هاوڵاتی نيوه‌ڕۆى ئه‌مڕۆ دووشه‌ممه 2022/10/10 نێچيرڤان بارزانى، سه‌رۆكى هه‌رێمى كوردستان، پێشوازى له عه‌لى ڕه‌زا گوينه‌ى، باڵيۆزى توركيا له عێراق و شاندێكى ياوه‌رى كرد. له كۆبوونه‌وه‌يه‌كدا بره‌ودان به په‌يوه‌ندييه‌كانى عێراق و هه‌رێمى كوردستان له‌گه‌ڵ توركيا به‌تايبه‌تى له بوارى ئابوورى و ئالوگۆڕى بازرگانى و هاريكاريى هاوبه‌شدا، دوايين په‌ره‌سه‌ندنه‌كانى پرۆسه‌ى سياسى، پرسى هه‌ڵبژاردنى سه‌ركۆمار و هه‌وڵه‌كانى پێكهێنانى حكوومه‌تى نوێى فيدراڵيى عێراق، تاوتوێ كران. هه‌ردوولا هاوڕا بوون له‌سه‌ر گرنگيى پاراستنى سه‌قامگيرى و ئاشتى له عێراق كه كاريگه‌رى به‌سه‌ر ئارامى و سه‌قامگيريى ناوچه‌كه‌دا هه‌يه، هه‌روه‌ها تيشكيان خسته سه‌ر ته‌حه‌دييه‌كانى قۆناغى ئێستاى عێراق و چۆنيه‌تيى تێپه‌ڕاندنيان به هاريكاريى نێوان پێكهاته و لايه‌نه سياسييه‌كانى وڵات و سوودوه‌رگرتن له ده‌وڵه‌مه‌نديى سه‌رچاوه مرۆيى و سروشتييه‌كانى عێراق. گفتوگۆ و ڕاگۆرينه‌وه ده‌رباره‌ى دوايين ڕووداو و پێشهاته‌كانى ناوچه‌كه، ته‌وه‌رێكى ديكه‌ى كۆبوونه‌وه‌كه بوو.
.jpg)
هاوڵاتی وتەبێژی یەکێتی لەبارەی پێشنیازی تایبەت بە یەکلاکردنەوەی پرسی سەرۆککۆمار لە پەرلەمانی کوردستان رایگەیاند، نایانەوێت پرسی سەرۆککۆمار "بە زۆرینە و کەمینە" یەکلابکرێتەوە، بەڵکو دەبێت بە رێککەوتنی نێوان یەکێتی و پارتی بێت. وتیشی: "نە پارتی و نە یەکێتی هیچ کاتێک نەیان ویستووە پرسەکان بە زۆرینە و کەمینە یەکلابکەنەوە." رۆژی دووشەممە 10-10-2022، سۆران جەمال تاهیر، وتەبێژی یەکێتیی نیشتمانیی کوردستان به‌که‌ناڵی ڕووداوی ڕاگه‌یاند، ئەوان هەمیشە پێیان باش بووە هەموو بابەتێکی پەیوەندیدار بە کوردستان، عێراق و ناوچەکە "بە رێککەوتن و گفتوگۆ" یەکلابکرێتەوە.وتیشی: "یەکلاکردنەوەی پرسی نەتەوەیی و نیشتمانی بە تایبەت بۆ پۆستەکانی بەغدا کە پۆستی گرنگن، وەک وەزیری دەرەوەی عێراق، وەزیری دارایی، جێگری سەرۆکی پەرلەمان لە رابردوودا لە پەرلەمانی کوردستان یەکلانەکراونەتەوە تاوەکو ئێستا بۆ پەرلەمان بگەڕێینەوە؛ بۆیە باشترین چارەسەر ئەوەیە بە رێککەوتن پۆستی سەرۆککۆمار یەکلابکرێتەوە و پۆستەکە لای یەکێتی بمێنیتەوە." سۆران جەمال تاهیر وتیشی، شیعەکان نەچوونە پەرلەمانی عێراق تاوەکو بەربژێری سەرۆکوەزیران یەکلابکەنەوە؛ هەمان شت بۆ سووننەکانیش دروستە؛ وتیشی: "ئێمەش پێمان باشە هەموو لایەنەکان بەتایبەتی پارتی رەزامەندییان لەسەر بەربژێرەکەمان هەبێت و بۆ ئەوەی ئەو پۆستە بۆ یەکێتیی نیشتمانیی کوردستان بمێنیتەوە. ئەو کاتە بنەما و پرەنسیپی پێکەوە کارکردنمان دەپارێزین بۆ ئەوەی پێکەوە لە بەغدا و لە کوردستانیش کار بکەین." هه‌روه‌ها وتی: "ئێمە نامانەوێت پرسی سەرۆککۆمار یان هەر پرسێکی دیکە بە زۆرینە و کەمینە یەکلابکرێتەوە؛ هاوپەیمانیی رزگارکردنیی نیشتمان لە بەغدا سەرینەگرت، چونکە داوای حکومەتێکی زۆرینەیان دەکرد و لایەنەکانی دیکەش دەیانگوت، نەخێر کارکردن و هاوبەشی پێکەوە دەکەین، چونکە ئەو قۆناخە ئەوەی پێویستبوو. لە کوردستانیش لە زۆربەی بابەتەکان لە رابردوودا نە پارتی و نە یەکێتی نەیانگووتووە پرسەکان بە زۆرینە و کەمینە یەکلادەکەنەوە؛ ئێمەش کار بەزۆرینە و کەمینە ناکەین، چونکە ئەو بابەتە لە رابردوودا کاری پێنەکراوە." وتەبێژی یەکێتی لەبارەی ئەگەری رێککنەکەوتنیان لەگەڵ پارتی لەسەر بەربژێرێکی هاوبەش و قۆناخی دوای ئەوە وتی: بژاردەی یەکێتی دوای رێککنەکەوتن لەگەڵ پارتی هەر رێککەوتنە، واتا هیچ جێگرەوەیەکی دیکە نییە. لەبارەی ئەگەری دووبارەبوونەوەی سیناریۆی 2018، سۆران جەمال تاهیر وتی، ئەگەر پارتی و یەکێتی رێکنەکەون، ئەو کاتە "دڵتەنگییەک" دروست دەبێت، "بەڵام بڕواناکەم ببێتە هۆکاری ئەوەی پەیوەندییەکانی یەکێتی و پارتی تێکبچن؛ هیوادارین نەگاتە ئەو قۆناخەش. پۆستەکە لای یەکێتی بمێنێتەوە هۆکار دەبێت بۆ ئەوەی پەیوەندییەکانمان لەگەڵ پارتی زیاتر گەشە بکەن." ئەم وتەیە دوای ئەوە هات رۆژی شەممە 8-10-2022، مەسرور بارزانی، سەرۆکوەزیرانی هەرێمی کوردستان لە دیداری پرسی کورد لە رۆژهەڵاتی نێوەڕاست رایگەیاند، دەکرێت کێشەی هێزە سیاسییەکانی باشووری کوردستان تایبەت بە پرسی سەرۆککۆمار لە پەرلەمانی کوردستان یەکلابکرێتەوە.
هاوڵاتی له‌ساڵیادی هه‌ڵبژاردنه په‌رله‌مانییه‌که‌ی ساڵی ڕابووردوو، سەرۆکوەزیرانی عێراق، مستەفا کازمی رایگەیاند کە پێویستە پەنابردن بۆ سندوقەکانی دەنگدان پەیوەست بێت بە باوەڕی ھێزە سیاسییە بەشدارەکانی پرۆسەکە بە بەھا دیموکراسییەکان و پراکتیزەکردنی کردەی سیاسی و داوایشی لە ھەموو لایەنە سیاسییەکان کرد کە لەڕێگای دیالۆگەوە، قەیرانی سیاسیی چارەسەر بکەن. مستەفا کازمی راگەیەندراوێکی لەبارەی تێپەڕبووبوونی ساڵێک بەسەر ئەنجامدانی ھەڵبژاردنەکانی پێشوەختەی ئەنجوومەنی نوێنەرانی عێراق بڵاوکردەوە و تیایدا ئاماژەی بەوەداوە کە لە رۆژێکی وەک ئەمڕۆدا و لە ١٠ی تشرینی یەکەمی ٢٠٢١ گرنگترین بەرنامەی حکوومەتەکەی جێبەجێکرد کە ئەوەیش ئەنجامدانی ھەڵبژاردنەکانی پێشوەختە بوو و ھاتووە "بە گەواھیی نەتەوە یەکگرتووەکان و ھەموو چاودێرانی پرۆسەکە، ھەڵبژاردنە پێشوەختە بەشێوەیەکی دادپەروەرانە و پیشەییانە ئەنجامدراوە". سەرۆکوەزیرانی عێراق راشیگەیاند کە ھەڵبژاردنەکانی پێشوەختەی ئەنجوومەنی نوێنەران لە ساڵی رابردوودا، لەسەر وڵامی داواکاریییەکانی گەل ئەنجامدرا. سەرۆکوەزیرانی عێراق ھەروەھا تیشکی خستووەتەسەر ئەوەی کە پاش تێپەڕبوونی ساڵێک بەسەر پرۆسەکە، ئەم ئەزموونە سەلماندی کە پەنابردن بۆ سندوقەکانی دەنگدان، پێویستە پەیوەست بێت بە باوەڕی ھێزە سیاسییە بەشدارەکانی پرۆسەکە بە بەھا دیموکراسییەکان و پراکتیزەکردنی کردەی سیاسیی، ئەوەیش لەچوارچێوەی کولتوور و بەھای دیموکراسیی. مستەفا کازمی ئەوەی وەبیرھێناوەتەوە کە لە میانی دوو ساڵی رابردوودا، سەرباری ئەو ھێرشە بێ وێژدانانەی کە کراونەتە سەر حکوومەت، بەڵام لە رێگای پەنابردن بۆ دیالۆگ و ھاریکاریی ھاوبەش لەگەڵ سەرجەم ھێزە سیاسییەکان لە پێناو نیشتمان و بەرقەرارکردنی رەوشەکە کاریان کردووە، ئەوەیش بە ئامانجی دامەزراندنی رۆشنبیرییەکی سیاسیی کە لەسەر بەھا دیموکراسییەکان بێت، ھەروەھا دژبە توندوتیژی و تاکڕەوی بێت، چونکە عێراق لە پێناو گەیشتن بە دیموکراسییەکەی ئێستا، بەرەوڕووی نەھامەتیی و ئاڵنگاریی زۆر بووەتەوە. سەرۆکوەزیرانی عێراق لە کۆتاییدا داوای لە ھەموو لایەن و ھێزە سیاسییەکان کردووە کە لە پێناو چارەسەرکردنی قەیرانی سیاسیی، پەنا بۆ لۆجیکی دیالۆگی بنیاتنەرانە ببەن. ئەمڕۆ دووشەممە ١٠ی تشرینی یەکەمی ٢٠٢٢، ساڵێک بەسەر ھەڵبژاردنەکانی پێشوەختەی خولی پێنجەمی ئەنجوومەنی نوێنەران تێپەڕدەبێت، بەڵام تا ئێستا بەھۆی بەردەوامی ناکۆکیی نێوان لایەنە سیاسییەکان نەتواندراوە، سەرکۆماری نوێ ھەڵبژێردرێت و حکوومەتی نوێیش پێکبھێندرێت.
.jpg)
هاوڵاتی وەزارەتی بازرگانی عێراق :سەبەتەی خۆراکی هاوڵاتییان دابینکراوەوە و مانگانە بەسەر هاوڵاتییاندا دابەشدەکرێت. ئەمڕۆ دووشەممە، عەلا جبوری وەزیری بازرگانی عێراق بە ئاژانسی فەرمی هەواڵێ عێراقی راگەیاند سەبەتەی خۆراکی هاوڵاتیان دابین کراوەوە مانگانە دابەشدەکرێت. هەروەها ڕاشیگەیاند سەرجەم حەوت مادە بنەڕەتییەکەی فاسۆلیا، برنج، دۆشاوی تەماتە، له‌تكه‌نۆک، رۆن، شه‌كر و نیسک لە خۆدەگرێت. باسیشی لەوە کرد جۆرێکی نوێی برنجی تایلەندی گەیشتووەتە وڵات و لەگەڵ شەش ماددە بنەڕەتییەکەی تر دابەشدەکرێت. ئەمە لەکاتێکدایە، لە رۆژی ٢٧ی ٧ی ٢٠٢١، دوای ١٥ ساڵ لە راگرتنی جارێکی دیکە ماددە زیادکراوەکانی بەشەخۆراکی مانگانەی هاوڵاتیان لە ژێرناوی سەبەتەی خۆراک گەیشتە هەرێم کە لە فاسۆلیا، برنجی هیندی، دۆشاوی تەماتە، له‌تكه‌نۆک، رۆن، شه‌كر و نیسک پێکهاتبوو.
.jpg)
هاوڵاتی لەبارەی دەستگیرکردنی دوو ڕۆژنامەنوس، لقی سلێمانی و سەندیکای ڕۆژنامەنوسان وسەنتەری میترۆ بۆ داکۆکی لەمافی ڕۆژنامەنوسان ڕوونکردنەوە دەدەن. کاروان ئەنوەر سکرتێری لقی سلێمانی سەندیکای ڕۆژنامەنوسانی کوردستان بە هاوڵاتی ڕاگەیاند، ئێمە ئێستا لە بەڕێوەبەرێتی ئاسایشی سلێمانین. بەمەبەستی سۆراخ کردنی ھەردوو رۆژنامەنووس سەرتیپ قەشقەیی و ئیبراھیم عەلی لە دەزگای بوار میدیا کە دەستگیر کراون. وتیشی، پاش دیدارو بینینی بەڕێوەبەری ئاسایشی سلێمانی روونکردنەوەی ھاوبەشمان لەگەڵ سەنتەری میترۆ دەبێت لەو بارەیەوە
هاوڵاتی محه‌مممه‌د حه‌لبووسی، سه‌رۆكی ئه‌نجوومه‌نی نوێنه‌رانی عێراق به‌یاوه‌ری محه‌ممه‌د شیاع سوودانی، كاندیدی چوارچێوه‌ی هه‌ماهه‌نگی بۆ پۆستی سه‌رۆكوه‌زیران و فاڵح فه‌یاز، سه‌رۆكی ده‌سته‌ی حه‌شدی شه‌عبی گه‌یشته هه‌ولێر. ئەمڕۆ دووشەممە، شاندێکى هاوپەیمانیى بەڕێوەبردنى دەوڵەت سەردانى هەولێرى پایتەختى هەرێمى کوردستان دەکەن و لەگەڵ مەسعود بارزانی سەرۆکی پارتی دیموکراتی کوردستان کۆدەبنەوە و ئامانج لە سەردانەکە بابەتی هەڵبژاردنی سەرۆککۆمار و پێکهێنانی حکومەتی نوێی عێراقە. ئەمەش لە کاتێکدایە یەکێتى بەرهەم ساڵح و پارتى رێبەر ئەحمەدى بۆ پۆستى سەرۆککۆمار بەربژێر کردووە. هاوپەیمانیی چوارچێوەى هاوئاهەنگى دەیەوێت دوو پارتە سەرەکییەکەی باشووری کوردستان زوو بگەنە رێککەوتن بۆ یەکلاکردنەوەى ئەو پۆستە کە هەنگاوى یەکەمى پێکهێنانى حکومەتە بۆ ئەوەى بەربژێرى سەرۆکوەزیران رابسپێردرێت بۆ پێکهێنانى حکومەت. ئه‌م سه‌ردانه له كاتێكدایه ئه‌مڕۆ ساڵێك تێده‌په‌ڕێت به‌سه‌ر ئه‌نجامدانی هه‌ڵبژاردنه‌كانی په‌رله‌مانی عێراق. له 10ی تشرینی یه‌كه‌م/ئۆكتۆبه‌ری 2021، هه‌ڵبژاردنی ئه‌نجوومه‌نی نوێنه‌رانی عێراق ئه‌نجامدرا كه 3249 كاندید بۆ 329 كورسی ئه‌نجوومه‌نی نوێنه‌رانی عێراق كێبڕكێیان كرد. له‌و هه‌ڵبژاردنه‌دا، زیاتر له 8 ملیۆن ده‌نگده‌ر له سه‌رتاسه‌ری عێراق به‌شدارییان كرد
.jpg)
هاوڵاتی هاوڵاتییەک دوای بەکارهێنانی بڕێکی زۆر لە ماددە کحولییەکان ئەمبوڵانسێک دەڕفێنێت. بەشی پۆلیسی فریاکەوتنی هەولێرلە ڕاگەیەندراوێکدا ڕایگەیاند دوای ئەوەی ئاگادار کرانەوە کەوا لە فەرمانگەی تەندروستی (کۆنتڕۆڵی ١٢٢) شوفێرێک کە پێشتر کارمەند بووە بەناوی (و. ا. ص) ئامبۆڵانسێکی بردووە و هەڵاتووە، دەستبەجێ دەستیان بە بەدواداچوون کرد و توانییان لە شەقامی (١٠٠ مەتری) نزیک نەخۆشخانەی ڕزگاری دەست بەسەر ئامبۆڵانسەکەدا بگرن و شوفێرەکەشی دەستگیر بکەن. تۆمەتباری ئاماژەپێکراو، کە بڕێکی زۆر لە ماددە کحولییەکانی بەکارهێنابوو، بەمەبەستی گرتنەبەری ڕێکارە یاساییەکان، ڕادەستی بنکەی پۆلیسی سەروەران کراوە.
.jpg)
هاوڵاتی دەزگای میدیای بوار لە ڕاگەیەندراوێکدا ڕایگەیاند پێشنیوەڕۆی دوێنێ یەکشەممە سەرنووسەروبەڕێوبەری نوسینگەی دەزگاکەیان لە کاتی گەڕانەوەیان لە هەولێرەوە بەرەو سلێمانی بێسەروشوێن بوون. دەزگای میدیای بوار ئەوەشی ڕاگەیاندووە پێشنیوەڕۆی یەك شەممە 9/10/2022، هەریەك لە سەرتیپ وەیسی قەشقەیی، سەرنووسەری دەزگای میدیای بوار و ابراهیم عەلی، بەڕێوەبەری نوسینی دەزگاكە بۆ كارێكی رۆژنامەوانی لە هەولێرەوە بەرەو سەنتەری شاری سلێمانی بەڕێكەوتوون. بەڵام لەكاتژمێر شەشی ئێوارەوە ژمارە مۆبایلەکانیان داخراوەو سۆراخیان نییە. هەروەها باسیشیان لەوە کردووە، سەرباری ئەوەی هیچ وەڵامێكیان نییە. ئەوەی بۆتە جێگەی گومانی ئەوان، كاتژمێر (9:24) نۆ و بیست و چوار خولەك لە رێگەی ئەكاونتی ابراهیم عەلی، ئەكاونتێكی تركراوەتە ئەدمین لە دەزگای میدیایی بوار لە تۆڕی كۆمەڵایەتی فەیس بووك. دەزگای میدیای بوار داوای لە هەر سێ سەرۆكایەتی و دامەزراوەكانی هەرێمی كوردستان و سەرجەم باڵیۆزخانەو كونسوڵخانەی وڵاتان لە عێراق و كوردستان لە پەیوەندیداین بۆ سۆراغی ئەو دوو هاوکارەیان.
هاوڵاتی بەهۆی خۆپیشاندان لە باکوری کوردستان و تورکیا بۆ ئۆجەلان 139 کەس دەستگیر کران بەهۆی خۆپیشاندانەکانی یادی 24ەمین ساڵی پلانی نێودەوڵەتی لە دژی ئۆجەلان لانیکەم 139 کەس لە شارەکانی باکوری کوردستان و تورکیا دەستگیر کران. ئاژانسی مێزۆپۆتامیا بڵاوی کردەوە؛ پۆلیسی تورکیا هێرشی کردوەتەوە سەر بەشدارابوانی خۆپیشاندانەکانەکانی یادی پلانی نێودەوڵەتی بۆ دورخستنەوە و دەستگیرکردنی عەبدوڵا ئۆجەلان، رێبەری پارتی کرێکارانی کوردستان (پەکەکە) و ژمارەیەک کەسی لە شەش شاری باکوری کوردستان و تورکیا دەستگیر کردوە کە ژمارەیەکیان پەرلەمانتاری هەدەپە-ن. پۆلیس بۆ رێگریی لە خۆپیشاندا هێرشی کردوەتە سەر گردبونەوەکانی شارەکانی رحا، جۆلەمێرگ،وان و ئامەد لە باکوری کوردستان و شارەکانی ئیزمیر و ئیستانبوڵ لە تورکیا. بە پێی زانیارییەکانی ئەو ئاژانسە زۆربەی پەرلەمانتاران و ئەندامانی رێکخرەی خۆپیشاندانەکانی پارتی دیموکراتی گەلان لەو شارانە دەستگیر کراون. ئەمڕۆ 24 ساڵ تێدەپەڕێت بەسەر (9/10/1998) کە بە پلانی نێودەوڵەتیی بۆ دژایەتی عەبدوڵا ئۆجەلان رێبەری پەکەکە ناو دەهێنرێت، ئۆجەلان ناچار کرا خاکی رۆژئاوای کوردستان جێبهێلێت و دواتر لە 15ی شوباتی ساڵی 1999 و بە پلانێکی هاوبەشی چەند دەزگایەکی هەواڵگریی دەستگیر و رادەستی تورکیا کرا تا ئێستاش لە زیندانی ئیمڕاڵی لەو وڵاتە بەند کراوە.
هاوڵاتی به‌پێی ڕاگه‌یه‌ندراوێک ناوەندی ڕاگەیاندنی هێزەکانی سوریای دیموکرات بانگه‌شه‌یه‌کی دەوڵەتی تورکیا ڕه‌تده‌کاته‌وه و ڕایده‌گه‌یه‌نێت شەھیدبوونی ھەشت شەڕڤانیان درۆیە. ناوەندی چاپەمەنی و ڕاگەیاندنی هێزەکانی سوریای دیموکرات (هه‌سه‌ده) لە لێدوانێکی نوسراودا بانگەشەی دەوڵەتی تورکی داگیرکەری ڕەتکردەوە کە گوایە ھەشت شەڕڤانیان شەهید بوون. هه‌سه‌ده ڕایگەیاند، “وەزارەتی بەرگری دەوڵەتی تورکی داگیرکەر لە ٨ و٩ی تشرینی یەکەمدا ڕاگەیەندراوێکی بڵاوکردەوە و ڕایگەیاند، کە لەم ڕۆژانەدا هەشت شەڕڤانمان شەهید بوون ئەم بانگەشانە دوورن لە ڕاستییەوە. ئەوەش لە کاتێکدایە ماوەی ڕابردوو بەردەوام دەوڵەتی تورک شەھیدبوونی شەڕڤانانی ھەسەدە بڵاو دەکاتەوە.
هاوڵاتی د. دیندار زێباری ڕێکخەری ڕاسپاردە نێودەوڵەتییەکان لە حکومەتی ھەرێمی کوردستان رایگەیاند، بەھۆی بەکارھێنانی ماددەی ھۆشبەر زیاتر لە ٣ ھەزار کەس لە زیندانەکاندان. د. دیندار زێباری ڕێکخەری ڕاسپاردە نێودەوڵەتییەکان به‌که‌ناڵی (کوردسات نیوز)ی ڕاگه‌یاندووه: زیاتر لە ٣ ھەزار کەس بەھۆی بەکارھێنانی ماددەی ھۆشبەر خراونەتە زیندان و پێویستە سەنتەرێکی چارەسەرکردن بۆ ئەم زیندانییانە بکرێتەوە. لەبارەی زیندانییانی بادینان، دیندار زێباری وتی، داوامان لە کونسوڵخانەکان کردووە لیژنەی یاسایی بھێنن و لەگەڵ دادوەرەکانی ھەرێم دانیشتن بکەن لەسەر کەیسی زیندانیانی بادینان. دیندار زێباری ژمارەی بێسەروشوێنبووانی شنگالی ئاشکرا کرد و رایگەیاند، نزیکەی ٣ ھەزار ھاوڵاتی شنگال کە لەلایەن چەکدارانی داعش رفێندراون، تا ئێستا بێسەروشوێنن. لەبارەی رێژەی توندوتیژی بەرامبەر بە ژنان، دیندار زێباری وتی، ژنکوژی زیادی نەکردووە بەڵکو ھۆشیاری بۆ رێگریکردن لەو دیاردەیە زیادی کردووە. دیندار زێباری راشیگەیاند، "ھەرێم بەراورد بە وڵاتانی ڕۆژھەلاتی ناوەڕاست زۆرترین ئازادی تیایە لە ھەموو ڕویەکی ڕۆژنامەنوسی و مافی مرۆڤەوە."
هاوڵاتی باڵوێزی تورکیا له‌عێراق لە رێوڕەسمێکدا به‌ئاماده‌بوونی وه‌فدێکی حکومه‌تی هه‌رێم سه‌نته‌ری پێدانی ڤیزای تورکیا لە ھەولێر کرده‌وه‌و ڕایگه‌یاند له‌عێراق ڕۆژانه ٥ هه‌زار داواکاری وه‌رگرتنی ڤیزا پێشکه‌ش ده‌کرێت. عەلی رەزا گونەی باڵوێزی تورکیا له‌عێراق ئاماژەی بە کردنەوەی سەنتەرەکە کرد و رایگەیاند کە بە مەبەستی پەرەپێدانی خزمەتگوزارییەکان و باشترکردنی کوالێتی کارکردنمان، ھەروەھا بۆ رێگریکردن لە بازرگانییکردن بە ڤیزاوە، ئەم سەنتەرەمان کردەوە و لەمەودوا ھەموو ھاووڵاتییان دەتوانن لە رێگای ئەم سەنتەرەوە باشترین خزمەتگوزارییان پێشکەش بکرێت. باڵیۆزی تورکیا وتیشی: "لە کۆی ١٢ سەنتەری پێدانی ڤیزای تورکیا لە عێراق، رۆژانە پێنج ھەزار داواکاری وەرگرتنی ڤیزا پێشکەش دەکرێت و لە وەرزی ھاویندا ئەم رێژەیەیە بەرزبووەوە بۆ حەوت ھەزار داواکاری، توانیوومانە بە باشترین کوالێتی خزمەتگوزارییەکان پێشکەشی ھاووڵاتییان بکەین".
.jpg)
نوێنه‌ری حكومه‌تی هه‌رێمی كوردستان له ئێران رایگه‌یاند: ئه‌گه‌ر چالاكی هێزه چه‌كداره ئۆپۆزسیۆنه‌كانی ئێران له‌خاكی هه‌رێمه‌وه به‌رده‌وام بێت ئه‌وا حكومه‌تی هه‌رێم رێگه‌ی تر ده‌گرێته‌به‌ر. نازم ده‌باغ نوێنه‌ری حكومه‌تی هه‌رێمی كوردستان له چاوپێكه‌وتنێكدا له‌گه‌ڵ ئاژانسی ئیرنا رایگه‌یاندوه، نزیكه‌ی 20 رۆژ پێش ئێستا لیژنه‌ی ئاسایشی هاوبه‌ش له هه‌ولێر و تاران كۆبونه‌وه تیایدا برِیاردرا ئاسایشی سنوره‌كانی نێوانیان به‌هێز بكرێت، جه‌ختكرایه‌وه نابێت گروپه چه‌كداره ئۆپۆزسیۆنه‌كان چالاكیان هه‌بێت شاهیدی وه‌ستانی چالاكییه‌كانی ئه‌م گروپانه بوین تا چه‌ند رۆژی رابردوو كه روداوه‌كان له ناوخۆی ئێران سه‌ریانهه‌ڵدا. ده‌باغ راشیگه‌یاندوه: له كۆبونه‌وه‌ی شانده هاوبه‌شه‌كانی كونسوڵخانه‌ی كۆماری ئیسلامی ئێران و حكومه‌تی هه‌رێمی كوردستان، جه‌ختكرایه‌وه پێویسته باره‌گای گروپه كوردییه‌كان چۆڵ بكرێت، ئێمه‌ش چاوه‌رِێی جێبه‌جێكردنی ده‌كه‌ین باره‌گا سنورییه‌كان ده‌بێ چۆڵ بكرێن، حكومه‌تی هه‌رێم هه‌میشه رایگه‌یاندوه كه رێگه نادات له‌خاكه‌كه‌یه‌وه كاری دژ به ئاسایشی وڵاتانی دراوسێ ئه‌نجام بدرێت. ده‌باغ ئاماژه‌ی به‌وه‌شكردوه، گروپه كوردییه‌كانی ئۆپۆزسیۆنی ئێران ده‌یان ساڵه له‌هه‌رێمی كوردستانن توانیومانه تا راده‌یه‌ك كۆنترۆڵی چالاكیه‌كانیان بكه‌ین و پابه‌ند بین به رێككه‌وتنه‌كان، به‌ڵام به‌داخه‌وه هه‌ندێك گروپ و كه‌س هه‌ندێكجار خراپ به‌كاری ده‌هێنن، ئه‌گه‌ر پابه‌ندی هۆشدارییه‌كان نه‌بن سه‌باره‌ت به دوركه‌وتنه‌وه له چالاكییه چه‌كدارییه‌كانیان ئه‌وا به دڵنیاییه‌وه حكومه‌ت ئه‌مجاره‌یان برِیارێكی جدی له‌باره‌یانه‌وه ده‌دات. لێدوانەکەی دەباغ لە کاتێکدایە سوپای پاسدارانی ئێران هۆشداریی دابو, کە ئەگەر پارتەکانی رۆژهەڵاتی کوردستان مەترسیی بۆ دەسەڵاتی کۆماری ئیسلامی دروست بکەن ئەوا هاوشێوەی 28ی مانگ جارێکی دیکە هێرش دەکرێتە سەر بنکە و بارەگاکانی ئەو پارتە لە هەرێمی کوردستان. لە هێرشەکانی 28ی مانگی سوپای پاسداران بۆ سەر بنکە و بارەگاکانی هەرێم 17 کەس گیانیان لەدەستدا و زیاتر لە 60 کەسیش برینداربون.
.jpg)
ئه‌مڕۆ یه‌كشه‌ممه ٢٠٢٢/١٠/٩، به‌سه‌رۆكایه‌تیی د. ڕێواز فائق، سه‌رۆكی په‌رله‌مانی كوردستان و ئاماده‌بوونی د. هێمن هه‌ورامی، جێگری سه‌رۆكی په‌رله‌مانی كوردستان و منی نبی قه‌هوه‌چی، سكرتێری په‌رله‌مان، دانیشتنی ژماره (١١)ی ئاسایی خولی پایزه‌ی ساڵی چواره‌م له خولی پێنجه‌می هه‌ڵبژاردنی په‌رله‌مان به‌ڕێوه‌چوو. به‌پێی خاڵی یه‌كه‌می به‌رنامه‌ی كاری دانیشتنه‌كه، كه‌بریتی بوو له ده‌نگدان له‌سه‌ر پێشنیازه‌یاسای به‌رده‌وامبوونی خولی پێنجه‌می په‌رله‌مانی كوردستان-عێراق، به‌پێی بڕگه‌ی (پێنجه‌م) له مادده‌ی (٧٨)و مادده‌كانی (٧٩، ٨٠) له‌په‌یڕه‌وی ناوخۆی په‌رله‌مانی كوردستان، له‌لایه‌ن لێژنه‌ی كاروباری یاساییه‌وه، ڕاپۆرتی ده‌نگدان له‌سه‌ر پێشنیازه‌یاساكه به‌ڕه‌چاوكردن و جێكردنه‌وه‌ی ئه‌و سه‌رنج و تێبینی و پێشنیازانه‌ی له‌لایه‌ن ئه‌ندامانی په‌رله‌مانه‌وه له دانیشتنی پێشووتردا له كاتی خوێندنه‌وه‌ی دووه‌می پێشنیازه‌یاساكه خرابوونه‌ڕوو، به‌ناوونیشان و مادده‌كانی و هۆكاره‌كانی ده‌رچوواندنی به‌جیا خرانه ده‌نگدانه‌وه و په‌سند كران، پاشان كۆی یاساكه‌خرایه ده‌نگدانه‌وه و به‌ده‌نگی (٨٠) ئه‌ندامی په‌رله‌مان په‌سند كرا. یاسای به‌رده‌وامبوونی خولی پێنجه‌می په‌رله‌مانی كوردستان، له سێ مادده و هۆكاره‌كانی ده‌رچوواندنی پێكهاتووه و له‌لایه‌ن ژماره‌ی یاسایی ئه‌ندامانی په‌رله‌مانه‌وه پێشكه‌ش كرابوو، مه‌به‌ست له ده‌رچوواندنیشی ڕێگریكردنه له دروستبوونی بۆشایی یاسایی و به‌رجه‌سته‌كردنی پره‌نسیپی به‌رده‌وامیی دامه‌زراوه ده‌ستوورییه‌كانی هه‌رێمی كوردستان-عێراق، هه‌روه‌ها گه‌ره‌نتیكردنی به‌رژه‌وه‌ندییه گشتییه‌كان له به‌رده‌وامیی پیاده‌كردنی ده‌سه‌ڵاته‌كاندا و بۆ ته‌واوكردنی ڕێكسازییه یاسایی و كارگێڕی و هونه‌رییه‌كانی ئه‌نجامدانی هه‌ڵبژاردنێكی پاك و بێگه‌رد و جێمتمانه و ده‌سته‌به‌ركردنی تۆماری بایۆمه‌تریی پاك و بێگه‌رد و ڕه‌خساندنی ژینگه‌یه‌كی سیاسیی له‌بارتر بۆ هێنانه‌دیی یه‌كڕیزی و كۆده‌نگیی نیشتیمانی له‌پێناو ده‌سته‌به‌ركردنی مافی سه‌رجه‌م هاووڵاتییانی هه‌رێمی كوردستان له پیاده‌كردنی مافه‌كانی خۆپاڵاوتن و ده‌نگدان و فه‌راهه‌مكردنی هه‌لومه‌رجی ڕكابه‌ریی یه‌كسان له‌نێوان هه‌موواندا. به‌پێی خاڵی دووه‌م و كۆتایی به‌رنامه‌ی كاری دانیشتنه‌كه‌ش، كه به ئاماده‌بوونی ئالان حه‌مه‌سه‌عید، وه‌زیری په‌روه‌رده‌و د. سه‌یوان عه‌لی، بریكاری وه‌زاره‌تی په‌روه‌رده به‌ڕێوه‌چوو، له‌لایه‌ن لێژنه‌ی په‌روه‌رده و لێژنه‌ی كاروباری یاساییه‌وه، مادده‌كانی ( ١٦٦، ١٦٧، ١٦٨، ١٦٩، ١٧٠، ١٧١، ١٧٢، ١٧٣، ١٧٤، ١٧٥، ١٧٦، ١٧٧، ١٧٨، ١٧٩، ١٨٠، ١٨١) له پڕۆژه‌یاسای په‌روه‌رده و فێركاری، كه تایبه‌ت بوون به(حووكمه‌دارایی و گشتییه‌كان)، هه‌روه‌ها هۆكاره‌كانی ده‌رچوواندنی پڕۆژه‌یاساكه خوێندنه‌وه‌ی دووه‌میان بۆ كرا. له‌لایه‌ن ئه‌ندامانی په‌رله‌مانیشه‌وه چه‌ندین سه‌رنج و تێبینی و پێشنیاز له‌سه‌ر ئه‌و ماددانه و بڕگه‌كانیان و هۆكاره‌كانی ده‌رچوواندنی، به‌مه‌به‌ستی ده‌وڵه‌مه‌ندكردنی زیاتریان خرایه‌ڕوو، بۆئه‌وه‌ی له‌لایه‌ن لێژنه‌ی هاوبه‌شه‌وه ڕاپۆرتی ده‌نگدانی له‌سه‌ر ئاماده بكرێت به‌ڕه‌چاوكردنی ئه‌و سه‌رنج و تێبینی و پێشنیازانه. لای خۆشیه‌وه وه‌زیری په‌روه‌رده، به‌ناوی وه‌زاره‌تی په‌روه‌رده‌وه سوپاس و پێزانینی خۆیانی ئاراسته‌ی ده‌سته‌ی سه‌رۆكایه‌تیی په‌رله‌مان و لێژنه‌ی په‌روه‌رده و هه‌موو ئه‌وانه كرد كه پشتگیریی ئه‌و پڕۆژه‌یاسایه‌یان كرد، هه‌روه‌ها سوپاسی سه‌رجه‌م ئه‌ندامانی په‌رله‌مانی كرد كه به‌گفتوگۆكانیان له چه‌ند ڕۆژی ڕابردوودا له‌كاتی خوێندنه‌وه‌ی دووه‌می پڕۆژه‌یاساكه‌دا به‌مه‌به‌ستی ده‌وڵه‌مه‌ندكردنی زیاتری چه‌ندین سه‌رنج و تێبینی و پێشنیازیان خسته‌ڕوو، هه‌روه‌ها ڕوونكردنه‌وه‌ی پێویستیشی له‌سه‌ر سه‌رنج و تێبینی و پرسیاره‌كانی ئه‌ندامانی په‌رله‌مان له‌سه‌ر ئه‌و ماددانه و بڕگه‌كانیان كه له دانیشتنی ئه‌مڕۆدا خوێندنه‌وه‌ی دووه‌میان بۆ كرا، خسته‌ڕوو. به‌مجۆره سه‌رۆكی په‌رله‌مان كۆتایی به‌دانیشتنه‌كه هێنا.
هاوڵاتی پۆلیسی سلێمانی لە ڕاگەیەندراوێکدا هۆکاری گیانلەدەستدانی خێزانە چوار کەسییەکەی شاری سلێمانی ڕاگەیاند پۆلیسی سلێمانی ڕایگەیاند لەڕوداوێكدا چوار ئەندامی یەك خێزان بەیانی ئەمڕۆ لەماڵێكداو لە گەڕەكی جولەكان لە شاری سلێمانی بەهۆی تەزووی كارەباوە چوار ئەندامی یەك خێزان گیانیان لەدەستدا . وتیشی دوای گەیشتنی تیمەكانی بەڵگەی تاوانی بەڕێوەبەرایەتی پۆلیسی پارێزگای سلێمانی و بەڕێوەبەرایەتی ئاسایشی پارێزگای سلێمانی كەشف و هێڵكاری شوێنی ڕوداوەكە كرا و دەركەوت كە هەرچوار قوربانییەكە بەهۆی تەزوی كارەباوە گیانیان لەدەستداوە. هەروەها دوای بردنی تەرمەكانیشیان بۆ پزیشكی دادوەری ، هۆكاری گیانلەدەستدانەكەیان پشتڕاست كرایەوە كە بەهۆی تەزوی كارەباوە گیانیان لەدەستداوە . قوربانییەكان باوك و دایك و دوومنداڵی كوڕو كچیانن بەناوەكانی عادل مستەفا سەعید لەدایكبووی 1966 شعریە عەلی ئەمین لەدایكبووی 1972 محەمەد عادل مستەفا لەدایكبووی 1999 جوان عادل مستەفا لەدایكبووی 2002
.jpg)
.jpg)
