سەرۆکی حکومەتی هەرێم گەیشتە میسر

  هاوڵاتی به‌رپرسانی ئه‌مریكا رایانگه‌یاند:" پێشنیازیان بۆ به‌رپرسانی توركیا كردوه‌ كه‌ بیر له‌ پێشنیاری پێدانی سیستمی به‌رگری له‌ جۆری S-400 به‌ كیێڤ بكه‌نه‌وه‌ و ده‌شیانه‌وێت رێككه‌وتنی نێوانیان له‌سه‌ر كڕینی فڕۆكه‌ی F-35 بكه‌نه‌ كارتێكی فشار تا ئه‌نقه‌ره‌ به‌و داوایه‌ رازی ببێت". به‌پێی ئاژانسی هه‌واڵی رۆیته‌رز، به‌رپرسانی ئه‌مریكا رایانگه‌یاند:" پێشنیازیان بۆ توركیا كردوه‌ سیستمی به‌رگری ئاسمانی له‌ جۆری S-400ی روسی به‌ هێزه‌كانی ئۆكرانیا ببه‌خشن". مانگی رابردو له‌ په‌یوه‌ندییه‌كی ته‌له‌فۆنیدا به‌رپرسانی ئه‌مریكا به‌  هاوشانه‌ توركییه‌كانیان راگه‌یاندوه‌، كه‌ بیر له‌ پێشنیازی ره‌وانه‌كردنی سیستمی به‌رگری ئاسمانی له‌ جۆری S-400ی روسی بكه‌نه‌وه‌ و هیچ واده‌یه‌كان بۆ جێبه‌جێكردنی ئه‌م پێشنیازه‌ بۆ به‌رپرسانی توركیا دانه‌ناوه‌. به‌رپرسانی ئه‌مریكا باسیان له‌وه‌شكردوه‌:" له‌ ئێستادا كار له‌سه‌ر جێبه‌جێكردنی داواكاری ڤۆڵۆدمیر زلێنیسكی، سه‌رۆكی ئۆكرانیا ده‌كه‌ن كه‌ پێشتر داوای له‌ به‌رپرسانی ئه‌مریكا و یه‌یكێتی ئه‌وروپا كردبو یان سیستمی به‌رگری بۆ هێزه‌كانی وڵاته‌كه‌ی دابین بكه‌ن، یان بیر له‌ داخستنی ئاسمانی وڵاته‌كه‌ی بكه‌نه‌وه‌".        

  شاناز حەسەن بەپێی ئەو خشتەیەی كە وەزارەتی دارایی بلاویكردۆتەوە ئەمرۆ مووچەی خانەنشینان دابەشدەكرێت، ئەمەش لەكاتێكدایە تەنیا ئەمرۆ دەوام هەیە و خانەنشینان لە درەنگانی شەوەوە لە بەردەم بانكەكان نۆرەیان گرتووە و تائێستا دەست بە دابەشكردنی موچە نەكراوە. خانەنشینێك لە بەردەم یەكێك لە بانكەكانی سلێمانی بە هاوڵاتی وت:"ئەمشەو نزیكەی 40 كەس بوین لەبەردەم ئەم بانكە شەومان بەرێكرد، كەچی تائێستا دەست بە دابەشكردنی مووچە نەكراوە". عەبدڵا خدر، پیاوێكی تەمەن 71ساڵە، موچەیەكی خانەنشینی پێمەرگایەتی هەیە، وتی:" ئەوەی ئەم حكومەتە بە خەڵكی دەكات، كەس نەیكردووە لە میژوودا، وای لێكردووین پەشیمان بین لەو خزمەتەی بۆ خاك و وڵاتمان كردووە".   ئەمڕۆبەگوێرەی خشتەی وەزارەتی دارایی، مووچەی خانەنشینی سەربازی و مەدەنی لە یەک کاتدا دابەش دەکرێت، هەروەها ژمارەیەک وەزارەتیش کە بڕیاربوو دوێنێ مووچە وەربگرن، مووچەکانیان کەوتوەتە ئەمڕۆ یەکشەممە و بەوهۆیەش قەرەباڵغییەکی زۆر لەبەردەم زۆرینەی بانکەکان دروستبووە.

هاوڵاتی  سەرۆکی یەکێتی زانایانی ئایینی ئیسلامی کوردستان رایگەیاند:" ئەوانەی هەولێر مووشەکباران دەکەن مەبەستیانە کورد لە سووننە دوور بخەنەوە و شەقامی وڵاتانی عەرەبی دژ بە کورد بجووڵێنن". ئەمڕۆ شەممە 19-3-2022، عه‌بدوڵڵا سه‌عید وه‌یسی له‌كاتی به‌شداریكردنی له‌ سێیەمین کۆنفرانسی نێودەوڵەتی (منبر الأقصى- قودس) لە شاری ئیستانبوڵ له‌ تورکیا ئاماژەی بەوەشکرد، "په‌یوه‌ندیی کورد و قودس به‌ پەیوەندیەکی مێژوویی و پڕ لە شانازی دەزانین، لەبەر ئەوەی سەرکردەی ناوداری نەتەوەیی و ئایینی سەڵاحەددینی ئەیوبی قودسی رزگار کردووه‌، ئەمەش بووە مایەی سەرکەوتنێکی گەورە بۆ جیهانی ئیسلامی بە گشتی و گەلی کورد بەتایبەتی." باسی لەوەشکرد، "ئێستاش رۆڵەکانی کورد لەسەر هەمان رێچکە و رێبازی سەڵاحەددینی ئەیوبین لە خۆشەویستیان بۆ قودس و پارێزگاریکردن لە پێگە پیرۆزەکەی‌، بەڵام بەداخەوە کەسانێك دەیانەوێت رووی جوانی مێژووی کورد و دیندارییەکەی و پەیوەندی پتەوی لەگەڵ وڵاتانی ئیسلامی و عەرەبی له‌کەدار بکەن، بەوەی پەیوەندی لەگەڵ ئیسرائیل هەیە، تا کار گەیشتە ئەوەی ئێران لە 13ی ئەم مانگە لە رێی ژماره‌یه‌ك مووشه‌كه‌وه‌ چەند ناوچەیەکی هاووڵاتینشینی مووشه‌كباران کرد، بە بیانووی بوونی بنكه‌ی ئیسرائیلی لەو ناوچانە". سەرۆکی یەکێتی زانایانی ئایینی ئیسلامی کوردستان ئەوەشی خستەرو، "ئەوانەی ئەو جۆرە تۆمەتانە هەڵدەبەستن، خۆیان مەعبەدی جولەکە لە تاران دەکەنەوە و رێگەش بە مزگەوتی سووننە نادەن هەبێت، بگرە ناوچە سووننەکانی عیراقیشیان وێران کرد، ئەوان هەر کەسێك نەچێتە ژێر باریان دەیان تۆمەتی ناڕەوایان بۆ دروست دەكەن، مەبەستیانە کورد لە سووننە دوور بخەنەوە و شەقامی وڵاتانی عەرەبی دژ بە کورد بجووڵێنن، بەڵام لێرەوە رایدەگەیەنین، کورد شانازی بە برایەتی هەمووانەوە دەکات، هیچ کاتیش ئامادە نییە لەسەر تۆمەتی بێ بنەما دژایەتی کەس بکات".

هاوڵاتی ئەندامی ئەنجومەنی باڵای سیاسی و بەرژەوەندییەکانی یەکێتی رایگەیاند:" نەبوونی مووچە یان کەم مووچەیی، کاریگەری دەرونی لەسەر چین و توێژەکان و راپەڕاندنی ئەرکەکانی پەروەردە و فەرمانگەکانیش هەیە،  چین و توێژەکان، هەفتانە کێشەکانیان کەڵەکە دەبن و ناڕەزاییان پەرە دەسەنێت". ئەمڕۆ شەممە 19-3-2022، مەلا بەختیار لە پەیجی فەرمی خۆی لە فەیسبوک رایگەیاند:" مامۆستای وانەبێژ.. تویژێکی ماندووی بواری پەروەردەن، زۆر گرنگن. ژیانیان سەختە و بەو هاوکارییە کەمەی پێیان دەدرێ، ژیانیان بە کولەمەرگی دەچێتەسەر، بەتایبەتی ئەو مامۆستایانەی لە دەرەوەی شارەکان و دێهاتەکان وانە دەڵێنەوە. هەقوایە حکومەت، ئاوڕێکی بەرپرسیارانەیان لێ بداتەوە و ئیتر دەست بکرێت بە دامەزراندیان، دامەزراندنیشیان جگە لەوەی هەزاران کەس سەرفرازی موچە دەکرێ، بۆ بواری پەروەردە و زانست و پەرەسەندنی فەلسەفەی خوێندنیش، زۆر گرنگە." باسی لەوەشکردوە: "بێ موچەیی، یان کەم موچەیی، کاریگەری دەرونی لەسەر چین و توێژەکان هەیە. تەنانەت کاریگەری نالەباری لەسەر راپەڕاندنی ئەرکەکان و پەروەردە و فەرمانگەکانیش هەیە!" مەلا بەختیار داوای دامەزراندنی کارمەندانی گرێبەستی تەندروستیش دەکات و نوسیویەتی: "دوو ھەزار کارمەندی تەندروستیش، حەوت ساڵە بەگرێبەست، ئەرکەکانیان بەتایبەت لەکاتی پەتای کۆرۆنادا رادەپەڕاندو ژیانی خۆیان خستبووە مەترسییەوە، ھەقە ئەمانیش، پاداشتی ئەو ماندووبونەیان دامەزراندنیان بیت."

هاوڵاتی ئه‌مڕۆ پارێزگاری هەولێر، لەدیوانی پارێزگا پێشوازی لە وەفدێكی پەرلەمانتارنى ئاکپارتى کرد جەخت لەسەر پەرەپێدانی زیاتری پەیوەندییەکان لە تێكڕاى بواره‌كانى بازرگانى و پیشه‌سازى و وه‌به‌رهێنان و فه‌رهه‌نگى و مرۆیی نێوان هەرێمى کوردستان و وڵاتاى تورکیا کرایەوە. ئەمڕۆ شەممە 19ی ئازاری 2022، به‌پێی راگه‌یه‌ندراوێكی پارێزگای هه‌ولێر، ئومێد خۆشناو، پارێزگاری هەولێر، لەدیوانی پارێزگا پێشوازی لە شاندێکى پەرلەمانتارنى ئاکپارتى کرد کە پێکهاتبو لە عفیف دەمیکران، پەرلەمانتارى پێشوى ئەکپارتى و فەهمى  ئوزتونج، پەرلەمانتارى ئەکپارتى و محەمەد جیلان، جێگرى پەیوەندییەکانى دەرەوەى ئەکپارتى، بەیاوەرى هاکان کەراجای، سەرکونسڵی گشتیی وڵاتی تورکیا لە هەولێر و هیمداد سەباح پەرلەمانتارى کوردستان. هەریەک لە نەبەزعەبدولحەمید، قائیمقامى ناوەند و ئەکرەم ئەحمەد، یاریدەدەرى پارێزگار و بەرێوەبەرى کاروبارى ناوخۆى پارێزگا ئامادەی بون. پەرلەمانتارنى ئاکپارتى جەختیان لە پەرەپێدانی زیاتری پەیوەندییەکان و هاوکاری و هەماهەنگی نێوان هەردولا کردەوە و ئامادەی خۆیان و وڵاتەکەشی نیشاندا بۆ هەر هاوکاری و هەماهەنگییەک لەگەڵ پارێزگای هەولێر. لەكۆبونەوەكەدا باس لە بارودۆخى عێراق بەگشتیى و هەرێمى کوردستان بەتایبەتى کرا و تیشک خرایەسەر هەڵبژاردنى ئەنجومەنى نوێنەرانى عێراق و پێکهێنانى حکومەتى نوێى عێراق.        

هاوڵاتی به‌ڕێوه‌به‌رایه‌تی پۆلیسی پارێزگای سلێمانی رایگەیاند:" بەمەبەستی پاراستنی ئاسایشی هاوڵاتیان سه‌رجه‌م هێزه‌كانیان لەرۆژانی نه‌ورۆزدا خستوەتە حاڵه‌تی ئاماده‌باشیه‌وه‌، بۆیە داوا له‌هاوڵاتیان ده‌كه‌ن خۆیان به‌دور بگرن له‌كاری نایاسایی و هه‌ڵگرتنی چه‌كی بێمۆڵه‌ت و ته‌قه‌ی خۆشی، بەپێچەوانەوە هه‌ركه‌سێك سه‌رپێچی یاسا بكات ده‌ستگیرده‌كرێت". ئەمڕۆ شەممە 19-3-2022، بەڕێوەبەرایەتی پۆلیسی سلێمانی لەراگەیەنراوێکدا ئاماژەی بەوەشکردووە، سه‌رجه‌م هێزه‌كانی سنوری پارێزگای سلێمانی به‌قه‌زاو ناحیه‌كانیشه‌وه‌ به‌سه‌رپه‌رشتی ڕاسته‌وخۆی به‌ڕێوه‌به‌ری پۆلیسی پارێزگای سلێمانی له‌حاڵه‌تی ئاماده‌باشیدان بۆ پاراستنی گیانی هاوڵاتیان و گه‌شتیاران. ئەوەش هاتووە، "داوا له‌هاوڵاتیان ده‌كه‌ین خۆیان به‌دور بگرن له‌كاری نایاسایی و هه‌ڵگرتنی چه‌كی بێمۆڵه‌ت و ته‌قه‌ی خۆشی چونكه‌ هێزه‌كانمان له‌سه‌رجه‌م شوێنه‌كان بڵاوه‌یان پێكراوه‌، هه‌ركه‌سێك سه‌رپێچی یاسا بكات ده‌ستگیرده‌كرێت و لێپێچینه‌وه‌ی یاسایی له‌گه‌ڵ ده‌كرێت". پۆلیسی سلێمانی ئەوەشی خستوەتەڕو، "داوا له‌هاوڵاتیان ده‌كه‌ین، وه‌ك چۆن هه‌میشه‌ هاوكاری هێزه‌كانمان بوون، ئێستاش هاوكارمان بن به‌ئاگاداركردنه‌وه‌مان له‌هه‌ر سه‌رپێچییه‌ك و هه‌ر گومانێك كه‌ ده‌كرێت بۆ نانه‌وه‌ی پشێوی، په‌یوه‌ندیمان پێوه‌ بكه‌ن." هێڵه‌ گه‌رمه‌كانی به‌ڕێوه‌به‌رایه‌تی پۆلیسی پارێزگای سلێمانی : 104 به‌شی پۆلیسی فریاكه‌وتنی سلێمانی  105 به‌شی پۆلیسی نه‌هێشتنی تاوانی سلێمانی

  هاوڵاتی پارێزگاری هەولێر رایگەیاند:" چاوەڕێ دەکرێت لە رۆژانی نەورۆزدا زیاتر لە 200 هەزار گەشتیاری دەرەوەی هەرێم سەردانی شوێنە گەشتیارییەکانی پارێزگای هەولێر بکەن". دەڵێت:" بردنی چەک بۆ سەیرانگەکان و تەقەکردن بەهەموو شێوەیەک قەدەغەیە". ئەمڕۆ شەممە 19-3-2022، ئومێد خۆشناو پارێزگاری هەولێرلە كۆنگرەیەكی رۆژنامەوانیدا رایگەیاند:" سبەی یەکشەممە لەکاتژمێر 4:00ی ئێوارەی ئاهەنگی نەورۆز لە پارکی شاندەر دەکرێتەوە و مەشخەڵی ئاگر دادەگیرسێنرێت، هەروەها لیژنەی ئەمنی پارێزگا و ڤیستیڤاڵی نەورۆزی هەولێر هەمو ئامادەکارییەکانیان تەواوکردوە. ئاماژەی بەوەشکرد، لەچەند رۆژی رابردودا رۆژانە تەنها لەبازگەکان زیاتر لە 10 هەزار کەس لەناوچەکانی ناوەڕاست و خواری عێراقەوە ڕویان لە سنوری پارێزگای هەولێر کردوە، بەوهۆیەش لە زۆرێک لە هۆتێل و شوێنە گەشتیارییەکان هیچ جێگایەک بۆ پێشوازی لە گەشتیاران نەماوە، هەروەها چاوەڕێ دەکەن لە رۆژانی نەورۆزدا 200 هەزار گەشتیار سەردانی هەولێر بکەن. پارێزگاری هەولێر ئەوەشی خستەرو، بۆ رۆژانی نەورۆز هێزە ئەمنییەکان، بەڕێوەبەرایەتی هاتوچۆی هەولێر، تەندروستی، گەشتوگوزار و سەرجەم لایەنەکانی دیکە لە ئامادەباشیدان بۆ ئەوەی هاوڵاتیان سەیران و نەورۆزێکی ئارام و سەقامگیر ئەنجام بدەن.

هاوڵاتی بەریتانیا رایگەیاند:" هیچ وڵاتێک بەهۆی هەرەشەکانی روسیاوە پاریزراو نیە و لە هەوڵدان بۆ سەپاندنی سزای زیاتر بەسەریاندا. جەختیش دەکاتەوە لەوەی کە روسیا لە داگیرکردنی ئۆکرانیا شکستی هێناوە.  بەپێی هەواڵێکی  ئاژانسی هەواڵی ئەلعەرەبییە، بین واڵاس، وەزیری بەرگری بەریتانیا رایگەیاندووە، کە وڵاتەکەی هاوکاری گەورەی پێشکەش بە ئۆکرانیا کردووە وەک لایەنی مرۆیی و موشەکی دژە فرۆکە. هەروەها جەختی کردەوە کە هیچ وڵاتێک بەهۆی هەرەشەکانی رووسیاوە پارێزراو نییە. هەروەها دەشڵێت، لەندەن سەربازی رەوانی سنوورەکانی پۆڵەندا کردووە بە مەبەستی هاوکاری کردنی ئۆکرانییەکان لەسەر سنوور.  لە لایەکی دیکەوە، پریتی باتێل، وەزیری ناوخۆی بەریتانیا دەڵێت، حکومەت و گەلی بەریتانیا لەوە تێگەشتوون کە پۆتین شکستی هێناوە لە داگیرکردنی ئۆکرانیادا.  سەبارەت بە سزادانی رووسیاش لە لایەن بەریتانیاوە، وەزیری ناوخۆی ئەو وڵاتە ئاماژەی بەوە کرد، وڵاتەکەی بەردەوام دەبێت لە سزادانی رووسیا و بریاردراوە یاسایەک لە پەرلەمان دەربکەن بۆ سەپاندنی سزای زیاتر.  هەروەها وتیشی، سزایان بەسەر زیاتر ل هەزار کەس و لایەنی روسی سەپاندووە، کە قەبارەی زیانە ئابوورییەکانیان زیاترە لە یەک ترلیۆن و 318 ملیار و 99 ملیۆن دۆلار. تا دێت سزاکان بۆ سەر رووسیا زیاتر دەبێت، هەرچەندە روسەکان دەڵێن "تەنها پارێزگاری لە ئاسایشی وڵات دەکەین"، بەڵام زۆرینەی وڵاتانی جیهان ئەو لەشکرکێشییەی رووسیا بە دەستدرێژی ناودەبەن و هەریەک لە وڵاتانی یەکێتی ئەوروپا و ئەمریکا جەخت دەکەنەوە لەوەی، "فلادیمیر پۆتین-ی سەرۆکی رووسیا تاوانباری جەنگە و بە فەرمانی ئەو خەڵکی بێتاوان و سڤیل دەکوژرێت."

هاوڵاتی بەڕێوەبەری گەشتوگوزاری سلێمانی ڕایگەیاند:" بەپێی ئامارە سەرەتاییەکان، لە ماوەی 3 رۆژی رابردوودا زیاتر لە 20 هەزار کەس هاتوونەتە سنووری پارێزگای سلێمانی". عەلی رەئووف، بەڕێوەبەری گەشتوگوزاری سلێمانی لە كۆنگرەیەكی رۆژنامەوانیدا ڕایگەیاند:" لیژنەکانمان لەنێو شار لە بەدواداچووندان، چاودێری رەوشی بازاڕ و هۆتێل و مۆتێل و رێستورانتەکان دەکەن. لە بازگەکانی تاسڵوجە و عەربەتیش لیژنەی پێشوازیمان هەیە بۆ پێشوازیکردن لەو هەموو ئەو گەشتیارانەی دێنە سنووری پارێزگای سلێمانی". سەبارەت بە ئاماری چوونی گەشتیاران بۆ سنووری پارێزگای سلێمانی، عەلی رەئووف وتی: "لە دوای 15ـی 3ـەوە تاوەکو 25ـی 3 ئامارەکان وەردەگرین، بەڵام بەپێی ئامارە سەرەتاییەکان، لە ماوەی 3 رۆژی رابردوودا زیاتر لە 20 هەزار کەس هاتوونەتە سنووری پارێزگای سلێمانی". بەڕێوەبەری گەشتوگوزاری سلێمانی وتیشی: "پێشبینی هاتنی گەشتیارێکی زۆر دەکەین؛ بەپێی ئەو بەدواداچوونەی ئەمشەو لە هۆتێلەکانی پارێزگای سلێمانی کردوومانە، 80٪ـی هۆتێل و مۆتێلەکان خەڵک و میوانی لێبووە، پێشبینی دەکەین ئەمڕۆ سەرجەم هۆتێل و مۆتێل و شوێنە گەشتیارییەکان پڕبن لە میوان".

هاوڵاتی وەزارەتی بەرگری روسیا ڕایگەیاند:" دوێنێ هێزەکانیان بۆ یەکەمینجار لە هێرشەکەی ئۆکرانیادا موشەکی دەنگبڕیان لەجۆری "Kinzhal"یان بەکارهێناوە و بەهۆیەوە کۆگایەکی سوپای ئۆکرانیا لە رۆژئاوای ئەو وڵاتە لەناوبراوە. ئەوەش هاتوە، کۆگا سەربازییەکەی ئۆکرانیا لەژێر زەویدا لە گوندی دیلاتینی ناوچەی فرانكيفسكدا بوە و سەرجەم چەک و کەلوپەلەکانیش لەناوبراون. ئەمرۆ 24 رۆژ تیدەپەرێت بەسەر ئۆپەراسیۆنی روسیا بۆ سەر خاكی ئۆكرانیا، بەپێی ئامارەكانی وەزارەتی بەرگری ئۆكرانیا تائێستا زیاتر لە 14هەزار سەربازی روسیا كوژراوە.

هاوڵاتی بەڕێوەبەرایەتی هاتووچۆی سلێمانی ڕایگەیاند:" سەرجەم کامێراکانی چاودێری خێرای لە ناوشارو ڕێگاوبانەکانی دەرەوەو ناوچە گەشتیارییەکانی دەستنیشان کراوەو بە خشتەیەک دادەنرێن. ئەمڕۆ شەممە 19ی ئازاری 2022، لە راگەیاندراوێکدا بەڕێوەبەرایەتی هاتووچۆی سلێمانی بڵاویکردەووە، ''پاش زنجیرەیەک لە کۆبوونەوە بەسەرپەرشتی بەڕێوەبەری هاتووچۆی سلێمانی لەگەڵ سەرجەم بەڕێوەبەری بەش و هۆبە و بەڕێوەبەرێتییەکانی ناوشار و دەرەوەی شار و سەرجەم ئەو ناوچانەی کە گەشتیار و سەیرانگاکان و هاوڵاتییان بە گشتی ڕووی تێدەکەن، بە پلانێکی تۆکمە و گونجاو و دیراسەکراو ئەرکەکانی دابەش کراوە، بەڕەچاوکردنی هەموو ئەگەرە هاتووچۆییەکان و بەهەماهەنگی لەگەڵ لایەنە پەیوەندیدارەکان و هێزەکانی ئاسایشی ناوخۆ و گەشت و گوزار. هەروەها بۆ نەهێشتنی دیاردەی سەرکێشی و دیاردەی خێرایی کە هۆکاری ڕووداوە نەخوازراوەکانە.'' ئاماژە بۆ ئەوەشکراوە، ''سەرجەم کامێراکانی چاودێری خێرای لە ناوشارو ڕێگاوبانەکانی دەرەوەو ناوچە گەشتیارییەکانی دەستنیشان کراوەو بە خشتەیەک دادەنرێن.'' ئەوەشخراوەتەڕوو، ''ئەو لەمپەڕە پلاستیکییانەی بەردەم بازگەو خاڵەکانی پشکنین (بەشێوەیەکی کاتی) دانراوە لادەبرێت بەمەبەستی نەهێشتنی دیاردەی قەتیس بوون و ڕیزبەندی ئوتومبیلەکان لەکاتی گەڕانەوەی شۆفێران لە سەیرانگاکاندا.'' باس لەوەشکراوە، ''وێڕای کاراکردنی تیمی فڕۆکەوانی هاتووچۆی سلێمانی بۆ چاودێریکردنی ڕەوشی هاتووچۆ و پێدانی زانیاری دۆخی قەرەباڵغی ڕێگاوبانەکان بە کۆنترۆڵی هاتووچۆ بەمەبەستی چارەسەری خێرا و گونجاو بۆ هەر پێشهاتێک. بەرچاوڕوونی تەواو دراوە بە ئەفسەران و کارمەندانی هاتووچۆ بە هاوکاری تەواوی هاوڵاتییان بە گشتی و بە شۆفێران بە تایبەتی، وە هەماهەنگیکردن لەگەڵ سەرجەم دام و دەزگاکانی راگەیاندن لەم ڕووەدا.'' هاتووچۆی سلێمانی داوا لە شۆفێران دەکات هاوکارمان بن لەسەرخستنی پلان و کارەکانمان کە ئامانجی سەرەکیمان فەراهەمکردنی ڕەوشێکی هاتووچۆیی لەبار و ئارام و سەلامەت بە پابەندبوونیان بەکۆی گشتی یاساو ڕێنماییە هاتووچۆییەکان و خۆیان بەدووربگرن لە خێرایی لێخوڕین وە مەیخواردنەوەی شۆفێران بەتایبەتی.''

هاوڵاتی وەزیری دەرەوەی عێراق، ڕایگەیاند:" پاڵپشتی لەو دەکەین کە ھەوڵە دیپلۆماسییەکان بە ئامانجی گەیشتن بە چارەسەرێکی سیاسیی و کۆتایی ھێنان بە ھێرشی روسیا بۆسەر ئۆکرانیا چڕتر بکرێنەوە. فوئاد حوسێن، وەزیری دەرەوەی عێراق، پێشوازیی لە باڵیۆزی بەریتانیا لە عێراق، مایک برایسۆن ریچاردسۆن کرد، وەزارەتی دەرەوەی عێراق بڵاویکردەوە لە دیدارەکەدا، پەیوەندییە دووقۆڵییەکانی نێوان عێراق و بەریتانیا تاوتوێ کراوە، ھەروەھا لەبارەی چۆنیەتی پتەوترکردنی ئاسۆی ھاریکارییەکانی نێوان ھەردوو وڵات لە سەرجەم بوارەکاندا، پەرەپێدان بە ھاریکارییە ئابوریی و بازرگانییەکان، پێکەوەکارکردن بۆ رووبەڕووبوونەوەی ئاڵنگارییەکان گفتوگۆکراوە. راشیگەیاندووە:" کە ھەردوولا باسیان لە پێشھاتەکانی جەنگی روسیا- ئۆکرانیا کردووە و لەو بارەیەوە فوئاد حوسێن جەختی کردووەتەوە لەسەر ئەوەی کە عێراق پاڵپشتی لەو دەکات، ھەوڵە دیپلۆماسییەکان بە ئامانجی گەیشتن بە چارەسەرێکی سیاسیی، ھێورکردنەوەی رەوشەکە، کۆتایی ھێنان بە ھێرشی روسیا بۆسەر ئۆکراینا چڕتر بکرێنەوە. باسی لەوەش کردووە:" کە دوایین پێشهاتە سیاسییەکانی عێراق و ھەوڵەکان بۆ پێکھێنانی حکومەتی نوێی خراوەنەتە بەرباس و لەوبارەوە جەخت کراوەتە لەسەر ئەوەی کە پێویستە حکومەتی نوێی عێراق بەپێی بنەماکانی دیموکراسی لە چوارچێوەی دەستووردا، متمانەی ئەنجومەنی نوێنەران بەدەستبھێنێت.

  هاوڵاتى سەرۆکی ئۆکرانیا  دەڵێت:" جەنگی نادادپەروەرانە و دوژمنکارانە هەمیشە باجێکی قورسی بۆ دوژمنکار دەبێت". ئەمڕۆ شەممە 19ی ئازاری 2022، لە پەیامێکی ڤیدیۆییدا، سەرۆکی ئۆکرانیا  وتی: "جەنگی نادادپەروەرانە و دوژمنکارانە هەمیشە باجێکی قورسی بۆ دوژمنکار دەبێت." زیلینسکی داوای کرد سزاکانی سەر روسیا قورستر بکرێن، هەروەها داوای لە سەرکردەی وڵاتە هاوپەیمانەکانی کرد دژە مووشەکی زیاتر بۆ وڵاتەکەی بنێرن، لەبەرئەوەی بە وتەی خۆی، "ئۆکرانیا  وەکو پێویست چەکی بەرپەرچدانەوەی ئاسمانی نییە." لە بەشێکی دیکەی پەیامە ڤیدیۆییەکەیدا سەرۆکی ئۆکرانیا  ئاماژە بەوە دەکات، "ئەم شەڕەی روسیا دەبێتە کەوتنێک بۆیان، کەوتنێکی بە ئازار. سەرەڕای ئەو بێهۆشکەرەی لەڕێگەی پڕوپاگەندەی تەلەڤزیۆنیشەوە بە خەڵک دەدرێت، هەست بە ئازارەکەی دەکەن." زیلینسکی باسی لە دۆخی شاری ماریۆپۆلی باشووری وڵاتەکەی کرد کە تێیدا دەیان کەس پەنایان بۆ ژێرزەمینەکانی هۆڵێكی شانۆ بردووە و رۆژی چوارشەممە کرایە ئامانج.  سەرۆکی ئۆکرانیا  وتی، زیاتر لە 130 کەس لە هۆڵی شانۆکە رزگارکراون، بەڵام دەیانی دیکە بەهۆی داروپەردووی هۆڵە رووخاوەکەوە ناتوانن دەربچن. 

هاوڵاتی  ئەندامی دەستەی هاوسەرۆکایەتی پەیەدە رایگەیاند خۆیان ئامادە دەكەن بۆ رزگاركردنی عەفرین و دەڵێت:" خەڵکی عەفرین بەرخۆدان دەکەن گەلەکەمان شارە داگیرکراوەکانی بەجێنەهێشت بۆ ئەوەی هەمیشە پشتیوانی لە تێکۆشانی ئازادی بکات، لە نزیکەوە مایەوە". ئاڵدار خەلیل، ئەندامی دەستەی هاوسەرۆکایەتی پەیەدە له‌ لێدوانێكدا لە ساڵیادی داگیرکردنی عەفریندا به‌ ئاژانسی هەواڵی فوراتی راگه‌یاند:" بەداخەوە چوار ساڵە عەفرین داگیرکراوە، عەفرین برینێکە کە هەمو رۆژێک لە رۆژەڤی ئێمەدایە، بۆ رزگاکردنی عەفرین ئێمە بیر دەکەینەوە، کار دەکەین و خۆمان ڕێکدەخەین، دوژمن، عەفرین، سەرێکانی، گرێ سپی، ئیدلب، جەرابلوس، عەزاز و باب، هەروەها زۆر هەرێمی دیکەی سوریای داگیر کردوە، ئەگەر دەرفەتێک ببینن هەرێمی دیکەش داگیر دەکەن". ئەندامی دەستەی هاوسەرۆکایەتی پەیەدە ئاماژه‌ی به‌وه‌شكرد: "لەو ناوچە داگیرکراوانەدا ئامانج بۆ لەناوبردنی گەلی کورد و کەلتوری دیموکراتی بو، ناوچە داگیرکراوەکان بۆ ڕاهێنانی چەتەکان و بڵاوکردنیان لە سەرتاسەری جیهاندا گۆڕدراوە، بارەگای ناوەندی دڕندەیی لە دەرەوەی مرۆڤایەتی لەم ناوچانەدا هەیە، سیاسەتی قڕکردن بۆ لەناوبردنی کەلتوری گەلەکەمان و گۆڕانی دیمۆگرافی و ناسنامە پەیڕەو دەکرێت". ئاڵدار خەلیل باسی له‌وه‌شكرد: "خەڵکی عەفرین بەرخۆدان دەکەن گەلەکەمان شارە داگیرکراوەکانی بەجێنەهێشت بۆ ئەوەی هەمیشە پشتیوانی لە تێکۆشانی ئازادی بکات، لە نزیکەوە مایەوە، بە تایبەتی سڵاو لە خەڵکی عەفرین لە شەهبا دەکەم، بەڕاستی وشەکان بەس نین بۆ ئەوەی باسی بەرخۆدانیان بکرێت، ماوەی چوار ساڵە لە حەلەب و شەهبا لە هەلومەرجێکی زۆر سەختدان، گەلەکەمان لە کەمپەکاندا، گەلەکەمان لە سەرێکانی و گیرێ سپیش لە دۆخێکی سەختدان، چاوەڕێی ڕۆژی ڕزگارین و خۆیان دەکەنە هێزێکی ڕزگاری، ئەوان بەم ڕۆحەوە کار دەکەن".   

  عەمار عەزیز – دهۆك فەرماندەیی پۆلیسی قەزای شەنگال لە 16 مانگەوە بڕیاری سەپاندنی قەدەغەی هاتووچۆ  تا کاتێکی نادیار ڕاگەیاند. قەدەغەی هاتووچۆ لەکاتژمێر12ی شەو تا6 ی بەیانی هەموو رۆژێک دەبێت، بڕیارەکە لەسەرانسەری قەزایەکە جێبەجێ دەکرێت. سەرچاوەیەک لە پولیسی قەزای شەنگال تایبەت بە هاوڵاتی ی وت:" قەدەغەی هاتووچۆ بۆ ئۆتۆمبێل هاوڵاتیان وبازاریشه، دەبێت هەموو کەسێک پێگیر بێت و قەدەغە نەشکێنێت". ئەو سەرچاوەیە ئەوەشی بۆ هاوڵاتی ئاشکرا کرد، پێش چەند رۆژێک کۆمەڵێک کەس رۆمانەی دەنگی یان تەقاندەوە. هەروەها خاڵێکی ئەمنی لەشەنگال رووبەروی هێرشی بۆمبی دەنگی بووەتە و وتی:" ئەم جۆرە حاڵەتانە وایکرد بەرێوەبەرایەتی پۆلیس بڕیاری قەدەغە دەربکات" . لەبارەی كاتی كۆتایهاتنی قەدەغەی هاتووچۆش سەرچاوەكە جەختی لەوەكردەوە: "کاتی هەڵوەشاندنەوەی قەدەغەی هاتۆچوو دیارنیە، لەوانەیه مانگێک بیت یان چەند حەفتەیەک ئەوە دەمێنێتەوە سەر بڕیاری دەزگا ئەمنیەکان، هەرکاتێک پێیان باشبۆ قەدەغەی هاتوچۆو هەڵدەگیرێت".