ڤیدیۆ.. لەیلا زانا، گەیشتە یاریگای ئامەد سپۆر بزانە چۆن پێشوازیی لێدەکەن

سەركۆ جەمال شەوی 17ی تشرینی دووەمی ئەمساڵ، دەنگی تەقینەوەیەكی بەهێز لەشاری سلێمانی بیسترا، دواتر دەركەوت تەقینەوەكە بەهۆی غازی سیستمی شۆڤاژ روویداوە، ئەم رووداوە بەكارەساتێكی گەورە وەسف كرا، رووداوەكە لەماڵی حاجی مەزهەر لە گەڕەكی كازیوەی دوو بوو، بەهۆیەوە 15 كەس گیانیان لەدەستداو 11 كەسی تر برینداربوون. دوای ئەم رووداوە قسەوباسێكی زۆر لەسەر غازو سیستمی شۆڤاژ كرا، حكومەتی هەرێم  دەستی بە رێوشوێن كرد، هێشتا خەڵكی كوردستان تاسەی ئەم رووداوەی بەرنەدابوو رووداوێكی هاوشێوە لەشاری دهۆك روویدا، دوای ئەم رووداوەی دهۆك  ئەنجومەنی وەزیران كۆبوەوەو بڕیاریدا كاركردن بە سیستمەكە رابگیرێت تا لێكۆڵینەوەكان تەواو دەكرێت. بەپێی بەدواداچوونەكانی هاوڵاتی، زیاتر لە 18 ساڵە سیستمی شۆفاژی ماڵان و غازی ئێڵ پی جی لەهەرێمی كوردستان پەرەی پێدراوە، بەپێی زانیاریەكانیش كە هاوڵاتی لەوەزارەتی سامانە سروشتیەكان دەستیكەوتووە، لە هەولێر 15 كۆمپانیا و لە سلێمانی 33 كۆمپانیا مۆڵەتی دانانی سیستەمی شۆفاژیان هەیە. بەوتەی سەرچاوەیەك لەبەرگری شارستانی سلێمانی بۆ هاوڵاتی كە ئامادەنەبوو ناوی بهێنرێت:»سەرەتا بەڕێوەبەرایەتی نەوت و كانزاكان مۆڵەت دەداتە كۆمپانیاكانی سیستەمی شۆڤاژو دواتر دێتەوە لای ئێمە رێنماییان پێدەدەین، چاودێریكردنیشی دەبێت لەلایەن نەوت و كانزاكانەوە بێت». وتیشی:»ئەوەی پەیوەندی بەئێمەوە هەیە تا مەرجەكانمان جێبەجێ نەكەن مۆڵەتەكەیان تەواو نابێت، ئەوەی لەسلێمانیش روویدا هۆكار رێنماییەكان نیە چونكە ئەوەی لێرە جێبەجێ دەكرێت لەهیچ پارێزگایەك جێبەجێ ناكرێت». سەبارەت بەڕووداوەكەی گەڕەكی كازیوەی سلێمانی ئەو سەرچاوەیە وتی:»هۆكارەكەی كۆبوونەوەی رێژەیەكی زۆر غاز بووە بۆیە خانوویەكی سێ قاتی تەختی زەوی كردووە، بۆیە هۆكارەكە وەستاكە نییە، بەڵام ئەو سیستەمەی بۆ ماڵەكە دانراوە كۆمپانیا داینەناوە بۆیە ئەوە ئەنجامەكەی بووە». هاوكات رێكان كەمال سەرۆكی لیژنە هاوبەشەكانی قایمقامیەتی سلێمانی لەلێدوانێكدا بەهاوڵاتی راگەیاند:»هەموو غازێك لەسەرچاوەیەكەوە دێتە دەرەوە بۆنی نییە بەڵام بۆنێكی دەستكردی بۆ بۆنكردن تێدەكرێت، هەموو سیستەمێكی غازو غازی بتڵیش بۆنی تێدەكرێت، بۆنی سیرەو  دەستكردە تا لەكاتی لێچوونیدا هەستی پێدەكرێت، رووداوەكەی كازیوەش تەنانەت دراوسێكان هەستیان پێكردووە بەبۆنەكەی، جگە لەوەی تانكیەكەش دوای تەقینەوەكە هەر غازی لێچووە و بۆنی هەبووە». سەرۆكی لیژنەكانی قایمقامیەتی سلێمانی دەڵێت:»هەموو سیتی و شوێنەكانی دیكە لەژێر چاودێری ئێمەدان، بەڵام ماڵەكان هیچ یاسایەك نییە بیانگرێتەوە و چاودێری بكرێن، كارەساتەكە لەوەدایە تانكیەكی غاز دادەنێن لەسەربان كە وەك بۆمبێكی تەوقیتكراو وایە». دانیار كامیل خاوەن كۆمپانیایەكە كە كاری دانانی شۆڤاژ دەكات بەهاوڵاتی وت:»سەرەتا ئەگەر بتەوێت ببیتە خاوەنی مۆڵەتی كاركردنی فەرمی لەڕێگەی بەرێوبەرایەتی كۆمپانیاكانەوە دەست دەكەی بەوەرگرتنی مۆڵەت وەك مۆڵەتێكی فەرمی تۆماركراو ، ئێمە مۆڵەتمان لە بەرێوەبەرایەتی نەوت و كانزاكان وەرگرتوەو دوای مۆڵەتیش بڕوانامەی بەرگری شارستانی و سامانە سروشتیەكان و قایمقامیەت و چەندەها مەرج و رێكاری تری یاسایی پێویست بووە». وتیشی:»ئەو مەوادانەی دەهێنرێتە هەرێم و لێرە كاری پێدەكرێت (ئێرانی، توركی ، ئیتاڵی، ئەڵمانی ، ئەمریكی) تەنكی غازی ناوخۆشمان هەیە». دانیار كامیل دەڵێت:»شۆفاژ خۆی هیچ رێوشوێنێكی لەسەر نیە و چونكە سیستەمێكی جیهانیە و بێ زیانە، وەكو رێوشوێن بەتەواوی لەسەر سیستمی غازە و دەبێت لەسەر سیستەمی غاز بكرێت چونكە بچوكترین كێشە لەسیستەمێكی مەركەزی غازدا كارەساتی گەورە دەخوڵقێنێت و ئەگەر لە لایەن كۆمپانیایەكی بەئەزموون و ستانداردەوە بكرێت مەترسیەكانی بەقەدەر سیستەمێكی ئاوە، تائێستا كارم بۆ دەیان ماڵ كردووەو تووشی هیچ حاڵەتێكی وا نەبووم لێچونێكی غاز هەبێت و بۆنی نەیەت». ئەندازیار هاوكار ئەحمەد كە خاوەنی كۆمپانیایەكی دیكەی دروستكردنی خانوبەرەیەو لەوچوارچێوەیەشدا كاری سیستەمی شۆڤاژ دەكات بەهاوڵاتی وت:»ئێمە كاری بیناسازی دەكەین، تائێستا هیچ كۆمپانیایەك نییە بەتایبەت مۆڵەتی دانانی شۆڤاژی بۆ هەرێمی كوردستان هەبێت، زۆربەی ئەوانەی ئەو كارە دەكەن وەستا ئێرانیەكانن، زۆربەی مەوادەكانیش ئێرانی و توركین، لەهەولێریش خەریكە دروستی دەكەن، بۆریەكانیش ئاسنن و وەك بۆری ئاوی ماڵانن، بەڵام ئەوەی ئێستا كوالێتی زۆر خراپە و فرت و فێڵی تێدا دەكرێت». وتیشی:»هیچ كوالێتی كۆنترۆڵێك نییە كە چێكی بۆری و تانكیەكان بكات كە دێتە هەرێمەوە، زۆربەی كەرەستەكان ئێرانی و توركین و چەند كۆمپانیایەكیش دەڵێن كەرەستەی ئەڵمانی و ئیتاڵی بەكاردەهێنن، بەڵام ئەوەی ئێمە بزانین هەر لەتوركیا دروستدەكرێت و زۆربەی كەرەستەكانیان توركییە، شۆڤاژ چەند جۆرێكی هەیە كە زۆربەی لێرە ئێرانیەكە بەكاردەهێنرێت». «تائێستا ئەوەی من ئاگاداربم هیچ لێپرسینەوەیەك نییەو زۆربەی وەستاكان كە كاردەكەن هیچ مۆڵەتێكیان نییە لەلایەن حكومەتەوە بۆیە حكومەت ناتوانێت لێپرسینەوەیان لەگەڵ بكات، سەبارەت بەوەش كەدەوترێت سیستەمەكە لێچوونی هەبێت بۆن دەرناكات وانییە بۆن دەردەكات و ئاسایی بۆنی غازی هەیە، ئەو ئاوەش كە لەژێر خانووەكەدا هەیە هیچ مەترسییەكی نییە چونكە دەسوڕێتەوە و بەسیستەمێك رێكخراوەو غازی تێكەڵ نابێت هەر كێشەیەك دروستبێت لەغازەكەدایە». هاوكار ئەحمەد وای وت. بەوتەی ئەو ئەندازیارە «سیستەمەكە ئامێرێكی لەسەرەو بەویستی كەسەكە خۆی دەتوانرێت پلەی گەرمی لەسەر دابنرێت بەڵام لەسیستەمی ئێرانیدا هەمووی یەك پلەی گەرمییە». خدر سەعید، یەكێكە لەو كەسانەی سیستەمی شۆڤاژی بۆ ماڵەكەی داناوە، بەهاوڵاتی وت:»دوای تەقینەوەكەی گەڕەكی كازیوە ترسم لێنیشتوەو  تەلەفۆنم بۆ كۆمپانیاكە كردووە سیستەمەكەم بۆ لاببەن بەڵام دواتر دڵنیایان كردمەوە كە هیچ كێشەیەكی تێدا نییە، سیستەمەكە نزیكەی ساڵێكە دامناوەو پێشتر هیچ ترسێكم نەبووە لەوەی بتەقێتەوە». وەستا عەتا ئەحمەد یەكێكە لەو وەستایانەی بەسەربەخۆ كاری سیستەمی شۆڤاژ بۆ ماڵان دەكات لەسلێمانی و چەند شارێكی دیكە، بەهاوڵاتی وت:»تائێستا نزیكەی 200 ماڵم داناوە هیچ كێشەیەكی نەبووەو هیچ سیستەمێك نەتەقیوەتەوە، كێشەكە لەشۆڤاژەكەدا نییە بەڵكو لەسیستەمی غازەكەدایە، كاتێك سیستەمێكیش بۆ ماڵێك دادەنێم رێنماییان دەكەم». «نەبوونی كارەباش یەكێكە لەگرفتەكان كەوادەكات ئەلەرمەكان لەوكاتەی كارەبا نییە كارنەكات، زۆركەسیش سیستمی غازەكە لەناو ماڵ دادەنێت كە دەبێت لەسەربانی ماڵەكان بێت». عەتا ئەحمەد وای وت. وەك ئەو وەستایە دەڵێت:»گرنگترین شت ئەوەیە ئەلەرمی غازەكە تەواو بێت كە بۆنێك دەردەكات و خاوەن ماڵەكە ئاگاداردەكاتەوە، ئەگەر سیستەمەكە بەپیل كاربكات باشترە، لەدوای ئەم تەقینەوەیەش خەڵكێكی زۆر تەلەفۆنی بۆكردووم كەمەترسییان لەسیستەمەكە هەیە بەهۆی ئەوەی بەشێك لەكەناڵەكان بەهەڵە لەسیستەمی غازەكە تێگەیشتوون و باسی دەكەن». بەوتەی عەتا ئەحمەد «ئێستا كە ستییەكان دروست دەكرێت سیستەمی شۆڤاژ نییەو تەنیا سیستەمی غازەو لەناو ماڵەكانیشدایە، ئەوەی كێشەكە دروستدەكات سیستەمی غازەكەیە نەك شۆڤاژەكە، ئەگەر حكومەت خۆشی سەرپەرشتی بكردایەو مەركەزیش بوایە بەمشێوازەی ئێستا هەر كێشەی تێدا دروست دەبوو، هەندێك ماڵیش دەڵێن خەتێكی فولم دەوێت و ئێمە بەمیلی باڕ بۆ ئیشكردنی تەباخێك 37 میلی باڕ رادەكێشین بەڵام ئەوان زۆر لەوە زیاتر داوا دەكەن، جگە لەوەی تەنكی غازەكە نابێت زۆری تێبكرێت و بەشێكی بهێڵرێتەوە». «پێویستە مانگانە یان چەند رۆژ جارێك ئەو سیستەمە چێك بكرێتەوە، بەڵام لێرە نە حكومەت گوێی پێدەدات و نە سیستەمێكی حكومیش هەیە بۆ غاز». سیستمی شۆفاژ بەشێوەیەكە كە شۆفاژەكە لەنێو ژوورەكانی ماڵەكەدا دادەنرێت و لەڕێگەی ئاوەوە گەرم دەبێت، ئاوەكەش لەڕێگەی دوو ئامێر كە بەسیستمی غازی ئێڵ پی جییەوە بەستراونەتەوە گەرم دەبێت؛ واتە غاز راستەوخۆ لەنێو شۆفاژدا نییە. تانكەری غازەكەش دەبێت لەسەربانی ماڵەكە دابنرێت.  

هاوڵاتی لەماوەی كەمتر لەدوو مانگدا، سوپای پاسدارانی كۆماری ئیسلامی ئێران بۆ جاری سێیەم هێرشیكردەسەر بنكەو بارەگاكانی حزبە كوردییەكانی رۆژهەڵاتی كوردستان لەهەرێمی كوردستان، هەرێم و بەغداد لیژنەیەكی هاوبەش لەبارەی هێرشەكانی ئێران و توركیا پێكدەهێنن، هاوكات ئێران 10 رۆژ وەك دوایین مۆڵەت بۆ پارتەكانی رۆژهەڵات دیاریی دەكات تا چەك دابنێن. ئەم هێرشانەی سوپای پاسداران لەكاتێكدایە، بەپێی راپۆرتە رۆژنامەوانییەكان، ئیسماعیل قائانی فەرماندەی فەیلەقی قودسی سوپای پاسداران لەماوەی چەندڕۆژی رابووردوودا سەردانی بەغدادی كردووەو هەڕەشەی كردووە كەوڵاتەكەی هێرشی زەمینی بۆ سەر بنكەو بارەگاكانی حزبەكانی رۆژهەڵاتی کوردستان ئەنجامدەدات ئەگەر بێتو حكومەتی عێراق ئاسایشی سنور نەپارێزێت و رێوشوێنی پێویست دژی حزبە كوردییەكان نەگرێتەبەر. قائانی ئەوەشی وتووە ئەگەر بێتو بەغدا بەدەم داواكارییەكانیەوە نەچێت، ئەوا ئێران هێرشی سەربازیی زەمینی دەكات و بۆردومانی بنكەو بارەگاكانی نەیارانیشی دەكات. لەسەردانەكەیدا بۆ بەغداد نێچیرڤان بارزانی سەرۆكی هەرێم لەگەڵ محەمەد شیاع سودانی سەرۆك وەزیران رێككەوتن لیژنەیەكی هاوبەش پێكبهێنن و سەردانی هەردوو وڵاتی ئێران و توركیا بكەن بۆ وەستاندنی هێرشەكانیان، هاوكات سودانی لەكۆنگرەیەكی رۆژنامەوانیدا رایگەیاند: حكومەتی عێراق ئاگاداری هێرشەكانی ئێران نەبووەو رەزامەندی ئێمەشیان لەسەر نەبووە، ئێمە رێوشوێنی پێویست دەگرینەبەر بۆ ئەوەی هێرشەكان دووبارە نەبنەوە.  ناسر كەنعانی وتەبێژی وەزارەتی دەرەوەی ئێرانیش لەبارەی هێرشەكانی سوپای پاسداران بۆ سەر هەرێمی كوردستان رایگەیاندووە: ئێران هەوڵدەدات ئاسایشی خۆی دابینبكات‌و هەڕەشەكان دووربخاتەوە، هەوڵ بۆ ئەوەش دەدات عێراق دەسەڵاتی خۆی لەتەواوی سنورەكانیدا بسەپێنێت‌و چیتر تاران ناچار نەبێت بۆ بەرگری لەخۆی، پەنا بۆ رێكاری دیكە ببات، ئاماژەی بۆ ئەوەشكردووە: چاوەڕوانیمان لەعێراق‌و هەرێمیش ئەوەیە كەچالاكییەكانی حزبەكانی دژبەری ئێران سنوردار بكەن، ئێران چاوەڕوانیی ئەوەشی لەهەرێم هەیە كە نابێت هەرێمی كوردستان ببێتە شوێنی هەناردەكردنی چەك‌و كەرەستەی سەربازیی دژی ئێران. محەمەد كازم ئال سادق، باڵیۆزی ئێران لە عێراق رایگەیاندوە؛ شاندێكی تاران بە سەرۆكایەتیی ئیسماعیل قائانی، فەرماندەی فەریلەقی قودس لەگەڵ بەرپرسانی عێراق كۆبونەتەوە و داوایانكردوە بەپێی خشتەیەكی كاتی پارتەكانی رۆژهەڵاتی كوردستان لەهەرێم چەك بكرێن. ئەو بە تەلەفیزیۆنی (ئەڵعالەم)ی راگەیاندوە؛ بەرپرسانی عێراق رازیبون بەدوو داواكاریی ئێران بۆ چەككردن و رەوانەكردنی ئەندامانی ئەو پارتانە بۆ كامپی پەنابەرانیان بەڵام هاوكات داوای كاتی زیاتریان كردووە بۆ چەككردنی سەرجەم ئەندامان و هێزەكانی ئەو پارتانە. بەپێی لێدوانی باڵیۆزی ئێران لە بەغدا، شاندی وڵاتەكەی 10 رۆژیان وەك دوایین مۆڵەتی بەرپرسانی عێراق و هەرێم دیاریی كردووە بەمەبەستی جێبەجێ كردنی دوو دواكارییە سەرەكییەكەیان. لەبەرامبەر هێرش و پەلامارەكانی ئێرانیش، حكومەتی هەرێمی كوردستان لەڕاگەیەندراوێكدا سەركۆنەی هێرشەكانی ئێرانی كردو رایگەیاند پێشێلكاری بەردەوامی سەروەری عێراق و هەرێمی كوردستان لەلایەن ئێرانەوە، هیچ پاساوێك هەڵناگرێت و پێشێلكردنێكی ئاشكراو زەقی یاساو رێسا نێودەوڵەتییەكان و پەیوەندی دراوسێیانەیە، داواشی لەكۆماری ئیسلامی ئێران كردووە، ئەم شاڵاوە لەدژی هەرێمی كوردستان رابگرێت، چونكە سەقامگیریی، هەرگیز لەڕێگەی توندوتیژییەوە دەستەبەر نابێت. حكومەتی هەرێم داوا لەدۆست و هاوبەشانی لەحكومەتی فیدراڵی و نەتەوەیەكگرتووەكان و كۆمەڵگەی نێودەوڵەتی بەگشتی دەكات، كە هەڵوێستی روون و ئاشكرایان بەرامبەر ئەو هێرشە بەردەوامانە هەبێت.  وەزارەتی دەرەوەی عێراقیش راگەیاند، ئەو هێرشانەی توركیاو ئێران لە رێگەی مووشەك و درۆنەوە دەیكەنە سەر هەرێمی كوردستان، پێشێلكاریی سەروەریی عێراقە. راشیگەیاند: عێراق رەتیدەكاتەوە وڵاتەكەی ببێتە گۆڕەپانێك بۆ یەكلاكردنەوەی ململانێی لایەنی دەرەكی.   لەبارەی كاردانەوە نێودەوڵەتییەكانیەوە، ئەلینا رۆمانۆسكی باڵیۆزی ئەمریكا لەعێراق رایگەیاند: عێراق  پێشێلكاریەكی تری بەخۆوە بینی، هێرشی درۆن و مووشەكی ئێرانی ژیانی هاووڵاتیانی مەدەنی دەخەنە مەترسییەوەو دەبنەهۆی وێرانكردنی ژێرخانی عێراق، دەشڵێت، دەبێت ئەم هێرشە بێباكانەی سەر هەرێمی كوردستان بوەستن. دایڤید هەنت، كونسوڵی گشتی بەریتانیاش لەهەولێر سەبارەت بەهێرشەكانی ئێران بۆ سەر هەرێمی كوردستان رایگەیاند، جارێكی دیكە هەرێمی كوردستان رووبەڕووی هێرشی مووشەكی و فڕۆكەی بێفڕۆكەوان لەلایەن سوپای پاسدارانی ئێران دەبێتەوە، بەریتانیا بەرامبەر ئەم دەستدرێژییە بێ پاساوە لەگەڵ هەرێمی كوردستانی عێراق دەوەستێت، پەیامەكەمان روونە، بوەستن. نێردەی نەتەوەیەكگرتووەكانیش لەعێراق (یۆنامی) لەڕاگەیەندراوێكدا داوایكرد هەموو هێرشە دووبارەبووەكانی ئێرانی لەعێراق بوەستێنرێت كە دەبێتەهۆی پێشێلكردنی سەروەریی عێراق، داواشیكرد بیانووەكان هەرچییەك بن نابێـت پەناببرێتە بەر ئەو هێرشانە كە دەبێتەهۆی خوڵقاندنی كارەسات و پێویستە پەناببرێتە بەر رێگە دیپلۆماسییە باوەكان. باڵیۆزخانەی كەنەدا لەعێراق لە راگەیەنراوێكدا ئیدانەی هێرشەكانی ئێرانی بۆ سەر بارەگای حزبەكانی رۆژهەڵات لەهەرێمی كوردستان كردو دووپاتیكردەوە، ئەو جۆرە هێرشانە سەروەریی خاكی عێراق پێشێل دەكەن و گیانی كەسانی مەدەنی دەخەنە مەترسییەوە و پێویستە ئەو هێرشانە رابگیرێن. سوپای پاسدارانی ئێران لە رێكەوتی (28/9/2022) واتە 12 رۆژ دوای سەرهەڵدانی ناڕەزایەتییەكانی مەرگی ژینا ئەمینی بەموشەك و فڕۆكەی خۆكوژ هێرشی كردەسەر بنكەو بارەگاكانی حدكاو كۆمەڵەو پاك لەهەولێرو كۆیەو سلێمانی كە بووەهۆی شەهیدبوونی 18 كەس كە ژمارەیەكیان ژن و منداڵ بوون و هاوكات بریندابوونی 62 كەسی لێكەوتەوە، لەهێرشەكانی رۆژی دووشەممە (14/10/2022)ش بۆ سەر بارەگاكانی حدكا لەكۆیە دوو پێشمەرگە شەهیدبوون و هەشت كەسی دیكەش برینداربوون. درەنگانی شەوی یەكشەممەو بەرەبەیانی دووشەممە بەدرۆن و مووشەك هێرشیكردە سەر بارەگای حزبی دیموكراتی كوردستانی ئێران لەكۆیەو كامپی جێژنیكان لە بەحركەی هەولێر كەخێزانی پەنابەرەكانی رۆژهەڵاتی كوردستان تێیدا نیشتەجێن؛ هەروەها بارەگای حزبی كۆمەڵەی شۆڕشگێڕ لەزڕگوێز، لەئاكامدا پێشمەرگەیەكی حزبی دیموكرات لەكۆیە شەهید بوو، هەروەها رۆژی سێشەممە ئێران بە چوار موشەك هێرشی كردەسەر بارەگای پارتی ژیانی ئازادی كوردستان لە پردێ‌، سەرۆكی حزبەكە دەڵێت ژمارەیەك پێشمەرگەمان برینداربوون.  

هاوڵاتی لە چاوپێکەوتنێکدا لەگەڵ ماڵپەڕی ئەلمۆنیتۆری ئەمریکی، مەزلۆم کۆبانێ فەرماندەی گشتی هێزەکانی سوریای دیموکرات (هەسەدە)، ئاماژەی بەوەدا کە تورکیا دەیەوێت دەست بەسەر کۆباێیدا بگرێت و بە شاری عەزازی باکوری حەلەب و ئەو ناوچانەوە بیبەستێتەوە کە لەساڵی ٢٠١٩، داگیرکراون و ووتیشی ئەو ژنەى، كە لەلایەن دەسەڵاتدارانی توركیاوە دەستگیركرابوو بەهۆی ئەنجامدانی تەقینەوەكەی ئەستەنبوڵ خەڵكیشاری حەلەبی سوریایە ، هەروەها، سەر بە گروپی تیرۆرستی داعشە. مەزلۆم کۆبانێ فەرماندەی گشتی هێزەکانی سوریای دیموکرات (هەسەدە) لەبارەی ئەنجامدەرانی تەقینەوەکەی ئەستەنبوڵ کە تورکیا هێزەکانی رۆژئاوای کوردستان بە ئەنجامدانی تۆمەتبار دەکات وتی، " من پێم وایە ئەو تەقینەوەیە هەوڵێکی تێکدەرانەی حکومەتی تورکیابوو، بۆ ئەوەی زەمینەی هێرشکردنە سەر رۆژئاوای کوردستان ئامادە بکەن". وتیشی "ئێمە لێکۆڵینەوەیەکی زۆرمان کردووە و گەیشتوینەتە ئەو ئەنجامەی کە هێرشەکە لەلایەن گروپە ئۆپۆزسیۆنەکانی سوریاوە ئەنجامدراوە کە لە ژێر کۆنترۆڵی تورکیادا کاردەکەن " ئەوەشی ڕونکردەوە کە بۆ یەکەمجارە ئەم زانیاریانە بۆ میدیاکان ئاشکرا دەکات و وتی " ئەو ژنەی دەستگیرکراوە لە خێزانێکەوە هاتووە کە پەیوەندییان بە داعشەوە هەیە. سێ برای لە ریزەکانی داعشدا کوژراون. یەکێکیان لە ڕەقە کوژراوە، یەکێکی دیکە لە منبج و یەکێکیشیان لە عێراق کوژراوە. برایەکی دیکە فەرماندەی ئۆپۆزسیۆنی سوریایە کە تورکیا لە عەفرین پشتیوانی دەکات ، بۆیە ئێمە بە هیچ شێوەیەک پەیوەندیمان بە تەقینەوەکەوە نەبوو و سیاسەتێکی لەو جۆرەمان نییە".

هاوڵاتی مەزلۆم عەبدی، ڕایگەیاند، ئامانجی ڕاستەقینەی لەشکرکێشی زەمینی سوپای تورکیا، دەستبەسەرداگرتنی شاری کۆبانێیە. لە چاوپێکەوتنێکدا لەگەڵ ماڵپەڕی ئەلمۆنیتۆری ئەمریکی، مەزلۆم کۆبانێ فەرماندەی گشتی هێزەکانی سوریای دیموکرات (هەسەدە)، ئاماژەی بەوەدا کە تورکیا دەیەوێت دەست بەسەر کۆباێیدا بگرێت و بە شاری عەزازی باکوری حەلەب و ئەو ناوچانەوە بیبەستێتەوە کە لەساڵی ٢٠١٩، داگیرکراون. لە وەڵامی پرسیارێکدا سەبارەت بە هەڵوێست و لێدوانی بەرپرسانی روسیا و ئەمریکا سەبارەت بە ئەگەری هێرشی زەمینی تورکیا، مەزلۆم عەبدی دەڵێت، " زۆربەی ئەو ناوچانەی کە هێرشیان دەکرێتە سەر، هێزی روسیا و ئەمریکاشی لێیە و دەبێت هەڵوێستیان هەبێت و رێگری بکەن." فەرماندەی هێزەکانی سوریای دیموکرات، جەختی لەوە کردەوە کە هێرشی زەمینی تورکیا بۆسەر خاکی رۆژئاوا دەبێتە هۆی ناسەقامگیری ناوچەکە و گورزێکی کاریگەر دەبێت لە هەوڵەکانی شەڕی دژی داعش. مەزلۆم کۆبانێ لەبارەی هەڵوێستی حکومەتی سوریا لەم کاتەدا، ئاماژەی بەوەدا کە نەبوونی سیاسەتێکی روون، لەلایەن ئەمریکاوە سەبارەت بە ئایندەی باکور و رۆژهەڵاتی سوریا، دەبێتە هۆی ئەوەی کە گفتوگۆکردن لەگەڵ دیمەشق، بەشێوەیەکی سەرکەوتوانە بۆ رۆژئاوای کوردستان قورس بێت." مەزلۆم کۆبانێ فەرماندەی گشتی هێزەکانی سوریای دیموکرات (هەسەدە) راشیگەیاندووە، چەکدارەکانی جەبهەت النوسرە، بە هاوکاری تورکیا، خۆیان بۆ هێرشکردنە سەر رۆژئاوای کوردستان ئامادە دەکەن و وتی، لە هەموو حاڵەتێکدا، هەسەدە بەرگری دەکات و وڵامی هێرشەکان دەداتەوە. مەزلۆم کۆبانێ لەبارەی ئەنجامدەرانی تەقینەوەکەی ئەستەنبوڵ کە تورکیا هێزەکانی رۆژئاوای کوردستان بە ئەنجامدانی تۆمەتبار دەکات وتی، " من پێم وایە ئەو تەقینەوەیە هەوڵێکی تێکدەرانەی حکومەتی تورکیابوو، بۆ ئەوەی زەمینەی هێرشکردنە سەر رۆژئاوای کوردستان ئامادە بکەن. ئێمە لێکۆڵینەوەیەکی زۆرمان کردووە و گەیشتوینەتە ئەو ئەنجامەی کە هێرشەکە لەلایەن گروپە ئۆپۆزسیۆنەکانی سوریاوە ئەنجامدراوە کە لە ژێر کۆنترۆڵی تورکیادا کاردەکەن. بۆ یەکەمجار ئەم زانیاریانە بۆ میدیاکان ئاشکرا دەکەم کە ئەو ژنەی دەستگیرکراوە لە خێزانێکەوە هاتووە کە پەیوەندییان بە داعشەوە هەیە. سێ برای لە ریزەکانی داعشدا کوژراون. یەکێکیان لە ڕەقە کوژراوە، یەکێکی دیکە لە منبج و یەکێکیشیان لە عێراق کوژراوە. برایەکی دیکە فەرماندەی ئۆپۆزسیۆنی سوریایە کە تورکیا لە عەفرین پشتیوانی دەکات. بۆیە ئێمە بە هیچ شێوەیەک پەیوەندیمان بە تەقینەوەکەوە نەبوو و سیاسەتێکی لەو جۆرەمان نییە. ئەمەشلە کاتێکدایە ئەمڕۆ رەجەب تەیب ئەردۆغان سەرۆککۆماری تورکیا لە کۆبونەوەی فراکسیۆنی پارتەکەیدا لە پەرلەمانی تورکیا، جارێکی دیکە هەڕەشەی لە رۆژئاوای کوردستان کرد و وتی، " هێرشە ئاسمانیەکان بۆسەر 'باکوری سوریا' بەردەوام دەبێت و لە گونجاوترین کاتدا، بە زەمینیش سوپا دەست بە جووڵە دەکات."

هاوڵاتی هەدەپە لەسەر بەکار‌هێنانی چەکی کیمیایی هۆشداریی دەداتە وەزیری بەرگریی تورکیا ،هەدەپە هۆشداریی دەداتە وەزیرى بەرگرى تورکیا کە چارەنوسی وەک عەلى کیمیایی دەبێت ئەگەر لێکۆڵینەوەی راستەقینە لەسەر بەکارهێنانى چەکى کیمیایی لە دژى گەریلاکانى پەکەکە نەکات. محەمەد روشتی تریاکى، پەرلەمانتارى پارتی دیموکراتی گەلان (هەدەپە) لە چوارچێوەى گفتوگۆکردن لەسەر بودجەى وەزارەتى بەرگریى تورکیا بۆ ساڵى 2023، رایگەیاند؛ ساڵى 1988 بە فەرمانى عەلى حسێن مەجید کە وەزیرى بەرگرى ئەوکات بوو، چەکى کیمیایی دژى کورد لە عێراق بەکارهێنرا، هەربۆیە ناویان کرد بە عەلى کیمیایی. ئەو پەرلەمانتارەى هەدەپە وتوشەیەتی: بەڵگە هەیە لەسەر بەکارهێنانى چەکى کیمیایی لە سنورەکانى هەرێمى کوردستان و پێویستە لێکۆڵێنەوە لەسەر ئەو بەڵگانە بکرێت. محەمەد روشتی جەختی کردوەتەوە بە رەتکردنەوەى بەکارهێنانى چەکى کیمیایی راستییەکان پەردەپۆش ناکرێن و عەلى کیمیاییش کاتی خۆی رەتى دەکردەوە چەکى کیمیایی لە هەڵەبجە بەکارهێنابێت، بەڵام دواتر بە هەمان تاوان لەسێدارە درا.

هاوڵاتی هێرشەکانی تورکیا بۆسەر رۆژئاوای کوردستان بەردەوامە و لە دێرک دوو کەس بریندار بوون . سەرلەبەیانی ئەمڕۆ جارێکی دیکە، تۆپخانە، فڕۆکە و درۆنەکانی سوپای تورکیا، دەستیان کردەوە بە هێرشکردنە سەر رۆژئاوای کوردستان و لە شاری دێرک دوو کەس بریندار بوون. کاتژمێر ١٠ی بەیانی ئەمڕۆ، سوپای تورکیا ناوەندی شاروچەکی تەل رەفعەتی کانتۆنی شەهبای تۆپباران کرد. بەگوێرەی زانیاریەکانی هاوڵاتی، ناو بە ناو تۆپبارانەکە بەردەوامە. نزیکەی نیو کاتژمێر لەمەوبەریش، چەند گوندێکی قامشلۆ کرانە ئامانج و ئاژانسی هاوارنیوز رایگەیاند، فڕۆکە جەنگیەکان بەسەر ئاسمانی شارۆچکەی رمێلان دەسووڕێنەوە کە زۆربەی دامودەزگا فەرمیەکانی خۆبەڕێوەبەری رۆژئاوای کوردستان لەو شارۆچکەیەن. هەروەها باسی ئەوە دەکرێت، درۆنەکانی تورکیا وێستگەیەکی غازیان لە نزیک شاری دێرک، کردووتە ئامانج و دوو هاوڵاتی مەدەنی بریندار بوون. هێزەکانی سوریای دیموکراتی (هەسەدە) درەنگانی شەوی رابردوو، ئاماری دوێنێی هێرشەکانی تورکیای بۆسەر رۆژئاوای کوردستان ئاشکرا کرد و رایگەیاند، دوێنێ فڕۆکە جەنگیەکان و درۆنەکانی تورکیا ١٢ جار شار و ناوچەکانی رۆژئاوای کوردستانیان بۆردومان کردووە و لە رووی زەمینیشەوە ٥٩٠ گولە تۆپ بەر خاکی رۆژئاوای کوردستان کەوتوون

سەركۆ جەمال ژمارەیەك خوێندكاری زانكۆو پەیمانگا لەسلێمانی لەلایەن دەزگا ئەمنیەكانەوە دەستگیردەكرێن، بەشێك لەخوێندكارانیش دەڵێن ئەوانەی ئازادكراون بەڵێننامەیان پێ پڕكراوەتەوە، دەستەی مافی مرۆڤیش دەڵێت بەدواداچوونمان بۆ خوێندكارە دەستگیركراوەكان كردووە. د.پێشڕەو حەمەجان، یاریدەدەری سەرۆكی زانكۆی سلێمانی بۆ كاروباری خوێندكاران بەهاوڵاتی راگەیاند:»بەشێوەیەكی فەرمی ئاگادارنین چەند خوێندكار دەستگیركراون، ئەوەی هەیە بەشێك دەڵێن 104 خوێندكار لەلایەن ئاسایشەوە دەستگیركراون، بۆ ئەو مەبەستە رۆژی سێشەممە 22-11-2022 تیمێكی سەرۆكایەتیی زانكۆی سلێمانی لەگەڵ ئاسایشی سلێمانی كۆبووەتەوەو بۆ ئەوەی ناوو ژمارەی خوێندكاران بەدروستی وەربگرین و بزانین چۆن دەتوانین بەشێوەیەكی یاسایی ئازادیان بكەین». یاریدەدەری سەرۆكی زانكۆی سلێمانی وتیشی: «كار بۆ ئازادكردنی خوێندكاران دەكەین ئاگادارنین لەكوێ خوێندكارەكان دەستگیركراون، بەشێك دەڵێن لەناو حەرەمی زانكۆ دەستگیركراون، بەڵام لایەنی دیكە دەڵێن لەدەرەوەی زانكۆی سلێمانی دەستگیركراون». لەبارەی دەرماڵەی خوێندكاران یاریدەدەری سەرۆكی زانكۆی سلێمانی وتی: «ئەوەی لەسەر ئێمەیە كردوومانە لەمانگی شەشەوە داوامانكردووە دەرماڵەی خوێندكاران بۆ ئەمساڵیش خەرج بكرێت، ئەنجومەنی وەزیرانیش بەنووسراو ئەو داوایەی ئاراستەی وەزارەتی دارایی كردووەو ئەوانیش لاری نەبوونیان لەسەر بڕیارەكە داوە، دواتر نووسراوەكە گەڕاوەتەوە ئەنجومەنی وەزیران و ئێستا بڕیار لای ئەوانە». لەبارەی دەوامكردنیش لەزانكۆی سلێمانی یاریدەدەری سەرۆكی زانكۆی سلێمانی بۆ كاروباری خوێندكاران دەڵێت: «بەفەرمی دەوام هەیە، بەڵام بەواقعی خوێندكاران بەشێكی زۆریان ناگەڕێنەوە بۆ زانكۆ.» دەستگیركردنی ئەو خوێندكارانە دوای ئەوە هات، هەفتەی رابردوو لەزانكۆكانی سلێمانی، راپەڕین، گەرمیان و هەڵەبجە خوێندكاران خۆپیشاندان و گردبوونەوەیان ئەنجامدا و داوای خەرجكردنی دەرماڵەیان كرد. هاوڵاتی بۆ بەدواداچوونی زیاتر لەسەر دەستگیركردنی ئەو خوێندكارانە پەیوەندی بە ئارام محەمەد وەزیری خوێندنی باڵای حكومەتی هەرێمەوە كرد، بەڵام ئامادەنەبوو لەسەر دەستگیركردنی خوێندكاران قسەبكات.  هاوكات بەوتەی سەرچاوەیەك لەسەرۆكایەتی زانكۆی پۆلیتەكنیكی سلێمانی لەكاتی سەردانەكەدا هیوا ئەحمەد بەڕێوەبەری ئاسایشی سلێمانی رایگەیاندووە:» ئەو خوێندكارانە بەكەسوكاری خۆیان دەزانن و مامەڵەیەكی زۆر یاساییان لەگەڵدا كراوەو لەئەمڕۆوە بەپێی یاسا ئەو خوێندكارانە ئازاد دەكرێن و دەگەڕێندرێنەوە بۆ ناوەندەكانی خوێندن». بەڵام ئەندامێكی ئەنجومەنی خوێندكارانی ناڕازی زانكۆی سلێمانی دەڵێت: 105 خوێندكار رۆژی دووشەممە 21-11-2022  لەلایەن هێزە ئەمنیەكانەوە دەستگیركراون، وتیشی: بایكۆتی هۆڵەكانی خوێندن دەكەین و رۆژی یەكشەمە جارێكی تر دەگەڕێینەوە شەقام. هاوڵاتی بەدواداچوونی كرد بۆ دەستگیركردنی ئەو خوێندكارانە، بەوتەی چەند سەرچاوەیەك لەئاسایشی سلێمانی و پۆلیسی سلێمانی، خوێندكارەكان لەچەند شوێنێكی جیاوازو بەشێكیان لەكاتی گەڕانەوەیان لەخۆپیشاندانەكانەوە بۆ ماڵەوە یاخود بۆ بەشە ناوخۆییەكانیان دەستگیركراون، هاوكات دوو مامۆستای زانكۆی سلێمانی و زانكۆی پۆلەتەكنیكی سلێمانی پشتڕاستیان كردەوە كە دەیان خوێندكار دەستگیركراون و ئاگاداری كەسوكاری بەشێك لەو خوێندكارانەیان كردووەتەوە. بەوتەی چەند خوێندكارێكی زانكۆ كە بۆ هاوڵاتی قسەیانكردووە، ئەو خوێندكارانەی ئازادكراون لەئاسایشی سلێمانی بەڵێننامەیان پێ پڕكراوەتەوە كە جارێكی دیكە بەشداری خۆپیشاندان نەكەن. هاوكات دەستەی سەربەخۆی مافی مرۆڤی هەرێم لەڕاگەیەندراوێكدا دەڵێت: دوای بەدواداچونمان لەگەڵ ئاسایشی پارێزگای سلێمانی بڕیارە دوای تەواوبونی رێكارە یاساییەكان  خوێندكارە دەستگیركراوەكان ئازاد بكرێن.

هاوڵاتی وەزارەتى خوێندنى باڵا کارکردنى بە سیستمى غازى شل لەسەرجەم دامەزراوەکانى ڕاگرت ئەمڕۆ چوارشەممە وەزارەتی خوێندنی باڵا کارکردنى بە سیستمى غازى شل لەسەرجەم دامەزراوەکانى ڕاگرتو ڕایگەیاند  پێویستە بەزوترین کات و زۆر بەوردى بەدواداچون بۆ هەمو ئەو سیستمانە بکرێ، کە بەمەبەستى ئامادەکردن یان گەرمکردنەوەى خواردن بەکاردێن و لە سەلامەتى دڵنیا ببنەوە، و دەبێت لە ماوەى (٣) سێ ڕۆژدا ڕاپۆرتێکى تێروتەسەل لە ڕێگەى بەڕێوەبەرایەتى تەندروستى و سەلامەتى زانکۆ و پەیمانگەکان و بەهەماهەنگى لەگەڵ بەڕێوەبەرایەتى بەرگرى شارستانى ئامادە بکرێت. هەروەها دەبێت هەمو ئەو سیستمانەى بەمەبەستى ئامادەکردن و گەرمکردنەوەى خواردن لەسەر هەمو زانکۆ و پەیمانگە و دامەزراوەکانى سەر بەوەزارەت و لە بەشە ناوخۆییەکان بەکار دێن، پێویستە ڕێگەپێدانى بەرگرى شارستانیان هەبێت و مۆڵەتى دانانى هەبێت و لە لایەن کۆمپانیاکان. لە کۆتایشدا وەزارەتى خوێندنى باڵا و توێژینەوەى زانستى تەئیکدى لەسەر ئەوە کردۆتەوە، کە لە حاڵەتى کەمتەرخەمى و جێبەجێنەکردنى ئەو خاڵانەى سەرەوە لایەنى کەمتەرخەم ڕوبەڕوى یاسا دەبێتەوە. دەقی بڵاوکراوەکە: لەپێناو بەرژەوەندى گشتى و پاراستنى سەلامەتى گیان و ژیانى مامۆستایان و فەرمانبەران و قوتابیان و خوێندکاران لەسەرجەم زانکۆ و پەیمانگەو بەشە ناوخۆییەکان و دامەزراوەکانى دیکەیدا، لە نوسراوێکدا وەزارەتى خوێندنى باڵا و توێژینەوەى زانستى کارکردنى بەسیستمى غازى شل لەسەرجەم دامەزراوەکانى ڕاگرت. وەزارەتى خوێندنى باڵا و توێژینەوەى زانستى لە نوسراوەکەیدا، کە لەلایەن دەزگاى سەرپەرشتى و دڵنیایی جۆرى دەرچوە، بەسێ خاڵ وردەکارى بڕیارەکەى ڕونکردۆتەوە، وەک لە خاڵى یەکەمدا هاتوە پێویستە دامەزراوەکان دەستبەجێ کارکردن بەسیستمى غازى شل ڕابگرن، لە خاڵى دوەمدا جەخت لەسەر ئەوە کراوەتەوە کە پێویستە بەزوترین کات و زۆر بەوردى بەدواداچون بۆ هەمو ئەو سیستمانە بکرێ، کە بەمەبەستى ئامادەکردن یان گەرمکردنەوەى خواردن بەکاردێن و لە سەلامەتى دڵنیا ببنەوە، بۆ ئەو مەبەستە پێویستە لە ماوەى (٣) سێ ڕۆژدا ڕاپۆرتێکى تێروتەسەل لە ڕێگەى بەڕێوەبەرایەتى تەندروستى و سەلامەتى زانکۆ و پەیمانگەکان و بەهەماهەنگى لەگەڵ بەڕێوەبەرایەتى بەرگرى شارستانى ئامادە بکەن. لە خاڵێکى دیکەى نوسراوەکەدا هاتوە، دەبێت هەمو ئەو سیستمانەى بەمەبەستى ئامادەکردن و گەرمکردنەوەى خواردن لەسەر هەمو زانکۆ و پەیمانگە و دامەزراوەکانى سەر بەوەزارەت و لە بەشە ناوخۆییەکان بەکار دێن، پێویستە ڕێگەپێدانى بەرگرى شارستانیان هەبێت و مۆڵەتى دانانى هەبێت و لە لایەن کۆمپانیاکان. لە کۆتایشدا وەزارەتى خوێندنى باڵا و توێژینەوەى زانستى تەئیکدى لەسەر ئەوە کردۆتەوە، کە لە حاڵەتى کەمتەرخەمى و جێبەجێنەکردنى ئەو خاڵانەى سەرەوە لایەنى کەمتەرخەم ڕوبەڕوى یاسا دەبێتەوە.

هاوڵاتی هەسەدە درەنگانی شەوی رابردوو، ئاماری هێرشەکانی دەوڵەتی تورکیای بۆسەر رۆژئاوای کوردستان بڵاوکردەوە و رایگەیاند، لە هێرشەکاندا، دوو شەڕڤانی هێزەکانی دژە تیرۆر شەهید بوون و سێ شەڕڤانیش بریندار بوون. هێزەکانی سوریای دیموکراتی (هەسەدە) رایگەیاند، دوێنێ فڕۆکە جەنگیەکان و درۆنەکانی تورکیا ١٢ جار شار و ناوچەکانی رۆژئاوای کوردستانیان بۆردومان کردووە و لە رووی زەمینیشەوە ٥٩٠ گولە تۆپ بەر خاکی رۆژئاوای کوردستان کەوتوون. لە ئامارەکەدا هاتووە، سوپای تورکیا لە رووی زەمینی و ئاسمانیەوە، ١٢ جار بە فڕۆکەی جەنگی و درۆن و ٥٩٠ جاریش بە تۆپ، هاوەن و موشەک، هەرێمی شەهبا، باشوری عەفرین، منبج و گوندەکانی، کۆبانێ و گوندەکانی، حەسەکە و گوندەکانی، قامشلۆ و گوندەکانی و گوندێکی دێرەزۆری کردووەتە ئامانج. قەسەدە دەڵێت، تورکیا لە هێرشەکانیدا، چەندین قوتابخانە و پاڵاگەی نەوتی بۆردومان و تۆپباران کردووە. سەرلەبەیانی ئەمڕۆش، تۆپخانەکانی تورکیا لە بارەگاکانی سەر سنورەوە، چەند گوندێک زەرگان و کانتۆنی شەهبای نێوان عەفرین و کۆبانێیان تۆپباران کردووە.

هاوڵاتی  67 رۆژە ناڕەزایەتییەکانی لە رۆژهەڵاتی کوردستان و ئێران بەردەوامە و حەفتەیەکە ئاستی توندوتیژییەکانی هێزە ئەمنییەکان بەرامبەر خەڵکی کورد زۆر زیاتری کردوە بە جۆرێک ناوەندەکانی مافی مرۆڤ و مامۆستایانی ئایینیی هۆشداریی دەدەن لە چۆنیەتی مامەڵەی کۆماری ئیسلامی بەرامبەر ناڕەزایەتییەکانی رۆژهەڵات. سەرەڕای توندوتیژییەکان و رەوانەکردنی هەزارن هێزی چەکدار بۆ ناوچەکانی رۆژهەڵاتی کوردستان بەڵام ناڕەزایەتییەکان لەو بەشەی کوردستان بەردەوامن و ژن و منداڵ، بەساڵاچو و گەنجی کورد بەردەوامن لە ناڕەزایەتیی و گوللـە و کوشتن و بڕین لە دەربڕینی ناڕەزایەتیی ساردی نەکردونەتەوە بە جۆرێک ئێستا کورد بوەتە پێشەنگی ناڕەزایەتییە سەرتاسەرییەکان و بە دروشم لە تاران و کەرەج و شارەکانی دیکە هاوسۆزی و پشتیوانیی بۆ کورد دەردەبڕدرێت. رۆژی سێشەممە دوای تێپەڕاندنی سێ شەوی خوێناوی لە چوارچێوەی ناڕەزایەتییەکان لە زۆربەی شارەکانی رۆژهەڵاتی کوردستان دوکان و بازاڕەکان نەکرانەوە. لە (مەهاباد،بۆکان، سەقز، سنە، پیرانشار، مەریوان، جوانڕۆ، روانسر) و چەند شارێکی دیکەی رۆژهەڵات دوکان و بازاڕەکان لە چوارچێوەی ناڕەزایەتییەکان نەکرانەوە و هێزە ئەمنییەکانیش لە رێگەی بڵندگۆوە داوایان لە کاسبکاران کرد دوکان و بازڕەکان بکەنەوە بەڵام ئەو هەوڵەی هێزە ئەمنییەکان شکستی هێنا. لە هەندێک گەڕەکی شاری جوانڕۆ ناڕەزایەتیی بەڕێوەچو و هێزە ئەمنییەکانیش بۆ بڵاوپێکردنی گەنجان تەقەیان کرد بەڵام تا ئێستا ژمارەی کوژرا و برینداری ناڕەزایەتییەکانی ئەمڕۆی ئەو شارە دیار نییە بە تایبەت کە زۆرینەی هێڵەکانی ئینتەرنێت لەو ناوچەیە لەکارخراون. لە شاری کرماشان و مەهاباد هێزە ئەمنییەکان شەوی سێشەممە هەڵیانکوتایە سەر ماڵی دەیان دانیشتوی ئەو دو شارە و چەند کەسێکیان دەستگیر کرد. سوپای پاسداران حاشای لەوە نەکردوە کە هێزەکانیان لە جوانڕۆ و پیرانشار و مەهاباد تەقەیان لە خەڵک کردوە. بە پێی ئەو تۆمارە ڤیدیۆییانەی کە لە شارەکانی رۆژهەڵاتی کوردستان بڵاوکراونەتەوە؛ هێزە ئەمنییەکانی ئێران بۆ سەرکوتی ناڕەزایەتییەکانی و کۆتایی خۆپیشاندانەکان چەکی سەربازیی و لە هەندێک حاڵەتیشدا دۆشکا بەکاردەهێنن. مامۆستایانی ئایینیی شاری سنە ودەوروبەری لە بەیاننامەیەکدا؛ رایانگەیاند ئەوەی هێزە ئەمنییەکانی لە ماوەی زیاتر لە دو مانگی رابردودا بەرامبەر خۆپیشاندەران کردویانە، هاوشێوەی کۆمەڵکوژییەکی ستەمکارانەیە. ئەو مامۆستایانە ئاماژەیان بەوە کردوە هێزە ئەمنییەکانی کۆماری ئیسلامی ئێران بە هەمو شێویەک هەوڵی سەرکوتی خەڵکی رۆژهەڵاتی کوردستانیان داوە و دەستیان هەبوە لە رشتنی خوێنی گەنجان و لاوان بۆیە ئەوان هاوشانی خەڵکی ناڕازیی پشتیوانیی لە خۆپیشاندان دەکەن و هاوکات جەختیان لەوە کردەوە دەسەڵاتی ستەمکار نابێت حوکمڕانیی خەڵک بکات و دەبێت شەرعیەتی دەسەڵات بخرێتە ریفراندۆمە و خەڵک مافی خۆیانە دەسەڵاتی ئێستای ئێران هەڵنەبژێرن. زانکۆکان لە ژمارەیەکی بەرچاوی زانکۆکانی کوردستان لە سنە و زانکۆکانی تاران و بابۆل و ئەسفەهان گردبونەوە و ناڕەزایەتییەکان بەردەوام بون. لە زانکۆی کوردستان لە سنە سرود بۆ شەهیدانی رۆژهەڵاتی کوردستان وترایەوە و خوێندکاران بە گردبونەوەی ناڕەزایەتیی بایکۆتی هۆڵەکانی خوێندنیان کرد. ژمارەیەکیش لە خوێندکارانی ئەو زانکۆیە بە رێپێوان و خۆپیشاندان دروشمی "کوردستان ناوی بەرزە دوژمن دەخاتە لەرزە "یان وتەوە. لە زانکۆی شەریف لە تاران پێکدادن لە نێوان خوێندکارانی ناڕازی و خوێندکارانی سەر بە دەسەڵاتی کۆماری ئیسلامی ئێران رویدا. هاوکات لە زانکۆی پزیشکیی مەشهەد هێرش کرایە سەر خوێندکاران و ژمارەیەکیان لێ برینداربو و لە زانکۆکانی بوشەهر-یش بایکۆت و ناڕەزایەتیی بەردەوام بو. خوێندکارانی زانکۆی بوشەهر گردبونەوەیان ئەنجام دا و بایکۆتی هۆڵەکانی خوێندنیان کرد. ناڕەزایەتییەکانی شەوی سێشەممە شەوی سێشەممە لە چەند گەڕەکێکی تاران ناڕەزایەتیی بەڕێوەچو و دژی دەسەڵات دروشم وترایەوە. لە شاری زاهیدان لە پارێزگای سیستان و بەلوچستان هێزە ئەمنییەکان بۆ رێگریی لە خۆپیشاندان و ناڕەزایەتیی تەقەیەکی زۆریان کرد. لە شاری ئەندیمێشک لە پارێزگای خوزستان هاوشێوەی زاهیدان تەقەی زۆر کرا و لە چەند شارێکی پارێزگای فارس هاوکات ناڕەزایەتیی بەڕێوچو. میدیاکانی سەر بە دەسەڵات بڵاویان کردەوە شەوی سێشەممە ئەفسەرێکی سوپای پاسداران بە ناوی سەعید بەهەشتی لە شاری کرماشان و لەبەردەم ماڵەکەی خۆیدا بە دەستڕێژی گوللـە کراوەتە ئامانج و مردوە. بە پێی ئەو زانیارییانەی لە سەرچاوەکانی هەواڵی رۆژهەڵاتەوە بڵاو کراوەتەوە ئەو ئەفسەرە دەستی هەبوە لە سەرکوتی ناڕەزایەتییەکان و تەقەکردن لە گەنجانی شارەکە. رێکخراوەکانی مافی مرۆڤی رۆژهەڵاتی کوردستان بڵاویان کردوە لە 66 رۆژی ناڕەزایەتییەکاندا 102 کەس لەو بەشەی کوردستان کوژروان، بە گشتی تا ئێستا 434 کەس لە ناڕەزایەتییە سەرتاسەرییەکانی ئێران کوژراون کە یەک لەسەر چواری ژمارەی کوژراون هەومو وڵاتەکە خەڵکی رۆژهەڵاتی کوردستان بون. بە پێی ئامارەکان تا ئێستا لە سەرتاسەری ئێران نزیکەی 17 هەزار و 500 کەس دەستگیرکراون، رێکخراوەکانی مافی مرۆڤ هۆشدارییان داوە بەهۆی هێزە ئەمنییەکانەوە ژمارەیەکی زۆری برینداران رو لە نەخۆشخانەکان ناکەن و ئەوەش مەترسیی بۆ ژیانیان دروست دەکات.

هاوڵاتی لەماوەی كەمتر لەهەفتەیەكدا لەسلێمانی و دهۆك، بەهۆی تەقینەوەی غازەوە 21 كەس گیانیان لەدەستداو 43 كەسی دیكەش برینداربوون، هەردوو رووداوەكە كاردانەوەی زۆریان لێكەوتەوە، حكومەتی هەرێم بڕیاریدا بەكارهێنانی سیستەمەكە رابگیرێت. مەسرور بارزانی سەرۆكی حكومەتی هەرێم سەرپەرشتی كۆبوونەوەیەكی تایبەت بەڕووداوەكانی تەقینەوەی غازی لەسلێمانی و دهۆك كرد،  لایەنە پەیوەندیدارەكانی حكومەتی راسپارد كەپێداچوونەوە بەهەموو ئەو شوێنە گشتی و تایبەتانەی ئەم جۆرە سیستەمە بەكاردەهێنن بكەن و لێكۆڵینەوەی جیدی و ورد لەبارەی جۆری غازەكە و لایەنە جێبەجێكارەكان و هۆكارەكانی رووداوەكانی سلێمانی و دهۆك بكەن، تا دەركەوتنی ئەنجامی لێكۆڵینەوەش، بڕیاردرا بەكارهێنانی سیستەمەكە لەو شوێنانەی بەكاردەهێنرێت، رابگیرێت . هاوكات نێچیرڤان بارزانی، سەرۆكی هەرێم لەبارەی تەقینەوەكەی دهۆكەوە رایگەیاند: دووبارەبوونەوەی رووداوی تەقینەوەی غاز جێگەی نیگەرانی و مەترسیی جیدییە دەبێت لایەنی پەیوەندیدار بەزووترین كات و بەجیدی لەسەر ئەو بابەتە رابوەستێت و چاودێرییەكی باشتری سیستەمی غازو چۆنیەتیی بەكارهێنانی بكات. هەروەها قوباد تاڵەبانی جێگری سەرۆكی حكومەتی هەریم رایگەیاند: هێشتا برینی كارەساتەكەی سلێمانیمان لەدڵەو بەداخەوە ئەمجارە كارەساتی تەقینەوەی غازی لەدهۆك هاتەسەر. لەبارەی راگرتنی كاركردن بەسیستەمی غاز، جەوهەر عەلی، قایمقامی دهۆك دەڵێت: دوای رووداوەكەی دهۆك بڕیاردرا كاركردن بەسیستمی غاز رابگیرێت تاوەكو پێداچوونەوەی پێویست دەكرێت. هاوكات رێكان جەمال، سەرۆكی لیژنە هاوبەشەكانی قایمقامیەتی سلێمانی رایگەیاند: كۆمەڵێك بڕیار دەرچوون كە نابێت ئیتر ئەو سیستەمە بەكاربهێنرێت، دوای ئەوە لەو بڕیارانە ئاگادار دەكرێنەوە بزانین شێوازی راگرتنی چۆن دەبێت ئەوكات رێنمایی پێویست دەردەكرێت. نەبەز عەبدولحەمید قایمقامی هەولێر-یش رایگەیاند: بەبڕیاری سەرۆكی حكومەت كاركردن بە سیستەمی غاز بەهەموو شێوەیەك راگیراوەو بۆ ئەوەش تیمەكانمان راسپاردووە ئاگاداری سەرجەم كۆمپانیاكان بكەنەوە كە نابێت سیستمی غاز بۆ هیچ كەسێك دابنێن. سیستمی شۆفاژ كەئێستا لەهەرێمی كوردستان باوە بەشێوەیەكە كە شۆفاژەكە لەنێو ژوورەكانی ماڵەكەدا دادەنرێت و لەڕێگەی ئاوەوە گەرم دەبێت، ئاوەكەش لەڕێگەی دوو ئامێر كە بە سیستمی غازی (ئێڵ پی جی)یەوە بەستراونەتەوە گەرم دەبێت، واتە غاز راستەوخۆ لەنێو شۆفاژدا نییە، تانكی غازەكەش لەسەربانی ماڵەكە دادەنرێت، بەپێی ستانداردە نێودەوڵەتییەكان پێویستە بەكۆمەڵێك رێنمایی و مەرجی سەلامەتی دابنرێت، بەڵام ئەوەی تێبینی دەكرێت لەئێستادا زۆرێك لەو تانكی غازانە مەرجی سەلامەتییان نییە و لەكاتی تەقینەوەیان لەناو ماڵان و شوێنە گشتییەكان كارەساتی وەك ئەوەی سلێمانی و دهۆك دەخوڵقێنن. زیاتر لە 18 ساڵە سیستەمی شۆفاژو غازی LPG لەهەرێمی كوردستان پەرەی پێدراوە، لەهەولێر 15 كۆمپانیاو لە سلێمانی 33 كۆمپانیا مۆڵەتی دانانی سیستمی شۆفاژیان هەیە. ئێوارەی پێنجشەممەی رابردوو 17-11-2022، بەهۆی تەقینەوەی غازی سیستمێكی شۆفاژ، خانوویەكی سێ نهۆمی لەسلێمانی رووخاو بەهۆیەوە 15 هاونیشتمانی گیانیان لەدەستداو 11ی دیكە برینداربوون، هەروەها درەنگانی شەوی دووشەممە 21-11-2022 لەگەڕەكی گرێ باسێ لەبەشە ناوخۆییەكی زانكۆی دهۆك بەهۆی هەمان سیستمی غازی شۆفاژەوە تەقینەوە روویداو لەئاكامدا شەش كەس گیانیان لەدەستداو 32 كەسی دیكەش برینداربوون.

هاوڵاتی فڕۆکە جەنگیەکانی تورکیا بە درێژایی ئەمڕۆ، بەسەر ئاسمانی رۆژئاوای کوردستاندا دەگەڕێن و جگە لە بارەگاکانی هەسەدە، فڕۆکەخانە و پاڵاوگەکانی رۆژئاوا دەکانە ئامانج. ئاژانسی هاوارنیوزی نیزک لە خۆبەڕێوەبەری باکور و رۆژهەڵاتی سوریا رایگەیاند، فڕۆکە جەنگیەکانی تورکیا، پالاوگەی عەودا و لەیلانی نزیک لە شاروچکەی تربەسپی -یان بۆردومان کردووە. لەلایەکی دیکەوە، کاتژمێر ١٤:٠٠، فڕۆکەخانەی منخی کانتۆنی شەهبای نێوان عەفرین و کۆبانێ و چەند گوندێکی کانتۆنەکە لەلایەن سوپای تورکیاوە تۆپباران کراون. دەوڵەتی تورکیا لە ماوەی ٢٤ کاتژمێری رابردوودا، بە دەیان جار هێرشی کردووەتە سەر گوند و شاروچەکەکانی رۆژئاوای کوردستان. دیارترینیان بارەگای هاوبەشی یەکینەکانی دژە تیرۆری رۆژئاوا (یات) و هاوپەیمانی نێودەوڵەتی دژی داعش بوو کە لە ئەنجامدا دوو ئەندامی (یات) شەهید بوون و سێ ئەندامیشی بریندار بوون. هەروەها ٢٣ گوند و ناوچەی کانتۆنی شەهبای نێوان عەفرین و کۆبانێ تۆپبارانکراون و نزیکەی ٥٧٠ گولە تۆپ و هاوەن بەر ئەو ناوچانە کەوتوون.  

هاوڵاتی پەروین بوڵدان هاوسەرۆکی هەدەپە رایگەیاند، پێویستە هەموو کەسێک عەقڵیەتی دەسەڵاتی تورکیا ببینێت کە بۆ بەرژەوەندی خۆی ژیان و مرۆڤ پشتگوێ خستووە. پەروین بوڵدان هاوسەرۆکی پارتی دیموکراتی گەلان (هەدەپە)، لە کۆبونەوەی حەفتانەی پارتەکەیدا لە ئەنقەرە، ئاماژەی بە ئۆپەراسیۆن و لەشکرکێشیەکانی تورکیا بۆ نێو خاکی رۆژئاوا و هەرێمی کوردستان کرد و وتی، " تەقینەوە تاریکەکەی تەقسیم و ئۆپەراسیۆنی ئاسمانی و هێرشەکان بۆ سەر شوێنی نیشتەجێبوونی هاوڵاتیانی مەدەنی باکور و ڕۆژهەڵاتی سوریا بەڕێکەوت نییە. بێگومان زۆر پرسیار هەیە کە پێویستە روون بکرێتەوە.  هاوسەرۆکی هەدەپە راشیگەیاند، وەک ئەوەی حکومەتی ئاکەپە – مەهەپە بانگەشەی بۆ دەکات، مۆدێلی بەڕێوەبردنی دیموکراسی لە باکور و ڕۆژهەڵاتی سوریا، هەڕەشە نییە بۆ سەر تورکیا. مەترسی ڕاستەقینە لەسەر ئایندەی هاوبەشی گەلان، ئەو سیاسەتە شەڕەنگێزەیە کە لەلایەن ئاکەپە-مەهەپە سەپێنراوە،" بوڵدان دەڵێت، پێویستە ئەو کەسانەی بێدەنگن و چەپڵە بۆ ئەم سیاسەتە شەڕەنگێزیە لێدەدەن، ئەم شانۆگەرییە ببینن کە بەرلە هەڵبژاردن نمایشکراوە. پێویستە نەبینە بەشێک لە شانۆگەریەکە. لایەنگری چارەسەری بین و شەڕ رەت بکەینەوە. رۆژێک دوای هێرشە ئاسمانیەکەی فڕۆکە جەنگیەکانی تورکیا بۆسەر رۆژئاوای کوردستان لە ١٩ی تشرینی دووەم، پارتی دیموکراتی گەلان (هەدەپە) راگەیەندراوێکی بڵاوکردەوە و دژایەتی خۆی بۆ ئۆپەراسیۆنی سەر رۆژئاوا و هەرێمی کوردستان دەربڕی. هەر ئەمڕۆش، دەوڵەت باخچەلی سەرۆکی پارتی بزوتنەوەی نەتەوەپەرستی تورکیا کە هاوبەشی دەسەڵاتە، هەدەپەی بە پشتگیریکردن لە پەکەکە تۆمەتبار کرد و داوای کرد، جارێکی دیکە دەست بە رێوشوێنی داخستنی هەدەپە بکرێت.

هاوڵاتی بڕیاردەری لیژنەی کاروباری یاسایی لە پەرلەمانی کوردستان،ئاماژە بەوە دەکات کە ئەو پەرلەمانتارانەی دەستیان لەکارکێشاوەتەوە هەمان لیست دەتوانێت شوێنەکانیان پڕ بکاتەوە و لە حاڵەتی ئەوەی کە لیستەکە ئامادە نەبێت شوێنەکان پڕ بکاتەوە، ئەوکاتە بەڕێژەی سەدی، کورسییەکان بەسەر فراکسیۆنەکانی پەرلەماندا دابەش دەکرێت. جەلال محەمەدئەمین بڕیاردەری لیژنەی کاروباری یاسایی لە پەرلەمانی کوردستان لە لێدوانێکی بۆ ئاژانسی ئانادۆڵو گوتی: "پێشبینی دەکەم لە هەفتەی ئاییندەدا، دەستلەکارکێشانەوەی ئەو پەرلەمانتارانەی دەستلەکارکێشانەوەیان پێشکەش بە سەرۆکایەتی پەرلەمان کردووە، بخرێتە بەرنامەی کارەوە و دەنگی لەسەر بدرێت، ئەگەر دەنگی پێویستی هێنا ئەوا بە دڵنیایییەوە کەسی دیکە لە هەمان لیست دەچنە شوێنیان". بەهۆی ناڕەزایەتی لەهەمبەر درێژکردنەوەی تەمەنی خولی پێنجەمی پەرلەمانی کوردستان، تا ئێستا لە کۆی ١١١ پەرلەمانتار، ١٢یان بایکۆتیان راگەیاندووە و ١٠شیان دەستلەکارکێشانەوەیان پێشکەش کردووە کە دەستلەکارکێشانەوەی یەکێکیان (شایان کاکە ساڵح لە فراکسیۆنی گۆڕان) پەسەندکراوە و دەستلەکارکێشانەوەی سەرۆکی فراکسیۆنی نەوەی نوێ، کازم فاروق کە پێشتر پێشکەشی سەرۆکایەتی پەرلەمانی کوردستان کردبوو، وەک راگەیەنراوە بەھۆی "خراپی دۆخی تەندروستییەوە" تا ئێستا پەسەند نەکراوە. بڕیارە لە دوو هەفتەی داهاتوودا، پەرلەمانی کوردستان رێکارە یاساییەکان لەبارەی ئەم پرسە بگرێتەبەر. ناڕەزایەتییەکان بەهۆی درێژکردنەوەی تەمەنی خولی پێنجەم، جگە لە پەرلەمانتاری فراکسیۆنی گۆڕان، شایان کاکە ساڵح فراکسیۆنەکانی دیکەشی گرتەوە و رۆژی یەکی تشرینی دووەم، پێنج ئەندامی فراکسیۆنی یەکگرتووی ئیسلامیی کوردستان دەستیان لەکارکێشایەوە و ھۆکارەکەیشیان بۆ بڕیاری درێژکردنەوەی تەمەنی پەرلەمان گەڕاندەوە و پێنج رۆژ دواتر و لە رۆژی شەشی مانگدا، ئەندامانی فراکسیۆنی نەوەی نوێ، (سێ پەرلەمانتار) كشانه‌وه‌ی خۆیان راگەیاند و وەرگرتنی مووچەکانیشیان رەت کردەوە، هاوکات ١٢ په‌رله‌مانتار هەمان رۆژ بایكۆتکردنی دانیشتنەکانی په‌رله‌مانی كوردستانیان راگه‌یاند كه‌ بریتیی بوون له‌ فراكسیۆنی كۆمەڵ (حەوت پەرلەمانتار)، چوار پەرلەمانتاری بزووتنه‌وه‌ی گۆڕان (عه‌لی حه‌مه‌ساڵح، دابان محه‌مه‌د حوسێن، ئاشنا عه‌بدوڵڵا قادر و شیرین ئه‌مین) و دیاری ئه‌نوه‌ر-یش وه‌ك پەرلەمانتاری سەربەخۆ. گوتیشی: "سەبارەت بەو کەسانەی کە بایکۆتیان کردووە، ئەوا رێکاری دیکە هەیە، ئەگەر بە ماددەی ٢٢ و ٢٣ لە پەیڕەوی ناخۆ مامەڵەیان لەگەڵدا بکرێت، ئەوانەی بایکۆتی سیاسیی دەکەن، ئەوا دەتوانن بایکۆت بکەن، ئەگەریش بە نەهاتوو مامەڵەیان لەگەڵدا بکرێت، ئەوا رێکاری دیکەیان بەرامبەر دەگیرێتە بەر، بۆیە چۆنیەتی شێوازی مامەڵەکردنیان دەگەڕێتەوە بۆ دەستەی سەرۆکایەتی پەرلەمان". تا ئێستا لە کۆی ١١١ پەرلەمانتار، ١٢یان بایکۆتیان راگەیاندووە و ١٠شیان دەستلەکارکێشانەوەیان پێشکەش کردووە و کورسییەکانیان چۆڵە، لەبارەی چۆنیەتی شێواز و رێکارە یاساییەکان لەمبارەیەوە، جەلال محەمەدئەمین ئەحمەد گوتی: "ئەگەر لیستەکە ئامادەبێت پەرلەمانتاری دیکە بنێرێتە شوێنی دەستلەکارکێشاوەکان، ئەوا شوێنەکە پڕ دەکرێتەوە، ئەگەرنا سەبارەت بە فراکسیۆنی یەکگرتوو، ئەوا بزووتنەوەی ئیسلامیی دەتوانێت شوێنیان پڕ بکاتەوە، چونکە کاتی خۆی لە هەڵبژاردنی پەرلەماندا لیستێکی هاوبەشیان هەبووە، ئەگەریش هیچکامێکیان ئامادەنەبوون شوێنەکان پڕ بکەنەوە، ئەوکات بەڕێژەی سەدی دابەشی سەر فراکسیۆنەکان دەکرێت". بڕیاردەرەی لیژنەی کاروباری یاسایی لە پەرلەمانی کوردستان پێشبینی وایە کە بزووتنەوەی ئیسلامیی شوێنی پەرلەمانتارانی یەکگرتووی ئیسلامیی پڕ دەکەنەوە و گوتی: "لە شوێنی پەرلەمانتار شایان کاکە ساڵح، کەسێک لە لیستی بزووتنەوەی گۆڕان دەچێتە شوێنی". لە هەڵبژاردنەکانی خولی پێنجەمی پەرلەمانی کوردستان، یەکگرتووی ئیسلامیی کوردستان و بزووتنەوەی ئیسلامیی کوردستان بە لیستێکی هاوبەش بەناوی بەرەو ئیسلاح بەشداری پڕۆسەکەیان کرد و بەهۆی رێژەی بەشدارییکردنی ئافرەتانەوە بە سیستەمی کۆتا، بزووتنەوەی ئیسلامی نەیتوانی هیچ کورسییەک بەدەست بهێنێت. هاوکات گوتەبێژی بزووتنەوەی ئیسلامیی رایدەگەیەنێت کە تا ئێستا بۆچوونی جیاواز هەیە بۆ بەشداریکردنیان لە پەرلەمانی کوردستان و ئاشکرای دەکات کە دوای رێکارە یاساییەکانی پەرلەمانی کوردستان، ئینجا ئەنجوومەنی شورای بزووتنەوەی ئیسلامیی کۆدەبێتەوە و بڕیار لەسەر بابەتەکە دەدات. گوتەبێژی بزووتنەوەی ئیسلامیی کوردستان، عەبدوڵڵا وەرتی لە لێدوانێکی بۆ ئاژانسی ئانادۆڵو گوتی: "ئێمە لەگەڵ یەکگرتووی ئیسلامیی کوردستان بە یەک لیست دابەزین بۆ هەڵبژاردنەکانی پەرلەمانی کوردستان کە لیستی بەرەو ئیسڵاح-مان پێکهێنا، ئێستا برایانی یەکگرتووی ئیسلامیی بە ئارەزووی خۆیان کشاونەتەوە لە پەرلەمانی کوردستان، ئێمە چاوەڕێ دەکەین رێکارە یاساییەکان لە پەرلەمانی کوردستان تەواو ببێت، دواتر ئینجا ئەنجوومەنی شورای بزووتنەوەی ئیسلامیی کۆدەبێتەوە و بڕیاری کۆتایی دەدات لەوەی بچێتە شوێنی پەرلەمانتارەکان یان نا، چونکە لە رووی یاساییەوە تەنیا بزووتنەوەی ئیسلامیی دەتوانێت شوێنی یەکگرتووی ئیسلامیی پڕ بکاتەوە". عەبدوڵڵا وەرتی گوتیشی: "دوای رێکارە یاساییەکان لە پەرلەمان، ئێمەش دیراسەی بابەتەکە دەکەین و ئەوکات بڕیار دەدەین، چونکە بۆچوونی جیاواز هەیە بۆ پڕکردنەوەی شوێنەکە، هەندێک پێیانوایە کە شوێنەکە پڕ بکەینەوە و هەندێکیش لەگەڵ ئەوەن کە بەشداری کاری پەرلەمانیی نەکەین". رۆژی نۆی تشرینی یەکەم، پەرلەمانی کوردستان پێشنیازەیاسای درێژکردنەوەی تەمەنی خولی پێنجەمی تا ٣١ی کانوونی یەکەمی ٢٠٢٣ پەسەند کرد و ئەمەش کاردانەوەی جیاوازی لەنێو فراکسیۆنەکانی پەرلەمان دروست کرد و هەمان رۆژ پەرلەمانتار لە فراکسیۆنی بزووتنەوەی گۆڕان، شایان کاکە ساڵح دەستلەکارکێشانەوەی خۆی راگەیاند و بەدوای ئەویش ٢٠ پەرلەمانتاری دیکە لە فراکسیۆنە جیاوازەکانەوە دەستلەکارکێشانەوەیان پێشکەیش بە پەرلەمانی کوردستان کرد و هەندێکیشیان بایکۆتی دانیشتنەکانی پەرلەمانیان کردووە. رۆژی ١٦ی تشرینی دووەم لە دانیشتنی پەرلەمانی کوردستاندا، دەستلەکارکێشانەوەی پەرلەمانتاری بزووتنەوەی گۆڕان، شایان کاکە ساڵح پەسەند کرا و پێشتر سەرۆکی فراکسیۆنی نەوەی نوێ، کازم فاروق دەستلەکارکێشانەوەی پێشکەش بە سەرۆکایەتی پەرلەمانی کوردستان کردبوو، بەڵام وەک راگەیەنراوە بەھۆی "خراپی دۆخی تەندروستییەوە" تا ئێستا دەستلەکارکێشانەوەکەی پەسەند نەکراوە.  

هاوڵاتی باڵیۆزی کۆماری ئیسلامیی ئێران لە عێراق لە گفتوگۆیەکی تەلەفزیۆنیدا ڕایگەیاند پرسی پێشڕەویی زەمینی بەرەو خاکی عێراق ڕاست نییە و لە بنەڕەتدا لە درۆیە. محەمەد کازم ئال سادق، باڵیۆزی کۆماری ئیسلامیی ئێران لە عێراق لەبارەی دەنگۆی ئۆپەراسیۆنی زەمینیی ئێران لە عێراق بەمیدیاکانی وڵاتەکەی ڕاگەیاند پرسی پێشڕەویی زەمینی بەرەو خاکی عێراق ڕاست نییە و لە بنەڕەتدا لە درۆیە، وتیشی ئێمە ڕێز لە سەروەریی خاکی عێراق دەگرین و ڕێوشوێنی زۆرمان گرتووەتە بەر بۆ سەقامگیری و یەکڕیزی خاک و گەلی عێراق و بۆ خۆشگوزەرانی ئەم وڵاتە. محەمەد کازم ئال سادق ڕاشیگەیاند: عێراق وڵاتێکی گەورەی دراوسێیە، ئێران و عێراق پەیوەندی سیاسی و جوگرافی و مێژوویی و ئایدیۆلۆژییان هەیە، هەروەها سنوورێکی هاوبەشیان هەیە. باڵیۆزی کۆماری ئیسلامیی ئێران لە عێراق ڕاشیگەیاند: ئەم هاوبەشیانە پەیوەندییە کۆمەڵایەتییەکانی نێوان عەشایرە-کوردەکانی ناوچەی کوردستان و عەشایری باشووری عێراق و عەشایری باشووری ئێرانی مسۆگەر کردووە، هەروەها زەمینەی سەفەرکردنیان لەنێوان ئەو دوو وڵاتە و تەنانەت زەواجی نێوان کوردەکانی ئەمانەشیان بۆ دابین کردووە دوو وڵات، هەروەها بووە هۆی ئەوەی پەیوەندییەکانی نێوان هەردوو نەتەوەی عێراق و ئێران بەهێز و دۆستانە بن. ناوبراو زیادی کرد بۆیە ناکرێ ئێران ئۆپەراسیۆنی زەمینی لە عێراق دەست پێ بکات. جەختیشی کردەوە "زۆر قسەمان لەگەڵ براکانمان لە هەرێمی کوردستان کرد و پێش ئەمەش لیژنەیەکی ئەمنی هاوبەش لە نێوان هەرێمی کوردستان و دەسەڵاتدارانی کۆماری ئیسلامی پێکهێنرا بۆ ئەوەی بیر لە چارەسەرێک بکەنەوە". جێگای ئاماژەیە پێشوتر بەرپرسانی سوپای پاسدارانی ئێرانی باسیان لەئەنجامدانی هێرشی زەمینی سەربازی کردبوو بۆسەر بنکەو بارەگاکانی حزبە کوردییەکانی ڕۆژهەڵات لەهەرێمی کوردستان.