هاوڵاتی هاتوچۆی سلێمانی ئاگاداری شۆفێران دەکاتەوە کە لە هەفتەی ئایندەوە كامێرا جێگیرەكان دەخرێنەكار و سەرپێچی و خێرایی شۆفێران تۆماردەکەن. بەڕێوەبەرایەتی هاتووچۆی سلێمانی ڕایگەیاند، ئاگاداری سەرجەم شۆفێران دەکات کە لە ڕۆژی سێ شەممە ڕێکەوتی 23/01/2024 کاتژمێر 10:00 ی سەرلەبەیانییەوە کامێرا جێگیرەکانی ناو سنووری پارێزگای سلێمانی دەکەونە بواری جێبەجێکردن و تۆمارکردنی سەرپێچی خێرایی. هاتوچۆی سلێمانی لە ئاگادارییەکدا دەڵێت، داوا لەسەرجەم شۆفێران دەکەین پابەندی ئەو خێراییە دیاریکراوانە بن کە لەسەر شەقامەکان بۆیان دیاریکراوە بەپێی هێما و تابلۆکانی هاتووچۆ. رونیشیکردەوە، هەروەها وەک بەرچاو ڕوونیەک بۆ هەموو لایەک ئەم کامێرایانە سیستەمی پۆینت تو پۆینت نییە و بە سیستەمی یەک خاڵ خێراییەکان تۆمار دەکات.
هاوڵاتی کۆریای باکوور ڕۆژی هەینی ڕایگەیاند سیستەمی چەکی ئەتۆمی ژێر ئاوی تاقیکردۆتەوە وەک وەڵامدانەوەیەک بۆ مانۆڕێکی دەریایی هاوبەشی نێوان کۆریای باشوور و ئەمەریکا و ژاپۆن لەم هەفتەیەدا، هاوکات بەردەوامە لە تۆمەتبارکردنی ڕکابەرەکانی بۆ زیادبوونی گرژییەکان لە ناوچەکەدا. ئەم تاقیکردنەوەیە چەند ڕۆژێک دوای ئەوە هات کە ڕابەری کۆریای باکوور کیم جۆنگ ئون ڕایگەیاند چیتر کار بۆ مانەوەی ئاشتی لەگەڵ کۆریای باشور ناکەن و و وڵاتەکەی دەستووری خۆی دەنووسێتەوە بۆ ئەوەی کۆریای باشوور بە دوژمنترین دوژمنی بیانی وڵاتەکەی پێناسە بکات. لە ئێستادا گرژییەکانی نێوان ئەو دوو وڵاتە بۆ بەرزترین ئاست لە ماوەی چەند ساڵی ڕابردوودا بەرزبووەتەوە، لە کاتێکدا کیم چالاکییەکانی تاقیکردنەوەی چەکی خێراتر کردووە و هەڕەشەی ناکۆکی ناوکی دەکات. ولایەتە یەکگرتووەکانی ئەمەریکا و هاوپەیمانە ئاسیاییەکانی وەڵامی دەدەنەوە بە بەهێزکردنی مانۆڕە سەربازییە هاوبەشەکانیان کە کیم بە مەشقی داگیرکاری ناوی دەبات. فڕۆکە بێفڕۆکەوانەکەی چەکی ئەتۆمی ژێر ئاوی کۆریای باکوور یەکێکە لەو سیستمە فراوانانەی کە لەم ساڵانەی دواییدا نیشاندراوە لە کاتێکدا کیم سیستەمی چەکی ئەتۆمی فراوان دەکات. سوپای کۆریای باشوور جەخت لەوە دەکاتەوە کە کۆریای باکوور توانای ئەو فڕۆکە بێفڕۆکەوانانەی زیاد کردووە کە وا پێشبینی دەکرێت بۆ ئەنجامدانی هێرش بۆ سەر کەشتی و بەندەرەکانی ڕکابەرەکانی .
هاوڵاتی مقاومەی ئیسلامی کە گروپێکی چەکداری شیعەیە بەرپرسیارێتی هێرشەکەی دوێنێ شەوی سەر فڕۆکەخانەی هەولێریان گرتە ئەستۆو ڕایانگەیاند هێرشیان کردۆتە سەر پێگەیەکى هێزەکانى ئەمریکا لە نزیک فڕۆکەخانەى هەولێر. دژەتیرۆرى کوردستانیش رایگەیاند، درۆنەکە خراوەتە خوارەوە. شەوى پێنجشەممە 18ى کانوونى دووەمى 2024، "مقاوەمەى ئیسلامى - شیعە" رایگەیاند، بە درۆنێک هێرشیان کردووەتە سەر پێگەیەکى هێزەکانى ئەمریکا لە نزیک فڕۆکەخانەى هەولێر. هەر ئەمشەویش دوای هێرشەکە دژەتیرۆری کوردستان رایگەیاند، شەوى پێنجشەممە درۆنێکی بۆمبڕێژکراو تێکشێندرا و خرایە خوارەوە کە ئاڕاستەی فڕۆکەخانەی نێودەوڵەتیی هەولێر کرابوو. بە گوێرەی زانیارییەکان درۆنەکە لەلایەن هاوپەیمانان و دوور لە شوێنی نیشتەجێبوون و قەرەباڵخی خراوەتە خوارەوە و زیانی گیانی نەبووە. لەگەڵ بەردەوامی جەنگی ئیسرائیل و حەماس و پشتیوانی هاوپەیمانان و ئەمریکا بۆ ئسرائیل هێرشەکانی سەر گروپە چەکدارەکانی سەر بە ئێران ڕۆی لە زیادبونێکی بەرچاو کردووە بەتایبەت لە سوریا و عێراق. جەنگی نێوان سوپای ئیسرائیل و بزووتنەوەی حەماس لە 7ـی تشرینی یەکەمی 2023 دەستیپێکرد و لە رۆژی 17ـی هەمان مانگەوە هێرشی ئەو گرووپانەی خۆیان بە مقاوەمەی ئیسلامی ناودەبەن بۆ سەر هێزەکانی ئەمریکا لە هەرێمی کوردستان، رۆژئاوای کوردستان، عێراق و سووریا دەستی پێکرد.
هاوڵاتی مامۆستایانی ناڕازی گەرمیان هۆشداری دەدەنە مامۆستایانی ئاینی و وتاربێژانی سەرجەم مزگەوتەكانی گەرمیان. مامۆستایانی ناڕازی گهرمیان لهپهیامێكدا بڵاویانكردهوه، به پێی زانیاریهكانمان ئهوقافی گهرمیان داوایان كردوه له سهرجهم مزگهوت و مامۆستایانی ئاینی گهرمیان و ناوچهكانی دهوروبهری بۆئهوهی له وتاری ههینیدا داوا له مامۆستایان بكهن بایكۆت بشكێنن و بگهڕێنهوه هۆڵهكانی خوێندن". دەشڵێن "بۆیە لێرەوە داوا لە مامۆستایانی ئاینی بەڕێز دەكەین بە ھیچ شێوەیەك نەچنە ژێر باری جێبەجێ كردنی داواكاریەكەی ئەوقاف و بە گوێیان نەكەن، چونكە ئەو بایكۆتەی ئێمە درێژەمان پێ داوە تەنھا بۆ داوای مافی مامۆستایانی كەرتی پەروەردە نییە، بەَلكو داوای مافی سەرجەم مامۆستایان و فەرمانبەرانی ھەرێمی كوردستانمان كردووە كە خۆی لە گواستنەوەی موچەدا دەبینێتەوە بۆ سەر بەغداد و مامۆستایانی ئاینی بەڕێزیش بەشكێن لە بابەتەكە" . ئاماژەیان بەوەشكردووە "مامۆستایانی ئاینی بەرێز شوێنگرەوەی پێغەمبەرن (د.خ)و لە سۆنگەی بیرو باوەڕی پتەویان بە ئاینی پیرۆزی ئیسلام ئێستاش بە ھەمان نەفەسی پێشو دژی ستەم و ستەمكاران بوەستنەوە و پاڵپشتی ستەمكاران نەبن و بەرگریكارێكی بوێر بن لە مافی مامۆستایان و فەرمانبەران" .
هاوڵاتی سەرەڕای هێرشەکانی ئێران بۆ سەر هەرێم، بەڵام هێشتا حکومەتی هەرێم هیچ بڕیارێکی نەداوە بۆ گەڕاندنەوەی نوێنەرایەتیەکەی لەو وڵاتە. ئەمرۆ پێنج شەممە هاوڵاتی پەیوەندی بە نازم دەباغ، نوینەری حکومەتی هەرێمی کوردستان لە تاران کرد دەربارەی ئەگەری کشاندنەوەیان لە تاران و گەیاندنی پەیامێکی ڕوون بە تاران، بەڵام ناوبراو ئامادە نەبوو هیچ لێدوانێک بدات. شەوی دووشەممە سوپای پاسدارانی ئێران، بەچەندین موشەکی زیرەکی بالیستیک هێرشی کردە سەر شاری هەولێر و بەهۆیەوە چوارکەس گیانیان لەدەست دا و زیاتر لە ١٦ کەسیش بریندار بوون. دوا بەدوای هێرشەکەش هەردوو سەرۆکوەزیرانی عێراق و هەرێمی کوردستان کۆبوونەوەکانیان لەگەڵ وەزیری دەرەوەی ئێران هەڵوەشاندەوە. هاوکات عێراق وەک ناڕەزایەتیەک لەبەرامبەر پێشێل کردنی سەروەری وڵاتەکەی باڵوێزی خۆی لە تاران بانگهێشتکردەوە، بەڵام تاوەکو ئێستا هەرێمی کوردستان بڕیاری بۆ گەڕاندنەوەی نوینەرایەتی خۆی نەداوە.
هاوڵاتی تەڤگەری ئازادی ڕەتیدەکاتەوە فریاڵ سلێمان خالیدە کە ئێوارەی ئەمڕۆ لە کەرکوک بە دەستڕێژی گولە کوژرا ئەندامی تەفگەری ئازادی بێت و دەڵێت،ئەو ژنە ئەندامی تەڤگەری ئازادییە، ئێمە هەموو ئەو چەواشەکارییانە ڕەتدەکەینەوە. جومعە کەریم وتەبێژەی تەڤگەری ئازادیی کۆمەڵگەی کوردستان، لەو بارەیەوە لە لێدوانێکدا بە ڕۆژ نیوسی ڕاگەیاندووە،" ئەو ژنەی کە خەڵکی ڕۆژئاوای کوردستانە و ئێوارەی ئەمڕۆ لە کردەوەیەکی تیرۆریدا شەهید بوو، هیچ پەیوەندییەکی بە تەڤگەری ئازادییەوە نییە." وتیشی: لە میدیاکانی باشووری کوردستان وا بڵاوکراوەتەوە کە ئەو ژنە ئەندامی تەڤگەری ئازادییە، ئێمە هەموو ئەو چەواشەکارییانە ڕەتدەکەینەوە. وتەبێژی تەڤگەر ئاماژەی بەوەشداوە،" ئیدانەی هەموو کردەوەیەکی تیرۆریستی دەکەین، بەرامبەر هەر هاووڵاتییەک بکرێت." ئێوارهی ئهمڕۆ پێنجشهممه لهگهڕهكێكی شاری كهركوك دهستڕێژی گوللـه له فریاڵ سلێمان خالیدەی خەڵی ڕۆژئاوای کوردستان کرا لەلایەن دوو سەرنشینی ماتۆڕسکیلێکەوە و شەهید کرا و بکەرانی کردەوەکە هەڵهاتوون و تا ئێستا دەستگیرنەکراون.
هاوڵاتی ئێوارهی ئهمڕۆ پێنجشهممه لهگهڕهكێكی شاری كهركوك دهستڕێژی گوللـه له ژنێك كرا دهستبهجێ له شوێنی روداوهكه گیانی لهدهستدا. سهرچاوهیهكی ئهمنی له پارێزگای كهركوك رایگهیاند، له گهڕهكی سهرچنار لهنزیك قوتابخانهی سهگرمه لهلایهن ماتۆڕسكیلێكهوه دهستڕێژی گوللـه له ژنێك كرا و دهستبهجێ له شوێنی روداوهكه گیانی لهدهستدا. ئەو ژنە چالاکوانە سیاسییە ناوی فریاڵ سلێمان خالیدە و لە ساڵی ١٩٦٧ لە شاری حەسەکەى ڕۆژئاوای کوردستان لە دایک بووە. بەپێی زانیارییەکان، ئەو ژنە لە ماوەی ڕابردوودا بۆ سەردانیکردنی ڕێکخراوەکانی ژنان، ڕووی لە باشووری کوردستان کردووە. دوای رووداوەکەش تەرمی ژنەکە گەیەندراونەتە پزیشکی دادی کەرکوک پۆلیسی کەرکوکیش رایگەیاند، پەڕاوی لێکۆڵینەوەیان بۆ ڕووداوەکە کردووەتەوە و بەپێی فەرمانی دادوەریش بڕیاری دەستگیرکردن بۆ ئەنجامدەرانى تاوەنەکە دەرکراوە.
هاوڵاتی كۆمسیۆنی باڵای سهربهخۆی ههڵبژاردنهكانی عێراق بڕیاریدا بورهان نهمراوی كاندیدی ههڵبژاردنی پێشوهختهی پهرلهمانی عێراق كه له مانگی (تشرینی یهكهم/10)ی 2021 بهڕێوهچو، وهك پهرلهمانتار له ئهنجومهنی نوێنهران له شوێنی محهمهد حهلبوسی دهستبهكاردهبێت. بەگوێرەى بڕیارەکە، بورهان ناسر محەممەد فەهد نەمراوى لە لیستى تەقدووم دەبێتە پەرلەمانتار و جێگەى محەممەد حەلبووسی دەگرێتەوە. كۆمسیۆنی باڵای سهربهخۆی ههڵبژاردنهكان لهراگهیهندراوەکەیدا کە ئەمڕۆ پێنجشەممە بڵاویكردهوه، "كۆمسیۆن له دهستهی كۆمسیاران تاوتوێی یاداشتنامهی دیوانی سهرۆكی ئیدارهی ههڵبژاردنهكانی سهبارهت به پهرلهمانتاری جێگرهوه بۆ محهمهد حهلبوسی كردووه و لهو چوارچێوهیهدا بڕیاریداوه به كاندیدی جێگرهوه بۆ شوێنی محهمهد ڕیكان حهلبوسی له لیستی پارێزگای ئهنبار. بورهان نەمراوى لە هەڵبژاردنى ساڵى 2021ى پەرلەمانى عێراقدا شەش هەزار و 716 دەنگى لە سنوورى پارێزگاى ئەنبار بەدەستهێنا کە بەگوێرەى بڕیارەکەی ئەنجوومەنى کۆمیسیاران وەک خاوەنى زۆرترین دەنگ لە نێو کاندیدە سەرنەکەوتووەکانى ئەو بازنەى هەڵبژاردنە دیاریکراوە کە حەلبووسی تیایدا کاندید بوو و سەرکەوت. رۆژی 14ی (تشرینی دووهم/11)ی 2023، دادگای باڵای فیدراڵی بهتۆمهتی ساختهكاری، ههڵوهشاندنهوهی ئهندامێتی محهمهد حهلبوسی سهرۆكی پێشوی پهرلهمانی ڕاگهیاند، ئهمهش له پاشخانی سكاڵایهكی یاسایی هات كه لهلایهن پهرلهمانتار لهیس دلێمی له دژی تۆماركرابو.
هاوڵاتی ژوری هەڵبژاردنی بزوتنەوەی گۆڕان لە راگەیەندراوێکدا ئاشکرایکرد، هەفتەی داهاتوو گۆڕان کۆنفڕانسی نیشتیمانی دەبەستێت. لە راگەیەندراوەکەدا هاتووە، بەپێی بڕیار و ڕاسپاردەی کۆبونەوەی جڤاتی نیشتمانی و جڤاتی گشتی بزوتنەوەی گۆڕان لە ڕۆژی ٦ی ١ی ٢٠٢٤ بزوتنەوەی گۆڕان لە ڕۆژانی شەممە و یەکشەممە (٢٠ و ٢١ی ١ی ٢٠٢٤) لە ژێردروشمی (گۆڕان بەرەو قۆناغێکی نوێ بۆ ڕوبەڕوبونەوەی ئاڵنگارییەکان) لە گردی زەرگەتەی شاری سلێمانی دوهەمین کۆنفرانسی نیشتمانی خۆی گرێدەدات. چۆمان محەمەدیش کە بە وتەبێژی دوەمین کۆنفڕانسی نیشتیمانی بزوتنەوەی گۆڕان دانراوە سەبارەت بە کۆنگرەکە ڕایگەیاند، کۆنفڕانسەکە لەژێر ناونیشانی گۆڕان بەرەو قۆناغێکی نوێ بۆ ڕوبەڕوبونەوەی ئاڵەنگارییەکان بەڕێوەدەچێت و لە پێنج ڕاپۆرتدا بە وردی پێداچونەوە بۆ هەیکەلییەت و دۆخی بزوتنەوەکە دەکرێت. وتیشی، دەیانەوێت بۆ شێوازی سیاسەتکردن بچنە قۆناغێکی نوێوە و هەڵسەنگاندن بۆ بڕیارەکانی جڤاتی نیشتمانی و ڕابردوی نوێنەرەکانی بزوتنەوەی گۆڕان بکەن. جێگەیباسە بزوتنهوهی گۆڕان ئێستا بهدۆخێكی نائاساییدا تێدهپهڕێت، له دوایین ههڵبژاردنی پهرلهمانی عێراقدا كه له 10ی مانگی 10ی ساڵی 2021دا بهڕێوهچوو، نهیتوانی هیچ كورسیهك بهدهستبهێنێت، له ههڵبژاردنی 18ی 12ی 2023ی ئهنجومهنی پارێزگاكانی عێراقیش بهشداری نهكرد. له ههڵبژاردنی پهرلهمانی عێراقدا له ساڵی 2010 بزوتنهوهی گۆڕان وهك سێیهم گهورهترین هێزی سیاسی ههرێمی كوردستان دهركهوت، لهسهر ئاستی عێراقدا 487 ههزار و 181 دهنگی بهدهستهێنا و ههشت كورسی مسۆگهر كرد.
.png)
هاوڵاتی ئەندامێكی لیژنەی دارایی پەرلەمانی عێراق رایگەیاند پێویستە بەزووی وەزارەتی دارایی هەرێم لیستی مووچەخۆران رەوانەی بەغدا بكات تا ئەم مانگە لەگەڵ دابەشكردنی مووچەی فەرمانبەرانی عێراق بەغداد پارە بۆ مووچەی فەرمانبەرانی هەرێم بنێرێت. د.بڕیار رەشید ئەندامی لیژنەی دارایی پەرلەمانی عێراق لەبارەی نوسراوەكەی وەزارەتی دارایی عێراق بۆ هەرێم كە داوای لیستی مووچەی فەرمانبەران دەكات، بە هاووڵاتی وت" ئەو نوسراوە بۆ ئەوەیە ژمارەی تەواوی مووچەخۆرانی عێراق بزانرێت تا بڕی خەرجییەكان بزانن و خۆیان بۆ ئەمساڵ ئامادە بكەن كە ئەوەش لەسەر بنەمای ماددەی 77ی یاسای بودجەیەیە". وتیشی"دەبێت وەزارەتی دارایی هەرێم بەزووی لیستی مووچەخۆرانی هەرێم رەوانەی بەغداد بكات تا ناردنی مووچەی فەرمانبەران هاوشێوەی ناوچەكانی دیكەی عێراق دوا نەكەوێت" وەزارەتی دارایی عێراق هەموو مانگێك لەسەرەتای مانگەوە دەستبەدابەشكردنی مووچەی خانەنشینانی شارستانی و سەربازی دەكات و لەڕۆژی 18 مانگیشەوە دەستبەدابەشكردنی مووچەی فەرمانبەرانی وەزارەتەكانی دەكات و لەماوەی چەند رۆژێكدا سەرجەم مووچەخۆران مووچەكانیان وەردەگرن. "بۆ ئەم مانگە بەغداد 618 ملیار دیناری بۆ مووچەی فەرمانبەرانی هەرێم دەنێرێت كە ئەوەش لەخەرجی راستەقینەوەو ئەگەری هەیە بۆ مانگی داهاتوو بڕەكە زیادو كەمبكات و لەوەدا كێشە بۆ مووچەی فەرمانبەرانی هەرێم دروست دەبێت، بەڵام هەمواركردنەوەی یاسای بودجە كێشەی موچەی فەرمانبەرانی هەرێم چارەسەر دەبێت". ئەندامەكەی لیژنەی دارایی پەرلەمانی عێراق وای وت. د.بڕیار رەشید ئەوەشی خستەڕوو" وەزارەتی دارایی عێراق لەگەڵ دەستپێكردن بەدابەشكردنی مووچەی فەرمانبەرانی، پارەی مووچە بۆ هەرێم دەنێرێت و ئەوكاتە دەبێت وەزارەتی دارایی هەرێم لەگەڵ داهاتی ناوخۆ مووچەی فەرمانبەران دابەشبكات". رۆژی یەكشەمەی رابرددوو 14ی كانونی دووەمی 2024، ئەنجومەنی وەزیرانی عێراق لەكۆبوونەوەی هەفتانەی خۆیدا بڕیاریدا بۆ ئەم مانگە 618 ملیار دینار بۆ مووچەی فەرمانبەرانی هەرێم بنێرێت و تا هەمواركردنەوەی یاسای بودجەش ناردنی پارە لەبەغداوە بۆ هەرێم بەردەوامبێت.
هاوڵاتی كونسوڵخانەی ئەمریكا لەهەرێم رایگەیاند بەتوندی ئیدانەی هێرشە بێماناكانی ئەم دواییەی ئێران دەكەین دژی هاووڵاتیانی مەدەنیی هەرێمی كوردستان، دەشڵێت لەهێرشەكەی سەر هەولێردا هیچ ناوەندێكی ئەمریكا زیانیان بەرنەكەوتوە. كونسوڵخانەی ئەمریكا لەهەرێمی كوردستان راگەیەنراوێكی لەبارەی هێرشە موشەكییەكەی سەر هەولێر بڵاوكردەوەو رایگەیاند"بەتوندی ئیدانەی هێرشە پڕتوندوتیژی و بێماناكانی ئەم دواییەی ئێران دژی هاووڵاتیانی مەدەنیی هەرێمی كوردستان و هێرشە درۆنیە بەردەوامەكانی سەرتاسەری ناوچەكە دەكەین، سەرەخۆشی خۆمان ئاڕاستەی كەسوكاری قوربانیەكان دەكەین" ئەوەشی خستوەتەڕوو "ئیدانەی پێشێلكردنی ئاشكرای سەروەریی عێراق لەلایەن ئێرانەوە دەكەین، لەبەرامبەر ئەو هەموو هەواڵە نادروستانەی لە ڕاگەیاندن و تۆڕەكۆمەڵایەتیەكاندا بڵاوبوونەتەوە، دەمانەوێت ڕونیبكەینەوە كە لە هێرشەكانی ئێران لە 15 ی كانونی دووەمدا هیچ ناوەندێكی ویلایەتە یەكگرتووەكانی ئەمریكا زیانیان بەرنەكەوتون".
هاوڵاتی وەزارەتی دارایی عێراق داوای لیستی مووچەی فەرمانبەرانی هەرێمی لە وەزارەتی دارایی هەرێم كردوە بە مەبەستی دابینكردنی خەرجی موچەكانیان تا ئەو كاتەی هەمواری بودجەی ساڵی 2024 پەسەند دەكرێت. بەپێی نوسراوێكی وەزارەتی دارایی عێراق كە تەیف سامی وەزیری دارایی عێراق واژۆی لەسەر كردوە رۆژی 16ی كانونی دووەمی 2024، ئاماژەی بەوەداوە بەپێی یاسای بودجەی گشتی پێویستە خەرجی و مووچەی فەرمانبەرانیان بۆ مانگی كانوونی دووەم و مانگەكانی دواتر رەوانەی فەرمانگەی ژمێریاریی وەزارەتی دارایی یان گەنجینەی پارێزگاكانیان بكەن تا ئەو كاتەی ئەنجوومەنی وەزیران و پەرلەمان رەزامەندی لەسەر خشتەی بودجە دەدەن. هەر بەپێی نوسراوەكە كە هەرێمی كوردستانیش دەگرێتەوە، ئەو لیستە مووچەی بنەڕەتی فەرمانبەران و سەرجەم دەرماڵەكان و پارەی لێبڕینی خانەنشینی تێدا بێت لە دوای وردبینیكردنی لەڕێگەی بەڕێوەبەری گشتی یان بەشی ژمێریاری وەزارەتەكانەوە بۆ ئەوەی لە خەرجی مانگانەی پارەكانیان پشتی پێ ببەسترێت.
.jpg)
هاوڵاتی بەرپرسی میحوەری مەخموور - گوێڕی هێزی پێشمەرگە رایگەیاند لەكۆنەوە لەگەڵ ئێران دۆستی یەكترین، بەڵام ئەم هێرشە نامەردیانە بۆچی دەكرێت بۆ ئێرانیش خراپە گەلێكی وەك كورد بكات بەدوژمنی خۆی، ئیسرائیل لێرە نیەو شوێنیان دیارە. سیروان بارزانی بەرپرسی میحوەری مەخموور - گوێڕی هێزی پێشمەرگە لەكۆنگرەیەكی رۆژنامەوانیدا لەبارەی هێرشە مووشەكیەكەی ئێران بۆ سەر هەولێر رایگەیاند" لەكۆنەوە لەگەڵ ئێران دۆستی یەكترین و وەك گەلان یەك نەژادین، بەڵام ئەم هێرشە نامەردیانە بەبێ هیچ بیانویەك بۆچی دەكرێت، ئیسرائیل لێرە نیەو شوێنیان دیارە". وتیشی "ئەمە شتێكی زۆر كەمە بۆ وڵاتێكی گەورەی وەك ئێران، كە هێزی خۆی پیشانی جیهان بدات و لەسەر خەڵكی مەدەنی تاقیبكاتەوە، هەموومان دەزانین هێزی ئێران هێزێكی گەورەیەو وڵاتێكی گرنگە". "ئەم شێوازە نامەردیە بۆ خودی ئێران خراپە كە گەلێكی وەك كورد بكات بەدوژمنی خۆی، چونكە ئێران پشتوپەنای گەلی كورد بووە، هیوادارین هێرشەكانی ئێران دووبارە نەبێتەوە". سیروان بارزانی وای وت.
سەرۆك وەزیرانی عێراق رایگەیاند هێرشەكەی ئێران پێشهاتێكی مەترسیدارە بۆ سەر پەیوەندییە پتەوەكەی نێوانمان و عێراق مافی خۆیەتی هەموو ڕێوشوێنە یاسایی و دیپلۆماسیەكانی بگرێتەبەر. بەپێی راپۆرتێكی ئاژانسی رۆیتەرز، محەمەد شیاع سودانی سەرۆك وەزیرانی عێراق لەكۆڕبەندی داڤۆس بەمیدیا عێراقییەكانی راگەیاندوە "هێرشەكانی ئێران بۆ سەر هەولێر دەستدرێژییەكی ڕوونە بۆ سەر سەروەری عێراق و پێشهاتێكی مەترسیدارە كە پەیوەندیی پتەوی تاران و بەغدای تێكداوە". كۆماری ئیسلامی ئێران رۆژی دووشەممە بەچەند موشەكێكی بالیستیكی زیرەكی جۆری (خەیبەر شكێنی 3) هێرشیكردە سەر هەولێرو لە ئەنجامدا چوار هاووڵاتی شەهید بوون و زیاتر لە 16 كەسی تریش بریندار بوون، سەرەڕای زیان گەیاندن بە چەندین خانوو و موڵكی خەڵكی مەدەنی كە لە دووری شەس سەد مەتر لە ماڵەكەی پێشڕەو دزەیی كە خۆی و منداڵەكەشی لە هێرشەكەدا شەهید بوون كەوتبوونە ژێر كاریگەری هێرشەكەی سوپای پاسدارانی ئێران. ئەمەش كاردانەوەی جیهانی لێكەوتەوە، هەروەها ناكۆكیەكی نا ئاسایی لەنێوان هەردوو دەوڵەتدا بەدوای خۆیدا هێنا، بەغداد وەك ناڕەزایەتیەك باڵیۆزی وڵاتەكەی لە تاران بانگهێشتكردەوە، هاوكات بەرپرسی كاروباری ئێرانیشی لە بەغداد بانگهێشتكرد. لەبەرامبەریشدا تاران پێداگریكرد كە هێرشەكە بەمەبەستی ڕاگرتنی هەڕەشە سیخوڕەكانی ئیسرائیلە بووە. لەبارەی هەڵوێستی عێراق بەرامبەر بەو هێرشەی سوپای پاسداران، سەرۆك وەزیرانی عێراق جەختی لەوەكردۆتەوە" عێراق مافی خۆیەتی هەموو ئەو ڕێوشوێنە یاسایی و دیپلۆماسیانە بگرێتەبەر كە هەیەتی وەك نەتەوەیەكی خاوەن سەروەری". ئەمەش لەكاتێكدایە ئێران لە ماوەی ڕابردوودا چەندین هێرشی لە هەرێمی كوردستان ئەنجامداوەو ڕایگەیاندوە"ئەو ناوچەیە وەك گۆڕەپانی گرووپە دابڕاو و جوداخوازەكانی ئێرانن و بریكاری دووژمنە سەرسەختەكەی ئێرانن كە ئیسرائیلە". بۆ ئەو مەبەستەش بەغدا هەوڵی چارەسەركردنی نیگەرانییەكانی ئێرانی سەبارەت بەحزبەكانی رۆژهەڵاتی ئێران لە ناوچەكەدا داوە، لەو چوارچێوەیەشدا كاری بۆ گواستنەوەی بەشێك لە ئەندامانی هەریەك لەو حزبانە داوە لەچوارچێوەی ڕێككەوتنێكی ئەمنی لەگەڵ تاران لە ساڵی 2023دا، بەڵام هێرشەكان بەردەوامن لەژێر بیانووی جۆراوجۆردا، كە دواینیان لێدانی هەرێمی كوردستانە بە بیانوویی "سیخوڕیكردن بۆ ئیسرائیل".
هاوڵاتی – عەمار عەزیز فڕۆكەكانی توركیا بەچڕی چیای مەتینیان لەرۆژهەڵاتی قەزای ئامێدی بۆردومانكرد، دوای بۆردومانەكەش لەناوچەكە دەنگی تەقەیەكی زۆر بیستراوە. پەیامنێرمان لەقەزای ئامێدی پێیڕاگەیاندنین ئێوارەی ئەمڕۆ 17ی كانونی دووەمی 2024، فڕۆكەكانی توركیا بەچڕی چیای مەتینیان لەرۆژهەڵاتی قەزای ئامێدی بۆردومانكردوەو هاووڵاتیانی قەزای ئامێدیش هەستیان پێكردوە، بەڵام بەهۆی ئەوەی ئەو ناوچەیە قەدەغەكراوە زیانەكان نەزانراوە. ئەوەشی خستەڕوو دوای بۆردومانەكە دەنگی تەقەیەكی زۆر بیستراوە، بەتایبەت لەگوندەكانێ (دێرێ، مێرستەك، سگێرێ، سەرگەلێ) كە هەموویان دەكەونە سنوری قەزای ئامێدی.
