی خنکاند". فەرماندەی بڕیارگەی ناوەندی پاراستنی گەل(نەپەگە) جه‌ختى له‌وه‌شکرده‌وه‌:"لەم کاتەدا گەریلا دوو نوێکاری گرنگی درووست کرد: ١-لەناو گەریلادا پسپۆڕییەتی و شەڕی تیم پێشکەوت. ٢-پێشخستنی ڕێبازەکانی شەڕی تونێل بۆ پاراستنی هەرێمە ئازادکراوەکان. موراد قەرەیلان وتیشى:"دووژمن وایدانابوو کە هەمیشە بە سیخوڕی و فڕۆکەی کەشف “سیخوڕی” دەستنیشان بکات و بە موشەک لێبدات، بەڵام کاتێک ئامانج زۆر بچووک بوەوە و لەسەر زەوی نەما ئەوا لای دوژمن شتێک نەما کە لێبدات و پاکتاوی بکات". رونیکردۆته‌وه‌ و وتویه‌تى:" بێگومان ئەمەش بە ئاسانی دروست نەبووە، لەسەرووی هەموویەوە هێڵی ڕێبەر ئاپۆ لە ئایدیۆلۆژی، فەلسەفە، باوەڕی لە هێزەکانمان ئەوە دروست بوو، وردبوونەوە لەسەر پارادیگمای کۆمەڵگای دیموکراتیک-ئیکۆلۆژی کە خۆی دەسپێرێ بە ئازادی ژنانی پێشکەوتوو ئاستی پەکەکەیی بوون کە لەناو گەریلاد ئاوابووە". وتوشیه‌تى:"بەرخۆدانی گەریلا لە گردی سوور و وەرخەلێ لە شەڕدا ئێمەی گەیاندە ئاستێکی بڵند و نوێ، بەتایبەت لە شەڕی تونێلـدا لاپەڕەیەکی نوێی کردەوە، لە بەرخۆدانی میلیتانی ئاپۆییدا لاپەڕەیەکی نوێیە، هەڤاڵان لە ڕێبازی تونێل و شەڕی ژێر زەویدا بارێکی گرانیان خستە سەر ملی خۆیان، ویستیان ڕۆڵیکی مێژوویی بگێڕن و ئەو ڕۆڵەشیان گێڕا، ئەو هەڵوێستە میلیتانی، بە بڕیارداری و فیدایی بە ڕێبازێکی نوێ چەندین بابەت کە تا ئێستا نادیار بوون و ڕوون نەبوو، ڕوونی کردەوە". بەشیێوەیەکی گشتی ئەم بەرخۆدانییە لەم هەشت مانگ و نیوە زۆر هێژا و شکۆدارە، بەتەنها بۆ ئێمە نا، بۆ هەموو ئەو هێزانەی کە ئەمڕۆ لەژێر هێزە هەژموونگەراکاندا دەچەوسێندرێنەوە، لێرەدا بەتەنها نەک شەڕی تونێل، بەشێوەیەکی گشتی شەڕی گەریلا لەسەر هەموو ئاستەکانی تیمی پسپۆڕە، کە توانیویەتی سیخوڕ و تەکنیکی دوژمن پوچەڵ بکاتەوە، دەوڵەتی تورک لەبەرامبەر بەرخۆدانی گەریلا لە باشوری کوردستان شکستی هێنا، لەبەرئەوەش دەیەوێت هێرش بکاتە سەر ڕۆژئاوای کوردستان، لەوێش شکست دەهێنێت. ئاماژه‌ى بۆ ئه‌ه‌وشکرد:" ئێمە قەت نامانەوێت دووژمن بە بچووک ببینین، بۆ سەرکەوتن لە شەڕدا پێوانەی هەرە گرنگ ئەوە کە پێویستە تۆ دوژمنی خۆت باش بناسیت، هەروەها خۆشت باش بناسیت، دوژمنی ئێمە لایەنی بەهێزیشی هەیە، ئەگەر تۆ لەبەرامبەر لایەنە بەهێزەکە تەدبیر وەربگری، ئەوا ئیرادەی شەڕیان نابێ، دوژمن بە چی شەڕ دەکات؟ دوژمن سیخوڕ کۆدەکاتەوە، بە ڕێگای فڕۆکەی کەشف و ڕێگای دیکە و بە هێزی ئاسمانی شەڕ دەکات، ئێمە شێوازی تیم و شێوازی شەڕی تونێلمان پێشخست، لەبەرامبەر هێزی ئاسمانی تا ئاستێک تەدبیرمان وەرگرت، لەبەرئەوەش ئامێرەکانی دوژمن بێ ئەنجام مانەوە و دوژمن بەسەر نەکەوت، بۆ ئەوەی خۆی لەم شکستە ڕزگار بکات، بە شیوازێکی هەرە نامەرد ئەو چەکەی کە بەپێی یاساکانی شەڕ لە تەواوی جیهان قەدەغەن و بەکارهێنانیان وەک تاوان هەژمار دەکرێت، چەکی کیمیایی بەکاردەهێنێت، ئێستا دوژمن لەبەرامبەر شێوازی شەڕی تیمی گەریلا و لەبەرامبەر شێوازی شەڕی تونێلدا تەنها چەکێک لەدەستی ماوە ئەویش چەکی کیمیاییە، یانیش چەکی تاوانە، ئەو دوژمنە ئێستا ناتوانێت شەڕێکی ئاسایی لەگەڵ ئێمە بکات، ئەوەی دەیکات یان بە چەکی ئاسمانی یان چەکی کیمیایی هێرش دەکات، ڕاستی سوپای تورک ئەوەیە، لە پراکتیکدا ئەوەیە، ڕاستی لەبەرچاوە، بێگومان سەرکەوتن بۆ ئێمەیە. له‌کۆتایى قسه‌کانیدا راشیگه‌یاندووه‌:" ئەو بەرخۆدانییە کە هەشت مانگ و نیوە لە هەرێمەکانی پاراستنی مەدیا و باکوری کوردتان بەڕێوەدەچێت، ئەو ڕاستییە ئاشکرا دەکات کە ئەگەر ئەو هێڵە بە ڕاستی جێبەجێ بکرێت سەرکەوتن مسۆگەرە".

هاوڵاتی بافڵ تاڵەبانی رایگەیاند:" لەسەر ھێڵێکی نیشتمانی و نەتەوەیی ستراتیژێکی نوێی کوردستانی دادەڕێژین و دەمانەوێت وەکو کورد بە یەک وەرەقەی سیاسی بچینە بەغدا و داکۆکی لە مافە دەستووری و نەتەوەییەکانمان بکەین و حکومەتێک بنیادبنێین کە بتوانێت خزمەتگوزاری، چاکسازی ریشەیی، بنەبڕکردنی گەندەڵی و بەگژداچوونەوەی بیری تووندڕەوی، نەتەوەیی و مەزھەبی بکاتە سەرمەشقی ئەرکەکانی و لەسەر بنەمای یەکسانی و ھاوڵاتیبوون خزمەت بکات".   بافڵ تاڵەبانی، ھاوسەرۆکی یەکێتی لەمیانی پێشوازیکردنی لە مارتن یێگەر، باڵیۆزی نوێی ئەڵمانیا لە عێراق و کلێمێنس زێمنتنەر، کۆنسوڵی گشتیی ئەڵمانیا لە هەرێمی کوردستان باسیان لە قۆناغی دوای هەڵبژاردن لە عێراق کردووە و رایگەیاند، "لەسەر ھێڵێکی نیشتمانی و نەتەوەیی ستراتیژێکی نوێی کوردستانی دادەڕێژین و دەمانەوێت وەکو کورد بە یەک وەرەقەی سیاسی بچینە بەغدا و داکۆکی لە مافە دەستووری و نەتەوەییەکانمان بکەین و حکومەتێک بنیادبنێین کە بتوانێت خزمەتگوزاری، چاکسازی ریشەیی، بنەبڕکردنی گەندەڵی و بەگژداچوونەوەی بیری تووندڕەوی، نەتەوەیی و مەزھەبی بکاتە سەرمەشقی ئەرکەکانی و لەسەر بنەمای یەکسانی و ھاووڵاتیبوون خزمەت بکات و دوور لە ئەجێندای سیاسی بەرنامەکانی جێبەجێ بکات". لەسەر کێشەکانی کەرکوک، ناوچە دابڕێندراوەکان و بۆشایی ئەمنی لە ھەندێک ناوچەی عێراق، بەتایبەت ھەماھەنگی و ھاریکاریی نێوان ھەرێمی کوردستان و عێراق، بافڵ تاڵەبانی ھێزە ئەمنییەکانی بە "فاکتەری ئاسایش و ئارامی لە سنوورەکە" لە قەڵەمدا و گوتیشی، "لای یەکێتی کەرکووک قودسی کوردستانە و لە ئەولەویەتی خەباتی حیزبی و سیاسیمانە کە خزمەتی زیاتری شارەکە بەبێ جیاوازی بکەین". ئاماژەی بەوەش کرد، یەکێتی گۆڕانکاریی لە ئەرکە حیزبییەکانی لە کەرکووک کردووە و "لە داهاتووشدا زیاتر لەگەڵ کەرکووکییەکان دەبین و خزمەتی زیاتریان دەکەین". هاوسەرۆکەکەی یەکێتی جەختی لەوە کردووەتەوە، "سەردەمی فرە بڕیاری و کێشەی تەداخولکردن لە بەڕێوەبردنی کاروبارەکانی رێکخراوەیی و سەرکردایەتیکردن کۆتاییھات، و دەبێت یەکێتییەکەمان یەکێتییەکی پتەو، خاوەن ئۆرگانی کاریگەر، کارا، خزمەتگوزار و چالاکتر ئەرکە بنچینەییەکان رایی بکات".

هاوڵاتی دەمیرتاش، لەزیندانەوە رایگەیاند:"دادگا بۆ سزادانی ئەو هاوڕێکانی ئەرکدار کراوە و ئاشکرای کرد، ئێمە ناترسین، ئێمە تاوانبارنین ئێمە ڕۆڵەی بێ گوناهی ئەم گەلەین، جگە لە خودا سەرمان بۆکەس نەچەماندووە. سەڵاحەدین دەمیرتاش، هاوسەرۆکی گشتی پێشووی هەدەپە، لە حەوتەمین دانیشتنی دادگا لە بارەی دۆسیەی کۆبانێ کە 108 سیاسەتمەداری کوردی تیادا دادگایی دەکرێت لە دادگای تاوانە قورسەکان لە ئەنقەرە چەند پەیامێکی نوێی راگەیاند.   پارێزەران و پەرلەمانتارانی هەدەپە لە دادگاییەکەدا بەشداریان کرد، سیاسەتمەداران لە زیدانی سنجان و زیندانی سەگبیسا بە ڕێگەی ڤیدیۆ دادگاییەکە بەشدار بوون. دەمیرتاش لە دادگا وتی: دادگا خاوەنی هێزێک نییە کە بڕێارێکی دادپەروەرانە بدەن، لە ماوەی داهاتوودا هەڵبژاردنی سەرۆک کۆماری هەیە بۆ پیلانگێڕی سیاسیش ئەندامانی دادگا ئەرکدار کراون. ئەو وتیشی دادگا هیچ بەڵگەیەکی بۆ تاوانبارکردنی ئەو هاوڕێکانی نییە، بەڵام بەڵگەی درۆ هەیە، شاهیدی درۆ هەیە، سەرۆک کۆمار زیاتر لە نیوەی ئەندامانی دادگای دەستوری بنگەیی ئەرکدار کردووە، ئەندامانی ڕێکخراوی دادگەر و دۆزگەر ئەرکدار دەکات، هەرکاتێک گوشاری سیاسی لەسەر دادگا لابرا ئەوکاتە دەبێتە دادگا. دەمیرتاش ڕاشیگەیاند، هەتا ئەمڕۆ داخوازی بەردانی خۆی نەکردووە وتی: لەبەر ئەوەی ئەوەی منی دەستگیرکردووە ئێوە نین، لە سەرفەرمانی ئەردۆغان ئێمە لێرە ڕاگیراوین، ئێمە باوەڕمان بە گەلی خۆمان هەیە، ئێمە بە سەربەرزی بەرخۆدان دەکەین، ئێمە نوێنەری گەلین هەڵبژێردراوین پێنج ساڵ پێش ئێستا لە لایەن خەڵکانی دەمامکدارەوە لە ماڵی خۆماندا ڕفێندراین. هاوسەرۆکی پیشووی هەدەپە راشیگەیاند: ئێمە ناترسین، ئێمە تاوانبارنین ئێمە ڕۆڵەی بێ گوناهی ئەم گەلەین، جگە لە خودا سەرمان بۆکەس نەچەماندووە، چی بەتاڵکردنەوەیەکە، تۆ کێی کە ئێمە بەتاڵ بکەیتەوە. سەرکردە کوردەکە وتیشی: سەرۆک کۆمار لە پێنج ساڵدا زیاتر لە 150 جار دەربارەی من و دۆسیەی کۆبانێ قسەی کردووە، بەلایەنی کەمەوە باخچەلیش 120 جار قسەی کردووە و حکومەتیش لەسەر ئەم دۆسیەیە زیاتر لە 500 جار قسەی کردووە. ئەو داوای کرد کە هاوڕێکانی ئازاد بکرێن لەبەر ئەوەی کێشەی داواکاران لەگەڵ ئەوە دەشڵێت،  من منەتی ئێوە هەڵناگرم من سیاسەتمەدارێکم، من لێرە سیاسەت دەکەم، بەڵام ئازادی هاوڕێکانم بگێڕنەوە.

  هاوڵاتی حەوت فراکسیۆنى پەرلەمانى کوردستان لەسەر دۆخى ناوخۆی پەرلەمان و وتەکانى جەلال پەرێشان پەیامێکیان بڵاوکردەوەو داوا دەکەن کە ئەو پەرلەمانتارە لەناو دانیشتنى پەرلەمان داوای لێبوردن بکات. لە راگەیەنراوەکەدا ئەو فراکسیۆنانە رایانگەیاندوە، کە پاراستنى شکۆى پەرلەمان ئەرکێکى پیشەیی و ئەخلاقییە پێویستە لە ئاست پاراستنى ئەو شکۆیەدا بن و نابێت هەڕەشەکردن بەرامبەر چەند پەرلەمانتارێک ببێتە هۆی سوکایەتیکردن. داواشیان کردوە ئەو پەرلەمانتارەى پارتى بە راشکاوی لەناو دانیشتنى پەرلەماندا داوای لێبوردن لە پەرلەمان و خەڵکى کوردستان بکات بۆ ئەوەى دۆخى  دانیشتنەکانى پەرلەمان ئاسایی بێتەوە.

  هاوڵاتی وتەبێژی حکومەتی هەرێمی کوردستان دەڵێت، " لەبارەی نرخ و کوالێتی سوتەمەنی داواکراوە وەزیری سامانە سروشتییەکان بە نوسراو داوابکات دۆخی شۆفێرانی پاس و تاکسی لەبەرچاو بگیرێ". ئەمڕۆ چوارشەممە 27ی تشرینی یەکەمی 2021  جوتیار عادل، وتەبێژی حکومەتی هەرێمی کوردستان لەپاش کۆبوونەوەی ئەنجومەنی وەزیرانی هەرێم کۆنگرەیەکی رۆژنامەوانی ئەنجامدا وتیشی، "بڕیاردراوە تاوەکو کۆتایی ئەمساڵ بەڕێژەی لەسەدا 15 داشکاندن بۆ دانەوەی کرێی و قەرزی کارەبا بۆ هاوڵاتیان بکرێ". دەربارەی دابەشکردنی نەوتی سپی. وتی، " ئێمە لە هەرێمی کوردستان پێویستمان بە 260 ملیۆن لیترە، ئێستا لە هەنگاوی یەکەم لە ناوچە شاخاوییەکان دابەشکردنی دەستیپێکردووە و 100ملیۆن لیتر بۆ ئەو پرۆسەیە دابینکراوە". جوتیار عادل وتیشی. "ئاسانکاری دەکرێت بۆ هێنانی بەنزین لەلایەن کەس و کۆمپانیاکان"، ئەوەشی خستەڕوو، "ئەنجومەنی وەزیران وەزارەتی سامانە سروشتییەکانی ڕاسپاردووە، کۆتایی بە گرفتی غازی ماڵان بهێنێت". دەربارەی نارەزایەتی مامۆستایانی وانەبێژ وتی، " ناکرێ ئایندەی خانەوادە و منداڵانی کوردستان بکرێتە قوربانی تا بکرێیت بە گرێبەست، حکومەت دەیانجار وتویەتی بەپێی داهاتی بەردەست درێغی ناکات و وەزارەتی دارایی ئەمرۆ ڕێنمایی دەرکەتووە و پێمان وایە ڕێنمایی باشن". دەربارەی ناڕەزایەتی خوێندکارانی قۆناغی دوانزە، وتی، " لەگەڵ وەزارەتی خوێندنی باڵا قسەم کردووە وەنەگیرای خوێندکارای کیشەیەکی تەکنیکییە ئێستاش زیاتر لە چوار هەزار کورسی چۆڵ لە زانکۆ و پەیمانگاکان ماون ئەو گرفتە چارە دەکرێ"، دەربارەی ڕێژەی وەرگرتنی خوێندکاران بە پارالێڵ باسیلەوەکرد، " ئەمە پلان و سیاسەتی حکومەت و وەزارەتی خوێندنی باڵایە".

هاوڵاتی باڵیۆزی روسیا لە عێراق رایگەیاند:" بە داهاتووی کورد لە سووریا زۆر گەشبین نین تاوەکو ئێستا ناتوانێت بڵێت چ داهاتوویەکیان دەبێت، "هیچ کەس نازانێت، ئەوە لەسەر ئەوە دەمێنێتەوە کە چی بەسەر بارودۆخی سوریادا دێت و کوردەکان چی دەکەن. پێگەی ئەوان، ئەگەر باسی کوردەکانی سووریا بکەم، ئێستا زۆر ئاڵۆزە". ئەمڕۆ چوارشەممە 27ی تشرینی یەکەمی 2021 ئالبروس کوتراشێڤ، باڵیۆزی ووسیا لە عێراق، بەشداریی لە پانێلێکی دووەمین رۆژی دیداری مێری کرد کە لە شاری هەولێر بەڕێوەدەچیت و تێیدا لەبارەی پەیوەندیی وڵاتەکەی و تورکیا لەبارەی سووریا و پرسی کورد قسەی کرد روونیکردەوە:" تاوەکو ئێستا ناتوانێت بڵێت چ داهاتوویەکیان دەبێت، "هیچ کەس نازانێت، ئەوە لەسەر ئەوە دەمێنێتەوە کە چی بەسەر بارودۆخی سوریادا دێت و کوردەکان چی دەکەن. پێگەی ئەوان، ئەگەر باسی کوردەکانی سووریا بکەم، ئێستا زۆر ئاڵۆزە. من ئەوە دەڵێم کە بە داهاتوویان زۆر گەشبین نیم. ئەوان بوونەتە بارمتەی ئەوەی کردوویانە یان ئەوەی بەرامبەریان کراوە لە ماوەی چەند ساڵی رابردوودا، ئەمەش زۆر جیددییە. بەڵام لە کۆتاییدا هیوادارم لایەنە سوورییەکان، کوردەکان و حکومەتی سووریا بتوانن بگەنە رێککەوتنێک، چونکە ئێمە بۆ ئەوانمان روونکردووەتەوە کە بژاردەی دیکە باش نابێت بۆیان و لانیکەم ئەوان گوێیان بۆ گرتین. بۆیە با هیوا بۆ باشترین بخوازین. کێشەی سووریا و کوردستان ئاڵۆزە، چونکە پێگەیان جیاوازە لەوەی کورد لە عێراق هەیانە. ناتوانین بەراوردیان بکەین". باڵیۆزی رووسیا روونیکردەوە کە تورکیا دەیەوێت "رژێمی ئەسەد جێگەی بگیرێتەوە یان لەسەر دەسەڵاتی لابدەن، بەڵام من لەگەڵ ئەوە هاوڕام کە دەستەواژەی 'رژێمی بەشار ئەسەد' بەکاربهێندرێت، دەستەواژەیەکی نەرێنییە، چونکە حکومەتی ئێستای سووریا و سەرۆکی سووریا، سەرۆک و حکومەتی شەرعین. هاوکات ئەندامی نەتەوە یەکگرتووەکانن. بۆیە ئەگەر پێیان بڵێین رژێم، شتێکی باش نییە، نە لەڕووی سیاسییەوە نە لەڕووی تێڕوانینی دیکەوە. کەواتە، بۆ سووریا بۆ ئێمە هاوپەیمانێکی ستراتیژییە؟ لە سەرەتادا وا نەبوو، بەڵام بە تێپەڕبوونی کات ئاستی بەشداریی رووسیا لە چارەسەرکردنی پرسی سووریادا زیادیکرد و لە کۆتاییدا گەیشتینە ئەو ئەنجامەی کە سووریا بووەتە هاوپەیمانێکی ستراتیژیمان. کەواتە، ئێمە لەسەر حیسابی هاوپەیمانەکانمان رێککەوتن لەگەڵ کەس ناکەین". باڵیۆزی رووسیا لە عێراق وتیشی، "لەبارەی تورکیاوە؛ تورکیا، ئێران و رووسیا ئەندامی سەرەکیی رێککەوتنی ئەستانەن. رێککەوتنی ئەستانە بۆ ئەوە دروستبوو تاوەکو لایەنە سوورییەکان یەکبخاتەوە - لایەنە ناکۆکەکانی سووریا، چونکە بەداخەوە لەو کاتەدا نەتەوە یەکگرتووەکان نەیتوانی ئەوە بکات، بۆیە هەرسێ وڵاتەکە لە رووداوەکانی سووریا تێوەگلان و بەیەکەوە کۆبوونەوە و بڕیاریاندا پێکهاتەکانی سووریا یەکبخەنەوە کە شەڕیان لە دژی یەکدی دەکرد. بەم شێوەیە دەستیپێکرد. دواتر لە رۆڵی نیوەندگیرییەوە پەرەیسەند بۆ رۆڵی ئەوانەی کە بیر لە داهاتووی سووریا دەکەنەوە و هەوڵدەدەن رێکی بخەنەوە. زۆربەی رێکخستنەوەکانی بۆ ئەوە بوو کە رێگە لە شەڕ و پێکدادانەکان بگرن لەنێوان لایەنە سوورییەکان و ئەو لایەنانەی لە پرسەکەوە تێوەگلابوون. لەم رووەوە، بەڵێ، ئێمە ئاستێکی باشی هاوئاهەنگیمان لەگەڵ تورکەکان هەبووە لە چوارچێوەی رێککەوتنی ئەستانەدا. لەسەر ئاستی دیپلۆماسی، سەربازی و هەواڵگرییەوە هاوئاهەنگیمان زۆر باشە، بەڵام ئەوە رێککەوتن نییە". هەروەها زیاتر روونکردەوە کە ئەوەی رووسیا بە شێوەیەکی پراگماتیک دەیەوێت بیکات، بۆ ئەوەیە رێگە لە شەڕ بگرن لەسەر خاکی سووریا و گوتیشی، "لە هەمان کاتدا ئێمە شەرعییەت نادەینە ئەوەی تورکیا لە سووریادا ئەنجامی دەدات لەڕووی داگیرکردنی ناوچەکانی و پاڵپشتییەکانی بۆ گرووپە تیرۆریستییەکان، ئێمە بە بەرزی نانرخێنین؛ بەڵام سوپاس بۆ خوا، بە شێوەیەکی پراگماتیکی، لەبارەی چارەسەرکردنی کێشەکانی سووریا، ئێمە گەیشتووینەتە ئاستێک کە هاوڕانین، بەڵام تۆمەت نابەخشینەوە. بۆیە دەکرێت ئەمە ببێتە هۆی ئەوەی کە هەندێک کەس وا بیربکەنەوە ئێمە رێککەوتنێکمان هەیە. نەخێر ئەمە رێککەوتن نییە". ئالبروس کوتراشێڤ، باڵیۆزی رووسیا لە عێراق باسی لە هەسەدە و پرسی کورد لە سووریا کرد، ئەو وتی "ئێمە هەر لە سەرەتای پرۆسەی سیاسیی سووریادا یاخود کاتێک بیرۆکەی پرۆسەی سیاسیی سووریا خرایە سەر مێز، کاتێک هاوبەشە نێودەوڵەتییەکانمان لە بیرۆکەی گۆڕینی رژێمی سووریاوە هاتنە سەر ئەوەی سەقامگیری لە دیمەشق بەدیبێنن، ئێمە لە دژی وەلانانی هەر پێکهاتەیەک بووین. ئێمە باوەڕمان وایە کە هەموو لایەنە سوورییەکان پێویستە لە پرۆسەکەدا بەشداربن، بەڵام هەندێک شت هەن ناتوانیت هیچ لەبارەیانەوە بکەیت. تورکیا ڤیتۆی لەسەر بەشداریکردنی هەسەدە لە پرۆسەی سیاسیدا هەیە. ڤیتۆش مانای ئەوە نییە کە تورکیا هەڵبستێت و شوێنەکە جێبهێڵێت. ئەگەر تورکیا شوێنەکە جێبهێڵێت، ژمارەیەکی گەورەی ئەندامانی ئۆپۆزیسیۆنی سووریا لەگەڵی دەڕۆنە دەرەوە و ئەمە کێشەکەیە". باڵیۆزی رووسیا ئاماژەی بەوەش کرد، "بۆ ئێمە! ئێمە پەیوەندیمان لەگەڵ هەسەدە هەیە لەسەر ئاستی جیاوازدا. ئەفسەرانی سەربازیمان لە سووریا پەیوەندیی راستەوخۆیان لەگەڵ هەسەدە هەیە و ئێمە پەیوەندییەکی سیاسیمان لەگەڵیاندا هەیە. جاروبار لەگەڵ ئیلهام ئەحمەد و ئەندامانی دیکەی سەرکردایەتیی هەسەدە لە مۆسکۆ کۆدەبینەوە. رووسیا وڵاتێکی فیدراڵییە و هیچ کێشەمان لەگەڵ وڵاتی دیکەدا نییە کە ببنە خاوەنی فیدراڵی یان ئۆتۆنۆمییان هەبێت". ئالبروس کوتراشێڤ باسی لەوە کرد، "ئێمە ئێستا هاوکاریی پرۆسەی دانوستاندن لەنێوان هەسەدە - رۆژئاڤا و حکومەتی سووریادا دەکەین. ئەمە شتێکی ئاسان نییە. پرۆسەیەکی زۆر ئاڵۆزە. باڵیۆزەکەمان بۆ دیمەشق ئەرکی ئەوەی پێدراوە بۆئەوەی رۆڵی نێوەندگیر ببینێت و بە شێوەیەکی فەرمی ئەو ئەم کارە دەکات. یان دەکرێت بە شێوەیەکی نافەرمی بێت، بەڵام من لێرەوە رامگەیاند. مەبەستم ئەوەیە کە هەردووکی، هەسەدە و دیمەشق دەزانن کە ئەو نێوەندگیری دەکات. هەروەکو گوتم، شتێکی ئاسان نییە چونکە هەردوولا زۆر کەللـە رەقن و دانوستاندنکارێکی ئاسان نین. بەڵام ئێمە توانیومانە رازییان بکەین و ئەوانیش لەوە تێدەگەن کە پێویستە رێکبکەون، چونکە هەر بژاردەیەکی دیکە بۆ هەردووکیان باش نابێت. بەڵام هێشتا پێموایە پرۆسەکە بە هێواشی بەڕێوەدەچێت، چونکە ئەوان متمانەیان بە یەکدی نییە. بۆچی  متمانەیان بە یەکدی نییە؟ ئەگەر بێتو باس لەوە بکەم پێویستە یەک هەفتە گوێم بۆ بگرن بۆئەوەی باسی بکەم، بەڵام بڕوام پێبکەن ئەوان متمانەیان بە یەکدی نییە. ئێمەش باشترین هەوڵی خۆمان دەدەین بۆئەوەی پرۆسەکە ئەنجامی هەبێت". ئالبروس کوتراشێڤ، باڵیۆزی رووسیا لە عێراق لەبارەی رۆژئاوای کوردستان لە پانێلەکەدا زیاتر قسەی کرد و ئەوەی خستەڕوو، "تەنانەت لەڕووی بوونی هەرێمێکی ئۆتۆنۆمی، بیرۆکەکە زۆر باشە و هەیە و شتێکی زۆر ئاساییە بۆیان؛ کەمینەیەک یان گرووپێکی نەتەوەیی کە ئۆتۆنۆمی یان هەرێمێکیان لە چوارچێوەی وڵاتێکی دیکەدا هەبێت، هەروەکو هەرێمی کوردستانی عێراق، بۆ نموونە؛ بەڵام ئەمە بۆ سوورییەکان زۆر ئاسان نییە. کوردەکانی سووریا قەوارەیەکی هەرێمیی تێکەڵاو [یەکگرتوویان] نییە. لە باکوور، ئەوان چۆن بڵێم.. ئەم شوێنە لێرەیە و ئەو شوێنە لەوێیە و ئەم شوێنانە بەیەکەوە بەستراو نین و بە ناوچەکانی دیکە دەورەدراون کە گرووپە نەتەوەییەکانی دیکە تێیدا دەژین کە رەنگە پێیان خۆش بێت لەنێو قەوارەیەکی ئۆتۆنۆمیی کوردیدا بژین یانیش نا.. کێ دەزانێت.. تاکە ناوچە کە بینیبێتمان کە کورد بە راستی زۆرینە و پێگەیەکی مێژوویی بەهێزیان هەبێت، عەفرین بوو، بەڵام ئێستا ناخۆشە کە قسە لەبارەی ئەوەوە بکەیت کە لە داهاتوودا چی بەسەر عەفریندا دێت، ئەمە تراژیدیایە. ئەمە وادەکات بارودۆخەکە ئاڵۆزتر ببێت و ئێمە ئێستا رووبەڕووی بارودۆخێک دەبینەوە". باڵیۆزی رووسیا لە عیراق دەڵێت، "ئێستا هەسەدە - رۆژئاڤا چەند ناوچەیەکی بەدەستەوەیە کە زۆرینەی عەرەبن و کوردیش کەمینەی کەمینەن، واتە لە کەمینەش کەمترن. ئەوان کۆنترۆڵی ئەو ناوچانەیان بەدەستەوەیە. ئەمە بە شێوەیەکی کاتی بۆ ئەوان باشە، بەڵام بۆ داهاتوو، چ دوور یان نزیک، ئەوان پێویست دەکات قەوارەیەک پێکبهێنن، کەواتە ئایا ئەمە دەبێتە دیکتاتۆریەتی رۆژئاڤا لەسەر دانیشتووانی ئەو ناوچانە، یانیش جۆرێک لە هەڵبژاردن ئەنجامدەدەن. ئەگەر بێتو هەڵبژاردنیش ئەنجامبدەن، کێ دەنگی پێدەدرێت و کێ دەسەڵات دەگرێتەدەست؟ ئایا هەسەدە لای ئاسایی دەبێت دەسەڵات رادەستی هەندێک کەسی دیکە بکات؟ ئەمە پرسیارێکی کراوەی گەورە و زۆر ترسناکیشە. من هەمیشە ئەمەم گوتووە کە شتێکی زۆر ئاڵۆزە. لە رووسیا تووڕە مەبن، ئێمە باشترین هەوڵی خۆمان دەدەین، بەڵام کێشەکانی رۆژهەڵاتی نێوەڕاست هەندێک جار شێتت دەکەن، چونکە زۆر ئاڵۆزن، ئێمە وامان بیردەکردەوە کە ژیانی ئێمەی رووسی ئاڵۆزە، بەڵام نا، کاتێک لەمە تێدەگەین زۆر سادە و ئاسانە"

هاوڵاتی سەرۆکی حکومەتی هەرێمی کوردستان، ئێوارەی ئەمڕۆ چوارشەممە بەشداری لە دوا پانێلی دیداری ئینستیتیوتی رۆژهەڵاتی ناوەڕاست بۆ توێژینەوە (مێری) كرد و رایگه‌یاند كه‌ حكومه‌تی هه‌رێم توانیویه‌تی به‌ سه‌ركه‌وتوانه‌ هه‌موو مانگێك موچه‌ بدات.  مەسرور بارزانی، سه‌رۆكی حكومه‌تی هه‌رێمی كوردستان له‌و پانێله‌دا وتی "به‌غدا زیاتر له‌ سێ ملیار دۆلار قه‌رزاری فه‌رمانبه‌رانی هه‌رێمه‌، سه‌ره‌ڕای ئه‌وه‌ش و سه‌ره‌ڕای قه‌یران و ئاڵنگارییه‌كانی به‌رده‌می، حكومه‌ت توانیویه‌تی مانگانه‌ موچه‌ به‌ فه‌رمانبه‌ران بدات". ئاماژه‌ی به‌وه‌شدا كه‌ حكومه‌تی عێراق له‌ ساڵێكدا شه‌ش مانگ موچه‌ی فه‌رمانبه‌رانی هه‌رێمی بڕی و قه‌یرانی كۆرۆنا و نزمبونه‌وه‌ی نرخی نه‌وتیش ئاسته‌نگی خسته‌به‌رده‌م حكومه‌ت.  له‌ پانێله‌كه‌دا، مه‌سرور بارزانی باسی له‌ كار و پرۆژه‌كانی كابینه‌ی نۆیه‌می حكومه‌تی هه‌رێم كرد كه‌ خۆی سه‌رۆكایه‌تیی ده‌كات و وتی "گه‌نده‌ڵی به‌رٍێژه‌یه‌كی به‌رچاو كه‌مبوه‌ته‌وه‌ و ده‌بێت بڵێین گه‌نده‌ڵی كه‌م ده‌كه‌ینه‌وه‌، چونكه‌ بنبڕكردنی سه‌خته‌ و به‌پێداگرییه‌وه‌ كار بۆ ببنڕكردنی ده‌كه‌ین، چونكه‌ چاكسازی كاری سه‌ره‌كیی كابینه‌كه‌مان بووه‌". سه‌رۆكی حكومه‌ت رایگه‌یاند كه‌ له‌ ماوه‌ی ته‌مه‌نی حكومه‌تدا 147 پرۆژه‌ی جۆراوجۆر له‌ سه‌رجه‌م ناوچه‌كانی هه‌رێمی كوردستان به‌ به‌های 8 ملیار دۆلار جێبه‌جێ كراون و ره‌زامه‌ندیش به‌ سه‌دان پڕۆژه‌ی كه‌رتی تایبه‌تیش دراوه‌، ئێستاش كار بۆ ته‌واوكردنی 21 به‌نداو ده‌كه‌ن كه‌ بڕی 32 ملیار دیناری ده‌وێت، وتیشی كه‌ هه‌زار و 100 كیلۆمته‌ر شه‌قام قیرتاو كراون و كاته‌كانی پێدانی كاره‌باش زیادی كردوه‌ و ژێرخانی ئابوریشمان بۆ خۆراك به‌هێز كردوه‌.

 هاوڵاتی له‌ دانیشتنی ئه‌مڕۆی په‌رله‌مانی كوردستاندا  سه‌رجه‌م فراكسیۆنه‌كانی په‌رله‌مانی كوردستان بایكۆتی دانیشتنی ئه‌مڕۆی په‌رله‌مانیان كرد. ئەمڕۆ چوارشەممە 27ی تشرینی یەکەمی 2021 له‌ دانیشتنی ئه‌مڕۆی په‌رله‌مانی كوردستاندا کە بێگەرد تاڵەبانی، وەزیری کشتوکاڵ و سەرچاوەکانی ئاوی هەرێم ئامادەی بوو خوێندنەوەی یەکەم بۆ چەند پڕۆژە یاسایەک دەکرێت. بەهۆی ئەوەی لە دانیشتنی دوێنێێدا، پەرلەمانتارێکی پارتی دیموکراتی کوردستان "وشە و جنێوی نەشیاوی بەکارهێنا" و ئەمڕۆش پەرلەمانتاران داوای سزادانیان کرد، پەرلەمانتارانی پارتی دەنگیان نەدا و گرفت دروستبوو، هەربۆیە سەرجەم فراکسیۆنەکان دانیشتنەکەیان جێهێشت، جگە لە فراکسیۆنی پارتی و پێکهاتەکان.  ئەو داوای لێبوردنەی پارتی کردوویەتی جێگای رەزامەندی پەرلەمانتاران نەبووە و داوای سزادانیان کردووە و خراوەتە دەنگدانەوە، بەڵام پارتی و پێکهاتەکان 46 دەنگ بوون و پەرلەمانتارانی دیکەش بە 32 دەنگ بوون، بۆیە دانیشتنەکەیان جێهێشتووە و دەڵێت، سوورن لەسەر "سزادان."

   هاوڵاتی ئه‌ندامێكى په‌رله‌مانى كوردستان رایگەیاند:" له‌داهاتودا هیچ پیاوو ژنێکی نەجیب جورئەتی ئەوەناکات بێتە ناو ئەم پەرلەمانە"، ده‌شڵێت:"ئه‌وه‌ى ڕویدا به‌شێكه‌ له‌پیلانى نائومێدكردنى خه‌ڵكى كوردستان". ئه‌بوبه‌كر هه‌ڵه‌دنى ئه‌ندامى په‌رله‌مانى كوردستان له‌دانیشتنى ئه‌مڕۆى په‌رله‌ماندا ڕایگه‌یاند، "ده‌بوایه‌ ئه‌م په‌رله‌مانه‌ پڕبوایه‌ له‌دادوه‌ره‌كانى كوردستان، دواتر ئه‌وه‌ى ڕویدا به‌شێكه‌ له‌پیلانى نائومێدكردنى خه‌ڵكى كوردستان". جه‌ختده‌كاته‌وه‌، لەداهاتودا هیچ پیاوو ژنێکی نەجیب جورئەتی ئەوەناکات بێتە ناو ئەم پەرلەمانە". ئه‌و ئه‌ندامه‌ى په‌رله‌مانى كوردستان له‌كاردانه‌وه‌ به‌قسه‌كانى دوێنێى جه‌لال په‌رێشان وتى:"کەس حورمەت‌و کەرامەت‌و شکۆی خۆی لێ زیاد نییە بێ حورمەتی  پێبکرێت".

 هاوڵاتی  یانەی برایەتی کە یانەیەکە لە خولی کوردستان یاری دەکەن، بۆ هەڵبژاردنی سەرۆک و دەستەی کارگێڕی یانەکە هەڵبژاردنی ئەنجامدا، لە هەڵبژاردنەشدا وه‌زیرێكی حكوومه‌تی هەرێمی كوردستان بوو بە سه‌رۆكی یانه‌یه‌كە. ئەمڕۆ چوارشەممە 27ی تشرینی یەکەمی 2021 هه‌ڵبژاردنی یانه‌ی وه‌رزشی برایه‌تی ئه‌نجامدرا و تێیدا به‌ شێوه‌یه‌كی چاوه‌ڕواننه‌كراو دكتۆر دارا ره‌شید، وه‌زیری پلاندانان له‌ حكوومه‌تی هه‌رێمی كوردستان، به‌ سه‌رۆكی یانه‌كه‌ هه‌ڵبژێردراو دەستەی کارگێڕی یانەکەش دیاری کران.  جێی ئاماژەیە، هه‌ڵبژاردنه‌كه‌ له‌ ژێر سه‌رپه‌رشتیی لیژنه‌ی باڵای هه‌ڵبژاردن دوێنێ سێشه‌م له‌ هه‌ولێر به‌ڕێوه‌ چوو، كه‌ ده‌سته‌ی نوێ و هه‌ڵبژێردراوی یانه‌ی برایه‌تی به‌م شێوه‌یه‌ هه‌ڵبژێردران: 1- دکتۆر دارا ڕەشید (71) دەنگ  2- هەڵمەت عەبدولرەزاق (71 )دەنگ  3- دارا عەزیز (71) دەنگ  4- ڕامان ڕەشید (67 )دەنگ  5- فاروق خزر (65 )دەنگ  6- دەرباز حەیدەر (53 )دەنگ  7-  دەران غازی( 51 )دەنگ. یانه‌ی وەرزشی برایه‌تی یه‌كێكه‌ له‌ یانه‌ ناوداره‌كانی كوردستان و ساڵی 1984 له‌ هه‌ولێر دامه‌زراوه‌. یانه‌كه‌ وه‌رزی رابردووی بووه‌ پاڵه‌وانی خولی نایابی تۆپی پێی كوردستان.

 هاوڵاتی  جێگری بەرپرسی مەڵبەندی سێی یەكێتی لەهەولێر ئەوە ئاشكرا دەكات كە بەم نزیكانە كۆبوونەوەی لوتكە لەنێوان هەردوو هاوسەرۆكی یەكێتی ئەنجامدەدرێت، دەشڵێت:» ئێستا لەناو مەكتەبی سیاسی و سەركردایەتی دوای دەرئەنجامی هەڵبژاردنەكان ئەوە روونبووەتەوە كە پاشەكشەی یەكێتی بەهۆی كێشە ناوخۆییەكانەوە بووە». رەشاد گەڵاڵی، جێگری بەرپرسی مەڵبەندی 3ی یەكێتی لەهەولێر لەلێدوانێكدا بە هاوڵاتی  وت:» تەسەور دەكەین لەماوەیەكی نزیكدا كە رەنگە لەماوەی 72 كاتژمێری داهاتوودا بێت هەردوو هاوسەرۆك كاك بافڵ تاڵەبانی و كاك لاهور شێخ جەنگی كۆبوونەوە ئەنجامبدەن، ئەگەر شتی دیكە روونەدات ئەو كۆبوونەوەیە ئەنجامدەدرێت». ناوبراو وتیشی:» دوای هەڵبژاردنەكانی پەرلەمانی عێراق كە یەكێتی هەم بەدەنگ و هەم بەكورسی پاشەكشەی كردووە، ئەوەتا كاك شاڵاو عەلی عەسكەری و كاك فەرید ئەسەسەردیش باسی ئەوەیان كردووە ئەگەر یەكێتی كێشەی ناوخۆیی نەبوایە دەرئەنجامی هەڵبژاردنەكان بەم شێوەیە نەدەبوو كورسییەكان و ژمارەی دەنگەكانی یەكێتیش زۆر زیاتر دەبوو». رەشاد گەڵاڵی ئەوەشی دووپاتكردەوە یەكێتی كەهاوپەیمانێتی لەگەڵ بزوتنەوەی گۆڕان هەبووە، ئەگەر كێشە ناوخۆییەكانی نەبوایە 25 بۆ 26 كورسی بەدەستدەهێناو 150 هەزار دەنگیش زیاتری بەدەستدەهێنا، وتیشی:» ئێستا لەناو مەكتەبی سیاسی و سەركردایەتی یەكێتی تەسەورێك دروست بووە كە پاشەكشەی یەكێتی بەهۆی كێشە ناوخۆییەكانەوە بووە، بۆیە كۆبوونەوەی هەردوو هاوسەرۆك خاڵێكی ئیجابیە بەئامانجی چارەسەركردنی كێشەكان». بەرپرسەكەی یەكێتی ئەوەشی دووپاتكردەوە كە جارێ نازانرێت كۆبوونەوەی هەردوو هاوسەرۆك دەرئەنجامەكەی چی دەبێت، بەڵام ئەوە بۆ یەكێتی و هەموو لایەك روونبووەتەوە كە كێشە ناوخۆییەكان زیانی گەورەی بەیەكێتی گەیاندووە.  

هاوڵاتی بەڕێوەبەرایەتی تەندروستی پارێزگای سلێمانی رایگەیاند:"لە شاری سلێمانی لە ماوەی مانگێكدا 256 حاڵەتی سوتاوی تۆماركراوە، هەر لە ماوەی مانگی ڕابردوودا 1180 نەخۆش سەردانی بەشی ڕاوێژكاری نەخۆشخانەی سوتاوی و نەشتەرگەری جوانكاریان کردووە". ئەمڕۆ چوارشەممە 27ی تشرینی یەکەمی 2021، بەڕێوەبەرایەتی تەندروستی پارێزگای سلێمانی بڵاویکردووە، "بەپێی ئامارێكی بەرێوبەرایەتیی گشتیی تەندروستیی سلێمانی لەماوەی مانگی ڕابردوودا لە نەخۆشخانەی سووتاوی و نەشتەرگەری جوانكاری ئیمێرجنسی لەشاری سلێمانی 256 حاڵەتی سووتاوی تۆماركراوە و  چارەسەری پێویستیان بۆ كراوە". ئەوەشخراوەتەڕوو، 182 نەشتەرگەری گەورە و سەرووگەورە ئەنجام دراوە، هەروەها 4475 پشكنینی تاقیگەیی و 282 چارەسەری سروشتی لەو نەخۆشخانەیە ئەنجام دراو". ئاماژەی بەوەشکرد "لە ماوەی مانگی ڕابردوودا 1180 نەخۆش سەردانی بەشی راوێژكاری نەخۆشخانەی سووتاوی و نەشتەرگەری جوانكاری یان كردووە. 

  هاوڵاتی بەڕێوەبەرایەتی نەوت و کانزاکانی سلێمانی رایگەیاند:" سبەینێ لە ماوەت و شارباژێڕ دەست بە دابەشکردنی نەوت دەکرێت". ​ئەمڕۆ چوارشه‌ممه‌ 27ی تشرینی یه‌كه‌می 2021، بەڕێوەبەرایەتی نەوت و کانزاکانی سلێمانی رایگەیاند: بڕیارە سبەینێ پێنجشەممە، نەوت لە قەزاکانی شارباژێڕ و ماوەت دابەشبکرێت و لەبارەی نرخەکەشییەوە ئاماژەی بەوەکردووە، نرخەکەی بۆ 200 لیتر 55 هەزار دینار دەبێت. ماوەی چەند رۆژێکە حکومەتی هەرێم دەستی بە دابەشکردنی نەوتی سپی کردووە و لە ناوچە ساردەکانەوە دەستی پێکردووە، وەک دەڵێن، بەردەوام دەبن. ساڵی رابردوو تەنها چەند مەڵبەندێک نەوتی سپییان وەرگرت و نەوت نەدرا بە هەموو مەڵبەندەکان، هاوڵاتیان ناچاربوون سەرەڕای سەختی دۆخی دارایی و نەبوون و دواکەوتنی موچە؛ خۆیان بە نرخێکی بەرز "کە لە هەندێک شوێن بۆ بەرمیلێک (200 لیتر) دەگەیشتە 150 هەزار نەوت بکڕن.